Ayupu nirya nyapmasina ara, weik mekwen akunum ceprobukopura, Nuh birye, deiamukba, el mapu ton, sikce deiamikba, dadeipdanin balamik nang arye, bokuka yala yuk-yuk wilibuka deipnin balamik touk, nyapmane. Aninye sik yala arye, deiyok kouamikba, bokukabikce, tukwak mutuku im sirya, mutuku sirya nirya binuka ulamik. Ninye tukwak nang nirya, sik apu yapu ara, aninye uka.
Amos 3:2 - Eipomek2 Ara, talye ati kume. Ninye mutuku-mutuku nirya aulamik bukni, anoutamak arye tonok yala nanguk, sik Israel nang ati, na Allah arye wiamsise. ‘Na tenena ninye unamak’ tenen, anggun wiamsise bukni, wini talak ara, anggunce tuba malye winin ninguk, pia weik arye tuba ululumba, elisunune ati, dipkoprob narye anggunti, weik arye wenebuka opnamsine. အခန်းကိုကြည့်ပါ။ |
Amos 3:2
37 ပူးပေါင်းရင်းမြစ်များ
Tonda, ‘Anye birye, el deipnamle mapu nirya ap, sikce deipnamak mapu nirya ap ati, “Allah el si Yahweh arye nyasilye yupu, pia moubuka talipmunce, el yupu uk dobolbanamlulume. Diksukumuk wininamlulume,” nyanamle’ tenen, nara Allah, na si Yahweh arye, Abraham akunum wipdeipse. Abraham arye nyapliba, el tam nang nirya arye aning atonun winibicopura, na Yahweh arye elti, ‘Winipnamkine,’ nyapdeipse yupu nirya dipkoprob winipnamne. Allah el si Yahweh arye Abraham biti tenebukce, ayupu nyabuk.
Nyabukce, ayupu ton nyabuk. “Wini talak ara, Musa anda, Israel ninye sik dam bimince, aninye bobuka bobimince, narye, ‘Ateleb mutuku arepnamkine,’ nyabuka, nyalin yupu nyapdeiamkise mutuku, anyuk binamlume. Ara, narye dopkwetepniba, na pil dona malaikat arye menekuka, melibuka balibuk, anggunda el aminyan tam bimunce, narye nukise mutuku binamlume. Unamlum bukni, sik malye winipmangu ninye ara, sapi basam urasin atonun, puturubuka memepdeibikce, aning si erenmek ning ati, na tenyamse talak akunum uplyopura, anang nirya ati, weik arye wenebuka opnamne,” Allah arye nyabuk.
Minop talak donirye dipdongobuka wini talak nirya ara, ikin ning noutamakuk ulamupa ati ara, yuk nang arye, nunti, ‘Anang ara, Allah el ‘Naʼ tenen, ninye kum unyake. Allah si erenyakba, elce aninye taliplirye, kalikuka melilul ninye kume,’ tenepsetinge. Ara, urdem ati, kume. Nun ikin unyap ning ap, an si eren aik ati malye nang arye, yanibuka malye kilinyaka ap ati nyababe. Ati, nun ni koproba Allah ance melipsilyame, nyakinyabe. Sik Israel ninye arye, ‘Se’ tenen, malye kanye bobuka, Allah ati morobik.
Nyabukce, ayupu ton nyabuk. “Ara, na Allah arye utam unyak ninye ap, sik weik deiyok nang ap, sikti, yukupniba, yanamak talak ara, na mikip sik deice arepnibuk, aninye mikip weik deice yakirye, Yerusalem mutuku nirya yanuka, alabuka doprobikirye unamake. Aninye deiyok nang nirya arye, sik ninye deiyok nang bulamak ning bobuka, Yerusalem mutuku weik cang keil poka dobuka, antanap dongobik poka dam deipnamake. Ara, apoka bublan mikip kipdeibikce, wekelbace bisik bublan dam ara, sik bulamak ning deipnamake. Winibikirye, sik nirya arye, Yehuda mutuku noutamak asik donyak mutuku nirya ap, amutuku unyak ninye ap, akeil deibuka dobik ning ap ara, sik ayanamak yu ninye aryuk, yanuka alapdobikirye unamake. Wininamak talak ara, amutuku nirya ati, malya kipnamake.
Allah an weik yu ara, doprapmince, an si kum kel bikamkik nang, yuk-yuk mutuku nang, sik deiceuk deipnalyame. Tonda, an yu weik upkilye ning ara, an si pia kum erekinyak nang, sik deiceuk, deipnalyame. Deiyok ara ani. Aning ara, sikce, an mapu koproba, Yakub birye deibukba, dadeipdanin yangalamupu nang obuka, akunum kum kipmanto kipsik. Tonda, anang arye nun unyap mutuku babye, sikce yatu obuka, sice buklopsika ati, moropkine na nio.” Nabi Yeremia birye, Allah ati nyabuka morobuk.
Na mutuku nang arye nyanyaka ati ara, ‘Allah Yahweh im deice yin talin malaikat nirya, sik deiyoknye ulula ati, elda mikip weiknye ulirye,’ nyapmasile. “Narye, sik Anatot mutuku nang ati, wenebuka opnamne. Sik mutuku unyak wel nang nirya ara, mal olan dam arye, ninye on parang ya arye, obikiba dipnamake. Tonda, anang sik mapu ap, kilmapu ap nirya ara, din patana deice arye dipnamake.
Na kayapu, anggun tenipdelulume! Allah arye lo arepliba, anggun mal olan nang arye yanuka, akunum obukapsikirye, talipsikcopura, anggunce yata nyaptum do? Min talak ara, anggunce, ‘Kume pera mutuku nang ara, nun kayapu nang unyaka ati, yuk mutuku nang arye, olyanganamsiak talak ara, anang arye, ton yanuka melipnasiake,’ tenelulum bukni, dipkoprob atalak ara, anang aryuk, anggunti olyanamsiake. Anang arye, yanuka opsikcopura, winipmanto ara, kil mi bolya ani, mi deiya dinmalyeba, uk dilamle touk, aminyan talak anggun ton, aning atonun kum winipsilya ati ikin kanye bobuka, kum upnamlum do?
Nyabukce, ayupu ton dukdongobuka nyabuk. Allah el si Yahweh arye nyapmasile. Anggun amutuku ululum Israel ninye ara, na dam arye batakuka, yukak tuba-tuba balulume. ‘Malye una ati, yukak bipyak’ tenen, anggun babye anggun bidamang ati, kel bikuka kum kalikildalulume. Talye luba kibuka, malyeuk winiluluma anya arye, anggunti, kanye kum deilisunune. Anggun malye winiluluma ati, lik unulula anya arye, na dam ton kum yanamlume. Ati ara, narye anggun malye winilulum ning nirya ara, namin kibuka kum batakdongopnamsine. Tuba tenenuna arye, anggun malye winimunye ning ati, wenebuka opnamsine. “Allah arye nyapdeipnuke,” Yeremia birye nyabuk.
Nyabukopura, ayupu ton dukdongobuka nyabuk. Nara, Allah Yahweh arye nyapsine. “Na dipkoprob nyapsine. Aminyan talak ara, sik tuba malyeuk wininyak nang nirya ati, weik tonun wenepnamsine. Sikda, yuk nang arye, nunti, ‘Allah el ‘Naʼ tenen nang unyake, ‘Tenenansiak’ tenen, min arye nyalamsise touk, anggun ninye den bol mouse tam sekelulum bukni, anggun talima noutam ara, malye winin ning, aupmasili buk winilulume. Aning atonun winilulum nang ara, aminyan talak anggun dengna dopropnalume.
Wenepsinirye, ikin deipnamsina deiyok ara, ani. Narye, ‘Aning ara, pia winina meme,’ nyapdeipse bukni, anggunce pia malye un ninguk talibuka umunce, talye ning ati, ‘Nun ni koproba anyeʼ tenen, isa si erelulume. Winimunya ati, anggun umunye mutuku noutam nirya ara, narye pia wenena ikin ning ton arepnamsine. Aning ara, tonok ning babye kum bataknamne. Minop talak arye, pia ton kum winyamse ning dobuka, anggun mutuku nang deice deipnamsine. Tonda winipyopura, aminyan dounamle talak ara, aning atonun, kanye imun weik ning ton, tuba ton ap, anggun deice pia kum deipnamsine.
Winipnalam talak ara, wisi nang ap, wisi kilapu ap, wel nang ap, wel kilapu ap, mitik mapu ap, kilmapu ap, sik nirya ara, opnamalyame. Winibuka opnalam bukni, aning moubuka kekepnamalulume. Yata nang do nirya, akain lenan ongopmalinye birye, ninye tonoknye babye, sik urasin deice lak kina ati, seken ning akunum sekdeipmalye nang ara, bol ton kum pipnamlume. Seken ning, sik urasin deice akunum wamlye nang ara, olana meme. Ati ara, wini talak asukum noutam arye, na si eren aik dam arye, deiyok koupnamalume,” Allah arye, sik yin talin nang ati nyabuk. Nyabuk talak aryuk, sikda ninye olana ati, deiyok koubikce, Israel nang ninye deiyok nang nirya, Allah el si eren aik urasin dam tikmek nang kan-kan arye, kong kibuka wipmekce, opnin banmekba eipse.
Ati ara, Allah ance nun ninye deiyok nang ap, nun Israel yala ninye nirya ap ati, “Na yupu yanipmumnyopura, dipkoprob wenepsinirye, ikin ning weika arye arepnamsine,” nyabuka, nyalin yupu deice nyamsulume. Ayupu nyapsulum touk, malye winilamupu ati, weik ikin ning, pia weik nun nong deice delilamsulume. Ara, Allah ance, Yerusalem mutuku noutamak unyak ninye nirya ati, weik kanye imun wenena ning wenyamsuluma deice arye, malye nang arye, Yerusalem mutuku ninye obuka sirya dakikce, amutuku aik ap, amutuku ning nirya ap dakuka, atu kiplomik ning ara, tukwak im sirya, mutuku sirya nirya unyak ninye noutamak ara, awinyamuk ning atonun ton, kum winiplume.
Aning nirya winipnamna deiyok ara, urdem ati kum winipnamne. Ara, asum-asum nirya, kam kum ulul ning, Isa Mutuku Dongonye el si Bahal atibuk, “Nun ni koprop,” nyabuka, el si erebikirye, siltong teleb ning boyakirye, uku dongobuka, el siuk eremunya ati, wenepnamsine. Tonda, amul potokuka dongolamak ning, el si ara, anting-anting ap, tonda karaklamak ning kalung ap nirya dobuka, ‘Nun tenenyap nang arye, urasin teleb kilapu tenenamsiyak’ tenen, ‘Nun tenenyap nang dan tam do?’ tenen, pia elbanyaka ati, Israel ninye wenepnamsine. Isa Mutuku Dongonye, el si Bahal, el siuk erebikirye, na Allah ati, batakaninyak dekna ati, na Allah Yahweh arye wenebuka opnamsine. Allah arye nyabukba, nabi Hosea kekebukce sekuk.
Nara Efraim yala ninye arye, wininyak ning nirya ara, na kele. Ara, Israel yala ninye nirya ati nyapsine. Anggunce nati bataknulumce, isa siuk ereluluma anya arye, winipmanto ara, kilapu arye, sik min domice nang, sik akanye yapu batakikirye, talye-talye yolamak kilapu winilamak touk, winilulume. Sik malye wininyak ning ara, ‘Nun ni Allah eibuka, kum biknamsil,’ tenelamik bukni, aning kum duknupmanto. Aning nirya dipkoprob na Allah elinune. Anggun Israel ninye nirya ara, malye weik winimunya deice arye, akunum malye winililaluluma anya arye, na dam kum yanutume.
Aning kum bukni, tonda, sik Israel nang arye, ‘Allah el si erebibirye, elti, si erebuka kinamapʼ tenen, kam ning obuka, boyanuka arelyanganinyake. Tonda, kam ning boyanuka, Allah ati yanuka arepnikirye, atup kalinyaka noutam arye, bokuka dinyake. Wininyaka babye, na Allah Yahweh ara, ‘Pia na lik,’ tenenuna ati, sikce areninyak ning ara, ‘Na likʼ tenen, kum dolonune. Ati wini talak ara, narye sik malye wininyak ning nirya ati, tenepnirye wenepnamane. Adeiyok ara, sik malye unyaka ati, weik tonun wenepnamne. Ati naryuk sik tamubuka, Mesir mutuku uk dopkwetepnamne!
Anggunce malye winilulum ning nirya ara, pia malye weik winilulume. Ara, sik Gibea mutuku nang arye, malye winin ning weik talibuka winilamikce, malye kipdeipdayik touk, anggun amutuku ululum Israel nang babye, atonun winilulume. Winiluluma ati ara, Allah arye anggun malye winilulum ning nirya ara, tuba tenipsilirye, wenepnamsile. Ara anggun malye winimunye ning atonun, dengna arepsilirye, wenepnamsile. Nabi Hosea birye, sik Israel yala nang ati nyabuk.
Allah Yahweh arye, ayupu ton dukdongobuka nyabukba, Amos birye kekebuk. “Sik Yehuda yala ninye arye, tuba-tuba weik arye malye wininyaka ati, dipkoprob narye, sik amutuku unyak ninye ati, wenebuka opnamne. Sik malye ulamik ning namin kiamsirye, adiparyuk wenebuka kum omse bukni, wini talak ara, sik malye winin ning weik wininyaka ati, aninye ara, opnamne. Aninye ati opnamne ning ara, pia dipkoprob kum bataknamne. Deiyok ara, sik Yehuda yala ninye ara, na Allah Yahweh arye, ‘Aning wininamlulume. Aning ara, kum wininamlulume,’ nyapdeiamse yupu nirya, batakuka yanilamikce, sikda asum-asum nirya, akunum pia malyeuk wininyake. Narye, nyapdeiamse yupu nirya ara, ‘Nun lik’ tenen, batakanauk ululuma ati, dipkoprob narye wenebuka opnamsine. Ara, talye ati kume. Sik deipkirikdop nang, si erelamik ning kwemdina ap, ninye arye puturubuka delinyak ning anyuk, si erenyaka deice arye, tilila yupu uk kekebuka talinyake. Na Allah arye nyapdeiamse ning ton kum tenekirye, malye winin ninguk tenenyaka ati, Yehuda yala ninye nirya wenebuka opnamne.
Tonda, winipmanto ning ara, moubuka tenipdelulume. Anggun kele, ninye bitinye nang arye, neiktoto barudake. Ara, sik abitinye nang ara, ‘Nun winipnamaname. Bisikuk neika binamaname,’ nyabuka, laka kum nyapdanmarikiryuk, tonok bisikuk barudak do? Kume, ‘Nun bitinye ara, abisikuk binuname,’ nyabuka, neika kum nyapdatiringopura, neika tonok bisikuk kum bitiringe. (Aning atouk, anggun ap, na ap, tonok kanye uk, kum boptipyopura, neika kum uptibye.) Allah arye nyapdeibukba, Amos birye kekebuk.
Allah arye nyabukba, Amos birye kekebuka sekuk yupu. Se, Sion mutuku noutam umunce, ‘Nunda telebuk ubuka unyabe’ tenen, talye kanye bobuka ululum ninye ara, bicoe nyapsine. Tonda, sik Samaria mutuku deice ukirye, ‘Ikin ning nun dam kum yatue’ tenen, teleb kanye bobuka, umunye ninye babye, anggun bicoe. Anggun nirya ara, malye umunye bukni, ‘Nunda teleb unyabe,’ tenelulum ning ara, Allah arye wenepsilirye, anggun deice ikin ning deipnamsila ati, anggunda bicoe. Sik Samaria mutuku nang ara, talye nang kume. Israel ninye nirya arye, sik si akunum kel bikamik. Tonda, Israel ninye nirya arye, ‘Nun ni yapu arye, kalikuka melinamsiyak’ tenen, sikti, kanye deibuka dikirye, ‘Nun melipsilyame,’ nyabuka moronyake. Bukni, sik nirya ara, bicoe nyapne.
Sik malye winin ning deiyokuk talibuka unyak nang ap, ‘Nunda mikip nang unyabe,’ tenenyak nang ap, pia malye weik wininyaka ati, Allah el si Yahweh arye nyasulule. Kume, anggun pia malye-malye weik winimunya ati, narye anggun wenena ati, anggun nong deice, ikin weik ning delinamsine. Aikin ning anggun nong deice deipnamsin talak ara, anggunce lyepdamunce, ton kum binamlume. Anggun bidamang kum lyepdatume. Anggunce, bona utotoa talina kum ninye nirya ati, ikin ning, sik nong deice delilamlum touk, narye anggun nong deice babye, ikin weik ning deipnamsine. Anggun malye winilulum ninye nirya ara, ikin ninguk dolonamlulume. Kanye imun weik ning arepsinyopura, aminyan talak nirya ara, anggun kanye talima erena deice erepdanuka kwalibuka erelamunye touk, tuba tonap pia kum wininamlulume. Anggun malye winilulum ninye nirya ara, anggun malye kanye bobuka, alye dakdamunce, unamlume.
Se, anggun Niniwe mutuku ninye, anggunda ninye arye, talye yolamak kilapu atonun ululuma ati, narye wenen ning arepnamsine. Anggunce malye-malye winilulum ning ara, ani. Ara, talye yolamak kilapu nirya arye, sik urasin pia teleb kipdakirye, yuk ninye ati, kanye delin yupu ap, una ap, winilamaka atonun, anggunce yuk-yuk mutuku nang ati, ‘Nun tam kipdopnamlume,’ nyabuka, kanye delin yupu nyalamlume. Tonda, yuk mutuku ning nirya, ‘Nun tam yatingba, optepyeʼ tenen, teleb yupu nyabuka, sik lilolamlumba, yuk-yuk mutuku nang, anggun tam kepropbikba, olamrume. Akanye delin yupu ap, ninye ona ap, winilamluma deice arye, yuk-yuk mutuku nang, weik malye kilamlumce, Israel mutuku nang babye dobuka, anggun mutuku bobinamlume.
‘Mutuku-mutuku nirya binuka unamake,’ tenebukce tonoknye kintinipdeibukura, anye deice arye yala kibukce, ninye yala-yala nirya weik kibuk. Allah arye ayala-ayala ninye nirya kum kintinipdeiyamuk talak arye, sik unamak mutuku ap, sik wininamak talak ap, ‘Winibuka unamake,’ tenebukce minop arye wibuka deiamuk.
Malye winin ninguk talibuka wininyak ninye nirya ati ara, Allah arye ikin ning ap, kanye imun ning ap weika arye, sik nong deice deipliba, sikda ikin weik unamake. Minyuma ara, Yahudi yala ninye bukni, sik malye wininyak ninye ati wenebuka, yupu lepsisikuka bokeipnamle. Aminyan ara, Yahudi yala kum ninye babye, malye wininyak ninye ati, weneplirye, yupu lepsisikuka bokeipnamle.
Anggun ni koproba Allah, weik mambulnye ululce, anggunti wiamsuke. Tukwak mutuku noutamak ara, ninye yala-yala weik daunyak bukni, Allah arye, anggun apu yapu ati, bico tenebuka wiamukce, melilamukba, dadeipdanin yangalamika ani, anggun wini talak upre yangalulum ninye babye, ‘Na mapu pia unamak’ tenen, wipdeipsilirye, melisulule. Yuk nang ton kum wipdeiamuk, anggun uka. Arup babye, elce anggunti, aning tuba tenesulule.
Nyaplumba, Allah akunum kekepmasilce, anggun Israel ninye ati, arup arye nyapmasile. “Ura ‘Naʼ tenen, ninye ara, Israel ninye uka. Na mapu atonun unamak,” nyapmasile. Aning ara, min arye, Allah el si Yahweh, akunum anggunak nyapdeiamsuk touk, tuba tonap nyapmasile. Tonda, elce, “Aning ara, wininamlulume. Aning ara, ton pia kum wininamlulume,” nyapdeiamsuk yupu nirya, ‘Kekebuka wininamlum’ tenen, nyapmasile.
Musa birye Israel ninye ati, nyabuk. Ura, anggun ton teneipdelulume. Tonda yuk ninye ati asipdenamlulume. Minop talak arye dipdongobuka, wini talak nirya ara, anyapmasinto ning, minop talak ton ulamuk do, kum do? Aning atonun, pia kum ulamuk. Allah arye ninye kintinip deiamuk talak bukni, adipdongobuka wini talak babye, tonda, im sirya, mutuku sirya anoutamak mutuku nirya babye, aning atonun ning pia kum ulamuk. Tonda, ninye mutuku-mutuku nirya arye, minop talak noutam arye ato ning ati, pia kum tenelamikce, yuk nang ati kum nyalamik. Wini talak Allah arye, anggunti melibuka winisilye ning nirya ara, pia mambul weik ulula ati nyapsine.
“Narye, ‘Talye ning si erenyak ning nirya, adiparyuk dakuka, uku dapnamlulume,’ nyapmasina deiyok ara, ani. Ara, anggun ni koproba Allah, el si Yahweh arye, akunum wipdeiamsuka atia. Anggunda, el ‘Naʼ tenen, ninye ati ara, yuk talye ning do, Isa Mutuku Dongonye do, aning-aning nirya ati, si kum erenamlume. Allah el siuk erenamlulume. Allah arye, ninye im sirya, mutuku sirya nirya ati, bico tenelul bukni, anggun Israel nang ati ara, weik arye bico tenesilirye, anggun diamuk ati, ‘Na tenena ninye dipkoprop’ tenesulule. Yuk ninye ton kume.” Musa birye, Israel ninye ati nyabuk.
Allah arye ninye mutuku sirya im sirya nirya ati, yupu yuk-yuk bokeiplirye, wenepnamla ara, el mapu kan-kan arye deiyok koupnamla anya arye, ikin ning anggun nong deice deipsikce talak ara, kanye deibuka, Allah el siuk erenamlulume. Tonda, el mapu kan-kan arye deiyok koupsilyeura, mitik ikin usilye bukni, aminyan daknamle talak ara, diba tenena kum arye, Allah el laka teleb yupu ati, yaniltanyak ninye ati ara, yupu bokeiplirye, wenepnamle ning ara, weik mambule. Sik pia ikin weik unamake.
ကြော်ငြာတွေ