Amos 1:3 - Eipomek3 Allah el si Yahweh arye, nyabuk. “Sik Damsyik mutuku ninye arye, tuba-tuba weik malye wininyaka ati, dipkoprob narye, sik amutuku ninye nirya ati, wenebuka opnamne. Anggunti bico tenenuna anya arye, sik malye winin ning, weik winilamik ning ara, minop talak arye, adiparyuk wenebuka kum omse. Bukni, sik Damsyik mutuku ninye aryuk, Gilead mutuku ninye ati, weik yu upliba, weik arye onyake. Winipmanto ara, ninye arye, ‘Gandum duk kwapnamak’ tenen, ikin ning dobuka, gandum duk deice deibikirye, teiklamak touk, sik Damsyik ninye arye, ‘Naʼ tenen, ninye, Geleat mutuku noutam unyak ninye ati, ikin ning weik, sik nong deice delinyake. Ati, na Allah arye Damsyik mutuku unyak ninye nirya ati, wenebuka opnamne. Aning kum bataknamne,” nyabuk. အခန်းကိုကြည့်ပါ။ |
Amos 1:3
26 ပူးပေါင်းရင်းမြစ်များ
Ati ara, Allah Yahweh arye, sik Israel tam ulamik ninye nirya, yu ubukba, sik wenena ati, elce, ‘Akunuma, Siria mutuku taleamuk ninye deiyoknye, Raja Hazael ap, tonda el mi Benhadad ap arye, sikce, ‘Israel ninye, anirya ayanuka optinge,’ tenebukba, aketing tamun noutam nirya ara, sik anang arye, ton talak ton olyanamna ani, ton talak babye, Israel ninye dam yanuka tupa-tupa olamdik.
Israel ninye, sik yin talen nang nirya ara, Siria mutuku taleamuk ninye deiyoknye birye, yanuka obuka, sirya daknin balamikce, yin talen nang weik tonun, kum daneiyamuk anya arye, anoutam talak ara, Raja Yoahas el yin talibuka, kuda basam libuka bobana ati, tuku deice bikbik abuka ban ning, el si kereta kuda, aning deice tikuka, balamik yin nang ara, lima puluh (50) nanguk, tuba kam ulamik. Tonda, ninye olban talak ara, tuku bisik deice binarye, ninye ona ning, el si kereta kuda perang ara, sepuluh (10) tuba awamuk. Yuk ning nirya ara, pia kum danamuk. Tonda, Raja Yoahas, el yin talen nang yupa ara, sepuluh ribu (10.000) nanguk tuba ulamik. Sik yuk yin talen nang nirya ara, Samaria tam taleamuka deiyoknye, Raja Hazael birye obuka, sirya dakamuka deice arye, ninye arye, tuku sung-sunga yanilamaka atonun, ubuka omukce, sirya daklamukba, Israel tam yin talen nang ara, kum danin balamukce, mitik anunuk tuba kam ulamik.
Winibukopura, Ahas bira, Asyur mutuku taleamuknye, Raja Tiglat-Piliter biti, ‘Melibuka lyepnutume,’ nyabuka, morobuk ning ara, kekebuk. Winibuka kekebukopura, aninye deiyoknye birye, yanuka obuka sirya dakukce, Siria mutuku taleamuknye, Raja Rezin malye kibukce oplobuk. Tonda, Damasyik mutuku ara, malye kibukce, Damasyik asik ap nirya, atam tuku ap, alubuka doprobuk. Winibukce, amutuku ulamik ninye ara, tomobukabukce, tapu koupdongobukce, ‘Aninye ara, na ikin pil dipniba, na pil talye donamniyakʼ tenen, amutuku ninye nirya, bobinuka wenen aik bukni, Kir mutuku delilbiyuk.
Elisa engenmokba, Hazael birye asipdeyuk. “Naio, yata deiyok ning ati, na deiyoknye anda engenmalam do?” nyabuka, Hazael birye asipdeyuk. Nyabukba, Elisa birye, tamubuka nyabuk, “Deiyok ara, ance winipnamlam ning ara, na akunum kele. Ara, aminyan talak, Israel yala ninye unyak mutuku noutam nirya ara, ance yu ning, sik dam deipnamlame. An Hazael birye, Israel ninye unyak mutuku noutam ara, ‘Nun oldan nang arye, wekuka opsikcakʼ tenen, weik keil deibuka, cang poka wibuka, aknapdongobuka domik asik babye, uluplopnamlame. Ara, anyasik-anyasik nirya dobikba, mikip ubuk poka nirya ara, ance uluplopmince, anyasik nirya uku dongopnamlame. Tonda, ance amutuku noutam unyak kam nang nirya ara, parang ya arye opnamlame. Winipmince, Israel mutuku kilapu, sik winiryuk dibikiba, moum tuba dilamikce mapu nirya babye, obuka atu kipnamlame. Tonda, amutuku kilapu, sik mi winiryuk bomikce kilapu babye, sik mun pum tam nirya ara, tiriplopminba, dipnamake,” nyabuk.
Anggun talilulum ning noutamak arye bokuka, ninye tekbarye atonun ap, tonda ninye pinbarye atonun ap, bokuka arepnamlume. Wininamluma deiyok ara, ani. Ara, aminyan talak weik ikin upnamsil ning ara, ‘Atalak ara, aikin ning yanamle. Yuk talak ara, aning yanamle’ tenen, kel kum biktuma ati nyapsine. Ara, anggunce, anggun ning koproba bokuka yuk nang ati, melibuka arepmunyopura, aminyan talak anang arye, anggun ikin ning dopropmunye talak, anggun arelamlum nang arye melipnamsiaka ati nyapsine.
Anggun babye akunum kel bikamlume. Awa wina kelnye bira, el yala yuk-yuk ulye touk, aning bol kona ati ara, yuk-yuk kintinibuka delilule. Ara el wa wiamlirye, yala yuk-yuk akouamlye touk, el bol kona ati pil don ning babye, yuk-yuk kintinililule. Ati, gandum do, kacang tanah do atonun ning ara, kat ning bol kona ati ara, ikin ning arye teikliba, bol kolule. Bukni, pia mitang ning, winipmanto ning, tomat ap, sumik (ketimun) ap ati ara, namin ning aryuk yala dokolule. Tonda ikin ning arye, tomat ap, sumik ap ara, kum paplirye, yala kum dololule. Aning ara kum winipmanto. Kat ning kona ati, ikin ning arye pil dolule. Mitang ning kona ati, mitang ning aryuk apil dololule.
Na mapu Israel nango, anggunce na yupu kekepnululume. Winipmanto yupu ton nyapnusine. Anggunda, ‘Gandum bama labibirye, el duk ning wibuka dopropnamap’ tenen, weik ikin yo, gandum deice deibuka teiklamlumba, el duk labuka poulbalamle. Atonun el bama babye, yuk labuka saklamle. Winiplyopura, ninye arye gandum bama yuk, gandum duk yuk, wibuka delilamak touk, upnamlume. Weik ikin yo deice, kat yo arye tace lubuka tuku deice lukmunyeba, tuku palilamle touk, upnamlume. Ara, anggunce weik mutuku dup ap, mitik mutuku dup ap, adeice unyak ninye nirya ara, opra balamunce, obuka sirya daknamlume. Ara, anggunce anggun olan ninye nirya ati, obuka sirya daknamlume. Winipmunyopura, ninye arye wa tuku palibuka bataklamaka touk, sik yuk mutuku nang ati, oplopnamlulume. Tonda, diklanye duk labikirye, kala saklye ning ara, kumanya arye bobuka balamle touk, anggunce anggun mal olan nang nirya ati, obuka kum kipdeipnamlume.
Aning nirya, min kum winiplye talak ara, ance, ‘Se atam nang ara, mikip weik nang arye, obukapsikirye, sirya daksicak’ tenen, ilil ulye nang nirya ara, na Allah arye kum kipdeipnamne. Ara, Aram mutuku ninye ap, Pekah birye talilul Israel ninye ap nirya ara, narye wenepnirye, kum kipdeipnamne. Amutuku-amutuku nirya ara, malye kipdeipnamne.
“Ayupu ara, talye ati kum nyapkine. Deiyok ara ani. Aram mutuku ninye deiyok nang unyak sukum ara, Damsyik mutuku unyake. Ati Aram mutuku deiyok ara, Damsyik mutuku mikip mitik tonun ulul touk, sik Aram mutuku ninye nirya babye, mikip mitik tonun unyake. Tonda, Damsyik mutuku babye atonun, mikip weik kum ulule. Amutuku talibuka, ninye deiyoknye Resin bira, el mikip mitik tonun ulul touk, el ulul mutuku Damsyik mutuku deiyokak babye, mikip mitik tonun ulule. Aminyan talak, keting tamun enam puluh lima (65) tahun ton, akunum kiplyopura, narye nyapniba, yuk nang arye, Efraim yala ninye nirya obikirye, sirya dakmanto upnamake.
Ami si nyapnamlama ara, urdem ati kume. Ara, ami min kum nepsilirye, ‘Na nin, na ni,’ min kum nyapnamle talak ara, Asyur mutuku ninye deiyoknye birye, amutuku noutam yalirye, Damsyik mutuku ap, Samaria mutuku ap yalirye, sik talinyak ning aning-aning nirya, dalubuka doproplirye, el mutuku koproba tamubuka bobinamle.” Allah arye, na Yesaya biti nyapnuk.
Allah el si Yahweh arye, ayupu nyabuk. Sik Edom mutuku ninye arye, tuba-tuba weik arye malye wininyaka ati, dipkoprob narye, sik amutuku ninye ati, wenebuka opnamne. Minop talak, sik malye winilamik ning ara, namin kiamsirye, minopce wenebuka kum oplopse bukni, wini talak ara, sik malye winin ning weik wininyaka ati, aninye opnamne. Aninye ati opnamne ning ara, pia dipkoprob kum bataknamne. Deiyok ara, sik Edom mutuku ninye arye, sik mining yala nang, na mapu Israel nang, weik arye olamika ati, kwang dakuka opnamne. Ara, sik kayapu koprop ati, bico tenena kum arye, Israel ninye atibuk mal pilamikce olamika ati, sik Edom ninye wenebuka opnamne. Edom nang arye Israel ninye ati, kum namin kilamikce, pia yu ulamukba, tuba-tuba tenipna arye, olyangalamik ning ati, opnamne.
Allah el si Yahweh arye, ayupu ton nyabuk. “Sik Amon mutuku ninye ara, tuba-tuba weik arye malye unyaka ati, dipkoprob narye, sik amutuku ninye ati, wenebuka opnamne. Minop talak, sik malye ning ara, luba kiyamsirye, adiparyuk kum wenebuka oplopse bukni, wini talak ara, sik malye winin ning weik winilamik ning ati, aninye opnamne. Aninye ati, opnamne ning ara, pia dipkoprob kum bataknamne. Deiyok ara, sik Amon mutuku ninye arye, ‘Nun dem aryuk, amutuku nirya lo weik arye talinamabe,’ tenelamikce, mal olan talak ara, sikce Gilead mutuku ulamik kilapu, mi bomna kipman ap, mi moum dilamne mapu ap, nirya obuka bataklamika ati, kwang dakuka opnamne.
Allah el si Yahweh arye, ayupu ton nyabuk. “Sik Gasa mutuku ninye arye, tup-tupa weik arye malye wininyaka ati, dipkoprob narye, sik amutuku ninye ati, wenebuka opnamne. Sik malye winilamik ning ara, namin kiamsirye adiparyuk wenebuka kum omse bukni, wini talak ara, sik malye winin ning weik, wininyaka ati, aninye wenebuka opnamne. Aninye ati opnamne ning ara, pia dipkoprob kum bataknamne. Deiyok ara, sik Gasa ninye ara, ‘Naʼ tenen, ninye, sirya obikce, tapu koubuka boyanamikce, bobuka yuk ninye dam, uang yo bok deklamik. Abobinamik nang ara, sik Edom mutuku nang ati, ‘Anang obuka, sirya dakupurye boyapu nang ara, deksululume,’ nyabikba, Edom mutuku ninye arye, ‘Naʼ tenen, ninye ati, deklamik. Akunum Edom mutuku nang arye dekikopura, sik pil dona ati bobuka, sik mutuku bobinamika ati, sik Pilistin yala ninye nirya wenebuka opnamne.
Allah el si Yahweh arye, ayupu ton nyabuk. Sik Tirus mutuku nang arye, tup-tupa weik malye wininyaka ati, dipkoprob narye, sik amutuku ninye ati, wenebuka opnamne. Minop talak, sik malye winilamik ning ara, namin kiamsirye, minopce wenebuka kum omse bukni, wini talak ara, sik malye winin ning weik wininyaka ati, aninye nirya opnamne. Aninye opnamne ning ara, pia dipkoprob kum bataknamne. Deiyok ara, sik Tirus mutuku ninye arye, ‘Naʼ tenen, ninye, Israel nang ati, tapu koubukabikce, aninye dobukabikce, yuk pera mutuku nang dam, uang yo bok deklamik. Adeklamik nang ara, sik Edom mutuku nang ati, “Tapu koubuka, boyanmap ninye deksululume,” nyalamikba, deklamika ati, adeice arye, sik Tirus mutuku ninye arye, sik Israel ninye ati, “E, nun kayapu, sik Israel ninye ap, nun ap, olana kumce, teleb ubuka neika unamabe,” nyabuka, akunum nyalina yupu nyapdeiamik ani, sik Tirus ninye arye, ayupu batakika ati, aninye nirya wenebuka opnamne.
Allah Yahweh arye, ayupu ton nyapdeibukba, Amos birye kekebuk. Allah el si Yahweh arye, ayupu nyapdeibuk. Sik Moab mutuku ninye arye, tup-tupa weik arye, malye wininyaka ati, dipkoprob narye, sik amutuku ninye ati, wenebuka opnamne. Sik malye wininyak ning, namin kiamsirye, adiparyuk wenebuka kum omse bukni, wini talak ara, sik malye winin ning weik, winilamak ning ati, Moab ninye weik arye wenebuka opnamne. Aninye ati opnamne ning ara, pia dipkoprob kum bataknamne. Deiyok ara, sik Moab mutuku ninye arye, Edom mutuku ninye deiyok kibuka, taleamuknye akunum, ‘Merekukua bita dibukba, Moab nang arye weibik,’ tenebikce, el anye weiamik ning dakuka batakikce, el yok dobuka, uku dongobikba, uku dibukce, atu dayuk ning ati, na Allah arye, sik Moab mutuku ninye nirya wenebuka opnamne.
Allah Yahweh arye, ayupu ton dukdongobuka nyabukba, Amos birye kekebuk. “Sik Yehuda yala ninye arye, tuba-tuba weik arye malye wininyaka ati, dipkoprob narye, sik amutuku unyak ninye ati, wenebuka opnamne. Sik malye ulamik ning namin kiamsirye, adiparyuk wenebuka kum omse bukni, wini talak ara, sik malye winin ning weik wininyaka ati, aninye ara, opnamne. Aninye ati opnamne ning ara, pia dipkoprob kum bataknamne. Deiyok ara, sik Yehuda yala ninye ara, na Allah Yahweh arye, ‘Aning wininamlulume. Aning ara, kum wininamlulume,’ nyapdeiamse yupu nirya, batakuka yanilamikce, sikda asum-asum nirya, akunum pia malyeuk wininyake. Narye, nyapdeiamse yupu nirya ara, ‘Nun lik’ tenen, batakanauk ululuma ati, dipkoprob narye wenebuka opnamsine. Ara, talye ati kume. Sik deipkirikdop nang, si erelamik ning kwemdina ap, ninye arye puturubuka delinyak ning anyuk, si erenyaka deice arye, tilila yupu uk kekebuka talinyake. Na Allah arye nyapdeiamse ning ton kum tenekirye, malye winin ninguk tenenyaka ati, Yehuda yala ninye nirya wenebuka opnamne.
Allah Yahweh arye, ayupu ton nyapdeibukba, Amos birye kekebuk. Sik Israel yala ninye arye, tuba-tuba weik malye wininyaka ati, dipkoprob narye, sik amutuku ninye ati, wenebuka opnamne. Sik malye winilamik ning ara, namin kiyamsirye, adiparyuk wenebuka kum oplopse bukni, wini talak ara, sik malye winin ning weik wininyaka ati, aninye opnamne. Aninye opnamne ning ara, pia dipkoprob kum bataknamne. Deiyok ara, sik Israel ninye arye, pia diksukumuk unyak ninye ati, ‘E nun kayapu nang anye,’ tenena kumce, ‘Kume, anang ara, nun pil donamsiyaka ati, aninye tapu koubikirye, bobuka sik aik binuka deibipyopura, Pil donamsiyake. Sik dekna ati, sikce dekna weik ning, el si perak arepnamsulume,’ nyabuka bobanyake. Aning wininyaka atonun, aning-aning nirya kum upmale bukni, talye bona utotoa talina kum unyak ninye babye, atonun ubuka, ‘Nun pil talye donamsiyak’ tenen, tapu koubikirye, bobinuka yuk nang ati, ‘Dekenyak ning kum bukni, yan ongona ara, sandaluk arepsumunce, aninye dopropnamlume,’ nyabuka bona utotoa talina kum ninye dekenyake. Yuk nang arye, bona utoto talina kum ninye, akunum dekicopura, ikin pil dinyake.
Allah Yahweh arye nyapdeibuk yupu ara ani. “Narye tukwak mutuku noutamak unyak ninye sik wininyak ning nirya ati elinunce, Hadrak mutuku ap, Damsyik mutuku ap, unyak ninye malye wininyak ning ati wenepnamne,” nyapdeibuk. Ara, sik Israel yala ninye unyak mutuku noutam atibuk kume. Ayupu ara talye ati kum nyapsine. “Deiyok ara, pia weik mutuku noutam el si ara, Siriya mutuku noutam ninye deiyok nang unyak mutuku babye, na Allah Yahweh elinunce talinune,” nyapdeibuk.
Allah Yahweh arye, Hamat mutuku babye, talilule. Ara, Hadrak mutuku ap, wilibuka dana-dana bokolanak unyak ninye nirya babye, Allah arye, talilul ninye unyake. Aning atonun, amutuku nang arye, weik kel kina deiyok ning nirya, kel bikamik nang unyak mutuku, Tirus mutuku ap, Sidon mutuku ap nirya ara, Allah arye talilule.
ကြော်ငြာတွေ