Malye winin ninguk talibuka wininyak nang ara, ‘Nun patapmasilye ning ara, ani-ani,’ nyabuka maknya kintinibikirye, kwalinyake. Ati, ‘Sik malye wininyak ning ara, tamubuka sik nong deice yanuka, malye kipdeipdating’ tenen, morokinyabe. Tonda, sikce, ‘Nun bona weik tonun doprobibirye, bona talin nang unamab’ tenenyak nang ara, Allah Yahweh ati, ‘Allah ara, nun lik,’ tenebikirye, batakanyake. Tonda, yuk nang nirya ati, ‘Malye kipdeipnamap’ tenen, pia sunyake.
2 Timotius 3:2 - Eipomek2 Ninye mutuku-mutuku nirya arye pia malye wininamak ning ara, nyapnukine. Ara, sik bidamnye arye, sik bidamnye ati tenenauk unamake. Yuk nang ati bico tenebuka kum melinamake. Tonda, ‘Yo bok weika arye doproptibye’ tenen, kanye engeplibuk, unamake. Aninye nirya arye, “Nunda pia teleb nang,” nyabuka kanye erena ap, sik babye kanye aryuk erepdeipdakirye, dilana ap, yuk nang ati yu uplirye, sik nong deice malye yupu nyabuka delinamake. Winibikirye, sik ni yapu ap, sik nin yapu ap, nyanyak yupu ati, yanibuka kum kekepnamake. Tonda, yuk nang arye teleb kipdeipsikibuk, anang arye, “Telebe,” nyabuka, kina kum unamsiake. Allah winilul ning nirya ati, ‘Nun lik’ tenen, pia malyeuk wininamake. အခန်းကိုကြည့်ပါ။ |
2 Timotius 3:2
43 ပူးပေါင်းရင်းမြစ်များ
Tonok ning ara, kanye talima erelakirye, ‘Yuk nang ara, nunti, sikda pia weik nang tenesinyake,’ tenelakirye, anang sik asing erebukabikirye, ninye kisok dup-dup diprebakiba, Allah el lik ulule. Bitinye ning ara, sitang deice arye tilila yupu nyanyak ninye ara, Allah el lik ulule. Winilye ning ara, deiyok ning ton kum upmalibuk, ninye sik taruk deice arye, oltakanyak ninye ara, Allah el lik ulule.
Nyabuk bukni, Allah arye tamubuka adomon yupu nyabuk. Winipmanto ara, an kapak ya arye, akapak ya talipmalamnye biti, ‘Anda na bopmanilam bukni, weik mambul ning ara na uka,’ nyabuka, kwaliptu do? Kume, ninye arye kapak memenyak atia. Atonun tonda, yo seken ning gergaji ara, agergaji bopmalinye biti, ‘Anda, na bopmanilam bukni, weik mambul ning ara, na uka,’ nyabuka, kwaliptu do? Aning atonun, tonda ninye arye, ‘Kama talibuka binamapʼ tenen, bai tam mitik yo sekuka deibikirye, kintinip deibikceura, sikce delinyak yo, elcuk, ayo kintinipmalinye, el nong dobuka, kum talilule. Aning atonun, kam kum ulul yo kama ara, el sekuka kintinip deipmalinye bira, kam ululnye birye tomoptu do? Kume, aning kum winipmanto bukni, ninye arye akama amemebuka delinyak yo ara, tomobuka talilule.
Bukni, aning-aning min kum kipdeipnamle talak ara, Siria tam mutuku talipnamle Raja birye, el kanye aryuk tenipnamle touk, aninguk wipnin banamle. Tonda, el talima eren deice arye, maknya kintiniplirye, nyanamle. “Kume nara, pia deice tam ulinye unune. Ninye arye si erenyak ning, dewa-dewa ap, ninye arye, ‘Nun ni koproba ani’ tenen, si erenyak talye ning nirya ap, tonda aning-aning nirya, deice tam erebuka ululnye, Allah Yahweh ara, na amu tamuk ulule. Ninye arye, si erenyak ning nirya ara, mambul kume. Na uk ara, mambul weiknye unune. Na tonok ara, weik deiyoknye unune,” nyapnamle. Utenepdalirye, el siuk weik tonun erenamle. Tonda, elce Allah Yahweh ati, pia malye-malye yupu weik tonun nyanamle. Ura, amutuku deiyoknye, Raja Siria bira, elce aning winipnamla ara, Allah arye, ‘Anye winipnamle,’ akunum tenyamuk touk ati, aning winipnin balamlya ani, Allah arye, ‘Atalak akunum,’ tenyamuk touk, akunum uplyopura, Raja malye weik ulamuka ati ara, Allah arye anye el deice, ikin weik ning deipnamle. Adeice arye, Allah el yu tenyamuk ning ara, sirya daknamle. Allah arye, akunum tenyamuk ning nirya ara, dipkoprob nong upnamle!
Winipnamle talak ara, el anye birye, Weik Erena Deiyoknye Allah, aning-aning nirya deice tam ululnye, Allah ati, malye yupu nyanamle. Malye yupu nyaplirye, Allah el wipdeiamuk nang ati, pia ikin ning, sik nong deice tuba delinamle. Winiplirye, Allah arye, ‘Aning wininamlulume. Aning ara, pia kum wininamlulume,’ nyapdeiamuk mem yupu ati ara, amalinye birye yanipnamle. Tonda Allah arye, ‘Na tenyamse talak ani,’ nyabuka, el si eren ati nyapdeiamukba, el mapu arye, el si erenamak keting tamun ap, wala ap, asum ara, ‘Kum kipdeipnamle’ tenen, piripdenamle. Winibuka unamle talak noutamak ara, Allah arye, el mapu dobuka, amalye weik deiyoknye ati, arepnamle. Ara, pia diba kum bukni, tia talak ati, Allah el mapu pirilena ati, anye el amu tam deipnamle. Atalak ara, keting tamun winilye ap, tonok ning noutamak ap deice arye, amalye deiyoknye birye, Allah el mapu talinamle.
Nyabukopura, awekuka kekenmek nang nirya ati ayupu nyabuk. “Anggun nirya, anggunce anggunti, ilil una ap, anun una ap, upsilya ati, kanye talima kalekuka dildanamlulume. Ninye kam una ap, ninye teleb una ati, mambul ning ap ara, aning-aning bona talinanye kina deice arye teleb kum updeipsute.” Yesus arye nyabuk.
Wininyak bukni, narye nyapsin yupu ara, yuke. Sikce, ‘Anang optibye,’ tenelamsikce nang ati, bico tenebuka, teleb updeipmunce, ‘Aning tamubuka arenamsiake,’ tenena kum aryuk, talye urdemuk arenamlulume. Aning ati ara, anggun ni Allah im deice ululnye birye, pia malye ninye ap, teleb ubuka melilule, sikce tamubuka, ‘Naio telebe,’ pia kum nyanyak ninye ap nirya ati, bico tenebuka kanye arelul touk, anggun babye, yuk ninye nirya ati, bico tenebuka kanye delinamlulume. Anggunce winipmunyopura, Allah el mapu koprop kipdeipnamsile. Tonda aminyan ara, Allah arye im deice teleb ning weika arye arenamsile.
Orkiting tamun unmaputo talak arye, tonoknye, el si ara, Teudas, weiknye erebuka tikamukce, ‘Nara, weiknye,’ nyalamukbuk, ninye yupa weik 400 nang atonun, el yupu uk kekebuka dobolbalamik. Winilamik bukni, yuk nang arye Teudas obikura, el melibuka dobolbalamik nang nirya, ‘Bilulume,’ nyabuka yakika ati, bokuka yuk-yukak bindobikbuk, awinilamik ning kum dayuk.
Anggun Yahudi yala kum ninye ara, aminyan tam dukulongolamak yo taruk atonun ninye ululume. Israel ninye ara, duk teleb yo minyuma yala kouamikiba, kolupliba sekeltaklamak yo taruk atonun ninye unyake. Ati sik Yahudi yala kum ninye arye, Israel ninye ati ara, ‘E, sikda malye ninyeuk unyak bukni, nunda telebuk unyabe’ tenen, anggun bidamang kanye aryuk kum erelanamlulume. Luba kilongona meme. Talye bai tam yo taruk dobuka dukdongobica deice arye, minop talak ulamle yating ap, nong ap teleb kum ulule. Minop talak ulamle tuku teleb ap, yating teleb ap ulamlya deice arye, aminyan talak dukulongonyak yo taruk teleb ubuka duk moulule. Ati, sik Yahudi yala kum ninye arye, Israel yala ninye ati, ‘Sikda malye unyak bukni, nunda teleb nanguk unyabe,’ nyabuka pia kum nyanamlulume.
Tonda, Kristus arye ninye nirya sik malye ning pununa ati dipsuka ara, ‘Sik kam unamak talak ara, sik bidamang patan ning atibuk tenebuka, talye-talye unamak’ tenen, kum dipsuke. Aning pia kum bukni, Allah arye tenebuka ara ani. Ara, ‘Aninye nirya, sik yok pununa ap, sik lyena ap ati, Yesus dibuk.’ Dibuk bukni, Allah arye kam bukeibuknye, ‘Yesus elti, dib tenebikirye, eltibuk tenebikirye, eluk talibuka, el piluk dobuka unamak’ tenen, Yesus arye el punupsukce, dipsuke.
Winipnamsil ning ati ara, anggun talye tukwak ninye malye upsilye ning nirya ara, pia batakanamlulume. Akunum diamik ninye arye, aning-aning nirya kum pataplirye, pia talye wininamak atonun, malye winin ning nirya ara, batakanamlulume. Ara, yuk kilapu talye dalubuka yolana ap, pia yuk talye kanye bobuka ninye kum winipmanto ning, pia malye-malye yolalamak ning ap, malye winin ning ati weik patana ap, aning nirya batakuka, diksukumuk wininamlulume. Amalye winin ning yala nirya ara, pia kum wininamlulume. Tonda, ‘Aning-aning nirya bona weika arye doproptinye’ tenen, weik arye patapsilyopura, ara pia malye winina ati, aning babye, kum wininamlulume. ‘Bona weik doproptinye’ tenen, kanye talima engelul nang ara, Allah batakuka yuk talye ning si erenyak atonun wininyak anya arye, aning babye kum wininamlulume.
Allah el winin ning Yanina Deiyoknye birye, ninye mutuku-mutuku nirya, ‘Nun deiyok ning’ tenen, Allah atonun si sisibuka, si erenyak ning nirya ati ara, elce yanilule. Elce, Allah winin ning nirya ati ara, ‘Na aryuk deice tam unirye, aning nirya ara, na amutamuk upnamle’ tenen, elce el bidamnye ati, erepdanamle. Aninguk kume, anggun Yahudi yala ninye arye, Allah el si erena ati, weik mambul deiyok aik dolulum ning ara, anye birye anyaik wekuka, ‘Ninye mutuku-mutuku nirya kekenamak’ tenen, “Nara, Allah unune,” nyabuka, elce el bidamnye siuk erelilanamle.
Amalye wininyak nang atonun, urikce nang bitinye, sik si ara, Aleksander ap, Himeneus ap, winirudake. ‘Isa Mutuku Dongonye birye anang ati, malye kilibuk, weik kanye imun kanye bonamrak’ tenen, narye anang ara, Isa Mutuku Dongonye biti akunum arepse. ‘Allah elda talinye’ tenen, ‘Yesus ati malye yupu nyana ara, pia malye winin ning ulule,’ tenebuka, ‘Kel biknamdak’ tenen, narye anang ara, Isa Mutuku Dongonye ati akunum arepse. Na Paulus arye sekeibkine.
Tonda, nun kele. Allah arye nyapdeibukura, Musa arye sekeiyamsuk mem yupu ara, Allah arye diksukum un ninye ati kum nyabuk. Kume. Ayupu ara, Allah ap, ninye deiyok nang ap, sik amu tam una kum arye, sik nyanyak yupu ati, yaninyak nang, sik wenena ati sekeipsuke. Tonda, ‘Allah el mambul,’ tenena pia kum arye, kanye pia malye-malye wininyak nang ap, tonda, ‘Allah nyasilye yupu ap, el ulul ning ap, talye ning uka,’ tenebikirye, Allah el pia teleb ulul ning, el mingne ning nirya ati, akutubuka nalinyak nang ap, tonda, sik ni yapu koprop ap, sik nin yapu koprop ap, yuk talye nang ap, oltakanyak ninye ap, ati, Allah arye amem yupu nyabukura, Musa arye sekeipsuke.
Anyapmakin yupu ara, talye ati kume. El deiyok ara, yata ninye do nirya, ‘Se, bona weik talinanye utibye’ tenen, yo bok do, dengna weik ning do, weik arye patalyopura, adeice arye malye winin ning yala weik wininamake. Anyapmakin touk, ton nang ara, ‘Yo bok weik doproptibye’ tenen, patabuk deice arye, Allah dib tenelamak ning batakuka, talye yuk bisik balamakbuk, aminyan ara, weik kanye imun ning ap, ikin ning weik ap, kanye bokoltona ap, weik ulule. Sik ikin ulilalamik. Na Paulus arye nyapmakine.
Anang arye yuk nang ati, tenepce arye teleb yupu yukuna ati, talye nyanamak bukni, aminyan ara, anang deice ikin ning delinamake. Tonda, sik winipnamak ning ati, ‘Winipnyopura, aminyan talak yata winipnamnil do?’ tenena kum aniryuk, ‘Talya parapkabuka winipnune,’ tenebuka malyeuk wininamake. Sirya talak unamak ninye arye, sik bidamnye ati, ‘Nunda pia teleb nang, nunuk ara, pia mambul’ tenen, sik kanye erelilanamake. Anang arye, Allah el winilul ning ap, Allah el ap, ati, kanye kum deipnamak bukni, sik patan ning atibuk, ‘Kanye deibuka talye-talyeuk unamap’ tenebuka malye wininamake.
Allah arye, ‘Wininamake’ tenen, el yupu deice arye weik mambule nyapsuk ning ara, ani. ‘Ara, anggunce anggun bidamnye patapsilye ning, ‘Aning mambule’ tenen, melilalamlum touk, anggunce anggun ap neika ululum nang ati, bico tenebuka melinamlume, nyapdeipsuke.’ (Imamat 19:18) Anyapdeipsuk yupu ara moubuka kekepmunce, dobolbalamunyeura, pia telebuk unamlulume.
Asurat deice arye, “Yuk nang ati, nimalye arye sik amutamak unamlulume,” nyapmasin touk, anggun wisi danana kum arye, kam nang atonun nang ati, ayupu nyapsine. Ara, sik wisi nang amutamak umunce, sik yupu kekebuka nimalye arye unamlulume. Buku Amsal yupu noutamak sekeipsik yupu aupmala ati nyapsine. Ayupu ara ani. ‘Sik kanye erebuka, dildanyak ninye ara, Allah arye aninye ati bataklirye, sik yupu sekelule. Bukni, sik kanye darabuka, talima nimalye arye amutamak unyak ninye ati ara, bico tenepsilirye, talye luba kibuka melisulule.’ (Amsal 3:34) Ayupu tuba awamsuka ati, anggunce yuk ninye nirya ati, anggun bidamnye kanye darabuka, talima nimalye arye teleb ubuka unamlulume.
Ninye arye, sik ‘Na’ tenen ning, delilamak touk, weik wenena ning tia talak ati, tenepce deililul bukni, ‘Aminyan ara pia oplopnamne’ tenen, pia weik arye malye ning tenenyak ninye ati ara nyapnusine. Ara sik nong pataplye ning, malye ninguk tenebuka, talima ap, nong ap, pia malye winin ninguk unyake. Winibuka unyakce, sik deice tam unyaka deiyok nang nirya ati, ‘Nun like,’ tenebuka yaniltanyake. Aninye ara, pia lik tenebuka, sik kanye weik arye erenyaka anya arye, sik ilil-ilil una kum arye, Allah el im deice pil donyak ninye malaikat ap, yuk ninye deiyok nang atouk, im deice unyak ninye ap ati, talye luba kibuka, sik nong deice malye yupu nyabuka, ikin ning sik nong deice delinyake.
Ara, sikda, talye tukwak kam ulul ning nirya ara, kanye bona kum arye, talye luba kibuka, ulamaka atouk, atilila yupu peteren nang babye, unyake. Sikda, mambul ning bukni, bita kum tenebikirye, pia kum kel bikamice ning ati, “Aning ara talye ning uka,” nyabuka, malye yupu uk deilinyake. Wininyak ning ati ara, ninye arye talye tukwak kam ulul ning, tomobikirye, kanye bona kum ning, talye merekukua olamak touk, Allah arye atilila yupu peteren ninye nirya ati, talye luba kibuka oplirye, sirya daknamle. Aninye ara, Allah yaniptabuka, pia malye-malye wininyaka ning ati ara, Allah arye sikti, obuka, sirya daknamlarya.
Allah arye anang dobuka, pia kunuknak dongopnamla ara, talya urdem ati kume. Ara, atilila yupu nyaninye arye, “Nunda weik mambul ning winipnamabe,” nyabuka, talye yupu uk nyaltakanyakce, sik kanye erebuka kwalinyake dilanyaka atia. Tonda, talye tukwak ninye nirya ara, talima noutamak malye ning aupsuka anya arye, yuk ninye malye winin ning pataplibuk, tenenyak ning ati ara, atilila nang arye, nyanyake. “Kume. Winina ara, telebe uka,” nyanyake. Nyabica deice arye, yuk nang sik kanye lilonyake. Sikce talima lolonyak ninye ara, winiryuk deiyok kibuka diba tenepmak bukni, kanye min kum wisibuk nang ati nyapne. Anang arye, sik malye nang winilamak ning batakuka, ‘Diksukumuk unamap’ tenen, winiryuk deiyok kipmak bukni, talima wisina kum ninye ati nyapne.
Atilila yupu peteren nang arye, ‘Aning-aning nirya weik doproptibye’ tenen, patalye ninye unyaka anya arye, sik badamnye kanye arye tenenyak ning, talye yupu uk, peteresinyak deice arye, ‘Sik ning weik dolonamap’ tenen, yum yupu nyabuka, anggun ning ubula dolonamsiyake. Minop talak ara, Allah arye, ‘Atilila peteren nang ara, wenebuka oplopnamne,’ tenyamukce, akunum kentenlamuk anya arye, aning ara lubakiplirye, kum bataknamle. Dipkoprop aminyan talak ara, aninye oplopnamlarya.
Sik anang ara, lik kanye bobikirye, epra bakirye malye nyabuka yaniltan ninye unyake. Ton anang ara, yuk nang ati dipnilibuka tuba-tuba tilila ati talya kisilinyake. Anang ara, sik kanye talima noutam malye ning patalamlye ninguk tenebuka unyake. ‘Yuk nang arye, sikda teleb nang, tenepnamsiyak’ tenen, sikce, sik badamnye ati erelanyakce kwalin yupu nyalilanyake. Anang ara, dipkoprop yuk nang ati bico tenena kum bukni, ‘Nun patapsilye ning arepnamsiak’ tenen, “Na ka, na ka, anda pia telebnye,” nyabuka talye pil ilitakanyake.
Mem Kwatima Urasin Atonye birye, laut mekwen kup-kup ak tikilbiyukba, na Yohanes arye eipse ning ara nyapnusine. Ara, laut mekwen noutamak arye, malye ulina ning, weik ning kam ulul ning kutukuka tikilyayuk. Aning el urasin ara laka nyapnune. El kisok ara tekbarye ubuk bukni, el kisok kalun ning, el si ara mahkota yuk-yuk uamuk ning ara, taku barye 10 ubuk. Tonda, el kisok tekbarye asok deice ara, si lakak ubuk. Asi sekuka deiamukba, lakak uamuk ning ara, ninye arye amalinye biti, el si siptingopura, Allah kekepturye, ‘Na like’ tenen, yu weik uptue. Amalinye el si nirya ara, Allah yanina yupu ulula ati nyapne.
Winibikce, Allah im deice tam ululnye biti, pia malye-malye yupu el nong deice delilamikce, sik malye ulamik ning ati ara, ‘Se, nun dipkoprop malyeuk winilamubu,’ nyabuka, sik balye tam kibuka amalye winin ning ati kum bataklamik. Kekena kumce bisibuka unmekce, malye winin ninguk talibuka unmekak, eipse.
Im noutamak arye ninye nong deice sakuka obuk ning urasin ara keil atonun bukni, dekne dukduka puru mok sakuk. Es mok puru ara, dekne dukduka atonun yuk-yuk bukni, tonok ning ara, 45 kilo atonun ubuka sakuk. Aning ara pia weika arye sakanmokce, ninye pia weik obuk. Obukba, tukwak ninye nirya imun kanye bobuka unmekce, asakanmok dekne dukduka mok puru ati, Allah el nong deice pia malye yupu nyabuka derenmekak kekepse. Na Yohanes arye nyapsine.
Sik nong bol tin weik ubukce, bol kobukba, akanye imun deiyoknye, Allah el si ati pia malye yupu weika arye nyanmek. Deiyok ara, sikce, ‘Akanye imun ning nun nong deice awinipmasila deiyoknye bira, Allah el uka,’ tenebikce malye yupu nyanmek. Allah El si ati malye yupu weik nyanmek bukni, sik malye-malye unyak ning ati, balye tam kibikce, kum batakik. Tonda, elti, “Anda pia telebe,” nyabuka, el si kum erenmek. Amalye winin ning nirya ara, tuba talibuka wininmekak anirya eipse.
ကြော်ငြာတွေ