Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -




2 Timotius 2:19 - Eipomek

19 Aninye ara wininyak bukni, Allah arye nyapsuk yupu ara, min kum upsutue. Winipmanto ara, pia teleb ayukumna yo, gat yo iknabuk, pia gat ulamle atonun, Allah arye nyapsuk yupu ara, min kum kum datue. Allah el yupu noutamak sekamik yupu deice arye, lak kipdeipsuke. Ayupu ara, ani. ‘Allah arye, ‘Aninye na mapu unamake’ tenen, akunum wipdeiamsuk ninye ara, el akunum kel bikamsuke.’ (Bilangan 16:5) Tonda, ‘Yata nang do nirya, “Allah ati akunum diba tenepsa ati, el mi unune,” nyanyak nang nirya ara, adiparyuk malye winin ning nirya ara, batakikirye, balye tamubuka diksukum bisikuk banamake.’

အခန်းကိုကြည့်ပါ။ ကော်ပီ




2 Timotius 2:19
69 ပူးပေါင်းရင်းမြစ်များ  

Allah arye, nun tukwak mutuku unyap nang nirya ati, nyasulule. “Dipkoprob, weik kel bikna deiyok ning ara, ani. Ara, anggun ni koproba Allah, el si Yahweh ati, ‘Se, elda pia mambule,’ tenepnulumce, nati ilil unamsile. Tonda, Allah arye, “Teleb winin ning ara, aniʼ tenen, kel bikin ning bukni, el nong noutam ara, ani. Ara, yata malye winin ning do nirya, anggunce aning bataklumce, anang dam arye kisik dakuka, yukak bimunyopura, kel weik nang unamlulume,” nyapdeipsuke. Ayupu nirya ara, Ayub birye, el kwit capu sik winilye nang ati nyabuk.


Anyapmasin yupu ara, talye ati kum nyapsine. Deiyok ara, el kanye talima lamapdongobuka arye, Allah amu tam ulirye, diksukumuk winilulnye bira, Allah Yahweh arye melibuka kalikilirye, aninye ati, teleb winililule. Bukni, malye winin ninguk tenebuka, upre bace ninye ara, wenebuka opnamle ati, kintinililule. Sik malye winin ninguk talibuka, wininyak ninye ap, sik wininyak ning ap nirya ara, Allah Yahweh arye kum daneipnamle.


Deiyok ara, Allah arye nyasulul yupu moubuka talikirye, sik pia diksukum telebuk wininyak nang ara, mikip tuba unamake. Ikin ning do, kanye imun ning do, anggun dam yalye babye, anggunda ilil una ap, malye una ap, pia kumce, mikip arye tuba telebuk wininamake. Tonda, Allah arye nyasulul yupu, moubuka talikirye, pia diksukum telebuk wininyak nang ara, yuk nang nirya arye, sikti, pia luba kum kinamake. Anang ati, tuba tenenauk unamake.


Anggun sitang deice arye, ‘Malye yupu tabipyak’ tenen, pia moubuka kalikelanamlulume. Tonda, anggun sitang deice arye, tilila yupu ap, tenepce arye nyana yupu ap, pia kum nyanamlulume.


Sik diksukumuk wininyak ninye ara, malye winin ning tonok ning babye, kum wininyaka anya arye, Allah el si Yahweh arye, aninye ati, pia moubuka elilulce, bikilule. Ati ara, Allah arye, sik anang ati, arenamle ning ayala-ayala nirya ara, pia kum kum danamle. Allah arye, sik menenga ning arepliba, aninye ap, aning ap, pia aunamle. Aninye ara, kum kum danamake, pia aunamake.


Ati ara, yata nang do nirya, sikce, Allah Yahweh ati, ‘Nun ni koproba ani’ tenen, diba tenebuka, elti, kanye deipmunce, bico tenelulum nang nirya ara, anggun nirya arye, malye un ning nirya ati, anggunce, ‘Nun like’ tenenamlume. Allah el tibuk, anggun kanye talima, el deiceuk delinamlume. Allah arye, ‘Naʼ tenen nang, ‘Winibuka wininamak’ tenen, akunum wipdeiamsuk nang ati, “Aning ara, wininamlume. Aning ara, pia kum wininamlume. Winipmunyopura, narye anggunti, pia teleb kilinamsine,” nyapdeiamsuk yupu, moubuka talinyak nang ara, Allah arye, pia melibuka kalikisulule. Winilula ati, anggun mal olan nang ap, sik pia malye ning talibuka, wininyak nang ap ati, obuka sirya daklyopura, el ‘Naʼ tenen nang anggunti dobuka, teleb kipdeipnamsile.


Winilula ati ara, malye, el dam ara, pia weik kumanya mikip yalirye, amalye ululnye dam, yanuka puplirye, el nong bobiliba, kum danamle. Bukni diksukum teleb ubuka unyak ninye ara, pirilen ning ton, sik dam yatua babye, kum lulukdenamake. Pia tunim abuka telebuk unamake.


Angguncuk tenebuka, kel bikamlum ning atibuk, ‘Nunda pia weik kel nang’ tenen, kwalina meme. Ati ara, malye winin ning nirya ara batakmumce, anggun ni koproba Allah Yahweh ati, ‘Elda pia weik mambulnye,’ tenebuka ilil unamsile.


Aning ati ara, sik Pilistin mutuku nang arye, dobuka deibikceba, nun dam yupu asilyanganamsiak nang yakirye, asipdesikceura, anang ati, yata yupu nyapnalum do? Kume, na nabi Yesaya birye, na kanye ara, ani. Sik adopdeibikceba, yanganamak nang ati ara, nunce nyapnamabe. “Allah arye elcuk, el tenen nang, sik melina ati, Sion mutuku akunum teleb kibuka tamupdeipmale. Ati, Allah Yahweh, el mapu ikin deiceuk ulamik nang ati ara, amutuku upceba, kalikinamla ati, talye kanye deibuka, telebuk unamake,” nyabuka, laka nyapnamabe. Nabi Yesaya birye nyabuk.


Ati, na Allah Yahweh, aning-aning deice tam unirye, Weik Erena Deiyoknye ununa anya arye, narye, ‘Winipnamne,’ tenenye touk wininune. Narye dipkoprob nyapsine. Narye weik mambul keil tonok Sion mutuku noutam deipne. Akeil ara dipkoprob pia mikip keil deipne. Tonda akeil ara, dekna weik keil deipniba, pia darabuka buknamla ati, yata ninye do nirya, akeil ati diba tenebice ninye ara, alye pia kum dakdanamake.


Minop talak donirye dipdongobuka wini talak nirya ara, ikin ning noutamakuk ulamupa ati ara, yuk nang arye, nunti, ‘Anang ara, Allah el ‘Naʼ tenen, ninye kum unyake. Allah si erenyakba, elce aninye taliplirye, kalikuka melilul ninye kume,’ tenepsetinge. Ara, urdem ati, kume. Nun ikin unyap ning ap, an si eren aik ati malye nang arye, yanibuka malye kilinyaka ap ati nyababe. Ati, nun ni koproba Allah ance melipsilyame, nyakinyabe. Sik Israel ninye arye, ‘Se’ tenen, malye kanye bobuka, Allah ati morobik.


“Narye, ‘Aninye ara na mapu koproba’ tenen, wipdeiamsiba, na si tuba ereninyak nang arye, anggun malye ululum ninye ati, dipdongobuka anggun si malye nyanamsiyake. Tonda, na Allah Yahweh arye aning-aning nirya talinirye, ‘Winipnamne’ tenenye touk, ninye winipmanto kum pil donanye birye nyapsine. Nara, Weik Erena Deiyoknye aryuk, anggun malye-malye ululum ninye ati, obuka sirya dakanamsine. Bukni, na amu tam unyakce, na si erenyak ninye ati, winiryuk si pia teleb ning arepnamne.


“Anda, Yerusalem mutuku weik asik noutam dana-dana tam nirya ak, binulyame. Biminyopura, anyasik noutam unyak nang nirya dipdemince, yata nang do nirya, Israel yala nang pia malye-malye weik wininyak ning ap, na Allah arye, ‘Aning ara, pia na like,’ tenenun ning bukni, amutuku nang arye, pia mem ning wininyakba, eibikirye, sik kanye talima noutam arye, ‘Se, aning ara, kum winiptinge, aning ara pia malye wininyakeʼ tenen, talima uk diliba, engenyak nang nirya ara, sik dam binulyame. Biminyopura, anang sik urasin tam bukni, sik asok deice tam ara, lak bikna ati, tanda sekdeipnamlyame.” Allah arye, kain lenan ongopmoknye, seken ning lipmoknye biti, nyabuk.


Bukni, Allah Yahweh elda pia teleb ulule. Winilirye, elda elti, diba tenenyak nang nirya ati, kanye imun upsilye talak ara, elce pia melisulule. Ninye arye, ‘Nun mal olan nang yanuka opsicakʼ tenen, kat keil arye dobuka, cang keil aik ap, poka ap dobikirye, akeil aik pum tam dungnubuka balamak touk, Allah Yahweh ara, ‘El dam ati, yanuka melibuka lyepropsutueʼ tenen, el dam yanganamak nang, sikti, kalekuka melinamle. Kanye imun ning, sik dam kum yanganamle. Weik mok ceplirye, weik mek deipturye, obuka tokna dobuka, ninye asik dam yatua babye, Allah arye elti, diba tenenyak nang ati, kalekuka melipliba, telebuk unamake.


Winipnamne talak ara, ninye si Sealtiel birye deibuknye, Yehuda mutuku noutam talibuka ululnye, Gubenur Zerubabel an tonok ara, ‘Na mi koprop atonunye unalam’ tenen, ereipnamkine. Na mikip deice arye, an uk erepdeipkiniba, ninye deiyoknye kibuka unalame. Ara, talye ati kume. Narye, ‘Wininamne,’ tenelamse ning nirya ara, narye anti mikip arepkiniba, ‘Apil uk talibuka donalam’ tenen, nyapkine. ‘Wininamle’ tenen, wipdeiamkisirye, akunum akuamkisa ati, Allah ati, apiluk donamlame. Winipmanto ara, ninye deiyok nang arye, taruk duk deice dongonyak ning, el si cincin, aning deice sik si sekikirye, mambul surat sekna ning deice, ataruk dongon ning darapdongobikiba, sik si laka upliba, ninye nirya eibikirye, ‘E, ara dipkoprob nun ninye deiyoknye birye, asekne ning dopdeipsuke’ tenen, kel biklamak touk, winipnamkine. Ara, na Allah arye, mikip an deice arepneba, na tenyamse piluk, teleb ubuka dopminyopura, ninye nirya arye, ‘E, ara Allah arye tenyamuk touk pil dopmale,’ tenen, kel bikinamake. Allah arye ayupu nyapkile.” Allah arye nyapdeibukba, nabi Hagai birye, Gubenur Zerubabel ati, nyabuk. Ayupu ton nyabuk. “Allah arye ayupu nyapkile. ‘Aning nirya ara, na talye ati kum nyapsine. Ara, na Allah Yahweh, aning-aning nirya talibuka, deice tam Weik Erenanye unirye, im deice yin talin malaikat nirya, sik weik deiyoknye birye nyapmakina ati, ayupu nirya ara, dipkoprob nong upnamle.’ Allah arye, na nabi Hagai biti, ayupu laka nyapdeipnukce, ‘Yehuda tam talibuka ululnye, Gubenur Zerubabel biti, laka nyalbinulyame,’ nyapdeipnuka ati ara, ayupu nyapkine.” Nabi Hagai arye, Gubenur Zerubabel biti nyabuk.


Ati, anggun nirya moubuka dinamlume! Na Allah arye, el Yosua urasin dam ara, mambul weik keil tonok dobuka, deipman ning, el nong ara, tonok bukni, akeil nong bol deice, tujuh per segi aupmale. Moubuka kekepnululume! Na bidamnye, akeil deice ara, pia teleb-teleb ubukapnirye, mambul yupu sekuka deipnamne. Tonda, aminyan talak ara, tonok sum deice arye, amutuku noutam unamak nang nirya arye, sik malye unamak ning nirya ara, naryuk kum kipdeipnamne. Amutuku nang nirya ati, teleb kipdeipnamsine. Ara, amutuku noutam ululum nang, anggun malye winilulum ning ati, wenebuka opsitinirye, sirya daksitinye bukni, anggun malye winin ning ati, dibina deiyok ning ara, kum deipnamsina ati, nyapsine. Na Allah, im deice unyak yin talen malaikat nirya, sik deiyoknye unirye, ayupu nyapsina ati, aning nirya ara, dipkoprob nong upnamle!


Musa birye Allah ati, akunum morobukopura, Musa birye Korah ap, elti melibuka yanmek nang nirya ati, nyabuk. “Mapmapya bereklyopura, beren tam talak aryuk, Allah elce dipkoprop, ‘Nara atia, na unye ning ara, ani. Tonda, na pil donya deiyoknye bira atia,’ nyana ap, ‘Na dam yanmanto nang ara, ani. Sikda na mapu koproba ara, ani,’ nyabuka, laka nyan ning ara, nyapsilyopura, kekepnamabe,” nyabuk. “Nyabuka, wipsilya deice aryuk, ‘Allah el pil dopnarye, el dam bobinmantonye bira, aniʼ tenen, kel bikikuka unamabe,” Musa birye nyabuk.


Ati ara, Harun ap, el mapu ap, na si deice arye, sik Israel ninye ati, ‘Allah arye, teleb kipdeipsilirye telebuk unamlumʼ tenen, teleb yupu nyabikirye, anggun nong deice deipsikcopura, na Allah arye anggun nirya ati, pia teleb updeipsinirye, melisinyeba, teleb kibuka unamlume. Allah arye ayupu nyapdeibukba, Musa birye binuka sik Israel ninye ati, laka nyabuk.


Ati ara, ninye mutuku-mutuku nirya, na yupu moubuka kekebikirye, ‘Na wininye ning atonun wininamak’ tenen, anggunda na mapu arye, ‘Ninye mutuku-mutuku im sirya, mutuku sirya nirya kekenamak’ tenena ati, peterelbanamlume. Peterepra balamunyebuk, ninye dib tenebikceopura, Allah el si deice ap, el Mi Koprop, Yesus na si deice ap, Allah El Dib Kanye si deice ap, sik diba tenepnamak ninye mek dongopdeipnin banamlume.


Bukni, narye aninye ati, adiparyuk laka kibuka nyapnamne. ‘Anggunda kanye talima pia malye ululum nang anya arye, na dam arye bindoplulume. Anggun winilamluma ara, na kum kel bikamsise. Anggunda na mapu koprop kume. Anggunda na walwale,’ nyapnamne,” Yesus arye nyabuk.


Aik akunum dobukopura, weik mok cebuka, yenya dobukce, mek obukopura, anyaik dam yanuka obuka aknubuk bukni, aik kum loklobuk. Ara mutuku yangan keil deice arye ayukumna yo ikuka dobuka ati, el aik kum loklobuk.


Nyabukura, sikce akeil uang lake kipdeyikopura, Yesus arye asipdeyuk. “Anggun ton akeil uang dipdelulume. Akeil uang deice el ninye urasin atouk puturubuka deibik ning ara, yatanye urasin do? Tonda, ninye si sekuka deibik ning ara, yatanye si do?” nyabuka Yesus arye asipdeyuk. Asipdeyukura, sikce tamubuka, “Ara, weik ninye deiyoknye Kaisar el ning,” nyabik.


‘Anang ati, diba kum tenenamlulume,’ nyapmasina ara, urdem ati kum nyapmasine. Deiyok ara ani. Aminyak talak yanamak nang ton nang arye, ‘Nunda Kristus unyabe,’ nyanamake. Ton nang arye, ‘Kume, nunda Allah el yupu ap, aminyan winipnamle ning ap ati, lake nyana deiyok nang unyabe,’ tilila ati nyanameke. Aning ara, ‘Sik yuk nang arye, nun mambul pil eipsikirye, dib tenebuka melipnamsiak’ tenen, ninye arye winipmanto kum pil donamake. Aninye ara, isa mikip deice arye, ninye arye kum winipmanto pil donamake. Ton nang ara, ‘Apil dolamipyeba yuk nang eipsikirye, ‘E, anang ara, dipkoprop Allah el mikip deice aryuk apil donyake,’ tenepnamsiak’ tenen, mambul pil ton donamake. Apil-afil nirya dopnamak ning ara, Allah el min arye wipdeiamuk ninye ara, ‘Allah batakuka, nunuk melipnamsiak’ tenen, yanuka pil donamake. Sikti lila yupu nyan nang arye wininamak bukni, Allah wipdeiamuk ninye arye, atilila ning dib kum tenenamake. Aninye ara, Allah el ‘Na’ tenen, ninye unyaka anya arye, tilila ning ap, tilila yupu ap ati dib kum tenenamake.


Nyapnamlum bukni, adeiyoknye birye tamubuka nyapnamsile. “Anggun dan mutuku arye yanmalum nang do? Na ap neika kum ulamubu ati, anggunda na pia walwale. Na tam nang kum ululume. Anggunda, pia malye winilalum nang anya arye, anggun adiparyuk yuk-yukak bindoplulume. Na dam kum unamlume,” nyapnamsile.


Yata nang do nirya, na nyasinye yupu kekebikirye, aninguk wininyak nang ara, aik dona pia weik kelnye atonun unyake. Anyaik dona kelnye bira, ‘Aik dopnun’ tenen, tuku palibuka mutuku yangan keil deice ayukumna yo ikuka aik dobuke. Aik akunum dobukopura, akaren ara weik mok cebuka, kumanya dobukce, mek obukopura, anyaik dam yanuka obuka langdibuk bukni, aik ara kum lokuk. Ara mutuku yangan keil deice arye, ayukumna yo ikuka, pia teleb ubuka domuk arye, anyaik ara, kum lokuk.


Sik talye pil dobuka unyak nang ara wininyak bukni, nara pia teleb Domba Weina Deiyoknye unune. Na talinun ninye nirya ara, akunum kel bikamsise. Sikda na domba atonun unyake. Aning atonun, na talinun ninye, na domba atonun ninye nirya arye, nati akunum kel bikamnike.


Alukunyanuk, Yesus arye el mapu ati, ayupu ton nyabuk. Narye wipdeiamsise nang nirya, akunum kel bikamsise anya arye, anggun nirya ati kum nyapsine. Bukni, Mazmur noutamak sekik yupu, nong upnamala ati, ayupu nyapnusine. Mazmur noutamak sekik yupu ara, ani. ‘Na ap neika ubuka din neika dinyam bukni, anye birye nati, ‘Malye kibuka opnamak’ tenen, yanipnunile ati, akunum kintinipmanile.’ (Mazmur 41:9)


Ton nang ara kum kekenyak bukni, yuk nang el nyasilye yupu diba tenebuka kekebicopura, adeice arye, lak akarye nyasinyake. Ara, ‘Allah elda pia dipkoprop yupu uk nyasulule’ tenen, kel kibika ati, sik diba tenenyak deice arye, yuk nang babye eibikirye, ‘Allah ara dib yupu uk nyasulule’ tenen, kel kinyake.


Saulus eibukopura, Saulus dobuka Antiokia mutuku tamubuka boyayuk. Boyayuka ati, Barnabas ap, Saulus ap, Yesus diba tenebuka talyamik nang ap, keting tamun tonok talak arye ton sum arye ton, ton sum arye ton nirya, bulubuka wekelamikbuk, sikce Antiokia mutuku ninye weik Allah yupu peterelamrik. ‘Yesus ulamuka atonun uptibye’ tenen, patalamukbuk piribuka kel kibuka diksukum ulamik nang ati, yuk talye ulamik nang arye, Antiokia mutuku arye deiyok kibikce, “Aninye ara, Kristen ninye unyake,” nyalamik. Ara, minop talak Antiokia mutuku nang arye, deiyok koubuka, “Anang ara, Kristen nang unyake,” nyalamik.


Winipnyopura, yuk ninye mutuku-mutuku nirya ara, minop talak arye min wibuka deiamse ninye, Yahudi yala kum ninye arye, ‘Allah arye lyepnamsil’ tenen, epdenamniakca. Na Allah ati dib tenebikcopura, lyepnamne.


Tonda, min talak ara, Allah arena deiyok nang arye yupu nyabikura, anye birye an si sisibuka morokinyak nang nirya ara, ‘Wenena aik dongopnamne’ tenen, amutuku yayuk,” nyabuk.


Kume, minop talak Allah arye, ‘Israel ninye ara na tenen nang unamak,’ tenyamsukce weiamsuk ninye, Israel ninye ati, kum batakamsuk. Ura, Allah yupu noutamak ara, nabi Elia birye Israel ninye ati tenebukce, nyapdeiyamuk yupu ara, kum kel kiyamlum do? Nabi Elia birye Allah ati ayupu nyabuk.


Ura, anggunce, ‘Yuk ninye nirya ati, bico tenebuka melinamabe,’ nyabuka tenepce arye talye yupu nyabuka, kum wininamlum bukni, dipkoprop yuk ninye ati pia bico tenebuka melipnamlulume. Tonda, malye winin ning aning-aning nirya ati, ‘Aning ara pia nun like’ tenen, bataknamlume. Malye ning tonok babye talibuka kum unamlume. Teleb winin ning yala-yala nirya ati, aninguk talipmunce kanye deibuka diksukumuk unamlume.


Minop talak arye dipdongobuka, wini talak noutamak nirya babye, tonok ninguk tenebuka patalamnuke. Ara, ‘Kristus el si kum kekelamik ninye, sik unyak mutuku noutam akuk peterelbinamne’ tenen, patalamnuke. Winibuka ulamse deiyok ara, ani. Winipmanto ning tenelamse yupu deiyok ara ani. ‘Yuk nang arye, sik aik ayukumna yo min arye ikuka domicak ara, kum dopnamne,’ tenenune. Ayupu nong ara, ‘Yuk nang arye, Allah yupu min arye akunum peterelamik mutuku noutamak ara, narye kum peterelbinamne. Allah el si ap, el yupu ap, min kum kekelamik mutuku noutam akuk peterelbinamane,’ tenelamsirye, apiluk dobuka ulamse.


Tonda, Kristus tukwak mutuku yanuka ulamuk ning deiyok ara, ani. Ara, sik Yahudi yala kum ninye arye, “Se, Allah talye luparabuka wenepsuturye oplopsutu bukni, bico tenyamsukce, lyen ning akunum kintinipdeiamsuke,” nyabuka, ‘Yahudi yala kum ninye nirya arye, Allah el siuk erenamak’ tenen, Kristus yayuke. Kristus arye, Yahudi yala kum ninye ati tenebuka, pil dolamuk ning ara, minop talak Allah el yupu deice seklamik yupu atonun winilule. Ayupu ara ani. “Na ni Allah, Yahudi yala kum ninye kan-kan unamne talak noutamak nirya ara, narye Allah an si ati, pia erenamne. An si erena ati, mot nyanamne,” nyabuk. (2 Samuel 22:50)


Na kayapo, nun kele. Nunce Allah ati diba tenebuka, nun kanye el deiceuk delinyap ninye nirya ati ara, yata winin ning do nirya, ikin usilye ning babye, kanam usilye ning babye, Allah arye awinisilye ning nirya dobuka, nunti teleb kilisulule. Ikin ning usilye talak babye, kanam usilye talak babye, atalak nirya ara, Allah arye pil dobuka melisilya deice arye teleb ulisulule. Winibuka melisilye nang ara, talye nang ati kum bukni, Allah arye, ‘Na mapu ubikirye, na tenyamse pil teleb kibuka donamake’ tenen, yukusilirye, wibuka deilisilye ninye ati nyapsine.


Ribka birye akwa bitinye mapu min kum deiamuk talak ara, Allah arye, ‘Minop talak narye, amapu bitinye ati, tenyamsi touk unamdak’ tenen, akil Ribka ati ayupu nyabuk. ‘Allah arye, “Kwa bitinye mapu deipnalama ara, minyuma deipkwetepnalam mi ara, aminyan deipkwetepnalam mi, el amutamuk pia unamle. Aminyan deipnalam mi ara, deiyok ning talibuka weiknye unamle. El du kopropa ara, weitnye el amutamuk unamle,” Allah arye nyabuk.’ (Kejadian 25:23) Allah arye Ribka ati, ayupu nyabuk talak ara, akwa mapu min kum deibuka ati, sikce teleb winina ap, malye winina ap, min kum winiprik. Bukni, Allah arye tenyamuk touk nyabuk. Tonok ning babye min kum winiprik bukni, Allah arye, ‘Winipnamne,’ tenyamuk touk, Yakup ati wipdeibuk. Wini talak babye, Allah arye wibuka delilamle touk, aninguk unamle. Tonda, ninye arye sik ulamak ning deice arye kum bukni, yukupsilirye, wilisilya deiyoknye, Allah arye tenesilye touk unamle. ‘Anirya ara na tenyamsi touk unamle’ tenen, Allah arye ayupu nyabuk.


Bukni, yata ninye do nirya, Allah ati sik kanye talima, el deiceuk delilamak ninye ara, Allah arye aninye, el kele.


Na kayapu, Allah arye nun nirya ati, ‘Wininamsine,’ nyabuka, arup nyapmasin yupu nyalilamsukba, aupmasila anya arye, yata malye winin ning ap, malye tenen ning ap do nirya, nun nong malye winisilye ning ap, nun kanye talima malye winisilye ning ap, adiparyuk batakibirye, diksukum ninyeuk unamabe. Ara, ‘Nun Ni Koprop Allah ara, pia mambule’ tenen, el si erena ati diksukumuk unamabe. Aning wininamaba ati, na Paulus arye nyapsine.


Winilamlum bukni, wini talak ara, Allah el si akunum kel kiplume. Ura, elce anggunti akunum lyepdopsuke. Allah el ulul ning akunum kel kiplum bukni, el yupu batakuka minop talak talyamlum ning, mikip kum ning, pia malye ning ara, tuba tonap talipre baluluma ara, yata deiyok ati winilulum do? Winimunye ning ara, ‘Amalye ning nirya batakamubu bukni, min arye talyamsuk Isa Mutuku Dongonye, tuba tonap tapu koubuka talipsutu’ tenen, wininmalum do?


Winipmanto yupu ton nyapnusine. Aik dona deiyok nang arye, pia unamle aik dopnamikce talak ara, anyaik ayukumna ati, tuku palibuka, keil yangapdeibikirye, adeice ak, aik nong dolamak atonun, Allah arye el mapu nun nirya ati, teleb kilisulule. Allah el yupu dobuka peterelbana ati, deiya kouna deiyok nang, Rasul nang ap, Allah el yupu laka nyabuka peteresinyaka deiyok nabi-nabi nang ap, sikda aik ayukumna ati, keil yangaldelilamak atonun winisinyake. Pia aik dopnamikce talak ara, aik dika deililamak keil ara, ‘Aik abilinga nirya funguk upnamle’ tenen, konop keil deibikirye, akeil deice, anyaik nong nirya dobuka deililbalamak touk, Kristus el babye, akonop keil atonun, nun Deiyoknye usulule.


Nun Ni Koprop Allah arye, el mapu nirya ara, im deice unyak nang babye, tukwak mutuku unyak nang babye, kwepdeiamsuka anya arye, elda nun ni kopropa usulule. El siuk erebibirye, el mapu unyabe.


Tonda, anggun winimunye ning nirya ati, winibuka tenenamlulume. Winipniba, Allah El Dib Kanye arye, kekebuka eipnilirye, ‘Se, sik malye wininmake,’ tenepnilirye, ‘Malye kanye boplyak’ tenen, malye una kumce, pia diksukumuk unamlume. Allah El Dib Kanye ara, talye ati kum arepsuk bukni, basam amul seklamak atonun, Allah El Dib Kanye arepsuka deice arye, urasin kintinilina atonun winipsuke. Ati, adeice arye, nun kele. ‘Akunum lyepsukce, deksuka ati ara, daulamibya ani, sirya talak weik mambul sum ara, sirya memeproplirye, teleb kipdeipsilirye, el dam bobinamsil’ tenen, bikinyabe.


Aminyan arye yatinya babye, asurat deice arye, Allah elti, dib tenen ninye adiparyuk wininamak ning, ‘Teleb ning ara, ani,’ tenepnamlum tenena ati, ayupu sekeibkine. Allah dib tenebupu ura, kanye dukdongopsuk ninye nirya ara, Allah el mapu silip atonun unyabe. Ninye aik ayukumna yo ikuka dobiceura, adeice arye gat ding abuka tiklamle atonun, Allah Pia Kwemdinanye, el mapu arye el si erebuka, el dipkoprop yupu moubuka talibibirye kalikinyabe.


Bona weik talin nang, sik ning bokuka, yuk ninye arilamakopura, adeice arye, im deice dekna atonun ning weik arepnamle. Winipmanto ara, ayukumna teleb yo arye aik ayukumna ikikcopura, pia gat ubuka mikip ulamle atonun, bona weik talin nang arye yuk nang ati, weik arye melibikcopura, aminyan talak ara, Allah arye meliplibuk, sik babye teleb unamake. Anirya ara, talye ati kume. Deiyok ara, talye una kum bukni, ‘Pia dipkoprop bol koplobuka, kam pia un ning dopropnamak’ tenen, nyapne.


Abraham arye utenebuka dinauk ulamuk. ‘Kume, aminyan talak, na pia unamne mutuku ara, Allah elcuk dopnamle. Allah arye, ‘Winibuka dopnamne,’ teneplirye, aik dona deiyoknye ulule. Aweik aik aruma noutamak ara, tuku palibuka apum noutamak keil deibikirye, anyaik ayukumna yo akeil deice ikuka deibikirye, anyaik nirya dobikiba, pia aunamle. Anyaik ara, tia aik kume. Allah arye dolul aik nirya ara, pia aunamle.’ Abraham arye utenebuka dinauk ulamuk.


Aning ati ara, na kayapu, anyapmasin ning nirya ara, ‘Allah arye winamsil’ tenen, kanye deiplumce, kintinibuka dinauk ululuma anya arye, ‘Allah nyasilye touk, diksukumuk wininamap’ tenen, pia pi dobuka pirilenamlulume. Wininamluma deiyok ara, ani. Ara, ‘Allah arye ninye nirya ati wenebuka bokeipnamsil talak ara, dipdesilirye, “Aninye ara, malye un ning kum upmale. Sikda diksukumuk unyakce, na ap dukdongobuka, teleb-teleb ubuka neika unyabe,” nyabuka deipnamsil’ tenen, teleb ubuka unamlulume.


Anang ara, nun batakuka nun kan-kan arye yukak bindobik bukni, nun kanye ap, sik kanye ap neiktoto kume. Nun diba tenebuka, nun kanye tenenyap atouk nang ulamtingtoura, nun batakna kumce, nun ap neika ulamtibye. Bukni, sikce nun batakuka bindobikce, yuk tam kipdobikbuk, eibupurye, sik ulamik ning kel kibupe. Ara, ‘Aning sik kan-kan danerye, tonoknye babye ton, nun diba tenebuka kanye tenenyap touk, sik babye, diba kum tenenyaka’ tenen, kel bikamubu.


“Yohanes ance eipmom ning pia Malye Kam Ulul Ning ara, min arye tukwak mutuku noutam balamuk. Wini talak tunimapliba, ninye kum elinyak bukni, aminyan talak ara, tukwak mutuku noutam tuku pum bisik bakamlyak douapce, kutukuka tiknamle. Aminyan tuku pum bisik arye weleplyopura, Kristus arye anye biti wenebuka oplopnamle. Allah arye aning-aning nirya kwepdeiyamuk talak arye, ‘Aninye lyepnamne’ tenen, Kam Pia Unamak Ninye Si Sekna Buku, sik si kum sekiamuk ninye ara, aminyan talak aMalye Kam Ulul Ning tuba tonap eipnamake. Minop arye tukwak mutuku balamuk bukni, wini talak kum elinyakbuk, aminyan talak tonap laka yalyeura, eipnamaka ati nyapkine. Malye Kam Ulul Ning ara, elinamak ninye ara, Allah arye ‘Sik kam pia unamak’ tenen, sik si kum sekiamuk ninye ara eibikirye, lukdanamake.”


Anggun ulamlum mutuku ara, na kele. Isa Mutuku Dongonye arye amutuku ninye nirya ati talilulba, el yupu kekebuka dobolbanyake. Amutuku ninye weika arye wininyak bukni, anggunda, nati kum bataknulumce, tuba diba tenebuka dobolyanganululume. Batakna pia kum aryuk, na yupu dobuka peterelamuknye, el si ara Antipas, anggun mutuku malye nang arye oplomika ati, ikin weik ulamsuk bukni, wini talak noutamak babye, nati kum batakamnulume. Tuba diba tenelulume. Bukni, anggun mutuku noutamak ara, Isa Mutuku Dongonye ulule.”


Anyasik dana-dana tam domik cang keil poka amu tam ara, aik ayukumna kopropa ikuka dolamak touk, weik mutuku yangan keil atonun, deiyok keil yuk-yuk 12 deiyamikak eipse. Adeiyok keil urasin laka upmokak ara, yuk-yuk bukni, ninye si 12 ton sekuka deiamik ning eipse. Aninye si 12 nang ara, Domba Mi Atonye, ‘Na yupu dobuka peterena deiyok kouna deiyok nang unamak’ tenen, wipdeiyamuk Rasul nang, sik si akeil deice yuk-yuk, sik si sekuka deiyamika upmokba, eipse.


Allah el mapu nirya arye, el urasin, sik asing arye eipnamake. Sik asok deice Allah el si sekeipnamle.


Anggun Piladelpia mutuku ninye ara, anggun winilulum ning nirya akunum kel bikamsise. Anggun kanye mouplulume. Narye buplan akunum kukeipman ning ara, yuk ninye arye kum tiriksitinge. Na kele, anggunce na pil dona ati, anggun mikip mitik tonunuk upmasil bukni, anggun mikip mitik tonunuk upmasilya babye, na yupu moubuka talimunce, dobolyanganululume. Anggunce, na ap na si ap ati, ‘Nun lik’ tenen, “Anye bira nun walwale,” nyabuka, pia kum batakanululume. Aikin ning ara, anggun dam kum yaliba, narye anggunti winibuka kum asilenamsine.


ကြှနျုပျတို့နောကျလိုကျပါ:

ကြော်ငြာတွေ


ကြော်ငြာတွေ