Winibikopura, Esra birye, sik anang kan-kan tikukabukce, sik nirya ati nyabuk. “Anggunda, kunum malye winilulume. Nun ni Allah arye, ‘Wininamlume, aning ara, pia kum wininamlume,’ nyapdeiamsuk yupu ap, el ap ati, yaninauk ululume. Ara, anggunce Israel mutuku noutam ara, yuk malye winin ning ton, winilulum bukni, anggunce yuk dana-dana tam mutuku kilapu dobuka, doluluma deice arye, pia malye winin ning ton, tabakuka winipmalume. Ati, anggun malye winilamunyeba, pia weik kipninbalyopura, aning deiyok upmalya ati, Allah arye weik tonun wenepnamsile.
2 Timotius 2:16 - Eipomek16 Tonda, ayupu peterenamlyame. Allah pia diksukum ulye touk kum bukni, pia malye-malye yupu nyaltakalamak nang ara, sik yupu kekena kume. Ayupu kekenyak nang ap, ayupu nyanyak nang ap ara, akunum malye wininyak bukni, ayupu nyanyaka deice arye, Allah el ulul ning atonun kum bukni, weika arye tonap, pia malye winipnin banamake. အခန်းကိုကြည့်ပါ။ |
2 Timotius 2:16
19 ပူးပေါင်းရင်းမြစ်များ
Allah Yahweh arye, na nabi Hosea biti, yanuka nyapnuk. ‘Sik Israel yala nang nirya arye, malye yupu nyana ap, talye yupu nyaltakna ap, ninye walana ap, olana ap, pia weik tonun winipdanin banyake. Winibika ati, na Allah ara, Pia Teleb Lek Deiyoknye unune. Tonda narye, ‘Winipnamneʼ nyabuka, nyalin yupu deice arye nyanye touk, aninguk dipkoprob unune. Ati, sik Yehuda yala nang ara, na lik ati, na dam ton, tuba kum yanganamake.
Amalye winibuknye ap, anggun ap neika tuba ululum talak ara, anggunce, ‘Nunda, Allah el mapu unyabe’ tenen, kanye erebuka kwalilulum ning ara, malye winilulume. Ura, domon yupu nyapnusine. Sik roti din ning dapmace nang arye, ‘Roti dapnuyap’ tenen, roti nena deiyok ning mitika aryuk, roti bun dongonyak bukni, roti bun noutamak nirya balirye, aroti nirya weik arye, nelule. Aning atonun, anggun dib tenelulum ninye kan-kan arye, tonok malye ululnye tuba aulamliba, anggun nirya arye, “Yo anye bira dauplye,” nyapmunyopura, aminyan ara, el malye winilamlye ning deice arye, yuk nang nirya ati, malye kilinamsile. Anye ap, anggun ap apia neikauk ulamunyeura, el malye winilula deice arye, anggun teleb buka ululum nang ababye, atonun malye ulinamsile. Winipsilyopura, anggun babye malye wininamlume.
Tonda, nun kele. Allah arye nyapdeibukura, Musa arye sekeiyamsuk mem yupu ara, Allah arye diksukum un ninye ati kum nyabuk. Kume. Ayupu ara, Allah ap, ninye deiyok nang ap, sik amu tam una kum arye, sik nyanyak yupu ati, yaninyak nang, sik wenena ati sekeipsuke. Tonda, ‘Allah el mambul,’ tenena pia kum arye, kanye pia malye-malye wininyak nang ap, tonda, ‘Allah nyasilye yupu ap, el ulul ning ap, talye ning uka,’ tenebikirye, Allah el pia teleb ulul ning, el mingne ning nirya ati, akutubuka nalinyak nang ap, tonda, sik ni yapu koprop ap, sik nin yapu koprop ap, yuk talye nang ap, oltakanyak ninye ap, ati, Allah arye amem yupu nyabukura, Musa arye sekeipsuke.
Allah arye kum nyapdeiamuk bukni, sik yuk nang arye talye nukunyak yupu ap, nong kum upnamle yupu, talye-talye peterelamak yupu ap ara, kekebuka dib tenena meme. Ayupu kekena pia kume. Aning kum bukni, ‘Allah el diksukumuk ulye touk, na babye winiptinye’ tenen, ance moubuka dilamince, kel biknamlyame.
Timotiuso, pia mambul yupu nyapnukine. Allah arye areamkuk ning ara, ‘El dipkoprop yupu ara, malye upnyak’ tenen, bita diminyak arye, pia moubuka talinamlyame. Yata talye yupu do nirya, nong kum upnamle yupu, Allah ati yanin yupu ap, Allah yupu nyasilye touk kum bukni, yuk tilila yupu, talye peteren yupu ap ara, ayupu nirya kekena pia meme. Donga ibuka yukak unamlyame. Atalye yupu nirya ara, ton ninye arye, “Kume, ayupu ara, weik kel bikne yupu. Pia mambul yupu,” nyanyak bukni, dipkoprop ayupu ara, walwal yupu ati ara, talye tilila yupu nyanyake.
Ara, Timotiuso, narye nyapnukin ning ara, ‘Diba tenenyak ninye arye, tuba tenenamake’ tenen, ila tonap, pia peterenauk wininamlame. Ara, “Allah disululce, yupu bokeipnamsile ati, kanye mouplulume,” nyabuka peterenamlam yupu ara, ani. Ara, “Ninye arye talye-talye yupu ati, yu uplibuk, nyaldanyak ning ara, bataklulume,” nyanamlyame. Tonda, “Yupu deice arye waldaluluma ara, teleb kum winililalulume. Yupu ati waldalulum nang ap, waldamunyebuk, eibikirye, ayupu kekenyak nang ap, malyeuk winililanyake,” nyabuka peterenamlame.
Aning mitik tonun, yatanye do nirya, mambul un ning, malye ning yala-yala nirya ati, bataktopura, teleb pil donanye unamle. Winipmanto ara, elda weik aik pum dekna weik ning ulye touk, weik mambul pil talibuka dopmantonye unamle. Atonye, el deiyoknye Allah arye anye biti, el malye winin ning kum kipdeiplyopura, anye biti teleb kipdeipnamle. Teleb akunum winibdeiplyopura, weik mambul pil aning-aning nirya talibuka, el li koprop ati, teleb pil melibuka dopmantonye unamle.
Atalak noutam nirya ara, malye wininyak nang ap, tilila yupu tenepce arye, nyalamak nang ap, malye akunum wininyak bukni, weik arye tonap, tabakuka pia malye wininyake. Sikce yuk nang ati, ‘Tilila ning ati diba tenepnamak’ tenen, tilila yupu talye tenepce arye nyanyake. Aning atonun yuk nang arye aninye ati, tilila yupu nyakibuk, aninye diba tenenamake.
Atilila yupu nyanyak nang ara, sik malye yupu peterenyaka deice arye, anyasik-anyasik ninye akunum diba tenelamik bukni, tonok-tonok ton kum, sik nirya arye, dib tenebik ning, Allah yupu batakuka, weik kanye mambul kilinyake. Ara, atalye yupu nyanyak nang arye, yuk nang ati, peterenyaka deice arye, tonok-tonok kum bukni, anang weika arye minop talak kunum diba tenelamik ning, bataknamyak ati, atilila yupu nyanyak nang arye, yuk nang ati, weik kanye mambul kilinyake. Aning ati ara, atilila yupu, tenepce arye nyanyak ninye ati, “Amalye winin ning ap, tilila yupu nyanmalum ning ap, adiparyuk bataklulume,” nyabuka, yupu sekenamlyame. Amalye nang talye yupu peterenyaka deiyok ara, ‘Yo bok weik arye dolonamap’ tenen, tilila yupu tenepce arye, nyanyake.
Sik Kerit mutuku unyak ninye ati, mikip asa arye wenepminyopura, aKerit mutuku unyak kili sal ara, Yahudi yala ninye arye, talye-talye nuklamak yupu, nong kum upnamle yupu, minop talak nuklamik yupu ara, tuba kum kekenamake. Tonda, Allah yupu batakuka, yaninyak ninye arye, ‘Winipnamlume,’ nyabuka, tilila nyanyak yupu ton, tuba kum kekenamake.
Ayupu kekebuka dobolbanyaba deice arye, teleb kilisul bukni, na mi Tituso, sik yuk nang pia walwal nang arye, nong kum upnamle ning ati, talye yupu deice arye nyalalamik ning ap, sik apu yapu arye, dadeipdanin yangalamikce, nyapdanin yangalamik yupu ap, Allah arye, “Aning wininamlulume. Aning ara, pia kum wininamlulume,” nyapdeibukba, Musa birye sekeiyamsuk mem yupu nirya ati, yu kanye bobuka derelalamak yupu ap, ance nyalana meme. Amalye winin ning donga anibuka, batakalongonamlyame. Ayupu atonun yupu nirya ara, kum melipsutu atia. Tonda ayupu nirya ara, nong dib kum upnamle ati ara, ayupu kekena ap, yuk nang ap nyalana ap ara, pia kum wininalyame.
Tonda, atalak noutamak nirya ara, anggun nirya arye, anggun neika ululum ninye ati, moubuka kalekelanamlulume. Ara, Allah arye nun lyena ati, bico tenesilirye, el kanye aniryuk talye melisilye ning akunum kekebuka kel kinyak bukni, lik upliba, ‘Dawaplye, tenebuka, batakicak’ tenen, moubuka kalekelanamlulume. Tonda, ‘Allah arye bataksilyak’ tenen, ton nang malye winibikiba, yuk nang weik yu upliba, adeice arye ninye weika arye tonap tabakuka, malye kanye bobuka malye winibikirye, ‘Sik nirya malye winipdeipdacak’ tenen, pia moubuka kalekelanamlulume. Ara, urdem ati kum nyapsine. Ton tam nang arye, yu weik upliba, yuk tam nang ton, aning eibuka kekebicopura, ninye weikia arye tonap, yu upliba, ‘Sik nirya malye winibicak’ tenen, nyapsine. ‘Winipsilyak’ tenen, moubuka kalekelanamlulume.
Allah arye anang dobuka, pia kunuknak dongopnamla ara, talya urdem ati kume. Ara, atilila yupu nyaninye arye, “Nunda weik mambul ning winipnamabe,” nyabuka, talye yupu uk nyaltakanyakce, sik kanye erebuka kwalinyake dilanyaka atia. Tonda, talye tukwak ninye nirya ara, talima noutamak malye ning aupsuka anya arye, yuk ninye malye winin ning pataplibuk, tenenyak ning ati ara, atilila nang arye, nyanyake. “Kume. Winina ara, telebe uka,” nyanyake. Nyabica deice arye, yuk nang sik kanye lilonyake. Sikce talima lolonyak ninye ara, winiryuk deiyok kibuka diba tenepmak bukni, kanye min kum wisibuk nang ati nyapne. Anang arye, sik malye nang winilamak ning batakuka, ‘Diksukumuk unamap’ tenen, winiryuk deiyok kipmak bukni, talima wisina kum ninye ati nyapne.
Tonda, Allah diba tenen nang, sik kan-kan bukni, ton nang ara, atilila yupu peteren nang, pia malye-malye ulamice ning eibikirye, ‘Aninguk winipnuyabe,’ tenebuka, pia malye wininamake. Malye-malye ubicopura, yuk ninye ton eibikirye, Yesus el dipkoprop bisik ati nyanamake. “Kume. Anang ara, malye-malye ulamica ati, Yesus nyanyak yupu ara, talye yupu uka,” nyabikirye, malye yupu nyabuka deilinamsiake.
Minyuma yayuknye, malye ulirye, kam tuba ululnye birye, ‘Aminyanye birye melipnunil’ tenen, mikip weik aribukba, aminyan tuku pum tam arye, kutukuka tikilyayuk Malinye birye, pia mambul pil weik dolamuk. Amambul pil dolamuka deice arye, sik tukwak mutuku tuba ulamik ninye arye, eltilila nyalamuk yupu nirya dib tenelamik. Tilila ninguk dib tenelamika ati, aminyan talak tikilyayuknye birye nyapdeibukba, tukwak ninye nirya arye, minyuma yayuknye, el urasin atonun ning, sik bidamang taruk arye puturubuka memepdeibik. Ara el kisok tonok ning, ya arye cobuka obik bukni, kum diamukce, el kisok dilauk uamuknye, ‘El ti si erepnamap’ tenen, amalye kam ulul ning el urasin atonun puturupdeibik.
Apia malye ning kam ulul ning, el kisok tekbarye ubuk bukni, tonok ning ara asok deice omika dila ubuk. Talinye ulamtopura, akunum deamtu bukni, omika dila niamukba, kam tuba unmokce, omika dila uamukba, eipse. Tukwak mutuku im sirya, mutuku sirya nirya tuba unmek ninye arye, amalye kam ulul ning ati, ‘Se, el kisok deice dila weik ning aubuk anya arye, akunum deamtu bukni, tuba kam ulule’ tenen, lukdayikce, el nyalamuk yupu kekebuka dobolbalamik.
ကြော်ငြာတွေ