Tonda ance, “Aning ara, wininalulume. Aning ara, pia kum wininamlulume. Teleb winina ara ani,” nyapdeiamsulum yupu dobuka, narye ninye deiyok talibuka wininyak nang, kekena ak nirya laka nyalbinamne. Ayupu bobuka, ninye deiyok nang, sisin nang kekena ati, laka nyalbinamne talak ara, alye ton pia kum dakanamne.
2 Timotius 1:8 - Eipomek8 Aning ati ara, nun Deiyoknye Yesus, el yupu laka nyabuka peterena ati, ilil una ap, tonda, ‘Se, yuk nang arye akutunamniak do?’ tenen, alye una ap, pia kum unamlyame. Aning atonun, ‘Se, na peterenulula deiyoknye Paulus ara, tapu koubuka wenena aik dongobik ati, na alye dakuka unamne,’ tenena meme. Aning nirya kum bukni, narye ninye lyena ati, Yesus el laka teleb yupu peterepnibuk, malye nang arye, na nong deice ikin ning weik delininyak touk, an babye atonun, ‘Winipnica babye, telebe uka,’ tenenamlyame. Utenebuka an mikip yabuka unamlama ara, Allah el mikip melibuka arisilya deice arye unamlame. အခန်းကိုကြည့်ပါ။ |
2 Timotius 1:8
48 ပူးပေါင်းရင်းမြစ်များ
Allah el si Yahweh arye, “Aning wininamlulume. Aning ara, pia kum wininamlulume,” nyapdeipsuk yupu nirya ara, pia telebuk ulule. Ayupu moubuka kekebipyopura, nun kanye ap, talima ap kam kilisulule. Ikin usilye talak ara, kanye talima kwa disulule. Allah Yahweh arye ninye ati, “Teleb winin bisik ani,” nyapdeiamsuk yupu nirya ara, pia diksukum yupu ulula ati, nunce, ‘Ayupu ara, dib do, tilila do?’ tenen, kanye kum bokoltonamsile. Allah arye ayupu nyalamuk touk, nong dipkoprob upra banamla ati ara, ayupu nirya ara, moubuka diba tenepnamabe. Walwal nang babye, Allah arye anyapdeiamsuk yupu, pia moubuka kekebikirye, talibibyopura, sik kel kibuka bakirye, aminyan talak, sik babye kel ninye unamake.
“Anggunda moubuka kekepnululume! Anggunce, ‘Se, diksukum winina ara, weik tonun patasululeʼ tenen, moubuka kel biklum nang ati nyapsine. Ara, narye, ‘Aning ara wininamlume, aning ara pia kum wininamlume. Teleb una ara ani,’ nyabuka peterelamsise yupu akunum taliplumce, anggun kanye talima noutam boplumce, aninguk talibuka ululum nang ati nyapsine. Anggunce na yupu kekepnululume! Sik yuk talye unyak nang, tukwak mutuku unyak nang arye, talye-talye yupu nyabuka, nalisinyak yupu ap, nalibuka ik-ik nyasinyak yupu ap, minin yupu nyasinyaka ap nirya babye, ilil una pia kume. Tonda, talye nang arye anggunti ara, ‘Sikda malye unyake. Sikda talye ning ati, diba tenenyake,’ nyapsikirye, malye yupu anggun deice nyasinyak nang ati ara, anggunce, ilil una kumce, ‘Se, yata ning deiyok ati ayupu nyasinyak do?’ tenen, kanye teniltona pia kum unamlume. Atalye nang arye, anggunti, malye yupu nyapnamsiyak bukni, anggunda ilil una ap, mikip mitang una ap ara pia kum unamlume. Deiyok ara, ani.
Anggun ton moubuka tenipnululume. Allah arye, nati nyapnukba, sekeipmasin yupu atonun, tenibuka kum nyanyak nang nirya ara, talye nong yokuk unyake. Dan nang do nirya, na sekeipmasin yupu atonun tenebuka, kum nyanyak nang nirya ara, aminyan talak sikda dirina ak kum unamake. Sik nirya ara, dipkoprob kum winipnamake.
Wini talak unyak nang ara, wininyake. ‘Ninye arye el bidamnye kil batakuka, yuk kil ubula neika malamak touk, nati diba’ tenena kumce, na batakuka yuk ning eibuka, dobolbanyakce, pia malye-malye wininyake. Wininyaka ati, anggun babye, sik anang kan-kan umunce, na nong ap, na yupu ap, ati, ‘Nun opsicak’ tenen, anggun ilil ati alye upsile bukni, bataknumunyopura, na Ninye Mi Koprop Atonunye birye aminyan sirya talak, anggun babye, bataknamsine. Ara, na ni el urasin pia teleb ulirye, dirina weik ulya atonun, na babye atonun unyopura, Allah arye dirina kipdeibukura, im deice unyak nang, malaikat ap, ansiniprobibyopura, tukwak yanamap, talak ati nyapsine.” Yesus arye awekmek nang ati nyabuk.
Yata nang do nirya, anggun anang kan-kan upmunce, na nong ap, na yupu ap ati, ‘Yesus ati diba tenebibyeura, yuk nang arye nun nong deice ikin ning deipsicak do, opsicak do?’ tenen, anggun ilil ati alye usilyeura, nati bataknumunyopura, aminyan sirya talak ara ikin weik upnamsile. Ara Allah daunmalya ani, na Ninye Mi Koprop Atonunye birye aminyan talak, ‘Anang ara, na mapu kume,’ nyabuka anggunti bataknamsine. Ara, na ni el urasin pia teleb ulirye, dirina weik ulya atonun, na babye, atouk upnyopura, Allah arye kwepdeibukak im deice unyak nang malaikat ap, ansinipropbibirye, tukwak yanamap talak ati nyapsine. Yesus arye awekmek nang ati nyabuk.
Elce nati laka nyapnamle bukni, anggunda na mapu ababye, ‘Yuk ninye nirya kekenamak’ tenen, nati adiparyuk laka nyalbinamlume. Na pil deiyok kipse talak arye diprongobuka, wini talak nirya ara, na ap neika unyaba ati, anggunce tonap nati, laka nyalbinamlume.” Yesus arye el wipdeiamuk nang ati nyabuk.
Batakdongobikura, Yesus wipdeiamuk nang Sandeheren nang wekmek ak batakuka yukak biyikopura, utenebik. E sik Sandeheren nang arye, ‘Yesus ap, Yesus el si ap ati, nun like. Ati anang onmabe,’ tenepmasiakce, opmasiaka ati, ‘Allah arye nunti kanye deipmasila ati, opmasiaka babye, telebuka,’ tenebikce kanye deibuka kil-kil asa biyik.
Ura, yata mutuku ninye do nirya, yuk nang arye Allah el laka teleb yupu, ninye lyen yupu peterebikiba, kekebikirye dib tenebicopura, Allah el mikip deice arye aninye lyelule. Allah el yupu ati tuba-tuba dib tenenyak ninye ara, Allah arye aninye ati lyelule. Minyuma ning ara, Yahudi yala ninye lyelule. Aminyan talak ara, Yunani yala ninye babye kekebuka dib tenebicopura, lyelule. Ati ara, ‘Allah el lak teleb yupu, ninye lyena yupu dobuka peterenamne do, kum do?’ tenen, alye kum dakalanune. Teniltona kum diparyuk, kanye deipnirye, pia pi dobuka peterenauk unune.
Allah el siuk weik arye erenamabe. Na Paulus arye, Yesus Kristus ninye lyena ati el laka teleb yupu dobuka peteresunune. Apeteresinye yupu deice arye, diba tenepmunyopura, Allah arye anggun kanye talima mikip kilisululba, pia batakna kumce pia talibuka unamlume. Allah elcuk mikip ulisulule. Mikip kilisululba, minop talak arye dipdongobuka, danoutam talak nirya ara, Allah arye ninye lyena ati, Yesus el laka teleb yupu ara duknyamukba ninye arye kum kekepmanto ulamik. Bukni, wini talak ara ayupu lakak kibukba, peteresinyabe.
Kanye imun usilye ning tenena ati, minop talak Mazmur yupu noutamak sekamik yupu nyapnusine. Ayupu ara ani. ‘Allah anda, ‘Na’ tenen ninye unyaba anya arye, malye nang arye ‘Nun like’ tenen, tuba-tuba opmanto usinyake. Ara ninye arye talye domba basam ati, ‘Domba basam ara talye ninguk ulula anya arye, talye luparabuka optibye,’ tenenyak touk, sik malye nang arye, nunti atonun tenesinyake.’ (Mazmur 44:22)
Nabi Yesaya birye sekamuk yupu ara, ani. ‘Allah arye domona yupu deice nyabuk. Anggun moubuka dipdelulume. Sion mutuku bana ati, bisik noutamak ara, yan dum dukne keil deipne. Ninye arye talye luparabuka bakiba, akeil deice arye, sik yan dum dukliba, kote saknamake. Bukni, abisik noutamak deipnamnanye bira, pia diksukumnye unamla anya arye, elti, diba tenebice ninye nirya ara, na Allah arye dipkoprop lyepnamna ati, alye pia kum dakdanamake. Aning ara, nong upnamle anya arye, sikce nati diba tenebikcopura, aminyan talak, ‘Se, nunda talye ninguk diba tenelamupu’ tenen, sik talima pia boktoplirye, kum uk dinamle. Dipkoprop na Allah arye aninye lyepnamne. Ati, aninye ara alye pia kum alye dakalanamake.’ (Yesaya 28:16)
Tonda, tilila yupu kum nyanyap bukni, pia dipkoprop ninguk nyana ap; Allah el mikip arisilibuk, adeice arye moubuka pil dona ap; aning-aning nirya wininyabe. Anirya ara, yin nang arye, taruk dana-dana tam yin talibuka olbalamak touk, malye winina pia kum, diksukumuk unyaba deice arye, Allah el pil donyabe.
Na kayapu, arup nyapmasin touk, Allah arye, nun nirya ati, Kristus pil dopsuk deice arye, nong tonok atonun kibuka, kanye talima dukdongopsuka ati ara, narye anggun Yahudi yala kum ninye ati, Allah morosunune. Wini talak ara, narye anggunti, Yesus Kristus el yupu peterelamsise ati, yu nang arye, na tomobuka tapu koubuka wenena aik dongopnikba, unune.
Ara, na kayapu. Nun Deiyoknye Yesus ati pil dolamsiba, yu nang arye, tomopnikce, tapu koubuka wenena aik dongopnikba, asukumuk unune. Narye anggunti nyapsine. Allah ati dib teneplum arye, akunum lyepsuka ati ara, Allah arye anggunti, ‘Na mapu unamaka ati, winibuka, winibuka diksukumuk wininamake,’ tenyamsuk atonun, adiparyuk aninguk tenebuka unamlulume, nyapsine.
Ara, na kayapu, anyapnusin yupu ara, talye ati kum nyapsine. Kume, nara nun Deiyoknye Kristus, el pil melina deiyoknye ununa deice arye, ayupu nyapdeipnusine. Anggun Yahudi yala kum nang ara, dib tenena kumce, anggun kanye talima noutamak talye-talye tenenyak nang deice arye, malye-malye winilamak touk, anggun Efesus mutuku nang arye, sik talye nang wininyak atonun tuba kum wininamlume.
Narye anggunti bico tenesununa ati, arup asurat deice nyapmasin yupu ara, telebe uka. Ara, na kele, tapu koubuka wenena aik dongopnikbuk, aunye talak, Allah el laka teleb yupu, ninye lyen yupu ati peterenye talak babye, Allah arye melinulule. Atouk, malye nang lik tenebuka, Allah yupu ati, “Ayupu ara, talye yupu uka,” nyaninyak bukni, narye, “Kume, deiyok ara ani,” nyabuka, lipsisikuka peterenun talak babye, Allah pia bico tenenululce melinulule. Allah arye, nati wininulul touk, anggun babye atouk, anggun ati pia bico tenebuka, melisulula anya arye, na weik arye kanye delisunune. Allah arye, anggunti melisulule, akunum kel kiyamsise. Ati, ‘Allah arye, anggun talima ak pil dosilye ning ara, teleb ubuka sirya daknamsile,’ tenesunun ara, telebe uka.
‘Se, aning winiptinye’ tenen, pia patapnil ning ara, nyapnusine. Ara, dipkoprop Kristus ap, talima dukdongobuka unirye, Allah arye, Kristus kam bukeibukura, winira Kristus mikip weik ulye touk, ‘Na babye, winiptinye’ tenen, patanulule. Tonda, Yesus el kanye imun ning weik ulamuka ani, nun malye winina ati dibuk touk, na babye ikine upnutopura, akunum diamik ninye atouk uptinye. Akunum diamik ninye atonun uptinye nyanmana ara, diamik ninye, malye winin ning nirya kum patalirye, malye kum winilamak touk, ‘Na babye, malye ning kum patapnutu ura, malye kum winipnamne’ tenen, patanulule. Ara, Kristus arye, el mikip weik arinulula deice arye, ‘Malye ning arye, na talima kum lilonamnile’ tenen, nyapne.
Tonda, Allah el weik mikip weik ulamle touk, elce anggun Kolose ninye ati, mikip weik arisilibuk, kanye imun ning weik upsilya babye, ‘Batakana pia kum arye, pia pi dobuka pil domunce, kanye teniltona kum arye, telebuk unamlume. Tonda, ikin upsilya babye, yuk nang ati, minpola arye yu uplibuk, pil kum batakanamlum bukni, nimalye aryuk unamak’ tenen, nunce anggunti Allah morosinyame.
Wini talak ara, na nong deice ikin ning deilinikibuk, ikin weik unulul bukni, tuba kanye deibuka unune. Ara, anggun kele, anggun ap, yuk mutuku ninye ap melina ati, Allah el laka teleb yupu peterenye ati, yuk nang arye, ‘Apil dolulnye ara, nun like’ tenen, ikin ning na nong deice delininyake. Yesus Kristus arye nati, ‘Na dib tenena ninye melina ati, Paulus ara, pil dolibuk, yuk nang arye ikin ning el nong deice delinamake,’ tenelamnukce, wipdeipnuka anya arye, apiluk do nirye sirya dakdibanamne. Kristus el nong deice ikin ning delilamikba, ikin ulamuk ning atonun, na nong deice delinamniyak ning ara, tuba aupmanila ati, sirya dakaldongonamne. Yesus diba tenebibya ati, Allah el mapu kipdeipsilye ninye ara, nunda Yesus Kristus el nong atouk unyabe. Ara, el tam ninye, el amu tam unyaba ati nyapne.
Yesus elce, ‘Ninye mutuku-mutuku nirya sik malye unyak ning kum daneipnirye, dekuka lyepnamne’ tenen, elce el nonguk arepsukbuk obik. Ara, nun malye winin ning ati, talye oplopsutu bukni, Yesus arye nun pununa ati dipsuke. Allah arye, ‘Teleb talak ara, atalakuk,’ tenyamuk touk winibuk. Allah arye, ‘Ninye nirya lyeptinye’ tenen, patalamuka ara, awinibuka deice arye akunum lak kipdeipsuke.
Bukni wini talak ara, nun lyen ning nirya ara, Yesus Kristus nun Lyena Deiyoknye tukwak mutuku akunum yayuk deice arye, akunum lak kipsukura, kel kinyabe. Yesus Kristus el pil dopsuka deice arye, ninye dipna deiyok ning akunum, kum daneibuk. Winipsukce, ninye lyena ati, Yesus el lak teleb yupu peterenyaka deice arye, dipkoprop kam una deiyok ning ap, bola koplobuka, pia kam unamap ning ap ara, akunum lak kibuka ati, kel kinyabe.
‘Apil donamle’ tenen, wipdeipnuka ati, apiluk donuna ati ara, yuk ninye arye, ‘Nun lik’ tenen, ikin ning weika arye, na nong deice delininyak ati ara, na kanye mambul kanye bobuka, ikin unulule. Bukni, ikin ning na nong deice upnilya babye, narye, ‘Se’ tenen, alye kum dakanune. Ura, talye ati kume. Deiyok ara, ani. Na kanye teniltona pia kum aniryuk, na diba tenyamsinye bira, na kele. Narye Allah ati, ‘Pia moubuka kalikinamnel’ tenen, el deiceuk deiamse ning nirya ara, min kum kum datue. Wini talak arye dipdongobuka, Yesus tamubuka el yanamle talak bukni, anoutam talak nirya ara, Allah arye moubuka kaliknilirye, dinamnile. Na Paulus arye nyapne.
Bukni, Onesiporus ap, el aik unyak ninye ap, nirya ati ara, ‘Allah arye aninye nirya ati, wenena kumce, sik patana atonun, mitang arye melibuka arenamle’ tenen, moronune. Deiyok ara, tonok talakuk kum bukni, Onesiporus ara, anirya talak nirya weik arye, na kanye kwa melilamnuke. Tonda elce nati, ‘Se, Paulus ara, tapu koubuka wenena aik dongobik ati, na alye upnilyak’ tenen, ‘El dam kum binune,’ pia kum tenelamnuk.
Tonda, sik yin talin nang arye, ‘Ikin ning awabsilya babye, telebuka,’ tenebikirye, pia pi dobuka pil dolamak touk, na ap, na neiktoto unyap nang ap, ikin upsilibuk, aning tenena kum arye, ‘Yesus Kristus el pil don nang, el yin talin nang atonun unamabe’ tenen, nyabe. Wininyap touk, Timotius an babye, atonun tenebuka unamlame.
Yesus Kristus arye ninye lyena ati, el laka teleb yupu peterenibuk, yuk nang arye, ‘Nun lik’ tenen, ikin ning weik na nong deice deilinikibuk, kanye imun kanye bobuka unune. Tonda, sik pia malye unyak ninye tomobikirye, tapu koubuka wenena aik dongolamak touk, ayupu peterepnin balamsibuk, tapu koubuka wenena aik dongopnike. Bukni, Allah el yupu ara, ninye arye tapu kum kouptinge. El yupu peterenyakbuk, ninye kekebikirye, diba tenebuka weik arye biknin banamake.
Anang nirya bataknik bukni, nun deiyoknye Yesus, na dam yanuka melipnuka deice arye, el mikip arepnukbuk, na yupu teleb ubuka nyapse deice arye, atalak bulupmek Yahudi yala kum ninye nirya arye, Allah el ninye lyen yupu kekebik. Atalak ara, aninye arye talye merekukua oplopmanitinge. Bukni, Yesus arye lobuka lyepnuka ati, sikce kum opnike.
Sikda wininamak bukni, Timotius anuk ara, kanye teniltona ap, kanye walwal una ap, kum unamlyame. Sirya talak nirya ara, kanye moupmince, moubuka tenenamlyame. Ikin ning weik aupkilya babye, batakna kum arye, pia pi dobuka pil donamlyame. Allah yupu min kum kekelamik ninye ara, ‘Sik ton kekeptinge’ tenen, Allah el ninye lyen yupu laka peterelbanauk unamlyame. Allah arye areamkuk pil nirya ara, tonok ning babye, batakna kum arye, sirya dakanamlyame.
Anggunda, Allah ati diba teneluluma ati, Allah arye, ‘Na mapu malye ubicak’ tenen, el mikip deice arye kalekuka lelilongosulule. Wini talak arye dipdongobuka, dotalak yanamle talak nirya ara, el mikip arye kalekuka lelisilyebuk, sirya daknamle talak akunum uplyopura, Allah arye lyen ning akunum kintiniyeiamsuk ati, Yesus aminyan talak tamubuka yalyopura, lyepnamsile. Atalak ara alyen ning nirya laka daneipnamsile.
Allah arye anggun nirya ati, ‘Yuk malye bisik bimunyak’ tenen, talibuka balirye, melibuka disululnye ulule. Allah, el melisilirye deice arye, malye kum winiyabe. Ara, pia ati, kalikuka melisulula atia. Tonda, Allah arye el mikip arisilirye, el melisilya deice arye, pia daulamibya ani, sirya talak ara, nun nonge dopsilirye, malye ning nirya pia kum kipdeipsilyopura, el dam ara, pia teleb dirina damak deipsilyeura, kanye deibuka, pia telebuk unamabe.
Ura, nara diba tenepsa ati, anggun du kopropa atonun usunune. Tonda, anggun ap, na ap, diba tenebupa deice, Yesus arye talisiliba, el ap kanye talima dukdongobuka ubirye, el pil donyapa ati, ikin ning, nun nong deice weika arye delisinyake. Delisinyakba, kanye imun kanye usilya babye, batakna kum, pia pi dobuka, lamapdongobuka arye, el pil tuba donyabe. Anggun babye, na babye, anisibuka unyabe. Ura, Allah el yupu ap, Yesus arye dipkoprop nyalamsuk yupu ap, dobuka peterelamsa ati ara, tapu koubukapnikce, laut mekwen arye sekdongamuk mutuku, mek dum-dumak, el si Pulau Patmos mutuku deipnikba, ulamse.
“Allah el mapu nirya ara, Domba Mi Atonye, el ining sik lyena ati arebuk deice arye, Isa Mutuku Dongonye malye kibik. Tonda, aninye arye, “Ninye lyena ati laka teleb yupu ani,” nyabuka lak akarye, peterelamika deice arye, Isa Mutuku Dongonye malye kibuka nirya obik. Aninye nirya arye, ‘Kume, nun kam unyaba ara weik mambule, nun kam una ara nun dokola ati ara, opsicak ati, Allah yupu nyanyaba ara bataknuyabe’ tenen, ilil kum ulamuk. ‘Malye nang arye opsica babye, telebe uka,’ tenelamik. Aning nirya winilamika deice arye, Isa Mutuku Dongonye ati, malye kibuka ulamik.
Nyapnukopura, narye, ‘Anye binyak kipnun’ tenen, el dam gutam tuku dipdongobuka bukmase bukni, elce nyapnuk. “Amio, winina ara meme. An ap, an kwit yapu aton ninye ap, sik nirya arye Yesus el yupu talibuka, el piluk dolulume. Anggunce aning winilulum touk, na babye, el pil melinanyeuk ununa ati ara, ance nati si erena meme. Allah eltibuk kibuka, si erenamlulume. Anggun nirya arye, ‘Yuk ninye ton Yesus el laka teleb yupu, ninye lyen yupu kekenamak’ tenen, ayupu dobuka peterelamluma atonun, sik minop talak ulamikce, Allah yupu laka nyalamik nang, nabi-nabi nang babye, Yesus ati yupu nyalamik,” nyapnuke.
ကြော်ငြာတွေ