Diba na ni Allah, narye an siuk erekunune. Tonda, ‘Allah elcuk melinamnil’ tenen, antibuk, diba tenebuka unune. Na nio, ‘Na mal olan nang arye, malye kipdeipnikiba, na alye daknyak’ tenen, ance kaliknamnilam’ tenen, moropkine. Tonda, ‘Na mal olan nang arye, opnikcopura, weik yupu arye nalipnikcak’ tenen, ‘Allah ance kaliknamnilam’ tenen, moropkine na nio.
2 Timotius 1:12 - Eipomek12 ‘Apil donamle’ tenen, wipdeipnuka ati, apiluk donuna ati ara, yuk ninye arye, ‘Nun lik’ tenen, ikin ning weika arye, na nong deice delininyak ati ara, na kanye mambul kanye bobuka, ikin unulule. Bukni, ikin ning na nong deice upnilya babye, narye, ‘Se’ tenen, alye kum dakanune. Ura, talye ati kume. Deiyok ara, ani. Na kanye teniltona pia kum aniryuk, na diba tenyamsinye bira, na kele. Narye Allah ati, ‘Pia moubuka kalikinamnel’ tenen, el deiceuk deiamse ning nirya ara, min kum kum datue. Wini talak arye dipdongobuka, Yesus tamubuka el yanamle talak bukni, anoutam talak nirya ara, Allah arye moubuka kaliknilirye, dinamnile. Na Paulus arye nyapne. အခန်းကိုကြည့်ပါ။ |
2 Timotius 1:12
58 ပူးပေါင်းရင်းမြစ်များ
Tonda, yu nang arye nati, ‘Anye bira, opnuyap’ tenen, ninye onak akunum kintibikce, ninye on ning, el si jaring, dungnubuka deibika noutam arye, ‘Ance lobuka lyepnamnilam’ tenen, moropkine na nio! Aning ara, talye ati, kum morokunune. Kume, ‘Na on nang arye, opnikcak’ tenen, an damuk yanuka unune. Tonda, anda, na Lyena Deiyoknye unilyama ati, antibuk morokunune na nio.
Ance eilinilyama ati, na ikin unilye ning nirya, ancuk nukmince, tuba tenilyama ati, na ikin upniliba, na mapmanto kum unye talak nirya ara, ancuk na ikin unulul ning nukmince, tenenauk unilyame. Tonda na ni Allah, na ikin upniliba, engepnirye, na asing maka saknilyopura, ance na asing maka dopropmince, mitik mek makau, el si botol noutam dikilongonilyame. Diba, ance, ‘Anye ikin unmokba, el asing maka sakmok ning nirya ara, ‘Tuba tenepnamne’ tenen, an buku noutam aryuk, sekenimince, tuba bikilyame.
Dipkoprob, Allah elda nun Lyena Deiyoknye ulule. Nunce el tibuk, diba tenenamabe. Nunda, ilil kum unamsil bukni, wini talak ara, ‘Allah elcuk, nunti melibuka lyedopnamsilʼ tenen, diba tenenamabe. Aning ara, talye ati kum bukni, deiyok ara, nun ni koproba Allah, el si Yahweh, elce nun mikip kilisulule. Ati ara, mot sena deice nunda el siuk erenamabe. Tonda, “Nun Lyena Deiyoknye bira, Allah eluk ulule,” nyabuka, Allah el si erenamlulume.
Aning-aning talibuka deice tam Weik Erena Deiyoknye ululnye, Allah Yahweh arye, ‘Wininamne,’ tenelye touk ulule. Elda Weik Erenanye birye, na melinulula ati, sik malye nang ati alye kum daknamne. Elce tenelye touk winipnamne. Nara Allah arye akunum melinulula anya arye, pia pi dobuka mikip arye pil donamne. Na kele, Allah melinilya deice arye alye kum daknamne. Elce tenelye touk, apiluk dipkoprob donamne.”
Ati, anggunda ‘Yuk ninye arye, nalibuka malye nyapsikiba, alye upsilirye ilil unamsil do?’ kum tenenamlume. Imun kanye bobuka mitang asa kum unamlume. Alye kum dakalanamluma ati nyapsine. Atenen ning ara, adiparyuk bataknamlume. Winipmanto ara, anggun wel ulamlum talak arye, malye ulamlumba, alye ulamsuk ning ara, kekebuka kum dukdongobuka ulamlum ning ara, tuba tonap kum teninamlume. Tonda, sal arye kilapu domica ani, youwak batakiceba, mambul kanye bobuka ulamak touk, kum unamlume. Aning atonun ulamlum bukni, aning babye tonap tuba kum teninamlume. ‘Nun biyuk unyabe,’ kum tenenamlume.
Bukni, Allah Yahweh elda pia teleb ulule. Winilirye, elda elti, diba tenenyak nang nirya ati, kanye imun upsilye talak ara, elce pia melisulule. Ninye arye, ‘Nun mal olan nang yanuka opsicakʼ tenen, kat keil arye dobuka, cang keil aik ap, poka ap dobikirye, akeil aik pum tam dungnubuka balamak touk, Allah Yahweh ara, ‘El dam ati, yanuka melibuka lyepropsutueʼ tenen, el dam yanganamak nang, sikti, kalekuka melinamle. Kanye imun ning, sik dam kum yanganamle. Weik mok ceplirye, weik mek deipturye, obuka tokna dobuka, ninye asik dam yatua babye, Allah arye elti, diba tenenyak nang ati, kalekuka melipliba, telebuk unamake.
Ninye mutuku-mutuku nirya arye, el nonge ap, el si ap deice arye, diba tenebikirye, ‘El dem aryuk lyepnamsile’ tenen, sik kanye talima el deiceuk delinamake.’ Allah arye nyapdeibukba, Yesaya arye sekuk. (Yesaya 42:1-4) Ayupu ara, Yesaya arye sekeiamuk. Yesus atalak arye nyabuk yupu nirya ara, ‘Yesaya nyalamuk yupu deice winipnamle’ tenen, nyabuk.
Yesus arye ayupu akunum nyabukopura, ayupu ton nyabuk. Na dipkoprop nyapsine. Yata nang do nirya, na yanamne sum ara, ‘Asum yanamle do, asum noutamak ara beren tam yanamle do, sintam yanamle do?’ tenen, kum kel bikinyake. Allah el im deice pil don nang, malaikat babye kum kel bikik. Tonda, Allah el Mi Koprop na babye, kum bikse. Na ni Allah elcuk, ‘Sirya talak daknamle talak ani’ tenen, akunum tenyamuka ati, el kele.
Ayupu ton nyabuk. “Allah arye ninye nirya wibuka boknamle talak ara, ninye weik arye, nati nyapnamniyake. ‘Naie, naie, an si deice arye, an yupu lakak laka nyalamubu talak ara, an si deice arye, isa dolkwetelamubu. An mikip deice arye, ninye kum winipting ning, sirya pil dolamubu,’ nyabuka moropnamniyake.
Ayupu nyabukopura, ayupu ton nyabuk. “Na dipkoprop nyapsine, Sodom mutuku ulamik nang pia malye ulamikura, Allah arye ninye nirya obuka wenebuk talak ara, Sodom mutuku ulamik nang pia malye ulamikura, Allah arye amutuku ninye obuka kum daneibuk bukni, Allah arye ninye nirya bokuka wenepnamle talak, sirik talak ara, Sodom mutuku ulamik nang ara, mitik weik mambul arye wenepnamle. Sik bataknamsiak mutuku nanguk ara, weik arye wenebuka opnamle ati, sik weik ikin upnamle,” Yesus arye nyabuk.
Ati, naio, narye anti, ‘Na mapu ikin uplyak’ tenen, ‘Na mapu dobuka tukwak mutuku noutamak arye yukak bobitum’ tenen, kum moropkine. Aning kum bukni, ‘Malye Winina Deiyoknye, Isa Mutuku Dongonye arye na mapu ati, malye updeipliba, sikce malye winibicak’ tenen, “Ance na mapu ati, melibuka kalikinamlyame,” nyabuka moropkine, naio.
Yupu sekikura, Paulus ap, Barnabas ap, ilil kum asa mikip arye, tamubuka anyanmek nang ati nyaprik. “Pia teleb ning ara, nunce Allah yupu minopce anggun nyapsitinimibuk, kekeptum bukni, anggun ayupu batakmalumce, kum kekepmalume. Aning ati ara, Allah arye kam pia una arisulul ning, ‘Kum dopdopnamabe’ tenen, anggun kanye pum tam aryuk tenepdanmalumce, ayupu batakmalum ati ara, winira nunda Yahudi yala kum ninye ati, sik un dam peterelbinaname.
Bukni, aminyan talak, sik Yahudi yala deiyok nang arye, amutuku Yunani ulamik kilapu, sikda sisin kilapu ulamikce, Allah si erelamik kilapu ap, tonda, amutuku koprop sisinanye ap, ati ayupu nyabik. “Paulus ap, Barnabas ap, sik nong deice ikin ning deipnuyabe,” nyabuka yupu deice arye obyakik. Yupu deice arye obyakikura, amutuku nang arye Paulus ap, Barnabas ap, sik nong deice ikin ning deibikce, “Anggun anang berurume,” nyabuka, sik mutuku noutamak arye yakik.
Malye nyabuka morobupubuk, Paulus arye tamubuka nyapsuk. “Na akunum tenepsirye binamna anya arye, anggun malye nyabuka, engenmaluma deice arye, anggunce nati mitang kipdeipmanuluma ara, yata ati do? Tonda, Yesus el si ati ara, Yerusalem mutuku binibuk, tapu kouna babye, na nong ona babye, dawinipnamniake. Na akunum tenepsa ati, aning nirya ara, telebuka,” Paulus arye nyabuk.
Sik Stefanus keil donokuka, tuba onmek talak ara, Stefanus arye Allah ati morobuk. “Na ni Yesus anda na ni koprop ulyama ati ance na kanya talima dopropnilyame,” nyabukopura, sakukabukce gutam tuku dipdongobukce, weik yupu arye ayupu nyabuk. “Naio, sik amalye unmak ning ati ara, ‘Ance kum wenepnamlyame’ tenen, moropkine,” nyabuk. Stefanus ayupu nyabukopura, adiparyuk dibuk.
Ura, yata mutuku ninye do nirya, yuk nang arye Allah el laka teleb yupu, ninye lyen yupu peterebikiba, kekebikirye dib tenebicopura, Allah el mikip deice arye aninye lyelule. Allah el yupu ati tuba-tuba dib tenenyak ninye ara, Allah arye aninye ati lyelule. Minyuma ning ara, Yahudi yala ninye lyelule. Aminyan talak ara, Yunani yala ninye babye kekebuka dib tenebicopura, lyelule. Ati ara, ‘Allah el lak teleb yupu, ninye lyena yupu dobuka peterenamne do, kum do?’ tenen, alye kum dakalanune. Teniltona kum diparyuk, kanye deipnirye, pia pi dobuka peterenauk unune.
Nabi Yesaya birye sekamuk yupu ara, ani. ‘Allah arye domona yupu deice nyabuk. Anggun moubuka dipdelulume. Sion mutuku bana ati, bisik noutamak ara, yan dum dukne keil deipne. Ninye arye talye luparabuka bakiba, akeil deice arye, sik yan dum dukliba, kote saknamake. Bukni, abisik noutamak deipnamnanye bira, pia diksukumnye unamla anya arye, elti, diba tenebice ninye nirya ara, na Allah arye dipkoprop lyepnamna ati, alye pia kum dakdanamake. Aning ara, nong upnamle anya arye, sikce nati diba tenebikcopura, aminyan talak, ‘Se, nunda talye ninguk diba tenelamupu’ tenen, sik talima pia boktoplirye, kum uk dinamle. Dipkoprop na Allah arye aninye lyepnamne. Ati, aninye ara alye pia kum alye dakalanamake.’ (Yesaya 28:16)
Tonda, Allah arye anggunti, ‘Aminyan sirya talak ara, anggun malye winin ning tonok ning babye kum upnamle’ tenen, anggun kanye kwa diprongobuka melisilye talak ara, anggun dib tenelulum ning ara, pia darapdongobuka mikip unamsile. Winibuka daulamunye ani, aminyan talak ara, nun Weik Deiyoknye Yesus Kristus tukwak mutuku tamubuka yalyopura, anggunda diksukumuk unamlume. Ati yata nang do nirya, ‘Aninye ara, malye wininyak,’ nyabuka anggunti kum nyapmanto unamake.
Wini talak ara, “Aning ara, telebe. Aning ara, malye,” tenyak touk pil donyak bukni, wini talak ara, ‘Aning ara, nong upnamle, aning ara, talye ning uka’ tenen, adiparyuk kum nyaptibye. Bukni, Yesus tamubuka yalirye, ninye nirya ati, yupu bokeipnamle talak ara, aning-aning nirya ati, lak kipdeipnamsile. Dirinarye, kunukmalyak laka kilamle touk, Allah arye yupu bokuka dipdesilirye, “Malye ning ani, teleb ning ani,” nyabuka, lak kipdeipnamsile. Ninye nirya arye dolamikce pil nong ati, ‘Teleb ning dan do, malye ning dan do’ tenen, Allah eluku buk deice arye asipdenamsile.
‘Winiptinye’ tenen, na pia patanululbuk, ‘Dipkoprop wininamne’ tenen, kanye deibuka, tuba tenenun ning ara, nyapnusine. Ara, na nyapnamne yupu ap, na wininamne ning nirya ap, deice arye, ‘Malye winipnikca deice arye alye kum dakdanamne’ tenen, pia patanulule. Alye una kum bukni, minop talak na winilamse ning nirya deice arye, Kristus el si ereiyamsa atonun, wini talak babye, ilil kum, balye tam kipnirye, ‘Na wininamne ning nirya deice arye, Kristus el si erenamne,’ pia tenenune. Ara, na kam unarye do, dipnarye do, adeice arye Kristus elce, el si ereipnamle. ‘Na kam una babye, dipna babye, telebe uka,’ tenenune.
‘Se, aning winiptinye’ tenen, pia patapnil ning ara, nyapnusine. Ara, dipkoprop Kristus ap, talima dukdongobuka unirye, Allah arye, Kristus kam bukeibukura, winira Kristus mikip weik ulye touk, ‘Na babye, winiptinye’ tenen, patanulule. Tonda, Yesus el kanye imun ning weik ulamuka ani, nun malye winina ati dibuk touk, na babye ikine upnutopura, akunum diamik ninye atouk uptinye. Akunum diamik ninye atonun uptinye nyanmana ara, diamik ninye, malye winin ning nirya kum patalirye, malye kum winilamak touk, ‘Na babye, malye ning kum patapnutu ura, malye kum winipnamne’ tenen, patanulule. Ara, Kristus arye, el mikip weik arinulula deice arye, ‘Malye ning arye, na talima kum lilonamnile’ tenen, nyapne.
Yata ning do nirya, Yesus el weik mikip deice arye, aning-aning nirya talibuka, el amutamak delilule. Atouk el mikip deice aniryuk, nun talye tukwak nong bataksilirye, nun dobuka urasin pia yuk ning kipsilirye, el pia teleb im deice nong ulye touk ubuka, kwepdeipnamsile. El pia teleb ulye touk, nun babye, teleb winipsiliba unamabe. Na Paulus arye, anggun Pilipi ninye ati, nyapsine.
Anyapmasin yupu uk kume. Tonda, teleb-teleb kibuka winilamse ning weik aupnuk bukni, Yesus dib tenepnirye, ‘Na deiyoknye Yesus Kristus ap, dukdongobuka unaname,’ akunum tenepne ning ati ara, ‘Mince arye tenelamse ning nirya ara, malye ning atouk, dauplye,’ tenenune. Ara, ‘Na Deiyoknye Yesus Kristus ap, talima dukdongobuka una ara, pia mambule,’ ati nyapsine. Minop talak ara, na diksukum ulamse deice arye, ‘Aning deice arye, teleb updeipnamnile,’ tenelamse bukni, wini talak na kanye ara, ‘Aning nirya ara, mal-malya, sukulonga donoklamak atonun ning ulule,’ tenenune. Tonda, ‘Lyun ning atonun ning ulule,’ tenenune. Winibukap tenenuna deiyok ara, ‘Weik mambul ning ara, Kristus eluk talibuka, el ap, talima dukdongobuka unaname’ tenen, nyapne.
Unyaka deiyok ara, sikce Yahudi yala kum ninye ati, ‘Allah yupu peterebikibuk, kekebikirye diba tenebikcebuk, Allah arye lyeplyak’ tenen, sikce, nunti, yupu sekelongona ap, yanina ap wininyakce, pia pirildesinyake. Wininyaka deice arye, sik malye winin ning pia weika arye tabakuka winibiceura, weik upnin balule. Mek makau dobuka, mek dinikikibuk, mek deiplirye, dikilsaklamle atonun, sik malye winin ning ara, pia weik akunum ubuk. Allah arye sikti, dipkoprop weik arye wenebuka oplopnamle. Na Paulus arye, nyabuka sekeipsene.
Timotiuso, pia mambul yupu nyapnukine. Allah arye areamkuk ning ara, ‘El dipkoprop yupu ara, malye upnyak’ tenen, bita diminyak arye, pia moubuka talinamlyame. Yata talye yupu do nirya, nong kum upnamle yupu, Allah ati yanin yupu ap, Allah yupu nyasilye touk kum bukni, yuk tilila yupu, talye peteren yupu ap ara, ayupu nirya kekena pia meme. Donga ibuka yukak unamlyame. Atalye yupu nirya ara, ton ninye arye, “Kume, ayupu ara, weik kel bikne yupu. Pia mambul yupu,” nyanyak bukni, dipkoprop ayupu ara, walwal yupu ati ara, talye tilila yupu nyanyake.
Tonda, nun deiyok nang ap, Allah El Dib Kanye ap, arye anti, ‘Elce ayupu bobuka peterenamle’ tenen, an deice deipkubu ning nirya, ance, ‘Malye upnilyak’ tenen, pia kanye moubuka kalikimince, dildanamlyame. Winibuka unamlama ara, Allah El Dib Kanye arye, el mikip arisilya deice arye kalikildanamlyame. Allah El Dib Kanye ara, nun kanye noutamak usulule.
Bukni, Onesiporus ap, el aik unyak ninye ap, nirya ati ara, ‘Allah arye aninye nirya ati, wenena kumce, sik patana atonun, mitang arye melibuka arenamle’ tenen, moronune. Deiyok ara, tonok talakuk kum bukni, Onesiporus ara, anirya talak nirya weik arye, na kanye kwa melilamnuke. Tonda elce nati, ‘Se, Paulus ara, tapu koubuka wenena aik dongobik ati, na alye upnilyak’ tenen, ‘El dam kum binune,’ pia kum tenelamnuk.
Tonda Timotius, an akunum kel biklume. Minop talak Efesus mutuku noutamak pil dolamse talak ara, Onesiporus arye na patalamnuk ning, aning-aning nirya ati, weika arye melyamnuke. Winilamuka nirya ati ara, na patanilibuk utenenune. Ara, ‘Se, nun ni Allah arye Onesiporus ati kanye deipturye, Yesus tamubuka yanamle talak, yupu bokeipnamsil sum ara, Allah arye talye obuka bataktue bukni, anye birye el malye winilamuk ning nirya ati, namin kibuka, wenena kum arye, talye melibuka teleb updeipnamle’ tenen, moronune.
Aning ati ara, nun Deiyoknye Yesus, el yupu laka nyabuka peterena ati, ilil una ap, tonda, ‘Se, yuk nang arye akutunamniak do?’ tenen, alye una ap, pia kum unamlyame. Aning atonun, ‘Se, na peterenulula deiyoknye Paulus ara, tapu koubuka wenena aik dongobik ati, na alye dakuka unamne,’ tenena meme. Aning nirya kum bukni, narye ninye lyena ati, Yesus el laka teleb yupu peterepnibuk, malye nang arye, na nong deice ikin ning weik delininyak touk, an babye atonun, ‘Winipnica babye, telebe uka,’ tenenamlyame. Utenebuka an mikip yabuka unamlama ara, Allah el mikip melibuka arisilya deice arye unamlame.
Yesus Kristus arye ninye lyena ati, el laka teleb yupu peterenibuk, yuk nang arye, ‘Nun lik’ tenen, ikin ning weik na nong deice deilinikibuk, kanye imun kanye bobuka unune. Tonda, sik pia malye unyak ninye tomobikirye, tapu koubuka wenena aik dongolamak touk, ayupu peterepnin balamsibuk, tapu koubuka wenena aik dongopnike. Bukni, Allah el yupu ara, ninye arye tapu kum kouptinge. El yupu peterenyakbuk, ninye kekebikirye, diba tenebuka weik arye biknin banamake.
Winibuka ulamsa ani, wini talak babye, tuba wininune anya arye, Allah arye dekna ning kintinibuka ara, dipkoprop dopropnamne. Ara, Yesus arye ninye mutuku-mutuku nirya ati, yupu bokeipnamsil sum ara, pia diksukum yupu bokolina deiyoknye Allah arye nati, malye ning nirya kilipnilirye, pia diksukumnye kipnamnile. Dekna ning dopropnamne ara, aninguka. Pia teleb updeipnamnil ara, nauk ati kume. Aning kum bukni, yata nang do nirya, ‘Se, nun Deiyoknye Yesus arye, ila tamubuka tonap, tukwak mutuku tamubuka yasutue’ tenen, buku sukubuka, kintinibuka dinauk unyak nang nirya ati, dekni ning arepnamsil ning ara, diksukum kili sal daneipnamsile. Na Paulus arye nyapkine.
Anyapmakin yupu ara, pia dipkoprop ulula ati ara, ayupu diba tenebuka talinamlyame. Tonda, ance peterenaminye ninye ati, ayupu dem dobuka, mikip asa arye peterenamlyame. Ara, ‘Allah ati akunum dib tenelamik kili sal arye, yuk talye ning nirya batakikirye, teleb un ninguk pia patapliba, moubuka talibikirye, pia pi dobuka, diksukumuk wininamak’ tenen, nyapkine. Anyapmakin yupu nirya ara, pia teleb yupu ulul ati, yata ninye do nirya, aninguk kekebibirye, talibuka wininamyaba deice arye, ayupu arye, telebuk kilisulule. Ninye nirya ati, nyapkine.
Nun diba tenenyap ning deiyok kouna ap, ansinibuka sirya dakna ap, deiyoknye Yesus ati, diba tenebuka talibibirye, pia tenenauk unamabe. Yesus ara, ‘Allah arye nati erepdeipnilirye, pia teleb ulinamnile’ tenenauk ulamuka anya arye, ‘Se, wanwanun yo deice ninye onyaka ara, alye una asa opnamaka ara, na like,’ kum tenebuke. Kum tenebukce, wanwanun yo deice obik talak ara, uk weik dinmokce, ikin weik unmoka babye, kum batakuke. Aminyan talak, kam bukuka im deice biyukce, Allah el weik Ninye Deiyoknye bunak, sirik taruk tam bulbiyuk. Yesus arye, ‘Allah el taruk sirik tam bulbinamna ara, pia telebe,’ tenyamukce, aninguk tenebuka deice arye, kanye deibukce, ‘Wanwanun yo deice opnamniyaka ara, na like anya arye, bataknamne’ tenen, pia kum tenelamuk.
Ura, Yesus tukwak mutuku ulamuk talak ara, Isa Mutuku Dongonye arye Yesus ati, ‘Malye winiptue’ tenen, el talima ikin ulamukba, Yesus el ikin kanye bobuka ulamuk. Isa Mutuku Dongonye arye, ‘Malye winiptue’ tenen, asilelamukba, el babye ikin kanye bobuka ulamuk. Yesus babye ikin kanye bobuka ulamuka anya arye, Isa Mutuku Dongonye arye, nun tukwak ninye ati, ‘Malye winipting’ tenen, talima lilosululba, ikin asa unyap talak ara, Yesus weik kelnye anya arye, nun talima kwa daksilirye, melisulule.
Yesus ara, pia kam unamla anya arye, ‘Allah ap talima dukdongobuka unamap’ tenen, Yesus ati diba tenebuka, el deiceuk Allah el dam yanamak ninye nirya ara, Yesus arye pia lyebuka sirya dakasulule. Ninye lyena pil ara, etekdop asa ubuka don pil dosulule. Tonok ning babye kum batakalule. Winisilya deiyok ara, ani. Ara, pia kam ulirye, elti, diba tenenyak ninye ara, ‘Allah arye, elti, diba tenepce ninye melinamle’ tenen, Allah dam bilirye, yupu pia melibuka nyalule. Nun melina ati, Allah ati tuba morosulule.
Anggunda, Allah ati diba teneluluma ati, Allah arye, ‘Na mapu malye ubicak’ tenen, el mikip deice arye kalekuka lelilongosulule. Wini talak arye dipdongobuka, dotalak yanamle talak nirya ara, el mikip arye kalekuka lelisilyebuk, sirya daknamle talak akunum uplyopura, Allah arye lyen ning akunum kintiniyeiamsuk ati, Yesus aminyan talak tamubuka yalyopura, lyepnamsile. Atalak ara alyen ning nirya laka daneipnamsile.
Amalye winin ning nirya kum wininamlulum bukni, Yesus diba tenepmunce, el yupu kekebuka, dobolbalamluma ati ara, yuk nang arye, ikin ning, anggun nong deice deipsikcopura, alye kum unamsile. Alye kum upnamsil bukni, Allah lyepsukce, el mapu kipsukbuk, Kristen ninye nyasinyaka ati, ‘Aning ara, pia teleb’ tenen, Allah arye winipsuka ati, “Telebe,” nyabuka, el si erenamlulume.
Aning ati ara, na kayapu, Allah arye tenyamsuk touk, malye nang arye ikin ning anggun nong deice deipsikcopura, teniltona kum arye, anggun kwepdeisuknye Allah ati, anggun nong ap, anggun kanye talima ap, anirya dobuka, Allah el deice delinamlulume. Anggunce, anggun bidamang nong ap, kanye ap, Allah ati arepmunyopura, batakna kum, teleb un ninguk ubuka, pia diksukumuk unamlulume. Nun kwepdeisuknye Allah ara, pia batakna kum, melibuka dinauk usulule.
Allah arye anggun nirya ati, ‘Yuk malye bisik bimunyak’ tenen, talibuka balirye, melibuka disululnye ulule. Allah, el melisilirye deice arye, malye kum winiyabe. Ara, pia ati, kalikuka melisulula atia. Tonda, Allah arye el mikip arisilirye, el melisilya deice arye, pia daulamibya ani, sirya talak ara, nun nonge dopsilirye, malye ning nirya pia kum kipdeipsilyopura, el dam ara, pia teleb dirina damak deipsilyeura, kanye deibuka, pia telebuk unamabe.
ကြော်ငြာတွေ