2 Tesalonika 2:9 - Eipomek

⁹ Allah el winin ning nirya, Yanina Deiyoknye yanamle talak ara, talye ati kum yanamle. Kume, Isa Mutuku Dongonye el mikip weik ulye touk, amikip deice arye, yata mambul ning do nirya, pia teleb pil ap, ninye kum winipmanto ning ap, ‘Diba tenepnamniak’ tenen, weik mikip winin ning ap, pil weika arye dopnamle. Winipnamle bukni, anirya ara dipkoprop kume, ara Isa Mutuku Dongonye el tenepce arye winin ning, tilila ning pil dopnamle talak arye yanamle.

2 Tesalonika 2:9 ပူးပေါင်းရင်းမြစ်များ

2 Tawarikh 18:20

Nyanmika ani, aminyan talak ara, yin talin malaikat tonoknye tukwak arye, Allah si Yahweh dam tikukce nyabuk. “Narye Ahab el kanye tamuna ati, kekena teleb yupu deice arye, Winipnalam nyalbinamne. Nyabukura, ‘Na nyapmakin touk winipnamlyame nyapnamne,” nyabuk.

Keluaran 7:22

Bukni, Mesir mutuku aning-aning nirya weik kel nang, Asing kwa keten nang ap, sik Isa Mutuku Dongonye mikip deice arye, aninguk, ninye kum winipmanto ning, mek ining dayuk ning ara, atonun winibik. Winibika ati ara, Firaun el talima kat ubuka deice arye, malye kipdeibukba, sik bitinye Musa ap, Harun ap nyaprik yupu kum kekebuk. Firaun kum kekepmanto ubuk ning ara, Allah el si Yahweh arye, nyabuk touk winibuk.

Keluaran 8:18

Winibukba, aning-aning nirya, asing keten nang weik kel nang arye, ‘Nun babye, atonun ubibiba, tuku kel-kela arye deibum danamle’ tenen, sik babye Isa Mutuku Dongonye mikip deice arye winipdeyikbuk, kum winibuk. Piripdeyik bukni, suma kum ubuk. Sik malye pil deice kum bukni, amutuku nirya noutamak ara, ninye ap, sik weilamik ning ap, suma weika arye amulamik.

Keluaran 8:7

Winibukura, sik Mesir mutuku noutamak, ninye kum winipmanto ning, asing keten nang kele weik nang arye, sik babye atonun, Isa Mutuku Dongonye mikip deice malye pil dobikba, yakai pia weik Mesir mutuku nirya langdibuk.

Yesaya 29:10

Aning nirya winipnamlum bukni, deiyok ara ani. Ara, Allah Yahweh arye, anggunti, wimana deiyok ning arepsilyeba, mapluknamlume. Tonda, sik asing kun nang atonun unyak nang, sik nabi-nabi nang nirya ara, Allah arye anggun asing akunum lelipdongopsuk. Tonda, aminyan winipnamle ning eibuka, lak nyan deiyok nang babye, Allah arye anggun asok deice akunum sekdongopsuka ati, sik anang nirya arye, kum melibuka lak nyapnamsinge.

Yehezkiel 14:5

Winibuka nyapdeipnamne deiyok ara, ani. Ara, Israel yala nang kan-kan arye, isa si erelamik nang arye, wininyak ning deice, na dam arye kisikdakuka, yukak wininyake. Na dam yanuka, na siuk kum ereninyake. Wininyaka ati, isa si erenyak nang arye, na nabi nang dam yanuka moropnikceura, na nyanamne yupu deice arye, isa dam ara, narye na mapu koproba dobuka, kisikdakuka yukak deipnamne. Winipye deice arye, na mapu koproba, sikcuk ara, isa mer ati talibuka unyak ning ara, batakikirye, tuba tamubuka, na damuk deipnyeba, na tamuk yanganamake.

Matius 12:22

Yesus binuka unmok mutuku noutamak arye, isa taliamuka deice arye, yupu luba kibuka, asing kuamuknye tonok, ‘Yesus arye kwetepnul’ tenen, yuk nang arye anye bobuka, Yesus dam boyayik. Boyayikba, Yesus arye anye talyamuk isa yakuka kwetebukopura, anye yupu nyabuka, aning-aning nirya teleb ubuka dinmok.

Matius 4:10

Nyabukura, Yesus arye tamubuka nyabuk. “Kume, Allah yupu buku noutamak arye nyasulule. ‘Anggun Ni Kopropa Allah ara, el siuk erebuka talinamlulume. Anggun kanye ara, el deice anyuk delinamlulume. El piluk donamlulume.’ (Ulangan 6:13) Ayupu ara, Allah yupu noutamak ulula ati nyapkine. Ati, Isa Mutuku Dongonye anda, na batakuka an yukak bilyame,” Yesus arye, Isa Mutuku Dongonye ati nyabuk.

Markus 13:22

‘Anang ati, diba kum tenenamlulume,’ nyapmasina ara, urdem ati kum nyapmasine. Deiyok ara ani. Aminyak talak yanamak nang ton nang arye, ‘Nunda Kristus unyabe,’ nyanamake. Ton nang arye, ‘Kume, nunda Allah el yupu ap, aminyan winipnamle ning ap ati, lake nyana deiyok nang unyabe,’ tilila ati nyanameke. Aning ara, ‘Sik yuk nang arye, nun mambul pil eipsikirye, dib tenebuka melipnamsiak’ tenen, ninye arye winipmanto kum pil donamake. Aninye ara, isa mikip deice arye, ninye arye kum winipmanto pil donamake. Ton nang ara, ‘Apil dolamipyeba yuk nang eipsikirye, ‘E, anang ara, dipkoprop Allah el mikip deice aryuk apil donyake,’ tenepnamsiak’ tenen, mambul pil ton donamake. Apil-afil nirya dopnamak ning ara, Allah el min arye wipdeiamuk ninye ara, ‘Allah batakuka, nunuk melipnamsiak’ tenen, yanuka pil donamake. Sikti lila yupu nyan nang arye wininamak bukni, Allah wipdeiamuk ninye arye, atilila ning dib kum tenenamake. Aninye ara, Allah el ‘Na’ tenen, ninye unyaka anya arye, tilila ning ap, tilila yupu ap ati dib kum tenenamake.

Lukas 11:25

Yanuka dinmalirye, el min arye ulamlye aik noutamak ara, amsuna ap, delin ning nirya ap, teleb wamlirye, ninye ton una kum ati, ‘E, anyaik ara lo tuba upmala ati, anyakuk unamne,’ tenebuka ulule.

Yohanes 4:48

Morobukba, Yesus arye anye biti nyabuk. “Anggunda, ninye kum winipmanto ning ap, winipman kum pil ap doliba, elimunye deice arye, ‘E, anye bira dipkoprop Allah ati pil dolule’ tenen, dib tenelulume. Aning kum eipmunyopura dib kum tenelulume,” Yesus arye nyabuk.

Yohanes 8:41

Bukni, anggunda anggun ni koprop arye winilul ning uk, aninguk tuba winilulume.” Yesus arye nyabuk. Nyabukba, sikce, “E, nunda talye yoldakirye, delilonyak mapu atonun kum unyabe. Dipkoprop nun ni kopropa ara, Allah eluk usulule. Yuknye bira, nun ni kum usulule,” nyabik.

Yohanes 8:44

Anggun ni koprop Isa Mutuku Dongonye arye, anggun kanye talima talisilibuk, elce kanye delilul ninguk malye winilulume. Allah arye aning-aning nirya kwepdeibuk talak arye dipdongobuka, anoutam talak nirya ara, Isa Mutuku Dongonye el kanye noutamak ara, dipkoprop ning tonok babye kum ulamukce, tuba kum ulula ati, Isa Mutuku Dongonye elda ninye talye oltakananye ulule. Elce tilila yupu nyalye talak ara, el mutuku koprop yupu uk nyalule. Isa Mutuku Dongonye, tilila yupu deiyok koubuka nyananye koprop ulula anya arye, tilila yupu uk pia nyalule.

Rasul 13:10

“Anda Isa Mutuku Dongonye kouku kolokonanye mi ulyamce, aning-aning nirya teleb diksukum un ning nirya batakloplumnye ulyame. Tilila yupu nyabuka duknubuka batakna ap, malye un ning ap, an talima noutamak tenena weik ulyame. Allah el diksukumuk nyalye yupu dobuka, ance kwalipsingnibuka nyaminye yupu ara, pia kum bataknalam do?

2 Korintus 11:14

Wininyaka ati ara, kum lukdatibye. Anang sik ni koprop Isa Mutuku Dongonye babye atonun, ‘Dirina arena im deice pil donanye, malaikat, tenepnamniyak’ tenen, malaikat nong ap, urasin ap atonun dalirye, ninye dam yangalule.

2 Korintus 11:3

Utenyamsise bukni, winira na ilil upnile. Ara, Isa Mutuku Dongonye arye, tenepce arye yupu teleb-teleb kibuka nyabukba, Hawa arye, tilila yupu dib tenebuk touk, ‘Anggun Korintus ninye babye atonun winipnamlum’ tenen, nyapsine. Ara, deiyok kouna talak ara, anggunce yuk yupu tabakuka dib tenena kum arye, dipkoprop Kristus el tonok dib tenyamlum bukni, yuk nang arye, yuk yupu peterepsikca deice arye, ‘Anggun kanye tenen ning deice arye, yuk malye bisik kirikuka bimunyak’ tenen, ilil upnile.

2 Korintus 4:4

Ara, tukwak mutuku nirya talilye Deiyoknye Isa Mutuku Dongonye arye, sik dib tenena kum ninye ati, asing kuna atonun kum ning arilule. Winiplyopura, anang ara, Allah el dipkoprop yupu kekepman kum unyake. Winilya deiyok ara, sik kanye talima noutamak, Kristus el laka teleb yupu deice arye, Kristus el pia teleb ulya ning kel bikikirye, sik talima ak dirina atonun upliba, ‘Moubuka kel bikicak’ tenen, Isa Mutuku Dongonye arye ninye ati, asing kun ning arilule. Ariliba, Kristus el pia teleb ubuka weik mambul ulya ara, el laka teleb yupu ara pia bikman kum unyake. Allah el pia teleb ulye touk, Kristus el babye atonun ulule.

Efesus 2:2

Minop talak ara, sik Yesus ati dib tenena kum ninye arye, malye-malye winilamak touk, anggun babye, atonun malye winilalume. Asing arye, kum eilinyap bukni, im noutamak balamak Isa mere, sikti, talipsinaba, sik weik deiyoknye Isa Mutuku Dongonye, el yupu kekebuka ulalume. Ara, Allah el yupu yaniltalamak ninye ara, Isa Mutuku Dongonye elcuk sik kanye talima taliliba, malye weik wininyake.

2 Timotius 3:8

Tilila yupu nyalamak bukni, yuk nang aik duknubuka binamak ninye ara, Allah el dipkoprop yupu nirya ara, yaniptabikirye, yupu sekenyake. Minop talak ulamrik nang Yanes ap, Yambres ap arye, Musa nyalamuk yupu ati yanibrikce, el yupu seklamrik touk, anang arye atonun Allah el yupu ati, yaninauk wininamake. Sik kanye talima noutam nirya ara, pia kwalibukba, akunum malyeuk ubuka anya arye, sikce Allah ati diba kum teneptinge. Allah arye sikti, kanye kum deililule. Allah arye sik anang ati akunum batakuke.

Yakobus 3:15

Winin ning ara, nun ni Allah im deice arye kum arisulule. Ara Allah arye, ‘Wininamake,’ tenesilye touk winin ning kume. Ara nun babye kanye talima noutam patapsilye ning uka. Amalye usilye ning ara, sik diba tenena kum ninye ara, Allah El Dib Kanye nyasilye yupu kum kekenyakce, yaniltanauk wininyak ning ati nyapsine. Tonda aning ara, Isa Mutuku Dongonye arye nyalibuk, malye ubibyopura, malye ulisulule.

Wahyu 12:17

Winibukba, Weik Mem Kwatima Urasin Atonye birye akil ati, yu weik ubukba, ‘Akil min arye deiyamuk mapu nirya epnirye oplopnun’ tenen, yukak biyuk. Akil arye deiyamuk mapu nyabuk ning ara, yuk nang ati kume. Ara Allah arye, ‘Wininamlulume, aning ara kum wininamlulume,’ nyabuka, nyalisulul yupu diba tenebuka ayupu dobolbanyakce, Yesus el laka teleb yupu talibuka, pia peterenyak ninye ati nyabuk.

Wahyu 12:9

Mikael ap, el mapu silip ap arye, weik Mem Kwatima Atonye ap, el amu tam ulamik malye malaikat ap malye kibikce, sik anang nirya tukwak dopkwetebik. El urasin Mem Kwatima Atonye bira, yuknye kume. El si ara, Isa Mutuku Dongonye, tonda Setan nyanyabe. Minop talak dipdongobuka wini talak noutamak nirya, elce tukwak ninye sik talima libuka bobalamla deice arye, ninye im sirya, mutuku sirya nirya, Allah el diksukum bisik batakikirye, kirikuka malye bisikuk banyake. Allah batakuka malye bisikuk banyaka deiyok ara, eltia.

Wahyu 18:23

“Aning atonun, sik mutuku noutamak ara weisa delilamikba, dirin uamuk bukni, wini talak arye dipdongobuka doryanamle talak ara, sik Babel mutuku noutamak ara, dirin tonap pia kum unamle. Tonda minop talak ara, sal arye, ‘Kil dopnuyap’ tenen, kanye deibuka yupu nyalamik ning kekelamik bukni, tuba tonap sik mutuku ara sal ap, kilapu ap dopdakirye, pia kum unamake. Minop talak sik Babel mutuku noutamak ulamik dekna deiyok nang ati, yuk im sirya, mutuku sirya nirya ulamik ninye arye, ‘Se, sikda weik mambule,’ tenelamik bukni, sik babye kum danmake.” “Babel mutuku ulamik ninye arye, sik malye winin ning aning-aning nirya winilamika deice arye, yuk mutuku ninye nirya eibuka kel kiyamikce, malye bisikuk balamik.

Wahyu 19:20

‘Kurun kuda basam deice bukuka balulnye, malye kipnuyap’ tenen, pirilenmek bukni, kum winipmanto unmekak eipse. Ara, kurun kuda basam deice bukuka balulnye, el yin talin nang arye, Kam Ulirye, Pia Malinye ati tomobikce tapu koubik. Tonda, Tilila Nyana Deiyoknye ton tomobikce, tapuko koubik. Anye bira, tilila nabi ulamuk. Elce, ‘Malye Kam Ulul Ning, na ni kopropa ulula ati, el melipnun’ tenen, min arye ninye kum winipmanto ning mambul pil dolamuknye, el si ara, Tilila Yupu Nyana Deiyoknye tomobik. Minop talak ara, aTilila Nyana Deiyoknye birye, ninye kum winipmanto pil dolamukba, ninye weika arye tilila ninguk diba tenelamik. Elti diba tenelamik ninye ara, Kam Ulirye, bukni, Pia Malinye el pitin kilina ning, el nomor sik nong bol deice sekikce, el urasin aton ning puturubuka deiyamikba, elti, si erelamik nang ati nyapne. Kurun kuda deice bukmoknye ap, el tam nang ap arye, Kam Ulirye, bukni, Pia Malinye ap, Tilila Yupu Nyana Deiyoknye ap, tilila nabi ap tomobikce, uku pia dilamukak pum tam dopkwetebik. Uku pia dilulak ara, mek kwen urasin atonun ulule. Bukni, amek kwem ara, mek kwen sirika kume. Ara kumasan bol keil, akeil si ara belerang, uku buk weika arye dipliba, keil but-buta tong ara, sikin tong atonun tong weik nyalamle ning ap, tin ap, welelamukce, mekwen atonun deiamukce, uku buk paklamukce, uku pia dilamukak noutamak dopkwetebik.

Wahyu 20:10

Uku arye dibukba, amalye winin kili sal ati, tilila yupu nyalamuknye Isa Mutuku Dongonye, sik malaikat arye tuba tonap tongobikce, weik uku din mutuku noutamak dopkwetebik. Ara uku buk dilamukce, tin ap, kumasan bol keil el si ara belerang, kel lyin ap, ara uku tin weika arye dipliba, keil but-buta tong bukni, sikin tong atonun tong weik lelamle ning tong ap nyalamukce, deiyamuk mekwen noutamak dopkwetebuk. Ara, pia Malye Kam Ululnye ap, Tilila Yupu Nyalamuknye ap minyuma talak dopkwetebuk akuk, Isa Mutuku Dongonye babye, auku din mutuku noutamak dopkwetebuk. Keting noutam babye, lukunyan babye, atalak nirya, batakna pia kum aryuk, auku arye sik nong deice, uk weik dilamlya ati, pia donmaca ani, engenauk unamake.

Wahyu 9:11

Asul kwising sik deiyoknye bira, weik tuku pum bisik malaikat ulule. Ibrani ninye yupu deice arye, el si ara Abadon nyanyake. Yunani yupu nyanyak ninye arye, el si ati Apolion nyanyake. Asi bitinye ning nyanyak deiyok ara, anye elda Ninye Oltakana Deiyoknye ululua ati, asi nyanyake.