Bai tam yakdonokukce, im deice ulye ning, el si ara Kerubim dobuka, Eden mutuku bukni, keting yangan tam deibukba, anye birye uku buk diliba dirina weik ulamle touk, dirina weik ulamuk parang ya dobuka, yu weik ulamukce, kalikilamuk. Ara, ‘Ninye tukwak ninye arye, Kam Una Deiyok yo duk dolona ati, amutuku bisik yacak’ tenen, abisik kalikilamuk.
2 Tesalonika 1:8 - Eipomek8 Tonda, ayanamle talak ara, yata ninye do nirya, ‘Allah ara nun like’ tenen, dib tenena kum arye, Allah el ap, nun Deiyoknye Yesus ati, el laka teleb yupu, ninye lyena yupu ap ati, batakuka yaninyak ninye nirya ara, weik arye wenebuka, sik nong deice weik ikin ning deipnamle. အခန်းကိုကြည့်ပါ။ |
2 Tesalonika 1:8
59 ပူးပေါင်းရင်းမြစ်များ
Tace weik ning ara, ninye arye pia kum talepmanto anya arye, yo dula arye do, besi ning arye do, lumubukabirye, anyaka deiplobikcakuk, uku dongonyake. Winilamikce touk, pia malye unyak nang ara, Allah arye, sik malye wininyak ninye batakuka, uku dongopliba, uku arye dibuka, sirya daknamle.” Raja Daud birye, ayupu nyabuk.
Atalak nirya ara, yuk nang arye yu ubukba, ‘Anye nyalul yupu kum kekepnamap’ tenen, na dam yanuka, malye ubika noutam arye, an Allah arye lyepdopnulume. Tonda, ance na wibuka erepdeipnulumba, narye sik yuk-yuk mutuku nang babye, talipsirye, sik ninye deiyoknye kibuka ulamse. Winilamse talak ara, na mince kum bikamse nang, yuk-yuk mutuku nang ara, na amu tam deipseba, na pil melibuka dolamnike.
Aning kum bukni, nunce moropkiap ning ara, ‘An Allah ati, diba tenena kumce, kel kum bikamkik nang, yuk-yuk mutuku nang ara, sik deiceuk an yu teneplum ning ara, weik tonun delinalam’ tenen, moropkiabe na nio. Sik ayuk mutuku nang arye, anti, diba tenebuka, kum bikamkikce, ance nyasilyam yupu, pia kum talinyake. Tonda, ayala yuk-yuk nang ap, sik deiyok-deiyok nang ap arye, ‘Allah Yahweh, elcuk melibuka lyepsutue’ tenen, an si erebuka, anti pia kum morokinyake. Ati, sik yala yuk-yuk nang ati, wenebuka opnalame. Aning ati tenebuka, moropkiabe na nio.
Se, nun ni Allah Yahweh, ninye malye wininyak ning ati, anda kwang dakna deiyoknye ulyama ati, ance, “Aning wininamlume. Aning ara, pia kum wininamlume,” nyapdeiamsulum yupu nyasulul touk ubuka, ninye nirya kum winibikirye, malye wininyak ning ati, wenenamsilame. Diba nun ni Allah, anda sik malye wininyak nang ati, kwang dakna deiyoknye ulyama ati, minop yanuka, ninye nirya ati, yupu lipsisikuka bokeipmince, wenenamlame!
Nyaprikba, Firaun birye tamubuka nyabuk. “Allah el si Yahweh nyapmarumnye bira, yatato mikipnye ati do? Tonda ‘Na yupu kekepturye Israel ninye bataktue’ tenen, nyanmanil do? Kume. Anggun nyapmarumnye Yahweh ara, na walwalnye. Ati ara, Israel ninye kum batakloptiniba bitinge. Aning kum winipnamne,” nyabuk.
Aolsukum noutam ara, mitik yo taruk nirya dilonyakba, aning sesal akunum seplyopura, akunum kouluplirye, ayo taruk ara dakalsakanamle. Daksaklyopura, yuk mutuku unyak kilapu yakirye, sik asik yoka ati, bobuka dongolbanyake. Se, sik Israel tam ulamik nang ara, ‘Aning-aning, mambul ning nirya ton kel biktibye,’ tenena kum nang anya arye, Allah sik kwepdeiamuknye bira, sikti, bico pia kum tenenamle. Tonda, sikti, tuba telebuk kum kipdeipliba, telebuk kum unamake. Sik ti batakanauk unamle.
Allah tenibukce wipdeipnuk ning ara, Allah Yahweh arye, ‘Aninye, sikti, lyen talak akunum dam ubuka ati nyalbinamlyame,’ nyapnuke. Ara, imun kanye bonmakirye, engebuka unyak ninye ati, ‘Talima kwa baribuka melinamsile,’ nyabuka laka nyanamlyame. Tonda, anggun mal olan nang ati, ‘Kwang dakanamsile,’ nyabuka laka nyanamlyame. ‘Nyabuka nyalbanamle’ tenen, Allah arye nati wipdeipnuke.
Allah an weik yu ara, doprapmince, an si kum kel bikamkik nang, yuk-yuk mutuku nang, sik deiceuk deipnalyame. Tonda, an yu weik upkilye ning ara, an si pia kum erekinyak nang, sik deiceuk, deipnalyame. Deiyok ara ani. Aning ara, sikce, an mapu koproba, Yakub birye deibukba, dadeipdanin yangalamupu nang obuka, akunum kum kipmanto kipsik. Tonda, anang arye nun unyap mutuku babye, sikce yatu obuka, sice buklopsika ati, moropkine na nio.” Nabi Yeremia birye, Allah ati nyabuka morobuk.
Aning atonun, yuk nang ati, ikin ning, sik nong deice pia delinyake. Tonda, talye minin yupu deice arye, tilila yupu uk, pia nyanyake. Anang nirya arye, amalye winin ninguk, tuba-tuba wininyaka ati, anang nirya arye, na Allah Yahweh ati, ‘Elda, dipkoprob nun ni koproba Allah ulule,’ kum nyakirye, nati moubuka kum bikininyake.
Atalak ara, el yanuka bukmoka dam arye, weik mek balamle touk, uku dilamuk mek, kutukuka sakukce biyuk. Winibukba, im deice ninye, yupa pia weik, nukmanto kum beribu-beribuan ap, berjuta-jutaan nang ap nirya arye, el tibuk kanye deibikce kinmek. Sik nirya arye, ‘Elce tenebuka nyapsilye touk wininamap’ tenen, el dam kintinibuka kekenmek. Atalakuk, sik im deice unyak ninye, pia kum nukmanto ninye ton, el dam yanuka wekuka, antanap dongopmek diparyuk, tukwak ninye nirya bukni, sik yuk-yuk winilamik ning, sekiamuk buku yanuka deibikce, ‘Ninye yupu bokeipnuyap’ tenen, abuku yanuka yok deibik.”
Tonda yata nang do nirya, sikce, ‘Se, nun ni Allah arye, yata yupu nyapnamsil do?’ Tonda, ‘Nai ance nunti, kalikuka melinamsilamʼ tenen, na dam ton yanuka, kum moroninyake. Tonda, sik anang arye, ‘Se, nun yata wiripnamap do? Teleb ning ara, aning do, aning do?’ tenen, na Allah ati, tuba kum asininyak nang nirya babye, wenebuka opnirye, sirya dakuka, kum daneipnamne. Ara, sik anang nirya ara, na Allah ati, melibuka kum dobolyanganinyakce, akunum bataknika ati, opnirye pia kum daneipnamne. Tonda, ‘Allah arye, yata yupu nyapsiliryeba, aninguk talebuka dobolyanganamap do?’ tenen, na dam yanuka, na yupu kum kekenenyake. Wininyaka ati, anang nirya opnirye, pia kum kipdeipnamne.
Nyapnyopura, na kwanim taruk tam deipnamne ninye ati nyapnamne. “Allah arye, ‘Aninye na like,’ tenebuka akunum bataksuk ninye ara, na dam arye yukak bilulume. Allah arye Isa Mutuku Dongonye ap, el pil donyak nang, sik malye malaikat atonun isa ap, nati bataknikce, malye ning talibuka, sik malye wininyak kili sal niryada, ‘Pia uku dipnamle’ tenen, uku din mutuku kintinibuka deibukak ara, anggun wekelbululume.
Nyabukba, sik Farisi nang arye Yesus ati tamubuka asipdeyik. “An ni koprop ara, dan mutuku ulul do?” nyabuka asipdeyik. Asipdeyikba, Yesus arye tamubuka, “Anggunda na ap, na ni koprop ap ati, pia kum kel kiyamlume. Nati, ‘Anye bira anye’ tenen, moubuka kel kipnutumopura, adeice arye, ‘E, el li kopropa anye’ tenen, kel kiptume. Bukni, na ap, na ni koprop ap ati, moubuka kum kel kiyamlume,” Yesus arye nyabuk.
Ura, Allah yupu pia peterelamikbuk, Yerusalem mutuku ulamik nang weik tonap kekelamikce, dib tenebuka tabaknin balamikce, minopce yupa weik uptabaknin balamik. Tonda, sik Yahudi yala nang, sik Allah ati arena deiyok nang Yesus peterelamuk yupu, ninye lyena ati laka teleb yupu kekelamikak arye, ninye weik tabaklamikce, Yesus el yupu talibuka dobolbalamik.
Aninguk kum bukni, amalye winilamik ninye arye, ‘Allah ap, el ulul ning nirya ap ati, tonap kum tenenamabe. Aning nirya ara nong kum danamle. Allah el ulul ning yala-yala nirya ara, tuba kum tenenamabe. Elda nun like,’ tenyamika ati, Allah arye aninye nirya ati, lik ubukba, ‘Sik aninye daulamica ani, dipnamake’ tenen, batakukba, sik pia malye tenelamik ning deice arye tapu koupdongamukba ulamik. Winilamikba, Allah arye, “Winina meme,” nyasilye ning nirya talibuka winilamik dib arye, pia malyeuk upra balamik.
Na Paulus birye nyapsine. Allah arye nyapdeibukba, Yesus Kristus el pil dopnuka deice arye, ‘Paulus ara, na yupu peterena ati, deiyok kounanye unamle,’ tenyamnukce, wibuka deipnuke. Wibuka deipnukce, el kanye arye bico tenepnukce, el yupu peterena ati, pil dona deiyok ning arepnuke. Winipnuka deiyok ara, ani. Ara, Paulus arye na yupu dobuka, peterepra banamle deice arye, Yahudi yala kum ninye unyak mutuku im sirya, mutuku sirya nirya noutamak arye, ninye weik na yupu kekebikirye, dib tenepneicopura, na talibuka, na yupu kekebuka, na aminyan dobolyanganamniake. Winibiceura, Yesus Kristus el si weik arye erenamake. Ati, Allah arye, ‘Yahudi yala kum ninye, nati dib tenebica deice arye, na yupu moubuka talibikirye, diksukumuk unamak’ tenen, na Paulus ati wibuka deipnuke. Ara, ‘Paulus arye, na yupu dobuka peterelbinamle’ tenen, Allah arye wibuka deipnuke.
Ura, Allah arye ninye lyena ati, el laka teleb yupu dobuka peterelbalamik bukni, Israel ninye nirya ara, ayupu ati diba tenebuka kum dololamik. Aning ara, nabi Yesaya birye sekamuk yupu deice kel kinyabe. Ayupu ara ani. ‘Yesaya birye, “Se na nio, an yupu ara nunce dobuka peterelamububa, ninye mitik anun aryuk diba tenenyake.” Yesaya birye nyabuk.’ (Yesaya 53:1)
Ninye lyena yupu ara, minop talak Allah arye duknyamuk bukni, wini talak ara akunum laka kibuka deipsuk. Ara, minop talak arye dipdongobuka doryanamle talak nirya unamlanye Allah arye el yupu laka nyana deiyok nang nabi-nabi nang ati “Winipnamlulume,” nyalilamukba, sikce sekuka delilamik yupu nunce dobuka, peterenyaba deice arye, laka ulule. Allah arye laka kipdeipsuka deiyok ara ani. ‘Ninye im sirya, mutuku sirya nirya arye, Yesus Kristus el laka teleb yupu, ninye lyena yupu kekebikirye, diba tenebikcopura, el yupu uk talibuka dobolbanamak’ tenen, laka nyalilamsuke.
Yata ati, anggun walwal tuba ululum do? Narye nyapnusin yupu ara, anggun ton moubuka teneipdelulume. Ayupu ara, kum kel kipmaluma anya arye, kum tenelulum do? Winipmanto ning ara nyapnusine. Yata ninye do nirya, sikce yuk nang ati, ‘Anang sik nyanyak yupu kekebibirye, sik amutamuk unmabe,’ tenebice ninyeuk, anang aniryuk ninye deiyok talibuka, sik deice tam ubikirye, sikce aninye talinyakce, sik tenebice piluk arukunyakbuk, sik amu tam unyakce apiluk donyake. Aning atonun ton, malye winin ninguk tenebuka patapsilyopura, amalye una deiyoknye birye tapu koupsilirye, anggun kanye talima talisiliba, malyeuk winipra balamunya deice arye, aminyan talak dipkoprop dipnamlume. Akumopura, Allah arye nyasilye touk, ayupu uk kekebuka dobolbamunyopura, Allah elcuk talisilirye, diksukum ninye kilinamsile. Ati, malye winin ninguk talibibyopura, dipkoprop dipnamabe. Allah arye nyasilye touk, teleb ninguk talibibyopura, kam pia unamabe.
Anango, anggun kan-kan arye, ton ninye ara, Allah el winilul ning ap, el yupu ap ati, moubuka min kum kel bikamikce, walwal ninyeuk tuba unyake. Aning ati, anggun Korintus mutuku ninye ara, anggun kanye walwal kipsukba, talye-talye ninguk tenepnin banmalumce, malye weik ululum bukni, pia teleb ning ara, anggun adiparyuk aning nirya batakuka, tuba tamubuka kanye moubuka unamlume. Anggun malye winilulum ning nirya batakuka diksukumuk unamlume. Ayupu nyapmasina nirya ara, ‘Kekepmunyopura, se tenen, alye dakdanamak’ tenen, na Paulus arye, nyapsine.
Winibuka unyap talak ara, Allah yanin ninye nyanyak yupu nirya ap, sikce, ‘Yuk nang Allah dib tenepnamak’ tenen, sik bidamang kanye erebuka tenepce arye nyanyak yupu ap nirya ara, bisibuka, kum kibuka delinyabe. Winibuka pil donyapa deice arye, nun kanye tenena ap, yuk ninye sik kanye tenena ap, tamupsilyopura, Kristus arye, ‘Wininamake,’ tenesilye touk, ansinibuka tenebibirye, el yupu kekebuka, aninguk talibuka elti, dobolbanyabe.
Se, anggun Galatia mutuku ninyeo, anggunda pia walwal nang atonun unmalume. Yata nang arye, tilila yupu peterelamsika deice arye, yupu dipkoprop ning moubuka kum kel bikamlum do? Kume, narye peterelamsisiba, elilamnulum talak ara, “Yesus Kristus wanwanun yo deice obikbuk, dipsuka deice arye lyesulule,” nyabuka laka nyabuka peterelamsise.
Wininyak nang, sik menenga ara, na Allah arye, sik malye pil donyak atonun kiklibuka, weik arye wenepneba, sik weik imun kanye bobuka unamake. Ninye kot dam arye, sakuka olamle atonun, sik malye winilamaka ati, aminyan talak, narye anang ati, wenepnamne. Sik anang on talak ara, akunum dam upmale. Anang opnirye, sirya daknamne talak ara, minopce yanamle, akunum dam kipmale. Allah arye nyabuk.
Nyabukce, ayupu ton nyabuk. “Anggun kele, Allah arye el yupu nyapnuk talak ara, anggun nirya amutuku dam amu tam yanuka buluplumba, Sinai mutuku dup deice ara, weik uku buk pakanmokce, uku buk im noutamak welebuka biyuk bukni, amutuku dana-dana nirya ara, dua weik ubukba, Sinai mutuku lelipdobukba, asukum nirya kunukuk. Awinibuk ning nirya, anggunce akunum eiplume.
Ura, luba kina meme. Malye winipmunyopura, ikin ning weik upsiliba, anggun kanye talima pum tam arye, ‘Se, yata wiripnamap do?’ tenen, malye kanye bobuka upmunyopura, anggun ni koproba Allah, Yahweh ati, pia se tenepnamlume. Yahweh el dam tamubuka yanamlulume. El ti, diba tenebuka, pia tenenauk upmunce, el yupu kekebuka dobolyamunyopura, Allah el si Yahweh arye anggunti, tuba tonap melinamsile.
Ayupu nyanmok talak ara, weik uku buk dinmokba, anggunda aning eiplumce, ilil weik wamsuka anya arye, anggunda amutuku dam kum binamlume. Bukni, anggunda atam bulubuka kekenmalum buk, Allah otam tikuka, weik uku buk dimoka kan-kan arye nyanmoka ani, anggun dana tam, Allah dana tam, anoutamuk tikmasirye, naryuk Allah arye nyanmok yupu kekenmasirye, anggunti laka nyanmasise. Allah Yahweh arye, nyapdeiamsuk yupu ara, ani.
Allah ati, diba tenebik ning ara, ila tuba tamubuka bataktingopura, aning ara, min kum kum danaeipmanto anya arye, sikda weik arye ilil asauk unamake. Ilil asa unamaka deiyok ara, ani. Anang ati ara, Allah arye yupu bokuka weneplirye, opnamle ning ati, ilil weik unamake. Tonda, sikce Allah elti, ‘Nun like’ tenen, lik ulul ninye ati, uku buk weik arye dinamle ning ap ara, ‘Sirya daknamsil’ tenen, ilil weik unamake.
“Weik arye onamle,” nyapmasina ara, talye ati kum nyapsine. Deiyok ara ani. Nun kele. Allah arye ayupu nyabuk. ‘Malye un ninye arye, nati malye winipnicopura, kwa dakuka sik nong deice ikin ning deipnamle deiyoknye bira, na aunune. Sikce malye unyak touk, narye sikti, weik arye wenebuka opnamne.’ (Ulangan 32:35) Tonda, ayupu tonap nyabuk. ‘Aning-aning nirya deice tam talibuka, weik Ninye Deiyoknye arye, el mapu nirya ati, yupu lipsisikuka bokeipsilirye, wenepnamsile.’ (Ulangan 32:36) Ayupu nirya nyabuknye bira, nun kele anya arye, elti, yaninyak ninye ara, weik arye opnamle.
Malaikat arye, nyalamik yupu mitik mambul bukni, ayupu yanilamik ninye ati, ‘Dauplye,’ tenena kum arye, wenebuka olamuk. Anang olamuka anya arye, wini talak weik mambul lyena ning kintinipsuk ning ara, ‘Mambul kume’ tenen, batakipyopura, Allah arye nunti, ‘Dawaplye. Sikti kum wenepnamne,’ tenepnamsil do, kum do? Kume, aning kum winipmanto ati, Allah arye ninye lyena ati kintinipsuk ning batakipyopura, dipkoprop opnamsile. Ayupu nyapmasina ara, nun Deiyoknye Yesus arye, ninye lyena ati, kai teleb yupu deiyok koubuka minyuma arye laka nyalamukba, el yupu kekelamik nang arye, nun dam yangalamikce nunti, “Yesus arye nyalamuk yupu ara, ani-ani,” nyabuka, nun dam laka nyabuka lak koprop peterelamsike.
Nun ni Allah arye minop talak akunum wiamsukce tenyamsuk touk, Allah El Dib Kanye arye, anggun talima noutamak malye ning kum deipsukce, teleb kipdeilisulul deice, Allah arye wibuka deipsuke. ‘Wininamak’ tenen, Allah arye wibuka deiamsuka deiyok ara, nyapnusine. Ara, ‘Yesus Kristus el ining biyuka deice arye, anggun malye ning kum danyaipsilirce, lyepsiliryopura, el yupu uk talibuka dobolbanamak’ tenen, wibuka deipsuke. Allah arye bico tenepsilirye, nun patapsilye ning talye arisulul ning ap, Allah ap kanye dukdongobuka umunce, yuk ninye ap kanye deibuka, teleb ubuka neika unamlulum ap, ‘Aning nirya weik upnin banamsil’ tenen, Allah morosunune.
Allah arye ninye mutuku sirya im sirya nirya ati, yupu yuk-yuk bokeiplirye, wenepnamla ara, el mapu kan-kan arye deiyok koupnamla anya arye, ikin ning anggun nong deice deipsikce talak ara, kanye deibuka, Allah el siuk erenamlulume. Tonda, el mapu kan-kan arye deiyok koupsilyeura, mitik ikin usilye bukni, aminyan daknamle talak ara, diba tenena kum arye, Allah el laka teleb yupu ati, yaniltanyak ninye ati ara, yupu bokeiplirye, wenepnamle ning ara, weik mambule. Sik pia ikin weik unamake.
Allah arye ayupu nyapdeibukura, aning ubuk touk, Allah el yupu nyabuka deice arye, wini talak ulul im ap, tukwak ap, tonda im ap, tukwak ap noutamak ulul ning nirya ara, tenebuka tenepce deibuka kalikilule. Aning-aning nirya ara, tenebuka tenepce deibuka kalikilamlya ani, apia daulamlye bukni, Allah teneplye talak arye, elti, yaniptabuka, pia malye winin nang ati, yupu bokeiplirye, wenebuka oploplyopura, kum ubuka daneipnamle. Atalak aryuk, wini talak tukwak mutuku ap, im noutam ulul ning nirya ap ara, Allah teneplye talak arye, el yupu nyaplibuk uku arye dipnamle. Allah arye, ‘Na tenepse talakuk, aning nirya kum ubuka deipnamne,’ tenelula anya arye, aning ara wini talak ati, talye tenebuka tenepce deibuka kalikilule.
Im deice ulamik pil don nang, amalaikat malye-malye winibik touk, Sodom mutuku ap, Gomora mutuku ap, amutuku dana-dana ulamik mutuku ninye ap, aninye nirya arye, pia malye winilamik. Sik malye winilamik ara, ani. Sik kanye nong nirya, aninguk tenyamikce, Allah arye, ‘Sal arye kilapu uk, dobuka neika unamake,’ tenyamsuk ning atonun kum bukni, aning batakuka, sal arye sal mamun dolalamikce, yolalamik. Amalye winin ning atonun ning, weik ton winilamika ati, Allah im deice arye, uku buk dopkwetebukura, aninye nirya uku dibuka, sirya dakuk atonun, aminyan ara, malye winilamice ninye nirya, uku dil ban dopkweteplibuk, uku arye diplyopura, pia dipnamake. ‘Allah arye Sodom mutuku ap, Gomora mutuku ap, winibuka atonun winipnamle ati, biknamap’ tenen, nyapne.
Uku arye dibukba, amalye winin kili sal ati, tilila yupu nyalamuknye Isa Mutuku Dongonye, sik malaikat arye tuba tonap tongobikce, weik uku din mutuku noutamak dopkwetebik. Ara uku buk dilamukce, tin ap, kumasan bol keil el si ara belerang, kel lyin ap, ara uku tin weika arye dipliba, keil but-buta tong bukni, sikin tong atonun tong weik lelamle ning tong ap nyalamukce, deiyamuk mekwen noutamak dopkwetebuk. Ara, pia Malye Kam Ululnye ap, Tilila Yupu Nyalamuknye ap minyuma talak dopkwetebuk akuk, Isa Mutuku Dongonye babye, auku din mutuku noutamak dopkwetebuk. Keting noutam babye, lukunyan babye, atalak nirya, batakna pia kum aryuk, auku arye sik nong deice, uk weik dilamlya ati, pia donmaca ani, engenauk unamake.
“Bukni, weik uku buk dilamukce, tin ap, kumasan bol keil el si ara belerang ap, ara uku tin weika arye dipliba, keil but-buta tong ara, sikin tong atonun, weik lelamle ning nyalamukce deiyamse mekwen, uku din mutuku noutamak dopwketepniba, asukumuk pia daunamak ninye ara nyapnune. Sikda, diba tenena kum ninye ap, ‘Yu nang arye opsicak’ tenen, ilil upliba, nati batakaninyak nang ap, kir dona ninye ap, ninye bai mal ona nang ap, amalye pil donyak ninye nirya ap, talye ning ati, ‘Nun ni kopropa’ tenen, si erenyak nang ap, tilila yupu nyanyak ninye ap, aninye nirya ara, uku din mutuku, noutamak dopwketepniba, apia unamake. Uku din mutuku unamaka ara, Dipna Bitinye ning ati nyapkine.” Allah arye nyapnukba, na Yohanes arye kekepse.
Se, nun Deiyoknye, aning-aning nirya talibuka deice tam umince, ance tenelyam touk winilyame. Malye ning tonok babye, kumuk ulule. Anda, pia dib yupu uk nyamince, diksukumuk ulyame. Minop talak tukwak mutuku malye winilamik ninye arye oltakalamsik ati ara, dan talak arye anang ati kwang daknamsilam do? Sikce opsika ati, dan talak arye yupu lipsisikuka bokeipmince, amalye nang ati wenebuka opnalam do?” nyabuka, malye nyanmekba, kekepse.
ကြော်ငြာတွေ