2 Tawarikh 8:14 - Eipomek14 Tonda, Salomo birye, el li koprop Daud birye, “Winibuka unamlyame,” nyapdeiamuk touk, Raja Salomo birye sik imam-imam nang ati, bulubuka yuk-yuk wibuka deibukce, “Sik aninye kong ara, atalak aryuk Allah el si eren aik pum tam pil donamlume. Ton ninye kong ara, yuk talak noutam arye punubuka apiluk donamlume,” nyapdeibukba, aninguk winilamik. Tonda, Allah Yahweh el si eren ati, mot sena ap, imam-imam nang pil dolamik ning melina ati ara, Salomo birye, sik Lewi yala nang arye deiamikak, deipdanin yangalamik nang, wibuka deiamukce, “Aninye kong ara, atalak pil donamlume, sik yuk bulubikura, anang punupmunyak arye, apiluk donamlume,” nyapdeibuk. Ati, sik imam nang aryuk, Allah si eren ati weklamik talak nirya ara, aLewi yala nanguk melilamik. Atonun ton, Allah Yahweh el aik bublan dam nirya melibuka Kalikna nang babye, sik kong yuk-yuk bokuka delilamuk touk, apiluk dolamik. Aning-aning nirya ara, Allah el amu tam ulamuk ninye deiyoknye, Raja Daud birye, “Winibuka unamlame,” nyapdeiamuk touk, Raja Salomo birye aninguk winilamuk. အခန်းကိုကြည့်ပါ။ |
2 Tawarikh 8:14
33 ပူးပေါင်းရင်းမြစ်များ
Yerobeam bira, Allah arena ati, pala keil arye yangapdeiamik ning, mesba dam tikukce, ‘Siltong teleb ning uku dongopnirye, Allah Yahweh ati arepnune,’ tenenmok. Aning tenenmok talak ara, Yehuda mutuku noutam arye, dotalak winipnamne ning ati, Allah arye nyapdeipnaba, kekepnarye, ayupu laka nyananye, nabi ton ulamuk. Ulamuk anya arye, el anye biti, Allah arye, “Anda adiparyuk Betel mutuku bilyame,” nyabuk. Nyapdeibukba, anabi Betel mutuku biyuk talak ara, Yerobeam bira, mesba dam tikmokce, Allah ati aren ning, ‘Uku dongopnun,’ tenenmok.
Raja Daud birye nyabukopura, Asaf ap, el mapu silip, sik Lewi yala nang ap, sik duweit nirya arye, Allah Yahweh elce nyapdeiamukce, keil deice sekeiamuk yupu, Peti Perjanjian marikna deiamika damak batakuk. Ara, ‘Sik aimam nang nirya ara, min arye pil areamsiba, talibuka dolamik ning ara, anyapdeiamse touk, asum-asum nirya patapsilyeura, apiluk dukdongobuka pil donamakʼ tenen, asukumuk deiplobik. Sik aunmekak ara, Yerusalem asik noutamuk unmek.
Heman ap, Yedutun ap ara, sik terompet lelim lena ap, tonda lelim len ning, si ceracap ap, tonda simbal ap uk, aning lelim lena ati wiamuk. Tonda, sik Lewi yala nang, yuk nang arye, sik Allah si erebuka kin talak ara, mot sen ning yala-yala yuk ning babye, pia weik tonun nyalamik talak ara, Heman ap, Yedutun ap arye, alelim len ning ton nyalamdik. Tonda, Yedutun elce deiamuk nang nirya ara, Allah el si Yahweh, el si eren aik bisik bublan dam kalikin nang, sik ton kintinip deiamuk.
Daud bira, Harun elce deiamukba dadeipdanin yangalamik nang nirya ati, yupa yuk-yuk kipdeibukce bokeibuk. Ara, sik Allah el si eren aik pum tam pil dona ati weken talak ap, tonda pil yuk-yuk donamake tenebukce, wipdeibukopura, anang sik yupa yuk-yuk bokeibuk. Apil dona ati, Daud birye yupa yuk-yuk winmok talak ara, Eliazar birye deiamukba, dadeipdanin yangalamika ani, deiamiknye Zadok ap, tonda Itamar deiamukba, dadeipdanin yangalamika ani, deiamiknye Ahimelek ap, tonda sik yala nang yuk nang ap, ninye deiyoknye Raja Daud birye bokdeibukba, apil talibuka dolamik.
Ura, ninye deiyoknye Raja Daud ap, sik Lewi yala nang ninye deiyok nang nirya ap, ‘Aning ara Allah si eren talak mot nyana ap, alat-alat musik kintinina ati aning, apil talibuka unamakʼ tenen, ninye ton wipdeibik. Ara, Asaf elce deiamuk nang kan-kan ap, Heman elce deiamuk nang kan-kan ap, tonda Yedutun elce deiamuk nang kan-kan ap, wipdeibikba, anang ara Allah arye nyapdeiamuk yupu weken talak pil deiyok kouna ap, tonda mot nyan talak alat-alat musik el si ara, kecapi ap, gambus ap, simbal ap, nyanmeka deice arye, Allah el si erelamik. Awipdeibik nang arye, apil talibuka dolamik. Allah yupu weken talak deiyok kouna ati ara, yupa yuk-yuk wipdeibuk nang ara, sik si ani.
Ara, sik Lewi yala nang arye Allah Yahweh el si eren aik wekelban bisik bublan dam kalikna ati, ‘Apil donamakʼ tenen, anang ati bokdeibik. Ara sik Korah yala nang kan-kan noutam arye, Korah birye deiamukba, dadeipdanin yangalamika ani, anang arye deibiknye, el si Meselemya wipdeibik. Anye el li koproba, el si ara Kore ulamuk. Kore, el li koproba ara, Asaf ulamuk.
Ura, Allah Yahweh el si eren aik bublan bisik, wekelban dam kalikna nang ara, sik nirya tamubuka, Yehuda tam kum yayik bukni, sik noutam arye bokuka, ton nang ara, Babel mutuku arye tamubuka yanamikce, Yehuda tam bukni, Yerusalem asik noutamakuk yanuka ulamik. Anang sik si ara, ani. Ara, Akub ap, Talmon ap, Ahiman ap, Salum ap, tamubuka yayik.
Tonda, Allah Yahweh si eren aik bublan dam kalikna ati, Yoyada birye ninye ton wipdeibuk. Ara, Allah arye, “Aning ara na lik ati, aning winibice nang do, adin ning dibice nang do, amalye ning mangkau arye bol pibica babye, na si eren aik dam pia kum yatinge,” nyamuk ning, akunum winipmakce nang, ‘Anang ara, malye nang unyake,’ tenebuka ati, ‘Anang ara, el si eren aik wekicakʼ tenen, kalikna ati, ninye ton weibukba, anang arye anyaik bublan dam nirya kaliklamik.
“Nunce anyapnusiak touk winipnamabe. Sik imam yala nang ap, Lewi yala nang ap nirya ara, anggun abulupmalum nang noutam arye, bokmunyakarye, yupa winilye bobuka kintinipnulume. Ara, tonok yupa ara, Allah si erebuka kin sum, Sabat sum deice, Allah si erelamik aik pil dopnumunye nang ara, Allah si eren aik bublan-bublan dam nirya, ‘Talye nang wekekicakʼ tenen, kaleknamlume.
Allah Yahweh arye, Raja Daud el dam lak nyana ati, Allah el yupu laka nyana deiyok nang, nabi Gad ap, nabi Natan ap, sik deice nyapdeiamukba, yanuka nyapdikopura, “Lewi yala nang ara, Allah el si eren aik noutam bung-bung ana el si ara, kecapi ap, gambus ap, bobana ati wipdeipnamlume,” nyapdeiamukba, wipdeiamuk touk, atalak Raja Hizkia babye, Lewi yala nanguk wipdeibukba, Allah el si eren aik pum tam kintinibuka tikik.
Winibikopura, Raja Hizkia birye, Allah el si eren aik pum tam pil dona deiyok nang, sik imam-imam nang ap, tonda, sik pil melin nang, yuk Lewi yala nang ap, sik yuk-yuk bukni, sik yupa yuk-yuk pil dolamik touk bokdeibuk. Atonun ton, sik imam-imam nang babye, pil dolamik touk, sik yupa yuk-yuk bokdeibuk. Winibuka deice arye, sik imam nang ap, Lewi yala nang ap, sik yupa yuk-yuk tamubuka wibukce, sik pil don nang ati arebuk. Sik pil talebuka donamik ning ara ani. Ara, ‘Allah arye nun malye winin ning kilipnamsilʼ tenen, kam ning obuka, uku dongon ning ap, tonda ‘Allah ap, nun ap, dukdongobuka teleb unamapʼ tenen ati, Allah aren pil don nang ap, Allah el yupu keken talak pil don ning ap, bokuka arebuk. Tonda, Allah el si eren aik bublan dam arye, ‘Allah ati si erebuka kinamakʼ tenen, Allah ati si erebuka kin mot nyan ning ap, Allah ati, “Anda pia teleb ulyame,” nyabuka, el si eren yupu nyan ning ap, bokuka arebuk. Ara, Allah el si eren aik pum tam, tonda el aik bai tam, yuk-yuk pil don nang ap nirya ara, kintinip deibukce, “Winipnamlume, wininamlume,” nyabuka, anang ati, sik pil nirya, yuk-yuk bokuka arebuk.
Lewi yala nang bukni, ninye si Asaf birye deibukba, dadeipdanin yanamik nang, sikda mot nyana ati, alat musik, kitar ayala-yala nirya ara, kel weik nang ulamik. Anang ara, minop talak ulamuknye, Raja Daud birye wipdeibukce, nyabuk. “Anggunda asukum tikuka umunce, pil donamlume,” nyapdeiamukakuk ulamikce, pil dolamik. Anang ara ani. Ara, Asaf ap, Heman ap, tonda Yedutun, elda nabi kibuka, Raja dam ulamukce, Allah arye nyapdeiamuk yupu laka nyalamukba, Raja kekelamuk. Tonda, Allah el si eren aik, bublan dam pia kalikin nang ulamik. Sikda, Kaplina Kwalina sum ati, ‘Asukumuk unmamunce, bublan kalekuka, pil donamlume,’ nyapdeiamuk mutuku anyuk ulamikce, pil dolamik. Bukni, sik Lewi yala nanguk bukni, ton tam nang melipnaba, sik dipnamik ning ati kintinililamik.
Ura sik imam nang, Teleb Lek Aik pum tam ulamik nang nirya ara, sik pil akunum dobikopura, ayupa tonok nirya arye, Allah Teleb Lek Aik noutam arye kutukuka, bai tam yayik. Tonda, sik kayapu nang nirya, sik imam-imam nang yala-yala nirya arye, ‘Allah dam yanuka uptibyeʼ tenen, Allah arye nyamuk touk, pil akunum winibika ati, Allah arye, Sikda malye winin ning pia ton kumce akunum teleb nang kipmake,’ tenebuk. Ati, sik babye anyaik dam unmik.
Ura, Raja Daud birye sik imam-imam nang ap, sik Lewi yala nang ap, Allah el aik pum tam pil don nang ati, “Wininamlume,” nyapdeiamuk ning nirya ara, aninguk talebuka pil dolamik. Tonda sik Lewi yala nang ati, ‘Allah arena ati, dekna weik bon ning yala-yala nirya deilin aik, winibuka pil donamlume,” nyapdeiamuk ning ap, tonda yuk-yuk pil don nang ap ati, nyalamuk ning nirya ara moubuka talilamikce, aninguk pil dolamik.
Aning akunum winibikopura, Allah arye nyamukba, Musa birye sekeiamuk buku noutamak nyabuk touk, Allah el aik pum pil dona deiyok nang, sik imam nang wibuka, yupa yuk-yuk bokuka si sekeibik. Aning atonun sik melin nang ati, Lewi yala nang ton wibuka, yupa yuk-yuk bokuka, si sekeibik. Awinibik ning deiyok ara, aminyan talak Allah el si eren aik noutamak pil donamik ning ati, akunum kintinibik. Aning nirya ara, minop talak Musa birye, “Wininamlume,” nyapdeiamuk touk winibik.
Allah el si eren aik, pil talibuka donamik ati, deiyok kibik nang, sik si ara ani. Asabya ap, Serebya ap, Yesua ap, Binuai ap, Kadmiel ap, sikce Lewi yala nang, sik bulubuka yuk-yuk ati deiyok kibik. Atalak ara, sik nirya arye, asum-asum unyak bitinye-bitinye kipdeibik. Ara, Allah el si eren aik noutam, el yupu keken talak, mot nyana ati, tonok bulubuka ton kibik. Tonda Allah ati, ‘Telebe,’ nyabuka, si erena ati, yuk bulubuka ton kibik. Sik bulubuka yuk-yuk ulamik touk kibuka, ayupu nyanmek. Akibik ning ara, min talak Allah el pil dolamuknye Raja Daud birye, ‘Aning ara, wininamlume,’ nyapdeiamuk touk, winibik.
Allah el si eren aik wekelban bisik bublan dam kalikna ara, sikcuk Allah el si erena aik pum tam wekelban bisik bublan dam domik uku bulung aik, ‘Noutam deiamik ning nirya ati, kaliknamak’ tenen, wipdeibik. Anyaik kalikna ati, deiyok kin nang sik si ara, ani. Ara, Matanya ap, Bakbukya ap, Obaja ap, Mesulam ap, Talmon ap, tonda Akub ap, sik anang nirya wipdeibik.
Atonun, sik anirye dukdongobuka aminyan tam tikuka banmek nang ara ani. Semaya ap, Asareel ap, Milalai ap, Gilalai ap, Mahai ap, Netaniel ap, Yehuda ap, Hanani ap, banmek. Sik anang nirya ara, mot sen ning aning-aning nirya bopmekce, banmek. Ara, minop talak Allah el pil donanye, Raja Daud birye, ‘Wininamlulume,’ nyapdeiamuk atonun winibuka unmek. Tonda Allah arye, “Wininamlulume, aning ara kum wininamlume,” nyapdeiamuk yupu talibuka seklamuknye, el si ara Esra, elce menekuka banmokba, sik aninye nirya, el donga tam banmek.
Yudea mutuku tam nirya weik ninye deiyoknye Raja Herodes talibuka ulamuk talak noutamak arye, Allah arena ati, deiyoknye el si ara Zakaria ulamuk. Zakaria ara, Allah arena deiyok nang bukni, el ap pil dolamik nang yala sik si ara, Abia, Zakaria el kil Elisabet ara, sik apu kopropa Harun yala nang arye deiamik.
Aminyan talak ara, Saul malye ubukura, Allah arye, Saul batakukce, ‘Yuknye sik ninye deiyoknye Raja unamle’ tenen, Saul pununa ati, Daud wipdeibuk. Deibukce Allah arye Daud ati tenebukce ayupu nyabuk. “Isai el mi Daud ara, nun kanye talima ansinibuka unyama ati, nun kanye tonok bopnumu nang unyame. Narye elti, ‘Apil donamle,’ tenepnye ning nirya ara, dipkoprop el donamlarya,” nyabuk. Paulus arye sik awekmek nang ati nyabuk.
ကြော်ငြာတွေ