Aning-aning nirya bokdeibukopura, atalak aryuk ninye deiyoknye Daud birye, sik Lewi yala nang noutam arye, yuk yupa ton wipdeibuk. Ara, Allah arye nyapdeiamukce, keil deice sekukba, Musa birye asekeiamuk yupu, Peti Perjanjian marikna pum tam deibuk ning ara, boyanuka, Allah el si erena ati, kintinip domuk aik, sapi bol arye doltakne tenda aik domuk ning kalikna ap, pil dona ap ati, pil talibuka unamik nang wipdeibuk. Winibuka deiyok ara, ‘Anang arye Allah Yahweh, Israel nang nirya kalikuka melilul Allah ara, el si eren deice arye moronamak ning ap, tonda, kanye pia deibikirye mot nyanamak ning ap, Allah el si erebuka kina ap, ‘Telebeʼ nyabuka, wininamak ning ap, apil nirya ara, anang aryuk talibuka unamakʼ tenen, ati, Lewi yala nang wipdeibuk.
2 Tawarikh 5:13 - Eipomek13 Sik nirya ara Lewi yala nang arye, amesba dam tikmekce, lelim len ning simbal ap, kecapi ap, terompet ap bopmekce, ona ap, nyena ap kinmekce, sik kayapu nang arye, ‘Asukum dam unmak nang nirya ati, teleb arye kekepnuyakʼ tenen, weik yupu deice arye, ninye tonoknye elce nyalamuk touk nyanmekce, mot arye Allah Yahweh ati, si erenmikce, nyanmek. Sik ap neika tikmek nang arye nyanmek mot ara ani. Nun ni Allah Yahweh ara, weik tonun melisulule. Elda pia teleb ulirye, nunti weik tonun bico tenesulule,’ nyabuka nyanmekce, amot ara neiktoto nyanmek. Mot nyanmek talak ara, Allah Yahweh si eren aik noutam ara, dua sakukce, anyaik noutam nirya wekuka langdibuk. အခန်းကိုကြည့်ပါ။ |
2 Tawarikh 5:13
32 ပူးပေါင်းရင်းမြစ်များ
Raja Yosafat birye, el mapu Israel nang ap, akunum yupu talibikce, ninye deiyoknye Raja birye, mot sena deiyok nang ton wipdeibukce, nyabuk. “Anggunce nun ni Allah Yahweh ati, el si eren mot ton senamlume. Ara, ‘Nun ni Allah Yahweh, malye uning tonok babye kum ulirye, elda pia teleb, leknye ulule,’ nyabuka, si erena ati mot, weik yupu deice arye senamlume,” nyapdeibuk. Nyabuka ati, sik mot sena deiyok nang arye, pola minopce menekuka banmekbuk, sik yin talin nang nirya ara, aminyan banmikce, ninye olbana ati biyik. Sik neika biyik talak ara, sik mot sen nang arye, “Allah Yahweh ati, weik arye Nun ni telebe nyanamabe. Allah arye pia kalekuka melisilyakarye, ton kum batakasulule, weik arye bico tenesilirye, melibuka lyelosulule,’ nyabuka, mot senmekce, amot senmek talak aryuk, sik yin nang bita lelebuka tikmekce, neika banmik.
Yosafat el tam yin talin nang, bisik tuba banmik talak uk, Allah si eren mot sena deiyok nang ara, weik yupu deice arye deiyok koubuka, mot senmek talak aryuk, sik otam mutuku olana yin talin nang arye, Opnamap tenen, yanganmik nang ara, sik kan-kan noutam ara, Allah arye lo arebukba, sik Edom mutuku nang duknupmikce, ayanganmik yin nang ati, mal dobuka onmek. Olanmek talak ara, Allah arye lo arebukba, sik Moab mutuku yin nang ap, Amon mutuku yin nang arye, sik Edom mutuku yin nang ati nirya obuka, sirya dakik. [Akunum Raja Yosafat birye, Allah yupu mot sebuka Allah ati teleb nyabuka kinamak tenen wipdeipmok nang menekuka, weik yupu deice arye mot sepnin bayik talak ara, Allah Yahweh arye, sik ‘Opnamapʼ tenen, yanganmek nang yin talin nang, sik kan-kan arye, ilil un ning ap, kanye bokol walwalan ning ap arebukba, yuk-yuk bai sakuka baloyik buk, dopkirikuka obikce, kum daneibik.]
Ninye deiyoknye Raja Salomo birye, Allah ati akunum morobukopura, adiparyuk, uku buk im deice arye sakukce, Allah Yahweh kina ati, kam ning boyanuka deibik ning nirya ara, uku arye dibuka kum danaibuk. Winibukura, Allah si eren aik noutam nirya, Allah Yahweh ara, pia telebnye ulule ati, el damnye pia weik dirina, Allah el si eren aik wekuka langdibuk.
Anyaik dam bulubuka wekmek ninye, sik Israel yala ninye nirya arye dinmekce, im deice arye auku buk saka yanganmok ning ap, Allah Yahweh el damnye weik dirina ara, Allah Yahweh el si eren aik noutam langdibuk ning ara, sik nirya arye gutam tuku dinikdongopmekce, sik asok ara tukwak kanupdongobik. Sik asok ara, tuku deice dinikdongopmekce, Allah ati si erenmek. Tonda, sik Israel ninye nirya arye, Allah ati si erena ap, mot nyana ap, unmekce, el si erenmek. Sikce tanmek yupu ara ani. “Se, nun ni koprop Allah ara, pia teleb ulirye, nunti weik tonun teleb kilisulule. Elce nunti, weik tonun bico tenesilirye, elce Wininamlulume, winipmunyopura, narye pia teleb kipdeipsinirye, kalekuka melinamsine nyabuka nyalin yupu deice arye nyapdeiamsuknye bira, luba kina kumce, pia kum bataknamsile. Tuba melinamsile nyabuka, si erenmek.
Sik imam-imam nang una ati memepdeiamikak tikik. Tikikce, sik Lewi yala nang babye, mot nyan ati ulamik ning, alat-alat musik ap nyebuka mot nyan ton yuk nang arye mot nyanmekce Pia telebe nyabuka, Allah Yahweh ati si erenmek. Sik Allah si eren mot nyanmek ning ara, min talak ninye deiyoknye Raja Daud birye memepdeiamuk ning nirya bopmekce, mot nirya nyenmek. Mot nyanmeka deiyok ara ani. Allah Yahweh arye, nunti teleb, weik arye bico tenesilirye, elce “Wininamlulume, winibuka unamlume, winipmunyopura, narye pia teleb kipdeipsinirye, kalekuka melinamsine,” nyabuka, nyalin yupu deice arye nyapdeiamsuknye bira, ‘Luba kina kumce, pia kum bataknamsile. Tuba melinamsile,’ tenena ati, si erenmek. Ura, minop talak, Raja Daud birye, mot deice arye Allah ati, ‘Anda pia telebnye,’ nyapdeiamuk talak ara, sik imam nang arye, lelim len ning, el si ara terompet lelim ponganmek sukum ara, sik Israel ninye nirya ara, tikmekce, mot nyanmek.
Winibikopura, Allah el si Yahweh ati kanye deibukabikce, “Allah ara, pia teleb ulula anya arye, ‘Telebe,’ nyababe,” nyabuka, el si erebuka mot senmek. Amot noutamak senmek yupu ara ani. “Nun ni Allah, anda pia teleb ulyame. Ance nun Israel ninye ati, pia kum batakasimince, bico tenebuka melisilyamnye,” nyabuka mot senmek. Mot akunum sebikopura, Allah el si eren aik ayukumna ati, weik pala keil yangabuka, tuku pum bisik ayukumna yo deibik. Akunum deibikopura, anyaka bulubuka unmek Israel ninye nirya arye, sik ni koproba Allah, el si Yahweh ati, weik yupu arye el si erebikce unmek.
Ura, “Yerusalem mutuku tuba tamubuka dobupu cang keil poka ati, kwalina yubuka, si erenamabe,” nyabuka, Nehemia birye Lewi yala deiyok nang ati, deiyok koubuk. Tonda, ayupu nyabuk. “Sik Lewi yala nang yuk-yuk aulamik touk, Yerusalem mutuku bulubuka yamunce, anggunce, ‘Winipnuyabe,’ nyabuka, winipnin bamunye touk, sik yuk ninye nirya, aninguk melibuka wininamake. Ara, Allah ati kanye deibuka, teleb nyan mot sena ati, nyan ning bung-bung ana, el si ara gambus ap, kecapi ap bobibirye, mot sebuka, si erebibirye, banamabe,” nyapdeibuk.
Ara, talye ati kume. Deiyok ara, Allah Yahweh ara, telebuk ulirye, nun ninye ati, bico tenepsilirye, pia tuba melisilya ara, pia kum bataknamsile. Allah arye, “Wininamsine,” nyabuka, nyalina yupu deice nyasilye touk, pia dipkoprob winilule. Minop talak dorapce deibikba, dadeipdanin yanganyap ninye nirya ati, tuba-tuba tenesilirye, melisulule.
Nun ni Allah Yahweh ati, “Anda pia telebnye ulyame!” nyabuka, el si erenamabe. Diba, Yahweh pia telebuk winisulula ati, nun nirya arye, “Naio anda pia teleb ulyame,” nyabuka, elti, si erenamabe. Tonda, Allah arye nunti, “Weik tonun bico tenesununa ati, ‘Pia teleb kilinamsine,’ nyabuka, nyalin yupu deice arye nyapdeipsine,” nyapdeipsuke. Aning nirya ara, pia kum bataknamle.
Tonda, nun apu yapu nirya arye, antibuk ‘Elda dipkoprob aulule. Nun ni koproba Allah arye, dipkoprob melinamsilarya’ tenen, sik kanye an deiceuk delilamkikce, an si erelamkike. Winilamkik talak ara, ance sik dam ulamlumce, sikti, melibuka lyelamsulume. Ance nun apu yapu kum bataklamsuluma ati ara, sikce, ‘Se, yata ati batakasulul do?’ tenen, malye kanye bobuka, kum ulamik.
Anggun Israel nang nirya ara, kekepnululume! ‘Nun mal olan nang arye opsikcak’ tenen, kalekuka melisilirye, mikip aresulul Allah ati, nun nirya arye, el si erebuka, ‘Anda pia telebe,’ nyabuka, si erenamkiabe. Ara, nun apu koproba Yakub birye, si erelamuk Allah ati, nun babye, ‘Naio, anda pia telebe,’ nyabuka, kil-kil kanye bobuka, weik yupu deice arye nyanamabe.
Ati, sik mutuku noutam kalikuka dina deiyok nang arye, kanye deibuka una ati nyanamake. Pin-pin kanye bobuka nyanamak yupu ara, moubuka kekenamlulume. Ara, sik ni koproba Allah Yahweh arye, ‘Na tenena ninye lyepnune’ tenen, Yerusalem mutuku yalirye, sik asing koproba arye eibikirye, kanye deibuka weik yupu deice arye si erebuka kinamake.
Wini talak ara, narye sikti, kanye tenen ning ap, talima ap, deiyok tonok ninguk arepniba, teleb winin ninguk talibuka wininamake. Ara, talye ati kum bukni, ‘Sikce nati, ilil upliba, pia si erenamniake. Na siuk pia erenamniake. Aning winibikca deice arye, sik winina ara, pia telebuk wininamake. Pia telebuk ukirye, sikce mapu deibikcopura, dadeipdanin banamak mapu nirya babye, teleb kipdeipniba, pia telebuk winipnin banamake.
Bukni, aminyan doyanamle talak ara, amutuku noutam nirya, tuba tonap teleb kipdeipyopura, weik kwalya kwalibuka dinmakirye, kanye deibuka, yupu ding weik nyanmakiba, yuk mutuku nang arye kekepnamake. Tonda, wel nang arye, dopdakirye, sik kilapu donamak nang ap, sik sal donamak kilapu ap ara, kanye deibuka, pin-pin kanye arye nyanamak yupu ara, yuk mutuku nang arye kekepnamake. Tonda, yuk nang babye, na Allah ati, telebe nyana ati, arin ning, sikce boyanuka, na si eren aik dam boyangakirye, kanye lon mot nyanmakiba, yuk mutuku nang arye kekepnamake. Sik amutuku unamak nang arye nyanamak yupu ara ani. “Se, nun ni koproba Allah Yahweh ara, pia telebnye ulule! Elda, im deice yin talin malaikat nirya ara, sik deiyoknye ulula ati, el mikip pia weik aulule. El ti, nunce ‘Pia telebe,’ nyanyabe. Allah ara, nunti, pia bico tenesulula ati, elce nunti, ‘Wininamsine,’ nyalin yupu deice nyapdeiamsuk yupu nirya ara, pia melibuka arenamsile. Elce bico tenesilye ning ara, pia min kume kum danamle!” Anang arye, ayupu nyanamake. Sikce, na Allah ati ayupu nyanamniaka ara, talye ati kume. Deiyok ara, ani. Anggun mal olan nang arye, malye weik kipdeibik bukni, narye tonap, pia teleb kipdeipniba, minop talak, pia teleb ulamuk touk upnamle. Narye winipnamsina ati, na si erena ati, ayupu nyapmakine. Na Allah Yahweh arye nyapmasina ati, aning nirya ara, dipkoprob nong upnamlarya!
Amutuku dib tenebik nang ara, sik kanye talima imun ulamuk ning ap, sik kanye tenelamik ning ap, neika ansinibuka, sik talima dukdongobuka ulamik. Tonoknye babye ton, el talyamne ning ati, ‘Ara pia na dokola,’ kum tenelamik. Aning pia kum tenelamik bukni, sik talyamik ning nirya melibuka talye arildalamik.
‘Allah arye anggun kanye tenena tonok arenamsile,’ tenen patanulula deiyok ara ani. Ara, ‘Sik kanye talima dukdongobikirye, tonok kanye bobuka neika atonun ubuka unyakce, nun Deiyoknye Yesus Kristus, el Li Kopropa Allah ati, weik arye si dokirye, el siuk erenamake’ tenen, na Paulus arye, anggun Roma mutuku ululum ninye ati Allah morosunune. Na Paulus arye nyapsine.
Teleb kam ulul ning tonok arye, akaru makau emas ning, sik tekbarye malaikat ati arebukba sik amalaikat dobuka talibikba, Allah el si erena ati, Teleb Aik noutamak ara, tulum weik welebuk. Atulum ara, Allah el im deice tam si erena aik pum tam binuka langdibuk. Atulum ara, urdem tulum kum bukni, Allah el pia teleb ulye ap, el mikip weik ulye ap deice arye atulum welebuka, ubukba anyaik langdibuk. Atulum arye anyaik langdibukura, anyaik wekmanto kum ubik. Anyaik kum wekmanto talak ara, sik tekbarye malaikat arye, tekbarye kanye imun bona deiyok ning talipmek ning bokuka, tukwak ninye ati arilamika ani, aikin ning arin talak sirya min kum dakamik talak noutamak nirya ara, aTeleb Aik wekmanto kum unamake. Aning nirya ara, na Yohanes arye eipse.