Ati, Allah Yahweh arye, anabi el kanye talima noutam ara, dowininamuk ning ati, “Winibuka nyapnulyame,” nyaibukba, anabi kekebukce, minopce amesba dam yanuka nyabuk. Ara, “Se, anda amutuku mesba, amutuku mesba, Allah Yahweh arye anti, ayupu antinyapdeipkile. Aminyan talak ara, Raja Daud, el yala mapu arye, sal mi ton deipnamake. Ami si ara, ‘Yosia,’ nyapnamake. Se, amesba-amesbao, na Allah ati, dib kum tenenyak bukni, talye isa mutuku dongonye, si erebikirye, imam-imam nang don pil talibuka dokirye, isa mutuku dongonye, si erenyak nang ara, anye Yosia birye, anang oplirye, an deice arye, sik nong uku dongopnamle. Sik aimam ato nang ara, talye isa si erenyak aik arye, na Allah si erena ati, mesba deiamnik dam yakirye, ‘Nun ton amesba deiceak, siltong teleb ning, uku dongopnamabeʼ tenen, yanganamake. Yosia birye, ayanamak nang ara, oplirye, sik nong ap, sik ninye yok ap boyanuka, an deiceak uku sekuka daplyopura, uku arye aning nirya diplirye, sirya daknamle.
2 Tawarikh 34:3 - Eipomek3 Yosia el wel winiryuk nepmok talak aryuk, ninye deiyoknye Raja tikamukce, el umur keting tamun delapan (8) tahun kibuk talak ara, el apu koproba Raja Daud si erelamuk Allah ati, el babye atonun, ‘Allah arye yata nyapnunil do?’ tenen, Allah ati si erena deiyok koubukce, moubuka kekelamuk. Winibuka ulamuka ani, keting tamun dumbarye ton mabukopura, sik Israel nang arye, minop talak isa si erena ati, kintinibuka delilamik ning nirya ara, ‘Amalye ning kum kipdeipnamne,’ tenebukce, deiyok koubuk. Ara, isa si erena ati, mutuku kon deice kintinibuka dolamikak ap, isa Asyera nyabuka, el si erena ati, cang yo iklamik ning ap, yuk-yuk talye ning ati, si erelamik ning, ninye urasin atonun ubuka memebuka, deiamik ning nirya ara, ulubuka dakukce, kum kipdeibuk. အခန်းကိုကြည့်ပါ။ |
2 Tawarikh 34:3
26 ပူးပေါင်းရင်းမြစ်များ
Bahal si erelamik ning, el si patung ap, Bahal si erena ati domik aik ap nirya ara, Yehu el yin talin nang ap, el melibuka kalekin nang ap arye, ulubuka daklobikce, kum daneibik. Winibikopura, Bahal isa si erelamik sukum ara, deibar dam kiplobik. Awinibik karin dipdongobuka, wini talak babye, anyaik uamukak ara, ninye arye deibar morobikce banyake. Awinibik deice arye, asukum ara, pia malye mutuku kibuk.
Hizkia bira teleb winilamuk ning ara ani. Yehuda mutuku tam ulamik nang arye, Allah el si erena ati, mutuku kon deice domik aik balamikce kam ning obuka Allah ati arelamik bukni, anyaik ara Allah arye, ‘Aning ara, kum wininamlume, aning ara winina meme,’ akunum nyapdeiamuk. Ati, anyaik-anyaik nirya ara, Hizkia birye ulubuka dakuke. Tonda, aninye arye, ‘Isa Mutuku Dongonye si erenamap’ tenen, weik keil dobuka, dokola delilamik ning nirya ara, Hizkia birye teikukura, kum daneibuk. Tonda, ‘Isa Mutuku Dongonye kil el si Asyera erenamap’ tenen, cang yo ikukabice, isa si erelamikak ara, acang yo nirya Hizkia birye, ayo weblobuk. Ton ning ara, minop talak Israel ninye mek ap, ninye ap, kum ulamik mutuku, talye balamik talak ara, yu kwatima arye, si tobukba, ninye weik diamik bukni, Allah arye, nyapdeibukba, Musa birye kat ning, el si tembaga dobukabukce, kwatima urasin atonun ning memepdeibukce, cang yo deice deibuk. ‘Aning ara, weik mambule,’ tenelamika ati, kat ning dopropnak arye, kwatima urasin atonun memepdeipna arye si erelamikce aning dem morolamika ati ara, malye ning pia weik winilamik. Ati, sik Yehuda tam nang arye, kat ning dobuka abal urasin atonun ning ton memepdeipna arye, aning si ara, Nehustan nyabuka si silamikce, ‘Nun moronyap ning kekepsilirye, melinamsil’ tenen, tong teleb ning uku dongolamikce, aning si erelamikce morolamik. Winilamika deice arye, pia malye winilamika ati, Raja Hizkia birye abal urasin atonun memeldeililamik ning ara, dobuka pouklobukce, kum kipdeibuk. Ara, ‘Yehuda nang arye, tuba aning si erebikcak’ tenen, winibuk.
“An adiparyuk tamubuka, na mapu Israel ninye, sik deiyoknye Raja Hizkia dam bimince, anyapmakin yupu ara, binuka laka nyapnulyame. Ara, “Nara, Allah Yahweh, an apu Raja Daud birye, si erelamnuknye ununa anya arye, an tenipmalamce, asing maka deice arye, nati moropmanilam ning ara, akunum kekepmakine. Ati, narye anuk dikulul ning ara, akunum kwetepdeipmakine. Ati, mapmaminya berekliba, daunmaminya ani, like winilye sum ton akunum uplyopura, narye kwetepnamkine. Kweteipkinyopura, anda na Allah Yahweh si eren aik dam binulyame.
Tonda Raja Yosia birye winilamuk. Amutuku nirya isa si erelamik ning uluplobukce, isa si Asyera si erena ati, ikamik cang yo nirya weblobuk. Tonda, sik isa si erelamik nang arye, talilamik keil, akeil talibuka sik isa sisibuka si erelamika nirya Yosia birye, dobuka teikuka batakuk. Winibukce, atue kiplobuk. Aning-aning si erelamika nirya ara, ninye yok uk yamubukabukce weik ubuka langdibuk. Winyamukce ninye yok uk erelamuk. Deiyok ara, ‘Amutuku-amutuku nirya ara, tuba tonap, ninye yanuka isa si kum erenamak’ tenen, winibuk.
Ura, aning nirya akunum winibikopura, Raja Yosia birye, ‘Winiplulume,’ nyapdeibukba, Allah el si eren aik pum tam pil dona deiyok nang, sik weik deiyoknye, imam Hilkia ap, el amu tam pil don nang, yuk imam nang ap, tonda Allah el si eren aik bublan dam tikuka kalikin nang ap arye, Allah el si eren aik pum tam wekuka dipdeyikce, isa si eren ning nirya dobukabikce, bai tam boyayik. Ara, isa mer sik si Bahal ap, Asyera ap, si erena ati, ninye taruk deice arye, memebuka deiamikce, anyaik pum tam deiamik ning ap, tonda, im deice tam ulul ning ati si erelamik ning ap, aning dobukabikce anyaik pum tam arye, bai tam boyayik. Boyayikopura, weik asik Yerusalem mutuku bai tam bukni, mek si Kidron mek dam bobiyikce, uku dabikba, uku dibuk. Aning-aning nirya uku akunum dibukce, atue dayuk ning ara, bobukabikce, mutuku si Betel mutuku bobinuka, donokikce batikik.
Raja Daud tenebukce winibuk ning deiyok ara ani. ‘Kume, Allah Yahweh el si eren aik dona ati patapmalye ning nirya ara, na adiparyuk kintinip deipnamne,’ tenebuk. Utenebukce, nyabuk. “Aning kintinip deipnamana deiyok ara, ani. Na mi Salomo elda, winiryuknye ulula ati, anyaik atonun ning kanam kum dolamuka anya arye, el pil dona ati ara, mitik weik tonun kum tenilula atia. Aminyan talak Allah Yahweh el aik aminyan dopnamle ning ara, urasin pia teleb-teleb upnamle. Winipliba, weik mutuku sirya, im sirya nirya, unyak nang nirya eibicopura, ‘Se, anyaik ara urasin pia teleb ulula anya arye, yuk mutuku noutam ara, anyaik atonun ton pia kum ulule. Anyaik asukum ara ani, aning uka tenenamake. Ati, na Raja Daud kum dipnamnye talak aryuk aik don ning nirya ara, pia teleb ninguk kintinip deipnamne,” nyabuk. Nyabuk touk, Daud min kum dibuk talak nirya ara, anyaik dona ati pia teleb ning kintinip deiamuk.
Tonda, na mi Salomo, narye el si erelamse Allah, na ni koproba Allah ati, an babye kel bikinamlame. Allah el siuk pia erenamlame. Ara, an kanye talima nirya moubuka tenepmince, ‘Winipnun do, kum do?’ tenen, teniltona pia kum unamlame. Pia pi dobuka, el tibuk, talipmince el siuk erenamlame. Ara talye ati kume. Deiyok ara, Allah Yahweh elda, ninye talima noutamuk ulul ning nirya weklirye dilule. Tonda, ninye kanye pum tam teninamak ning ap, ‘Winipnamabe tenen,’ teninamak ning ap nirya ara, kel bikilule. Ura, ance elti, ‘El kanye delilul ning eipnirye, kel biknamne. Aninguk talibuka unamne,’ tenepminyopura, dipkoprob adiparyuk el ulul ning ati eipmince, elti, bikinamlame. Bukni, aning winina kumce, el batakmince, kum dobolbiminyopura, elce, ‘Kume, anye na like,’ tenepkilirye, pia ati bataknamkile, kum melinamkile.
Israel mutuku noutam ulamik nang, sik ninye deiyok kibuka ulamuknye, Raja Daud birye, el dam bulubuka yanmek nang nirya ati, nyabuk. “Ura, na kayapo. Na mi Salomo bira, Allah arye, ‘Anye bira Raja unamleʼ tenen, akunum wipdeipmasile. Anye wipdeipmal bukni, elda welnye tuba unmal talak wipdeipmala anya arye, el pil dona ara, kabula. Elda winiryuk biknin banmale. Tonda, nun ni koproba Allah Yahweh, el si eren aik dona ati ara, pia ikin pil ulule. Deiyok ara, aweik aik ara, talye tukwak nang, dipnamak nang arye wekenamak aik kume. Ninye talye nang sik weken aik kum bukni, anyaik ara, Allah el si Yahweh, aning-aning deice tam ululnye, el aik ulul ati nyapne.
Yehuda tam noutam nirya ara, yuk mutuku nang olana kumce, namin aryuk ulamik ati ara, amutuku noutam nirya, ‘Yuk mutuku yu nang arye yanuka opsicak tenen, weik cang keil poka domukce, weik asik domuk ning nirya ara, lipsisikuka dolamukak arye, teleb kibuka mikip kepdeibuk. Allah el si Yahweh arye, Asa biti, kanye pia namin arye dungobuka uning areamukba, adeice arye Yehuda tam noutam nirya, olana kumce, teleb asa namin aryuk ulamik. Winibuka ati, keting tamun ouku weik deice arye, ton kum olalamik. Teleb kanye deibuka ulamik.
Akunum wekuk ati, nabi Asarya birye, ‘Ninye deiyoknye Raja Asa abataknamneʼ tenen, biyuk. Biyukce nyabuk, “Se na deiyoknye Asa ap, Yehuda mutuku noutam unyak nang nirya ap, tonda Benyamin yala nang nirya ap ati, nyapsine! Moubuka kekeplulume! Allah Yahweh anggun dam usulule. Atonun, anggun babye el dam ululume. Ati, anggunce Allah Yahweh ati, El nyasilye yupu nirya adiparyuk moubuka dolonamabe, aninguk talinamabe ati, melipsilyame nyabuka moropmunyeura, elce anggun dam yanuka melisiliba, el ap neika unamlume. Bukni, anggunce elti, kum kekepmunyakarye, batakmunyeura, elce anggunti melina kumce, batakanamsile.
Atalak noutam ara, isa si erena ati, kam ning obuka, uku dongona ati kintinibuka deiamik ning, el si mesba-mesba ap, tonda isa morona ati, kin-kin tong teleb nyan ning bobuka, uku dalyangalamikak ton, kwinibuka batakik. Ara, Yerusalem weik asik noutam wa uk ning nirya ara, ulubuka batakik. Winilamikce, amesba-amesba Yerusalem mutuku dobuka deiamik ning nirya ara, dobuka Kidron mutuku, lu sukumak donokik.
Winibukopura, yuk mutuku nang arye, ninye urasin atonun memebuka deipnarye, ‘Nun ni koproba aniʼ tenen, si erelamik ning ap, tonda yuk-yuk ning si erelamikce, Allah si eren aik noutam delilamik ning nirya ara, dobuka donokuk. Tonda, isa si erena ati, kam ning opnarye, uku dongonak, el si mesba domik ning nirya babye, tonda, Allah el aik dam kon deice domuk ning nirya ara, ulubuka batakuk. Aning-aning nirya ara bobuka, anyasik ulamik noutam arye, pera mutuku bai tam bobuka donokolbiyuk.
Raja Manasye birye nyabuk ati, Allah el si eren aik damuk, kam ning obuka, uku dongopting bukni, sikce mandipna kanye tuba bolamik ati, amutuku ninye ara, sikce yuk tam mutuku kon deice kintinibuka, yuk mesba deiamikak ton, kam ning obuka, Allah si erelbalamik. Aning ara, kum winipting bukni, sikce aning arelbalamik ning nirya ara, sik si erelamik Allah, el si Yahweh tonok, tenelamikce winilamik.
Amon el babye, el li koproba Manasye birye, Allah dam malye weik ulamuk atouk, el babye winilamuk. Tonda, el li koproba Manasye birye, isa si erena ning, ninye urasin atouk memebuka deiamik ning, el si patung-patung kintinibuka, memepdeiamuk ning dam, isa siuk erelamuk touk, Amon babye atouk, aisa siuk erelamuk.
Aning nirya akunum sirya nyabikopura, Raja Yosia birye, amutuku nang arye, talye nong kum ning bukni, sikce, ‘Nun ni melipsilyame,’ nyabuka, si erelamik ning, Israel nang arye talilamik mutuku nirya uamuk ning nirya ara, ulubuka batakikce, kum kipdeibuk. Winibikce, amutuku nang nirya ati, “Nun ni koproba Allah, el si Yahweh, el tibuk si erenamlume,” nyabuk. Nyabukura, ‘Diba, wininamabe,’ tenebikce, Yosia tuba kam ulamuk talak noutam nirya ara, amutuku nang nirya arye, sik apu yapu nang arye si erelamik Allah, el si Yahweh, el tibuk diba tenebuka, diksukumuk ulamik.
Kam nang, sik unamak talak nirya ati, teleb ubuka winina ati, moubuka kalikdakcopura, yuk malye ning ton, sikce talibuka pia kum wininamake. Ara, nun ni koprop Allah ance, “Aning ara, wininamlulume. Aning ara, pia kum wininamlulume,” nyapdeiamsulum touk, sik aninye arye, aninguk moubuka tenebikirye, ayupu talibuka winipnin bacopura, malye un ning ton talibuka kum wininamake.
Allah antibuk morokununa deiyok ara, ani. Narye, ‘Aning-aning nirya talibuka Pia Mikip Weik ulya Deiyoknye Allah ara, ancuk nati lyepropnamnilam,’ tenen, antibuk diba tenekunune. Diba na ni Allah Yahweh, nara mitik mi ulamse talak arye, dipdongobuka, na kam unye talak nirya ara, antibuk diba tenekunune. Yuknye biti, ton pia diba kum tenenune.
“Anya arye aning ara, winina kum bukni, anggunce amutuku bimunce sik Isa Mutuku Dongonye, el si Asyera, el si erena ati dobik aik ap, yo deiyok iklamak ning ap, kam ning obuka, Isa Mutuku Dongonye arena ati, keil pala dobuka, pala keil bulubuka yakdeibik ning ap, tonda, sik isa si erena ati, puturubuka delilamik ning nirya ap, weplopnalulume,” Allah arye nyabuk.
Tonda, nunce yata mapu do nirya, sik unamak ning ati, ‘Yata wiribuka unamak do?’ tenen, moubuka dinamabe. Winibuka dinauk ulamibiba, sikce teleb unyak ning ara, lakak uk ulule. Aning atonun, sikce malyeuk unyak ning babye, lakak uk ululba eibuka kel kinyabe. Aning ara kum duknuptinge. Aning atonun, nunce wisi nang sik winilamice ning eibibirye, ‘Sik wininyak ning ara, pia teleb kibuka unyake,’ teneptibye. Teneptibirye, ‘Aning ara, pia teleb unyake, anang ara, tuba-tuba malyeuk winipre banyake’ tenen, kel kinyabe.
Sikce nati patapliba, ‘Se, pia weik kel bikna deiyok ning ton doproptibye’ tenen, tuba teneninyak ninye ara, narye sikti, bico tenenirye, melinune. Tonda, yata mutuku ninye do nirya, sikce, ‘Se pia weik kel bikna deiyok ning doproptibye’ tenen, nati patapliba, pia pi dobuka, eninyak ninye ara, dipkoprob sikce pia weik kel bikna deiyok ning, akunum talibuka unamake.
Aning atonun, anggunce mutuku kon deice memebuka deiplumce, anggun ning nirya bobuka, mutuku kon deipmunce, isa si erena ati, uku dongolulumak nirya ara, narye uluplopnamne. Tonda, isa si erena ati, kin-kin tong ning dobuka, uku dongolbalamlumak nirya ara, dakuka uluplopnirye, kum kipdeipnamne. Winipnyeura, isa si erena ati, weilbalamlum ning, anggun si eren ning nirya ara, sik nong nirya dakukapnirye, donoknamne. Anggun ton oplopsinyeba, dipmunyopura, anggun nong dopropnirye, anggun talye ning si erelulum ning ap, isa si erena ati, memebuka delilulum ning, el si patung ap, dakukapnirye, adeiceuk, anggun nong dobuka, adeice deiplopnamsine. Na kanye talima noutam ara, pia malye weik winilulumba, na lik unulule ati, dukmanto kanye unirye, aning nirya ati ara, ‘Anang ap, aning ap nirya ara, na like,’ tenenune.
Akanye imun ning nirya, winipnamla deiyok ara, talye ati kume. Deiyok ara, anggun Israel yala ninye ap, Yehuda yala ninye ap arye, Allah el yupu bisibuka yanimunce, el dam malye winimunye nang ati, dipkoprob anggunti, wenepnamsile. Ara, wini talak ara, yata nang arye, Israel yala ninye dam malye winipdeibikiba, opmanto unyak do? Ara, Israel yala ninye, sik deiyok mutuku, ibu kota Samaria unyak ninye arye, malye weik wininyakba, Israel ninye nirya eibikirye, sik babye malyeuk wininyake. Aning atonun, Yehuda yala ninye babye, yata nang arye, sik benepdeibikba, Isa Mutuku Dongonye siuk erenyak do? Ara, yuk mutuku arye kume. Yehuda yala ninye unyakak nirya, sik weik deiyok mutuku, ibu kota Yerusalem noutamak arye, isa siuk erenyakba, yuk Yehuda yala ninye nirya babye eibikirye, atonun isa si erenyake. Ati, sik Yerusalem mutuku unyak ninye ap, Samaria mutuku unyak ninye ap ati, weik arye wenepnamne.
Aninguk tenebuka, kum unamlum bukni, weik mambul ning ara, Allah arye, ‘Wininamake,’ tenen, nyasilye touk, diksukum winina ap lyepsilirye, nun kanye talima talibuka unamsil ning ap, im deice welepnamlum ning ap, aninguk minopce tenepmunce, pia moubuka talipmunyopura, yuk yala ning nirya babye, elce dipkoprob arenamsile.
Tonda, an mitik mi ulamlum talak arye dipdongobuka, anoutam talak nirya, Allah el pia diksukum yupu peterelamkikbuk, akunum kel bikamlume. Allah yupu peterelamsiaka deice arye Allah, ninye ati lyesulul yupu ap, lyen ning ap, nirya ara, kel bikinyabe. Nunce Yesus Kristus ati, dib tenenyap deice arye, Allah lyesulule. Aning nirya ara, Allah el yupu deice arye kel bikinyabe.