Ura, Raja Hizkia birye teleb pil dolamuk ning deiyok nirya ara, ani. Ara, Raja Hizkia bira, Allah el si Yahweh ati pia dib tenelamuka ati ara, apil dolamuk. Elce, ‘kume, Allah el si Yahweh arye, nun Israel ninye nirya pia kalikuka melilamsuk Allah ara, el tonoka,’ tenelamuka atia. Yehuda tam ulamik ninye ara, sik Raja nang weik ton aulamik bukni, sik yuk-yuk Raja nang ara, el tonun kume. Hizkia bira pia telebnye ulamuk. El min kum deiamik talak babye, el akunum deibikba, nebukce Yehuda ninye taleamuk talak bukni, aminyan talak babye, el ulamuk atonye ton kum ulamik. Pia telebnye bira el uka.
2 Tawarikh 32:8 - Eipomek8 Nyabukopura, ayupu ton nyabuk. “Aning ara, talye ati kum nyapsine. Raja Sanherib elda ninye mikip deice aryuk, yanganmal bukni, nunda nun ni Allah Yahweh, el mikip weik deice unamabe. Aning ati ara, Allah Yahweh arye nunti, kalekuka melipsilirye, el mikip deice aryuk melibuka, sik Asyur mutuku yin nang nirya, obuka sirya daknamale,” nyabuk. Yehuda tam mutuku nirya taleamuknye Raja Hizkia birye, ayupu nyabukba, el taleamuk nang nirya kekebikce, sik nirya ara, ‘E, dip nyapmasileʼ tenebikce, ilil una kumce, malye tenebik. အခန်းကိုကြည့်ပါ။ |
2 Tawarikh 32:8
35 ပူးပေါင်းရင်းမြစ်များ
Nyabukura, Elisa bira Allah el yupu lak nyana deiyoknye birye, el melinanye biti nyabuk. “An ilil una kume. Anggunda ninye weik tenepmalum bukni, na dipkoprob nyapkine. Anda min kum eipmanto unmalam bukni, nun dam ara ninye pia weik arye, aunmake. Sik Aram mutuku nang ara, ninye mitik anun uka. Nun ap, neika unmap nang ara, pia weik,” nyabuk.
Ara, Ruben yala nang ap, Gad yala nang ap, tonda Manasye yala nang noutam arye bokdeibik yala nang ap, sikce amutuku ulamik nang ara, pia weik obik. Winibikopura, sik yala nang nirya ara, alubuka doprobik mutuku binuka ulamik. Winilamika ani, Allah arye, Israel nang sik wenen ati, lo arebukba, yuk karin mutuku, Babel mutuku nang arye, amutuku noutam ulamik nang nirya, obuka malye kibikce, amutuku ulamik nang, pia weika arye dobuka, sik mutuku koproba, Babel mutuku noutam bobiyikce, delilbiyikura, daulamik.
Ati ara, nun kele. Nun ninye deiyoknye bira, el Allah uka. Tonda, sik imam nang babye, asukumuk unyak ati, sik anang arye, lelim len ning, el si terompet, ‘Lelim nyapnamapʼ tenen, akunum kintinibuka deibik. Ara, nunce sik olyangan talak ati, lelim nyan ning akunum kintinibuk ninge. Aning ati ara, anggun Israel tam ululum nang nirya ati ara, nyapsine. Anggun ni koproba Allah, el si Yahweh ati, ‘Batakuka, bisipnuyapeʼ tenena pia kume. Anggun ni Allah ati, kum bisinamlume. Anggun kele, aning ara, kum winipmanto. Ayupu nirya ara, Raja Abia birye, sik Israel tam nang ap, Raja Yerobeam ap ati, nyabuk.
Wininmarik talak ara, Yudea mutuku ninye deiyoknye Asa birye,el si erelamuk Allah, Yahweh ati morobukce nyabuk. “Se, na ni koproba Allah Yahweh, ancuk ninye mikip kum nang ati melisilyame. Nun babye, mikip kum nang unyap bukni, otam mikip weik nang dam binuka opdanuyap ati, ancuk nunti Melipsimince, mikip arepnusilam tenen, moropkine. Ati wini talak ara, nun melipsilyame. Ara talye ati kum nyapne. Nunce an tonok, ‘Allah Yahweh aryuk melipsutueʼ tenen, unyaba ati moropkine. Tonda, nun ni koproba Allah Yahweh, wini talak ara, nunce ‘Ancuk melipsutumʼ tenen, dinauk ukinyaba ati, nun ni koproba, an si deice arye yanuka, otam yin talen nang, mikip weik nang, sik yupa nukmanto kum arye kintinibuka, otikmakce, kama ap, yuk ninye olan ning nirya ap bobuka tikmake. Ati, Allah Yahweh, anda nun ni koproba ulyama ati, ‘Naio, otikmak nang arye, obuka malye kipsicakʼ tenen, tonda an tenen nang ap, an ap ati, ‘Malye kipsitingce, obuka sirya kum daksitingʼ tenen ati, moropkine. Tonda, ‘Ance mikip arepsiminyeba, nunce anang obuka sirya daktibyeʼ tenen, moropkine na nie.” Raja Asa birye nyabuka morobuk.
Anoutam ara, aminyan talak winipnamuk ning bikilamuknye, nabi Hanani birye, ninye deiyoknye Raja Asa, el dam yayukce nyabuk. “Anda an ni koproba Allah Yahweh, elti, kanye deibuka kum ulyame. Elcuk lyepnutue,’ kum tenelyame. Bukni, ninye deiyoknye Raja Siria mutuku talebuka ululnye tonok, Elcuk lyepnutueʼ tenen, kanye deibuka ulyame. Ati ara, ance sik Israel tam unyak nang, sik ona ati lo ara, akunum wangaplume. Ati, Siriya mutuku ninye deiyoknye bira, akunum bindobuka ati, elti, tomobuka kum tapu kouptume.
Yahasiel birye nyabuk, “Na deiyoknye Raja Yosafat ap, na kayapu nang, anggun Yehuda tam ululum nang ap, Yerusalem weik asik noutam ululum nang ap, anggun nirya ati nyapsine. Wini talak ara, nun ni koproba Allah Yahweh arye nyapsile. Ara anggun ona ati yin talin nang yupa pia weik arye yanganmacak, eipmunyakarye ilil una ap, kanye bokoltona ap, una kume. Deiyok ara, ayanganmak nang ona ati ara, anggun mikip deice aryuk, kum opnamalume. Allah aryuk, anang opnamale.
Nyapdeipman mutuku akunum wekelbimunyeura, anggunce anang ati, ‘Nun babye mikip arye opdanamabe tenen kum kaleknamalume. Anggunda, anang olana ati kalikmasicak uk binuka dipra buknamlulume. Dipra wekmamunye buk, anggunti Allah Yahweh arye ninye obuka sirya daknamal ning ara, anggunce eipnamlume. Ati ara, anggun Yerusalem mutuku ululum nang ap, Yehuda tam ululum nang nirya ap, anggunda ilil una ap, kanye bokoltona ap, talima dakalsakna ap, una meme. Mapmamunya bereklyeura, mal olanak ara, talye mangkau kanye bobuka weknamalulume. Ara anggunti, Allah Yahweh arye dipkoprob melibuka lyelonamasile.” Yahasiel birye nyabuk.
Akunum mapmika, berekukopura, beren tam koproba arye, sik Israel nang nirya ara, Tekoa pata mutuku tam biyik. Sik aninye binuyik talak ara, Raja Yosafat birye, ayupu nyabuk. “Yehuda tam noutam ululum nang ap, Yerusalem weik asik noutam ululum nang ap, anggunce Allah Yahweh tonok ati, dib tenepnamlulume. Dip tenepmunyeura, Allah arye melipsiliba, anggun adiparyuk talima darabuka, mikip tuba unamlume. Tonda, sik nabi-nabi nang arye nyalilamsik yupu ara, moubuka talebuka, dib tenepmunce, teleb umunyeura, anggun winin ning nirya ara, nong unamsile.” Yosafat birye, sik Israel nang ati nyabuk.
Ati, anggun deiyoknye Raja Hizkia ati batakmunyeba, elce tilila yupu anggun dam pia nyanmasil ning ara, diba kum tenenamlume. Elce anggunti, walwal nang atonun kilisulula ati, elce, ‘Winipnamabe,’ nyanmasil yupu ara, kekena meme! Hizkia birye, anggun dam nyasilye yupu ara, diba kum tenenamlume. Anggun ton moubuka biknamlume. Dan mutuku unyak nang, sik si erelamik ning arye, nun Asyur mutuku nang ati, mikip kibuka ton obuka sirya daksik do? Tonda, dan tam nang arye, sik tam nang lyena ati, yanuka na apu yapu nang ap, na ap ati, obuka sirya daksik do? Kume, yuk-yuk mutuku nirya alubuka doprobuburye, sik yuk mutuku ulamik nang nirya, obuka sirya dakupu. Winibuburye, sik ulamik mutuku ap, sik talilamik ning nirya ap ara, alubuka doprobupu. Ati yuk-yuk mutuku nang nirya ara, kum lyepdanmanto ulamika ati, narye dipkoprob nyapsine. Anggun Israel nang babye, anggun ap, anggunce si erelulumnye ap arye, anggun tam nang ati, kum yanuka lyeptume.” Raja Sanherib birye, Sik israel nang ati nyabuk.
Winipnamle ati, teleb ning ara, ‘Allah Yahweh, el amu tam binuka una ara, pia telebe. Allah elcuk melinamnile’ tenen, el tibuk moronamne. Bukni, ‘Sik ninye tukwak ninye atibuk, sikce melipnitinge,’ tenena ning ara, pia kum tenenamne. Ara, nun tukwak ninye nirya ara, mikip kumce, mitang ninye uk unyap bukni, Allah elda, mikip weiknye ulula ati, nyapne.
Winida na akunum kel bikse. Allah arye, ‘Anye bira, ninye deiyok kiplirye, na mapu koproba, Israel yala nang nirya ara, taliplirye, sik rajanye unamle’ tenen, wipdeiamnuka ati, dipkoprob melipnilirye, pia lyelonamnile. Allah ara, im deice arye, Pia Teleb Lekak arye, na moronun ning kekepnilirye, melinamnile. Allah, el mikip weik, sirik taruk deice melinamnila deice arye, na mal olana ati, yu nang nirya obuka, sirya daknamnarya!
Allah Yahweh arye, ninye tukwak ninye nirya ati nyasulule. Anggunce, ngalukuka malye yupu nyamunye ning nirya ara, tunim aplulume. Nara, Allah Yahweh ununa ati, na siuk kel kipnululume. Yata ninye do, mutuku-mutuku nirya, daunyak ninye nirya arye, na siuk kel biknumunce, na siuk erenamnulume. Tonda, mutuku-mutuku nirya ululum ninye arye, na siuk erebuka, si erenamnululume.
Tukwak mutuku-mutuku nirya unyak ninye arye, mal olanmakirye, weik lelim nyapliba, ngaluklamak touk, winibuka ngalukunyake. Ton tam ninye arye, yuk tam ninye ati, obuka sirya dakikiba, kum danalule. Allah arye tenepsilye sum, akunum kiplyopura, el yupu weik arye nyapliba, tukwak mutuku nirya, atu atonun ubuka kum danamle.
Sik eibika deice arye, diba tenebik. Tonda, Musa ap, Harun ap arye, “Kume, Allah el si Yahweh arye, nun ikin usilye ning ap, kanye imun kanye bolamupu ning ap ara, aning nirya Yahweh akunum kel bikamukce, nunti bico tenepmasilce, melinamsile,” nyabuka, laka nyaprikba, kekebikopura, sik Israel ninye nirya arye, gutam tuku dipdongobuka, Allah el si Yahweh ati, el si erebik.
Yatanye do nirya, elce, ‘Se, yata wiripnamnil do? Ikin ning na dam yanamle do? Yuk ninye arye, nati, ikin ning dobuka, na nong deice deilinamniyak do?’ tenen, malye kanye bobuka ululnye bira, ilil kanye bobuka, talima noutam engena uk unamle. Bukni, yuk nang arye, anye biti eibikirye, el ikin ulye ning kel bikikirye, ‘Se, nun kwit melipnuyap’ tenen, el talima melina ati, teleb yupu nyabikcopura, anye kekeplirye, aminyan talak tuba tamubuka kanye deibuka unamle.
Allah Yahweh arye el wenena ati kintinip deibuk kama dobuka, sik Asyur mutuku nang ati, opnamle talak ara, Allah el ‘Naʼ tenen, nang Israel ninye kekebikirye, bung-bung nyan ning, el si ara kecapi, lelim nyan ning, el si gendang ap, bobikirye, kanye deilin mot ton nyapnamake. Atalak ara, Allah el taruk aryuk ereplirye, sik Asyur nang uaplirye, wenebuka opnamale.
Anggunce, ‘Se, sik Mesir mutuku nang ara, pia mikip weik nang unyake,’ tenelulum bukni, na dipkoprob nyapsine. Sik Mesir mutuku nang ara, talye tukwak ninye koproba uka. Sikda na Allah ununa atonun nang kum unyake. Sik talibuka unyak kam ning kuda nirya ara, talye ninguk ulule. Sik kuda basam ara talye kam ninguk, na talima mikip ulul touk kum unyake. Mikip kumce mitang ninguk unyake. Ati, na Allah taruk deice arye, ikin pil dobuka, anggun malye winilulum ninye nong deice ikin ning deipsinye talak ara, na wenepsinirye anggun nirya obuka sirya dakanamsine. Ara, pia malye ululum ninye ap, anggunti melisinyak ninye ap, anggun nirya wenebuka opnamsine. Winipmanto ara, ninye bakirye keil yan dum dukliba, saklamak touk, narye obuka sirya dakanamsine. Anggun nirya adiparyuk dipnamlume. Allah arye sik Israel yala ninye ap, Yehuda yala ninye ap ati nyabuk.
Ati ara, anggunda Raja Hizkia birye, nyapmasil tilila yupu ati, kekena kume. Elce anggunti, ‘Allah Yahweh arye melibuka lyepnamsile,’ nyapmasil ning ara, talye tilila yupu uk nyapmasila anya arye, aning ara diba kum tenepnamlume. Anggun ton tenipdelulume! Narye, Asyur mutuku taleamse talak nirya ara, yata mutuku nang ton, kum obuka sirya dakamsirye, sik mutuku kum talinun do? Kume, yuk-yuk mutuku dana-dana tam nirya ara, obuka sirya dakamsirye, sik mutuku nirya alubuka dopromse ati, amutuku-amutuku nang nirya ara, lyepdanmanto kum ulamik. Amutuku-amutuku unyak nang arye, ‘Nun ni aniʼ tenen, si erelamik isa mer arye, anggun ton yanuka melibuka lyepdomsik do? Kume, tonok ning babye, melibuka kum lyepdobik. Amutuku nirya akunum malye kibuka talipse.
Ati ara, narye nyapsise. Anggunda ilil una meme. Nara anggun dam unirye, pia melinamsine. Nara, anggun ni koproba Allah ununa ati, anggun kanye teniltona kum unamlume, Imun kanye bobuka kum unamlume. Nara anggun ni Allah unirye melinamsine. Na aryuk mikip arenamsine. Tonda nara, malye ning tonok ning babye ton kum ununye birye, na sirik taruk deice arye, pia talinamsine. Winibuka melipsinya deice arye, aning-aning nirya malye kum kipnamsine.
Tonda, anggunce, ‘Yuk mutuku ninye olbinamap’ tenen, ‘Winipnuyabe,’ nyabuka yupu talilamlum bukni, narye anggunti, yupu seksinyopura, anggun tenepmalum ning, nong kum upnamle. ‘Winipnamap’ tenen, kinintininamlum bukni, anggun tenepmamunya atonun, kum wininamlulume. Atenepmalum ning nirya, kum kipdeipnamsine. Ayupu nirya nyapmasina ara, urdem ati, kum nyapsine. Imanuel nyanyak touk, “Na Allah ap, Israel yala ninye nirya ap neika unamap ati, nyapsine. Ati anggunce, ‘E Yahudi yala ninye nirya obuka, sirya daknamabe’ tenen, kanye kum delinamlulume.” Na Allah arye nyapsine.
Na Allah Yahweh arye nyapsine. Nara anggun ni koproba Allah Yahweh unun bukni, anggunce bataknulumce, ninye koproba atibuk, ‘Sik mikip deice arye melipnamsiakca,’ tenemunce, talye tukwak nang ati, ‘Sik yuk mutuku nang aryuk, melibuka lyepsitinge,’ tenelulume. Aning atonun tenebikce nang nirya ara, narye wenebuka opnirye, kanye imun weik ning, sik deice deipnamnarya! Deiyok ara, sikce nati, diba tenena kumce, sik kanye talima noutam arye, tenibuka batakaninyake.
Ati ara, minop talak ara, anggunce Babel mutuku talibuka ninye deiyok kibuknye biti, ilil weik ulamlum ning ara, tuba kum unamlume. Anye biti, anggunce elti, ilil una kume. Ilil kum unamluma deiyok ara, ani. Ara, na Allah, anggun kan-kan unirye, tuba melibuka kalikinamsine. Narye melibuka kaleksiniba, Babel mutuku ninye deiyoknye birye, sikti, ‘Oplirye, talinamsilʼ tenen, pia lyelonamsine. Winipsinyopura, anggunda telebuk unamlume.
Amalaikat arye, na Zakaria biti, nyapnuke. “Anda, ninye si Zerubabel dam binuka, elti, Allah Yahweh arye, nyapdeibuk yupu ara laka nyapnulyame,” nyapnuke. Ara, ance elti, nyapnalam yupu ara, ani. “Zerubabel an teleb winipnamlam ning ara, an mutuku yin talen nang, sik mikip weik deice arye, mambul pil kum dopnamlame. Aning atonun, ancuk mikip deice arye, kum winipnamlame. Aning kum bukni, na Allah Yahweh arye, na mikip weik ulul Pia Teleb, Lek Dip Kanye, el mikip weik, an deice deipkiniba, aning aryuk, narye, ‘Anye apil dopnamnile,’ tenepkise mambul ning ara, winipnamlame. Nara, Allah Yahweh, im deice unyak yin talen malaikat nirya, sik deiyoknye ununa ati, anyapmakin yupu ara, dipkoprob nong upnamlarya!
Anggun mal olan talak upliba, anggun mal olan nang ap, mal olalbanamlum talak ara, anggun mal olan nang ara, yin talin nang pia weika arye, kuda basam balye deice bukuka, yanganamak ning ap, ninye arye kuda basam tapu kirikikiba, libuka tuku deice balamak ning, el si ara kereta kuda perang, aning deice bukikirye, anggun dam olyangasikiba eipmunce, anggun ilil una meme. Aning kum bukni, minop talak anggun ni koproba Allah Yahweh, Mesir mutuku ninye noutamak arye melibuka boyanamsuk Allah arye, anggunti melinamsile. Ati asum-asum nirya, el tibuk pia diba tenebuka unamlume.
Elce nyanamsile. “Amapo, anggun nirya kekeplulume! Anggun Israel yala ninye ara, arup arye nyapmasin yupu ara, moubuka kekeplulume. Wini talak anggun mal olana ati, anggun mal olan nang dam bimunyopura, ilil una ap, kanye talimauk dina ap, ‘Se, yata wiriptibye do?’ tenen, walwal kanye bobuka, sirim talina ap, pia kum wininamlulume.
Anang nirya bataknik bukni, nun deiyoknye Yesus, na dam yanuka melipnuka deice arye, el mikip arepnukbuk, na yupu teleb ubuka nyapse deice arye, atalak bulupmek Yahudi yala kum ninye nirya arye, Allah el ninye lyen yupu kekebik. Atalak ara, aninye arye talye merekukua oplopmanitinge. Bukni, Yesus arye lobuka lyepnuka ati, sikce kum opnike.
Yosua birye, tonok talak aryuk, amutuku noutam nirya ara, biyukce obuka ara, ninye deiyok Raja-Raja nang ap, sikce talilamik nang ap nirya ara, biyukce obuk. Israel nang nirya arye, amutuku noutam ulamik nang obik. Ara, sik mikip deice aryuk kume. Sik ni koproba Allah Yahweh arye, melibukce, el mikip sik Israel nang deice deibukba, obuka sirya dakik.
Na mapu atonun nango, anggunda Allah ati, diba tenebuka taliplum nang ara, anggun talima ak usilinye, Allah, el mikip pia weik ulule. Bukni, tilila yupu peterenyak nang nirya, sik talima ak ulirye, talilinye bira, Isa Mutuku Dongonye, el mikip mitika. Ati ara, Allah el mikip deice talisilibuk, ululuma anya arye, Isa Mutuku Dongonye, el talilye nang nirya, akunum yanibuka bataklulume.
“Anda ninye olana ati cang yo tace ap, parang ya ap, aning nirya kintinipmalamce, yanmalame. Bukni, nara, aning-aning nirya, deice tam ulirye mikip weiknye, Allah el si Yahweh, el si deice arye yane. Allah ara, mikip weik deiyoknye, el si Yahweh deice, aniryuk yanmane. Allah ara, Israel ninye, sik yin talin nang kalikuka melilule. Ance malye yupu nyaplame deice arye, Allah ati yanipmalame.
ကြော်ငြာတွေ