2 Tawarikh 22:11 - Eipomek11 Winilamik bukni, Raja Yehoram birye deibuk kil, ara Ahasia el makal kil tonok, el si Yoseba ulamuk. Tonda, Allah el si eren aik pum tam pil dolamuknye, imam Yoyada birye, akil domukura, akil Yoseba birye, Ahasia deibuk mi, el si Yoas dobukce duknubuk. Ara atalak, Yehuda yala nang arye, deiamik mapu, Raja kipmanto mapu nirya ara, Atalye birye nyabukba, el tam nang arye wibuka olamik ati, ‘Ami Yoas ton obicak,’ tenebukce, Yoseba birye, sal mi nyana kumce, Ahasia deiamuk mi Yoas doprobuk. Yoas doprobukce, el ap, el kalekuka melin kil ap, tonok man aik noutam arye, dungnubuka daulamdik. Winibuka ati, Allah el si eren aik noutam ara, tonok aik noutam koprop arye, dungnubuka deiamukba, aulamdik. Yoseba birye, ami lyepdobuk deice arye, Atalye birye, ami kum obuk. အခန်းကိုကြည့်ပါ။ |
2 Tawarikh 22:11
14 ပူးပေါင်းရင်းမြစ်များ
Abiam bira, malye winilamuk bukni, Abiam el apu koproba, Raja Daud birye, Allah Yahweh el si erelamukce, telebuk winilamuk ning ati, Allah arye, ‘Amalye wininyak deiyok nang ara, wenebuka opnirye, kum kipdeipnamne do? Yata winipnamne do?’ tenen, tenipdeyukce, ‘Kume, Daud birye deibukba, dadeipdanin banamak nang ara, Israel ninye ap, sikce unamak mutuku nirya ara, tuba talipnamake,’ tenebuk. Ati, Rehabeam birye deiamuk mi, Abiam birye, el li punubuka, Yerusalem mutuku asik nirya, talipnamle. El diplyopura, elce deipnamle mi arye, amutuku talipnamlarya,’ tenebukce, anye wipdeibuk. Tonda, ‘Abiam el mi ton deipnamleʼ tenen, melibukba, Abiam birye, mi ton deibuk.
Bukni, ninye deiyoknye Raja Ahasia, el makal kil Yoseba, elda Raja Yoram el kilmu ulamuk. Ati ara, akil Yoseba birye, el du Raja Ahasia, elce winiryuk deibuk mi, Yoas dobuka dungnubuk. Ara, yuk nang ati, yupu nyana kum deice arye, yupu kum asa, Raja Ahasia el mapu ulamika noutam arye doprobuk. Deiyok ara, Ratu Atalye birye nyaibukba, ninye yuk nang arye, ‘Raja Ahasia, elce deiamuk mapu nirya, obuka sirya daknamabʼ tenen, akunum kintinip deibika ati, akil Yoseba birye, amitik mi Yoas dam bobinuka lyebukabukce, ami ap, ami kalekina ati melin kil tonok ap, bobinuka el aik pum tam bukni, tonok man aik pum duknupdeibuk. Winibuka ati ara, Atalye el melin nang arye, amitik mi Yoas kum obik. Aminyan talak ara, Yoseba birye, ami bobukabukce, Allah el si eren aik bukni, anyaik pum duknubukba, anyaik pum tamuk, keting tamun enam tahun deice arye daulamuk. Atalak noutam nirya ara, ratu Atalye, Israel tam ninye ulamik mutuku taleamukce, pil dolamuk.
Yehoram bira, malye winin ning weik winilamuk bukni, Allah Yahweh ara, Raja Daud elce deibukba, dadeipdanin yangalamik nang nirya ati, obuka sirya kum dakuk. Aning kum obuka deiyok ara, ani. Ara, Allah Yahweh arye, Daud el yala nang ati, nyalin yupu deice arye, “Daud birye deiplyeba, dadeipdanin banamak nang arye delinamak nang, sikcuk ninye deiyok kibuka, amutuku talibuka, Raja nang pia kipnin banamake,” min talak nyalin yupu deice arye akunum nyabuka ati, ‘Aning ara, akunum nyapdeipsa ati, sik Daud yala nang aryuk, amutuku talibikirye, Raja nang unamake,’ tenelamuk. “Pia aninguk wininamake,” nyalin yupu deice arye, Yahweh akunum nyapdeiamuka ati, aninye deiyok nang ara, obuka sirya kum dakuk. Ara, Allah arye, “Daud el yala nang aryuk, amutuku nirya talibikirye, ninye deiyok kibuka, Raja nanguk unamake,” nyalin yupu deice arye, min talak akunum nyapdeiamuka ati, ‘Daud el yala nang nirya ara, kum obuka sirya daknamne,’ tenelamuk.
Atalak ara, Yehuda tam taleamuk Raja Ahasia, el lin koproba Atalye birye, ‘Se, na deipsinye Raja Ahasia akunum obikba dibukʼ tenen, akunum bikukura, elce nyapdeibukba, el melin nang arye, Yehuda yala nang, Raja kiamik nang arye deiamikak, dadeipdanin yangalamik nang, Raja kipmanto nang nirya ara, ‘Sik ton Raja kibuka sisi nang tikicakʼ tenen, anang nirya obuka, kum kipdeibuk.
Akil Atalye birye, Yehuda tam taleamuka ani, keting tamun tekbarye (7) akunum kibukura, imam Yoyada birye, ‘'Yoas erepdeibipnyeura, Raja kipnamsile,’ tenebukce, pin-pin ubuka deice arye, mikip kibukce, ‘Aning ara winiptinye,’ tenebukce, Yoyada birye, yin talina deiyok nang, pamubarye nang ati, ‘Winipnamabe,’ nyabuka nyalin yupu deice arye, kintinibik. Ayin talin nang ara, sik amu tam, yin nang ton, seratus (100) nang taleamikce, yupu nyalamik. Ayin talin deiyok nang ara, kung yuk-yuk ulamik. Ati, imam Yoyada ap, yin talin deiyok nang ap, kanye tonok bobuka, yupu tabik nang, sik si ara ani. Ara, Yoreham el mi Asarya ap, Yohanan el mi Ismael ap, Obed el mi Asarya ap, Adaya el mi Maaseya ap, tonda Zikri el mi Elisapat ap, sik nirya ap, Yoyada ap arye, ‘Yo aning ara, winipnamabe,’ nyabuka, nyalin yupu deice arye nyadayik.
Nil mek pum bisik arye, yakai nukmanto kum pia weik uplirye, mek pum bisik arye yakai weik weleplirye, Firaun an weiknye aik bunak ap, an manak ap, yakai weika arye, langdipnamle nyabuk. An amu tam pil dona deiyok nang, sik aik pum ap, Mesir mutuku ninye sik din aik ap, sik din dan aik ap, sik un aik nirya ara, yakai weik weknamle.”
Yata ninye do nirya, sikce, ‘Wininamabe, teleb una ara ani. Nunce pil donamap ning ara ani,’ tenebikirye, ‘Yata wiripnamap do?’ tenen, pia weik kel kilamik nang ap, yupu taliptingce, pia mambul kirikuka piripdeca babye, Allah Yahweh arye, ‘Wininamne,’ tenyamuk ning ati ara, tukwak ninye arye kum malye kiptinge. Allah arye tenelul touk ulula atie.
Na Allah Yahweh arye nyapsine. “Winipmanto ara, ninye arye anggur tapu duk mouamlya dakikirye, malye ning batakuka, teleb ning wibuka dololamak touk, Israel ninye na wipdeiamse ninye noutamak arye, malye unyak nang ara wibuka bataknamne. Bukni, na si erebikirye, teleb unyak nang ara, lyebuka dopropnamne.
ကြော်ငြာတွေ