2 Tawarikh 2:10 - Eipomek

¹⁰ An mutuku nang arye, urasin teleb kat yo webuka kintinip deipnamak ning dekna ati ara, gandum duk teikicak arye, gandum tepung, yupa weik, dua ribu (2.000) ton (2.000 kg) arepnamne. Tonda, din ning el si jelai ara, atonun dua ribu ton (2.000 kg) tabakuka arepnamne. Tonda, anggur duk mek ninye dibikiba kanye wangalamak mek ara, empat ratus ribu (400.000) liter dopdeipnamne. Tonda, minyak zaitun ton empat ratus ribu (400.000) liter tabakuka dopdeipnamne,” Raja Salomo birye Tirus mutuku weik deiyoknye Huram biti nyabuk.

2 Tawarikh 2:10 ပူးပေါင်းရင်းမြစ်များ

1 Raja-Raja 5:11

Aryamuk bukni, Salomo birye el ka Hiram biti, din ning el si gandum pia weik arye arelamuk. Ara, Hiram el aik unyak ninye sik din ning ati, empat ribu empat ratus kilo (4,400 kg) din ning el si ara, gandum libuka arelamuk. Tonda, yuk ning ton tabakuka areamuk. Ara, zaitun yo duk teikuka purubikba, minyak mekintinibuk ning ara, 440 liter areamuk. Tonda, Raja Salomo birye aning-aning arelamuk touk, aketing tamun, aketing tamun nirya, Hiram biti pia tuba arelbalamuk. Ara, Allah el si eren aik dolamik talak arye, dukdongobuka tuba arelamuk.

1 Raja-Raja 7:26

Bukam weik mek makau bola ara, 75 milimeter ubuk. Bukam weik mek makau bai tam ara, mitik mek makau el si cangkir, el talena ati moubuka delilamak atonun winibuka deibukce, bunga si Bunga Bakung, kita lalamleto ning dobuka memepdeibuk. Adobuka deibuk mek makau, mek kwen makau noutam mek delina ara, winipmanto empat puluh ribu (40,000) liter atonun kintinip deibuk.

1 Raja-Raja 7:38

Aning upmok touk, Huram birye weik mek makau yangalina ato ning, el si baskom, sepuluh (10) ton dopdeibuk. Tonok yangalin ning ara, tonok mek makau bobana kereta ati, dopdeibuk. Yangabuka deilin ning baskom, el noutam wilina ati ara, 1,8 meter. Tonda, mek lin ning ikin ara, 800 liter memebuk.

1 Tawarikh 14:2

Aning nirya winibuka deice arye, atalak ara, el Daud bikukce, ‘E, aning nirya ara, Allah el si Yahweh arye, teleb kipdeipmanile. Ara, Allah arye, ‘Anye ‘Naʼ tenen, nang talibuka, weik deiyoknye Raja unamle,’ tenelamnuk touk, ‘Ninye deiyoknye kibuka erepdeipnuke,’ tenebuk. Tonda, Allah arye, ‘Israel yala nang nirya ara, pia telebuk unamakʼ tenen, ninye deiyoknye Raja keipnukce, na talenun ning nirya, pia teleb kibuka delinulule. Awinibuk nirya ara, na dem ati kume. Deiyok ara, Allah Yahweh el ‘Naʼ tenen nang, sik Israel yala nang melina ati winipnuke,’ tenebukce, Daud birye bikuk.

2 Tawarikh 2:15

Ati ara, wini talak ara, gandum yala bitinye ap, anggur mek ap, minyak zaitun mek ap ara, nun deiyoknye Salomo birye, winibuka arepnamsine,’ nyapdeiamsuk ning ara, dopdeipsiminyeba, nun an amu tam pil don nang arye, ‘Dan talak arye yanamsil do?’ tenen, dinauk unamabe.

2 Tawarikh 2:9

Urasin teleb yo kintinipnamak ning ara, mitik tonun kum bukni, pia weik tonun kintinibikirye, na dam boyanamake. Aning deiyok ara, ani. Ara, ‘Allah Yahweh el si eren aik ati dopnamne,’ tenepse ning ara, urasin pia teleb ap, nong weik aikak dopnamne.

2 Tawarikh 9:8

Nyabukce, aning ton nyabuk. “Ati ara, ani koprop, ance si erelyam Allah, Yahweh ara, pia telebnye ulul ati, ninye nirya arye, elti, telebe nyapting, tenepne. Ninye nirya arye, teleb yupu nyapmunyak arye, el siuk erenamlume. Allah arye anti, pia kanye deiamkukce anti, ‘Israel yala ninye nirya, sik ninye deiyoknye Raja kipnamle tenen, wipdeiamkukba, sik Israel mutuku ninye taliplume. Allah el si Yahweh arye winibuk ning ara, talye ati kum winibuk. Kume, ance si erelyam Allah Yahweh, sik Israel yala ninye ati, bico tenelamukce Sikda amutuku noutam pia ati unamak tenelamukce, wini talak babye tuba tenelul deice arye, an wibuka deipkukba, Israel ninye sik deiyoknye Raja akunum ulyame. Wipdeipkukce Anye bira, wininamle, Israel ninye sik melina ati, dipkoprob ning pil dobnin balyakarye, sik winilamikce touk, teleb kibuka yupu lipsisikuka bokolina ati, deiyoknye kipnamle. Tonda, diksukum ninguk talebuka, pil donamle,’ tenyamukce, wibuka deipkuke.” Ayupu nirya ara, Syeba mutuku ninye deiyok kil arye, Raja Salomo biti nyabuk.

Esra 3:7

Israel ninye nirya arye, aik pil melibuka don nang arena ati, yo bok uang moubuka deibik. Ara, keil deibuka puturun nang ap, yo cakukabikirye, aik nong dopnamika deiyok nang ap ati arebik. Tonda din ap, mek ap, zaitun yo duk mek minyak mek ap ara, bubukabikce, sik Sidon mutuku nang ap, Tirus mutuku nang ap ati arebik. Arebik ning deiyok ara, ‘Amutuku nang arye, aning doprobikirye, Libanon mutuku bikirye, weik kepyal yo deiyok tapu kobikirye, bobuka laut mekwen deice, Libanon mutuku arye, Yafo mutuku boyanamak’ tenen, arebik. Awinibik ning nirya ara, Persia mutuku talibuka, ninye deiyoknye ulamukce, el si Raja Kores birye, “Winipnamlume,” nyapdeibuk touk, winilamik.

Esra 7:22

Esra moropsilyopura, aning arenamlum ning ati, ‘Winibuka arenamlume’ tenen, nyapnusine. Ara, uang emas yupa ara, tiga ribu empat ratus kilo (3.400) arena telebe. Tonda roti yuna deiyok ning, gandum atau jagung yupa ara, sepuluh ribu kilo (10.000) arena telebe. Aning atonun anggur du mek ara, dua ribu liter (2.000), tonda zaitun yo duk mek dua ribu liter (2.000) arena telebe. Garam ara pataplyeura, Esra birye moroplye touk, tonok ton batakna kume. Weik arye arena telebe.

Lukas 10:7

Anggun akunum wekmunye aik ara, anyakuk din ning ap, mek ap, sik arepsice ninguk dobuka dinamlume. Ara, sik pil dobice ninye dekna dololamaka atonun ati, anyasik nang arye arepsice ninguk dobuka dinamlulume. Winina ara telebe. Or aik mapmana, ei aik mapmana, utam aik mapmana kina meme. Aik talye sakaldana meme.