2 Tawarikh 15:8 - Eipomek8 Oded el mi nabi Asarya birye, ninye deiyoknye Raja Asa biti, ayupu laka nyabukce, aminyan talak winipnamuk ning ati laka nyamuk ning ara, Asa birye ayupu kekebuk. Kekebukopura, el kanye pia deibuka si erebukce, ilil tenena kumce, kil-kil weik ubuk. Kanye deibukura, Yehuda tam noutam nirya ap, Benyamin yala nang sik ulamik mutuku noutam nirya ap, ninye arye, ‘Nun ni koproba aniʼ tenen, isa si erena ati, aik dobuka deiamikak nirya ara, Asa birye uluplobukce, aning kisikdakuka pia yuk karen ak binuka deibuk. Tonda sik Efraim mutuku nirya obuka kum danamik mutuku-mutuku dana-dana tam nirya ara, sik aninye babye isa si erena ati, kintinip deiamikak nirya ulubuka kisikdakuka yukak deibuk. Asa birye, ‘Winipnulume,’ nyapdeiamukba, el pil don nang arye, winibuka pil dolamik ning ara, adiparyuk Allah Yahweh, si erena ap, el arena ap ati delina ati, mesba ara, minop talak malye kiyamik bukni, Asa birye amesba tonap tuba lipsisikuka dobukce, teleb kipdeibuk. Amesba ara, Allah Yahweh el si arelban aik dam bukni, urasin tamuk, aning memepdeibukce dobuk. အခန်းကိုကြည့်ပါ။ |
2 Tawarikh 15:8
24 ပူးပေါင်းရင်းမြစ်များ
Winilamuka ati ara, Salomo birye isa si dobukopura, Yerusalem asik domik bukni, keting yangan tam mutuku dup isa si eren aik dobuk. Winibukopura, Moab ninye talibuka si erelamik Isa, el si Kamos babye, tonda Amon yala ninye arye, si erelamik Isa el si ara, Molok ap, tonok aik uk deibukapnarye si erelamuk. Isa bitinye ara, Allah el kanye ara, ‘Aning ara, pia na like,’ tenelamuk.
Raja Ahas bira, apil nirya akunum winibukopura, minop talak Allah arye, “Na si erenamnuluma ati, kat ning, el si perunggu deice arye, domba ato ning opmunce, uku dongonamlumak ati, el si mesba ton memepdeipnamlume. Aning ara, na Allah Yahweh, na si eren aik, bai tam bukni, urasin dam deipnamlume,” nyapdeiamuk. Aning dobuka, intinip deiamik ning ara, Ahas bira nyaibukba, el melin nang arye, Allah si eren aik urasin tam deibikce, kat ning el si perunggu arye, memebik mesba dobuka, yukak deibik. Ara, perunggu deice moubuka deibikce, deiamik mesba ara, anyaik urasin dam bukni, anyaik wekelbana ati, bublan dam deiamikak arye, dobuka kisikukapmunce, anyaik bublan atam, otam ara, winiryuk memebik mesba deiamikak ubukba, anoutam bukni, utam ara, aperunggu mesba dobuka deibik. Akunum delilbiyikce, winiryuk memepdeiamik ninguk, Allah Yahweh si erena ati deibik.
“Aning atonun, yu deibukabikirye, ‘Kume, nun ni Allah el si Yahweh arye, melisilya deice arye, Asyur mutuku deiyoknye sirya bisipbuka yaniptibye. Ati Allah el deice uk nun kanye delinamabe,’ tenepmunce, aning nyapnutum toura, aning ton nyapnusine. Allah babye elce ton kum melipsutue nyapsine. Anggun tenipdelulume. Anggunce si erelulum Allah el si Yahweh ara, el si erena ati mutuku deice aik domikce, ‘Kam ning obuka, el si erena ati arenamabe’ tenen, pala keil yangapdeiamik bukni, ninye si Hizkia birye asi erena aik, talye ning nirya uluplobukce, apala keil yangapdeiamik ning nirya dalubuka, kum daneibuk. Winibukce, anggun Yehuda tam ululum nang ap, weik asik Yerusalem noutam ululum nang ap, ati nyabuk. ‘Kume wini talak ara, yuk-yukak nirya ara, Allah el si erebuka kam ning obuka el si erena ati kum arelyanganamlulume. Yerusalem mutuku noutamakuk, pala keil taplakuka yangeibubkak, asukumuk kam ning obuka Allah ati arelyanganamlulume,’ nyapdeibuk. Ati ara, anggun se tenebuka, ‘Allah ati morobibiba, Allah arye, melinamsilca,’ tenepmunyopura, Allah ati nyana teleb do? Kume, el babye kum melipsutue, nyapsine. Nyabuka atalak ara, Asyur mutuku ninye deiyoknye Sanherib birye, sik Yehuda yala ninye ap, Yerusalem noutam ululum ninye ap, ati nyapsile.” Asyur mutuku yin talin nang sik weik deiyoknye birye nyabuk.
Aning atonun ninye sik kanye aryuk, Yerusalem mutuku bukni, keting yangan tam isa si erena ati, aik domik ning daklobukce malye kipdeibuk. Aning ara, Yerusalem mitik eitam bukni, mutuku si ara, ‘Pia Malye Un mutuku,’ nyabuka si silamik. Amutuku deice isa si erena ati domik aik uluplobuk. Aning ara, minop talak ninye deiyoknye Salomo birye, sik Sidon tam ulamik ninye talibuka si erelamik isa si Asytoret, el si erena ati domuk ning ara, uluplobuk. Tonda, sik Moab tam ulamik ninye talibuka si erelamik isa si Cemus, el si erena ati domuk ning ara, uluplobuk. Tonda, sik Amon tam ulamik ninye talibuka si erelamik isa si Molek, el si erena ati domuk ning ara, uluplobuk. Aisa mer nirya ara, pia malye weik ulamika ati, Allah el kanye ara, ‘Aisa nirya ara pia na like,’ tenelamuk.
Ura, winibikura, Raja Abia ap, el yin talin nang arye, Raja Yerobeam el yin talin nang ati dobolbiyik. Dobolbanmeka ani, amutuku noutam ulamik weik asik ap, anyasik dam mitik asik ap, amutuku noutam uamuk wa tuku ap, binuka alubuka doprobuk. Abinuka doprobik mutuku si ara, ani. Ara, Betel mutuku ap, Yesana mutuku ap, Efron mutuku ap, binuka alubuka doprobuk.
El yin talin nang nirya ara, ‘Yu nang arye olyasicak tenen, Yehuda tam noutam, ton weik asik cang keil arye antanabuka domika poka dam kintinip deibukura, binuka kaliklamik. Tonda, Yehuda tam bukni, yuk yin talin nang yupa ton, yuk-yuk dobuka poka balye tam kaliknamak tenen dopdeibuk. Tonda, el li koproba Raja Asa birye malye kibukce, dalubuka dopromuk mutuku, Efraim yala nang ulamik mutuku noutam babye, yin talin nang yupa ton dopdeibukba, sikce anyasik dobuka ulamik noutam binuka kaliklamik.
Tonda, sik imam-imam nang, sik weik deiyoknye, el si Amarya ara, anggun deice tam deiyoknye unamsile. Yata winin ning do nirya, Allah Yahweh el dam yupu lipsisikuka bokolinalamlum ning nirya ara, anye birye melinamsile. Aning atouk, amutuku taleamuk deiyoknye, Raja biti aning nirya ara, Yehuda yala nang, sik deiyoknye Zebaja, elce anggun deiyoknye uplirye, melinamsile. Zebaja el li bira, Ismael ulamuk. Tonda, sik Lewi yala nang arye, sik deice tam kina ati, sik deiyok nang atonun unamsiyake. Sikce talipsikcak arye, ‘Aning ara winipnulume nyan yupu ara nyanamsiake. Ati ara, narye sik yupu bokolina deiyok nang wibuka deipmasin nang nirya ara, Ilil una kumce, anggunce kanye talima eren deice, mikip weik arye apil talebuka unamlume. Teleb kibuka umunyeura, aning winibikce nang ati, Allah Yahweh ara, anggun ap neika unamlume. Elce anggun kanye talima noutam arye melinamsile.” Yosafat birye, sik Yudea tam yupu lipsisikuka bokolina deiyok nang ati nyabuk.
Yehuda tam taleamuk ninye deiyoknye Yosafat bira, el ulamuk mutuku ara, weik asik Yerusalem mutuku noutam ulamuk. Winibuka, elce taleamuk mutuku noutam nirya ara, pia dabu tam noutam, arah utam uamuk mutuku, Bersyeba mutuku arye dipdongobuka bilamuka ani, iknapnye tam, arah selatan tam uamuk, Efraim tam noutam bilamukce pil dolamuk. Winilamuka deiyok ara, ‘Na mutuku nang arye, sik malye un ning batakicak arye, nun apu yapu ati, kalekuka melilamuk Allah, Allah Yahweh el uk tamubuka talipnamap tenen, dipra bilamukce, yupu nyalamukba, anang kekelamikce, Allah el tam tamubuka balamik.
Apil nirya akunum winibikopura, sik Lewi yala nang ap, imam-imam nang ap arye, Raja Hizkia dam nyalbiyik. “Na nio, ance, ‘Allah Yahweh el si eren aik, pia teleb kilina ati, pil doplulume,’ nyapdeiamsulum ning ara, akunum dopmapce, sirya dakmabe. Ara, ‘Allah arye nun malye winin ning lyepnamsilʼ tenen, kam ning obuka, uku dongonyab ak mesba ap, apil don ning nirya ap, Allah el arena ati, teleb roti dabuka delin meja deice ap, tonda Allah el aik noutam pil don ning, yuk ning nirya ap ara, nunce akunum mengne kibuka, pia teleb kipdeipmabe.
Ura, atalak-atalak noutam nirya ara, ninye deiyoknye Raja Salomo birye,kambing ato ning obuka, Allah Yahweh el si eren ap, el si kina ap ati, keil pala deice arye yangabuka deiamuk ning, el si mesba deice arye, uku dongolamukba, uku arye aning nirya dilamuk. Amesba ara, Allah Yahweh el si eren aik damuk bukni, urasin tam domikak, adeice arye uku sekalamikak, kam ning obuka yanarye, aning deice dongolamuk.
Tonda, malye weik unyak ning ton ani. Sik Israel ninye ara, lukunyan talak ara ninye wein keil deiya dam ap, ninye wein dam ap, duknubuka banyaka deice arye, diamice nang dib kanye ati, ‘Sikce ton nunti bisik nuksululume,’ nyabukka moronyake. Tonda na Allah arye sikti, ‘Israel ninye anggunda basam kum dinamlulume. Tonda, ayala ning ani, aning babye anggun kum dinamlum ning ani,’ nyalamsise bukni, anyalamse yupu yanibuka lukunyan ara duknubuka dinyake. Narye, ‘Aning ara dina meme,’ nyamse buk, sik makau pum bisik yupmaca ani oplyopura, dinyake. Aning atonun, narye sikti, ‘Aning dina meme,’ nyalamse yala weik bukni, sikce yupmace mek babye dinyake.”
Sik malye wininyak ning nirya ara, yu weik unulula ati, narye tamubuka, anggun amutuku nang ati, like bitinye deice arye wenepnirye, kwang daknamne. Deiyok ara ani. Ara, sikce talye isa ati, “Nun ni koproba,” nyabuka, si erenyak deice arye, na mutuku koproba nirya, akunum malye kipdeipnika ati, amutuku noutam ara, na dam yakirye, na si kum erepnitinge. Sikce, ‘Nun ni,’ nyabuka, isa si erenyak ning ara, talye ning, kam ton kum ulul ning ati, si erenyake. Narye, ‘Amutuku ara, pia talipnamne,’ tenyamse mutuku, na mutuku koproba noutam ara, sik isa si eren ning, weik tonun akunum delilamika deice arye, amutuku akunum malye kipdeibike. Sikce amalye wininyak ning ap, aisa mer nirya si erena ati, patung ning delilamik ning ara, ‘Na pia like, tenenune. Allah arye na Yeremia biti, nyapnuk.
Nyapnukba, narye abisik bublan binuka, weksirye eipse. Asukum ara, tonok aik pum tam ara, anyaik abilinga piamik ning nirya ara, ninye arye gambar puturubuka sekamik ning weik eipse. Eipse ning ara, Allah arye, ‘Akam ning yala-yala nirya ara, pia na like,’ akunum nyapdeiamnuk bukni, ninye arye, aning urasin atonun akunum memebuka deiamik. Ara, yata ning do nirya, sik mun ap, yan ap deice arye, tuku butbuta noutamak balamle kam ning urasin atonun sekdeibik ning ara, bal ap, tonda Allah arye, ‘Akam ning ara, na lik ati, anggunce aning ara, dina pia meme,’ nyapdeipsuk ning, abapye eipse. Tonda, sik Israel nang arye, ‘Nun ni koproba ara aniʼ tenen, talye isa mer si eren ati, aning urasin atonun puturubuka, abilinga deice sekuka deiamik ning ton eipse.
Ati ara, nara Allah Yahweh arye nyapsine. Narye anggunti, “Aning ara, wininamlume. Aning ara, mem ning ati, aning pia kum wininamlume,” nyapdeipsise yupu moubuka talipmunce, telebuk wininamlume. Israel nang, Kanaan mutuku noutam, min kum yanamlum talak ara, Kanaan mutuku ulamik nang, amem ning weik winilamik ning ton, anggun pia kum wininamlume. Awinilamik mem ning, anggun ton winipmunya deice arye, anggun babye, malye kipdeipdanalume. Nara, anggun ni koproba, Allah Yahweh arye nyapsine.
Bukni, bisik tuba mapnin balamubu talak ara, yuk nang arye nyabikura, kekebikce nun diba tenyamubu touk, Roma mutuku Yesus ati diba tenyamik nang ara, eiabce mutuku si Porum Apius dilyanamsik. Tonda, tonok mutuku ton dekna aik winilye uamuka ati, Tiga Taberne nyalamik mutuku dilyanamsik. Dilyanamsikura, Paulus arye anang akunum eibukopura, Allah ati, “Telebe,” nyabukura, el talima kwa deibukura, el kanye deibuk.
Ati ara, sik Lewi yala nang arye, nyanamak ning ara, ani. “Allah el si Yahweh arye, talye ning si erena ara, pia malye weik ati, aning ara, na like. ‘Aning ara, pia malye,’ tenenun ning ati tenebuka, memebuka delina ati, keil ap, yo ap, tonda logam deice arye memebuka deibikirye, dungnubuka, si erenyak nang ara, Allah Yahweh arye anang ati, kanye imun weik ning, sik nong deice deipnamle. Ati, anggun Lewi yala nang arye, malye winin ninguk yasilyeba dolonamlume. Allah nyasilya deice arye, ikin ning anggun dam pia aunamsile,” nyabuka, yupu deice arye sunamsiake. Ayupu Israel nang nirya kekebikirye, diba tenebikirye, sikce tamubuka, “Yo, dipkoprob nyapmasuluma ati, akunuma nyababe,” nyabuka, nyanamake.
“Anggun babye, wininamlulume,” nyapmasina ara, talya urdem ati kum nyapne. Anggun kele, sik diba kum tenenyak ninye arye, malye-malye wininyak ning ara, minop talak weika arye akunum ulalum bukni, wini talak ara, aning nirya ara, akunum batakmalume. Aning ati ara, amalye un ning tonap, pia kum wininamlulume. Sik diba tenena kum ninye arye, malye-malye wininyak ning ara ani. Sikda, kil talye yona ap, ubula dona ap, malye un ning patana ap, kanye wangalamak mek weik arye dina ap, weik kwalina kwalibikirye malye-malye ubuka kouldana ap unyake. Tonda, sik puturubuka memenyak ning do, isa mer do, talye ning si erenyak ara, Allah arye, ‘Aning na like,’ tenelule.
Ati ara, Israel nang sikce talye aisa mer, sik urasin atouk ubuka puturubuka deiamikce, si erelamik ning nirya ara, ulubuka batikik. Batakikce, Israel nang ara, Allah el siuk erebik. Winibikopura, Israel nang ikin ning delilamikba, kanye imun kanye bobuka ulamik ning ara, Allah arye aning eibuka kel bikukce, ‘Se, sik tuba ikin kanye bobuka unyaka ara, kum bataktinye, melipnamne,’ tenebukce, kanye deibuk.
ကြော်ငြာတွေ