Aminyan talak ara, Allah arye, Abram wimabukba, lengdar deice arye, ayupu nyabukba kekebuk. Allah el si Yahweh arye nyapdeibukba, Abram kekebuk yupu ara, ani. “Abramo, an ilil una pia meme. Nara anti, weik deiyoknye ununa anya arye, pia kalikuka dinamkine. An bona pia weik talinanye ulalam ning ara, bona kume, ara natia. An menenga atonun dopropnalam ning ara, na uka.” Allah arye, Abram biti nyabuk.
2 Tawarikh 15:7 - Eipomek7 Sik minop talak ulamik nang ara, winibuka ulamik bukni, anggunda wini talak unmalum nang arye anang winilamik touk kum wininamlume. Anggun wini talak ulalum Israel nang ara, anggun ilil pia una kumce, namin arye, kanye darapdongobuka unamlume. Tonda anggun teleb pil donamluma ara, batakna kumce, pi dobuka pil donamlume. Anggun pil pia dobuka teleb pil donamlum ning ara, nong kipnamle. Tonda, Allah arye anggunti dekna ning arenamsilarya, nyapsine. Nabi Asarya birye, Raja Asa ap, sik Israel nang ap ati nyabuk. အခန်းကိုကြည့်ပါ။ |
2 Tawarikh 15:7
35 ပူးပေါင်းရင်းမြစ်များ
Ura, Raja Daud birye el mi Salomo biti ayupu ton nyabuk. “An talima noutam arye tenepmince, mikip kipnulyame. Tonda, ilil tenena kumce, aning ara pil dona ap, una ap uk unamlame. Ati ara, an ilil una ap, ilil arye, ‘Se,’ tenena ap, pia kum unamkile. Deiyok ara, na ani birye, el si eremnun Allah, Yahweh, elce an ap pil melibuka dopnamkile. Ati, an ni koproba Allah Yahweh arye pia kum bataknamkile, melinamkile. Atonun, ance Allah el si eren aik ap, anyaik pil donamak ning ap, anyaik dongopnamak ning ap nirya ara, tuba kintinibuka deilinamlam talak nirya ara, Allah elcuk, melinamkile. Winipnamkila deice arye, anyaik dona ati, pil donmaminya ani, aning nirya ara, sirya daknamlyame.
Tonda, sik imam-imam nang, sik weik deiyoknye, el si Amarya ara, anggun deice tam deiyoknye unamsile. Yata winin ning do nirya, Allah Yahweh el dam yupu lipsisikuka bokolinalamlum ning nirya ara, anye birye melinamsile. Aning atouk, amutuku taleamuk deiyoknye, Raja biti aning nirya ara, Yehuda yala nang, sik deiyoknye Zebaja, elce anggun deiyoknye uplirye, melinamsile. Zebaja el li bira, Ismael ulamuk. Tonda, sik Lewi yala nang arye, sik deice tam kina ati, sik deiyok nang atonun unamsiyake. Sikce talipsikcak arye, ‘Aning ara winipnulume nyan yupu ara nyanamsiake. Ati ara, narye sik yupu bokolina deiyok nang wibuka deipmasin nang nirya ara, Ilil una kumce, anggunce kanye talima eren deice, mikip weik arye apil talebuka unamlume. Teleb kibuka umunyeura, aning winibikce nang ati, Allah Yahweh ara, anggun ap neika unamlume. Elce anggun kanye talima noutam arye melinamsile.” Yosafat birye, sik Yudea tam yupu lipsisikuka bokolina deiyok nang ati nyabuk.
“Anggunda tunim abuka umunce, mikip kipdanamlume. ‘Seʼ tenen, ilil una pia kum aryuk, mikip asa umunce, kalikinamlume. Diba, Asyur mutuku talibuknye Raja ap, el yin talin nang ap, amutuku dam yanganamaka ara, yupa pia weike. Bukni, anang nirya ati ara, ilil una kume. Nun melisululnye el mikip ara, mikip weik ulul bukni, elti, melilul mikip ara, mitik mikip uk ulula anya arye, sikti, ilil una kume,” nyabuk.
‘Mangkau arye malye winibibyak’ tenen, Allah yupu moubuka kekebibirye, ‘Malye ning ani, teleb ning ani’ tenen, moubuka kel kibibirye, malye winin ning batakibirye, diksukum un ninguk, talibuka unamabe. Ara, Allah arye nyasilye yupu nirya, kekebuka pia talilamlenye bira, Allah arye anye biti, weik dekna ning arepliba, dopropnamle. Tonda, Allah el yupu uk moubuka talilirye, diksukumuk ululnye bira, el winin ning nirya ara, telebuk upra banamle.
An Allah arye, malye wininyak nang wenepmince, kum kipdeipminyopura, dipkoprob ninguk, wininyak nang arye aning ebicopura, pia kanye deibuka unamake. Ara, anda Allah arye, ‘Aning wininamlume, aning ara, pia kum wininamlume,’ nyapdeipsulum yupu ara, aninguk talibuka, wininyak nang ati nyapne. Winipmanto ara, an Allah arye, sik malye wininyak nang ati, yupa pia weik tonun opminba, sik ining weik tonun, tuku deice sakturye, weik tonun uptopura, an yupu talibuka diksukumuk wininyak nang arye, aning yaniptingba, sik yan nirya ara, ining diamuk uptue.
Na Allah Yahweh arye, nyapkine. “An engenmalam ning ara, asing maka kilipminba, cepropnamkile. An ikin kanye bopmalam ning ara, bataknulame. An mapu ara, anggun mal olan nang arye tomobuka, wenen aik deibik ning ara, batakdongobikiba, amutuku tamubuka yanganamakca, nyapkine. Na Allah Yahweh arye nyapkine anya arye, dipkoprob nong upnamlarya.
Elce nyapnuk, “Allah arye anti, weik tonun bico tenekilirye, ‘Anye bira, mambul weiknye ulule,’ tenekulule. Ati Daniel, an ilil una meme. Ilil upmakilce, mitang upmakil ning ara, bataknulyame. An adiparyuk mikip kipnulyame. Tonda, ‘Allah arye dipkoprob kalikuka melipnamkilʼ tenen, ilil una kum bukni, malye kibuka, telebuk unamlame,” nyapnuke. Elce ayupu nyapnuk talak ara, na mikip tamubuka yanuke. Yanukba, narye elti, nyapse, “Na nio, winira ance mikip kipdeipmanilama ati, yupu nyapdeipnilyame,” nyapse.
Na Allah Yahweh, im deice yin talen malaikat nirya ara, sik weik deiyoknye unune. Narye nyapsine. Ara, anggun kanye talima noutam nirya ara, mikip kipropnamlume! Wini talak ara, anggun nabi-nabi nang arye, anyapdeipmasin yupu kekebika ati, sikce ayupu laka nyapmasiceura, anggun wini talak unmalum nang arye kekenmalume. Ati, anggun taruk ap, nong ap ara, mikip kipropnamlume! nabi-nabi nang ara, na si eren aik, minop talak ulubuka, atu buklobik ning ara, amutuku nang arye, ‘Lipsisikuka dopnuyabeʼ tenen, pil deiyok kibik talak ara, anyaik ayukumna yo deibik talak arye, anabi nang ton eipmekce, ayupu nyabik. Anyabik touk, wini talak babye, ayupu uk nyapmasinba, anggunce kekepmalume. Ara, na Allah arye anggunti, tuba teleb kipdeipsiniba, amutuku nang arye, na si eren aik tamubuka, lipsisikuka dopnamaka ati, nyapmasine.
Ara, Allah arye anggunti, kanye deipsuka anya arye, urdemuk arepnamsil ning, weik arye im deice kintinibuka akunum deipsuke. Aning ati ara, amalye winin ning nirya winipsicopura, anggunda kanye pia deibuka unamlulume. Amalye winin nang, anggun apu yapu arye, na yupu laka nyalamik nang, sik nabi nang ati, atouk ikin ning sik nong deice delilamika anya arye, wini talak unyak nang babye, anggunda na yupu kekelulum ninye ati, atouk malye winin ning winilinamsiake. Winipnamsiyak bukni, im deice binamlum talak ara, Allah arye menenga ning weik arye arenamsile. Aning ati ara, “Anggun kanye pia deibuka unamlulume,” nyapsine.
Yuk nang arye anggunti, bico tenebuka kanye talima melisinyak nanguk, bico tenepmunyopura, adeice arye Allah elce anggun teleb una ati, ‘Talya arepnamne,’ tenepsuk ning arepnamsil do? Kume. Sik pia malye nang, ‘Ninye deiyok nang dopropnamak’ tenen, pajak yo bok bulubuka delilamak nang, anggun malye nang ababye, sik babye, atonun nang ati, bico tenebuka melildanyake. Aning ara, ninye nirya, sik babye, atonun nang ati, melildanyake.
Yesus arye ayupu nyabuk. “Anggun kanye moubuka una ati, ayupu nyapnusine. Anggunda, ‘Allah el si erebuka, el pil donamape,’ tenemunye talak nirya ara, yuk nang eipsikirye, ‘Sikda teleb nang, tenenamsiyak’ tenen, ninye si seknak lakak anyuk kum pil donamlulume. Ninye si seknakuk, laka pil domunyopura, anggun ni Allah im deice ululnye birye, ‘Dekne ning arenamne’ tenepsuk ning kum arenamsile.”
Awinamluma nirya ara, yuk nang eipsikirye, ‘Allah ati din dina kumce, si tebuka unmake, kum tenepnamsiyak’ tenen, nyapsine. Anggun ni Allah ninye asing arye kum elinyaknye, elcuk anggun duknubuka winimunye ning nirya, eibuka kel kilulnye anya arye, el si erena ati, din dina kumce, si tebuka umunyopura, kel biksilirye, el tenesilya ning arenamsile. Yesus arye nyabuk.
Anggunda, anggun aik kopropa wekmunce, buplan tirikdongopmunyopura, Allah moronamlulume. Winimunye talak ara, ninye asing arye kum elinyaknye, anggun ni Allah ati moropmunyeba, elcuk dinamsile. Winipmunyopura, anggun ni Allah, ninye duknubuka ulamak ning nirya elilunye anya arye, kel biksilirye, el tenepsuk ning, menenga ning aminyan talak arenamsile.
Wininyak bukni, narye nyapsin yupu ara, yuke. Sikce, ‘Anang optibye,’ tenelamsikce nang ati, bico tenebuka, teleb updeipmunce, ‘Aning tamubuka arenamsiake,’ tenena kum aryuk, talye urdemuk arenamlulume. Aning ati ara, anggun ni Allah im deice ululnye birye, pia malye ninye ap, teleb ubuka melilule, sikce tamubuka, ‘Naio telebe,’ pia kum nyanyak ninye ap nirya ati, bico tenebuka kanye arelul touk, anggun babye, yuk ninye nirya ati, bico tenebuka kanye delinamlulume. Anggunce winipmunyopura, Allah el mapu koprop kipdeipnamsile. Tonda aminyan ara, Allah arye im deice teleb ning weika arye arenamsile.
Aning ati ara, na bico tenepsinirye, Yesus dib teneluluma ati, nun du weit atonun ululum ninyeo, anggun sal babye, kilapu babye kekepnululume. Anggun Korintus mutuku ninye, kanye bokoltona pia kum aniryuk, tonok kanye bobuka unamlume. Yata ning do nirya, ikin usilya deice arye, ‘Allah el yupu batakibiba, malye ning arye, yuk bisik bobisilyak’ tenen, teniltona kum, pia kalikdanuka unamlume. Allah eluk moubuka talipmunce, unamlume. Anggun kele, nun Deiyoknye Yesus ap, talima dukdongobuka ubirye, elti, ikin pil donyapa nirya ara, dipkoprop nong upnamle. Tilila pil kum donyabe. Aning ara, akunum kel kipluma anya arye, ‘Na nong ap, kanye talima tenen ning ap nirya, Yesus deiceuk deipnirye, Yesus el piluk donamne’ tenen, kanye bokoltona kum aniryuk, pia pi dobuka unamlume. Na Paulus arye, nyapmasine.
Pil teleb ubuka donamluma ara, talye ati kume. Ara, anggun akunum kele, Allah arye, “Na mapu ati, aning arenamsine,” nyabuka akunum nyalilamsuk touk, pil teleb ubuka dolamunyopura, aminyan ara, dekna ning dipkoprop im deice aryuk arenamsile. Aning ara, akunum bikiluluma anya arye, pia pi dobuka pil donamlulume. Anggun Weik Deiyoknye Yesus Kristus el pil doluluma ati nyapsine.
Allah arye, nun teleb asa wininyap ning ati, tuba tenesilirye, nun wininyaba atonun, yupu lepsisikuka bogolisulule. Deiyok kum upmalibuk, talye ati, kum wenesulule. Ura, anggunce teleb pil dolulum ning nirya ara, kum luba kipnamsile. Sikce elti, diba tenyamik ninye, el mapu ati, bico tenebuka melilamlum ning ap, tuba melilulum ning ap, adeice arye el Allah ati, talima arilulum ning ara, tuba tenesulule.
Nyabukce, ayupu ton dukdongobuka nyabuk. Ati ara, an adiparyuk dib tenebuka, ilil pia kum aniryuk, mikip arye Israel ninye, sik deiyoknye kipminyeba, anang bobuka, na arepnamsin mutuku bobiminba, dopdopnamake. Narye anggun apu yapu nang ati, ‘Amutuku arepnamsine,’ nyapdeiamse mutuku binamluma ati, nyapkine.
Ati ara, an adiparyuk dib tenebuka, ilil una pia kum diparyuk, mikip arye unamlyame. An adiparyuk, dib tenebuka kalikdaminye deice arye, na yupu moubuka talinamlyame. Ara, na pil donanye, Musa birye arepkuk yupu, narye, ‘Wininamlume, aning ara, kum wininamlume,’ nyapdeipse yupu, moubuka dobolbanamlulume. ‘Yuk bisik binuyap’ tenen, ayupu batakuka, kwanim tam bisik babye, diksukum bisik babye, kum binamlulume. Tonok babye, ton kum batakminyopura, an ap, sik Israel ninye ap, banamlumak nirya ara, telebuk unamlume. Na yupu batakmunyopura, kume, pia ikinuk unamlume.
Narye akunum nyapkise touk, pia teninamlyame. Ara, an adiparyuk, dib tenebuka, ilil pia kum aryuk, mikip arye unamlyame. Ilil una meme. Pia kanye lamapdongobuka unamlyame. Tonda, ikin upkiliba, ‘Se, na tuba kum winiptinye’ tenen, kanye mitang upkiliba, kanye talima lik una kume. Anggun binamlum mutuku nirya ara, nara Yahweh, anggun ni Allah, na si Yahweh arye melipsinirye, pia kalikinamsina ati, anggun ilil una ap, lik tenena ap, meme. Allah arye, Yosua biti nyabuk.
Amutuku noutam nirya ara, wini talak Kenas mutukunye, el si Yefune, elce deiamuk mi Kalep, elce deibukba, dadeipdanin balamik nang nirya, doprobikce, sik mutuku koproba kipdobik. Yosua birye, Kalep biti amutuku nirya, arebuka deiyok ara, Kalep elda diksukum ulamuk ati, arebuk. Tonda, Israel nang ati, pia kalikuka melilamuk Allah Yahweh arye, ‘Winipnamlyame,’ nyapdeibuk yupu, Kalep kekebukce, aninguk talibuka ulamuka ati, Yosua birye, Hebron mutuku bokuka, Kalep ap, el mapu silip ap ati, arebukba, sikce amutuku doprobik.
Ati anggun nirya kanye moupnamlulume. Anggunce teleb pil dadolamunyeura, Allah arye, ‘Menenga ning arepnamsile,’ tenebuk ning ap, kanye deibuka erepdeipsilirye, im deice teleb ning arepnamsil ning ap ara, ‘Kum dasilyak’ tenen, anggun nirya moupnamlulume. Ara, ‘Allah arye, tenyamuk ning nirya arepnamsil’ tenen, pia mouplulume, nyapsine.
Ati ara, an kanye lon pil dopnin yangalyam ning nirya ati ara, Allah el si Yahweh aryuk dekna weik ning arepnamkile. Ayam mapu ara ilil upliba, ‘Nun nin irinamsil’ tenen, el dam yakiba, kil ayam arye el mapu el pol amu tam irilamle touk, anda, ‘Allah arye kalikuka melinamnil’ tenen, amutuku yanmalame. Ara, ‘Israel ninye sik ni koprop Allah, el si Yahweh arye, melibuka kalikinamnile’ tenen, amutuku yanmalama anya arye, ‘Allah arye, dekna weik arye arenamkil’ tenen, nyapkine,” Boas birye nyabuk.
ကြော်ငြာတွေ