Morobukce ayupu ton dukdongobuka morobuk. “Tonda winipmanto, an mapu Israel nang ati dan mutuku do nirya, anang dopdeipnamlamak nirya, anang arye sik oldan nang dam binukce talak ara, anti moronamkiake. Ara, anda Allah an si Yahweh ati si erebikirye moronamkiake. Tonda, ance wiamlum asik Yerusalem si ton teninamake. Tonda, an si eren aik dopse ning ara, aning ton tenebikirye, anti moronamkiake. Winibikcopura, ‘Ance kekenamsilyam’ tenen, moropkine.
2 Tawarikh 14:11 - Eipomek11 Wininmarik talak ara, Yudea mutuku ninye deiyoknye Asa birye,el si erelamuk Allah, Yahweh ati morobukce nyabuk. “Se, na ni koproba Allah Yahweh, ancuk ninye mikip kum nang ati melisilyame. Nun babye, mikip kum nang unyap bukni, otam mikip weik nang dam binuka opdanuyap ati, ancuk nunti Melipsimince, mikip arepnusilam tenen, moropkine. Ati wini talak ara, nun melipsilyame. Ara talye ati kum nyapne. Nunce an tonok, ‘Allah Yahweh aryuk melipsutueʼ tenen, unyaba ati moropkine. Tonda, nun ni koproba Allah Yahweh, wini talak ara, nunce ‘Ancuk melipsutumʼ tenen, dinauk ukinyaba ati, nun ni koproba, an si deice arye yanuka, otam yin talen nang, mikip weik nang, sik yupa nukmanto kum arye kintinibuka, otikmakce, kama ap, yuk ninye olan ning nirya ap bobuka tikmake. Ati, Allah Yahweh, anda nun ni koproba ulyama ati, ‘Naio, otikmak nang arye, obuka malye kipsicakʼ tenen, tonda an tenen nang ap, an ap ati, ‘Malye kipsitingce, obuka sirya kum daksitingʼ tenen ati, moropkine. Tonda, ‘Ance mikip arepsiminyeba, nunce anang obuka sirya daktibyeʼ tenen, moropkine na nie.” Raja Asa birye nyabuka morobuk. အခန်းကိုကြည့်ပါ။ |
2 Tawarikh 14:11
59 ပူးပေါင်းရင်းမြစ်များ
Sik ayin talin nang nirya ara, Allah ati, dip tenelamik nang ulamika ati, sikce, ‘Allah ati morobiba, dipkoprob Allah arye melipnamsilʼ tenen, morobikura, Allah arye, sik anang morolamik ning ara, kekebukce sik tenebuka, morolamik touk kibuka melibuk. Winibuk deice arye, sik awinilye yala nang arye, Hagri yala nang ap, sik tam kiamik yala nang ap, sik nirya ara, obuka sirya dakik.
Ati ara, nun kele. Nun ninye deiyoknye bira, el Allah uka. Tonda, sik imam nang babye, asukumuk unyak ati, sik anang arye, lelim len ning, el si terompet, ‘Lelim nyapnamapʼ tenen, akunum kintinibuka deibik. Ara, nunce sik olyangan talak ati, lelim nyan ning akunum kintinibuk ninge. Aning ati ara, anggun Israel tam ululum nang nirya ati ara, nyapsine. Anggun ni koproba Allah, el si Yahweh ati, ‘Batakuka, bisipnuyapeʼ tenena pia kume. Anggun ni Allah ati, kum bisinamlume. Anggun kele, aning ara, kum winipmanto. Ayupu nirya ara, Raja Abia birye, sik Israel tam nang ap, Raja Yerobeam ap ati, nyabuk.
Atalak aryuk, Yehuda tam yin talin nang arye dinmekce, sik Yerobeam tam nang arye, sik Yehuda urasin tam babye, donga tam babye, warekuka antapdongopmikak eibik. Winipmekba eibikura, lukdayikce, Allah Yahweh ati, “Se, nun ni melipsilyame,” nyabuka, weik yupu ngalukna deice arye nyabik. Nyabuka, sik imam nang ara, lelim nyan ning terompet pong-ponganmek.
Terompet lelim nyan ning, pong-ponganmek talak aryuk, Yehuda yin talin nang nirya arye, ninye olbana ati, lak kilina ati, weik yupu deice arye, ngaluka nyanmek. Weik lelim nyanmekura, sik dana-dana tam yin talin nang arye yayikura, olanmek. Bukni, sik Yehuda nang nirya arye, ‘Allah melipsilyame,’ nyanmek ning kekebukura, Allah arye, adiparyuk mikip arebuk deice arye, sik Yehuda tam nang arye, Israel tam ulamik nang ati, obuka sirya dakik.
Aning ati ara, sik Yehuda tam yin talin nang arye obik. Sik Israel tam ulamik nang ara, sik amu tam kibik. Yehuda tam nang arye, Israel tam nang ati obika deiyok ara, sik Yehuda tam nang arye, sik ni koproba Allah Yahweh ap, neika dukdongobuka ulamik ati, sikce, ‘Kume, Allah Yahweh arye melipsutua deice aryuk, mikip kiptibyeʼ tenen, diba tenenmeka deice arye, Israel nang obuka sirya dakik. Ara, sik apu yapu arye, si erelamik Allah, sik deiyoknye Allah Yahweh arye, sik Yehuda tam nang meliamuka deice arye winibik.
Anoutam ara, aminyan talak winipnamuk ning bikilamuknye, nabi Hanani birye, ninye deiyoknye Raja Asa, el dam yayukce nyabuk. “Anda an ni koproba Allah Yahweh, elti, kanye deibuka kum ulyame. Elcuk lyepnutue,’ kum tenelyame. Bukni, ninye deiyoknye Raja Siria mutuku talebuka ululnye tonok, Elcuk lyepnutueʼ tenen, kanye deibuka ulyame. Ati ara, ance sik Israel tam unyak nang, sik ona ati lo ara, akunum wangaplume. Ati, Siriya mutuku ninye deiyoknye bira, akunum bindobuka ati, elti, tomobuka kum tapu kouptume.
Ayupu akunum nyapdeibuk ati, el tam yin deiyok nang ap, sik mapu yin talin nang ap, sik neika minopce pola biyik. Ninye mal olbana ati biyikura, adiparyuk Yosafat ara ninye deiyoknye Raja nang kiniklamik baju pia teleb baju kinikukak eibik. Eibikce, ‘E, ara weik nang kiniklamak baju pia teleb kipmalnye bira, elda dipkoprob Israel nang sik deiyoknye Raja Ahab ara akunum tenen, dobolbiyik. Dobolbinuka warikik. Warikikbuk Yosafat birye, “Se, nara Israel nang sik ninye deiyoknye Raja kume. Nara Raja Ahab kum unune,” nyabuka ngalukukce, Allah ati morobuk. Ngalukuka morobukura, Allah Yahweh kekebukce melibuk. Melibuk deice arye, Siriya mutuku yin talin nang, aopdanmik nang dobuka, yuk tam yakukba, anang arye Yosafat biti, tuba dobolbana kumce batakik.
Se, nun ni koproba Allah, an siuk erekinyabe. Ati, anda nun ni koproba Allah, nun mikip mitang nang unyaba ati, sikda yin nang yupa weik yanganmakce, ‘Israel nang obuka kum daneipnamab tenen, yanganamaka adano. Ati, ance wenebuka, ikin ning sik nong deice deipnalame. Nunda, nun mikip deice arye yata winiptibye do? Aning ara, nun walwal upsile. Bukni, ‘Allah arye yata wiripsilya deice arye lyepnusil do?’ tenen, antibuk dinmabe. Nun melina ati, yanuka moropkiyabe. Raja Yosafat birye, sik Israel yala nang bulubuka tikmekak arye tikukce, Allah ati yanuka morobuk.
“Ati ara, na deiyoknye, ance sik Efraim yala nang dopropminye ura, an tam yin nang ap, sik ap, ansinibuka mikip deice arye, ilil una kumce, pin-pin deibuka, ‘Yuk mutuku nang olbinuyap,’ tenemince, ninye opmanto nang weik aunmace babye, Allah arye melipsilya deice arye, sik yuk mutuku nang ati, obuka sirya dakanamlume. Bukni, ance, ‘Se, anang nirya obuka sirya kum daktibye,’ tenepmince, ilil upkilyeura, Allah arye melina kumce, bataksilye ati, an mal olan nang, sik yuk mutuku nang arye, obuka sirya daknamsiake. Ara, talye ati kum nyapkine. Deiyok ara, Allah el mikip weik aryuk melipsiliba, nun mal olan nang ati, obuka sirya daktibye. Allah el mikip weik ulula deice arye, ‘Amutuku nang arye, yuk mutuku nang ati, obuka sirya daknamake,’ teneplyopura, aninguk wininamake. Aning kum opura, Allah arye, ‘Atam nang arye, sik ortam nang ati, obuka sirya daknamake,’ teneplyopura, aninguk wininamake. Aning nirya ara, Allah arye tenelye touk winilule,” Allah el yupu lak nyananye birye nyabuk.
Nyabukopura, ayupu ton nyabuk. “Aning ara, talye ati kum nyapsine. Raja Sanherib elda ninye mikip deice aryuk, yanganmal bukni, nunda nun ni Allah Yahweh, el mikip weik deice unamabe. Aning ati ara, Allah Yahweh arye nunti, kalekuka melipsilirye, el mikip deice aryuk melibuka, sik Asyur mutuku yin nang nirya, obuka sirya daknamale,” nyabuk. Yehuda tam mutuku nirya taleamuknye Raja Hizkia birye, ayupu nyabukba, el taleamuk nang nirya kekebikce, sik nirya ara, ‘E, dip nyapmasileʼ tenebikce, ilil una kumce, malye tenebik.
Atalak ara, dipkoprob dipmanto wamse. Winipmanto ara, akunum diamik nang banyak mutuku, el si Sheol mutuku arye, mikip weik tapu arye, yanuka koulongolamak touk upnukba, dipmanto wamse. Atalak ara, nara dipkoprob akunum dipmanto wamsa ati, lyepdanmanto kum wamse. Winipmanto ara, talye bai tam kam ulamle ning, mangkau kanye bobuka, bisik balamakak, ninye arye wena wepmakirye, akunum kintinibuka wepmakcak bakiba, abai kam ning youlamle touk, na babye winipnikba, dipmanto wamse.
Winida na akunum kel bikse. Allah arye, ‘Anye bira, ninye deiyok kiplirye, na mapu koproba, Israel yala nang nirya ara, taliplirye, sik rajanye unamle’ tenen, wipdeiamnuka ati, dipkoprob melipnilirye, pia lyelonamnile. Allah ara, im deice arye, Pia Teleb Lekak arye, na moronun ning kekepnilirye, melinamnile. Allah, el mikip weik, sirik taruk deice melinamnila deice arye, na mal olana ati, yu nang nirya obuka, sirya daknamnarya!
Ton talye nang ara, sik ninye mal olana ati, tuku deice balamle ning, el si kereta perang ati, weik tonun kanye delinyake. Ton nang ara, sik kuda basam ati, weik tonun kanye delinyake. Sik ato nang ara, ‘Aning arye, nunce yuk nang nirya ati, optibirye, sirya daktibye,’ tenenyake. Bukni, nun Israel yala nang arye, aning atonun kum teninyabe. Nunda, nun ni koproba Allah Yahweh ap, el si ati, weik tonun kanye delinyabe. Elce melisilya deice aryuk, nun mal olan nang obuka, sirya dakanamabe!
Tonda, kanye imun deice daunyak ninye nirya ara, ‘Allah arye melipnamsilarya’ tenen, sik kanye nirya, el deiceuk deibikirye, elti, diba tenenyak ninye ara, pin-pin asa arye, kanye deibuka unamake ati ara, sik urasin ara, telebuk unamle. Tonda, sik aninye nirya arye, aminyan talak ilil upliba, alye pia kum dakaldanamake.
Tonda, na Allah arye nyapsine. “Ikin weik upsilye talak ara, anggunce nati, ‘Naio melibuka lyepropsilyame!’ nyabuka, moropnumunyeura, dipkoprob narye yanuka, lyepropnamsine. Akunum lyepsiminyeura, anggunce na si erebuka kina ati, “Nun ni Allah, pia teleb ulule,” nyabuka, yuk nang kekenak, lakak arye nyanamlume.
Aning-aning nirya kum talibikirye, talye bona uto-toa talina kum unyak nang ara, Allah arye, pia luba kum kinamle. Aminyan talak ara, sik pia ikin kanye bobuka, unyak nang ton lyepnamle. Atonun, sik pia bona uto-toa talina kum nang arye, ‘Se, nun babye teleb uptibye’ tenen, pia patanauk ulul nang ara, pia min kum, kum danamle. Kume, Allah arye anang babye, lyepnamle!
Anye bira, el ikin ning doproplirye, kanye imun uplye talak nirya ara, elce, “Na ti melipnilyame,” nyabuka, moropnilyopura, na kekepnirye, elti, pia kalikuka melinamne. Tonda, anye bira, el ikin ning dololamlye ning ati, lyepnirye, el dobuka ereipnamne. El anye bira, erebuka deipnyopura, yuk ninye nirya arye, el tibuk, si erenamake.
Ninye arye, ‘Yuk mutuku ninye ati yanuka opsicak’ tenen, weik cang keil aik dolamikak, pum tam dungnubuka wekelbalamak touk, Allah Yahweh elda, mikip weiknye ulula anya arye, elce elti, dib tenenyak ninye, pia melibuka kalikinamle. Yata ninye do nirya, sik malye unyak ning nirya batakikirye, ‘Allah el yupu nyasilye touk, aninguk talibuka diksukumuk unamabe’ tenen, teleb ubuka unyak ninye arye, Allah el damuk yanganamake. Allah el damak akunum yacopura, Allah arye sikti, pia melibuka kalikinamle.
Aminyan yanamle talak ara, Allah arye Israel nang, sik deice ikin ning deiplyeura, ninye weika arye dipnamak bukni, sik aning kum dopropnamaka nang, tuba kam unamak nang ara, mitik tonunuk unamake. Minop talak ara, yuk karin mutuku ninye deiyoknye, Raja Asyur biti, ‘Elcuk lyepropnamsile,’ tenebikce, elti, morobik bukni, anye birye, sik tam nang weika arye, obuka sirya dakuk. Anye birye, sik obuka yaniplobuk bukni, mitik tonun tuba kam unmak nang ara, elti, ‘Elcuk melibuka lyepropnamsile,’ kum tenenamake. Atonun, Yakub birye deibukba, dadeipdanin yangalamika ani, mitik tonun tuba unyak nang ara, anye biti, ‘Melibuka lyepsutue,’ pia kum tenenamake. Ara, Israel nang nirya, sik ni koproba Allah Yahweh ati, pia dipkoprob diba tenenamake. Allah ara, pia diksukum ulirye, malye ning tonoknye babye pia kum ululnye, Pia Leknye Allah ulule.
Ati ara, anggun Israel yala nang ap, tukwak mutuku im sirya, mutuku nirya ululum nang ap, ninye sirika arye, deiamikce nang ati, ‘El anye birye, nun ikin upsilye talak ara, melibuka lyepnamsilarya,’ kum tenenamlume. Tukwak unyak nang nirya ara, sik u pum bisik ara, isin deice arye kam unyake. Sikda talye tukwak nang ati, yata wiripting deice arye, anggun tukwak ululum nang ati, melibuka lyepsiting do? ‘Kume, aning ara, pia kum winipmanto ati, dauplye,’ nyapsine. Allah arye nyabukba, nabi Yesaya kekebukce, Israel yala nang ati, laka nyabuk.
Sik amutuku ninye arye, ‘Yeremia nyalul yupu nun like,’ nyabuka anti malye kibuka bataknamkiyak bukni, anyapmakin ning ara, talye kume. Narye an melipkenepa, aning nirya ara na minop talak arye tenelamse touk winipnalama ati, nyapkine. Aning nirya naryuk anti, kalikuka melipnamkine. Ara, na Allah Yahweh arye, akunum nyapkine ati, ayupu ara dipkoprob nong upnamle,” Allah arye na Yeremia biti nyapnuke.
Winipmanto ning ara, winibuka unamlum talak ara, anggun Israel yin talen nang pamubarye nanguk, anggun mal olan nang, seratus nang ati obuka, sirya daknamlume. Tonda, anggun Israel yin talen nang seratus nang arye, anggun mal olan nang ati, ninye yupa pia weik, sepuluh ribu (10,000) nang obuka, sirya daknamlume. Ara, sik parang ya dobuka, obuka sirya dakmumce, malye-malye kipmamunya deice arye, sik yuk mutuku yu nang ara, weik tonun oplopnamlume.
Ati na Allah aryuk, bebeya laklirye, minopce lingum alamle touk, na mikip weik deice arye, malye ninye ati wenepnirye, kum kilinune. Yatato ninye do nirya, sik mikip uptinga babye, sik ap, sikce keil aik domik ning nirya ara, narye kum kilinune. Ara, sikce, ‘Nun osinyak ninye kum yana weknamak’ tenen, keil aik ap, cang keil poka ap, domik ning nirya ara, narye kum kilinune. Nara Allah, na mikip weik deice arye, sik anang tenenyak ning nirya, minopce kum kilinune.
Allah arye, na nabi Zakaria biti, nyapnuka deiyok ara, ani. Ara, yata mutuku nang arye do, anggun Israel yala nang ati, yanuka olyangalamsikce, anggun ning yala-yala nirya, alubuka dololamik ning ati nyapkine. Anggun moubuka tenipdelulume! Dipkoprob nyapne. Na pia talima nang, Israel nang ati, ikin ning sik nong deice delinyak nang do, olyanganyak nang do, anggunti ara, weik tonun wenepnamsine. Deiyok ara, Israel nang ara, na pia talima nang unyaka ati, Israel nang ati, malye umunce, ikin ning deipmunyopura, ara nati malye ulin ning winipmanuluma ati, nyapsine. Nara Allah Yahweh, im deice unyak yin talen malaikat nirya ara, sik deiyoknye ununa ati, naryuk ayupu nyapmasine.
Peterus anda, dib teneplumce, wini talak ara, ‘Anda Allah el Mi Koprop Kristus unamlame’ nyapmanilama anya arye, pia bulamle keil atonun ulyame. Ninye arye tuku palibuka mutuku yangan keil deice, aik ayukumna ikuka dolamak touk, yata nang do nirya, an nyapmanilam atonun diba tenebikceopura, Allah el mapu kipdeipniba, sik kanye talima ap, kanya ap, mikip unamake. Mikip weik kibuka ukirye, weik upnin banamake. Nati, dib tenepnikirye, na mapu weik upnin banamak ning ara, dipna deiyok isa mer ap, sik deiyoknye Isa Mutuku Dongonye ap arye, na mapu ati kum bisipnamake.
Yesus arye el wipdeiamuk nang ati nyabuk. “Anggunce mambul kanye bobuka talima bouku sukuna kum unamlume. ‘Allah elce, melinamsil’ tenen, diba tenebuka anggun kanye talima el deice delinamlulume. Tonda aning atonun, nati, ‘Elce melinamsil’ tenen, dib tenebuka, anggun kanye talima na deice delinamnulume.
Nyabukce, ayupu ton nyabuk. “Ikin kanye bona kumce, kanye deibuka yuk nang ap neika teleb una ati, deiyok ning aresunune. Sik diba tenena kum, talye tukwak ninye arye, yuk nang ati, tenebuka arye arenyak touk, kum aresunune. Ikin kanye bona kumce, teleb kanye bobuka, teleb una deiyok ning aresunun ning ara, na ninguk aresunune. Aning ati ara, anggunce, ‘Se,’ tenen, ikin kanye bona ap, ilil una ap, ikin kanye bobuka bouku sukuna ap, aning nirya kum unamlulume. Ilil asa kum aniryuk, kanye deibuka telebuk unamlulume.” Yesus arye nyabuk.
Arup talak, “Allah arye akunum teleb kipdeipsuk ning ani,” nyabuka laka nyapmasin yupu ati ara, yata yupu ton tabakuka nyaptibye do? Kume, Allah arye akunum bico tenyamsukce, nunti wipdeipsukce, melibuka pil dosulula anya arye, yatanye ap, yata ikin ning ap arye, malye kipsutu do? Aning nirya ara, malye kum kipsutue.
‘Wininamne,’ tenepsirye nyamse bukni, narye Israel ninye nirya obuka sirya dakniba, sik mal olan nang arye, walwal ubikirye, malye ubikcopura, ‘Allah el si Yahweh ara, mikip weiknye binye, nyanyak bukni, Yahweh arye aning kum ulamuke. El mapu Israel ninye nirya, nun babye mikip aniryuk obupe,’ nyabuka, ‘Kanye erebikcak’ tenen, teniltonune.
Tonoknye biryuk, seribu yin nang ati, dobol bitu do? Aning atonun, bitinye nang aryuk, 10.000 yin nang ati, obisiptiringce, ‘Minopce bindoplulume,’ nyaptiring do? Kume, aning ara, kum winipmanto. Dipkoprop sikti, Allah arye anang ara, ‘Dauaplye, sik oploptinge’ tenen, kum nyaplyopura, aning kum winipmanto. Anggun ni Yahweh arye, ‘Israel ninye oploptinge’ tenen, kum nyaplyopura, yuk mutuku nang arye, kum obuka sirya daktinge. Weik mutuku tikne keil, pia aulamle touk, sik ni koproba Allah babye, pia kaliklamuk bukni, Israel ninye, sik wenena ati, Allah arye sikti batakamukba, sik mal olan nang arye, obuka sirya daklamike.
Allah el si Yahweh arye, el mapu sik malye ning ati, yupu lipsisikuka, wenenamle bukni, sik mikip kum daliba, anang akunum kum danin bacopura, ila tuba tonap, bico tenepnamle. El mapu, yuk nang amu tam unyakce, talye piluk donyak nang babye, ura, sik bidamang kanye aryuk, pil donyak nang babye, kum dacopura, Allah eiplirye, bico tenepnamle. Bico teneplirye, el amu tam unyak nang, Israel ninye ati, tuba tonap, kanye namin upliba, bico teneplirye, lyepnamle.
Winibikopura, Allah el si Yahweh arye Gideon biti nyabuk. “Sik yupa tiga ratus (300) nang, sik taruk deice kam sitang arye lulaklamle atonun winipmak nang ara, narye melipsinya deice arye, lyepsilyeba, sik Midian yala ninye opnamalume. Sik gutam dipdongobuka talye urdem arye mek dinmek nang nirya ara, sikda bataknulyame. Ance nyapminba, sik mutuku koproba yuk-yuk tamubuka bindopnyake,” Allah arye nyabuk.
Yonatan birye akamnye, el yin melibuka bobanmok kamnye biti, nyabuk, “An adiparyuk minop yaminba, nun neika binimirye, Allah el si kum bikikce, kum erenyak nang, sik Pilistin nang arye, sik kalikina ati, yaka kin asik dobuka yan unyaka dam binuname. Binimnyopura, nun ni Allah Yahweh, elce nunti melipsilirye, ninye obuka, sirya dakan ning, nun deice deipnamsile. Melipsilyopura, Allah elce, sik Pilistin nang dobuka, nun taruk deice deipsiliba, sik anang nirya opnuname. Ara, ninye mitik tonun do, weik tonun do, kum teneipnuname. Allah el mikip deice arye, ninye weik aunyaka babye, ‘Opnirye sirya daknamne,’ teneplyopura, akunuma elce olule. Ati, elce melipsilya deice, obinimirye binuka, anang nirya obuka, sirya daknuname,” Yonatan birye, el melipmok kamnye biti nyabuk.
Ati ara, aunmak ninye nirya eibikirye, kel biknamake. Ara diba, Allah el si Yahweh, elda talye ning yo taca ap, parang ya ap deice arye, ninye kum lyesulule. Ninye nirya, olanyak bukni, olbisina ap, lyena ap ara, Allah el si Yahweh, el mikip deice aryuk aresulule. Elcuk lyesulule. Utenebikirye, kel biknamake. Arup olanamaba ara, Allah elcuk melisulula anya arye, aolan talak ara, Allah el mikip nun deice deipsiliba, anggun Pilistin ninye obuka, sirya daknamasiyabe,” Daud birye nyabuk.
Ninye ton, Allah ati, ‘Nun ni koproba ani,’ tenekirye, batakna kumce, el yupu moubuka talibikirye, dobolbanyak ninye ara, sik pia namin kanye bobuka ulamak ninye ara, Allah Yahweh arye, sikti, kalikilirye, pia teleb ubuka melinamle. Bukni, malye un ninguk, pia talibuka unyak ninye ara, amu tam deipliba, sikda kuna sukumuk pia unamakeʼ. Aning kum kipdeiplyopura, ninye arye kum elinamake. Aning ara, talye ati kume. Ninye nirya ara, sik mikip deice aryuk, teleb ubuka kum unamakeʼ. Allah arye melisilya deice arye, teleb unamabe.
ကြော်ငြာတွေ