Ura, aning nirya akunum winibukba, atam nang arye dilamik ning ara, atalak ara, Raja Hadadezer arye, dekna ning areamukba, sik dana-dana tam weik deiyok nang kibuka taleamik bukni, Hadadezer el amu tam kipdobikce, el melina ati, mal olyanmik nang, deiyok nang nirya ara, ‘Se, Israel yala nang, yin nang aryuk, nunti akunum opmasiyakeʼ tenen, akunum eibikce, kel bikik. Ati ara, sik adeiyok-deiyok nang nirya yayikce, Israel yala nang ati, nyabik. “Kume, sikcuk, akunum malye kipmasulama ati, angguncuk talipsumba, nun ap, sik ap epdanuka, kanye deibuka, telebuk neika unamabe. Nunda, anggun amu tam ubirye, anggun pil melina nanguk unamabe,” nyabuka, yanuka morobikce, nyalin yupu deice arye nyabik. Nyabika ati, sik Siriya mutuku noutam ulamik nang nirya ara, Israel nang aryuk talibik. Talibika ati ning ara, Siria mutuku ulamik yin talin nang arye, ilil ubukba, sik Amon mutuku ninye arye, ‘Israel tam nang mal olbana ati, sik ton yanuka melipsululume,’ nyabuka, morolamika babye, kum kekebikce, sik Amon yala nang ati, ton ap kum melilamik.
2 Samuel 8:6 - Eipomek6 Winibukopura, Raja Daud birye, ‘Amutuku nang, na amu tam unamakʼ tenen ati, na yin talin nang arye, atam nirya kalikuka talinmak tenebukce, el yin talin nang kong ton, yuk-yuk bukni, Damasyik tam noutam deibuka balamukba, daulamikce, atam nang nirya, sik amu tam kipdobik. Tonda, amutuku nang nirya arye, Raja Daud amu tam kibuka ulamika ati, yo bok bobuka yanuka, Daud biti arelyangalamik. Tonda, atam noutam nirya ara, Allah Yahweh arye, ninye deiyoknye Raja Daud ati, elce dan mutuku do nirya, olbalamok talak nirya ara, Allah meliamuk deice arye, Daud el deice obuka bisina deiyok ning deibikba, teleb kibuka olbisilamuk. Tonok mutuku nang babye, Daud biti kum malye kibik. အခန်းကိုကြည့်ပါ။ |
2 Samuel 8:6
26 ပူးပေါင်းရင်းမြစ်များ
Winibuka tenelaluma anya arye, wini talak akunuma, aninguk winipnamabe. Anggunce nyaptumba, Daud bira anggun tam kipsutue. Ati anggunda, bita moubuka tenipnamlulume. Nun ni koprop Allah Yahweh arye, Daud biti, nyalin yupu deice arye, akunum nyapdeiamuk. Na amu tam pil melinanye Daud bira, ‘Naʼ tenen, ninye sik Israel ninye ati, lyepdopnamle. Ara, sik mal olan nang, Pilistin yala nang ap, sik tam kiyamik nang ap, tonda yuk mutuku ninye, sik dana-dana tam unyak mal olan nang arye, ‘Israel ninye opnamabe,’ tenenyak ninye nirya ara, Daud deice lyepdopnamlarya,” nyapdeiamuk.
Dan mutuku nirya, balalum mutuku nirya ara, narye pia meilyamkise. Tonda, anti, ‘Opnamabe,’ tenelamkik nang nirya babye, narye sikti, kanye walwalap sinipna arye, meilyamkisiba, ance anang nirya obuka, sirya daklalume. Narye anti, weik kanye deipkisa anya arye, tukwak mutuku ninye deiyok nang, ulamaka atonunye ereipnamakine. Yuk deiyok nang, mitik weik si aupmal bukni, an si weik arye erepdeipkiniba, ninye mutuku-mutuku nirya, ‘Raja Daud bira, weik mambul weiknye ulamuk,’ tenepnamkiake,” Allah arye nyabuk.
Winibukopura, adiparyuk Raja Daud birye, aik dobuka, el yin talin nanguk, Edom mutuku noutam nirya ara, yupa yuk-yuk bukni, weika arye deibuk. Dobuka deibukba, ayin talin nang arye, Edom tam nirya kalikinmikba, sik Edom tam ulamik nang nirya arye, Raja Daud biti, amu tam kibuka ulamik. Tonda, atam noutam nirya ara, Allah Yahweh arye, ninye deiyoknye, Raja Daud biti, elce dan mutuku do nirya, olal balamik mutuku nirya ara, Allah meliamuka deice arye, Daud el deice mikip weik ap, ninye obuka, dakna deiyok ning ap deibukba, amutuku ninye nirya ati, teleb kibuka olbisilamuk. Tonok mutuku nang babye, Daud biti kum malye kibik.
Tonda, ninye deiyoknye Raja Daud ap, el yin talin nang ap arye, Moab mutuku ulamik nang ton, obuka sirya dakuk. Obuka sirya dakukopura, elce, “Sikda tuku deiceuk mapnamalume,” nyabukura mabik. Nyabukura, tuku deice mabik talak ara, sik winilye nang amapmik kan-kan arye, ninye bitinye-bitinye nang wibuka, opnin banmokba dibinmek. Ati ara, sik awinilye nang kan-kan arye, bokuka bitinye nang obik bukni, tonoknye bira, batakikba kam tuba unmok. Winipnin banmoka ani, ninye weik tam ara, obuk bukni, ninye mitik tam ara, kam tuba unmek. Ninye tonok-tonok wibuka batakaldongonmok, abatakdongopmok nang anyuk, kam tuba ulamik. Ati, sik Moab nang ara, ninye deiyoknye Raja Daud, el amu tam tamubuka ulamikce, el dekna ati ara, elti, yo bok weik tonun arelyangalamik.
Tonda, Damasyik tam taleamuk ninye deiyoknye Hadadezer, el amu tam pil dolamik deiyok-deiyok nang arye taleamik ning, ‘Mal olalbanak opnicakʼ tenen, lelin ning, el si ara, perisai nyalamak ning, kat dekna weik ning, emas deice arye moubuka deiamik ning ara, Daud birye aning nirya, alubuka doprobukce, adiparyuk ila tamubuka, Yerusalem mutuku bobiyuk.
Ura, Raja Yerobeam Bitinyanye birye, ninye deiyoknye kibuka taleamuk talak arye, winilamuk ning ap, pia pi dobuka, mikip weik tonun arye, pil dolamuk ning ap, yupu nyalamuk ning ara, Israel tam ulamik ninye, sik Raja-Raja ulamik ning sekna ati, buku noutam akunum sekik. Tonda, el Yerobeam Kedua birye, Yehuda tam talibuka ulamuknye biti, binuka mikip weik tonun arye obuka, sirya dakukce, amutuku alubuka dopromuk ning bitinye, Damsyik mutuku ap, Hamat-Yehuda mutuku ap dobuka, tuba tamubuka, Israel tam deibuk ning ap, aning nirya ara, Israel yala ninye ati, ninye deiyok kibuka talilamik Raja-Raja nang, sik si sekuka delilamik buku noutamuk, sekuka deiamik. Abuku si ara, ‘Sejarah Raja-Raja Israel,’ nyabik.
Hizkia birye winilamuk ati ara, Allah arye, elti, pia melilamuk. Ara, Allah el si Yahweh arye, Hizkia biti melilamuk deice arye, elce yata yala pil do nirya, el pil dolamuk ning nirya ara nong ulamukba, pia telebuk ulamuk. Tonda, Asyur mutuku tam nang sik taleamuknye birye, ‘Yehuda tam ninye obuka sirya daknirye, anang na amu tam pia ukirye, narye, dipnye piluk talye pil donamniyake,’ tenelamuk bukni, Hizkia bira, ‘Aning pia kum wininamne,’ tenebuka ati ara, Asyur mutuku ninye deiyoknye el yupu kum kekelamukce, anye biti yaniltalamukce, Raja Asyur mutukunye el pil kum dolamuk.
Ura, Moab mutuku taleamuk ninye deiyoknye, Raja Mesa bira, domba basam weinanye ulamuk. Ati ara, sik Israel yala ninye ulamik mutuku taleamuk Raja ati, tuku dekna ning ton arelamuk. Ara, pajak deklamuk ning ara, aketing tamun, aketing tamun nirya, domba basam mi, seratus ribu (100.000) ekor ap, tonda domba basam yim ara, seratus ribu (100.000) ekor nemne ning, sik potong dem wibuka, teleb ninguk arelamukba, el tam nang arye, Israel mutuku noutam boyangalamikce, arelamik.
Winibukopura, adiparyuk ninye deiyoknye Raja Daud birye, Edom tam noutam ara, el yin talin nang una ati, anyaik pum tam wipdeibukba, daulamik. Winilamika ati ara, sik amutuku nang ara, ninye asik nang ulamak atonun ulamikce, amutuku tuku deice unamika ati, yo bok ap, teleb arin ning ap, bulubukabikce, pajak yo bok arena atonun, Daud el damuk arelyangalamik. Unilamikba, Edom mutuku noutam ulamik nang nirya arye, Raja Daud el amu tam ulamik. Tonda, Raja Daud birye, ‘Ninye yuk mutuku nang olbinamana ati, binuka olanman talak nirya ap ara, Allah Yahweh el mikip ara, Daud deice deiamukce melilamukba, yuk mutuku nang ati oltakana uk ulamuk. Yuk mutuku nang arye, el Daud biti yanibuka malye kum kipmanto ulamik.
El yin talin nang nirya ara, ‘Yu nang arye olyasicak tenen, Yehuda tam noutam, ton weik asik cang keil arye antanabuka domika poka dam kintinip deibukura, binuka kaliklamik. Tonda, Yehuda tam bukni, yuk yin talin nang yupa ton, yuk-yuk dobuka poka balye tam kaliknamak tenen dopdeibuk. Tonda, el li koproba Raja Asa birye malye kibukce, dalubuka dopromuk mutuku, Efraim yala nang ulamik mutuku noutam babye, yin talin nang yupa ton dopdeibukba, sikce anyasik dobuka ulamik noutam binuka kaliklamik.
Winibuka unyak bukni, narye Yahweh ati, “Naio, anda na si erenun Allah, an tonok ulyame,” nyanune. “Ance aning-aning nirya talemince, mikip weiknye ulyame ati ara, an ara na deiyoknye ulyame,” nyakinune. Ati ara, na ni Yahweho, narye anti morokunun yupu nirya ara, ‘Kekepnimince, minop yanuka, melipnamnilam’ tenen, moropkine.
Tonda, weik pala mutuku, Moab mutuku nirya ara, na yan mek liknak atonun ulule. Tonda, laka kina ati, na yan kinikna kwiripnirye, Edom mutuku noutamuk dopkwetepnamne. Winipyeura, ninye nirya arye, ‘E, Edom mutuku nirya ara, Allah arye, akunum talilule’ tenen, bikinamake. Aning atonun, Pilistea mutuku noutam tiknirye, weik yupu deice arye, ‘Amutuku nirya ara, na ninguk ulule,’ nyanamne. Ninye nirya arye, aning kekebikceura, ‘E, Pilistea mutuku nirya babye, Allah arye akunum talilule’ tenen, bikinamake. Allah arye nyabuk.
Sik mal olalban nang arye, ‘Nun kuda balye deice bukibirye, nun mal olan ninye ati olbinamap’ tenen, aning-aning nirya kintiniptinga babye, sik mikip deice aniryuk, sik mal olan ninye ati obuka sirya kum daknamake. Allah Yahweh, elcuk, ‘Aninye obuka sirya daknamle. Aninye arye otam ninye ati, oplopnamake,’ tenelye touk, nong upnamle. Allah tenepmalye touk, obuka sirya daknamle. Ninye arye teneipdeting bukni, Allah arye tenelye touk apia wininamle.
Winibikura, Yonatan birye, Pilistin ninye, sik yin talin nang ulamik mutuku si, Geba mutuku binuka, anang obuk. Obukba, Pilistin ninye kekebik. Atalakuk, Saul birye nyabuk. “Wini talak ara, pong-pong ana, el si terompet, pong-pong ana weik arye, nyapmunyeba, Ibrani ninye unyak mutuku nirya kekepnuyake,” nyapdeibukba, pong-pong abikba, Israel ninye dana-dana tam nirya arye, kekebuka bulubik.
Winipdikopura, awinibuk ning ati ara, sik Pilistin nang aik dobuka, ulamika noutam unmek ninye nirya arye, eibikopura, ilil pia weik ubuk. Tonda, kata mutuku noutam mutuku-mutuku nirya, daulamik ninye nirya, sik ilil ubuk. Pilistin mutuku noutam taleamikba, ulamik mutuku bisik dam, kalikna ati, domik asik nirya, opnirye ubula alubuka dolona ati, Pilistin nang yuk-yuk nirya ara, sik ilil weik ubuk. Tonda, amutuku nirya babye, weikto lulukuk. Aning winibuka, ati ara, sik Pilistin mutuku nang nirya babye, ilil pia weik ubukba, bikbik abuka, otam binapna, atam yanapna kibik.
Yonatan birye akamnye, el yin melibuka bobanmok kamnye biti, nyabuk, “An adiparyuk minop yaminba, nun neika binimirye, Allah el si kum bikikce, kum erenyak nang, sik Pilistin nang arye, sik kalikina ati, yaka kin asik dobuka yan unyaka dam binuname. Binimnyopura, nun ni Allah Yahweh, elce nunti melipsilirye, ninye obuka, sirya dakan ning, nun deice deipnamsile. Melipsilyopura, Allah elce, sik Pilistin nang dobuka, nun taruk deice deipsiliba, sik anang nirya opnuname. Ara, ninye mitik tonun do, weik tonun do, kum teneipnuname. Allah el mikip deice arye, ninye weik aunyaka babye, ‘Opnirye sirya daknamne,’ teneplyopura, akunuma elce olule. Ati, elce melipsilya deice, obinimirye binuka, anang nirya obuka, sirya daknuname,” Yonatan birye, el melipmok kamnye biti nyabuk.