Weik ninye deiyok nang arye, kwalin kama talibikirye, sik yan dana-dana deibikirye, akama noutam tuku dipdongobuka talibikirye, ninye nirya ati yupu bokolinyake. Winilamak touk an ap, ance deipminyeba dadeipdanin balamikca ani, do unamak ninye, Yehuda yala ninye noutam arye, ninye deiyok kibice nang babye tuba wininamake. Ninye deiyok nang kina ati talilamak kama ara, an yala nang arye pia talinamake. Yehuda yala nang arye akama pia talilyamica ani, aminyan sirya talak ara, akama pia talinamlanye bira, ninye deiyoknye yalyopura, akama ara el ning anya arye, el bidamnye dopropnamle.
2 Samuel 7:13 - Eipomek13 Winipnyopura, anye birye, na aik dopnamnile. Anyaik dopnilyopura, Israel nang arye, anyaik pum bisik, na si erepnamniake. Tonda an deipnalam mi, el talinamle mutuku ara, narye yuk talak nirya, pia una ati, mikip kipnamne. Winipniba, yuk yala nang arye, elti, kum bisibuka opnamake. အခန်းကိုကြည့်ပါ။ |
2 Samuel 7:13
39 ပူးပေါင်းရင်းမြစ်များ
Allah ance, ‘Anye bira Raja unamle’ tenen, wibuka ereiyamnulumnye biti, meliamnuluma deice arye, na mal olan nang nirya, opnin balamsa ani, Israel ninye yala nirya ati, sik ninye deiyoknye Raja una ati, tuba tamubuka ereipnulume. Tonda Allah ance, ‘Anye bira, Raja Israel unamle’ tenen, bico tenebuka wiamnulumnye bira, na Daud biti, batakana pia kum aryuk, tuba nati, teleb ubuka melinilyame. Tonda, na ap, na mapu silip ap, dadeipdanin banamak ninye nirya ap ati, batakana pia kum aryuk, bico tenebuka winisiminba, telebuk pia unamake. Ayupu nirya ara, Raja Daud birye, mot sebuka, Allah el si ati erenmokce, nyabuk.
An deipmin mapu ap, ance dipminbuk, dadeipdanin banamak nang ap, na damak pia unamake. Aning atouk, an talipnalam mutuku ap, talinalam nang ap, an mapu nirya talinamak ning nirya ap, narye mikip arepnibuk, keting tamun weik arye talipnamake. Winilaminya, ance deipnalam mi arye, an taliplum mutuku, elce anti punubuka, aning nirya talinamle. Ance dipminbuk, dadeipdanin banamak nang nirya ara, an yala nang ati, ‘Weik ninye deiyok nang unamak’ tenen, pia ereipnamne.” Allah arye nabi Natan ati, laka nyabuk. Laka nyabukce, “Anda, Raja Daud laka nyalbilyame,” nyabuk.
Ati ara, na ni Allah, anda aning-aning deice tam umince, aning-aning nirya talilyamce, mikip weiknye ulyame. Nun ni koprop Allah, an si Yahweh, ancuk Israel ninye talibuka melisilyame. Ance an talye pil donanye biti nyamnulum ning ara, ‘An mapu arepnamkine. Weik deiyok nang, pia unamake,’ nyamnulume. Ati ara, na talima kwa barepnilam deice arye, ilil kumce, na ni Allah, anti moropnukine.
Allah Yahweh dipkoprob pia aulye touk, na Salomo birye, ayupu dipkoprob nyapkine. Allah Yahweh arye, akunum nati, ‘Israel ninye nirya talena ati, Salomo el li Daud, el bulamuk ning, el si tahkta deice buknamleʼ tenen, kintinipnuke. Tonda, Allah arye nati, ‘Elce aning wininamle. Elce deipliba, dadeipdanin banamak ninye ara, weik upliba, mikip unamake,’ nyapdeiamuk ning ara, anyapdeiamik atonun, atalak winipnule. Ati ara, ninye deiyok kibuka talena ati ara, na deice ap, narye deiamniba, dadeipdanin banamak nang deice ara, akunum arepsuke. Ati ara, Allah el si deice arye, na Salomo birye nyapne. “Adonia bira, arup aryuk wenebuka opniba, dipnule,” Salomo birye nyabuk.
Aning nirya winipminyopura, aminyan talak Allah el si Yahweh arye, ‘Winipnamkine,’ nyalin yupu nyapdeiamnuk touk wininamle. Ara, Allah arye nyapnuke. “Ance deipminba, dadeipdanin banamak ninye ara, sik wininamak ning pia moubuka dipdemince, malye una kum aryuk, nati kum bataknikirye, sik kanye pum tam ap, sik nong ap, na deiceuk deibikcopura, narye pia kalikuka dinamsine. Ara, an yala nang kan-kan arye, ninye ton dopnirye, Israel ninye sik ninye deiyoknye Raja kina ati, wipdeipniba, Israel ninye pia talinamake. Na Allah arye nyapdeiamse touk, winibicopura, an deipkerekdop nang noutam arye, Raja pia upnamake.” Allah arye, Daud biti nyalamuk touk, Raja Daud birye, el mi Salomo biti laka nyabuk.
Aning ati ara, Allah arye na ni koprop Daud biti akunum nyapdeiamuk touk winipnamne. Allah el si Yahweh arye, sisinanye Raja Daud biti nyapdeiamuk. “An mi tonoknye bira, an pununa ati, wipdeipnirye Raja tikeipnamne. An mi tiklirye Israel ninye talipnamle talak nirya ara, asukumuk na si eren aik dopnamnile nyabuk.” Allah arye, na ni koproba Daud biti nyabuka ati ara, wini talak narye tenepmana ara, na ni Allah el si Yahweh, el si eren aik dopnamne.
“Ance anyaik dopmince unamlam ara, nyapnukine. Ara, an aupnin banalam talak nirya ara, narye nyapdeiamkise yupu uk nimalye arye, kekebuka unamlyame. Ara narye, ‘Aning ara wininamlame, aning ara ton kum wininamlyame,’ nyapdeiamse yupu talibuka dobolbanamlyame. Winipminyopura, narye an ni koproba Daud biti, ‘Winipnamkine,’ nyalilamse touk, ayupu nirya ara, an deice uk nong lak kipdeipnamkine.
Salomo birye nyabuk yupu ara ani. Nun ni Allah, an si Yahweh ati, ‘Anda pia telebe,’ nyapkiyabe. Ancuk nun Israel ninye ati pia kalikuka meliamsulum touk, tuba melisilyame. Anda nun ni Allah tonok ulyame. Na ni koproba Daud biti, an Allah arye, ‘Wininamkine,’ nyapdeiplume. An si bam bol arye nyaplum yupu ara, wini talak an taruk aryuk akunum winipmalame. Nong akunum upmasile. Nun ni Allah, ance nyapdeiamsulum yupu ara ani.
Bukni, na si eren aik dopnamnilanye bira, ance kume. Ance anyaik kum dopnamnilam bukni, ance deipnalam mi, elce anyaik dopnamnile. Ara, an koproba arye deipnalam mi, an nong ap, an ining ap atonun mi, elcuk anyaik dopnamnile. Anyaik doplyopura, anyaik pum tam ara, ninye weik na si erenamniyake. Allah arye na ni koproba Daud biti nyabuke,” Salomo birye nyabuk.
Tonda, Allah Yahweh, elce Yerusalem mutuku ara, elce akunum nyapdeiamuk ara, “Yerusalem mutuku ara, na unamnak aulule. Tonda anyaik pum ara, ‘Naʼ tenen ninye arye, na si pia erenamniyak,” nyapdeiamuk bukni, Allah si eren aik dam, Raja Manasye birye, isa si erena ati, domba ato ning opnarye, dobuka uku dongonak, ton memepdeiamuk.
Asyera isa kil, el urasin atonun ubuka, dobuka kintinip deiamik ning ara, Allah si eren aik noutam deiamuk. Allah Yahweh arye, Raja Daud ap, el mi Salomo ap ati, sik deice nyapdeiamuk. “Amutuku noutam ara, Yerusalem mutuku ati, anyasik kota Yerusalem ap, amutuku noutam, na si eren aik dopnamlumak ara, na Allah Yahweh, na si asukum pia erenamniyake. Ura, Israel yala ninye unyakak ara, asik weik aupmal bukni, anyasik Yerusalemuk wipdeipne. Sik dua belas (12) nang, yala-yala yuk ukirye, sik unyak mutuku yuk-yuk aulamikca babye, ‘Yerusalem mutuku tonok ati, na si eren aik ara, asukum dopnamakʼ tenen, akunum wibuka akwamse,” Allah arye nyapdeiamuk.
Bukni, Allah Yahweh arye, ‘Yehuda tam unyak ninye nirya ara, wenepnirye nirya kum opniba, kum kum danaknamyake,’ tenebuk. Adeiyok ara, minop talak, Allah arye, el kanye delilamukce, el pil donanye Raja Daud biti, nyapdeibuk. “Ance deipminye mapu ap, sikce dibikiba, dadeipdanin, bakirye, unamak nang noutam arye, ninye ton wipdeipniba, Israel tam talinamake. Ara, Israel tam noutam unyak ninye talipnamaka ati, an mapu silip arye, ninye deiyok nang Raja kibikirye, ninye talebuka pia unamake,” nyalin yupu deice arye nyapdeiamuk. Tonda, Allah arye, “Sik Daud yala ninye bukni, anoutam arye tikinamak Raja-Raja nang ara, weik weisa dirina weik ulamle touk, pia ati unamake,” nyabuk.
Aning nirya ara, ance pia moubuka tenepnalyame. Ara, an ni koproba Allah Yahweh arye akunum wenyamkukce, ‘Na aik ara, elce pia yuk wibuka dopnamnile. Na unamnak, pia teleb lek sukum babye dobuka kintinip deipnamnile,’ akunum tenyamkuke. Ati, wini talak ara, an adiparyuk moubuka tenepmince, mikip arye pia pi dobuka, apil donamlame.” Daud birye el mi Salomo biti nyabuk.
Allah Yahweh arye, “Yerusalem mutuku weik asik noutam ara, na siuk pia erenamniaka ati, anyaik noutam ara, na si akunum deipsa ati, na si eren aik tuba aupnamle,” nyabuk. Winibuka nyapdeiamuk bukni, Manasye birye, amutuku taleamuk talak ara, Allah el si eren aik noutam ara, talye isa si erena ati, kam ning obuka, aning el si mesba ton dobuk.
Ati ara, na ni koproba anda Allah Yahweh, an si erepkine. Na nio anda nun Israel yala nang nirya ati, kalekuka melisilyam touk, tuba melinamsilame. Na ni koproba Daud bira, an amu tam ulamukce, an piluk dolamuk. Ati, ance elti, nyalin yupu deice arye nyapdeiamlum ning ara, Dipkoprop pia wininamsilamʼ tenen, moropkine. Daud biti nyalin yupu deice arye nyalamlum yupu ara ani. ‘Daud anda, narye, ‘Aning wininamlame, aning ara pia kum wininamlame,’ nyabuka, nyalamse yupu nirya, moubuka taleplumce, dobolbaminye touk, ance deipmin buk, dadeipdanin banamak nang nirya babye, na yupu moubuka kekebikirye, aninguk winibikceura, na dam unamake. Ara, ance Israel nang, sik deiyoknye Raja ulamlum touk, aminyan yanamle talak noutam babye, an mapu babye, sik kan-kan arye Raja nang wibuka deipnyopura, sikce ninye deiyok talebuka, Raja nang pia unamake. Na dam ton pia kum unamake,’ nyapdeiamlume.
Diba, Allah arye, “Aning ara, wininamlume. Aning ara, pia kum wininamlume,” nyapdeipsuk yupu, talibikirye, diksukum telebuk unyak nang ara, pia kum batakalule. Anang nirya ati, moubuka dilirye, kalikilule. Amutuku-amutuku noutam nirya ara, ninye deiyok nang, sik Raja nang nirya bunyakak, el si ara takhta, Allah arye, sik diksukum wininyak nang dobuka, ‘Anang ara, Raja nang dam deipnyopura, pia unamake,’ teneplirye, deiplyopura, yuk nang eibikirye, anang ati pia si erenamake.
Sik amutuku unamak ninye nirya arye, ayana talipnamsilanye, ninye deiyoknye Raja ati, si erebikiba, pia aunamle. Tonda, ayanamlanye, el si tuba auplyeba, el tibuk, “Nun deiyoknye ani,” nyabuka, elti, si pia erenamake. Keting sinarya aupnamle talak nirya ara, el tibuk kinamake. Aninye deiyoknye, pia teleb unamla deice arye, mutuku-mutuku nirya unyak ninye, ayala-ayala nirya ara, telebuk ulilulba, weika arye tabakikirye, teleb wininamake. Elce, tukwak mutuku noutamak unyak ninye nirya ati, teleb kililirye, melilamliba, tukwak mutuku ninye nirya arye, “Diba, elda pia telebnye ulule,” nyabuka, elti, si pia erenamake.
Na Allah Yahweh arye na mapu Israel ninye ati nyapsine. “Narye tenyamse talak akunum yalyopura, anggunce moryamnulum ning ara kekepsinirye, melinamsine. Tonda narye tenyamse talak akunum kiplyopura, anggun melibuka lyepnamsine. Winipsinirye, anggunda na amu tam ulamunyeba, narye tuba kalikuka melinamsine. Winipnamsina deice arye, doryanamle talak unamak Israel ninye babye, aning eibuka kel bikikirye, ‘Nun babye dipkoprob lyepropnamsile’ tenen, kel biknamake. Ati na pil donamsina deice arye, yuk mutuku nang arye anggun mutuku nirya alabuka dopropsik ning ara, tamubuka arepnamsine. Winipsinyopura, narye anggun minop talak aik dobuka ulamlumak bukni, aik oldemuk upsukak ara, tamubuka arepsiniba, aik dopmunce amutuku ara pia talibuka unamlume. Aning ara, na tenepse talak akunum uplyopura, winipnamle.”
Aning nirya ara, talye ati kum nyanyabe. Aminyan talak, pia telebuk wininamsil ning deiyok ara ani. Ara, Allah arye tenelamsuk touk, wini talak ara, nun lyena ati, sal mi tonok akunum deipmasirake. Allah arye weik mambul mi akunum kintinibuka arepmasile. Nun lyena ati, ami akunum arepmasil mi elda, aminyan talak aning-aning nirya talibuka, nun ninye deiyoknye unamsile. Winibuka daulamepya ani, ninye nirya arye, el si erebikirye, el si ati nyanamak ning ara, ani. Pia Mambulnye ulule. Ninye melina ati, Kanye Talima Kwadina Deiyoknye ulule. Pia Mikip Weiknye Allah ulule. Nun Ni Allah, Pia Kam Unamlanye ulule. Allah ap ninye ap, neika teleb una ati, Ansinilina Deiyoknye ulule. Aning-aning nirya, ninye arye el si tenibuka nyana ati, ayupu nyanamake.
Elda, aning-aning nirya ap, ninye nirya ap taliplirye, ninye deiyoknye pia aunamle. Elce aning-aning nirya, talibuka unamle talak ara, kum kumdanamle. Tonda, elce, ‘Allah ap, ninye ap, teleb ubuka neika unamak’ tenen, ansinilina deiyok kibuka unamsilnye bira, pia aunamle. Aning babye, kum kumdanamle. Minop talak ninye deiyoknye, Raja Daud birye taleamuk mutuku ap, ninye ap ara, el dem arye, pia taliplirye, ninye deiyoknye pia aunamle. Raja Daud ninye deiyoknye una ati, weik mambul bun ning deice bulamuk touk, anye babye, aning deice pia abunamle. Raja Daud birye taleamuk mutuku ap, ninye ap nirya ara, ayanamlanye, el si mikip deice arye, aning-aning nirya pia talinamle. Elce pia teleb kibuka, yupu lipsisikuka bokolinamsile. Tonda, el malye winin ning tonok babye kum winilirye, pia diksukumuk unamla deice arye, amutuku nirya ap, amutuku unamak ninye nirya ap, teleb arye talinamle. Elda ninye deiyoknye kiplirye, talinamle ning nirya ara, pia aunamle. Wini talak ap, yuk sum nirya ap, pia ati unamle. Elce pia teleb unamle ning nirya, sirya dakmanto kum unamle. Aning nirya ara, talye ati kum winipnamle. Allah Yahweh ara, aning-aning nirya talilirye, im deice yin talin malaikat nirya, sik weik deiyoknye ulule. Allah Yahweh, aning-aning nirya talibuka, deice tam ulirye, Weik Erenanye birye, pia pi dobuka, el mikip weik deice aniryuk, aning nirya dipkoprob pil dolya deice arye unamle. Allah arye nyapdeibukba, Yesaya birye sekeibuke.
Minop talak, narye na pil donanye Yakub biti areamsibuk, elce deibukba, dadeipdanin balamik ninye ulamik mutuku uk pia ati binuka unamake. Ara, sik apu yapu ulamik mutuku uk, binuka unamake. Sikce deibikiba, dadeipdanin banamak ninye nirya babye, amutuku uk talibuka pia aunamake. Ara, wini talak ululum ninye ap, aminyan talak sik mapu ap, tonda sik mapu arye deipdanin, banamak mapu ap, doyanamle talak deibikiba, dadeipdanin banamak ninye nirya ap, sik nirya amutuku noutamuk teleb ubuka unamake. Unamak talak ara, Daud el yalanye birye, ninye deiyok kibuka aninye pia talinamle. Sik Sisinanye el tonok unamle.
Nyabukopura, ayupu ton dukdongobuka nyabuk. “Atalak ara, aweik deiyoknye birye, im sirya, mutuku sirya nirya talinamle bukni, atalak noutamak ara, Allah aning-aning nirya, pia talibuka im deice ululnye birye, yuk weik Deiyoknye erepdeipnamle. Anye birye talinamle ning nirya ara, el Kerajaan nyalamak ning, pia aupnamle. El ti ara, yuk mutuku ninye nirya arye, talibuka el obuka malye kum kiptinge. Tonda, elce talinamle mutuku ap, ninye ap, yuk deiyok nang arye kum taliptinge. Aweik Deiyoknye birye, yuk ninye deiyok nang ap, yuk mutuku nirya ap, malye kipnamle. Bukni, yuk mutuku nang arye, elti, kum malye kipnamake. Elda pia tuba unamle.”
Imam-imam nang, sik deiyoknye Yosua, el kisok deice amahkota kalupdeipnalam talak ara, elti, ayupu nyapnulyame. Ara, ani. “Allah Yahweh, aning-aning nirya talibuka, deice tam erebuka, im deice malaikat nirya, sik deiyoknye ulule. Elce ayupu nyapkile. “Anggun nirya, moubuka kekeplulume! Winipmanto ara, anye elda, yo taruk atonunye unamle. Anye nepnin balamlya ani, aminyan talak ara, na Allah Yahweh ati, na si eren aik dopnamnile. Ati ara, elda mambul weiknye ulule,” nyapsile.
Wininamle talak ara, el anye biryuk, na Allah, si eren aik ara, dopnamnile. Tonda, ninye arye elti, ninye deiyok nang ati, si erelamak touk, sikce anye biti, si erenamake. Anye bira, ninye deiyok nang bun ning, el si ara, ‘tahkta kursiʼ, adeice buklirye, amutuku talibuka, yupu nyanamle. Wininamle talak ara, imamnye ton, el tahkta kursi damuk tiknamle. Winiplyopura, imam ap, aninye deiyoknye ap, tonok kanye bopdikirye, ‘Telebuk neika unamnameʼ tenen, kanye delilanauk unamdake. Wininamle talak ara, elcuk amutuku noutam unamak nang nirya ati, taliplirye, yupu nyalamliba, telebuk unamake.
Peterus anda, dib teneplumce, wini talak ara, ‘Anda Allah el Mi Koprop Kristus unamlame’ nyapmanilama anya arye, pia bulamle keil atonun ulyame. Ninye arye tuku palibuka mutuku yangan keil deice, aik ayukumna ikuka dolamak touk, yata nang do nirya, an nyapmanilam atonun diba tenebikceopura, Allah el mapu kipdeipniba, sik kanye talima ap, kanya ap, mikip unamake. Mikip weik kibuka ukirye, weik upnin banamake. Nati, dib tenepnikirye, na mapu weik upnin banamak ning ara, dipna deiyok isa mer ap, sik deiyoknye Isa Mutuku Dongonye ap arye, na mapu ati kum bisipnamake.
Anggun babye, kam keil atonun ululuma anya arye, Yesus ap kanye dukdongobuka ululum talak nirya ara, el dopropsilirye, aik atonun dobuka teleb updeipnamsile. Tonda, ‘Allah ap, malye winin ninye ap, ansinibuka neika utibye’ tenen, ansinilina deiyok nang ati, Allah arena deiyok nang atonun kilisulule. Winisilyopura, Yesus Kristus ap, talima dukdongobuka diksukum umunye deice arye, Allah ati teleb ning arenamlume. Ara asing elinyap ning kum bukni, tonda nong kipman talye ning ati arenamlulum bukni, Allah arye, ‘Aning teleb,’ tenelye ning uk, anggun kanye talima noutam arye arilulum ning, elti, arenamlume. Winipmunyopura, kanye delinamsile.
ကြော်ငြာတွေ