Atalak ara, Yerusalem mutuku ninye, obuka kum daneipnuyik sum ara, Daud birye, sik Yebus nang nalinmeka ati, el yin talin nang ati ayupu nyabuk. “Yata nang do nirya, ‘Yebus yala nang optibye,’ tenebice nang ara, Yerusalem mutuku keil poka, antanabuka dobika noutam bukni, kin-kin botobikba, din mek wekelbalul bisik weknamalulume. Abisik weklinye binyuk, sik amutuku asing malye nang ap, yok malye nang ap ara, na mal olan nang unyaka anya arye, anang opnamalume,” nyabuk. Yu ubukba, Daud arye ayupu nyabuka anya arye, atalak ara, yuk nang nirya arye nyanyake, “Yok malye nang ap, asing malye nang ap, nun Raja Daud, el ninye deiyoknye aik kum weknamake,” nyanyake.
2 Samuel 5:7 - Eipomek7 Utenebuka nyabik bukni, Daud ap, el yin talin nang ap arye, Yerusalem mutuku noutamak bukni, mutuku si Sion mutuku, aik dobuka, keil deibuka ulamikak binuka, obuka malye kibikce, anang nirya oplobikopura, amutuku doprobukce, sik talibik. Akunum doprobukura, ninye arye anyasik si ara, “Ara Daud el ning,” nyalamik. အခန်းကိုကြည့်ပါ။ |
2 Samuel 5:7
27 ပူးပေါင်းရင်းမြစ်များ
Yerusalem mutuku noutam bukni, mutuku si Sion mutuku, aik dobuka, keil dikuka ulamikak, Daud birye, “Amutuku unamne ati, amutuku ara, Daud mutuku,” nyabuka si dobuk. Akunum si dobukopura, ‘Amutuku nirya, mikip kipdeipnamne’ tenen, tonda, ‘Nun keil poka luluklirye, ulupsaklyak’ tenen, amutuku keil poka kup-kup keil ap, tuku ap, weik tabakuka deibikba, erebuk. Erebuka baripdayikba, mikip weik kibuk. Winibukopura, apoka noutamak ara, sik aik dolamik. Milo mutuku arye, dipdongobuka, anoutamak ara nirya, keil poka dobuka denepdongamikce, ‘Mikip kiplirye, kat kipnamle’ tenen, apil dolamik.
Allah arye, Obet-Edom ap, el aik un ninye nirya ati, kanye deibukce, teleb kipdeibukba, yuk nang arye, “Allah el nyapdeiamuk yupu liamik kwemdina ara, Obet-Edom aik ulula ati, Allah arye anye ap, el aik unyak nang ap, el talilul ning nirya ap ati, pia teleb updeibuk,” nyabuka, Daud biti laka nyabikba, kekebukopura, bikbik abuka biyukce, aning Obet-Edom aik arye doprobikce, tuba tamubuka, el mutuku koprop bobiyuk. Ara, Daud el mutuku, Sion nyalamik mutuku noutam, amarikna boyanuka deibuk.
Aning bobuka, Daud mutuku, el si ara Sion mutuku, akunum wekelbinuyik talak ara, Saul el kilmu Mikael, Daud domuk kil arye dinmokba, Daud bira Allah el si Yahweh ati, el si erena ati merebuka, yantangkalye denmokce, mot senmokba eibukce, Mikael el talima pum arye, ‘Daud bira na like, aning ara, yata ning ati unmal do?’ tenebuke.
Israel ninye sik weik deiyoknye, Raja Salomo birye Mesir ninye sik deiyoknye Firaun biti yupu nyabuk. Ara, nun mutuku nang ap, an mutuku nang ap, ‘Olana kumce, neika telebuk ubuka neika unamap’ tenen, yupu taliprik. Tonda, ‘Kanye deibuka teleb unamap’ tenen, Salomo birye, Firaun el kilmu dobuk. Dobukce el li Raja Daud taleamuk mutuku, Yerusalem mutuku boyayuk. Sikda amutuku ulamdika ani, el Salomo birye nyapdeibukba, el amu tam ninye, el ninye deiyoknye aik ap, Allah Yahweh el si eren aik ap, tonda Yerusalem dana-dana keil poka domik ning ap nirya ara, pil dolamik ani sirya dakik.
Raja Salomo birye, Allah el si eren aik akunum dobuka sirya dakdongobukura, yupu nyapdeibukba, Israel ninye sik deiyok nang, wisi nang nirya ap, Israel yala deiyok nang ap, ati nyalbiyik. Ara, “Yerusalem anyuk bulubuka yalulume. Yamunce, minop talak Raja Daud ulamukak, anyaik si ara, Sion amutuku noutam arye, weik mambul ning doprobibirye, Yerusalem mutuku boyanuka deipnamabe. Ara, Allah el si Yahweh arye, ‘Wininamlume, tonda aning nyapsinye touk winipmunyopura, narye anggunti winibuka melinamsine,’ nyapdeiamukba, ninye arye ayupu kekebikce sekuka, yo lakase arye memamik marikna pum bisik deibik. Amarikna dobuka, Yerusalem mutuku noutam boyanuka deipnamabe. Ayo lakase arye memamik marikna ara, minop talak Raja Daud ulamukak, anyasik si ara, Sion. Mining dam mutuku, Sion mutuku noutam arye amarikna doprobibirye, boyanuka Yerusalem mutuku noutamak, Allah el si eren aik pum tam deipnamabe.” Salomo birye, Israel sik deiyok nang, wisi nang ati nyabuk.
Raja Salomo birye, Mesir mutuku ninye deiyoknye Piraun, el kilmu dobuka domukce, daulamuka ani, aminyan talak ara, ‘Yuk mutuku binuka unamleʼ tenen, nyaibukba biyuk. Ara, Salomo el li Daud ulamuk asik noutam daulamuka ani, batakuka Salomo birye, akil ati winiryuk dobuk aik binuka ulamuk. Winibukba, Allah el si eren aik dam, eitam iknapye tam, (arah selatan) uamuk tuku ara, Salomo birye dobukce, teleb kipdeibuk. Tonda, asik si ara, Milo mutuku ton domuk.
Yoyada akunum dibukura, el kayapu nang arye, el nong bobuka, Raja Daud ulamuk mutuku ara, Sion mutuku noutam, sik Israel yala ninye talilamik Raja-Raja nang dipneura, weilamikakuk, el nong babye bobinuka weibik. Imam Yoyada bira, Allah si eren aik moubuka taleamukce, teleb pil dolamuk ning nirya ap, Israel yala nang ati teleb kibuka melilamuk ning nirya ap ati ara, akunum dibukura, el nong bobuka Raja Daud weiamikak, binuka weibik.
Raja Salomo birye, Allah si eren aik akunum dobuka sirya dakdongobukopura, yupu nyapdeibukba, Israel nang sik deiyok-deiyok nang dam ap, Israel yala-yala nang, yuk-yuk aulamik touk bukni, sik deiyok nang nirya ap ati nyalbiyik. Ara, Israel nang yala-yala nirya, sik apu yapu ap, sik ni yapu ap ati, “Yerusalem mutuku dem bulubuka yanamlume. Yamunyeura, minop talak Raja Daud ulamukak, amutuku si ara Sion mutuku, anoutam arye mambul weik ning doprobibyakarye, Yerusalem mutuku boyanuka deipnamabe. Ara, Allah el si Yahweh arye, ‘Aning ara wininamlume, aning ara, pia kum wininamlume. Winipmunyeba, narye anggunti winibuka-winibuka melinamsine,” nyabuka, nyalin yupu deice arye nyapdeiamukce, keil pala deice sekuka areamukba, ninye arye aning dobuka, marikna pum dongobuka deibik. Amarikna si ara, Peti Perjanjian dobuka, boyanuka Yerusalem mutuku deipnamabe. Ayo lakase arye dobik marikna, Peti Perjanjian ara, Daud ulamukak Sion mutuku arye dobibirye, Yerusalem mutuku Allah Yahweh si eren aik boyanuka deipnamabe,” Raja Salomo birye, Israel yala nang, sik wisi nang ap, deiyok-deiyok nang ap ati, nyabuk.
Tonda, mek pu uamukak mek kwelbana ati bisik bublan botopdeiamikba awamuk bisik ara, Kolhoze, el mi Salum birye, winiryuk ning tabakuka dobuk. Salum bira, Mispa mutuku taleamuknye ulamuk. Atonun, abublan tirikamik alip tam ara, aik aruma dopdongamik. Tonda, abublan dana-dana tam delilamik yo ap, alip tam delilamak yo ap, ensel ap, bisik tirikildongon ning ap dobikce tirikdongobik. Tonda, abublan alip tam ara, kat ning besi beton dobuka lamakdongobik. Tonda, Siloam mekwen deiamukak lilkwa ara, akeil poka tabakuka dopdongobik. Amekwen damuk, amutuku ninye deiyoknye Raja, el wa ara, ninye arye wiamikba awamuk. Asukum arye deiyok koubikce, keil poka dopnin balamik ani, minop talak Raja Daud ulamuk asik dam bana ati, moropdeiamik yo moromna dam binuka deibik.
Allah el si Yahweh arye nyapnamle. “Sion mutuku pia telebak, pia telebnye ulul mutuku noutamak ara, narye wipdeiamsinye amutuku deipne. Ara, ‘Amutuku noutamak ara, na si pia erenamniyak’ tenen, Yerusalem mutuku noutamak deipne. ‘Anye bira, tukwak im sirya, mutuku sirya nirya unyak ninye, sik ninye deiyoknye, Raja unamle’ tenen, wipdeipse.” Allah arye nyabuk.
Ati ara, Sion mutuku unyak nang nirya ara, kanye deibuka unamake. Tonda, Yehuda noutam unyak nang nirya ara, kanye deibuka, ‘Telebe,’ nyanamake. Ara, talye ati kum bukni, deiyok ara ani. Sikce, an pia teleb kibuka ulyam ning nirya ati, moubuka tenepdekirye, ‘Se, Allah ara, elce, ‘Aning ara, wininamlume, aning ara, pia kum wininamlume,’ nyapdeiamsuk yupu atonun, ubuka ulule,’ tenebikirye, anti kanye delinamake.
Anyasik Yerusalem mutuku ara, mutuku kon deice dobuka deiamik ati, el urasin ara, pia teleb ulule. Tonda, anyasik ati, ninye mutuku-mutuku nirya noutam unyak nang arye, amutuku tenebikce talak ara, kanye deibuka unyake. Sion mutuku ara, Israel noutam ulul bukni, dabu tam (arah utara) ulule. Anyasik ara, nunti talisulule ninye deiyoknye, nun Raja Allah arye, amutuku talilule.
Ninye arye an si erena ati, asum-asum nirya, kam ning obuka, anti arekinyak ning ara, kum patakulule. ‘Kam ning obuka, na dam boyanganamlulume,’ nyapnutumba, aning obuka boyakitinye bukni, aning kum nyapnuluma ati, kam ning ap, yuk teleb ning ap, kum boyanganamkine. Aning atonun, nun malye ning kilina ati, kam ning obuka, uku dongolyanganyap ning ara, kum patakulule. Ati na babye, kam ning obuka, an si erena ati, uku kum dongolyanamkine. Aning ara, Allah an kum patakulula ati ara, aning dobuka, arepkitinya babye, ance, ‘Aning ara, telebe’ tenen, kanye deibuka kum dolonalame.
Anggun Sion mutuku ululum nango, kanye lopsiliba, weik yupu ara, weika arye nyapmunce, Allah si eren mot senamlume. Wininamluma ara, talye ati kum bukni, deiyok ara, Israel nang anggun ni koproba Allah, malye winin ning tonok babye kum winilirye, Pia Diksukum Leknye ulule. Tonda, elda pia weik si erenanye, anggun kan-kan ulamlibuk, anggun ap neika ansinibuka unamlume.
Allah el mikip arye, tukwak mutuku tamubuka yanamle talak ara, Yakub birye deiamukba, dadeipdanin yangalamik nang, el mapu koproba ati nyapnamle. “Na Yerusalem mutuku weik asik noutam tamubuka yanamna ara, ninye Lyena Deiyoknye kipnirye yanamne. Ara, na mapu, anggun nirya malye winimunye ning batakmunce, tamubuka na tam kipnumunye nang lyepnamne ati, yanamne,” nyapnamle. Nara, Allah Yahweh arye, ayupu nyapsina ati, dipkoprob aning nirya nong upnamle!
Anggun nirya moubuka kekepnululume! Anggun mutuku deiyok dam, weik luak ululum nang ati, narye wenebuka opnamsine. Aning atonun, anggun mutuku kon deice, weik pala keil deice ululum nang babye, narye wenebuka opnamsine. Min talak ara, anggunce, “Kume nunda, pia mikip weik unyaba ati, yuk nang arye yanuka, kum opsitinge. Tonda, ‘Nun mal olan nang yanuka opsicakʼ tenen, cang keil poka dobupe ning ara, yuk nang arye yanuka, ulubikirye, wekuka kum opsitinge,” nyabuka, maknya kintibuka kwalilamlum bukni, na Allah arye, anggun nirya ati, malye kipsinirye, wenebuka opnamsine.
Amutuku yanganamak ninye, sikce nyanamak ning ara, “Yalulume, nun nirya Sion mutuku deice welebibirye, Israel ninye, sik ni Allah Yahweh, el si eren aik dam binuyabe. Winibibiba, elce nun wininamap ning nirya ati, bisik nukunamsile. Winibuka nuksiliba, nun nirya arye, abisikuk dobolbanamabe. Aning nyapmasina deiyok ara, Allah Yahweh el yupu ara, Yerusalem mutuku noutamuk ulula ati, amutuku uk, binuka unamabe. Tonda, Allah Yahweh ara, Sion mutuku deiceuk ulirye, el mapu koproba ati, yupu moubuka peterelule. Ati, Yerusalem mutuku uk, binuka unamabe,” nyabuka nyanamake.
Nabi Yesaya birye sekamuk yupu ara, ani. ‘Allah arye domona yupu deice nyabuk. Anggun moubuka dipdelulume. Sion mutuku bana ati, bisik noutamak ara, yan dum dukne keil deipne. Ninye arye talye luparabuka bakiba, akeil deice arye, sik yan dum dukliba, kote saknamake. Bukni, abisik noutamak deipnamnanye bira, pia diksukumnye unamla anya arye, elti, diba tenebice ninye nirya ara, na Allah arye dipkoprop lyepnamna ati, alye pia kum dakdanamake. Aning ara, nong upnamle anya arye, sikce nati diba tenebikcopura, aminyan talak, ‘Se, nunda talye ninguk diba tenelamupu’ tenen, sik talima pia boktoplirye, kum uk dinamle. Dipkoprop na Allah arye aninye lyepnamne. Ati, aninye ara alye pia kum alye dakalanamake.’ (Yesaya 28:16)
Ura, na kayapo. Sik minop talak ulamik Israel ninye, asing eipmanto ning dam yangalamik bukni, anggun wini talak ululum ninye ara, pia yuk nang dam yanmalume. Anggunda, Sion mutuku, Pia Kam Una Deiyoknye Allah, el ulul mutuku, im deice Yerusalem asik dam yanganmalume. Anggunda, weik yupa weik kum nukmanto, im deice pil don nang teleb kanye deibuka, malaikat beribu-ribuan bulubuka, weklamak dam yanganmalume.
Min nyapmasin ning eipsopura, na Yohanes arye aminyan eipse ning ton laka nyapnusine. Ara tonok weik mutuku dup, el si ara Sion mutuku, Domba Mi Atonye ap, elce akunum lyebuk ninye ap, sik yupa weik 144.000 ninye ap, amutuku dup deice tikmeka, eipse. Sik 144.000 ninye nirya ara, Domba Mi el si ap, el Li Kopropa Allah el si ap, sik asok deice sekdeiyamuk ning ara, eipse.
ကြော်ငြာတွေ