2 Samuel 3:25 - Eipomek

²⁵ Nun deiyoknye an kele, Abnar birye an dam yanmu ning ara, talye minin yupu nyalyanmakue. Tonda, elce anti, ‘Daud el ulul ning ap, el tenelul ning ap ara, yata wirilul do? Yata winipnamle do?’ tenen, dilyanmakuke.” Abnar birye, Daud ati nyabuk.

2 Samuel 3:25 ပူးပေါင်းရင်းမြစ်များ

Kejadian 42:12

Nyabikba, Yusup birye tamubuka nyabuk. “Kume, nyapmanulum bukni, na kanye ara, nun Mesir mutuku noutamak teleb ubuka kum kalikilanayabe ati, opnamsutum ning ati dilyanmasulume,” nyabuk.

Kejadian 42:16

Anyapmasin anya arye, tonoknye dopdeipmunba, elce anggun weit koproba bolbinmalya ani, tamubuka anyaka boyanamle. El bilye talak ara, anggun yuk nang nirya ara, wenena aik dongopsiniba, asukumuk unamlume. Ara, urdem ati kume. Nun nirya arye, asum nyapmanulum yupu, ‘Dib nyapmak do, tilila do?’ tenen, dipdenamsiyabe. Dib kumopura, akunuma, adeice arye kel biknamabe. ‘Anggunda ninye ona ati, dilkirikne nanguk unyake’ tenen, biknamsiyabe. Firaun tuba ulula anya arye, aning ara talye ati kum nyapsine, dib ati nyapne,” Yusup birye nyabuk.

Kejadian 42:9

Atalak aryuk Yusup birye, min arye lengdar deice mabukce, alengdar deice el du yapu ati eibuk ning ara, tuba tamubuka tonap tenibuk. Tenibukce, sikti nyabuk. “Yo! Anggunda, ‘Ninye opnuyap’ tenen, min yuma dilban nang ululumde! Nun Mesir mutuku noutamak teleb kibuka kum kalikilanyaba ati, ‘Dan do?’ tenen, dilyanmasulum do!” nyabuk.

2 Samuel 10:3

Daud birye wipdeipmuk nang, akunum Amon mutuku noutam biyikopura, amutuku noutam talibuka ulamik ninye deiyok nang nirya arye, Raja Hanun biti nyabik. “Se, nun deiyoknye Raja Hanun, anda Raja Daud elce wipdeipmalce, dopdeipmasilba, kanye barina yupu yanuka, nyapmasiyak nang ati ara, talye ati kum yanganmake. Nun deiyoknye ance, ‘E, telebe, na ni koprop Nahas dipmala ati, si dobuka melilyanganmaniyak caʼ tenen, pia kume. Dipkoprop ara, Raja Daud el mapu wipdeipmalba, nun dam yanmaka ara, ‘Amon yala nang sik mutuku noutam ara, yata wiribuka unyak do?’ tenen, maka melianmasiyake. Aning nirya, akunum eibuka kel kibikirye, ninye deiyoknye Raja Daud dam binuka, laka nyabikiba, kel kiplyeura, nun weik asik ap, amutuku ap yanuka, obuka sirya daksikirye, nun ning nirya alubuka dopropnamsil ati, kamo dilyanmasiyake,” nyabik.

2 Samuel 3:24

Nyabikura, Yoab kekebuk ning ara, Yoab adiparyuk bikbik abuka, ninye deiyoknye, Raja Daud dam biyukura nyabuk. “Se, na deiyoknye ance, Abnar bira, an dam yanmokbuk, yata deiyok ning ati talye batakmalamak, kanye deibuka binmo do? Tonda, na deiyoknye ance, Abnar biti, Talya binulyame nyapmumu ak binmal do? Teleb ning ara, Abnar tomopmatumce, tapu koupdongopmatume.

2 Samuel 3:26

Nyabukce, Daud el dam arye, batakuka biyukopura, Yoab birye, el tam yin talin nang ati nyabuk. “Abnar biti, winipnulyame,” nyabuka, ninye wipdeibukba, yupu nyalbiyik. Winibik talak ara, Abnar biti aminyan melibuka banmika ani, mutuku si Sira mutuku deibuk mekwen dam biyikce, Abnar tamubuka boyayik. Aning winipmik ning nirya ara, Daud el kum bikuk.

2 Samuel 3:27

Abnar minpola tamubuka, Hebron mutuku biyuk talak ara, Yoab weik asik dolamik dam, bai tam arye, anyaik wekel bana ati bisik bublan dam binuka, tikuk talak ara, Abnar biti Yoab birye duknuna yupu nyapnuyaka ati, wilamak touk ubuk. Winibuka ani, Yoab birye Abnar bira, adiparyuk tema arye, el mun pum tam lukdongobukba dibuk. Yoab birye Abnar obukba dibuka deiyok ara, Yoab el weit koprop Asael bira, minop talak Abnar birye omuka ati, Yoab tenilamuka arye kwang dakukce, Abnar oplobuk.

2 Raja-Raja 18:32

Winilamunye bukni, na aminyan talak yanyopura, anggun bobuka yuk pera mutuku bobisiniba, sik mutuku noutam binuka deipsiniba unamlume. Ara narye, pera mutuku bobinamsin bukni, aumunye mutuku atonun binuka unamlume. Aunamlum mutuku ara, aning-aning ayala-yala nirya weik arye, ulule. Jakong wa ap, gandum wa ap, anggur tapu duk wa ap, anggur mek winiryuk ning ap, roti kwaning ap, zaitun minyak mekintinina ati, zaitun yo duk moulamle yo ap, tonda mong mek ap, nirya weik uliba, aning-aning nirya dopropmunce dibuka, telebuk unamlume. Ati ara, ‘Nunda kam uk unamap do? Dipnamap do?’ tenepmunce wipnululume. Na tam kipdopmunyopura, kum opsinyeba, pia kam unamlume. Kumopura, narye anggunti obuka sirya daknamsine. Ati ara, Hizkia birye nyanmasil yupu kum kekenamlume. Elce talye nyasulula ati ara, elce, ‘Nun ni koprop Allah el si Yahweh arye, lyepnamsile,’ nyapsilyopura, ayupu ara kekena kume. Allah el si Yahweh arye, kum lyepnamsile.

Mazmur 121:8

Allah Yahweh arye, nun ban talak babye, yangan talak babye, pia teleb ubuka kalikinamsile. Ara, wini talak arye dipdongobuka, yuk dotalak babye, pia ati kalikinamsile.

Yesaya 37:28

Bukni, na Allah ara, an Sanherib birye mapmaminya bukuka baminye talak babye, tuba tonap bukuka dikdik sepminye talak babye, na kele. Tonda, ance bai baminye talak babye, an aik tamubuka yanuminye talak babye, na kele. Anda winiminye ning nirya ap, pil dominye ning nirya ap ara, na kele. Dipkoprop na Akunum kel bikikununa anya arye, ance nati weik tonun dereniminye ning babye, na kele.

Bilangan 27:17

Ati ance wibuka deipminba, anye birye minopce menekuka balibuk, sik Israel ninye eibikirye, el bilye bisikuk aminyan binamake. Aning atonun, el tamubuka yangaliba, sik eibikirye el amu tam kibuka tamubuka yanamake. Ara, el balye tam ara, sik nirya melibuka abisikuk dobolbanamake. Winipra banamlanye ‘Wipdeipnusilam’ tenen, moropkine na nio. Atonye kum wibuka deipminba, aninye ara, ance batakminba, domba basam wein nang kum ati, sik domba talye urdemuk unyakce, ‘Dan binuyab do?’ tenen, talye-talye ayanapna, obinapna winilamak touk, Israel ninye babye wininamake.” Musa birye Allah ati, nyabuka morobuk.

Yohanes 7:12

Sik ninye weik arye amutuku bulupmek noutamak, sik nirya arye Yesus ati weik arye murmurulanmek. Ton nang arye, “Yesus ara, teleb ululnye,” nyanmek bukni, yuk nang arye ara, “Kume, Yesus ara tenepce arye nyasiliba, el yupu kekenyak ninye mankau arye tilila ning ati dib tenenyake,” nyanmek.

Yohanes 7:47

Nyabikba, sik Farisi nang arye yu ubukba, tamubuka nyabik. “Elce tenebuka yupu deice nyapmoba, anggunce tilila ning ati akunum diba tenepmalumce nyapsulum do?

Roma 2:1

Ura yata nang do nirya, sikce yuk nang ati, “Anggun malye winilulum ning ara, ani-ani,” nyabuka, lyep-lyep abuka wenelulum ninye nirya ara, Allah arye anggun babye teleb ninye anya arye, ‘Dawaplye’ tenen, kum namin kipnamsile. Sikce yuk nang ati, “Anggunda malye ululum ninye,” nyabuka yupu bongoliluluma deice arye, anggun bidamang arye anggun bidamang ati, yupu lepsisikuka bokeipdanmalume. Deiyok ara, anggunce yuk nang ati, “Malye winipmalum ning ara atia,” nyamunye bukni, amalye winin ning ara, anggun babye atonun kibuka winiluluma anya arye, anggun bidamang ati wenebuka yupu lepsisikuka bongolilalulume.

Ulangan 28:6

Tonda, Allah elce yamubuka arepsilyeura, anggunce anggun aik batakuka bai bana do? Yuk mutuku bana do? Teleb kibuka arisilyeba, telebuk unamlume. Aning atouk, yuk mutuku daulamunya ani, aminyan talak, anggun asik tamubuka yanamlum talak ara, teleb kibuka kaliksilyeba, telebuk unamlume. Danaka do nirya, anggun unamlumak ap, banamlumak ap ara, Allah aryuk melipsilyeura, telebuk unamlume.