Aminyan talak ara, Allah arye, Abram wimabukba, lengdar deice arye, ayupu nyabukba kekebuk. Allah el si Yahweh arye nyapdeibukba, Abram kekebuk yupu ara, ani. “Abramo, an ilil una pia meme. Nara anti, weik deiyoknye ununa anya arye, pia kalikuka dinamkine. An bona pia weik talinanye ulalam ning ara, bona kume, ara natia. An menenga atonun dopropnalam ning ara, na uka.” Allah arye, Abram biti nyabuk.
2 Samuel 22:3 - Eipomek3 Na ni Allah, na ilil unilye talak nirya ara, keil deiya wekuka, dungnunye touk, ikin unilye talak nirya ara, ancuk melibuka lelildongonilyama anya arye, an aminyan tam dungnubuka banune. Yin talin nang arye, ‘Mal oldan talak ara, mal dobikceura, biklyak’ tenen, kelapye lilibuka winilamak touk, ance melibuka kalikinilyame. Na melina ati, kelapye atonun lelinilyame. Na lyena deiyoknye bira, an uka. Na ni Allah, anda keil bukamlye mutuku dup amu tam dungnul banun atonun, an mikip deice arye lelilamnilame. Pia yu nang arye, ‘Anye bira opnuyap,’ tenebikirye, mal wiyanganinyak bukni, na ni koprop ance lyenilyame. အခန်းကိုကြည့်ပါ။ |
2 Samuel 22:3
52 ပူးပေါင်းရင်းမြစ်များ
Tonda, Allah an tenelyam bisik ara, pia teleb bisikuka. Ance ninye ati, ‘Wininamlyame, abisikuk banalyame,’ nyasilyam ning ara, teleb bisikuka. Malye ning tonok babye kum ulule. Tonda, an Yahweh arye, nyasilyam yupu ara, pia dipkoprob uka. Malye ning tonok babye, kum ulule. Tonda, yin talin nang arye, ‘Mal dobikiba, biksilyak’ tenen, kelapye dobuka, lelildongolamak tonun, ninye nirya ikin uplye talak nirya ara, ‘Allah elcuk melibuka kalikinamsil’ tenen, antibuk dib tenebibya deice arye, ance teleb ubuka melisilyame. Winisiminba, malye ning, nun dam ton kum yanuka, kum winipsutue.
Yuk mutuku nang arye, nati tapu koulamak touk, ikin ning na deice deipnik bukni, ancuk na ikin ulamsak lobuka lyepropnulume. Tonda, nara oldan nang noutamak ulamse tam, sikce nati, opmanto winilamnikba, ance lyepropnulume. Na ni Allah, ance mikip ning arepnulumba, na mal olan nang nirya obuka, sirya daksiba, ance na dobuka, sik deice tam deipnulume. Aning atonun, ance melibuka lelipdongopnulum arye, nati, ‘Optibye,’ tenelamnikce, dobolbalamnik nang nirya ati ara, ance wenebuka oplumba, sikce ton kum opnik.
Allah ance, ‘Anye bira Raja unamle’ tenen, wibuka ereiyamnulumnye biti, meliamnuluma deice arye, na mal olan nang nirya, opnin balamsa ani, Israel ninye yala nirya ati, sik ninye deiyoknye Raja una ati, tuba tamubuka ereipnulume. Tonda Allah ance, ‘Anye bira, Raja Israel unamle’ tenen, bico tenebuka wiamnulumnye bira, na Daud biti, batakana pia kum aryuk, tuba nati, teleb ubuka melinilyame. Tonda, na ap, na mapu silip ap, dadeipdanin banamak ninye nirya ap ati, batakana pia kum aryuk, bico tenebuka winisiminba, telebuk pia unamake. Ayupu nirya ara, Raja Daud birye, mot sebuka, Allah el si ati erenmokce, nyabuk.
Allah arye, Israel ninye ati, bico tenebuka meliamuknye bira, nati nyapnuke. Ara, mutuku yangan keil lelilamsil touk, Allah arye Israel ninye ati, pia melibuka kaliklamuk. Elce nyapdeipnuke. “Yatanye do, Allah ati, ilil ulya deice arye, ninye talina deiyoknye kina ati, malye winina kum aryuk, pia diksukum ulamlirye, Raja ululnye bira winilule.
Ance sik anang ati, kanye imun weik ning, sik nong deice deipnalama ati, winipmanto ara, uku kalum pia buppu weik ulamle ning ara, im deice arye sakturye, sik kisok deice pouptopura, ‘Aning ara, telebe,’ tenepne. Winipmanto ning ton, ance anang tomobuka, weik tuku pum noutam dopkwetepmince, siknip dongopminyopura, tonap atuku pum tam arye, weleyanman kumto unamake. Aning babye, teleb tenepmana ati, aning ara moropkine na nio.
Na ni Allah, na kanye talima pia kum upnilyeba, pia mitang unulul talak ara, na kele. Ancuk, na ikin unilyeba, unun talak ap, aminyan winipnamsil ning nirya ara, an akunum bikamlume. Bukni, nati ara, ‘Anye bira, nun lik ati, tomobuka opnuyab,’ teneninyak nang arye, na banun bisik noutam ara, ninye on ning, akunum kintinibikce deibik.
Weik mutuku bulamle keil, deiya dam duknuptibye do, tonda, weik cang keil aik pum tam wektibyeba, sik yu nang arye, kum opsiting touk, narye Allah el dam binyopura, Allah arye, nati, pia melibuka kalikinulule. Tonda, na pia mikip kilinulula ati, na mal olan nang arye olyanganinyak talak ara, Allah arye, na lyelona deiyoknye unulule. Cang keil aik, el si ara benteng, pum tam wektiniba, yu nang arye, kum opnitinga atonun, unulule. Yin talin nang ara, ‘Sik yuk nang arye, mal dobikiba, opsikcak’ tenen, sik nong lelin ning, el si ara perisai, talilamaka atonun, Allah arye nati melibuka kalikinulule. ‘Yu nang arye, na dam yanuka opnikcak’ tenen, Allah el damuk binuka unune. Tonda, Allah el mikip deice arye, sik yuk mutuku nang, yuk-yuk nang nirya ara, na amu tam deipnilyopura, narye sik anang nirya ara, mikip unirye, talinune.
Ara, urdem ati kume. Na kanye imun ning upnile talak nirya ara, ‘Allah arye nati, kalikuka melinamnile’ tenen, unune. Ara, ikin ning nirya, na dam yanamle talak nirya ara, Allah arye melibuka lelipdongopniliba, el amu tam unamne. Allah arye melibuka lelipdongopnilirye, na bobuka, mutuku deice delilbinamnile.
Nun ni Allah Yahweh ara, elce nati, tuba-tuba mikip kilinulule. Winipmanto ara, yin talin nang arye, yuk nang ati, ‘Sikce mal bobikirye opsicak’ tenen, sik nong lelilongona ati, kat ning, el si ara perisai, talibuka balamak touk, Allah arye nati, kalikinulule. Allah ati ara, ‘Dip,’ tenepnirye, na kanye talima nirya, el deiceuk delinune. Allah ati, mikip arye diba tenenuna ati, melinilya deice arye, na kanye talima noutam ara, pia kanye deibuka, mot nyana deice, kil-kil asa arye unune. Narye na ni Allah ati, “Naio, anda pia teleb ulyame,” nyanune.
Na ni Allah, anda nati, ‘Ikin ning doplyak’ tenen, melibuka lyenilyame. Ance nati, ‘Kanye imun ning, el deice uplyak’ tenen, na dam umince lyenilyame. Ance na opmanto talak nirya, melibuka lyenilyama ati ara, yuk ninye eibikirye, na dana-dana tam yakirye, antibuk, pia kanye deibikirye, “Se, Allah arye, nun kwit lyelolula ati ara, aning ara pia telebe,” nyabuka, kanye lon mot nyanyake. Anti si erekinyake. (Sela)
Allah Yahweh arye, ninye tukwak ninye nirya ati nyasulule. Anggunce, ngalukuka malye yupu nyamunye ning nirya ara, tunim aplulume. Nara, Allah Yahweh ununa ati, na siuk kel kipnululume. Yata ninye do, mutuku-mutuku nirya, daunyak ninye nirya arye, na siuk kel biknumunce, na siuk erenamnulume. Tonda, mutuku-mutuku nirya ululum ninye arye, na siuk erebuka, si erenamnululume.
Tukwak mutuku-mutuku nirya unyak ninye arye, mal olanmakirye, weik lelim nyapliba, ngaluklamak touk, winibuka ngalukunyake. Ton tam ninye arye, yuk tam ninye ati, obuka sirya dakikiba, kum danalule. Allah arye tenepsilye sum, akunum kiplyopura, el yupu weik arye nyapliba, tukwak mutuku nirya, atu atonun ubuka kum danamle.
Bukni, yata nang do nirya, sikce, ‘Kume, Allah el damuk ubibiba, elcuk melibuka kalikinamsile’ tenen, an dam tuba unyak nang ara, ‘Ance melipminya deice arye, kanye deibuka unamak’ tenen, moropkine. An damuk unyak nang ara, ‘Sikda pia, kanye lon mot nyabikirye, pia teleb kanye deibuka unamak’ tenen, moropkine. Allah an damuk unyak nang ara, ance, ‘Pia melibuka kaliknalam’ tenen, moropkine. Winibuka melipsiminyopura, yata nang do, anti kanye deibikirye, an damuk unyak nang arye, an Allah ati, ‘Se, nun ni Allah bira, pia telebuk ulule,’ tenebikirye, an siuk tuba-tuba erepkikirye, anti, kil-kil kanye bobuka unamake.
‘Na ni Allah, narye anti, “Melipnilyame,” nyabuka, moropkine ning ara, an dam arye kum morokunune. Pia yukak arye morokunune. Wininuna anya arye, ance na moropnukin ning, kum kekepniminyopura, ‘Yata deiyok ati, kum kekenulul do?’ tenen, teniltonauk unirye, malye kanye bonune. Na kanye talima mitang unulule. Tonda, Allah ance na bobuka, yuk mutuku binuka deipniminba, pia darabuka unamne. Ara, abinuka unamne mutuku ara, ‘Weik arye erebuka, bukuk mutuku pia teleb sukumuk binuka, dobuka deipnamnilame’ tenen, moropkine.
Na nio, na kam ulamse talak nirya arye, ikin kanye bobuka, ulamse talak nirya ara, ancuk melilamnulumba, nara bikilina atonunye winilamseba, yuk nang arye, aning elilamika deice arye bikamik. Ara sikce, ‘E, dipkoprob Allah arye, anye bira, pia melibuka kalikilula ati, nun babye Allah ati, diba teneptibye’ tenen, akunum biklamik. Sikce aning bikamika deiyok ara, ani. Ara, na ikin ulamse talak nirya ara, an mikip deice arye, pia melibuka lyelolamnuluma arye, an dam, telebuk unune.
Yuk nang arye, sik talye kankan ninye ati, ikin ning sik nong deice deibikirye, “Adiparyuk, pil talye dopsululume,” nyabuka, yu yupu deice arye, arukunyakbuk, imun kanye bobuka, unyak ninye nirya ara, el ninye deiyok kibuka, unamlenye birye, amutuku nirya talinamle talak ara, sik aninye nirya ati, lyeproplirye, kanam asa kilinamle. Winipliba, sik unamaka ara, telebuk unamake. Talye kankan ninye nirya ati, weik arye bico tenelula ati, nyapne.
Teleb weik ning ara, tonok sum Allah an si eren aik dam yanuka eipkitinyeura, telebe teneptinye. Bukni, yupa weik seribu sum ara, talye yukak daunmatinye babye, telebe kume. Tonda, na ara, an si eren aik bublan dam kalikna pil doptinye babye, pia telebe. Bukni, malye wininyak nang, sik teleb aik binuka uptinye babye, aning telebe kume.
Na ni Allah Yahweh anda, aning-aning nirya talimince, im deice yin talin malaikat nirya, sik weik deiyoknye ulyame. Ati, ‘Narye anti moropkin yupu ara, kekepnamnilam’ tenen, moropkine. Tonda, ‘Yakop birye deibukba, dadeipdanin, yangalamik nang ati, Allah ance kalikuka melilalumnye kekepnilyam’ tenen, moropkine. Akunum tenen ati, teleb nyapne.
Se, na ni Allah, pia mandipna kanye bonyak nang arye, yu ubukba, ‘Anye opnuyap’ tenen, na dam akunum olyanganinyake. Ara, ninye weik arye, sik pia ilil tenena kum aryuk, ‘Anye olbinuyabe,’ nyabuka, sik yu nang nirya arye, bulubuka na dam akunum olyanganinyake. Tonda, anang ara, ‘E, anye oplobipyeura, Allah arye nun wenena ati, yata wiripnamsil do?’ pia kum tenenyake. Talya lukparabuka, olyanganinyake.
Allah arye, na tahkta deice buknirye, aning-aning nirya talepnirye, ‘Aning ara, wininamlume, aning ara, pia kum wininamlume,’ akunum nyapdeipsise touk ubuka, tukwak mutuku unyak nang, mutuku sirya, im sirya nirya ara, pia diksukumuk yupu lipsisikuka bokolinamsine. Atonun, tukwak nang, mutuku sirya, im sirya nirya ara, nunce winilamap touk ubuka, yupu lipsisikuka bokeipsilirye, wenepnamsile. Ati, ton tam nang ati, ‘E, sikda na kayapu’ tenen, kum bataknamle. Tukwak nang nirya ara, bita lakak arye lipsisikuka yupu bokolisulule.
Allah el si Yahweh, elda mikip weiknye anya arye, na kanye talima el deice uk delinune. Elce Mesir mutuku noutamak arye nun dobuka lyepmasil ati, narye Allah el si erebuka kisal donune. Nun ni Allah ulula ati, kanye deibuka mot nyabuka si erenamne. Elda nun ni Allah el uka ulula ati, el si erenyabe. Elda nun apu yapu ati kalikuka pia meliamuka anya arye, elti, kisal dobuka el si erenyabe.
Ninye arye, ‘Yuk mutuku ninye ati yanuka opsicak’ tenen, weik cang keil aik dolamikak, pum tam dungnubuka wekelbalamak touk, Allah Yahweh elda, mikip weiknye ulula anya arye, elce elti, dib tenenyak ninye, pia melibuka kalikinamle. Yata ninye do nirya, sik malye unyak ning nirya batakikirye, ‘Allah el yupu nyasilye touk, aninguk talibuka diksukumuk unamabe’ tenen, teleb ubuka unyak ninye arye, Allah el damuk yanganamake. Allah el damak akunum yacopura, Allah arye sikti, pia melibuka kalikinamle.
Allah ance nyalisilyam yupu nirya ara, pia dipkoprob uk ulule. Tonok yupu babye, tilila yupu ton kum ulule. Yata mutuku ninye do nirya, anggunce, ‘Allah aryuk melibuka kalikinamsile. Nun mal olan nang arye opsicak’ tenen, nun melina ati, Allah aryuk aninye ati, obuka bisipnamle. Ati ara, ninye mutuku-mutuku nirya, Allah an damuk, bulubuka wekelyanganyake.
Dipkoprob, Allah elda nun Lyena Deiyoknye ulule. Nunce el tibuk, diba tenenamabe. Nunda, ilil kum unamsil bukni, wini talak ara, ‘Allah elcuk, nunti melibuka lyedopnamsilʼ tenen, diba tenenamabe. Aning ara, talye ati kum bukni, deiyok ara, nun ni koproba Allah, el si Yahweh, elce nun mikip kilisulule. Ati ara, mot sena deice nunda el siuk erenamabe. Tonda, “Nun Lyena Deiyoknye bira, Allah eluk ulule,” nyabuka, Allah el si erenamlulume.
Sik adeiyok nang arye, yuk ninye nirya ati, teleb kibuka melilana uk unamak anya arye, winipmanto ning ara nyapnusine. Ara, pia mikip weik kumanya yaliba, lelimboka tam tikilbalamak touk, wininamake. Tonda, mok cena kum yini mutuku noutamak arye mek pu dobuka batuba, ninye nirya arye kanye deipting touk, wininamake. Tonda, yini mutuku noutamak ara, yo pia kum anya arye, keting tin weik upliba, weik keil deiyok keting koa bulbalamak touk wininamake. Ara, sik diksukum unamak deiyok nang arye, yuk talye ninye nirya teleb kibuka melinamaka ati nyapsine.
Anggun talye ning si erelulum ninye ara, yupu talipmunce, dotalak wininamle ning laka nyapnamnulume. Tonda anggunce anggun bidamang ati asipdanamlume. Ara, ‘Dotalak winipnamle ning ati, min yuma talak yatanye birye nyapdeiamsuk do? Minop talak arye yatanye birye nyapdeiamsuk do?’ nyabuka asipdanamlume. Ayupu ara, na Allah Yahweh arye, nyapdeiamsise. Diksukum koprop telebuk ulirye, ninye lyelula deiyoknye bira, yuknye ton kum ulule, na Allah tonok unune.”
Allah arye nyabukba, nabi Yeremia birye, tamubuka nyabuk. Na ni Allah Yahweh, anda erebuka ulyamce, mikip kilinilyame. Na kanye imun unilye talak ara, na ni anda, na mikip kelinilyamnye ulyame. Tonda, imun kanye bobuka, unun talak do, ikin ning yanuka unilye talak do, na mal olan nang arye opmanto uninyak talak do nirya ara, ancuk melibuka kalikinilyame. An damuk yanuka dungnubuka uniba, yuk nang arye kum opnitinge. Telebuk wininune. Tukwak mutuku im sirya, mutuku sirya, unyak nang nirya ara, ‘Elcuk melibuka lyepdopnamsilʼ tenen, an damuk yanganamake. Mutuku sirya, im sirya nirya unyak nang, an dam yakirye, nyanamake. “Nun apu yapu arye talibuka, si erelamik ning ara, nong kum ning, talye ninguk talibuka si erelamik. Tilila yupu uk, diba tenebuka taleamikce, dipkoprob nong kum upnamle ning, ninye kum melipmanto ninguk talibuka winilamik,” nyanamake.
“Aning-aning kum wininamlume,” nyapmasina deiyok ara, nyapnusine. Ara, nara aning-aning nirya talibuka, pia deice tam ununye, nara Allah Yahweh, im deice yin talin malaikat nirya, sik weik deiyoknye unune. Anggun Israel nang nirya arye, natibuk, “Nun ni koproba,” nyabuka, na si ereninyaka ati, naryuk anggun nirya ati, nyapsine. Dipkoprop, amutuku unmalam talak aryuk, anggun asing aryuk eipnamlume. Kanye deibuka, yupu sisikilyam ning ap, pin-pin kanye bomlum ning ap, tonda kil don kwalina dibikirye, karye on ning ap, sal arye kilapu dopnamice nang ap, sikce dopnamice kilapu ap, anang arye, kanye deibuka pin-pin kanye bobikirye, kanye lon mot nyanamak ning ara, na Allah arye aning nirya, kum kipdeipnamne.
Allah arye nun apu kopropa Abraham ati, “Winipnamne,” nyapra deiamukura, el yupu nyabuka laka nyalamik nang, nabi nang arye, sekeiyamsik touk, Allah el pil dolamuknye Daud arye deibuka, dadeipdanin, yangalamica ani, deipnamlanye bira, nun lyena ati, Lyena Deiyoknye weik mikipnye akunum erepdeipmasile.
Winiplyopura, Allah arye el mapu ati, “Sikce Isa Mutuku Dongonye ati, ‘Nun ni koproba, mikipnye,’ nyabuka, si erelamlum ning ara, wini talak danak unyak do? ‘Ninye opsikcak’ tenen, mutuku yangan keil donga, ninye duknulamak touk, anggunce talye ning ati, ‘Melipnamsiyak,’ tenelamlum bukni, wini talak ara, aning dan do?” nyabuka asipdenamle.
Nun ni Allah, yuk-yuk kum ulule. Elda keil pala yangalamla atonunuk ulule. Weik keil pia aulye touk, Allah babye, pia aulule. El tenena ap, el winilye ning ap ara, yuk-yuk kum ulule. El pil dolye ning ara, pia telebuk winilule. Tonda, el winilul ning nirya ara, dipkoprob kibuka diksukumuk winilule. Allah el pil dolul ning ara, ‘Ton tam nang, teleb kipnirye, ton tam ara, namin kipnamne,’ kum tenelirye, el nyalul touk, nirya pil dolule. Malye ning tonok babye, ton kum winiptue. El winilul ning nirya ara, yamubuka diksukumuk winilule. Ninye winilamak touk, elce teleb kibuka, yupu diksukumuk bokolisulule. Ati ara, el si erenyabe.
Ati ara, anggun Israel ninye ara, anggunda pia telebuk unamlume. Allah arye, pia teleb kipdeipnamsile. Allah el si Yahweh arye, anggun Israel ninye ati, lyepdeipsukce, wiamsuk bukni, yuk mutuku unyak ninye ati, aning atonun, sikti, ton kum wipdeiamuk. Allah arye, anggunti melisulule. Yin talin nang arye, ‘Mal arye opsicak’ tenen, ting kiniklamik touk, Allah arye anggunti, moubuka kalikisulule. Ninye arye, pia teleb parang ya bobikirye, kalikilalamak touk, Allah arye anggunti, kalikuka melipsilirye, anggun mal olan nang ati, obuka sirya daknamle. Winilula ati, el melipsilyopura, anggun mal olan nang dam bimunyopura, anang arye, ilil weik upliba, kanulongonamake. Winibikirye, ‘Se, nun ona kume, bico tenepsululume,’ nyabuka moropnamake. Anang nirya obuka, sirya dakmunce, sik nong deice yaniptapnamlume. Tonda, sik Isa Mutuku Dongonye, el si erena ati, mutuku deice delilamak ning nirya ara, daklopmunye deice, yanibuka banamlume.
Ura Hana bira, Allah ati morobukce, nyabuk. Allah Yahweh elcuk, na kanye pia teleb kipdeipmanilba, na talima pum tam kanye deipmane. Apil elce dopmanila deice arye, na kanye malye ulamnuk ning ara, teleb kipdeipmanile. Adeice arye, na kanye deipnarye, na tenepmana ara, ani. Na kanye ara, ‘Allah Yahweh elce, mikip kipdeipmanil,’ tenepmane. Adeice arye, yu teneninyak nang ati, malye nyapnamne. Na mal olan nang ati, na si bambol deice arye, malye nyapnirye, ‘Na lik,’ tenepne. Deiyok ara, na akunum bikmane. Dipkoprop Allah arye nati, akunum melipmanile.
Tonda, Allah Yahweh el lek koprop, pia teleb ulye touk, yuk nang ton atonun, pia kum unyake! Aning ara, Allah elcuk, nati melin ning ara, pia tuba arenulule. Ninye arye, ‘Nun mal olan nang arye opsikcakʼ tenen, weik mutuku bulamle keil dam, keil deia pum, binuka duknunyak touk, Allah elcuk erebuka deice tam ulirye, el mikip deice arye kalikisiliba, el amu tamuk unyabe.
ကြော်ငြာတွေ