2 Samuel 20:19 - Eipomek19 Nunda, weik asik aruma, Abel mutuku noutam daunyab nang nirya ara, yuk mutuku nang ati, olana ap, yu tenena ap, kum aryuk, namin arye mangkau asa, pia teleb kanye bobuka unyabe. Ara, Israel mutuku noutam ara, yuk asik weik daunyak bukni, nunda namin kanye uk bobuka unyabe. Ati ara na nio, anda yata ning deiyok ati, ‘Amutuku nirya ara, obukapnirye, malye kibuka, sice bukuka, kum kibuka deipnaman,’ tenenmalam do? Tonda, Allah Yahweh elce, ‘Amutuku ara, na ning koproba ati, pia talipnamne,’ tenelirye, talisulul mutuku tuku noutam nirya ati, na ni yata deiyok ati, ance, ‘Amutuku nirya obuka, malye kiploptinye,’ tenenmasilam do?” nyabuk. အခန်းကိုကြည့်ပါ။ |
2 Samuel 20:19
29 ပူးပေါင်းရင်းမြစ်များ
Ara, ‘Narye na Raja deiyoknye dam binirnye, el kekenak binuka nyapyopura, kekepnamnil caʼ tenen, yanuka nyapmakine. Tonda, elce na yupu kekepnilirye, yuknye birye, na mi tonok kam ulul mi, opmanto unulul ning ara, ‘Na deiyoknye Raja arye, lyepdopnamnilʼ tenen, yanuka nyapmakine na nio. ‘Sik aninye arye, na mi tonok obikceura, aminyan talak ara, na tam nang nirya, amutuku noutam arye kum danamake. Ati ara, na mi ap, na ap ara, nun Israel nang ati, Allah arye arepsuk tuku arye, obuka yaknamsiake,’ tenenune.
Narye, yuk yupu nyapsiba, aninguk wininamaka anya arye, anggunce ninye dopdeipmunyeba, anang ara, minopce Raja Daud dam laka nyalbinamake. Raja Daud biti nyapnamlume. ‘Naio, ninye kum unyak mutuku, pata mutuku noutamak ara, ninye arye mek koubuka, balamakak kum mapnamalume. Aning kum bukni, adiparyuk amek koubuka, otam bikbik abuka banamalume. Aning kum winipmunyopura, Absalom tam yin talen nang arye, an dam yakirye, an ap, an neika unyak yin talin nang ap nirya, obikirye sirya daknamake.’ Ayupu nyapnamlyame,” nyabuk.
Nyabukura, akil arye tamubuka nyabuk. “Minop talak ara, amutuku dana-dana tam ulamik nang nirya arye nyalamik. Ara, ninye nirya arye, ‘Yata wiriptinye do?’ tenenyak talak ara, ‘Weik tonun kel nang arye, weik kel yupu ton nyapnitingʼ tenen, patapsilyeura, Abel mutuku binuka, asilenamlulume. Winipmunyeura, amutuku nang arye, teleb kel yupu nyanamsiake,” nyalamik. Wilamik deice arye, sik yupu lipsisikuka bolilamik.
Aning ati ara, sik amutuku nang yayikopura, Raja Daud birye, sik Gibeon mutuku ulamik nang ati, asipdeyuk. “Raja Saul arye, anggun Gibeon nang ati, malye ulamsik ning pununa ati ara, yata ning winipsitinye do? Na kanye ara, anggun dam Raja Saul arye, malye uamuk ning ara, aning kilibuka kum kipdeipnirye, teleb kibuka deiptinyeura, anggun kanye teleb upsilya deice arye, Allah arye el ‘Naʼ tenen nang, nun Israel yala nang amutuku noutam unamabak ara, Allah arye melisilyeba, telebuk kipdeipnamsile. ‘Winipsutuʼ tenen ati, narye yata ning winipsitinyeba, teleb kanye deipsutum do?” nyabuka asipdeyuk.
Aning ara, talye ati kum moropkine. Deiyok ara, tukwak mutuku noutam nirya ara, ninye pia weik aulamik bukni, ance anang, Israel nang ati, ‘Israel nang, na ninye koprop unamak tenen wiamlumce neika unamabe,’ tenyamlumce aninye wipdeiamsulume. Ance, ‘Na mapu’ tenen, wiamsulumce, Musa dam nyapdeiamlumba, elce nyapdeiamsuk atonun, ‘Israel ninye na ninye koprop unmake,’ nyapdeiamsulume. Ayupu nyapdeamsulum talak ara, nun yok punun nang Mesir mutuku arye, boyanamlum talak arye nyapsulume. Se na ni Allah, an si Yahweh ulyame. Anda aning-aning deice tam talibuka Erenena Weik Deiyoknye umince, an tenyamlum touk ulyame. Ati ara, narye moropkine.” Salomo birye nyabuka morobuk.
Ara, talye ati kum bukni, ance Israel yala nang nirya ara, teleb kipdeipminba, sikce pil dobuka, wininamak ning nirya ara, sikce teleb ning weik tonun dolonamak ning ap, pia telebuk wininamak talak ara, ‘Narye ton eiptinye’ tenen, moropkine na nio! Tonda, ance wibuka teleb kipdeiamlum Israel nang arye, kanye deibuka, kil-kil asa unamak nang ara, ‘Na ton eiptinirye, sik teleb wininamaka ati, na babye kanye deiptinye’ tenen, moropkine. Ara, an ‘Naʼ tenen nang, pia talipminba, sik Israel nang teleb wininamak nang ara, na ton eipnyopura, telebuk kanye deibuka, kil-kil asa unamne.
Yata mutuku unyak ninye do nirya, ninye mutuku-mutuku nirya arye, “Nun ni Allah ara, Yahweh ulule. Elcuk talisiliba, nunda el amu tam unamabe,” nyabuka, unyak ninye nirya ara, Allah arye melilamliba, sikda kanye deibuka telebuk wininamake. Tonda, Allah arye, ‘Sikda ‘Naʼ tenen, ninye unamake’ tenen, wibuka delilul ninye ara, el mapu koproba unyaka ati ara, melipliba sikda telebuk wininamake.
Daud bira, yim domba basam ap, kil domba basam ap, sikce deiamik domba mapu ap, kalekuka weilamuk bukni, Allah arye Daud biti, ‘Na tenen nang, Israel yala nang nirya talibuka, weik ninye deiyoknye Raja unamle tenen, Daud wibuka erepdeibuk. Allah arye, ‘Yakub deiamukba, sikce dadeipdanin yangalamik nang, sik Israel yala nang nirya ara, ‘Naʼ tenen nang pia unamak’ tenen, akunum weiamuka ati, ‘Daud birye, anang nirya taliplirye, sik weik ninye deiyoknye Raja unamle’ tenen, Daud wibuka erepdeibuk. Winipmanto ara, domba basam weina deiyok nang arye, sik domba basam melibuka kaliklamak touk, Daud babye, sik Israel yala nang nirya ati, melibuka kalikinamle,’ tenebuka ati, Daud wibukce, erepdeibuk.
Aminyan talak ara, Yerusalem mutuku noutam nirya unyak nang arye nyanamake. “Se, sik Babel mutuku nang arye, nunti, adiparyuk malye kibuka, sice buklopmasiake. Tonda, Babel mutuku talibuka, ninye deiyoknye Raja Babel birye, obuka, sirya dakmasile. Winipmanto ara, weik laut pum tam ikan arye, mitik ikan obuka diplirye, sirya daklamle touk, nun Yerusalem mutuku ninye nirya, akunum obuka sirya dakmasile. Nun mutuku noutam teleb uamuk ning nirya, alubuka doprobukce, kum kipdeipmasile. Winipmanto ning ton, weik yu kam arye, pia weik ning arye, mitik kam ning obuka dilamle touk, Yerusalem mutuku nirya ara, kunum dipmasile. El mun pum tam arye, amutuku noutam teleb ning nirya ara, dopropnamle bukni, elce, ‘Na like, teneple ning ara, dukuka batakmasile.”
Ati na Allah aryuk, sik Babel mutuku noutam ara, isa el si Bel, si erenyaka ati wenepnamne. Ati, sikce isa Bel el si erelamikce, yuk mutuku ninye talilamik ning nirya, alubuka dopromik ning nirya ara, tamubuka, sikce aning dobuka, yuk mutuku ninye ati, tuba tonap arenamake. Aning winipniba, sik mutuku sirya, im sirya nirya unyak nang arye, ‘Isa Bahal el si erepnamabʼ tenen, Babel mutuku yangalamik touk, tuba tonap kum yanganamake. Bel isa ati, batakicak arye, el si pia kum erenamake. Ati, sik Babel mutuku nang arye domik weik cang keil poka nirya ara, narye dakuka, sice buklopnamne. Nara, Allah arye, ayupu akunum nyapdeipne.
Anggun Israel nang, anggun olan ninye, yuk mutuku nang nirya arye, anggun asok deice dipdesikirye, ‘Aning ara, pia malyeuk unyake,’ tenepsikirye, yu tenesinyake. Sik anang arye anggunti, si dirik-dirik apsikirye, nalibuka akutubuka nyasinyake. “Amutuku asik dobuka ulamikak ara, akunum obuka, kum kipdeibupu! ‘Asum ara, min yatuba, winiptibyeʼ tenen, pia dinauk ulamupu. Wini talak ara, anyaik malye uplyeba, adinauk ulamupu sum ara, asum akunum upleba, eibabe. Ati kanye deibabe,” nyanyake.
Tonda, Allah arye, aning-aning nirya talilirye, pia mikip weiknye ulule. Elce, nun apu koproba Yakub, elce deibukba, dadeipdanin yangalamika ani, deibikba, Yehuda tam ulamik nang, amutuku noutam ulamik nang, sik aik dolamik ning ara, bico kum tenebukce, yu ubukura, sik aik tonok babye, ton kum batakuk. Sik aik nirya ulubuka, sice buklobuk. Ara, Allah el yu pia weik ubukura, uapsuka deice arye, amutuku asik dolamuburye ulamupak nirya ara, ulubuka bataksuke. Winipmanto ara, ninye arye, ‘Yu nang ati, malye kipsicak’ tenen, sik asik dana-dana tam, cang keil poka dobuka dolamik bukni, yin talin nang arye, aning nirya ulubuka bataklamaka touk, nunda teleb ulamupu bukni, Allah arye tonok aik babye, ton kum batakuk. Anirya ulubuka batakuk. Allah elce Yehuda yala ninye ati, ninye deiyok nang kibuka ulamik Raja nang ap, sik amu tam yuk-yuk pil ati, deiyok kibuka ulamik nang ap ati, nun amutuku nang nirya ati ara, ‘anggun malye,’ tenepsukce, amu kipdeipsuk.
Allah arye, aning-aning nirya talilirye, pia mikip weiknye ulule. Elda nun mal olan nang atonun kibuka, akunum wenebuka ikin ning weik aresulule. Elce nun amutuku noutam unyap ninye nirya, nun Israel ninye ara, yanuka oplopmasile. Allah elce nun talisilye nang, deiyok nang, sik Raja nang ara, sik pia teleb ubuka dolamikce ulamik aik, anyaik si ara, istana nirya ap, nun weik asik dobuka unyabak ap, amutuku unyap nang kalikna ati, weik pala keil dobuka, cang keil poka domikce, ‘Yu nang arye yanuka opsikcak’ tenen, kalinyakak ap nirya ara, dakuka bataksuke. Allah elce nun Yehuda mutuku unyap nang deice ara, weik kanye imun ning ara, pia weik kipdeipmasile. Winipmasila ati ara, nun Yehuda tam noutam unyap kilapu ap, nun sal ap nirya ara, ikin kanye bobuka, enganauk unmabe.
Tuku likdebiyukba, sik anang ap, sik mapu nirya ap, atikmek touk adiparyuk, tuku pum bisik wekikba, atuku arye tamubuka sinipdongobuk. Ara, Korah el tam kipmek ninye nirya ap, el mapu nirya ap, el aik neika ulamik ninye nirya ap, tonda sik talilamik ning nirya ara, tuku pum bisik wekikba, kum dayuk.
Winipdika ati, Allah arye yu weik ubuk ati, el mikip ara, tuku deice deibukba, talye karin arye, tuku cobuka likukopura, sik anang bitinye ap, Kora el tam nang ap nirya ara, tuku pum tam wekdobikba, tuku siknipdongobuka deice arye, sik nirya dibik. Ton yuk nang ara, atam aryuk, ninye yupa ara, 250 nang ton, Allah arye, ‘Anang wenebuka opnune,’ tenebukce, uku dopkwetebukba, uku arye anang nirya dibuka, sirya dakuk. Awinibuk ning ara, sik Israel nang ton, ‘Aning ebikca deice arye, aning tuba tenenamakʼ tenen, anang obuka deice arye, Allah el mikip ning lake kibuk.
Anirya ara, nun dib tenenyap ninye ati nyapsine. Tukwak unyap talak ara, dipna ap, lyuna ap, ulul nong kipman unyap bukni, aminyan talak ara, Allah arye dipna ap, lyuna ap, upmanto kum ning arisilyopura, pia teleb kam upnamle ning dopropnamabe. Aning winipnamsil talak ara, dipmanto ning nirya, kum dipmanto ning, kam pia upnamle ning akunum doprobibyopura, atalak ara, sik minop talak Allah yupu noutam sekamik yupu ara, nong upnamle. Allah yupu noutamak aminyan talak ara, laka danamuk ning ati, sekamik ning ara, ani. ‘Allah arye, dipna deiyok ning ara, akunum kum daneipnamle. Allah arye, dipna deiyok ning nirya ara, akunum bisibuka sirya dakmale.’ (Yesaya 25:8)
Anyapmasin yupu ara, deiyok ani. Ara, tukwak mutuku unyap talak nirya ara, tia nonguk ubirye, ‘Se, ikin usulul’ tenen, malye nyabuka engenyabe. Ara, ‘Nun tukwak nong kum dasutuba, talye demuk ulamtibye’ tenena kum bukni, ‘Nun nong tia talak ati upsuk ning kum uptu ura, im deice nong dobuka, anong dongobuka ongopdeipsutue. Winipsilyopura, nun tukwak nong bol dibibyopura, kum dalirye, pia kam unamap deice arye, im deice nong dobuka pia kam utibye,’ tenena ati nyapsine. Tonda, ‘Dipna deiyok ning kum datopura, pia kam uninguk aunamle’ tenen, patana ati nyapsine.
Yata mutuku do nirya, anggun olan ninye unyak mutuku dam bimunyopura, ‘Amutuku noutamak unyak ninye opnamap’ tenen, warikil binamlum talak ara, anggun minopce, amutuku ninye ati, nyapnamlulume. “Kume, nun kanye ara, ‘Anggunda, nun amu tam ulamun buk, nunce pil dipsibiba, nun pil talye dopmunyopura, nun ap, anggun ap, talye kanye deibuka, neika teleb kibuka unamtibye,’ tenenyap bukni, “Anggunda, yata tenepmalum do?” nyabuka, asipdenamlulume. Nyapmunba, amutuku ninye arye, ‘Se, nun ap neika una ara, pia kum unamabe,’ tenebuka, malye kanye bobikirye, anggunti bublan kum kukeipsicopura, parapkabuka onauk winipnamlulume.
Mambul ning ara, weik ninye deiyok nang, Sisin nang ap, ninye deice tam unyak nang yala-yala nirya ap ati, Allah moronamlulume. Ara, talye ati kume. Ara, nun nirya arye ninye deiyok nang ati, Allah morobibyopura, anang Allah arye anang ati meliplye deice arye, teleb wininamsiyake. Ara, ‘Talye kanye deibuka, nimalye arye teleb ubuka neiktoto una ap, Allah diksukum ulye touk, nun babye, diksukum una ap, kanye malye una kum aryuk, etekdop utibye’ tenen, Allah moronamlume.
Atalak noutamak ara, Israel ninye nirya minop talak mangkau kanye bobuka, sik aik domik noutam teleb kibuka ulamik touk, pia kum ulamik. Amutuku-amutuku ulamik nang nirya ara, ilil weik ulamukba, sik mutuku koproba batakuka yuk mutuku duknulbinamikce, amutuku ninye nirya ara, ilil weik asa ulamik. Mangkau kanye bobuka kum balamik. Winilamika ani, malye kanye bobuka ulamikba, tonok kil el si Debora tikamuk talak ara, ‘Israel ninye melibuka lyepnamne’ tenen, Israel nang tamubuka mikip kepreipsuke.”
‘Ninye deiyoknye, Raja unamle’ tenen, Samuel birye Saul biti, wipdeibuk. Tonda, atalak sik Israel ninye ulamik touk, Samuel birye, zaitun yo duk, mek teleb cang makau arye, libuka deiamika dobukabukce, Saul kisok deice dikeibukce, Saul biti, taruk talibukce, ‘Telebe, akunum teleb kipdeipkine,’ nyabukce, amutuku nang ulamik touk, Saul mutubuk. Samuel winibukce nyabuk. “Allah el si Yahweh arye, Israel ninye, sik ninye deiyoknye kina ati, akunum wipdeiamkuke. Ance Israel ninye ati, sik ninye deiyoknye, Raja kipmince, talipnamlyame. Aning ati ara, aminyak mek an kisok deice dikeipmakina ara, Allah arye bikilina ati, narye an kisok deice dikeipmakine,” nyabuk.
Ati ara, na an amu tam pil donanye birye, nyapmakin yupu ara, kekepnunilyame. Ara, winipmanto ara, na an pil donanye biti, Allah Yahweh arye, “Anye bira opnamlyame,” nyapdeipmakilba, bobanmaniminya ani, ance na opniminyopura, Allah el kanye deipnamakile. Bukni, ‘Ance kum opnamanilamʼ tenen, Allah ati teleb ning areptinyopura, Allah arye, kanye deipnuturye, “Dawinipmalye, anye bira, kum opnamlyame,” nyabuka, luba kipnutu do? Bukni, winipmanto ara, na deiyoknye, Allah arye kum bukni, talye ninye aryuk tenibuka, nyapmakiyak deice arye, ‘Anye opnune,’ tenepminyopura, Allah arye, sik anang ati ara, supnamle. Deiyok ara, sik aninye unyaka deice arye, na an pil donunye bira, Allah el dam arye yakniliba, Allah arye kalikilul nang, Israel ninye kan-kan ton, kum uptinye. Ati, ‘Yata wiripnuna kumaʼ tenen, sik yuk mutuku ninye dam tikilbisirye, amutuku nang arye, talye ning isa mer siuk, erebuka unyak touk, ‘Sik ap, unyap talak ara, na babye isa si erepnyakʼ tenen, nyapkine.
ကြော်ငြာတွေ