Winibuk talak ara, Yehuda yala ninye nirya arye, Raja Daud biti, weik kanye deibik. Sikda ninye bin tonoknye atonun, elti, kanye deibikce, el tam kiprobik. Ara, sikce el Daud biti, ‘Nun Raja ninye deiyoknye unamsile,’ tenebikce, kanye deibikce, elti, yupu nyapdeibik. Sikce nyabik, “Raja Daud an ap, an yin talin nang nirya ap, nun mutuku tamubuka yanamlume. Nun ninye deiyoknye, Raja unamsilame,” nyabuka, yupu nyapdeibik.
2 Samuel 19:43 - Eipomek43 Nyabikba, sik Israel yala nang arye, tamubuka Yehuda yala nang ati, nyabik. “Winipmanto ara, elda Raja ninye deiyoknye kina ati, nunda yupa tagu barye (10) kipna arye, ‘Elda nun tamnye,’ nyanyabe. Tonda, nunce elti, ‘Nun yalanye koprop ulule,’ weik arye nyaptibye. Anggunda, mitik anun aryuk, ayupu nyaptume. Dipkoprop elda, nun yala nang koprop ulule. Ati ara, anggun Yehuda yala nang ara, yata ati malye yupu nyabuka, nun deice deipmasulum do? Yata ati anggunda, nunti, ‘Sikda, talye nang uka,’ teneplumce, malye kanye bobuka, disululum do? Luba kildongona kume. Nunda, minopce deiyok koubuka, morolamupa ani, Raja Daud tuba tamubuka boyayik. Anggunda, aminyan talakuk, nyaplume!” Israel yala nang arye, nyanmek bukni, sik Yehuda yala nang, sik yupu nyana ara, mikip weik nang anya arye, yu yupu weik arye nyanmekba, sik Israel nang arye, Yehuda yala nang, sik yupu kum yanipmanto ubik. အခန်းကိုကြည့်ပါ။ |
2 Samuel 19:43
23 ပူးပေါင်းရင်းမြစ်များ
Aning akunum winibukopura, Israel yala nang, ilil ubukba, sik asik yuk-yuk tamubuka, bikbik abuka biyik. Bulubuka yanganmekce, Israel nang, ayala-yala nirya arye, ayupu nyanmek. “Raja Daud birye, nun oldan nang nirya ati, lyepdomsuk. Tonda nun oldan nang, Pilistin yala nang ati obisibukba, anang arye, kum taleamsike. Bukni, wini talak ara, Daud el mi Absalom biti, ilil ubukba, amutuku batakuka, bai tam sakuka biyuk ani, aminyan talak ara, el mi Absalom akunum obik.
Gilgal mutuku noutam ara, pia malye winibuka, malye weik ulamuknye tonok ulamuk. Anye bira, el si Seba. Elda, ninye si Bikri, elce deiamuknye ulamuk. Sikda Benyamin yala nang ulamdik. Raja Daud, el bulubuka kina yangana ati, atalak noutam ara, Seba arye, ‘Israel nang, na yupu kekepnamakʼ tenen, lelim nyan ning, el si terompet deice arye, lelim nyan ati, pubukce yukubuka nyamuk. Wininmokce, ayupu nyabuk. “Ara nun ap, Raja Daud ap, tonok yupu kum nyalanyake. Yata ati el ap tonok ansiniptinye do? Se, sik Israel yala nang nirya, nunda atalak aryuk Daud batakuka, na mutuku tamubuka bindopnuyabe! Nun baju bola arye, dolina tenda aik deibupakuk, tamubuka bina unamabe,” nyabuk.
Unubukopura, ninye deiyoknye Raja Daud birye, Abisai biti nyabuk. “Wini talak ara, Absalom bira, mitik ikin arye winipsitu bukni, anye Seba biti ara, weik malye kipduipsute. Ati, nunce elti, pia mounamabe. Aning ati ara, Abisai ance, na yin talin nang weika arye bobuka, bimunce, anye Seba biti dobolbilyame. Minpola arye, anye min tomopminyeura, Seba el adiparyuk, bikbik abuka, weik cang keil arye, poka dobik mutuku noutam wekmalyebuk, anggunce el dam kum bitibye. Bikbik abuka bai ati, minpola elti, tomobilulume,” nyabuk.
Israel ninye nirya arye dipdeyikce, ninye deiyoknye Rehabeam birye Israel nang sik yupu kekepmanto kum ubukopura, sikce adeiyoknye biti nyabik. “Rehabeam el yala nang ara, Daud yala nang uka. Ati ara, nunda yata ning winiptibya deice arye Daud el yala nang ap, teleb ubuka neika uptibye do? Nunda yata wiribuka winiptibya deice arye Isai el mi Daud, el yala nang ap, neika uptibye do? Sikce deibikba, dadeipdanin yangalamik nang nirya ara, nun ap, neika kum unamabe. Ati ara, nun yuk Israel ninye, aning-aning nirya ara bindopnamabe! Rehabeam bira el yuk daunamle. El ap, el yala nang ap, ara Daud birye deibukba, dadeipdanin yangalamik yala nang nirya ara, sik bidamnye arye, sik tam nang ati kalikuka melilanamake. Nun yuk diamuk unamabe.” Nyabikopura, sik Israel ninye bukni, yuk anang-anang nirya arye, sik asik koproba tamubuka bindobikce, Daud el yala nanguk abatakdongobik.
Kanye talima erena ap, kwalina ap, una deice arye, ninye nirya pia walana ap, olana ap, diamuk unyake. Bukni, yata ninye do nirya, yuk pia kel bikamikce nang arye, sikti, “Teleb una ara ani, malye una ara ani,” nyabuka lipsisikuka nyan yupu nyabikiba, moubuka kekebice ninye ara, sik babye pia weik kel nang unamake. ‘Aning ara teleb, aning ara malye’ tenen, kel bikinamake.
Ninye ton yu tenebuka malye yupu arye, yupu nyabuka walace talak ara, sik yupu tamubuka nyapnumunyopura, nimalye aryuk nyapnin bamunce, teleb yupu uk tenebuka nyanamlulume. El ti tamubuka nyapnumunyopura, derelana deice arye, pia kum nyanamlulume. Talima nimalye arye, tamubuka nyapmunyeura, yu unmalinye babye, teleb kanye bonamle. Bukni, dereldanmace talak arye, tuba yu yupu uk tamubuka nyaldamunyopura, atonun yu yupu nyapdanin bamunba, aninguk weik kipnin banamsile. Ara, minopce deiyok koubuka yu nyanmalinye ap, tabakuka nyanmalinye ap, yuk nang nirya babye kekenmamunce, melibuka dereldana uk unamlume. ‘Winipsilyak’ tenen, ninye dereldan talak ara, kanye talima namin asa aryuk, teleb yupu nyanamlulume.
Winipmanto ara, mek bisik wakibikirye, kukdeibikiba, mek mikip arye balamle atonun, ninye arye kabul deiyok koubuka, derelana unamak talak ara, adiparyuk, adeiyok ning ati, “Dauplye,” nyabuka batakaldongonamlulume. Opdanmanto unyak ninye ati, lyelina telebe. Kumopura, ninye arye derepdakirye, ayu yupu uk tuba nyapdanin, bakibuk weik upnin balyopura, sikce nyaldanamal ning ap, oldanamak ning ap ara, min kum kum daneipnamsile. Ati, yu upliba, deiyok koubice talak aryuk, lyelina telebe. Yu yupu tuba nyaldana kume. “Dauplye,” nyabuka, batakaldongonamlulume.
Na kayapu nango, dipkoprob yupu nyapsine. Tonok mutuku ninye arye, yuk mutuku unyak ninye ati, ‘Omutuku ninye olbinamabe,’ teniptinge bukni, ormutuku ninye arye minop talak weik cang keil poka akunum antanabuka wiamik ning auplyopura, aning ara mitik ikin weik upnamsile. Deiyok ara, amutuku noutamak talye lukparabuka kum wekelbinmanto atia. Bukni, ikin weik ning nyapnusine. Ninye sik bitinye ara, sik nang susuk urudak bukni, tonoknye birye, el weit ati, ikin ning weik el nong deice deipliba, el du birye, pia malye kanye bopliba, derepdaricopura, aning ara ikin pia weik unamle. Ara, sik nang susuk koproba urudaka ati nyapne. Sikce yu teneldalamdak ning ara, minopce lipsisikuka bokeipmanto kume. Winipmanto ara, ninye arye weik kota mutuku aik weik dolamtingce, kat ning besi dobuka, anyaik antanap dongobuka weik cang poka ikicopura, pia ikin deice aryuk weknamlume. ‘Akota kanam aryuk wekelbinamtibye’ tenena kume. Aning atonun, sik du weit unyak ninye, yu upliba derelana weik akunum winiplinye bira, minopce ayupu lipsisikuka bokeipmunce, teleb ubuka kum delinamlume.
Yuk talye ning ati, ‘Nun Ni kopropa’ tenen, Isa Mutuku Dongonye si ap, isa mer si erena ap, yuk nang ati derena ap, yu upliba, yuk nang ati, ‘Nun pia like,’ tenena ap, kanye yuk-yuk tenekirye, yu kilana ap, ‘Na ka winilye ning ara, na babye winiptinye’ tenena ap, yu weik upliba yupu weik arye walana ap, ‘Nauk weiknye ereipnitingura, weiknye uptinye’ tenen, patana ap, deiyok nang arye, “Wininamabe,” nyabikce yupu yanibuka, “Aning ara kume. Nun yuk unamabe,” nyabuka una ap, talima wililanyakce, ‘Sik yuk, nun yuk’ tenen, yuk-yuk una ap,
Yata winin ning do nirya, ‘Nauk ereipnitinge,’ tenena ap, kwalina ap, maknye kintinilina ap, deice arye, pil kum donamlume. Aning ara, pia kum bukni, anggun adiparyuk talima namin kibuka, amu tam umunce, anggunce yuk ninye nirya ati, ‘Kume na kwit eluk ereiptinge. Nara, mitik mambul bukni, eluk ara weik mambule’ tenen, tenelanamlulume. ‘Weiknye bira na uka,’ tenena kume.
Efraim mutuku nang arye Gideon biti nyabik. “Oketeng tamun noutamak, anda Midian tam nang olbinamalum talak ara, yata ati nun ton kum nyapmasulum do? Winyamsuluma ara, yata deiyok ati, malye winipsulum do? Nunce anti malye kanye bopmabe,” nyabuka, Gideon dam nyalbiyikce, elti, malye-malye yupu weik nyanmik.
Keting tamun winilye akunum ubukopura, Allah arye pia malye isa dopdeibukba, Abimelek el kanye talima ap, Sikem mutuku ninye, sik kanye talima ap, wekukabukce talibukba, sik nirya pia malye kanye bobuka ulamikce, sik nirya malyeuk winilalamik. Winilamikce, sik Sikem mutuku ninye arye, Abimelek biti, malye ning weik winilamik.
ကြော်ငြာတွေ