Minop talak ara anggunce, ‘Yusup oplopnamabe’ tenen, dipkoprob malye kipdeipnulum bukni, atalak ara Allah el kanye ara, ‘Kume, winibuka dawinibice bukni, aminyan talak anye Yusup, el pil dolamnilya deice arye, dipmanto ninye weik lyepnamle,’ tenyamnuke. Ati elce kel biksukba, malye kipnulum ning ara, teleb uka. Wini talak apil donyap deice arye Allah min arye tenyamsuk ning ara akunum lakak upmalaba, kel bikape.
2 Samuel 16:10 - Eipomek10 Nyabuk bukni, Raja Daud birye Abisai biti nyabuk. “Kume, Zeruya el mapu ululum nang ara, anggun yata ning deiyok ati ayupu nyanmalum do? anggun tenepmalum ning ara, aning atonun na pia kum tenenune. Anye bira Simei birye nati malye yupu nyapmanil ning ara, auplule. Nun walwale, Allah el si Yahweh arye elti, ‘Daud wenepnaman ati, ance malye yupu nyapdeipnulyame,’ nyapmoa arye, anye bira malye nyamanil do, kum do? Allah arye aning atonun nyaplyopura, yatanye birye elti, ‘Yata deiyok ati malye yupu nyanmalam do,’ nyabuka yupu sektu do? Anyapnil ning ara, Allah arye do, kum do? Nun walwal anya arye, dayanmalya uka,” Daud birye nyabuk. အခန်းကိုကြည့်ပါ။ |
2 Samuel 16:10
21 ပူးပေါင်းရင်းမြစ်များ
Abisai birye, ayupu nyabuk bukni, Daud birye tamubuka Zeruya el mapu Abisai ap, Yoab ap ati nyabuk. “Ayupu nyapmanilam touk, winilyam ning ara, na tenenye touk, pia kum tenelyame. Ati ara, na ap, anggun ap, ansinibuka neika una kume. Anggunda, na oldan nang atonun akunum unamlume. Aning ara, yata ati do? Arup ara, yata deiyok ati, Israel yala nang ton opnamtibye do? Kume, asum ara, na kele. Na kanye ara, Israel yala ninye nirya ati ara, sik ninye deiyoknye Raja akunum upne. Tonda Raja pia unamna ati, ninye tonok babye, kum opnuyabe,” nyabuk.
Tonda nyabuk. “Se, nara ninye deiyoknye kina ati, Allah arye wipdeipnuk bukni, wini talak ara, na mikip pia mitang upmanile. Tonda, wini talak ara, Zeruya el mapu ara, yu weik ubuka ati, yu arye telebnye oplobik. Nara, sikti, yata wiriptinye do, kume. Aning ati, yupu kum sekmatinye. Kum malye kiptinye. Ati, aning ara, Allah Yahweh elcuk, wenen ning sikti, areptue. Ara, sik malye unyak ning atibuk dekuka, amalye ning atouk ati, weik ikin deilin ning ara, arepnamle,” Daud birye nyabuk
Winibukopura, ayouwak kil arye Elia biti nyabuk, “Anda Allah el pil dolyamnye binya arye, ance nati yata tenepmanilamce, malye kipmanilam do? Tonda ance na malye unye ning ati, ‘Tuba tonap, moubuka tenepnutue’ tenen, na dam yanmalam do? Tonda, na mi ona ati, yanmalam do? Yata deiyok ati yanmalamba na mi dipmanil do?” nyabuka malye yupu nyanmok.
Nyabukce, ayupu ton nyabuk. “Zeruya el mi Yoab birye, nati malye winipnuk ning ara, Salomo an akunum bikamlume. Ara anye birye, Israel sik yin talena deiyok nang bitinye, ninye si Nera, el mi Abnar ap, tonda Yeter el mi Amasa ati, winibuk ning ara, an kele. Ara ninye oldan talak kume. Talye kanye bobuka, ulamupu talak noutam bukni, ninye oldan talak atonun Yoab birye, abitinye nang oplobuk. Obukura, sik ining biyuka ara, el deiatinga deice poubuk. Tonda, sik ining el sendal deice sakuka poubuk.
“Aninguk ton kume. Tonda, anggunce nunti, ‘Kume sik Asyur mutuku nang ap, anggun weik deiyoknye ap arye, nun Yeduda tam unyap nang ap, weik asik Yerusalem noutam unyap nang ap ati, olyanganmasuluma ara, sik kanye aryuk unyake,’ tenesulum do? Aning ara, kume nyapsine. Allah el si Yahweh arye, Asyur mutuku deiyoknye biti, ‘Israel ninye olbilyame,’ kum nyapdeiptopura, elcuk mangkau arye, anggunti olyasutu do? Kume, Allah el si Yahweh arye, el bidamnye arye, nun deiyoknye ati nyabuke. ‘Yehuda tam unyak ninye ap, weik asik Yerusalem unyak ninye ap ati, olbilyame,’ nyapdeibuka deice arye, yanuka olyasiyabe. Nun kanye deice aryuk kume. Allah arye, ‘Telebe,’ kum tenelul ning unyap do? Kume. Allah arye, nun deiyoknye nyapdeibukba, anggun mutuku ninye nirya ara, obuka kum kipdeipnamapce.” Ayupu nirya ara, Asyur mutuku weik deiyoknye, el yin talin nang, sik deiyoknye birye, sik Yehuda tam nang, ninye si ton, Elyakim ap, Sebna ap, Yoah ap, ati nyabuk.
Tonda, nun ninye tukwak nang arye talinyap ning do, talye daupmalye ning do, Allah arye, ‘Na dopropnune,’ teneplyopura, nunce Allah ati, “Aning ara, dolona kume,” nyabuka, yupu sektibye do? Pia yupu kum sektibye. Tonda, nun ninye arye, mania kanye bobuka, Allah ati, “Anda yata deiyok ati, apil donalam do? Ance awininalam ning ara, yata deiyok ati winipmalam do?” nyabuka, kum asiptibye.
Aning ara, talye ati kum nyapsine. Deiyok ara, ninye deiyoknye Raja arye, “Winipnamne,” nyalul yupu nirya ara mikip weik ulule. ‘Winipnamne,’ teneplyopura, adiparyuk aninguk wininamle. Ati, yatanye birye, ninye deiyoknye Raja ati, weneplirye, “Anda yata wiripmalam do,” nyabuka, elce nyalul yupu kekena kumce, mania kanye bobuka, yupu sekting do? Kume, aning kum winiptibye.
Allah ara, elce aning-aning nirya talilirye, pia mikip weik deiyoknye ulule. Ati ara, winipmanto, Allah elce, ‘Aning ton winiptue,’ kum tenelam toura, dipkoprob yata ninye aryuk, aning-aning ton ulamtibye do? Kume, Allah arye, ‘Aning winipnamle,’ kum tenelye ning nirya ara, ninye arye dipkoprob kum winiptinge.
“Ninye tukwak mutuku unyap ninye nirya ara, weik konop nang ton, kum unyabe. Kume, an mikip atonun nang ton, kume. Allah ancuk, an pil don nang, malaikat taliplum ning babye, tonda ninye tukwak mutuku nirya taliplum ning babye, an tenelyam touk ulyame. Ati ara, yatanye birye ton, an mikip yanipkutu do? Tonda yatanye birye, wenena atonun an winipminya ati, ‘An yata deiyok ati winipmalam do?’ nyabuka, asipdekutu do? Pia kume.” Nebukadnesar birye nyabuk.
Peterus ap, Yesus ap, yukak binmarikce, Peterus arye yupu sekukopura, Yesus arye tamubuka, Peterus ati nyabuk. “Peterus anda yukak bilyame. Na kum dinukine. Allah arye tenyamnuk touk, akunum nyapdeiamnukba, ‘Wininamne,’ tenepse ning, ance yukupmanilama anya arye, winira Isa Mutuku Dongonye atonun wininmanilame. Allah arye patapliba, tenelul ning kum bukni, talya nang arye pataplyeba tenelamak touk, tenepmalamce ayupu nyapmanilame,” Yesus arye Peterus ati nyabuk.
Aning asipdenutum bukni, anggunti tamubuka nyapsine. “Kume, anggunda talye tukwak ninye ululuma anya arye, Allah ati yata wiribuka, asipdetumce, elti, wenena yupu nyaptum do?” Nabi Yesaya birye sekeiamuk touk, ayupu dobuka, anggunti nyapsine. Elce sekuk yupu ara ani. ‘Allah arye kwepdeibukba, talye aulul ning aning-aning nirya arye, aning-aning nirya kwepdeiamuka deiyoknye Allah ati, “Anda yata ati, na unye touk kwepdeiamnulm do?” nyabuka, weneptu do? Kume, aning ara kum winipmantoe.’ (Yesaya 29:16)
Sik malye nang arye, Yesus ati malye-malye yupu nyabuka, el nong deice deipmik bukni, elce ton sikti, tamubuka kum nyabuk. Ikin ubukura, donmok talak ara, anang ati kwang dakna yupu ton kum nyabuk. Kwang dakna yupu nyana kum aniryuk, elce el bidamnye nonguk Allah ati aribuk. Allah ara, dipkoprop teleb ubuka diksukum yupu uk bokolilulnye.
Ati ara, na an amu tam pil donanye birye, nyapmakin yupu ara, kekepnunilyame. Ara, winipmanto ara, na an pil donanye biti, Allah Yahweh arye, “Anye bira opnamlyame,” nyapdeipmakilba, bobanmaniminya ani, ance na opniminyopura, Allah el kanye deipnamakile. Bukni, ‘Ance kum opnamanilamʼ tenen, Allah ati teleb ning areptinyopura, Allah arye, kanye deipnuturye, “Dawinipmalye, anye bira, kum opnamlyame,” nyabuka, luba kipnutu do? Bukni, winipmanto ara, na deiyoknye, Allah arye kum bukni, talye ninye aryuk tenibuka, nyapmakiyak deice arye, ‘Anye opnune,’ tenepminyopura, Allah arye, sik anang ati ara, supnamle. Deiyok ara, sik aninye unyaka deice arye, na an pil donunye bira, Allah el dam arye yakniliba, Allah arye kalikilul nang, Israel ninye kan-kan ton, kum uptinye. Ati, ‘Yata wiripnuna kumaʼ tenen, sik yuk mutuku ninye dam tikilbisirye, amutuku nang arye, talye ning isa mer siuk, erebuka unyak touk, ‘Sik ap, unyap talak ara, na babye isa si erepnyakʼ tenen, nyapkine.
ကြော်ငြာတွေ