2 Samuel 12:16 - Eipomek

¹⁶ Daud el mi uk deiyok koubukura, ‘Allah moropneba, na mi kam buknule,’ tenibukce, din dina kum, lukunyan nirya, man aik wekuka, amsuna deice anyuk, makmokba berekuk.

2 Samuel 12:16 ပူးပေါင်းရင်းမြစ်များ

2 Samuel 12:15

Akunum nyabukopura, Natan tamubuka, el mutuku koprop biyuk. Daud el yin talinanye Uria, el kil youwak dakmokce, deipmok mi, Allah arye tenebuka uk, weik arebukba, uk pia weik dinmok.

2 Samuel 12:22

Nyabikura, Daud arye tamubuka nyabuk. “Diba ami kam tuba unmok talak ara, din dina kumce, si tebuka engenmasirye, mapmase. Ara, ‘Allah kekepnilirye, bico tenebuka, Allah el si Yahweh arye, na mi kam bukeipnamale,’ tenepmasirye winipse,” nyabuk.

2 Samuel 13:31

Nyabikura, atalak ara, ninye deiyoknye Raja Daud, adiparyuk tikukabukce, el mining ongopmok baju kwiribukce, wiliklobuk. Ara, ‘Se, na mapu nirya dipmakeʼ tenen, bico ubuk ati, mambul kanye bobuk. Winibukopura, Raja Daud adiparyuk, tuku deice mabukce, engebuk. Ninye deiyoknye Raja Daud, el amu tam nang nirya ara, sikce aning eibikce, sik babye, sik nong deice ongopmek baju nirya, kwiribuka wiliknauk ubikce, engebik.

1 Raja-Raja 21:27

Ura, Elia birye, Raja Ahab biti, Allah arye nyapdeipmok yupu laka nyanmok talak ara, anang nirya kekenmekbuk, Elia birye akunum nyapdeibukopura, Ahab kekebukce el baju ongopmok ning kwiribuka batakukce, pia malye baju dobuka, el nong deice kalupdayuk. Winibuka deiyok ara, ‘Na akunum malye upse,’ tenen, ilil kanye bobuka lak kibuk. Winibukce, malye kanye bobuka, din dina kumce, din bulung uk unmok. Tonda asum arye deiyok koubuka, bisik banmok talak babye ara, malye baju aryuk ongopdongobuka, ‘Nara dipkoprob pia malye ulamsinye’ tenen, ilil unmokba, bouku sukubukba unmok.

Nehemia 1:4

Na kwit capu arye ayupu nyapnikba, kekepse ning ara, aning atibuk tenipsirye, tukwak bukuka engepse. Malye kanye bobuka engepsa ara, like tonok talak arye kume. Ara, asum-asum nirya din dina kumce, ikin kanye bobuka engelamsirye, im deice ulirye aning-aning nirya talilul Allah ati, mikip arye moropsirye nyapse.

Ester 4:16

Ance adiparyuk, ayupu bobuka nyalbiminyeba, Yahudi yala ninye nirya kota Susan mutuku noutamak unyak ninye nirya bulubuka wekikirye, nati Allah moronamniyake. Wininamniaka ati, like winilye sum noutamak nirya ara, din ning ap, mek ap ton pia kum dinamlulume. Aning nirya si tebuka natibuk, Allah moronamnulume. Ara, lukunyan noutamak ap, keting duk-duk noutamak ap nirya din pia kum dibikirye, Allah moronauk unamake. Tonda na ap, na melin ati, neika pil dobuka unyak wel kilapu ap, nun nirya babye din si tebuka, Allah uk pia moronauk unamabe. Morolamibye ani, like winilye akunum ubibyopura, nara ninye deiyoknye Raja Ahasyweros dam binamne. Binamna babye, ‘Raja arye kum yukupkilyopura, talye lukparabuka, el dam pia kum yanamlulume,’ nyabuka peraturan deibik yupu dipkoprob yanipnamne. Peraturan yupu yanipnyopura, adeiyok nang arye nati opnamniak do, kum do, nun walwale. Aning ati ara, na dipna babye, teleb uka. Dipkoprop, Raja Ahasyweros dam morolbinamne,” Ester birye nyabuk. Nyapdeibuk yupu ati, Ester birye tamubuka, “Mordekai biti ayupu nyalbinamlyame,” nyapdeibuk.

Mazmur 50:15

Tonda, na Allah arye nyapsine. “Ikin weik upsilye talak ara, anggunce nati, ‘Naio melibuka lyepropsilyame!’ nyabuka, moropnumunyeura, dipkoprob narye yanuka, lyepropnamsine. Akunum lyepsiminyeura, anggunce na si erebuka kina ati, “Nun ni Allah, pia teleb ulule,” nyabuka, yuk nang kekenak, lakak arye nyanamlume.

Mazmur 69:10

Uteneninyak bukni, narye Allah an si eren aik ati, ‘Weik mambule,’ tenenuna ati ara, pia mambul kanye bobuka unune. Yuk nang arye, Allah anti, malye yupu nyabuka nalikinyake. Winibuka, na ni koproba Allah, anti nalikinyaka touk, sik aninye nirya arye, na babye nalibuka, wana ap nalibuka, akutuna ap, nyaninyake.

Yesaya 22:12

Allah Yahweh, aning-aning nirya talibuka, deice tam erebuka, mikip weik ulul nye, elce im deice yin talin malaikat nirya talilule. Atalak ara, Allah arye anggunti nyapsuke. Ara, “Engepnulume, weik arye ngalukmunce, engepnamlume. Tonda, engepnamluma ati, anggun kisok potong koplulume! Koplopmunye ning ara, anggunce ikin kanye bopmunyakarye, malye baju el si karung koni ongopnamlume. “Aning nirya ara, ‘Se, nun babye malye ulamubuʼ tenen, bikilina ati aning winipnamlume,” Allah arye nyapdeipsuke.

Yesaya 26:16

Se nun ni Allah Yahweh, nunda ikin weik ulamupu talak ara, ‘Allah aryuk melipnamsilʼ tenen, anti morolamkupu. Ance nunti akunum wenyapsulumba, kanye imun ulamsuka ani, nunce, ‘Nun ni Allah antibuk, melipsilyame!’ nyabuka, morolamupu.

Daniel 6:18

Winibukopura, ninye deiyoknye, Raja Darius tamubuka, el aik koproba biyuk. Biyuk talak ara, din ning babye, tonok ton dina kume. Tonda, el pil don nang ati, “Arup ara, na kanye delina ati, bukmelibuka mot sebuka, ton kum wininamlume. Na dam babye, yangana meme,” nyabuk. Tonda, alukunyan ara, pia wi kum mapmokce, kam berenga uk dipmok.

Daniel 9:3

Aning nirya eipsa ati, narye Allah ati moropse. Allah Yahweh elda aning-aning nirya talibuka, deice tam weik eren ululnye birye, ‘Winipnamne,’ tenelye touk ulula ati ara, elti, moropse. Ara, ‘Allah bico teneplirye, bico upliba, nun Israel ninye ati lyepnamsil’ tenen, moropse. Amoronmase talak ara, ikin kanye bopmasa anya arye, malye kain baju ongopsirye, na din dina kumce, si tebuka unmasirye, Allah atibuk, “ ‘Aning ara, winipsilyak’ tenen, lyepsilyame,” nyabuka moronmasirye, ikin kanye bopmasa ati, uku sice deice bukmase.

Yunus 3:9

Winipnamap ning ara, nun walwal bukni, Allah arye, ‘Opnamne,’ nyapdeiamsuk ning ara, ‘El kanye tamupliba, el yu, nun nong deice deipnamsil do, kum do?’ tenenmabe. ‘Bico tenepsuturye, yu kanye weik bosilye ning ara, batakturye, lyepsetue’ tenen, nyanmabe. Namin kipsuturye, lyepsilyopura, nun kum dipnamabe,” nyabuk. Niniwe mutuku weik deiyoknye birye, ayupu nyabuka dopdeibukba, el taleamuk nang nirya kekebik.

Rasul 9:9

Bobiyikura, Saulus elda like winilye sum asing gunanye atonun unmokce, atalak nirya din ap, mek ap, kum dinmok.

Yosua 7:6

Ilil ati batakikura, Yosua ap, el kanye delin nang ap, sik Israel mutuku noutam talibuka ulamik ninye deiyok nang ap, sikda ikin kanye bobuka, “Se, yata winiptibye do?’ tenen, sik mining ongopmek baju, kwilik-kwilika batakik. Tonda, asum keting noutam arye diprongobuka, alukunyan nirya ara, sik ni koproba, Allah Yahweh ati moronmek. Ara, Yahweh elce, “Aning ara, wininamlume, aning ara, pia kum wininamlume,” nyapdeibukba, sekdeiamik marikna yo, el si ara, Allah arye nyapdeiamuk yupu marikna pum bisik deiamik ning dam, sik nong tuku deice mapmekce, kisok ara, tuku dipdongobuka moronmek. Tonda, sik anang kisok deice nirya, tuku butbuta dobuka, likilanmekce, engenmek. Ara, yuk nang nirya arye, ‘Sikda, ikin kanye weik bobuka unmake, tenepnamsiyakʼ tenen, tuku butbuta dobuka, sik kisok deice deibuka unmek.