Anyaik noutam ara, weik nang ton aunyak bukni, nara sik deice tam uk, weik sisinanye unune. Na deiyoknye Potipar birye, aning-aning nirya arenulule. Tonok ning babye, kum batakakulul bukni, anda elce dopkuk kil anya arye, elcuk talikulule. Narye kume. Pia telebuk wininulule ati, yatato deiyok ati, anyapmanilam ning, pia malye ning winiptinya deice arye, Allah el si yaniptinye do? Kume, Allah ati malye kum winipnamne,” nyabuk.
2 Samuel 12:13 - Eipomek13 Nyabukopura, Daud arye Natan biti nyabuk. “Se, dipkoprob na akunum malye winipse. Na ni koprop Allah, el si Yahweh ati, pia malye wininune,” nyabuk. Nyabukba, Natan birye tamubuka nyabuk. “Allah, el si Yahweh arye, an malye winipmom ning nirya, kum kipdeipmakile anya arye, wenepnamkil bukni, kum dipnalame,” nyabuk. အခန်းကိုကြည့်ပါ။ |
2 Samuel 12:13
46 ပူးပေါင်းရင်းမြစ်များ
Raja Daud birye nyapdeibukura, el yin nang arye, Israel yala nang ulamik mutuku noutam nirya ara, nuknulamikak, Israel yala nang nirya, akunum nukuka sirya dakikopura, tonok lukunyan noutam ara, Daud birye, ‘Se nara akunum malye winipmane. Yata deiyok ati, aning winipmase do?’ tenebukce, mambul kanye bobuk. Atenebuk ning ara, Raja Daud birye, Allah Yahweh ati nyabuk. “Se, na nio. Na winipman ning ara, dipkoprob malye winipmaseba, malye winipdase. Aning ati ara, ance na walwal arye, malye winipmase ning ati, biknilyame, na nie,” nyabuka morobuk.
Ninye deiyoknye Raja Daud birye, sik Israel yala nang nirya, ona ati yanganmok malaikat eibuk. Eibukopura, Raja Daud birye, Allah Yahweh ati nyabuk. “Se, na nio, na tonok aryuk, weik malye un ning winipse. Malye una deiyoknye bira, na uka. Na aryuk akunum weik malye winipse. Bukni na nio, sik amutuku unyak nang nirya ara, yata malye ning ton winilamik do? Ati ara na nio, na ap, na mapu silip ap, na ni birye deiamukba, dadeipdanin yangalamik nang nirya uk, ikin ning ara, nun nong deice uk deipnusilame,” nyabuka morobuk.
Anabi binuka ayupu nyabukba, Yorebeam kekebukce, tenebuk. ‘Kume, anye bira, pia malye yupu nyapmala deice arye, nun mesba akunum malye kipdeipmasileʼ tenen, anyaik dam tikmek nang ati nyabuk. “El anabinye bira, malye yupu yanuka nyanmala ati, tomoplulume,” nyabuka, taruk dumu pukukba, adiparyuk Yorebeam taruk ara, biti kibukba, tamuka dopropmanto kum ubuk.
Elia adiparyuk Ahab unmokak Nabot wa win dam bayuk bukni, Ahab minop arye eipmokce, nyabuk. “Anda na oldananye atonun tenekunune. Anda na like. Bukni, nati enmanilam ning ara, akunum eipmanilame,” nyabuk. Nyabuk bukni, Elia biryopura, “Dipkoprop enmakina ani akunum eipkine. Ance apia malye ning winiminyeba, Allah el si Yahweh arye, ‘Aning ara na like, aning ara pia malye,’ tenepmakile. Amalye ning winipmalam ning ati, Allah el si Yahweh arye, ‘Ahab dam bimince, narye el wenena ati winipnamne ning ara, lak nyalbinulyame,’ nyapdeipmakila ati, nyapkine,” nyabuk.
Nyabukura, Israel tam weiknye Ahab birye tamubuka nyabuk. “Tonoknye ton aupmale. Elce nun ni koproba Yahweh ati, asipdeturye nyapnamsutunye bira aunmale. Bukni, elce na dam ara, dipkoprob teleb winipnamkil ton, kum nyanulule. Elda malye yupu uk nyalinulule. Ati, anye ati ara yu unulule. Anabi el si ara, Mika aunmale. Anye bira na like. Ara, Yimal birye deibuknye aulule,” nyabuk. Ayupu nyabuka ati, Yosafat kekebukce, “Se na ka, aning atonun yupu nyana kume,” nyabuk.
Raja Ahasia birye nyabukopura, ilil tenena kumce, ‘Anye Elia tomopnunʼ tenen, yin talena deiyoknye tonok ap, el amu tam yin telin nang lima puluh (50) nang ton, wipdeibukba, binuka Elia dam biyik. Ilil tenena kumnye ap, el yin talen nang ap, Elia tonok mutuku deice binuka bukmokak biyikce, ayin talena deiyoknye birye, Elia eibuk. Eibukopura, nyabuk. “Se, anda Allah pil donanye, nabi ulyamnye bira, nun mutuku ninye deiyoknye, Raja Ahasia birye anti, ‘Wini talak aryuk, na yin talin nang ap bimunce, na dam akoulukuka yalule!” nyapdeipmakile,” nyabuk.
Wenebukce, ikin ning arebukopura, Raja Daud birye Allah ati morobukce nyabuk, “Se, na ni Allah, aninye nukmana deice arye, dipkoprob malye weik ning winipmane. Nara walwalnye binya arye, narye malye winipmane. Na ni, an dam malye winipmana ati, na wenena ati talye luparabuka opnutum bukni, na malye upmase ning ara, ance bataknutumce, aning ati namin kipnamnilam tenen, moropkine,” nyabuka morobuk.
Atalak ara, nabi Hanani elce nyabuk yupu ati, ninye deiyoknye, Raja Asa bira yu ubukce wabuk. Wabuka ati, anabi ara adiparyuk dobuka, wenen aik dongobuk. Atalak noutam babye, ninye deiyoknye Raja Asa birye, el talebuka ulamuk mutuku nang kan-kan, ton nang ati, ikin ning bobuka, sik anang deice deibukba, imun kanye weik bobuka ulamikce, ikin deice uk ulamik.
Nyabuka asipdeyukce, yupu tuba nyamuk talak noutam ara, Raja Amazia birye, adiparyuk anabi biti, “Se, ayupu nyaplam touk, tonap nyana meme! Kumopura, nunce anti opnukiyabe! Tonda nunce anti, ‘Raja yupu lipsisikilina deiyoknye unamleʼ tenen, anti kum wibuka deipkubu,” nyabukba, anabinye adiparyuk yupu weik tonun ton kum nyabuk. Bukni, min talak ara, anabi birye nyabuk, “Wini talak anda na akunum kel kipkine. Allah arye anti, ‘Kume anye bira, isa si erenmala ara, pia malye un ning akunum winipmala ati, narye el obuka, kum kibuka deipnamane,’ akunum tenepmale. Tonda, Allah arye na bobuka, an dam dopdeipmanilba, an dam yanuka nyanmakin yupu nirya, ance pia kum kekepmanilamce, batakmanila ati, ‘Allah arye anti dipkoprob oplopnamkilʼ tenen, akunum bikmakine,” nyabuk. Nyabuk bukni, Amazia bira, mandipna kanye bubukce, ayupu babye kum kekebuk.
Allah arye anye akunum ila tamubuka teleb kipdeiplyeura, anang nirya wekuka kekenmacak aryuk, el anye birye nyapnamle. “Narye teleb ning ara, malye kilamsirye, malye ning ara, ‘Aning telebe,’ nyabuka, talye yupu nyalamsirye, pia malye ulamse. Bukni, Allah elce nati kum wenebuka opnuke. Bico tenepnukce, na malye ulamse ning nirya ara, biknukce winipnuke,” nyabuka, laka nyanamle.
Tonda, keting panalyangan tam ara, atam bukni, otam keting wekelbalamle tam aulule. Anoutam mutuku ara, kiklibuka kum nuktipye. Aning atouk, Allah arye lyebuka kilisulul ning nirya ara, atouk ulule. Nun malye winipmabye ning ara, Allah arye dobuka delilbalule. Ara, Allah arye, “Aning ara, wininamlume. Aning ara, pia kum wininamlume,” nyapdeiamsuk yupu yanibibirye, malye winin ninguk, weik tonun talibuka unyap bukni, Allah arye, aning nirya lyebuka kilipsilirye, kum kilisulule. Nun malye ning ara, namin kipsilirye, lyepsilyopura, nun malye wininyap ning dobuka, pia pera sukum atouk delilula ati, aning babye, pia nukmanto kum ulule.
Diba na ni Allah, narye pia malye winipsa ati, na mal olan nang arye, na kwit Uria obikba dibuka ati, el ining ara, na deice unulule. Anye obika deiyoknye bira, nauk unune. Ati, ance nati lyelonamnilame. Lyepdopniminyopura, ance diksukum kibuka unyak ning atibuk, narye an si erena ati, “Na lyelonulul Allah ara, diksukumuk ulule,” nyabuka, mot nyana deice arye, an siuk erenamkine.
Winipmanto ning ara, ninye arye nininga uamlye baju, mek likikiba, pia teleb ulamle touk, na ni Allah, ance na malye winipse ning ton nirya ati, kilipnimince, kum kipdeipnamnilyame. Tonda, na kanye talima pum tam, malye tenepse ning ara, ance anirya kilipra wipdonoknimince, telebuk kipdeipnamnilame.
Na ni Allah, na malye winipse ning nirya ara, an dam malye winipsirye, antibuk yanipkise. Ance, ‘Aning ara, winina meme,’ nyapdeiamsulum bukni, amalye teneminye ninguk, narye talye luba kibuka winipse. Ati ara, ance nati, “Pia malye winiplume,” nyabuka, wenepnimince, opnutuma babye, anda pia diksukumuk ulyame. Na dipkoprob malye winipsa ati, narye yata yupu tamubuka nyapkitinye do? Kume, ance, “Aning ara, malye ning, aning ara teleb ning,” nyabuka, yupu lipsisikuka bokolina deiyoknye ulyame. Anda pia diksukumnye uminya ati, wenebuka opnetuma babye, anda dipkoprob ulyame, nyapkine.
Ninye deiyok nang arye nyanyak yupu kekepmantonye, mangkau arye malye uplyopura, weik kel nang arye, “Malye unmalam ning ara, ani. Teleb uk unamlam ning ara, ani,” nyabuka wenebicopura, ayupu kekepmantonye bira, kekeplirye teleb unamle. Winina ara, pia teleb uka. Aning atonun, weik kel nang arye, dekna weik ning emas dobuka, amul dongona ning memebicopura, urasin pia teleb ulule.
Yata ninye do nirya, ‘Nun malye ulamupu ning, yuk nang arye kel biksicak’ tenen, sik malye winilamice ning kum batakikirye, tuba malye winin ninguk dungnubuka ulamice ninye ara, aminyan talak teleb kum upnin banamake. Bukni yata ninye do nirya, sik malye ulamice ning nirya ati, ‘Na malye winipse ning ara ani,’ nyabuka, laka arye laka nyabikirye, amalye un ning bataklamaka ninye ara, Allah arye sik malye unyak ning ati, aninye adiparyuk wenebuka oplomtu bukni, bico teneplirye, sik malye unyak ning nirya kum kipdeiplirye, aninye ati melibuka teleb ulinamle.
Dipkoprop na akunum moubuka kel bikse. Ara, na talima uk dinilye ning ara, ance na teleb kinina ati arepnulume. Kanye imun uk dilamnukba, dipmanto uamse bukni, tuba ton ap teleb kibuka kwetepdeipnulumba, adiparyuk kum dipse. Deiyok ara, narye malye un ning weik tonun winilamsa ani, ance, aning nirya dobuka, an dong tam deiplume. Na nie, ance pia kanye imun ning dam arye, lyepdeipmanilamce, na malye winilamse ning kum kipdeipnulume.
Tonda, ‘Nun ni Allah kanye deipsitue,’ tenen, anggunce nati siltong teleb ning dekuka kum boyanganululume. Tonda, anggun malye un ning dekna ati, ‘Anggun weilulum ning obuka nong kalimna teleb ning boyanganamnululume,’ nyabuka anggun deice kum deipsiseba, aning na arena ati kum boyanganululume. Aning nirya ara na ton kum patanulule. Bukni, anggunce malye winiluluma deice arye, nati ikin ning delinululume. Tonda, angguncuk tenepmunce, malye winilulum ning nirya ara, na lik weik unulule. Allah arye nyabuk.
Ati anggun malye ululum ning nirya yamubuka dopropniba, dua balamle atonun upnamle. Tonda, kumanya mikip arye pubuka dopliba, dua yukak bobalamle touk, anggun malye winilulum ning nirya yukupdopnirye, kum kipdeipniba, anggun dam kum unamle. Anggun malye winilamlum noutam arye, dekuka lopdeipsisirye, lyepsisa ati, na dam tamubuka yanganamnulume.” Allah arye Israel ninye ati nyabuk.
Allah elce, nun dam tiya talak ati, kanye ikin ning aresilyeba, nunda ikin kanye bobuka unamap bukni, elce tenelu touk deipsilyeba, akunum winibibyeura, elcuk nunti tamubuka tenepsilirye, melibuka lyepnamsilarya. Ara, ‘Allah elce nunti, weik arye bico tenesilirye, anggunti winibuka melina teleb kilinamsile,’ tenebuka, nyalin yupu deice arye nyasilye touk, tuba melinamsile. Dipkoprop pia ati, kum bataknamsile. Elda weik arye bico tenesulula ati, tamubuka pia ati bico tenepsilirye, weika arye melinamsilarya.
Ati, Allah Yahweh, el pil dolul malaikat arye, yuk im deice pil melibuka don malaikat nang ati, nyabuk. “Ura, imam Yosua birye, sung-sunga palibuk baju ongopmal ning ara, anggunce kwiribukapmunce, donoklulume,” nyabuk. Tonda, Yosua elti, nyabuk, “Wini talak ara, winipmanto ning ara, sung-sunga palibuk baju ongopmamu ning, kwiripnamakiyaka atonun, narye an malye winiplum ning nirya ara, akunum dobuka donoknirye, kum kipdeipne. Winipkince, wini talak winiryuk baju punubuka arepnukine. Ara, teleb kanye delin sum deice, ninye arye, ‘Weik tonun kwalya kwalipnuyapʼ tenen, pia teleb baju ongolamak ning atonun, akunum arepkiniba, ongopnulame. Deiyok ara, an malye winilalum ning nirya ara, akunum kum kipdeipmakine.” Malaikat arye nyabuk.
Farisinye birye nyabuka morobukura, ‘Amutuku talina deiyok nang arepnamne’ tenen, pajak yo bok bulubuka delinanye birye, mitikto yukak tikukce, ‘Nara, pia malinye’ tenen, mambul kanye bobuka, ‘Allah ulyak kum elinune’ tenen, gisok talipdanuka amnyok dunupdongobuka, Allah morobukce nyabuk. “Se, nai Allah, nara pia malinye ununa ati ara, bita opnutum bukni, ‘Bico tenepnulumce bataknulumce, lyepnutum’ tenen, moropkine,” nyabuka Allah morobuke. Yesus arye nyabuk.
Peterus ayupu nirya akunum nyabukura, sik awekmek nang akunum kekebikopura, ‘Se, nun pia malye winibupe’ tenen, kanye se tenebikce buku sukubuka, pia malye kanye bobikce, Yesus wipdeibukura, el yupu dobuka peterepra balamik Rasul nang ara, Peterus el weitcapu silip ap, nirya ati, tamubuka nyabik. “Se, amio, nunda, yata wiripnamap do?” nyabik.
Sik tukwak ninye bukni, Allah arena ati, deiyok nang arye, tuba-tuba arilbalamak touk, Kristus arye aning kum winibuk. Kristus ara, anang arye tuba-tuba arenauk, winilamak touk, el babye atonun winiptopura, like tonok talak deice aryuk, el bidamang nong dobuka, Allah ati kum areamtue. Aning kum bukni, weika arye tonap, im deice wekelbalamtue. Ara, Allah arye aning-aning nirya kwepdeibuk talak arye dipdongobuka, anoutam talak nirya ara, ila tuba tonap, weika arye im deice wekelbalamturye, Allah ati areamtue. Bukni, wini talak ara, sirya talak dam akunum ubukba, Kristus ara, like tonok talak deice arye akunum yayuke. Kristus yayuka deiyok ara ani. Ara, el bidamang, el nong kopropa dobuka, Allah ati akunum aribuka deice arye, nun punupsuke. Malye nang arye elti, obika deice arye, ninye malye wininyak ning nirya ara, akunum kum kipdeipsukce, nun punupsuke.
Aning atonun kum bukni, Allah malye winina pia kumce, dirinak ulamle touk, nun babye, malye winina kumce, telebuk ubirye, dirinak atouk ulamibyeura, nun nirya ap, tonok kanye tenebuka, ansinibuka unyabe. Allah el yupu uk kekebuka, dobolbabyeura, Allah el Mi Yesus, el ining arye, nun malye tenenyap ning ap, malye wininyap ning nirya ap, kum ubuka deipsilirye, lyepnamsile.
Ura, Yesus Kristus ara, pia diksukumnye ulirye, batakna kum diparyuk, Allah ati pia dipkoprop yupu uk nyasulule. Yesus ara, dibuk bukni, Allah arye minyuma kam bukeibuknye bira, el Yesus uka. Tukwak mutuku noutamak ninye deiyok nang weik aunyak bukni, sik deice tam ulirye, aning-aning nirya talibuka weik Ninye Deiyoknye Yesus ara, elce ton anyapmasin ning arenamsile. ‘Allah ap, Yesus ap, Allah el dam bunyak dib kanye tekbarye ap, sik nirye arye anyapmasin ning arenamsiak’ tenen, Allah morosunune. Na Yohanes arye nyapsine. Yesus Kristus ara, weik arye bico tenyamsukce, el ining biyuka deice arye, nun malye un ning tapu kouamsuka noutamak arye lobuka lyepsuke.
Nyabukura, Saul birye, tamubuka nyabuk. “Diba, na malye winipmase ati, ance melipniminba, tamubuka binimirye, narye talipse ninye ap, sik deiyok talibuka unyak wisi nang ap, dinmasicak arye, si sipnamnilyame. Ara, an ap, na ap neika, Allah el si erepnaname. ‘Winipnimnyopura, na mutuku nang arye, teleb tenepnamniyak’ tenen, moropkine,” Saul birye, nyabuka morobuk.
ကြော်ငြာတွေ