Aning atonun, aminyan talak dukdongobuka, ninye deiyoknye Raja Daud birye, ninye ton Rehob, elce deiamuknye, elda ninye deiyoknye, Raja Hadadezer ap, el yin talin nang ap, obuka dakuk. Raja Hadadezer ara, Zoba mutuku noutam nirya, taleamukce ulamuk bukni, Daud ap, el yin talin nang ap arye, anye ap, el mapu silip ap nirya, obuka sirya dakuk. Zoba mutuku ara, pala weik mutuku tonok, Damasyik tam noutam uamuk. Atalak ara, Daud arye, weik balamuk mek, Efrata mek lilun mutuku nirya ati, ‘Na mikip weika arye, amutuku nirya talinuna ara, tonap talepkipdeipnamanʼ tenen, banmok talak ara, Raja Hadadezer binyak obuka dakuk.
2 Samuel 10:19 - Eipomek19 Ura, aning nirya akunum winibukba, atam nang arye dilamik ning ara, atalak ara, Raja Hadadezer arye, dekna ning areamukba, sik dana-dana tam weik deiyok nang kibuka taleamik bukni, Hadadezer el amu tam kipdobikce, el melina ati, mal olyanmik nang, deiyok nang nirya ara, ‘Se, Israel yala nang, yin nang aryuk, nunti akunum opmasiyakeʼ tenen, akunum eibikce, kel bikik. Ati ara, sik adeiyok-deiyok nang nirya yayikce, Israel yala nang ati, nyabik. “Kume, sikcuk, akunum malye kipmasulama ati, angguncuk talipsumba, nun ap, sik ap epdanuka, kanye deibuka, telebuk neika unamabe. Nunda, anggun amu tam ubirye, anggun pil melina nanguk unamabe,” nyabuka, yanuka morobikce, nyalin yupu deice arye nyabik. Nyabika ati, sik Siriya mutuku noutam ulamik nang nirya ara, Israel nang aryuk talibik. Talibika ati ning ara, Siria mutuku ulamik yin talin nang arye, ilil ubukba, sik Amon mutuku ninye arye, ‘Israel tam nang mal olbana ati, sik ton yanuka melipsululume,’ nyabuka, morolamika babye, kum kekebikce, sik Amon yala nang ati, ton ap kum melilamik. အခန်းကိုကြည့်ပါ။ |
2 Samuel 10:19
12 ပူးပေါင်းရင်းမြစ်များ
Winibukopura, Raja Daud birye, ‘Amutuku nang, na amu tam unamakʼ tenen ati, na yin talin nang arye, atam nirya kalikuka talinmak tenebukce, el yin talin nang kong ton, yuk-yuk bukni, Damasyik tam noutam deibuka balamukba, daulamikce, atam nang nirya, sik amu tam kipdobik. Tonda, amutuku nang nirya arye, Raja Daud amu tam kibuka ulamika ati, yo bok bobuka yanuka, Daud biti arelyangalamik. Tonda, atam noutam nirya ara, Allah Yahweh arye, ninye deiyoknye Raja Daud ati, elce dan mutuku do nirya, olbalamok talak nirya ara, Allah meliamuk deice arye, Daud el deice obuka bisina deiyok ning deibikba, teleb kibuka olbisilamuk. Tonok mutuku nang babye, Daud biti kum malye kibik.
Ura, Elisa adiparyuk amutuku batakuka tamubuka, Elia el melinanye bira, neika birikce, apiluk dolbiyuk. Atalak noutam aryuk, Siria mutuku talibuka ulamuknye, Raja Benhadad, elce el yin talen nang ap, tonda yuk mutuku deiyok-deiyok nang ap, ara tiga puluh dua (32) mutuku Raja kibuka taleamik nang, sik nirya tabakukabice, sik ninye olan talak bukuka bana ati, el si kereta kuda ap, tonda aning libuka bobana ati, kuda basam ap, aning nirya kintinibuka deibikce, sik neika tonok sukum, bulubuka deibukba wekik. Sik abulubuka wekik nang ara, Benhadad elce deiyok kibukba, Israel tam weik kota si Samaria mutuku ulamik ninye ati, warekuka opnuyika ati, kintinip deibik. Atalak aryuk, kota Samaria domikak binuka, deiyok koubuka, mal binuka olanmek.
Atalak ara, Hadadezer birye, weik ninye kibuka taleamukba, el amu tam ninye deiyok kibuka ulamik nang ap, el tam yin talin nang nirya ap ara, Israel yala nang yin nang aryuk obuka sirya dakik. Winibikura, sik Siria tam nang nirya arye akunum kekebuka bikik. Ati ara, sik Hadadezer amu tam ulamik nang ap, deiyok-deiyok nang ap, sik nirya yayikce, Israel nang ati, “Angguncuk talipsumunyeba, nun ap, anggun ap epdanuka, nunda anggun amu tam talye teleb ubuka neika unamabe,” nyabuka, yanuka morobikopura, amutuku ulamik nang nirya ara, Israel nang aryuk talibik. Talibika ati ara, Siria mutuku nang arye ton ap malye kibuka, sik Amon mutuku nang ati tuba ton ap pia kum melilamik. Sik yuk-yuk kipdobikce ulamik.
Se, na ni Allah Yahweh, ance sik malye weik unyak nang ati, yu tenipmince, ‘Anang wenepnamneʼ tenen, kintinip deipmalam ning ara, pia kum tenebikirye, kel bikuka kum elinyake. Ance an mapu ati, ‘Bicoe, sikda dipkoprob melibuka kalikinamne,’ tenipmince, melinamlam ning ara, sik amalye wininyak nang kum eilinyaka anya arye, ance aning lak kipdeipminba, eiptingopura, aminyan ara sikce, ‘Se, nun malye wininyabe,’ tenen, ilil upliba, alye dakanamake. Ance sik malyeuk wininyak nang ati, yu weik upkiliba, ance wenebuka opnamalam nang ara, akunum kintinip deipmalam ning ara, sikti, wenebuka opmince, uku buk dilamle touk, anang kum kipdeipnalame.
Na ni koproba Raja ninye deiyoknye, anda pia telebnye. Yuk ninye deiyok nang atonun kume. Yuk ninye deiyok nang daunyak bukni, anda sik nirya talibuka deice tam ulyame. Allah im deice kwepdeibukce, eitam ululnye birye, na ni anti, ‘Amutuku nirya taliplirye, mikip weik ap, weik mambul una ap, urasin pia teleb una ap unamle’ tenen, wipdeibkukba ulyame.
Aning nirya, akunum winibukopura, Yosua tamubuka yayuk. Yosua tamubukura, bisik banmoka ani, Hasor mutuku yanuka doprobukce, amutuku ninye deiyoknye ton, parang ya arye oplobuk. Atalak ara, Kanaan mutuku nirya ara, asukumuk ulamikce, ninye deiyok nang weik tonun ton aulamikce, ninye deiyok nang talibuka, bun ning mutuku nirya awamuk bukni, Hasor bira, mambul weik mutuku uamuk.
Allah arye akanye imun ning weika arye, Babel mutuku ninye sik nong deice dopkweteplibuk yalyopura, ikin kanye bobikirye, ‘Se’ tenen, weika arye engebuka donmakiba, yuk mutuku Raja nang nirya arye, yukak arye tikuka eibikirye, ayupu nyapnamake.” ‘Se, Se. Amutuku ara, weik mambul mutuku, pia teleb ulamuk. Babel mutuku ulamlum ninye ara, mikip weik ap, pia teleb ap ulamlum bukni, wini talak adiparyuk tonok keting noutamak ara, Allah arye wenepmasilba, akunum kum daneipmasile,’ nyabuka engenamake.
Winibik talak ara, anye Adonia-Bezek birye nyabuk. “Kume, min talak ara, narye ninye deiyok kibuka ulamik nang ara, tujuhpuluh (70) nang babye, tomobuka sik taruk duk, pamu ning ap, yan duk pamu ning ap, sekuka batakamsiba, ulamikce, na meja deice bukuka, din dinmanbuk, adin sung-sunga sakanman ning ara, sik anang arye bulubuka dilamik. Sik anang ati, winilamse ning ara, Allah arye tuba tenyamnuka anya arye, aning ati, kwang daknile,” nyabuk. Nyabukopura, Adonia-Bezek adiparyuk bobukabikce, Yerusalem mutuku delilbiyik. Binuka deiamikba, daulamika ani, aminyan talak amutuku arye dibuk.
ကြော်ငြာတွေ