Aning-aning kum uamuk talak ara, an akunum kam ulyama ati, ancuk, tukwak mutuku nirya kwelina ati, weik mikip arye, kwepdeiplumura, pia mikip weik ulula ati, wini talak babye, tuba aulule. Aning atonun, im noutam ap, im deice ap, amutuku noutam ulye ning nirya ap ara, ancuk kwepdeiplume. An taruk mikip deice aryuk, aning-aning nirya akunum kwepdeiplume.
2 Peterus 3:10 - Eipomek10 Winilul bukni, Allah arye tenyamuk sum akunum uplyopura, nun mankau kanye bopmabyebuk, winipmanto ara, ubula don nang duknubuka talye karin arye yangalamak touk, Yesus Kristus tamubuka, tukwak mutuku yanamle. Atalak ara, Allah arye nyapdeiplibuk, im noutamak ulul ning nirya ara, adiparyuk tunim abuka, kum daneiplibuk, weik lelim nyapnamle. Winiplyopura, tukwak mutuku ap, im ap, aulye ning, deiyok ning nirya ara, weik uku buk arye dibuka, sirya daknamle. Winiplyopura, Allah arye, tukwak mutuku ap, tukwak mutuku ulul ning ap, ninye ati kwepdeiamuk arye memenyak ning nirya ap ara, kum ubuka daneipnamle. အခန်းကိုကြည့်ပါ။ |
2 Peterus 3:10
36 ပူးပေါင်းရင်းမြစ်များ
Allah arye, mambul pil dolye talak ara, weik mutuku nirya lulukulule. Winipmanto ara, lilin weisa deibikcopura, uku buk diliba, auku buk buppu arye, alilin nong mek kibuka balamle touk, mutuku kon lulukliba, tokna dolule. Winilula deiyok ara, Allah Yahweh arye yalyopura, mutuku kon nirya, lokonauk ulule. Ara, tukwak mutuku, im sirya, mutuku sirya nirya talibuka, weik deiyoknye ulul Allah ara, el yangalyopura, tukwak mutuku ulye ning nirya ara, ilil pia weik upliba, lokonauk ulule.
Aning ara, talye ati kum nyapsine. Allah arye akunum tenyamuk touk, asum akunum uplyeura, Allah Yahweh aning-aning nirya eitam erebuka, im deice yin talin malaikat nirya, sik weik deiyoknye ulula ati, sik kanye erebuka, kwalibuka unyak nang nirya ara, amu tam kipdeipnamle. Tonda, tukwak nang mutuku sirya, im sirya nirya arye, ‘Se aning ara, weik mambul, aning tonok ara, pia telebeʼ tenen, dipdakirye, kwalibuka talima erenyak nang nirya ara, Allah arye aning nirya yaniplirye, pia amu tam kipdeipnamle. Tonok ning babye, kum bataknamle.
Tonda, im noutam ulamle ning nirya, keting ap, wala ap, kurya ap nirya ara, Allah arye obuka, sirya dakliba, sung-sunga buklopnamle. Im ara, amsuna kitibuka koulamak touk ubuka, kitibuka koupdongopnamle. Keting ap, wala ap, kurya ap nirya ara, yo bok koulubuka, tukwak saklamle touk uplirye, kulubuka tukwak saknamake. Yo duk moulamle yo, sesal sepliba, el duk kouluplirye, tukwak saklamle touk, im noutam ulye ning nirya babye, tukwak saknamle.
Ati, anggun Israel yala nang nirya babye, tikuka im deice tam ap, tukwak mutuku ap, dipdenamlulume. Dipkoprop nyapsine. Im deice tam ulul ning nirya ara, kum danamle. Ara winipmanto ara, ninye arye weik uku deibikiba, im noutam welepmalya ani, adiparyuk kum danalamle touk, im deice tam wamlye ning nirya babye, kum dandopnamle. Tonda, tukwak mutuku ara, ninye arye wilamak baju wisi danamlirye, kwilikilsakalamle touk upnamle. Winiplyopura, tukwak mutuku noutam, mutuku sirya, im sirya nirya unyak nang nirya ara, talye suma adiparyuk dibilamak touk ubuka, dipnamake. Bukni, na Allah arye anggunti, lobuka lyepdopnamsin nang ara, min kum, kum danamle. Narye anggunti, lobuka lyepdopnamsin nang ara, pia ati aunamle. Aning ara, min kum, kum danmanto anya arye, pia sirya dakuka min kum, kum danamle.
Allah arye, ‘Na tenen mutuku’ tenen, Sion mutuku wibuka, el si Yahweh nyabuka, Sion mutuku deice deibuka ati, elda amutuku ulule. Ati, yanuka tikmunce, pong-pong ana, el si terompet, lelim nyapmunyopura, amutuku ninye arye, ‘Se, mambul sum ati, pitin-pitin kinmake,’ tenepnamake. Se, anggun Yehuda yala ninye nirya ara, awinipnamle ning eipmunce, ilil upsiliba, yok sirim talipnamsile. Ara, urdem ati kume. Allah Yahweh arye, nun malye winin ning dekna ati, ‘Wenepnamne,’ tenebuk sum, akunum dam upmala ati, ‘Se, ikin ning nun dam upmale’ tenen, imun kanye bobuka unamlume.
Yoel birye nyabuk. Allah Yahweh arye, ‘Sirya dakna talak ara, winibuka wekelbinamak,’ tenebukce, kintinibuka deibuk mutuku wekelbinamak ninye ara, ninye yupa pia weik, kum nukmanto beribu-ribu nang binuka unamake. Amutuku noutamak bulubuka wekelbinuce talak ara, talye talak kume. Ara, Allah Yahweh elce, tukwak ninye nirya, sik malye wininyak ning dekna ati, wenepnamle sum akunum dam uplyopura, adiparyuk yanamle.
Na Allah Yahweh arye nyapsine. “Na tenepse talak akunum uplyopura, gandum duk do, yata koulamak ning do, aning-aning nirya, wa wibuka koulamak ning ara, tuba lilamak talak, sirya min kum dakmakibuk, winiryuk ning ton paplirye, bongobuka panamle. Sik wa wiamikce ning lilamak ninye babye, wa wibuka koulamak ninye babye, tonok talak aryuk pil donamake. Aning atouk, anggur wa babye, tonda duk moulamle ning yuk yala ning babye, teleb ubuka paplirye, duk mounamle. Winibuka, adiparyuk duk minop mouplyeba, dakuka dinamake. Tonda, ton talak dakmakce ani, ila tuba mouplyopura, tuba dakanamake. Tonok talak babye, kum lolinamle pia moul pununamle. Atalak-atalak nirya, anggur tapu wa wibuka koubikiba atalak, aryuk teleb ubuka papliba, duk weik mounamle. Winipyopura, atalak aryuk amutuku unamak nang arye, anggur duk asum-asum nirya purunamake. Tonda dan mutuku do nirya, anggur tapu ara, mutuku konak weleplirye, el taruk ara, amutuku dup nirya bilikuka banamle. Amutuku ninye nirya arye, aning-aning weik dinamake.
Nyabukce, ayupu ton nyabuk. “Nara, Allah unune. Na si koprop ara, Yahweh. Narye aning-aning nirya talibuka, deice tam Pia Mikip Weik Deiyoknye unune. Narye, im deice unyak yin talin ninye nirya talinune. Narye, tukwak mutuku yanuka yan yanipnyopura, tukwak mutuku nirya, weik arye luluklirye, mitang upliba, mek balamle atonun ubuka, kum kibuka balule. Tonda, winipniba tukwak mutuku unyak ninye nirya, ilil deiceuk unyake. Winipmanto ara, Mesir mutuku noutam, Nil mek weik onmalye talak, mek kait weik arye welenmalya ani, cepropnin balamle talak mitik anun arye, koulukuka balamle touk, narye nyaipneba, sik aninye unyak mutuku nirya ara, weik arye luluklirye, welepmalya ani, tamubuka tukwakuk saknamle. Na Allah Yahweh arye, nyapsine.
Winibuka tikilyanganamla talak ara, amutuku nirya, weik arye luluklirye, mutuku nirya, atu atonun kiplopnamle. Winipmanto ara, lilin dobuka, uku dinipdongobikiba, uku buk dilirye, mek balamle touk upnamle. Ara, nun ulamepye mutuku deice tikilyaliba, mek kutuklirye, tokna donamle. Tonda, mutuku deice arye, mek kutuklirye, tokna pakuka balirye, opnin banamlya ani, lu mutuku obuka, dalalbalamle touk, upra binamle.
Allah Yahweh, mutuku kon dam yalyopura, mutuku kon lulukdanamle. Tonda, el dam yalyopura, mutuku kon nirya ara, mek atonun upliba, tokna doplirye binamle. Allah Yahweh yangalyopura, mutuku nirya lokukaplirye, lulukdanamle. Winipnamle talak ara, mutuku sirya, im sirya nirya ap, amutuku sirya, im sirya nirya unyak nang nirya ara, ilil upliba, yok sirim talipdanamake.
Bukni, anyapnusin yupu moubuka kekepmunce, ‘Dan talak winipnamle do?’ tenen, dinauk unamlulume. Ara, ‘Weik imun ning winipnamle’ tenen, kintinip deipse sum, na Allah Yahweh arye ninye nirya ati, yupu lipsisikuka bokeipnirye, malye wininyak nang wenepnamne sum, min kum upmalye talak ara, minopce narye na yupu lak lenanye, nabi Elia dopdeipniba, anggun dam minopce yanamle.
Pia minop talak, deiyok kouamuk talak ara, aning-aning nirya ap, dipna ap, lyuna ap, malye winina ap, kum uamuk. Bukni, wini talak ara, tukwak mutuku ulul ning aning-aning nirya ara, dipna ap, lyuna ap, malye winina ap noutam akuk ulule. Tukwak mutuku ulul ning nirya ara, talyauk ulule. Nong kum upnamle ninguk ulule. Ulula deiyok ara, Allah arye tukwak ulul ning nirya wenena ati, malye yupu nyabuka wibukba, talyauk ulule.
Tonda, Allah arye anggunti, ‘Aminyan sirya talak ara, anggun malye winin ning tonok ning babye kum upnamle’ tenen, anggun kanye kwa diprongobuka melisilye talak ara, anggun dib tenelulum ning ara, pia darapdongobuka mikip unamsile. Winibuka daulamunye ani, aminyan talak ara, nun Weik Deiyoknye Yesus Kristus tukwak mutuku tamubuka yalyopura, anggunda diksukumuk unamlume. Ati yata nang do nirya, ‘Aninye ara, malye wininyak,’ nyabuka anggunti kum nyapmanto unamake.
Ara, ‘Isa Mutuku Dongonye arye, anye talibuka, el nong deice pia ikin ning deiamliba, el nong ap, el malye winilul ning nirya ap, kulabuka oplopnamle bukni, nun Deiyoknye Yesus tamubuka tukwak mutuku yanamle talak arye, el kanya arebuk ning tonok ara, tuba lyebuka dopropnamle’ tenen, anye dobuka, Isa Mutuku Dongonye areplulume nyapsine. Na Paulus arye, nyapsine.
Ara, minop ara anggunce nunti, mitik kel bikamsulum touk, aminyan talak ara, weik arye kel biksumunce, bikamsulumce, nirya moubuka tenepsumunyopura, anggunce nunti, kanye deibuka, “Anggunda pia telebe,” nyabuka kanye deipnamsulume. Aning atonun, nun Deiyoknye Yesus arye, tukwak mutuku tamubuka yanamle talak ara, nunce anggunti, “Anang ara pia telebe,” nyabuka, kanye deipnamsiyabe.
Aning-aning nirya ara, na nyapmasin touk, Allah arye malye kibuka oplobuka, kum ubuka daneipnamle. Aning ati ara, anggunda yata ninye atouk ubuka unamlulum do? Kume. Yesus tukwak tamubuka yanamla ati, ‘Allah arye wibuka tenyamuk sum ara, dan sum yanamle do?’ tenen, kintinibuka pia dinauk unamlulume.
Winibuka unamlulum talak nirya ara, diksukumuk unamlulume. Ara Allah arye, ‘Aning wininamak’ tenen, el yupu deice nyasilye touk, malye una kumce arye, diksukumuk ubuka unamlulume. Tonda, ‘Asum ara, minopce yatue’ tenen, pil pia pi dobuka, palibuka donamlume. Yesus tamubuka yalyopura, im ap, im noutam ulul ning nirya ap, weik uku buk diplirye, sirya daknamle. Weik uku buk dilirye, bupu weik uplyopura, awinilya deiyok ning nirya ara, telepropnamle. Kum ubuka daneipnamle.
Allah arye ayupu nyapdeibukura, aning ubuk touk, Allah el yupu nyabuka deice arye, wini talak ulul im ap, tukwak ap, tonda im ap, tukwak ap noutamak ulul ning nirya ara, tenebuka tenepce deibuka kalikilule. Aning-aning nirya ara, tenebuka tenepce deibuka kalikilamlya ani, apia daulamlye bukni, Allah teneplye talak arye, elti, yaniptabuka, pia malye winin nang ati, yupu bokeiplirye, wenebuka oploplyopura, kum ubuka daneipnamle. Atalak aryuk, wini talak tukwak mutuku ap, im noutam ulul ning nirya ap ara, Allah teneplye talak arye, el yupu nyaplibuk uku arye dipnamle. Allah arye, ‘Na tenepse talakuk, aning nirya kum ubuka deipnamne,’ tenelula anya arye, aning ara wini talak ati, talye tenebuka tenepce deibuka kalikilule.
Tonda, el im deice pil don nang, malaikat ulamikbuk, Allah arye sikti, pil deiyok aribuk ning ara, ‘Nun like’ tenen, sikce yaniplobuka yukak binuka ulamikce, pia malye-malye winilamikba, Allah arye amalaikat nirya wenebuk. Amalaikat ara, Allah arye dopdakuka, pia kat tapu, kum bulupmanto tapu arye koubuka, pia kuna pum bisik dongobuk. Dongobuk anya arye, amalaikat daulamica ani, sirya talak ninye mutuku-mutuku nirya ati, yupu bokeiplirye, wenepnamle talak ara, amalaikat babye, wenebuka oplopnamle. Oplirye, uku dil ban donoklyopura, uku pia dilibuk, dapia uk tuba dilirye, malyeuk unamake.
Atalak aryuk Yesus arye ayupu nyabukba, kekepse. “Anggun nirya kanye mouplulume. Ubula don nang talya karin arye duknubuka yangalamak touk, anggun kum bikmamunye talakuk talye karin arye yanamne. Allah arye teleb updeiplirye, meliliba kanye deibuka unamlanye wininamle ning ara, lak nyapnusine. Winipmanto ara, ninye arye, ‘Nun mankau mapmabye talak, baju kum ongopmabibuk, nun kayapu yacopura, alye dakdapyak’ tenen, baju ongobikirye kanye moubuka kintinibuka dilamak touk, Allah arye melinamlanye babye kintinibuka dinauk unamle.” “Ayupu nong noutam ara, ani. Anggunce, ‘Nun ni kopropa dan talak dolyanamsil do?’ tenen, kintinibuka dinauk upmunyopura, aminyan talak ara, anggun alye kum dakanamlume. Tonda, winipmanto ara, kintinina kumopura, ninye dinmacak, talye nong demuk banyak ninye arye, alye dakaldalamak touk anggun babye kintinibuka dinauk kum upmunyopura, na tamubuka yanamne talak ara, alye dakdanamlume. Ati kanye mouplulume, nyapsine.” Yesus arye ayupu nyanmokak kekepse.
Aning nirya eipsopura, aning ton eipse. Ara, weik ninye deiyoknye kurun ning deice bunlulak eipse. Ara, pia weik kurun bun ning ap, aning deice bukmoknye ap eipse. Anye laka ubukba, im ap, im noutamak ulul ning nirya ap, tukwak ap, tukwak mutuku noutamak ulul ning nirya ap, aweik deiyoknye dam kum yanmanto ati ara, aning nirya kum dayukba eipse.
Anirya eipsopura, aminyan eipse ning ton laka nyapnune. Ara, minop talak tukwak mutuku uamuk ning nirya ap, im deice ap akunum kum dayuk ati, dinmasiba, Allah arye tukwak mutuku tam winiryuk kwepdeibuk ning ap, im deice winiryuk kwepdeibuk ning ap, eipse. Tonda, minop arye deiamuk laut mekwen nirya kum dayukura, winiryuk ning ton kum kwepdeibuk.
“Aning ati, anggunce peterelamsikba, kekenamlum ning nirya ara, ila tuba tonap tenepmunce, dipkoprop lipsisikuka dobolbanamlume. Anggun malye ululum ning batakmunce, urasin tamubuka diksukumuk unamlulume. Bukni, anggun kanye kum moupmumyopura, sik ubula don nang, talya karin arye, duknubuka yangalamak touk, anggun dam yanamsine. Anggunce, ‘Atalak noutamak, asum arye yanamasil’ tenen, moubuka kum kel bikmamunye talak aryuk wenelyanamsine.”
ကြော်ငြာတွေ