An oldan ninye ati, obuka bisipnalam talak ara, ance talilyamba, an amu tam unyak ninye nirya ara, sik kanye teniltona kum diparyuk, an dam yakirye, an ap, sik ap, neika ansinibuka, yuk mutuku ninye ati, olbinamlume. Winipmanto ara, lukunyan talak kurya dei sakuka, mutmuta deice palilamle atonun, asum-asum nirya, an amu tam unyak yin talin kam nang arye, ‘Nun ni ap, neika malye nang ati olbinamap’ tenen, an damak tuba-tuba yanganamake. Na Allah arye melisinirye, an amu tam, yin talin nang ap, an ap mikip kipdeipsiniba, an oldan ninye ati, mal olbinamlume.
2 Peterus 1:3 - Eipomek3 Allah el weik mikip deice arye, nun nirya ati, ‘Aninye ara, bola koplobuka kam pia unamake. Tonda, na Allah unye touk, diksukumuk unamak’ tenen, patapsilye ning nirya ara, akunum areamsuke. Ara, ‘Diksukumuk unamak’ tenen, deiyok ning areamsuka nirya ara, el ap kanye dukdongobuka neika ubirye, el ulul ning nirya kel bikanyaba deice arye, akunum areamsuke. Tonda, tuba arisulule. Allah arye nun nirya ati, nyapsuka ara, ‘Aninye ara na mapu unamake,’ tenenyamsukce, el weik mambule ulula ap, el pia teleb-teleb ubuka dirina weik ulula ap deice arye, akupsukce yukamsukce, wibuka deiamsuke. အခန်းကိုကြည့်ပါ။ |
2 Peterus 1:3
39 ပူးပေါင်းရင်းမြစ်များ
Teleb weik ning ara, tonok sum Allah an si eren aik dam yanuka eipkitinyeura, telebe teneptinye. Bukni, yupa weik seribu sum ara, talye yukak daunmatinye babye, telebe kume. Tonda, na ara, an si eren aik bublan dam kalikna pil doptinye babye, pia telebe. Bukni, malye wininyak nang, sik teleb aik binuka uptinye babye, aning telebe kume.
Ninye don kilapu arye, malye una kum diparyuk, teleb ubuka unyak ning ara, sik akanye yapu arye, ‘E, akilapu ara, pia telebuk unyake’ tenen, kanye deibuka unamake. Yuk ninye arye, anang ati, kanye delinamake. Bukni, yata kilapu do nirya, malye-malyeuk winipnin balamikiba, sik akanye yapu ati, malye ulinyakba, sik akanye yapu nirya alye daknamake. Akilapu malye unamak deice arye, sik akanye yapu, sik nong pum tam malye uplirye lyulamle touk unyake. ‘Se’ tenen, lik kanye uk bobuka unyake.
‘Diksukumuk ulamturye, el akanye nyaptu yupu uk kekebuka amu tam upmanto kil uk, ato kil eibuka doptinye’ tenen, pia piribuka elamtuma babye, adiparyuk el atonun kil ara, minopce kum eipnamlame. Pia teleb ulirye, el akanye yupu kekepmanto kil ara, minopce eibuka kum binuka dopropmanto anya arye, atonun kilapu ati ara, pia piribuka epdetum bukni, ikin diparyuk epnamlume. Aning atonun, akil urasin ara winipmanto, weik nong teleb dekna weik keil el si ara, intan berlian keil ara, urasin pia weik teleb ning ulul bukni, aning ara mitik mambule. Bukni, pia teleb ubuka ulul kil ara, weik mambul ulule.
Akil el akanye birye, el kil ati nyalule. “Pil teleb kibuka donyak kilapu ton, weik aunyak bukni, aunyaka noutamak arye, an uk ara, weik arye teleb ulyame. Yuk kilapu ara, mitik teleb unyak bukni, an uk ara, pia teleb piluk dolyame. Yuk kilapu wininyaka atonun kum winilyame,” nyabuka, akil el akanye birye, elti, kanye deibuka kilule.
Anggun ton teneipdelulume. Allah ara, el Mi Kopropa tonokuk ulul bukni, ‘Na mi ara tonoknye anya arye, na tenen kum arepnune,’ tenena kumce, nun lyena ati, arepsuk. Ati, el mi kopropa dobuka, nun lyena ati akunum arepsuka anya arye, yatato ning do nirya, nun patasulu ning nirya bico tenesilirye, el kanye deibukap, talya demuk kum arenamsil do? Kume, nun patasilye ning nirya ara urdem arenamsile.
Allah arye anggunti, ‘Na Mi Koprop Yesus Kristus ap, aninye ap kanye dukdongobuka neika unamak’ tenen, wipdeipsuknye bira, yupu talye kum nyaltakalule. Elce, ‘Wininamne,’ nyasilye touk, dipkoprop winisulula anya arye, arup nyapmasin touk melisilyeba, sirya talak ara, diksukumuk unamlume. Yesus ara, nun Weik Deiyoknye usulule.
Morolamse bukni, Allah arye ikin unilye ning ara, kum dopropnuke. Ayupu nyapnune. “Kume. Pauluso, aning tuba upmakil ikin wapkilya ababye, na bico tenepkinirye, na kanye aryuk melibuka arekunun ning dopropmince, telebuk unalame. Akunuma. Deiyok ara ani. Na mikip aresunun ning ara, sik badamnye mikip mitang wininyak ninye ati ara, na mikip weik arye arepsitinyeura, pia teleb wininamake. Mikip mitang winimunya noutamak arye, na mikip arenamsin ning ara, laka upnamlarya,” Allah arye nyapnuke. Nyapnuka ati ara, na mikip ara mitang upniliba, ikin unilye ning nirya ati, talye kanye deibuka weik arye, “Telebuka,” nyanamne. Deiyok ara, na mikip kum upnilirye, pia mitanguk unilye talak nirya ara, ‘Kristus el mikip weik arye arepnilibuk, adeice aryuk teleb wininamne’ tenen, kanye deibuka unamne.
Ara, na kayapu. Nun Deiyoknye Yesus ati pil dolamsiba, yu nang arye, tomopnikce, tapu koubuka wenena aik dongopnikba, asukumuk unune. Narye anggunti nyapsine. Allah ati dib teneplum arye, akunum lyepsuka ati ara, Allah arye anggunti, ‘Na mapu unamaka ati, winibuka, winibuka diksukumuk wininamake,’ tenyamsuk atonun, adiparyuk aninguk tenebuka unamlulume, nyapsine.
Nun dib tenenyap ninye nirya ara, kanye dukdongobuka nong tonok atonun unyabe. Allah El Dib Kanye arye, tonok nong atonun kilisulule. Aning atonun, Allah arye nunti, ‘Aninye lyepnamne’ tenen, yukupsukba, dib tenebuburye wini talak ara, ‘Elcuk dolyasilyopura, el ap, neika pia unamaba ara, dan talak arye, dolyanamsil do’ tenen, aning atibuk kintinipdeibuka dinauk unyabe.
Anyapmasin yupu uk kume. Tonda, teleb-teleb kibuka winilamse ning weik aupnuk bukni, Yesus dib tenepnirye, ‘Na deiyoknye Yesus Kristus ap, dukdongobuka unaname,’ akunum tenepne ning ati ara, ‘Mince arye tenelamse ning nirya ara, malye ning atouk, dauplye,’ tenenune. Ara, ‘Na Deiyoknye Yesus Kristus ap, talima dukdongobuka una ara, pia mambule,’ ati nyapsine. Minop talak ara, na diksukum ulamse deice arye, ‘Aning deice arye, teleb updeipnamnile,’ tenelamse bukni, wini talak na kanye ara, ‘Aning nirya ara, mal-malya, sukulonga donoklamak atonun ning ulule,’ tenenune. Tonda, ‘Lyun ning atonun ning ulule,’ tenenune. Winibukap tenenuna deiyok ara, ‘Weik mambul ning ara, Kristus eluk talibuka, el ap, talima dukdongobuka unaname’ tenen, nyapne.
Telebe na kayapu, asurat sirya dakana ati ayupu nyapnusine. Ara, yata teleb ning do nirya, pia dipkoprop mambul ning ap, kwalina kumce diksukum una ap, malye ning pia kum mingne ning ap, ninye nirya arye, ‘Aning dipkoprop teleb,’ tenenyak ning ap, apia teleb ning niryauk ara, tenenauk unamlulume. Yata ning do nirya, awinin ning ati ara, ‘Allah arye kanye delilule,’ tenenyap ning nirya ara, aninguk tenebuka unamlulume. Malye winin ning yala-yala nirya ara, kum tenenamlulume.
Aning-aning deice tam ulirye, pia weik mambulnye ulula ati ara, lilibuka nyapnusiname. Yata ulye ning do yuk-yuk yala nirya ara, elcuk kwepdeiyamuk. Im deice ulul ning nirya ap, tukak mutuku noutamak ulul ning ap, ninye asing arye elinyak ning nirya ap, aupmal bukni, ninye asing arye kum eipmanto ning ap, aning-aning nirya ara, elcuk kwepdeiyamuk. Tonda yata mikip ulye ning do nirya, ninye weik nang deiyok nang, Sisinanye Raja nang nirya ap, deice tam weik nang unyak nang ap, sik amutamukirye, mitik pil talibuka donyak nang ap, talye nang bukni, yuk nang arye anang ati, ‘Nun ni yapu,’ tenebuka, deiyok yupu nyanyak nang ap, anang-anang nirya babye, Allah el Mi Koprop arye kwepdeiyamuk. Yata ulye ning do, yuk-yuk yala nirya ara, elcuk aning nirya kwepdeiamukce, ‘Aning talipnibuk, aning ap, aninye nirya ap, sikce na si erebuka kinamniyak’ tenen, kwepdeiyamuk.
Ara, Allah arye anggunti, ‘Aninye ara, narye aning-aning ap, tukwak ninye nirya ap, talibuka unye talak, pia teleb weik dirinak unmana ara, sik ap unamabe’ tenen, yukupsuke. Allah arye anggunti, nyapsuk anya arye, ‘Aminyan talak Allah arye anggunti, kanye deipnamsil’ tenen, nunce anggunti, “Wininamlulum, wininamlulum,” nyabuka peterena ap, anggun ikin ulamsuk ning ati, kwa daklamsupu ning ap, anggun kanye imun kanye bona ati, talima mulina ap ulamsubu.
Allah arye sikti, ‘Anang lyepnamne’ tenen, wipdeiamsuka ati, ara nunce anggun Tesalonika mutuku nang ati, Allah el laka teleb yupu, ninye lyena yupu peterelamsupu deice arye, Allah arye anggunti yukupsuke. ‘Wininamak’ tenen, yukupsuka deiyok ara, ani. Ara, nun Deiyoknye Yesus Kristus ap, el yanamle talak upnamle ning ap, urasin pia teleb kibuka yanamle. Atalak ara, ninye nirya arye elti, teleb nyabuka, el si weik arye erepnamak talak ara, ‘Anggun Tesalonika nang babye, neika atonun wininamak’ tenen, yukupsuke.
“Wininalyame,” nyapmakina deiyok ara, ani. Ara, nun nong mikip kilana ati, bik-bik ana ap, mikip arye pil dona ap ara, mitik teleb bukni, Allah pia diksukumuk ulye touk, nun babye teleb koprop una ati, adiparyuk kel bikna ara, weik mambul. Diksukum ubya deice arye, yuk winin ning nirya noutam melisulule. Nun kele, diksukumuk ubibyopura, wini talak tukwak unyap talak babye, aminyan im deice binuka unamap talak babye, melibuka teleb keipdeipnamsile. Weik mambul ning ara, ‘Allah diksukum ulul touk, na babye diksukumuk unamne’ tenen unamabe.
Allah el mikip deice arye nunti, ‘Malye ning nirya batakuka, diksukum un ninyeuk unamak’ tenen, nyabuka melipsukce, akunum lyepsuke. Winipsuka ara, nun teleb ubuka pil dolamupa deice arye, kum lyepsuk bukni, elce minop talak akunum tenyamsuk touk, elce nunti bico tenepsukce, el kanye aryuk nunti talye melibuka lyepsuke. Allah el kanye aryuk bico tenyamsukce, ‘Yesus Kristus el pil donamla deice arye, aninye melibuka lyepnamne’ tenen, kintiniyamsuk ning ara, Yesus Kristus deice arye kintiniyamsuke. Aning ara, aning-aning min kum kwepdeiamuk talak arye, nun Lyena Deiyoknye Yesus Kristus akunum kintinipdeiamsuke.
Allah ara pia teleb ulirye, weik erenanye ulule. Ulirye, weik mambule ulul touk, el Mi Kopropa babye, pia atonun ulula anya arye, weik dirina ap, weik mambul weik ap ulule. Aning atonun, Allah ap, el kanye tenen ning ap, el ulul ning nirya ap, aulul atonun, el Mi Kopropa babye, el ulul ning nirya anisibuka ulule. Allah el Mi Kopropa arye, el weik mikip yupu nyalya deice arye, yata ning do nirya, teleb ulilulba, aning-aning nirya kum kum danalule. El nyalul yupu deice aryuk aning-aning nirya talilulba, teleb ubuka tuba kam ulule. Ninye mutuku-mutuku nirya, sik malye unyak ning kum ubuka delina ap, ninye weik lyena ap, teleb kinilina ap ati, mambul pil akunum dopsukce, ila tamubuka im deice welebukce, Allah el taruk sirik tam bukuke. Aning-aning nirya deice tam ulirye, weik erenanye ulule. Allah ara, Weik Mambulnye, im deice ululnye bira, el Mi Kopropa arye, el taruk sirik tam bulbiyuke.
Anggunda, Allah ati diba teneluluma ati, Allah arye, ‘Na mapu malye ubicak’ tenen, el mikip deice arye kalekuka lelilongosulule. Wini talak arye dipdongobuka, dotalak yanamle talak nirya ara, el mikip arye kalekuka lelisilyebuk, sirya daknamle talak akunum uplyopura, Allah arye lyen ning akunum kintiniyeiamsuk ati, Yesus aminyan talak tamubuka yalyopura, lyepnamsile. Atalak ara alyen ning nirya laka daneipnamsile.
Anggunce telebuk upmunyeura, deiyok kum, kum upmali bukni, yu nang arye, anggun nong deice, ikin ning delisinyaka ara, Allah arye aning akunum tenyamsukce, ‘Sikda namin kipliba teleb arye dakeiyam asa unamak’ tenen, Allah arye nyapsuke. ‘Wininamak’ tenen, nyapsuka deiyok ara, nyapnusine. Ara, Yesus Kristus arye lyepnamsuka ati, el nong deice ikin ning weik deibik ati, ikin kanye bobuka, uk weik ati donmoka ara, Allah arye, ‘Anggun bapye unamlume’ tenen, winipmanto ning ati, kunum pitin kipdeipsuke. Ara, ‘Yesus ikin weik ubuk bukni, namin asa arye, namin kibuka, teleb kibuk touk, anggun bapye atonun wininamlum’ tenen, wipsukce, nun diba tenenyab nang ati, pitin kilin nang atonun kunum kipdeipsuke.
Diba tenena kum nang arye, wininyak bukni, anggunda diba tenelulum ninye ara, Allah arye, ‘Na mapu kibikirye, diksukumuk unamak’ tenen, akunum wibuka deiamsuke. Tonda, ‘Na piluk dokirye, ninye ap, Allah ap, ansinilina deiyok nang unamak’ tenen, wibuka deiamsuke. Anggunda kunuknak noutam atonun, malye ulamluma noutam ulamlumbuk, Allah yukubsukce, dobuka teleb dirinak atonun delilbisuke. Winipsuka deiyok ara, ‘Allah el si erebuka, elti, telebe nyabuka, pia unamak’ tenen, dirinak delilbisuke.
Yuk nang arye anggunti, malye upsikcopura, tamubuka kwang dakana meme. Tonda, yuk nang arye anggunti, yu bobuka malye yupu nyapsikcopura, tamubuka sikti, malye yupu kum nyalanamlulume. Bukni, “Allah arye, ‘Teleb ulinamsile’ tenen, Allah moronamsine,” nyabuka, teleb yupu uk, tamubuka nyanamlulume. Anggunce yuk nang ati, ‘Teleb yupu nyalinamak’ tenen, Allah arye wibuka yukupsuk anya arye, winimumnyopura, Allah arye teleb ulinamsile.
Winibuka umunye talak noutamak arye, ikin ning ton upsilyopura, Allah elce anggunti, teleb kipdeipsilirye, ‘Darapdongobuka unamak’ tenen, mikip arepsilyopura, pil pia palibuka dona ati deiyok ning arenamsile. Allah arye, ‘Sik ap, Yesus Kristus ap, kanye dukdongobuka unyaka deice arye, pia kam unamake. Teleb arye dirina kan-kan ak, na ap dukdongobuka neika unamap’ tenen, yukupsuke.
Anggun nirya ara, Allah ap, nun Deiyoknye Yesus ap, akunum kel biknamluma anya arye, ‘Yesus ap, Allah ap, anggun ap, kanye dukdongobuka ululuma deice arye, telebuk unamlulum’ tenen, Allah morosunune. Ara, Allah arye bico tenepsilirye, talye melibuka arisulul ning ap, Allah ap, neikauk teleb ubuka umunce, teleb kanye bobuka una ati arisulul ning ap, ‘Weik upnin banamsil’ tenen, Allah morosunune.
Ara, Allah arye, ‘Sik diksukumuk unamak’ tenen, el pia teleb nyalin yupu akunum areamsuk ning ati ara, anggunce pia pi dobuka pil donamlum ning ara, laka nyapnusine. Anggunce Allah ati, diba akunum tenyamlum bukni, pia diksukum una ara, tonap tabakanamlulume. Diksukum una ning aupmasilyopura, pung un bisik una ati, weik kel bikna kina deiyok ning ton tabakanamlulume.
Weik arye kel kina deiyok ning akunum aupmasilyopura, anggun nong ap, anggun un ning ap, ‘Malye ubibyak’ tenen, pia kalikilamunce, memelonamlulume. Anggun babye, anggunti kalikdamunce, kalikdana un ning akunum aupmasilyopura, ikin ning auapsilya babye, batakna kum arye, pil pia palibuka dona ati, una deiyok ning ton, tabakanamlulume. Batakna kum arye, pil pia palibuka dona ati winin ning, akunum aupmasilyopura, Allah diksukumuk ulye touk, teleb mikne un ning ton tabakanamlulume.
Sikti lila yupu nyan nang ara, nun Deiyoknye Yesus Kristus, nun Lyenanye kel bikika deice arye, diba tenena kum ninye malye wininyak ning bataklamik bukni, ila tamubuka tonap aninguk talibuka, wininmacebuk, aning arye sik talima koupdongoplirye, bisibuka pia malye-malye wininyake. Ara, diba min kum teneabik talak ara, mitik malye winilamik bukni, wini talak ara pia weik malye-malye wininyake.
Yuk yupu diba tenebuka kum wininamlulum bukni, nun Deiyoknye bira, nun Lyenanye Yesus Kristus kel kibuka el ap, dukdongobuka ululum ning ap, Yesus bico tenepsilirye, talye melisilye ning ap, ‘Weik upnin banamsil’ tenen, pia palibuka pil donamlume. Ara, nun Lyena Deiyoknye Yesus Kristus ati, nun nirya el si weik arye erebibirye, ‘Elda weik mambulnye tenepnamap’ tenen, Allah moronune. Ara, ‘Wini talak babye, aminyan doryanamle talak nirya babye, el siuk weik unamle’ tenen, Allah moronune. Telebe, akunuma. Na Peterus arye nyapsine. Asukum anyuk sekuka deipsine.
ကြော်ငြာတွေ