2 Korintus 7:7 - Eipomek

⁷ Talima kwa dakuka melipsuk ning ara, Titus arye nun dam yayuk deice arye winipsuke. Tonda, anggunce Titus ati meliplum ning laka nyapsukbuk, kekebupu deice arye, nun ton kanye talima melibuka kwa dipsuke. Titus arye nati nyapnuke. “Kume, sik Korintus mutuku ninye arye an Paulus ati, ‘Se, el ap epdatibye’ tenen, patalibuk, tenekinyake. Tonda, ‘Paulus ikin upliba, Se, yata wiriptibya deice arye, Paulus meliptibye do?’ tenekinyake. Tonda, sik Korintus mutuku ninye arye, ‘Malye winilamububuk, Paulus arye wenepsuk ning ati, talima bouku sukubuka unyabe,’ nyapkike. Ayupu nirya ara, Titus arye laka nyapnuke. Kanye deibuka ulamse bukni, ayupu nirya nyapnuka ati ara, anggun Korintus ninye ati, na kanye deipsirye, pin-pin asa arye upse.”

2 Korintus 7:7 ပူးပေါင်းရင်းမြစ်များ

Mazmur 141:5

Allah Ance, “Aning ara wininamlume. Aning ara, pia kum wininamlume,” nyapdeiamsulum yupu, pia moubuka talilulnye birye nati, “Anda malye winipmalame,” nyabuka, wenepnutua babye, aning ara teleb uka. Ara, elce bico tenenulula ati, anyanulul yupu ara, teleb uka. Atonun, Allah ance, “Aning ara, wininamlume. Aning ara, pia kum wininamlume,” nyasilyam yupu, pia batakna kumce, tuba talibuka winilulnye birye nati, “Wininmanilama ara, bataknulyame. Aning ara, kum wininamlame,” nyabuka, wenepnutua babye, aning ara, pia telebe. Tonda, sik malye winin ninguk talibuka wininyak nang arye, nati, “E anye bira, nun kwit koproba ulula ati, elti, si erenamabe,” nyabuka, ‘Sikce aning nyapnikcak’ tenen, ‘Na lik,’ tenenuna ati, na ilil unmanile. Deiyok ara ani. Ara, sik anang arye, pia malye-malyeuk wininyaka ati, narye an Allah ati, “Anang ara, wenebuka opminyakarye, sik malye wininyak ning nirya ara, kum kipdeipnalyame,” nyabuka, tuba morokunune.

Mazmur 30:5

Amapo, Allah ati, batakna kumce, pia diba tenebuka, eluk tuba talilum nang nirya ara, nun ni koproba Allah Yahweh ati, kanye delin mot nyapmunyakarye, el siuk erenamlume. Tonda, nun ni Allah ara, malye un ning tonok babye kum ulirye, pia teleb, Leknye ulula ati ara, elti, ‘Telebe,’ nyabuka, si erebuka kinamlume.

Mazmur 38:18

Se na ni Allah. Narye pia malye winin ning talibuka, malye weik winilamse ning ati, laksukum arye nyapnarye, aning batakne. Tonda, na akunum malye winilamse ning ati, pia malye kanye bonune. Na malye winilamse ning ati, na talima noutam nirya ara, nakina talinulule.

Mazmur 51:1

Raja Daud birye, mot nyana deiyoknye, Kor ati, mot nyabuk.

Matius 26:75

Yim ayam arye ngalukukopura, adiparyuk, Yesus arye Peterus ati min talak nyapmok yupu ara, Peterus ila tonap tenebuk. Tenebukce, “Se, Yesus arye, ‘Yim ayam like bitinye kum kamupmalye talak, anye bira na walwale,’ nyabuka, like winilye deice arye pilipnamanilame,” nyapmanu touk, ‘Na akunum winipne,’ tenebuk. Utenebukce, el kanye talima pia ikin ubukba, anang asukumuk batakuka, bai tam biyukce, weik arye engenmok.

Matius 5:4

Sik kanye deibuka telebuk winin nang ara, ani. Ara, sik babye malye winin ning ap, yuk nang malye winin ning ap ati, ‘Se,’ tenebikirye, mambul kanye bobuka engenamak nang ara, Allah arye, sik talima kwa dibuka melinamle. Aning ati ara, sik kanye deibuka telebuk unyaka atonun, pia unamake.

Lukas 22:44

El opnamik ning ati, kanye imun upmokce, malye kanye bobuka, mikip arye Allah moronmokura, el nong mek bongobukce, mek tuku deice sakanmok ning ara, ninye opdakceura, ining weik balamle touk, nong mek weik bongobukce sakanmok.

Rasul 11:23

Dopkwetebikura, Barnabas Antiokia mutuku biyukopura, Allah arye anang ati, bico tenyamukce, pia teleb kibuka melipmok ning eibukce, pia kanye deibuk. Barnabas kanye deibukce, anang ati nyabuk. “Anggun Yesus diba tenelulum ning ara, batakna kum, pia talibuka unamlulume. Tonda, anggun kanye teniltona kum arye, anggun kanye talima bokoltona kumce, anirya ansinibuka, nun ni Yesus pia arenamlume. El tibuk pia arenamlulume,” Barnabas arye anang ati, teleb yupu nyabuk akarye, sik talima kwa dibuk.

Roma 1:12

Winipsitinyopura, anggun diba tenelulum deice arye, nati talima kwa dinamlulume. Aning atonun, na dib tenenun deice arye, anggun Roma mutuku tam ululum ninye ati, kanye talima kwa dipsitinye. Winipdatipyopura, nun nirya Yesus ati diba tenenyaba deice arye, ‘Nun talima kwa dipdatibirye kanye deibuka, neika dukdongopdatibye’ tenen, nyapsine.

1 Korintus 5:2

Se, aning ara, aupmal bukni, anggunda weik kanye erebuka kwalinauk ululume. Anggun ton moubuka kum tenelulum do? Teleb ning ara, anggunce, ‘Se,’ tenebuka, mun tulubuk ati, el li koprop domuk kil ati talye yobuknye bira dobuka, anggun kan-kan noutamak arye, bai tam yakdongoptumopura, aning tonok ara pia telebe. Aning kum winipmunyopura, tuba malye winilulume.

2 Korintus 1:14

Ara, minop ara anggunce nunti, mitik kel bikamsulum touk, aminyan talak ara, weik arye kel biksumunce, bikamsulumce, nirya moubuka tenepsumunyopura, anggunce nunti, kanye deibuka, “Anggunda pia telebe,” nyabuka kanye deipnamsulume. Aning atonun, nun Deiyoknye Yesus arye, tukwak mutuku tamubuka yanamle talak ara, nunce anggunti, “Anang ara pia telebe,” nyabuka, kanye deipnamsiyabe.

2 Korintus 1:4

Nun ikin usilye talak noutamak nirya ara, elce kanye talima kwa diprongobuka melisulule. Kanye Talima kwa diprongobuka melisilya deiyok ara, ‘Yuk ninye ton ikin uplye talak ara, na mapu arye anang ati, talima kwa diprongobuka melinamak’ tenen, melisulule. Yuk ninye kanye imun upliba, ‘Yata wiribuka deice arye melipsitibye do?’ tenena kume. Ara, Allah arye nunti, talima kwa diprongobuka melisilya mikip deice aryuk, nunce yuk nang ati melinyabe. Yuk ton kume.

2 Korintus 2:9

Asurat sekeiyamsise deiyok ara, ton nyapnusine. Ara, ‘Ujian kilamaka atonun, anggun Korintus mutuku ninye ati winipdesiniba, yata teleb winin ning do nirya, na nyanye yupu nirya kekebuka, teleb winipnamak do, kum do? Ton ning ara, bataknamak do?’ tenen, asurat sekeipsise.

2 Korintus 5:2

Im deice kintinipsuk ning aupmal bukni, tuba tukwak ning noutam akuk unyap talak nirya ara, ‘Se, winiryuk baju ongonyak touk, Allah arye im deice nong kintinipsuk ning ara, akunum dobuka ongoptibye’ tenen, pia patasiliba, malye nyabuka unyabe.

2 Korintus 7:6

Kanye imun ulamsuk bukni, ikin ulamle ninye nirya ati, kanye talima melibuka kwa dakuka melinanye bira Allah arye melipsuke. Ara, nun kwit Titus ara, nun dam yasuk deice arye, Allah arye nunti kanye talima melibuka kwa dakuka melilamsuke.

2 Korintus 7:8

Ara, yuk yupu ton nyapnune. Narye anggunti, wenena surat minop ning sekeipsise. Asurat eipluma deice arye, malye kanye bobuka engeplum ning ati, ‘Se, aning ara, kum winiptinye’ tenen, malye kanye bopsi bukni, wini talak ara, aning tuba kum tenenune. Winira na kel bikse. Na surat deice arye, tia talakuk malye kanye bobuka engeplum bukni, aminyan ara, ila tuba tamubuka ton teleb ning winiluluma anya arye, wini talak ara, na kanye deipne.

2 Korintus 8:16

Narye anggunti bico weik tenesinye touk, Allah arye Titus el talima noutamak bico weik tenena deiyok ning aribukba, el Titus ababye anggun Korintus mutuku ninye ati bico weik tenesulule. Aning ati ara narye Allah ati, “Telebe,” nyanune.

Pilipi 1:20

‘Winiptinye’ tenen, na pia patanululbuk, ‘Dipkoprop wininamne’ tenen, kanye deibuka, tuba tenenun ning ara, nyapnusine. Ara, na nyapnamne yupu ap, na wininamne ning nirya ap, deice arye, ‘Malye winipnikca deice arye alye kum dakdanamne’ tenen, pia patanulule. Alye una kum bukni, minop talak na winilamse ning nirya deice arye, Kristus el si ereiyamsa atonun, wini talak babye, ilil kum, balye tam kipnirye, ‘Na wininamne ning nirya deice arye, Kristus el si erenamne,’ pia tenenune. Ara, na kam unarye do, dipnarye do, adeice arye Kristus elce, el si ereipnamle. ‘Na kam una babye, dipna babye, telebe uka,’ tenenune.

Kolose 2:5

Yupu seksina ara, talye ati kume. Ara, anggun ap, na nong ap, neika amutuku uk kum unyap bukni, narye, ‘Aninye ara, weik mambule anya arye, melinamne,’ pia tenesununa ati, ayupu nyapsine. Na kele, anggunda, Kristus ati dib tenebuka, pia kanye lamabuka diksukum umunce, teniltona kum arye, tonok kanyeuk bobuka, telebuk ululuma anya arye, na weik kanye arye delisunune.

1 Tesalonika 3:6

‘Nun pil dolamubu ning ara, nong kum upsuk do?’ tenen, ilil ulamnuk bukni, wini talak ara, Timotius arye anggun dam anirye, nun dam akunum yanmasila anya arye, anggunce Allah ati, dib teneplum ning ap, yuk ninye ati, bico tenebuka melilamlum ning ap ati, teleb yupu akunum laka nyalyanmasile. Tonda, nyapsuke. “Sik Tesalonika ninye arye, sik ap neika ulamik talak ati, tuba tonap tenebice talak ara, kanye deibuka pin-pin kanye bonyake. Tonda, Paulus an ap, an neika ululum ninye ap arye, sik Tesalonika ninye ati, ‘Se sik ton eibuka, epdatibye’ tenen, pia patasulul touk, sik Tesalonika nang arye, sik nirya ati, atonun patalule,” nyabuka, Timotius arye nunti laka nyapsuke.

1 Tesalonika 3:8

“Sikda, nun Deiyoknye Yesus ati, dib tenebikirye, kanye dukdongobuka, pia kanye lamabuka unyake,” nyabuka laka nyapsuk ak, akunum kekebupu anya arye, nunda, dipkoprop pin-pin kilisululume.

Ibrani 2:1

Arup akunum nyapmasin yupu nirya aupmala ati ara, peteren nang arye peterelamsikba, kekelamubu yupu ara, pia kanye moubuka tenenamabe. Ara, ‘Mangkau kanye bobuka, walwal arye, Allah arye nyapdeipsuk bisik batakuka, yuk malye bisik kirikuka bipyak’ tenen, nyapsine.

Yakobus 5:17

Ura, minop talak ulamuk nabinye Elia ara, nun talye ulamap nang atonun ulamuk bukni, elce, ‘Mok kum cepnamle’ tenen, pia diba tenebukce, pia pi dobuka, Allah morobukopura, keting tamun winilye ap, ton keting tamun noutam ap deice arye, mok pia kum celamuk. Dou uk malamuk.

2 Yohanes 1:4

Yuk nang arye, anggunti nyapnike. “Nun ni Allah arye, ‘Wininamlulume,’ nyapsuk touk, anang nirya kum bukni, anggun kan-kan noutam arye, ton ninye ara, Allah el dipkoprop yupu kekebuka diksukumuk unyake,” nyapnike. Nyapnikba, kekepsa ati, na kanye pia teleb deipse.

Yudas 1:3

Na kayapum, anggunti, bico tenesunune. Otalak arye, ‘Anang ati surat seknamne,’ tenyamsise. Asurat noutamak ara, Allah lyepsukce, el ap, kanye talima dukdongobuka neika unyap ning ati, ‘Laka nyabuka seknamne,’ tenyamsise bukni, yuk nang arye, “Tilila yupu peterena nang anggun kan-kan noutamak yanmake,” nyapmekbuk, kekepsirye, ‘Aning ara, weik mambul anya arye,’ winira utenepne. Ara, ‘Aminyan talak kume, tilila yupu peterena ati, ayupu ara, adiparyuk yupu seknune’ tenen, asurat sekeipmasine. Wini talak sekmasin yupu deiyok ara, ani. Ara, tilila nang yupu peteresiceura, malye ning yuk tenena deice arye, Allah yupu akunum diba tenemunye ning batakmunyeura, malye upsilyake. Malye upsilyak anya arye, ‘Allah arepsuk yupu uk, pia moubuka talibuka unamlulum’ tenen, ayupu sekeipmasine. Allah yupu diba tenebupu ning ara, tonok talak aniryuk Allah arye nun diba tenenyap ninye ati akunum arepsuka ati, yuk talak arye, yuk yupu tonap, kum tabakalinamsile. Akunum arepsuk ninguk diba tenebuka talinamlulume. Yuk yupu tabakuka diba tenena meme.