Narye sik aninye ati wenebuka supse. Winipsirye ton tam nang ara kama arye deplopse. Ton tam nang ara, sik potong nirya kobuka batakse. Winipsopura, narye tamubuka nyapse, “Anggunda dipkoprob Allah el si deice nyalin yupu nyaplulume. ‘Nunda tuba tonap, nun kilmapu dobuka, sik yuk mutuku nang ati kum arenamabe. Tonda, nun mapu sik kil dona ati, yuk mutuku kilapu dobuka kum arenamabe. Tonda nun babye, yuk mutuku kilapu ton, pia kum dolbanamabe,’ nyalin yupu deice arye nyaplulume,” nyapse.
2 Korintus 7:11 - Eipomek11 Ara, anggun Korintus ninye ton tenipdelulume. Wenen surat dopdeipsukba, Allah arye anggun talima noutamak pil dobukba, anggunda mambul kanye bobuka engepluma deice arye winipsuk ning ara, telebuka. Ara ani. Anggunce nati, ‘Anang ara, teleb nang tenepnamsil’ tenen, pia pi dobuka yupu nyalamnulum ning ap, tonda, ‘Malye winipsuk ning kum daneiptibye’ tenen, pi dobuka pil dolamlum ning ap, tonda, ‘Se, yata ati malye winin ning nun noutamak tuba upmasil do?’ tenen, ilil kanye bobuka ululum ning ap, tonda, ‘Malye winin ning batakuka, teleb ninguk wininamabe’ tenen, patana ap, ‘Malye usilye ning batakuka, teleb kibuka mupdeipnamap’ tenena ap, tonda, malye usilye ning ati, “Dauplye,” kum nyanamap bukni, malye ning nirya ati ‘Yupu bokeibibirye, lipsisiknamap’ tenena ap, anirya ati ara, na kanye ara, telebuka. Adeiyok nirya ati ara, anggunce apil nirya dolamluma deice arye, ‘Anang ara, teleb winin ninyeuk unyak’ tenen, laka upsilaba akunum kel kisinyabe. အခန်းကိုကြည့်ပါ။ |
2 Korintus 7:11
54 ပူးပေါင်းရင်းမြစ်များ
Ati ara, ayupu nyapmanilamba kekepmana deice arye, ‘Na nyalamse yupu ara, dipkoprob malye yupu nyalamse,’ kunum tenepne. Utenepmana ati, ‘Yata deiyok ati nyalamse do?’ tenen, ikin kanye bobuka, alye dakdana anya arye, arup malye nyanmanu ning ara, bataknirye atu dobuka, na kisok deice deipna arye, butbuta deice bukmane. Ara, pia walwal arye nyanmanuba, winira kel kipmana ati ara, na malye ning batakna arye, ikin kanye bobuka abukmane. Ayub birye nyabuk.
Na ni Allah, narye an ap, an yupu ap ati, ‘Aning ara, pia telebuk ulule’ tenen, pia pataniliba, teninauk ununa anya arye, malye wininyak ninye nirya arye, an yupu yanikirye, malye winin ninguk talibuka, wininyaka anya arye, aninye ati, na yu ara, na damak uku buk dilamle touk, unulule. Ara, talye ati kume. Deiyok ara, Allah ance nyapdeiamsulum yupu ara, na oldan ninye nirya, moubuka kum tenekirye, talye luba kinauk wininyaka ati nyapne.
Na talima noutamak arye, Allah Yahweh ati, pia tuba tenena arye, kanye delinune. El tibuk pia patanulule. ‘Na ni Allah, dan talak yanuka lyepropnamnil do?’ tenen, na kanye talima noutamak ara, anti kintinibuka dinauk unamne. Ninye aik kalikina deiyok nang arye, lukunyan noutam, ‘Yu nang arye yanuka, opsikirye, nun talenyap ning, dalubuka dopropsicak’ tenen, pia dinauk ulamake. Aning atonun, narye, ‘Allah dan talak arye, yanuka lyepropnamnil do?’ tenen, anti, pia kintinibuka dinauk unune. Lukunyan kalikina deiyok nang arye, ‘Se, minopce berektue,’ tenelamak touk, sikda mitik anun aryuk tenenyak bukni, Allah ati tenikunun ning ara, pia weik arye pataniliba, tuba tenenune. Narye anti, pia moubuka dinauk ukunune. Inipmalye babye, berekmalya babye nirya, anti, an siuk erepkinirye, pia kintinibuka dinauk ukunune.
Allah anti ilil tenebuka, nimalye arye kanye dakdongobuka wininyak ninye arye, “Se, nun ni melipsilyame,” nyabuka, morokinyak ninye ara, sikti, melipmince, teleb kililyame. Aninye arye, “Se, yatanye birye melipsutue do? Kume, Allah elcuk melipsutue,” nyabuka morokinyak ninye ara, an kekepmince, aninye nirya ati, melibuka lyelyame.
Sikce nati, malyeuk winilininyak bukni, sik nakina dilamle talak ara, narye sik melina ati ara, teleb kilin ninguk wininune. Sik kanye imun weik nakina dilamukba, narye, ongolamse teleb baju ara, kwiribukapsirye, din ning nirya batakuka, din dina kumce, malye kanye bobuka, ikin weik upnukba ulamse. Tonda, sik nakina dilamuk talak ara, narye sikti, Allah morolamse bukni, elce na moryamse touk kum arepnukopura, ‘Se’ tenen, malye kanye bopsirye, na kisok ara, na taram deice deibuka engepse.
Weik arye kel kinyak nang ara, Allah atibuk ilil tenebuka ukirye, tuba-tuba el siuk erebikirye, malye winin ning ap, malye wininyak nang ap unyakak nirya batakuka, teleb winin ninguk unamake. Sikce, ‘Malye ubipyak’ tenen, malye un ning ap, malye unyak nang ap unyakak nirya, pia leilonyake. Bukni, ninye ton walwal uk ululnye bira, moubuka tenipdelirye, yupu kum nyalula anya arye, ‘Yuk talak ara, yata wiripnamnil do?’ kum tenelule. Lik uk ulula ati, el kanye talima noutamak minopce yu welepliba, yuk nang ati, weik arye derelirye, sikti, malye ulilule.
Aning atonun, yata ninye do nirya, malye upmace talak ara, adiparyuk sik kanye talima noutamak arye, ‘Se, nun malye upmabe,’ tenebikirye, adiparyuk amalye un ning bataklamaka ninye ara, Allah arye aninye ati melibuka teleb ulinamle. Bukni, yuk nang ara malye ubikiba, deiyok nang arye, “Nun kayapu, anggunda malye upmalume,” nyabuka wenebicopura, aninye ara, pia talima kat ninye unyaka anya arye, ‘Awenen yupu nun like, kum kekenamabe,’ tenekirye, awenen yupu ara yaninauk unyake. Aninguk wininyak ninye ara, aminyan talak weik ikin ning dopdopnamake.
Ance nati, weik tonun bico tenenimince, kanye akunum deipnuluma ati, wini talak babye, aminyan dounamle talak babye, ance talipniminba, an damuk neika pia unamname! Winipmanto ara, an kanye ara, na si sekeipniminyopura, apia unamle. Deiyok ara, ‘Yuk kilapu nirya ara, pia tenimince, kum patapnamkila ati nyapkine. Winipmanto ara, an taruk toupne deice, toupne dama wibuka dongopminyopura, pia aulula atonun, nati an kanye delinamnilame. Nun bitinye arye, weik tonun bico tenebuka, tuba-tuba kanye delilanauk unimnya ara, pia mikip weik ulule. Winipmanto ara, ninye dibina ara mikip weik ulye touk, nunce kanye delilanauk unimnye ning ara, pia mikip weik ulula ati, min kum winipmanto ulule. Tonda, ninye tukwak nang arye kam ulamikca ani, pia wisi dakcopura dibina uk unamake. ‘Aning ara kum winipsutue,’ teneptibya babye, dipkoprob aning winipnamsilca! Aning atonun, nun bitinye arye weik tonun bico tenenimirye, kanye delilana uk unimnya ara, pia aunamle. Min kum winiptue tenepne. Winipmanto ning ton, weik uku dinmalya ani, ninye arye auku kum tangalamak touk, weik tonun bico tenepnimince, kanye delilanauk uniminya ara, pia aunamle. Min kum winiptue tenepne. Aning ara, pia min kum winipnamle.
Nun ni koproba Allah, ance nunti, “Anggunda aninguk wininamlume, aning ara, pia kum wininamlume,” nyabuka nyalisiminye ninguk, talibuka dobolbanyabe. Tonda nunce, ‘Se, nun ni Allah, el ap, elce mambul weik pil dolul ning ap, ninye mutuku sirya, im sirya nirya kel biktinge,’ teneplirye, nun kanye talima ap, nun tenen ning ap nirya deice arye, antibuk patasiliba, tuba-tuba tenikinyabe.
Na Allah Yahweh arye nyapsine. “Tukwak mutuku noutam ulul ning nirya ap, im noutam ulul ning nirya ap ara, na taruk koproba arye, kwepdeipsiba ulule. Kanye talima erena kum, ‘Se nun malye unyabe’ tenen, ilil upliba, nimalyap asa unyak ninye ati, na kanye delinune. Tonda, sik malye unyak ning batakikirye, narye, ‘Aning ara wininamlulume, aning ara, kum wininamlulume,’ nyalisinye yupu nirya ara, moubuka kekebikirye, talibuka unyak ninye ati, na kanye delinune.” Allah arye, Israel ninye ati nyabuk.
Sik talye tunim abuka dabukmek bukni, yu kanye bobuka, sik talima pia kat weik ubuka ati, ‘Yesus arye, se’ tenen, pia malye kanye bobuka, yu arye asing aryuk dipra banmok. Winibukce, taruk kwanyamuknye biti, nyabuk. “Anda taruk lelekuka arepnilyame,” nyabuk. Nyabukopura, taruk kwanyamuknye birye, el taruk ninikuka aribukura, adiparyuk el taruk teleb kibukba, taruk ninikeibuk.
Aninye nirya ati wenebuka bai tam yakuka dopkwetebukura, Yesus elce wipdeiamuk nang arye, Allah yupu noutamak sekamik yupu ila tuba tonap tenebik. Sik tenebik yupu ara ani. ‘Naie, ninye nirya arye, an weik mambul aik ati, ‘Si erenamkiak’ tenen, pia pi dobuka, pil dopnyopura, kanye imun ning weik unamnile.’ (Mazmur 69:9)
Ura, Paulus arye, ‘Silas ap, Timotius ap, na ak yanamdak’ tenen, dinmok talak ara, Atena mutuku ninye arye sik taruk deice arye ninye urasin atonun kibuka puturup deipnarye, talye ning bukni, si erelamik ning, anyasik noutamak weik deiamik ning ara, eibuk. Eibukce, ‘Se,’ tenebuka pia malye kanye bobuk.
Ura, aning ara nyapnitinge bukni, luba kina meme. Minyuma yo taruk seklobuk ning deiyok ara, sik Israel ninye diba kum tenyamika deice arye batakuk. Aminyan dukdongobuk yo taruk ara, anggun Yahudi yala kum ninye, tuba-tuba diba tenemunya deice aryuk, tuba ululume. Aning ati ara, ‘Nunda, akunuma. Teleb ninyeuk unyabe’ tenen, anggun bidamang kanye talima erelana meme. Aning kum bukni, ‘Nun diba tenenyap ning ara lik upsilyeba, batakipyak’ tenen, adiparyuk ilil asa arye unamlulume.
Yata ninye do nirya, arup arye nyapmasin touk, winibikirye, Kristus el amu tam ubuka, elti, pil dolamunyopura, Allah arye anggunti kanye delinamsile. Tonda, yuk nang nirya arye anggunti, “Sik wininyak ning nirya ara, telebuka,” nyabuka, si erenamsiake. Ati ara, Allah El Dib Kanye melisilya deice arye, diksukum winina ap, yuk nang ap kanye deibuka namin asa arye dukdongobuka neika una ap, pin-pin kanye deibuka, melilana ap, anirya ara weik mambule nyapmasine.
Bukni, ton nangopura tilila yupu deice arye nyanyake. “Kume, nun ninye arye malye winibibya babye, Allah arye bico tenesilirye, namin kipsilyopura, adeice arye, Allah el pia diksukum ulul ning nirya ara, pia lak akuk ululba, ninye nirya arye moubuka kel bikmanto unyake. Ati, nun malye winibibiba, Allah arye nun malye winin ning ati wenepsilyopura, aning ara malye usulule,” nyanyake. Ayupu atonun ubuka nyapsicopura, nunce yata yupu tamubuka nyaptibye do? (Sik diba tenena kum, talye nang arye nyanyak yupu atonun nyapsine.)
Se, aning ara, aupmal bukni, anggunda weik kanye erebuka kwalinauk ululume. Anggun ton moubuka kum tenelulum do? Teleb ning ara, anggunce, ‘Se,’ tenebuka, mun tulubuk ati, el li koprop domuk kil ati talye yobuknye bira dobuka, anggun kan-kan noutamak arye, bai tam yakdongoptumopura, aning tonok ara pia telebe. Aning kum winipmunyopura, tuba malye winilulume.
Wini talak ara nunce anggunti, Allah pia moronyaba ara, nyapnusine. Ara, ‘Sik Korintus mutuku ninye arye, tonok malye winin ning ababye kum wininamake’ tenen, morosenyabe. Ara, yuk nang eipsikirye, ‘E, Paulus arye peterelamuk ninye, Korintus mutuku ninye telebuk unyaka anya arye, Paulus ap, el neika peterenyak nang ap, telebuk unyake. Sik winildena ning atonun kum sakik, tenenamsiyak’ tenen, kum nyapsine. Aning kum bukni, yuk nang arye nunti, ‘Kume. Paulus ap, el ap peterenyak nang ap, urdemuk pil donyaka ati, winildena ning atonun sakik,’ tenepsetinga ababye, aning ara mambul kume. Mambul ning ara, ‘Anggun Korintus mutuku ninye arye, diksukum ninguk talibuka pia unamlum’ tenen, Allah ati morosenyabe.
Malye winina pia kum aniryuk, nunda Allah el amu tam ubirye, el pil melinang unyaba anya arye, yuk ninye nirya arye, nun wininyap ning nirya eipsikirye, ‘Anang ara, teleb nang uk’ tenen, kel biknamaka ati, yatato winin ning noutamak do nirya, diksukumuk wininyabe. Ikin usilya babye, batakana kum, pia pi dobuka pil tuba donyabe. Ikine usilye ning ara ani. Kanye eito-uto winina ap, ikin upsiliba talima sukuna ap, kanye imun ning usilibuk, kanye imun kanye bobuka una ap,
Na kayapu, Allah arye nun nirya ati, ‘Wininamsine,’ nyabuka, arup nyapmasin yupu nyalilamsukba, aupmasila anya arye, yata malye winin ning ap, malye tenen ning ap do nirya, nun nong malye winisilye ning ap, nun kanye talima malye winisilye ning ap, adiparyuk batakibirye, diksukum ninyeuk unamabe. Ara, ‘Nun Ni Koprop Allah ara, pia mambule’ tenen, el si erena ati diksukumuk unamabe. Aning wininamaba ati, na Paulus arye nyapsine.
Talima kwa dakuka melipsuk ning ara, Titus arye nun dam yayuk deice arye winipsuke. Tonda, anggunce Titus ati meliplum ning laka nyapsukbuk, kekebupu deice arye, nun ton kanye talima melibuka kwa dipsuke. Titus arye nati nyapnuke. “Kume, sik Korintus mutuku ninye arye an Paulus ati, ‘Se, el ap epdatibye’ tenen, patalibuk, tenekinyake. Tonda, ‘Paulus ikin upliba, Se, yata wiriptibya deice arye, Paulus meliptibye do?’ tenekinyake. Tonda, sik Korintus mutuku ninye arye, ‘Malye winilamububuk, Paulus arye wenepsuk ning ati, talima bouku sukubuka unyabe,’ nyapkike. Ayupu nirya ara, Titus arye laka nyapnuke. Kanye deibuka ulamse bukni, ayupu nirya nyapnuka ati ara, anggun Korintus ninye ati, na kanye deipsirye, pin-pin asa arye upse.”
Na kanye deipmana ara, ‘Sik malye kanye bobuka engebike’ tenena ati kum bukni, ‘Sik malye kanye bobuka engebika deice arye, sik malye winin ning nirya batakikce, tuba tamubuka telebuk winibike’ tenen, kanye deipsine. Allah arye, ‘Na mapu malye ubikiba, mambul kanye bopnamake,’ tenyamsuk touk, mambul kanye bobuka engepluma anya arye, nunce asurat sekuka nyapsupu yupu deice arye malye kum kipdeipsupe.
Allah yupu sekamik atonun, anyuk wininamlulume. Ayupu ara, ani. ‘Yu upsilye talak ara, dipkoprop malye kum kililanamlulume.’ (Mazmur 4:4) Tonda, anggunce yuk nang ati, yu upsilye talak ara, minopce lipsisikdanamlulume. Yu tuba upmasilibuk, keting wekelbilirye, kuna daklyopura, pia malye ati, winina meme. ‘Mapmapya ambusum noutam aryuk lipsisiknamap,’ tenena kume. Yu upsiliba, tulum kanye bopdamunye talak ara, minopce lipsisikdanamlulume.
Malye yo arye, malye yo duk moulamle atonun, sik malye wininyak ninye, sik talima kunukna deice arye, nong kum upnamle ning, malye ninguk wininyake. Sik wininyak ning nirya ati ara, pia memepdopmunce, aning kum wininamlulume. Talye kanye bobuka, aninye ap, ansinibuka una kum bukni, sik malye wininyak ning ati, laka deice arye, yupu nyapmunce, batakanamlulume. Ara, yuk nang nirya ara, moubuka kel kiptingce, ‘Amalye winin ning bataknamak’ tenen, anggunce, “Kume, sik malye winin ninye ara, kunuknak atonun malye wininyak ning ara ani-ani,” nyabuka, laka arye, laka nyapmunce, yupu sekelongonamlulume.
Aning ati ara, na kayapu, minop talak dipdongobuka, anoutam talak nirya, na yupu kekebuka, teleb kibuka winimunya atonun, pia wininamlume. Tonda na ap, neika ulamubu talak babye, wini talak nun yuk-yuk unyap talak babye, Allah el yupu uk kekebuka, el yupu uk talibuka dobolbalulum touk, apia wininamlulume. Allah arye, ‘Apil winibuka donamak’ tenen, teleb kibuka tenyamsuk touk, ‘Aninguk pataplya ati, apiluk tenebuka donamak’ tenen, anggun kanye talima noutamak melibuka pil dosulule. Winibuka anggun talima noutamak pil dosulul anya arye, anggunce atouk, yuk-yuk tenepmunce, ‘Allah arye lyepnamnil ara, weik mambule,’ tenenamlume. Tonda, ‘Na mikip kumnye birye malye winipnun’ tenen, kanye pia moupnamlulume, na Paulus arye, nyapsine.
Ninye talye yoldalamak ning ap, aning-aning nirya pia pataplibuk, ‘Talya parapkabuka winipnun’ tenena ap ati ara, anggunce yuk nang nirya ati, talye minina yupu nyana ap, malye kilina ap, kum wininamlulume. Nunce anggunti akunum peterepsupu. “Yata ninye do nirya, anyapmasin malye ning ap, aning atonun ning ap, akunum winipmacopura, aminyan ara, Allah weik arye wenebuka opnamle,” nyabuka wenelamsupu.
Allah dib tenen ninye, sik deiyok nang kan-kan arye, dipkoprop tuba malye winibikcopura, anang ati yuk ninye nirya lak kekenmacak arye, malinye nyanamlulume. Wininamluma deiyok ara, sik yuk deiyok nang kekebikirye, ‘Se, nun babye, talye arye malye winibibyak’ tenen, ‘Moubuka dilanamabe, tenepnamak’ tenen, wininamlulume.
Aning kum wininamlam bukni, Timotius anda, ‘Allah arye kanye deipnamnil’ tenen, tonda, ‘Pil pia teleb ubuka donanye unamne,’ tenenamlyame, nyapkine. Tonda, ‘Allah arye winipdenilopura,’ “Anye bira, telebuka,” nyapnamnile. Allah el dipkoprop yupu nyasilye touk, diksukum peterenanye ununa ati ara, ‘Alye kum dakanamne,’ tenebuka unamlyame. ‘Winipnyopura, Allah arye kanye deipnamnil,’ tenebuka unamlyame. Ayupu pia tenebuka unamlame. Na Paulus arye Timotius anti nyapkine.
Anyapmakin yupu ara, pia dipkoprop ulula ati ara, ayupu diba tenebuka talinamlyame. Tonda, ance peterenaminye ninye ati, ayupu dem dobuka, mikip asa arye peterenamlyame. Ara, ‘Allah ati akunum dib tenelamik kili sal arye, yuk talye ning nirya batakikirye, teleb un ninguk pia patapliba, moubuka talibikirye, pia pi dobuka, diksukumuk wininamak’ tenen, nyapkine. Anyapmakin yupu nirya ara, pia teleb yupu ulul ati, yata ninye do nirya, aninguk kekebibirye, talibuka wininamyaba deice arye, ayupu arye, telebuk kilisulule. Ninye nirya ati, nyapkine.
Ura, na kayapo, Allah arye el mapu nirya ati, “Na ap, neika dikdik sena ati, kintinipdeipsise mutuku ara, dolonamlulume,” nyabuka, nyalilamsuk yupu tuba aupmasila anya arye, aning ati ara, kanye moubuka unamabe. Ara, aminyan talak nun kan-kan arye tonoknye ati do, tonok kil ati do, Allah arye, “Kume, aninye ara, na nyamse touk kum wininyaka anya arye, na ap neika dikdik sena ati, kintinipdeipsi mutuku ara, kum dopdoptinge,” nyabuka, ‘Yupu lepsisikuka bokeipsilyak’ tenen, kanye moubuka unamabe.
Amalye un ning akunum nyapmasin bukni, Allah arye weik kel bikilina deiyok ning arisulula ara, winira nyapnusine. Minop ara, el kel bikilina deiyok arisilye ning ara, yuk malye ning tonok babye tabakuka kum ulule, diksukumuk ulule. Ton anang ara, ‘Nun nirya talima nimalye aryuk, telebuk neika ulamtibye’ tenen, patalule. Tonda, sikce, ‘Na yupu nyapnikcopura, yuk nang kekebikirye, alye una ap, ilil una ap, kanye ikine ap, kanye delina ap, unamak do, kum do?’ tenen, minopce moubuka teniltonyake. Tonda, ninye arye yupu nyabikibuk, moubuka kekebikirye, nimalye aryuk unyake. Tonda, yuk nang malye ubicopura, ‘Na adiparyuk wenebuka optinye,’ kum tenebikirye, anang ati, bico tenebuka luba kilongonyake. Sik yupu nirya ara, duknuna kum arye, lak akuk laka nyanyake. Ton ninye urasin eibikirye, sik kanye kum bokolinyake. Sik teleb ubuka diksukum unyak ning noutam nirya ara, duk telebuk moulule.
Anggun Allah morolulum talak arye, nun Ni nyalulumnye Allah ara, ninye tukwak ninye nirya, sik wininyak ning dipdesilirye, sik wininyak ning atonun yupu bokeipsilirye, wenesulule. Ninye yuk-yuk ulamak touk, yupu bokuka kintinilisulule. Allah arye ninye urasin dipdebuka, ‘Na ka,’ tenena kum aniryuk, nun wininyap touk, yupu yuk-yuk bokuka kintinilisulul anya arye, anggun tukwak mutuku tia unamlum talak nirya ara, ‘Allah elda weik mambule. Malye winibibyopura wenepnamsile’ tenen, ilil uplibuk,pia leibuka diksukumuk unamlulume.
Winiryuk deibice mapu, sik nin yapu moum ati pia patalamle touk, Allah el pia teleb yupu, talima ak wisibuka teleb ulisulul yupu ati, pia patanamsile. Winibuka patapsilyeura, kekebuka dolonauk upmunyopura, Allah arye lyepsuk ak, el ap talima dukdongobuka umunya ara, pia wisipnin balamlya ani, telebuk unamsile.
Tonda, yuk nang ara, malye-malye weik winiyak deice arye, uku dilamle mutuku binmanto ubicopura, lyebuka dopropmince, tonap tamubuka, Allah el diksukum bisikuk delilyangnamlulume. Winipmanto ning ara, ‘Barye suse talyamlye ninye ongamikce baju nun kip ninye ongobibyopura, barye suse dakdongopsilyak’ tenen, kum ongonyabe. Kum ongonyap touk, ton ninye ara, sik malye winin ning pia malye ning anya arye, anang ati bico tenebuka melipnamlulume bukni, ‘Na babye, aning malye winipnilyak’ tenen, ilil-ilil asa arye, anang melibuka unamlulume.
ကြော်ငြာတွေ