Nyabukura, Yahweh arye amalaikat ati asibuk. “Yata wiripminya deice arye, el talima tamopnamle do?” nyabuk. Nyabukba, amalaikat arye nyabuk. “Aning ara, narye Ahab dam yupu nyalinamak nang nabi-nabi nang ati, sik talima noutam tilila yupu binuka nyapniba, kekebikirye, atilila yupu uk Ahab biti binuka nyalinamake,” nyabuk. Amalaikat arye nyabukba, Allah el si Yahweh arye tamubuka, aisa ati nyabuk. “Aning binuka nyapdeipminba, anabi nang arye Ahab biti atilila yupu nyabicopura, dipkoprob kekebuka Ahab talima tamupnamle. Ati, adiparyuk winipnalame,” nyabuka Allah arye, aisa ati nyabuk. Mikha birye nyabuk. Ura, aning eibuk ning nirya ara, Mikha birye Ahab biti nyabuk.
2 Korintus 4:4 - Eipomek4 Ara, tukwak mutuku nirya talilye Deiyoknye Isa Mutuku Dongonye arye, sik dib tenena kum ninye ati, asing kuna atonun kum ning arilule. Winiplyopura, anang ara, Allah el dipkoprop yupu kekepman kum unyake. Winilya deiyok ara, sik kanye talima noutamak, Kristus el laka teleb yupu deice arye, Kristus el pia teleb ulya ning kel bikikirye, sik talima ak dirina atonun upliba, ‘Moubuka kel bikicak’ tenen, Isa Mutuku Dongonye arye ninye ati, asing kun ning arilule. Ariliba, Kristus el pia teleb ubuka weik mambul ulya ara, el laka teleb yupu ara pia bikman kum unyake. Allah el pia teleb ulye touk, Kristus el babye atonun ulule. အခန်းကိုကြည့်ပါ။ |
2 Korintus 4:4
42 ပူးပေါင်းရင်းမြစ်များ
Aninye ara, ‘Sik kanye talima kat unamle’ tenen, na yupu kum kekepmanto una deiyok ning arepnyopura, sik kanye talima katauk unamle. Aning atonun, amul kunukna deiyok ning arepneba, sik amul arye teleb kibuka, kum kekepmanto unamake. Tonda, sik asing kuna deiyok ning arepneba, asing kupliba, narye mambul pil donamne ning ara, bita kum eipnamake. Aning-aning nirya ara, sik wenena ati, kum winipnyopura, sik asing arye eibikirye, sik amul arye kekebikirye, sik kanye talima pum tam moubuka tenebikirye, kel kibikcopura, pia ilil kanye bobuka, unyak ning nirya, batakikirye, ‘Na dam tamubuka yacak’ tenen, nyapne. Ara, na dam tamubuka yatingopura, narye sik malye ning ati, kilipnirye, teleb kipdeiptinye bukni, sik malye-malye weik wininyaka ati, ‘Aning kum winipnamak’ tenen, talima kat una deiyok ning arepneba, kum kekepmanto una deiyok ninguk, talibuka pia unamake. Allah arye, ayupu nyapdeibukba kekepse.
Ton ninye ara, Allah yupu kekebuka dolonyak bukni, yo duk tirmangka weiyang-weiyang kan-kan sakmok ning atonun wininyake. Ara, tukwak mutuku noutamak arye, ‘Aning doproptinirye teleb uptinye do? Yuk ning aupnutuba teleb uptinye do?’ tenen, teniltona ap, kanye bokoltona ap deice arye, Allah yupu batakalogonyake. Tonda, “Bona weik doproptinirye, telebuk uptinye,” nyabuka, sikce sik bidamang arye, tilila yupu talya nyaldanyake. Tonda, aning-aning nirya weik patapliba, ‘Aning ton doproptinye, aning ton winiptinye,’ tenenyak deice arye, lik upliba Allah yupu batakalogonyake. Wininyaka ara, tirmangka weiyang-weiyanga arye apamuk ning koupdongobukce, angkalung kipdongobukba, wen-wen alamuk touk, talya tukwak ning aning-aning nirya pia tenenyak deice arye, Allah yupu kekelamikce ning ara, batakiceba duk kum mouplirye, talya urdemuk bolule. Ara, teleb ubuka kum kekekirye, Allah yupu pia kum dobolbanyaka ati nyapsine.
Yupu nyalamapnye bira, ninye nong atonun dayukce, tukwak mutuku yayukura, nun kan-kan noutamak neika ulamubu. El pia teleb ubuka ulamukba, elilamubu. El pia teleb ulula ara, talye ati kume. Ara Allah el Mi Koprop tonok ululnye bira, el uka. Allah el Mi Koprop ulamukce, el dipkoprop una ap, el dipkoprop yupu nyana ap, el kanye aryuk tukwak ninye ati bico tenebuka, pia melina deiyok ning ap, anye deice weik arye uamuk. Nun ni koprop Allah arye anye bira dopdeipsukba, pia telebuk ulamukak, elilamubu.
Minop talak arye dipdongobuka, wini talak noutamak nirya arye, nun tukwak ninye arye, Allah el urasin pia kum elilamubu. Bukni, nun ni Allah, el ulyak ululnye, el Mi Koprop, Allah ap neika ururaknye bira, Yesus arye Allah el ulul ning laka elilule. Yesus el ulamuk ning ap, yupu nyalamuk ning ap deice arye, Allah el ulul ning lak kibuka laka nyalamsuke.
Nyabikura, Yesus arye domon yupu deice arye tamubuka nyabuk. “Wini talak ninye moubuka kel bikna ati, dirina upsil ning ara, anggun ap mitik anunuk, anggun neika unamsile. Dirina tuba wapsilye talak ara, teleb bisik adiparyuk banamlulume. Aminyan talak ara, kunuknauk unamsila ati nyapsine. Kunuknak balinye bira, el bisik banmalya ara, moubuka kel kum biktue.
‘Allah arye aninye ati, asing kun ning akunum aribuk. Tonda, sik kanye talima noutamak ara, kat akunum kibuk. Allah arye aninye ati, asing kuna ap, talima kat una ap, akunum aribukba wininyake. Sik asing arye teleb kibuka kum elinyake. Sik kanye talima noutamak ara, ‘Deiyok ani’ tenen, moubuka kum tenenyake. Sik kum kel bikmanto pia ulamika ani, sik malye winin ning batakuka balye tamubuka, na tam kum kipnamake. Sik malye wininyak ning bataktingopura, narye sikti, kwetebuka, teleb ulilamtinye bukni, sikda talima kat ninye anya arye, aning kum wininamake. Allah arye nyabuk.’ (Yesaya 6:10)
Na yasirye, sik kan-kan noutamak, yuk nang pia kum winilamik ning, ninye winipmanto kum ning, pil kum doptinyopura, kum elilamtingtoura, sik malye winin ning sik nong deiceuk tuba kum uptue. Bukni, wini talak akunuma. Narye ninye kum winipmanto ning, winipman kum pil weik arye domsiba, sik elilamik bukni, na ap, na Ni Koprop Allah ap ati, ‘Nun lik,’ tenesinyake.
Ura, na ni birye, weik malye winina deiyoknye, Isa Mutuku Dongonye ati, yupu lipsisikuka wenepnamle. Isa Mutuku Dongonye, tukwak mutuku nirya talibuka, weik malye deiyoknye, ulamle bukni, na pil dopnamna deice arye, Isa Mutuku Dongonye bisibuka opnyopura, el kum danamle. Ati Allah El Dib Kanye arye, Isa Mutuku Dongonye el amu tam unyak ninye ati, wenepnamle. Yesus arye nyabuk. Nyabukopura, ayupu tonap nyabuk.
Aminyan talak ara, Yesus arye amutuku ninye ati nyabuk. “Nara, tukwak mutuku im sirya, mutuku sirya unyak ninye ati, dirina deiyoknye unune. Na nyasinye yupu kekeplirye, talibuka dobolbalinye bira, kunuknak pia kum unamle. Aning kum bukni, kam una deiyok dirina ara, el talima ak unamle.” Yesus arye nyabuk.
Narye aning ati dopkwetepnamkin deiyok ara, ‘Sik asing laipnalama’ tenen, dopdeipnamkine. Tonda, ‘Sik kanye talima yuk punubiceura, sik kanye talima kuna atonun unyaka ati, dirinak tamubuka dobuka, delilyanganalam’ tenen, dopkwetepnamkine. Tonda, Isa Mutuku Dongonye, el mikip arye talibukak arye tamubuka, ‘Allah el mikip arye talipnamle ati dobuka, delilyanganalama’ tenen, dopkwetepnamkine. Ara, yata deiyok ati kume. Ance anang ati aning nirya akunum winipminyeura, nati diba tenebikca deice arye, sik talima ak malye tenenyak ning ap, sik malye unyak ning ap, Allah arye meliplirye, aning kum kipdeipnamle. Tonda, na Yesus ati diba tenepnika deice arye, Allah arye akunum wipdeiamuk ninye ap, ansinibuka unamake. Allah arye aning ati winipnamle. Yesus arye na Paulus ati nyapnuke, Paulus arye nyabuk.
Ara, Allah arye, ‘Tukak mutuku ninye lyepnamle’ tenen, wipdeiyamuknye Mesias el kanye imun ning bobuka ulamlya ani, diplirye, elda minopce kam buknamle. El dipmalya ani, minop kam buklinye birye, el tam nang, Yahudi yala nang ap, Yahudi yala kum ninye ap ati, “Allah arye lyepnamsile,” nyabuka, laka nyaplyeura, ayupu sik kekebikirye, sik talima noutamak ara, dirina atonun upnamle. Musa ap, Allah el yupu laka nyalamik nang Nabi nang ap arye ayupu uk nyapdeiamik. Paulus arye Raja Ageripa ati, ayupu nirya nyabuk.
Aning ara, mambul kum bukni, sik Allah ati dib kum tenenyak ninye arye, ‘Isa si erepnuyap’ tenen, arenyak ning ara, isa mer si erena ati arinyake. Sikce, ‘Allah el si erebuka, el tonok kibuka si erenamak’ tenen, kum wininyake. Isa talibuka unyaka anya arye, anggun Korintus mutuku ninye arye, sik yuk ninye isa si erena ati, arilamikce ning neika dilamunyopura, ‘Mangkau arye, isa ap neika upmunyak’ tenen, nyapsine. Aning ara, na like.
Tonda, narye, yuk ninye sik malye wininyak ning namin kinuna ara, urdem ati kum wininune. Wininuna deiyok ara, ‘Isa ‘Mutuku Dongonye arye, nun mankau kanye bopmabye talak, malye kipdeipsilyak’ tenen, wininune. Ara, Isa Mutuku Dongonye arye nun nirya ati, ‘Anang ara, malye winilinamak’ tenen, dungnubuka malye-malye ulisulul ning ara, nun akunum kel bikamubu. Aning ara, walwal kum usulule. Na Paulus arye nyapsine.
Ara, yuk yupu ton nyapnusine. ‘Kristus el pil dona ati, ninye lyena yupu, laka teleb yupu peterenamne’ tenen, Teroas mutuku binamse talak ara, Allah arye el yupu peterena ati, lo teleb ning akunum kintinibdeipnuk ning ara, eibuka kel kipse. Ara, ninye wekna ati, buplan weik arye kukulilamak atonunuk, pia teleb lo arepnukura, ‘Amutuku ninye petereptinye’ tenen, akunum kel kipse.
Bukni, sik Israel nang ara, Allah arye sik kanye tenena ati ara, kanye bokolton ning aribukba, teleb kanye ubuka kum tenelamik. Kanye bona kum winin ninguk winilamik. Aning aribuk talak arye diprongobuka, atalak noutamak nirya ap, wini talak ap, sik Israel ninye arye Musa sekamuk yupu, mem yupu peterebikibuk, moubuka kum teneptinge. Musa arye el urasin baju arye lelibukura, el urasin dirina moubuka kum eipmanto winilamik touk, wini talak babye Israel yala ninye Musa sekamuk yupu kekenamak talak ara, kanye bokoltonauk unyake. Kristus dib tenebibibuk, el talima dukdongobuka deipsilya deice aryuk, kanye bokolton ning kum uptua ati, sik Israel ninye ara, tuba moubuka kum teneptinge.
Tonda, nun nirya ara, nun urasin lelina kum, kimilana deice arye ninye urasin elilamak touk, nun ubya deice arye, yuk ninye arye, Yesus el winilul ning elinyake. Ara, nun Deiyoknye Yesus Kristus, el pia teleb ulye touk eibikirye, kel bikinyake. Nun Deiyoknye Yesus ara, Allah El Dib Kanye eluk ulule. El pia teleb ulya deice arye, nun talima pum tam pil dosilirye, el teleb ulye touk, nun babye atonun teleb ulisulule. El ulye touk teleb winilisilye talak nirya ara, teleb winipnin balamibya ani, aminyan ara pia teleb wininamabe. Anirya ara, Yesus Kristus aniryuk, teleb ulisulule.
Allah arye, “Kuna noutamak arye, dirina unamle,” nyabuk. Ayupu nyabuknye Allah, elcuk nunti pia mambul ning arepsuke. Ara, nun kanye talima noutamak, el dirina ning arepsuka deice arye, Allah el pia teleb ulul ning ap, pia teleb winilul ning ap ara, bikinyabe. Allah el pia teleb ulula ara, Yesus Kristus el winilamuk ning kel kibibya deice arye, laka usilibuk, bikinyabe.
Nun Deiyoknye Yesus Kristus arye, ‘Atalak malye-malye wininyak ninye ara, sik malye wininyak ning ap, malye tenenyak ning ap deice arye, na mapu malye kipdeibicak’ tenen, ‘Sik malye wininyak ning noutamak arye lobuka lyepnamle,’ tenyamukce, nun malye wininyap ning kilina ati, el babye el bidamang nong arepsuke. Yesus arye nun dekna ati, el nong arepsukba, malye nang arye obikba, nun pununa ati dibuk. Ara, nun malye wininyap ning wenena ati, Allah arye talye luba kibuka oplopsutu bukni, ‘Aninye wenebuka kum oplopnamne,’ tenyamukce, Yesus arepsukba, nun pununa ati dipsuke. Aning nirya ara, nun Ni kopropa Allah arye Yesus ati, ‘Wininamle’ tenen, wipdeiyamuk touk, Yesus winibuka deice arye deksuke.
Minop talak ara, sik Yesus ati dib tenena kum ninye arye, malye-malye winilamak touk, anggun babye, atonun malye winilalume. Asing arye, kum eilinyap bukni, im noutamak balamak Isa mere, sikti, talipsinaba, sik weik deiyoknye Isa Mutuku Dongonye, el yupu kekebuka ulalume. Ara, Allah el yupu yaniltalamak ninye ara, Isa Mutuku Dongonye elcuk sik kanye talima taliliba, malye weik wininyake.
Aning ara, talye kum nyapsine. Nun nong deice ikin ning deipsikirye, nun kanye talima malye kilina ati, usulula deiyok ning ara, ninye arye, kume. Tonda, nunti opmanto usulul ning ara, ninye arye, kume. Aning kum bukni, malye ulul ning nirya talibuka, deice tam mikip ulya deiyoknye Isa Mutuku Dongonye ap, tonda Isa Mutuku Dongonye el amu tam unyak bukni, im ap, tukwak ap, im sirya, mutuku sirya bokuka, talilya deiyok isa mer ap, pia malye tukwak kunuknak mutuku noutamak mikip ulul isa mer ap, asing kum elinyap bukni, im noutamak unyak isa mer ara aning-aning nirya ap, aisa mer nirya arye, nun dib tenenyap ninye ati, ‘Malye kibuka, optibye’ tenen, yaniltasinyake. Ati, winipsikiba, ikin weik usilye ning deiyok ara, ninye arye kume, ara Isa Mutuku Dongonye aryuka.
Allah el ulye touk, el Mi Koprop Yesus babye, pia dipkoprop atouk ulule. Allah ara, ninye asing arye kum eipmantonye ulule. Allah arye aning-aning nirya kintinibuka, deiamuk. Bukni, winipmanto ning ara, ninye arye winiryuk mi deibikceura, ami arye anggun ning nirya talibuka ulamle touk, Allah el Mi Koprop Yesus ara, deiyok kouna deiyoknye pia weik mambulnye ulule. Ulirye, aning-aning nirya talibuka, deice tam ulule.
Ara, Allah arye, ‘Na mapu unamak’ tenen, akunum wiamsuk ninye ati, utenebuk. Ara, ‘Na Allah arye duknyamse yupu ara, wini talak na mapu ati lakak nyapnamsin,’ akunum tenebuk. Ayupu duknyamuk ani, wini talak lakak nyasilya ara, nyapnusine. Ara, “Allah arye Yahudi yala kum ninye ati, kanye deiplirye, weik teleb kipdeipnamle,” nyasulule. Duknyamuk yupu noutamak, pia teleb ubuk yupu ara, “Yesus Kristus arye Yahudi yala kum ninye babye, sik kanye noutamak, el ap kanye dukdongopnamsile,” nyasulule. Anggun Kolose mutuku ninye babye, anggun talima noutamak Kristus dukdongobuka unamlulume. Winisilye talak nirya ara, anggun nirya arye, ‘Kume sirya talak ara, Allah ereipsilirye, im deice weik dirina noutamak, weik mambul ninye kipdeipnamsil’ tenen, diba tenebuka, kintinibuka dinauk unamlulume.
Aminyan yuk talak ara, nun ni Allah pia mambulnye, ara nun Lyena Deiyoknye Yesus Kristus, im deice arye tamubuka dolyanamsil. El dolyanamsila ara, pia teleb ubuka, dirina weik arye yanamle. Men kum dolyanmasilye talak noutamak nirya ara, nun kanye bokoltona kum aryuk, ‘El dipkoprop dolyanamsil’ tenen, kanye pia deibuka, dinauk ubirye unyabe. Ati ara, tukwak mutuku noutamak tuba kam unamap talak ara, pia diksukumuk unamabe.
Allah ara pia teleb ulirye, weik erenanye ulule. Ulirye, weik mambule ulul touk, el Mi Kopropa babye, pia atonun ulula anya arye, weik dirina ap, weik mambul weik ap ulule. Aning atonun, Allah ap, el kanye tenen ning ap, el ulul ning nirya ap, aulul atonun, el Mi Kopropa babye, el ulul ning nirya anisibuka ulule. Allah el Mi Kopropa arye, el weik mikip yupu nyalya deice arye, yata ning do nirya, teleb ulilulba, aning-aning nirya kum kum danalule. El nyalul yupu deice aryuk aning-aning nirya talilulba, teleb ubuka tuba kam ulule. Ninye mutuku-mutuku nirya, sik malye unyak ning kum ubuka delina ap, ninye weik lyena ap, teleb kinilina ap ati, mambul pil akunum dopsukce, ila tamubuka im deice welebukce, Allah el taruk sirik tam bukuke. Aning-aning nirya deice tam ulirye, weik erenanye ulule. Allah ara, Weik Mambulnye, im deice ululnye bira, el Mi Kopropa arye, el taruk sirik tam bulbiyuke.
Ura, yata ninye do nirya, sik diba tenenyak ning nirya akunum batakikcopura, yata wiribuka arye, tamubuka bobitibyopura, ila tuba tonap, sik malye unyak ning ati bataktingce, urasin tamupting do? Kume, aning ara, kum winipmanto. Minop arye, kunukna akuk ulamik bukni, Allah el dirina dobuka sik talima noutamak aribukba, doprobikce el ulamle ning kel kiyamik. Tonda, Allah arye arisilye ning doprobik. Tonda, Allah arye el Dib Kanye aribukba, sik ton doprobik.
Aninguk kum bukni, tonda, Allah el yupu laka nyalamik nang, nabi nang arye sekeiyamik yupu, pia dipkoprop yupu ara, akunum upmasile. Ayupu ara, ninye arye kunuknak banukce talak, weisa ubikibuk, dirina uplibuk, bita dikirye balamak touk, usulule. Allah el yupu, laka nyalamik nang arye seklamik yupu ara, dirina atouk usulule ati, anggunce ayupu moubuka kekenamlulume. Allah ati, moubuka min kum kel kiplum bikamlum talak noutamak ap, Yesus Kristus tukwak mutuku, tamubuka min kum yanaplye talak noutam ap, sik seklamik yupu moubuka kekenamlulume. Aning upnamsil talak ara, beren tam talak kipnamalya ati, tulik bisik yalamle talak ap, ulul kurya tikilyangalamle talak ap, dirina uplibuk, ‘Aning nirya, lakak dinuyabe,’ tenelamap touk, upnamsile.
Aning ato kum bukni, yata nang do nirya, sikce yuk nang ati, ‘Aning ara nun like,’ tenebuka, malye unyak ninye ara, kuna akuk tuba unyake. Ara dipkoprop winina ning kum kel kibika ati, walwal atouk wininyakce, aminyan unamle ning nirya kum tenenyake. Ara asing pun nang arye, bisik balamakak kum dikirye, yukak balamak touk, anang ara malye ubuka walwal wininyaka deice arye, sik ban bisik kum tenenyaka ati nyapne. Ara, sik kanye tenena kumce, asing kun nang winilamak touk unyake.
Asekman yupu ara, winiryuk yupu kum nyapmasin bukni, ton mitik winiryuk ning atouk ulule. Ara, “Wininamlulume,” nyapmasin yupu ara, Yesus el ulamuk ning ap, Yesus el yupu dopdoplumce, telebuk winilamlum ning ap, adeice arye, ‘Ara dipkoprop winibuka,’ tenebuka elinyabe. Allah yupu deice arye, kanye kunuknak ning, dirina uprebanmala ani, kanye dirina ning ara, akunum dirina upmale. Ati ara, “Allah yupu kekebuka dodoplum ning ara, ayupu ara, dipkopropuk ulule,” nyapmasine. Yesus ara, dirina atouk ulula anya arye, dipkoprop dirina ning ara, akunum elinyabe.
ကြော်ငြာတွေ