2 Korintus 3:6 - Eipomek6 Allah arye ninye lyena ati, “Wininamsine,” nyabuka nyalisilye yupu ara, ‘Winiryuk yupu dobuka, peterepra banamak’ tenen, nunti wipdeipsuke. Wipdeipsukce, pia moubuka teleb pil dona deiyok ning aresulule. Ayupu ara, ninye lyena ati, winiryuk yupu ara, mem yupu surat sekenyak yupu deice arye kum ulule. Aning kum bukni, Allah El Dib Kanye deice aryuk ulule. Deiyok ara ani. Mem yupu surat deice sekenyak yupu ara, ninye arye, ‘Anyuk talibuka dobolbayapya deice arye wininamap’ tenen, pirinyak bukni, teleb ubuka kum dobol binmanto kum unyaka anya arye, ayupu ara ninye osiliba, derelamak ning atonun ulule. Bukni, Allah El Dib Kanye ara, el pil dosilya deice arye, ninye kam una deiyok ninguk aresulule. Aning ati ara, Allah el ninye lyena yupu, nyalilamsil yupu, winiryuk ning ara, el Dib Kanye arye kam una deiyok ning arisilye ning deiceuk ulule. အခန်းကိုကြည့်ပါ။ |
2 Korintus 3:6
45 ပူးပေါင်းရင်းမြစ်များ
Nyabikopura, Yesus arye nyabuk. “Aning ati ara, winipmanto ara, tonok aik deiyoknye birye, el dokola ning delilu ak, anyaik pum arye, minop talak deiyamuk ning babye, winiryuk deipmalye ning babye dobuka lakak deiplirye, pil dolamle touk, sikda, Musa sekamuk yupu peterena deiyok nang ababye, atonun unamake. Ara, ‘Allah talisilirye, winilye ning anye,’ nyabuka, nyasinye yupu kel kiplumce, na mapu upmunyopura, minop nyalamik yupu ap, na winiryuk nyasinye yupu ap dukdongobuka peterenamlulume,” Yesus arye nyabuk.
“Anggur mek arepnusina ara, na ining atonun ulula ati, dobuka diplulume. Aminyan na ining atonun nyapmasina ara, lak nyapnusine. Ara, Allah min arye nyalilamsuk touk, ‘Ninye weik arye lyepnirye talinamne,’ tenelamuk touk, dipkoprop na opnikceba, na ining saknamle. Na ining saknamla ara, talya ati kume. Ara na ining deice, ninye mutuku-mutuku nirya, sik malye winilamikce ning ap, malye tenelamikce ning ap ati, kum daneipniba, Allah arye sik malye ning namin kiplirye, na ining deice arye ninye weike lyeplirye, sik kanye talima pia talinamle,” Yesus arye nyabuk.
Anggur mek dinmek talak ara, Yesus arye ayupu nyabuk. “Winipmanto ning ara, amek ara, na ining atonun ulula ati, dobuka diplulume. Amek ara, na ining atonun nyapmasina ara, lak nyapnusine. Ara, Allah min arye nyalilamsuk touk, ninye mutuku-mutuku nirya noutam arye ninye weik arye lyepnirye talinamne. Aning ara, ‘Diba tenepnamniak’ tenen, na opniceura, na ining binamle. Na ining banamla ara, talye ati kume. Ara, ninye mutuku-mutuku nirya, sik malye wininyak ning ap, malye tenenyak ning ap, ati, kum daneipnirye, na ining arye lyepnamna ati, lak bikilina ati aning arepsine,” Yesus arye nyabuk.
Aning winibuk touk, sik din ning dibuka dakalongoyikura, anggur mek makau arye kwebuka dobukce, ayupu nyabuk. “Amek ara, na ining atonun ulule. Na ining deice arye, winiryuk nyalin yupu nyapdeipsine. Bukni, minop talak ara, Allah arye nyalilamsuk ning ara, akunum punuple. Winiryuk nyapdeipsin yupu ara, minop talak nyalin yupu akunum punupmale. Ara anggun ap, ninye mutuku-mutuku nirya ap ati, opnikceura, na ining saklya deice arye, Allah arye sik malye winin ning namin kiplirye, kum danipnamle. Ninye weik lyeplirye, sik kanye talima pia talinamle. Bukni, minop talak nyalilamsuk touk kume. Wini talak Allah nyalisilye yupu yuk ulule. Ara, wini talak babye, aminyan talak babye, na ining deice arye ninye malye winin ning kum danipnamle. Ara, ninye weik lyena yupu ati, winiryuk nyalilye ning nyapne,” Yesus arye nyabuk. (Ara, “Ninye mutuku-mutuku nirya noutamak, kili sal weik, sik malye ulamice ning ap, malye tenelamak ning ap ati, kum daneipnirye na ining arye lyepnamne.” Yesus arye nyabuk.) Nyabukce, ayupu tonap nyabuk.
Allah El Dib Kanye arye, kam una deiyok ning arilule. Ninye nong ap, ninye mikip usilye ning ara, mambul ning pia kume. Ara nong kum upnamle ning uka. Narye nyapmasin yupu nirya ara, Allah El Dib Kanye arye nyalule. Ayupu ati, diba tenepmunyopura, kam una deiyok ning dololulume. Ayupu ara, kam una deiyok yupu ulule. Talye yupu kume.
Na Paulus birye nyapsine. Allah arye nyapdeibukba, Yesus Kristus el pil dopnuka deice arye, ‘Paulus ara, na yupu peterena ati, deiyok kounanye unamle,’ tenyamnukce, wibuka deipnuke. Wibuka deipnukce, el kanye arye bico tenepnukce, el yupu peterena ati, pil dona deiyok ning arepnuke. Winipnuka deiyok ara, ani. Ara, Paulus arye na yupu dobuka, peterepra banamle deice arye, Yahudi yala kum ninye unyak mutuku im sirya, mutuku sirya nirya noutamak arye, ninye weik na yupu kekebikirye, dib tenepneicopura, na talibuka, na yupu kekebuka, na aminyan dobolyanganamniake. Winibiceura, Yesus Kristus el si weik arye erenamake. Ati, Allah arye, ‘Yahudi yala kum ninye, nati dib tenebica deice arye, na yupu moubuka talibikirye, diksukumuk unamak’ tenen, na Paulus ati wibuka deipnuke. Ara, ‘Paulus arye, na yupu dobuka peterelbinamle’ tenen, Allah arye wibuka deipnuke.
Aning ati ara, yata ninye do nirya ati, Allah arye, “Aning wininamlulume, aning ara kum wininamlulume,” nyabuka, mem yupu areamsukba, ayupu talibuka dobolbabirye, diksukumuk winibibyopura, adeice Allah arye nunti, ‘Sikda teleb nang,’ kum tenenamsile. Nun babye mikip deice arye, diksukumuk kum winiptibya ati nyapne. Aning kum bukni, Allah el yupu kekebuka kel kinyaba deice arye, ‘Se, nunda dipkoprop kanye talima malye nanguk unyabe’ tenen, moubuka kel kinyabe.
Ara, Allah yupu noutamak sekeiyamik touk ulule. Ayupu ara ani. ‘Allah arye nyabuk, “Abrahamo, Narye an Abraham ati, yuk-yuk ninye yala-yala weik, daunamak ninye nirya ati, sik apu kopropa akunum kipkine,” Allah arye nyabuk.’ (Kejadian 17:5) Abraham bira, Allah ati diba tenelamuka anya arye, Allah el kanye ara, ‘Sik aminyan talak diba tenepnamniyak ninye nirya ara, sik apu kopropa ara Abraham ulule,’ tenelule. Allah ara, talinye kume. Elce deiyamuk ninye akunum kam bukuka delilule. Min kum ulamle ning bukni, ‘Aupnamle’ tenen, yupu nyalilamle touk, dipkoprop nong ulule.
Bukni, minop talak Musa birye sekamuk mem yupu amutamuk ulamamuburye, malyeuk winilamupe noutamak arye, wini talak Allah arye nunti wini talak akunum lyebuka lopdeipsuke. Ara Kristus dibuk talak ara, nun ni Allah arye Yesus ap, nun ap, kanye talima dukdongopsuk deice arye, akunum loplopsukba, Musa sekamuk mem yupu amu tam tuba kum unyabe. Ati ara, wini talak ara, Musa sekuka deiyamuk yupu uk talibuka, kum dobolbanyap bukni, Allah El Dib Kanye arye el mikip arisilirye, melisilya deice arye, Allah el winiryuk bisikuk banyabe. Winibuka akunum loplopsukba, wini talak, Allah El Dib Kanye mikip deice arye, Allah el teleb piluk nunce talibuka donyabe.
Allah arye wenebuka kum oplopnamsile nyapmasina ara, talye ati kum nyapsine. Aning deiyok ara nyapnusine. Ara, Yesus Kristus pil dopsuka deice arye, Allah El Dib Kanye arisiliba, el melisilya deice arye, dipna ap, malye winina deiyok ning arye, tapu kouamsuka noutamak arye, loltakasulule. Ati, aminyan ara el ap bokuka yuk-yuk kum unamabe. Kum dipnamap bukni, el ap neika pia kamuk unamabe.
Tonda, aning winibuk touk, sik din nirya akunum dibikopura, Yesus arye, tonok anggur mek makau dobuka ereiptalibukce, ayupu nyabuk. “Amek ara, na ining atonun ulule. Minop talak ara, Musa sekamuk yupu nirya moubuka kekelamika deice, Allah arye, Israel ninye, sik malye winilamik ning namin kilamuk bukni, wini talak ara, Allah arye, nyalisilye yupu yuke. Ara, ‘Na ining deice arye, ninye malye winin ning, Allah arye, kum daneiplirye, lyepnamsile,’ nyapsine. Ati, amek dipmap touk, aminyan talak babye amek dinamlum talak nirya ara, na ining ati tenepnumunce, pia denamlume.” Yesus arye, nyabuk.
Allah ati dib tenebuburye, el mapu unyaba noutamak ara, Allah arye, nun nirya ati, ‘Pil yuk-yuk donamak’ tenen, kwepdeipsukce, pil dona deiyok ning yuk-yuk bokuka aresulule. Ara, minopce weik mambul ning ara, ‘Na yupu dobuka peterelbana ati deiya kouna deiyok nang, Rasul nang unamak’ tenen, nun Rasul nang wipdeiamsuke. Bitinye ning ara, el nyalye yupu laka peterena ap, aminyan unamle ning min kum upmalye talak, laka nyana ap, ati, ‘Nabi nang donyak pil dobuka unamake’ tenen, yuk nang wipdeiyamuk. Winilye ning ara, el yupu nirya peterena ati deiyok nang wipdeiamsuke. Yuk nang ati ara, ninye kum winipmanto ning, winipman kum pil donyak ninye ap, wipdeiyamuk. Tonda, Allah El Dib Kanye arye, mikip ariliba, ninye kwetena ninye ton wipdeiyamuk. Ton ning ara, ‘Yuk nang ati bico tenebikirye, sik patan ning ati melinang unamake’ tenen, wipdeiyamuk. Tonda, ‘Pil nirya teleb ubuka donamak’ tenen, “Wininamabe, wininamabe,” nyabuka, pil dona deiyok ning moubuka tenebikirye, pil laka nyan nang, administrasi nyalamak ap, wipdeiyamuk. Tonda, sik min kum kel bikamik bukni, Allah El Dib Kanye mikip deice arye, yuk mutuku ninye nyanyak yupu, aninye areplibuk, ayupu dobuka, nyanyak nang ton wipdeiyamuk.
Ayupu nyapmasina ara, talye kum nyapsine. Kume, deiyok ara, ani. Allah yupu sekamik ning noutamak ara, ayupu ton aupmale. Ara, ‘Allah arye, minopce kwepdeibuknye bira Adam ara, sal kwepdeibukura, kam ulamuk.’ (Kejadian 2:7) Bukni, aminyan sirya talak Adam atonun bukni, bitinye ning dopdeipsuknye bira, kam una deiyok ning arisululnye Yesus ara, im deice anye ulule, talye tukwaknye kume.
Ara, winipmanto yupu deice arye, asik dona atonun ning ton nyapnusine. Allah arye nati, ‘Na pil dopnamnil’ tenen, pil dona deiyok ning, el mikip talye arepnuka deice arye, aik dona weik kel nang arye, aik ayukumna yo pia teleb ning iklamak touk, Allah yupu peterena deiya kouna ati, Allah yupu peterelamsise. ‘Anggun dib tenepnamlum’ tenen, aik ayukumna iklamaka atonun ning, pil dolamsa ani, aminyan ara, adeice arye yuknye ton, aik nong dolamaka atonun, wini talak pil dolirye, peteresulule. Bukni, apil-apil don nang nirya ara, ‘Mankau kanye arye, malye pil donyap’ tenen, sikce sik bidamang ati, adiparyuk pia moubuka dilanamake. Ara, talye ati kum nyapsine.
Ayupu atonun nyabuka, waldalulum bukni, Apolos ara, yatato weik mambulnye ululce yata ning ton nyalula ati, utenebuka nyalulum do? Tonda, na Paulus ara, yatato weik mambulnye upniba, utenebuka nyalulum do? Kume. Nun bitinye ara, talye pil melina nanguk, Allah el amu tam pil don nanguk unyame. Allah arye, nun bitinye ati, ‘Winibuka pil donamdake,’ tenyamsuka atonun, nun bitinye yuk-yuk bukni, peteresinyamba, dib tenelamlume.
Na kayapu, nara motona talin nang nyalamak yupu atonun nyapmasina ara, anggun wenena ati nyapsine. Ara, siktilila yupu peteren nang dipdakirye “Nunda Kristus el pil dona ati melinang unyabe,” nyanyak do? Sik talye nyanyak bukni, nara, Kristus el pil melinanye, dipkoprop deiyoknye, anggun deice tam unune. Sikda, mitik anun arye pil domik bukni, nara pil weik arye dolamse. Sikda, yu nang arye tomobikce, wenena aik dongobikba, like mitik anunuk ulamik bukni, nara atalak-atalak weik arye tomopnikce, wenena aik dongopra balamnikba, like yupa weik ulamse. Sikda, yu nang arye kama dobuka, sikti, mitika aryuk kulabik bukni, nati ara, pia weik arye olamnike. Tonda, nara atalak ton, atalak ton, ikin weik ulamnukba, like yupa weik arye dipmanto ulamse.
Bukni, sik Israel nang ara, Allah arye sik kanye tenena ati ara, kanye bokolton ning aribukba, teleb kanye ubuka kum tenelamik. Kanye bona kum winin ninguk winilamik. Aning aribuk talak arye diprongobuka, atalak noutamak nirya ap, wini talak ap, sik Israel ninye arye Musa sekamuk yupu, mem yupu peterebikibuk, moubuka kum teneptinge. Musa arye el urasin baju arye lelibukura, el urasin dirina moubuka kum eipmanto winilamik touk, wini talak babye Israel yala ninye Musa sekamuk yupu kekenamak talak ara, kanye bokoltonauk unyake. Kristus dib tenebibibuk, el talima dukdongobuka deipsilya deice aryuk, kanye bokolton ning kum uptua ati, sik Israel ninye ara, tuba moubuka kum teneptinge.
Anggun dib tenebuka diksukum umunya deice arye, akunum laka usulule. Anggunda, Kristus arye surat sekeipsuka atonun ululume. Nunce Allah yupu peteren pil dolamububa, nong ulamuk ning ara, anggun dib tenelamlumce akunum aululume. Bukni, alaka winisululum ning ara, sekna ning ap, tinta bolpen mek ap, arye kum sekupu. Aning kum bukni, Kam Ulya Deiyoknye, Allah El Dib Kanye arye anggunti, anggun talima noutamak pil dolamsukba, wini talak ara, laka nyan surat atonun ululume. Elce surat sekna atonun pil dolamsuk ning ara, pala keil deice kum sekuk bukni, anggun ninye talima noutamak pil dopsuka ning ara, sekna atonun laka usulule.
Ara na kayapu, anggun ton tenipdelulume. Minop talak Allah arye nyapdeibukba, Musa arye pala keil dobuka, akeil deice mem yupu sekdeibuk ning ara, ninye arye ayupu talibuka pia diksukumuk kum dobol binmanto ulamika ati, ninye dipna ning atonun upsuke. Upsuk bukni, ayupu yayuk talak babye, pia teleb ubuka dirina weik deice arye yayuk. Dirina weik ap, yayuk talak ara, Musa eibukba, el urasin ababye dirina weik ubuk. Dirina weik ubuk bukni, mitik kum danin balamuk talak babye, sik atalak elilamik ninye, Israel ninye arye Musa el urasin dirina weik tuba ulamuka anya arye, tuba-tuba kum elilamik. Deiyok ara, ayupu yayuk talak ara, dirina weik ubukura, mambul weik ulamuka ati, tuba eipmanto kum ulamik. Bukni, aminyan talak ara, Musa el urasin deice ubuk dirina ara, kum danin balamuk.
Musa arye mem yupu sekamuk ning ara, ninye arye ayupu nirya kekebuka diksukum kum winipmanto ati, ayupu deice Allah arye winipdesilyopura, dipkoprop dipnamabe. Bukni, aminop talak mem yupu ara, teleb ubuka dirina weik arye yayuke. Winiryuk yangalye yupu ara, Allah arye nun malye wininyap ninye ati, bico tenepsilirye, “Anggun ap, na ap neika una ati, ‘Anggunda diksukum winin ninye ululume,’ nyabuka akunum deipsine,” nyalisulule. Nun malye winin ning kilibuka kum danalisulul ati, el kanye aniryuk ayupu nyasulule. Nyasulula ati, ayupu ara pia teleb ubuka, weik mambul weik ulule. Ati, na kanye ara, minop yupu ara dirina ap, mambul una ap ara, mitika aryuk yayuk. Winiryuk yanmasil yupu ara, weik mambule nyapsine.
Ura, minyuma talak ara, Allah arye Musa ati nyalin yupu aribuk bukni, aminyan talak ara, Musa biti mem yupu ton tabakuka aribuk. Winibuka anya arye, Musa sekamuk yupu mem yupu ara, ‘Allah arye minyuma talak nyalilamuk yupu ati, yanina atonun ulul do? Musa sekamuk mem yupu ara, Allah arye nyalilamuk ning yupu sekelul do, tenepmunyak’ tenen, ayupu ton laka nyapnusine. Aning ara, tenena kume. Musa sekamuk yupu, mem yupu akunum arepsikcopura, aning moubuka kekebibirye, tonok ning babye batakna kum arye, dobolbatibiba, adeice arye kam pia una deiyok ning akunum dopropmatibyetoura, pia diksukum un ninye akunum ulamtibye. Bukni, nun kele. Mem yupu talibuka dobolbanyaba deice arye, diksukum un ninye kum kipsutue. Tukwak mutuku unyap ninye nirya ara, diksukumuk kum unyabe.
Nunce el yupu yaniplobuka malye-malye ulamupa deice arye, akunum diplamak ninye atonun ulamubu bukni, Kristus ap, talima dukdongopsuka deice arye, kam bulina atonun, teleb kipdeipsukce, lyepsuke. Allah arye, lyepsuka ara, yuk deice arye, kume. El bico tenyamsukce, el kanye aryuk talye meilyamsuka deice arye, lyepsuke. Nun teleb winina ati kume.
Ara, Allah arye ninye lyena ati, el laka teleb yupu peteren, pil donanye kipdeipnuka deiyok ara, laka nyapnusine. Ara, Allah bico tenepnukce, el kanye aryuk, apil dona deiyok ning talya urdemuk arepnuke. Allah el mikip arye, pil dopnuk deice arye, ‘Na laka teleb yupu peterena deiyok kounanye unamle’ tenen, akunum wipdeipnuke.
Tonda, yata nang do nirya, Allah arye, “Aning ara, wininamlume. Aning ara, pia kum wininamlume,” nyapdeibuk yupu yaniplinye ap, tonda Allah elce nyapdeibuk touk, kum winiplinye ap ara, sik Lewi yala nang arye, ‘Sikda moubuka, teleb kum wininamake,” nyabuka, yupu deice arye, sun yupu nyapnamlume. Ara, anye biti ara, “Allah arye ikin ning arepliba, anye el dam ikin ning yalyeba, dolonamlule. Adeice arye dipnamle,” nyabuka, yupu deice arye, sun yupu nyanamlume. Ayupu ara, anggun Israel nang nirya kekepmunyopura, anggunce tamubuka nyanamlume. “Yo, dipkoprob nyapmasuluma ati, nunce, ‘Aninguk winipnamleʼ tenen, ‘Akunuma, amin,’ nyababe,” nyanamlume.
Timotiuso, winiryuk nyapmakin ning nirya dobuka, yuk nang dib tenen ninye ati, peterepminyopura, adeice arye Yesus Kristus, el teleb pil melinanye una ati, teleb unamlame. Winipminyopura, Allah el yupu dib tenenyap ning ap, sikce teleb ubuka peterepkikbuk, kel biklumce moubuka talilyam ning ap, anoutam arye nebuka kanye wisinamkile.
Tonda, Allah danatam, ninye danatam, noutamak ansinilina deiyoknye, Yesus el un dam yanganmalume. Ninye lyena ati, Allah arye, “Winipnamsine,” nyabuka nyalilamsuk yupu, winiryuk ning ara, Yesus ara, ayupu ati ansinilina deiyoknye usulule. ‘Allah ap, ninye tukwak ninye ap, teleb ubuka neika unamak’ tenen, ansinibuka delisulul deiyoknye ara, Yesus uka. Minop talak ulamuknye Habel arye, Allah el si erena ati, kam ning obuka, ining likdeibuk ning ara, mitik telebuk winibuk bukni, Yesus arye nun lyena ati, el ining sakukce biyuk ning ara, pia mambul weik ulule.
Allah arye, ‘Ninye nirya, olana kum arye, teleb kanye bobuka, yuk ninye ap, neika teleb unamak’ tenen, teleb una ati deiyok ning arisululnye ulula anya arye, elcuk melisilyeba, yuk ninye ap teleb ubuka neika unamabe. Allah arye, “Na ap, ninye ap, teleb ubuka neika unamabe,” nyabuka nyalilamsuk yupu, ninye lyena yupu ara, Yesus el ining biyuka deice arye, sirya dakuka ansinipdeipsuke. Yesus obikba dibuk bukni, Allah arye Yesus tamubuka kam bukdeibukba, Yesus ara, kam tuba ulule. Allah arye nun lyena ati, nyalilamsuk yupu ara, kume kum danamle. Aning ara, pia aunamle. Winipmanto ara, sik domba weina deiyok nang arye, sik domba ati, teleb-teleb kibuka weilamak touk, Yesus arye nun diba tenenyap ninye ati, pia teleb kibuka melibuka kalikisulule.
Allah arye Yesus ati, ayupu nyalilamuka ati ara, nun kele. Allah ap, ninye ap, talima dukdongobuka neika una ati, Allah arye, winiryuk bisik kintinipsuk ning ara, pia telebe. Minop talak nyapdeiyamuk ning ara, mitik telebe uka. Allah ap, nun ap neika una ati, nun ansinilina deiyoknye Yesus ara, Allah arye akunum kintinipdeipsuka ati, ‘Aning ara, dib unamsil do, tilila do?’ tenen, kum teniptoptibye. Dipkoprop nong upnamle. Yesus elcuk nun diba tenenyap ninye ati, lyepdopnamsile.
Ura, na kayapo, Allah arye ayupu nirya ati, “Winiryuk nyalin yupu nyapsine,” nyabuka deice arye kel kinyabe. Minop talak nyalilamsuk ning ara, winipmanto nyana ati, akunum pun dayukce malye ubuka anya arye, aning ara, akunum punupsuke. Minop talak nyalilamsuk yupu ara, tonap kum talibuka unamabe. Akunum pun dayuk ning ara, minyuma kum danamlarya. Winiryuk nyalin yupu akunum nyapmasila ati, aninguk talibuka unamabe, nyapsine.
‘Malye un ninye ara, ansinibuka Allah ap, talima dukdongobuka unamak’ tenen, pia diksukum unanye, Yesus Kristus arye, nun malye un ninye dekna ati, like tonok talak aryuk dibuk. Yesus ara, ninye nong atonun dayukce ulamuka ani, obikopura dipmok bukni, dibukura, Allah El Dib Kanye mikip deice arye, Yesus ati tuba tamubuka kam bukeibuk.
Na Yohanes arye ayupu seksene. Ara aning-aning nirya kum uamuk talak, Allah el Kam una Yupu dobuka yanamuknye, Yesus ulamuk. Im deice ei ulamuka ani, tukwak mutuku yayuk talak ara, aulamukce, yupu nyalamukbuk, kekelamubu ning ap, nun asing arye elilamubu ning ap eibuka, nun taruk arye talilamubu ning ap ara, aning-aning nirya ara, anggunti laka nyabuka peterenyabe. Apeterenyaba ara, Kam Una Deiyoknye, Yesus, elti, nyasinyabe.
ကြော်ငြာတွေ