2 Korintus 11:4 - Eipomek

⁴ Dipkoprop nunce Yesus el yupu peterelamsupu atonun kum bukni, yuk nang arye tilila yupu deice arye Yesus ati peterepsikceba, ‘Diba tenepnamlum’ tenen, nyapsine. Tonda, yuk nang arye, ninye lyena ati tilila yupu, peterepsikceba, ‘Tilila isa dib tenebuka dopropmunyak’ tenen, nyapsine. Anggunda, ‘Ayupu ara dib do, tilila do?’ tenen, moubuka tenena kum arye, yuk nang arye nyasikce yupu, adiparyuk kanam aryuk kekebuka dololulume. Winilulum ning ara malyeuka.

2 Korintus 11:4 ပူးပေါင်းရင်းမြစ်များ

Markus 7:9

Anggunda Allah elce, “Wininamlulume, aning ton kum wininamlulume,” nyabuka nyalilamuk yupu, mem yupu yanilulumce, anggun apu yapu peterelamik ninguk ‘Aninguk talibuka unuyabe,’ tenemunce umunye ning, laka nyapnusine.

Rasul 4:12

Yata nang arye do nirya, nun kum lyepsitinge. Yesus elcuk lyepsutue. Allah arye ninye si mutuku sirya im sirya areamsuk nirya ara, adeice arye tonok babye ton kum lyepsutue. Yesus el si mikip deice aryuk lyeipsitue. Yesus elcuk lyesulule.” Peterus arye nyabuk.

Roma 8:15

“Allah el mapu ululume,” nyapmasina ara, urdem ati kum nyapsine. Deiyok ara ani. Allah arye el Dib Kanye arepsukba, anggun talima pum tam akunum wekuka usulula ati, anggunda el mapu kopropa akunum ululume nyapsine. Talye pil melibuka don nang arye sik deiyok nang ati, ilil weik ulamak touk, Allah arye el Dib Kanye arepsuka ara, ‘Anang ara, nati ilil weik unamniak’ tenen, kum arepsuke. Aning kum bukni, el Dib Kanye arepsukba weksuk deice arye, Allah el mapu kipdeipsuke. El mapu kipdeipsukba, el Dib Kanye pil dosilya deice, nunce Allah ati, “Nun ni,” nyanyabe.

1 Korintus 3:11

Deiyok ara, Allah arye nyabukba, aik ayukumna yo atonun ning akunum iksa anya arye, yuk ninye nirya arye, yuk ayukumna yo kum iktinge. Winipmanto yupu deice ayukumna yo nyapman yupu nong ara, Allah arye dipkoprop ning kintinibuk ning ara, ayukumna yo atonun ning ara, tonokuk ulule ara, Yesus Kristus el uka.

2 Korintus 11:1

Ara, na kayapu. Narye mitik anun walwal nang arye talye-talye nyaltakalamak touk nyapnyopura, ‘Talye lamapdongobuka kekepnamlum’ tenen, moropsine.

2 Korintus 2:12

Ara, yuk yupu ton nyapnusine. ‘Kristus el pil dona ati, ninye lyena yupu, laka teleb yupu peterenamne’ tenen, Teroas mutuku binamse talak ara, Allah arye el yupu peterena ati, lo teleb ning akunum kintinibdeipnuk ning ara, eibuka kel kipse. Ara, ninye wekna ati, buplan weik arye kukulilamak atonunuk, pia teleb lo arepnukura, ‘Amutuku ninye petereptinye’ tenen, akunum kel kipse.

Galatia 3:2

‘Anggunce laka nyapnumunba, kekebuka kel kipnun’ tenen, asipdenusine. Allah arye el Dib Kanye arepsukba, anggun talima noutam weksuka ara, yata arye do? Musa sekamuk yupu, mem yupu kekebuka dobolbalamluma deice arye, el Dib Kanye arepsukba, doproplum do? Akumopura, Allah el kai teleb yupu peterelamububa, diba tenepluma deice aryuk, Allah arye El Dib Kanye arepsukba, doproplum do?

1 Timotius 1:3

Ara, na Makedonia mutuku binamse talak nyapdeiamkise touk, anda Efesus mutuku tuba unalyame. Ara, dipkoprop Allah el yupu ulye touk kum bukni, yuk tilila yupu peterenyak nang ati, ‘Ance sik yupu sekenalyam’ tenen, nyapkise.

1 Timotius 2:5

Allah ara, el tonok. Yuk ton kum ulule. Atouk, Allah danatam, ninye nirya danatam, noutamak ulirye, kanye dukdongobuka melisilya deiyoknye bira, el tonok ulule. Yuk ton kume. Anye el si ara, Yesus Kristus. El aryuk nun ap, Allah ap neika kilisilirye, kanye dukdongobuka derisulrye.