1 Yohanes 2:8 - Eipomek

⁸ Asekman yupu ara, winiryuk yupu kum nyapmasin bukni, ton mitik winiryuk ning atouk ulule. Ara, “Wininamlulume,” nyapmasin yupu ara, Yesus el ulamuk ning ap, Yesus el yupu dopdoplumce, telebuk winilamlum ning ap, adeice arye, ‘Ara dipkoprop winibuka,’ tenebuka elinyabe. Allah yupu deice arye, kanye kunuknak ning, dirina uprebanmala ani, kanye dirina ning ara, akunum dirina upmale. Ati ara, “Allah yupu kekebuka dodoplum ning ara, ayupu ara, dipkopropuk ulule,” nyapmasine. Yesus ara, dirina atouk ulula anya arye, dipkoprop dirina ning ara, akunum elinyabe.

1 Yohanes 2:8 ပူးပေါင်းရင်းမြစ်များ

Mazmur 27:1

Daud birye nyabuk. Allah ance na dirina kilina ap, na lyena ap, Deiyoknye ulyame. Ara, weik kat poka cang arye erebuka dolamak touk, Allah Yahweh ance erebuka uminyeba, nara an amu tam unune. Ati ara, yuk nang nirya ati, ton birbir apnilirye, ilil kum unamnile.

Mazmur 36:9

Na nio, an uminyak arye, sik din aning-aning nirya ara, ancuk, an dam unyak nang ati, pia weik arye melibuka arenamsilyame. Winipmanto ara, ninye arye, pia teleb balamle mek noutam arye, ‘Mek dipnuyap’ tenen, mek kwebuka dibikirye, kanye delilamak touk, ance teleb ning nirya melibuka aresiminya deice arye, nun kanye deibuka unamabe.

Mazmur 84:11

Teleb weik ning ara, tonok sum Allah an si eren aik dam yanuka eipkitinyeura, telebe teneptinye. Bukni, yupa weik seribu sum ara, talye yukak daunmatinye babye, telebe kume. Tonda, na ara, an si eren aik bublan dam kalikna pil doptinye babye, pia telebe. Bukni, malye wininyak nang, sik teleb aik binuka uptinye babye, aning telebe kume.

Yesaya 9:2

Minop talak, ikin ning weik ulamukba, pia imun kanye bobuka unyakakuk ulamik ninye ara, atalak noutam, dirin weik ulul ning akunum eipmake. Ikin ning ap, ninye dipna ap, weik ulamuk mutuku noutam ulamik ninye ara, wini talak ara, weik dirina ning akunum eipmake. Ara, beren tam talak keting panaplirye, dirina weik ulamle touk, aninye arye dirina atonun ning, weik mambul ning akunum elinmake.

Maleaki 4:2

Bukni, anggunce nati, ‘Allah elda weik mambule,’ tenebuka, na si erenululumce, na nyapdeiamse yupu uk, moubuka talipmunce, ululum ninye nirya ati, na mikip ara, anggun deice deipsiniba, keting delilamle touk upsilyopura, teleb kipdeipsinirye, lyepnamsine. Winipsinya deice arye, anggun ikin usilye ning nirya, kum daneipnamsine. Winipmanto ara, sapi basam mi poka pum tam dongamica ani, apoka pum bisik arye kubuka, bai tam bilirye, weik kanye delilamle touk upmunce, kanye delinamlume.

Matius 4:16

Anggun kanye talima kunuknak atonun ulamak bukni, wini talak ara, weik dirina atonun ning akunum eipmake. Sik aunyak nang, talima kanye dipna atonun unyamukba, kunuknak atonun ulamak bukni, wini talak ara, weik dirina atonun ning eipmaka ati, bereklirye, keting deililamle touk unamake,’ Yesaya arye, domon yupu nyabuk. (Yesaya 9:1-2)

Lukas 1:79

Nun kuna ap, dipna ap noutamak unyap ninye dam yalyeura, dirina kipdeipsilirye, lyepnamsile. Nun Lyenanye dirina kipsilirye, nun ap, Allah ap, ‘Teleb kibuka neika unamak’ tenen, bisik peterenamsile. Na mi Yohanes an wininamlam ning ap, nun Lyenanye elce winipnamle ning ap ati, nyapne. Zakaria arye nyabuk.

Yohanes 1:9

Ninye mutuku-mutuku nirya sik melina ati, dirina deiyok ning arena deiyoknye, Dib Koprop Dirina Deiyoknye yanamuka ati, Yohanes bira, kintinilina ap, laka lena ap ati yayuke.

Yohanes 12:35

Nyabikura, Yesus arye domon yupu deice arye tamubuka nyabuk. “Wini talak ninye moubuka kel bikna ati, dirina upsil ning ara, anggun ap mitik anunuk, anggun neika unamsile. Dirina tuba wapsilye talak ara, teleb bisik adiparyuk banamlulume. Aminyan talak ara, kunuknauk unamsila ati nyapsine. Kunuknak balinye bira, el bisik banmalya ara, moubuka kel kum biktue.

Yohanes 12:46

Nara, dirina atonun upsirye, tukwak mutuku noutamak yase. Dirina atonun yanuka ununa ara, ‘Na ti diba tenenyak ninye nirya ara, kuna akuk, tuba kum unamak’ tenen, tukwak yasirye, unune.” Yesus arye nyabuk.

Yohanes 13:34

Wini talak ara, ‘Wininamlum,’ tenen, winiryuk yupu ton nyapdeipnusine. Ayupu ara ani. Anggun nirya arye bico tenelamunce, melilanauk pia wininamlulume. Narye anggunti, bico tenebuka melilamsise touk, anggun babye atonun, bico tenebuka melilanauk unamlulume.

Yohanes 8:12

Aminyan talak ara, Yesus arye amutuku ninye ati nyabuk. “Nara, tukwak mutuku im sirya, mutuku sirya unyak ninye ati, dirina deiyoknye unune. Na nyasinye yupu kekeplirye, talibuka dobolbalinye bira, kunuknak pia kum unamle. Aning kum bukni, kam una deiyok dirina ara, el talima ak unamle.” Yesus arye nyabuk.

Rasul 17:30

Minop arye Allah dilamuk bukni, walwalto nun winilamubu ning ara, Allah arye, ‘Minpola kum wenepnune’ tenen, namin kilongolamuk. Bukni, wini talak ara, Allah arye ninye mutuku-mutuku nirya ati, nyasulule. “Anggun malye winiluluma ara, batakmunce na tam kipropnamlume,” nyasulule.

Rasul 26:18

Narye aning ati dopkwetepnamkin deiyok ara, ‘Sik asing laipnalama’ tenen, dopdeipnamkine. Tonda, ‘Sik kanye talima yuk punubiceura, sik kanye talima kuna atonun unyaka ati, dirinak tamubuka dobuka, delilyanganalam’ tenen, dopkwetepnamkine. Tonda, Isa Mutuku Dongonye, el mikip arye talibukak arye tamubuka, ‘Allah el mikip arye talipnamle ati dobuka, delilyanganalama’ tenen, dopkwetepnamkine. Ara, yata deiyok ati kume. Ance anang ati aning nirya akunum winipminyeura, nati diba tenebikca deice arye, sik talima ak malye tenenyak ning ap, sik malye unyak ning ap, Allah arye meliplirye, aning kum kipdeipnamle. Tonda, na Yesus ati diba tenepnika deice arye, Allah arye akunum wipdeiamuk ninye ap, ansinibuka unamake. Allah arye aning ati winipnamle. Yesus arye na Paulus ati nyapnuke, Paulus arye nyabuk.

Roma 13:12

Wini talak ara domon yupu ton nyapnusine. Ara, lukunyan inipmalye talak, ninye mapmaca bereklamle touk, akunum unmala ati, kunukna noutam arye malye-malye winilamikce ning nirya ara, batakibirye, dirin ninguk talibuka diksukumuk winipribapya deice arye, ting ongolamak touk kibuka ubirye, pia kaliknauk unamabe.

2 Korintus 8:9

Aning ara talye ati kum nyapsine. Deiyok ara ani. Nun Deiyoknye Yesus arye nun nirya ati, bico tenelamsukce, weik arye melyamsuk touk, ‘Nun babye atonun wininamap’ tenen, nyapsine. Ara, anggun kele, nun Deiyoknye Yesus, el kanye aniryuk bico tenenyamsukce, melipsuka deice arye, teleb kipdeipsuke. Elda im deice pia weik sisinanye ulamuk bukni, nun melina ati ara, talye bona utotowa talina kum nang atonun dayukce, tukwak mutuku yayuk. Winibuka ulamuk ning ababye, deiyok aupmale. Ara, el talye bona utotoa talina kum nang atonun dayukce, pil dopsuka deice arye, ‘Sik tukwak ninye ara, bona utotowa talina kum ninye atonun unyak bukni, narye aninye lyepnyopura, sikda bona weik talilamak ninye atonun unamake,’ tenebuka wipsuke.

Efesus 5:8

Sik malye wininyak ninye ap, ansinibuka una meme nyapmasina deiyok ara, ani. Minop talak ara, anggun Efesus mutuku ululum nang ara, pia malye-malye ulamluma deice arye, kunuknak atonun ninye ulamlum bukni, wini talak ara, nun Deiyoknye Yesus ap, talima dukdongobuka umunya deice arye, dirina ninye atonun akunum ululume. Ati Dirina Deiyoknye arye el mapu una ati, akunum teleb kipdeipsuka ati, dirina nang ulamak atonun diksukumuk unamlulume.

2 Timotius 1:10

Bukni wini talak ara, nun lyen ning nirya ara, Yesus Kristus nun Lyena Deiyoknye tukwak mutuku akunum yayuk deice arye, akunum lak kipsukura, kel kinyabe. Yesus Kristus el pil dopsuka deice arye, ninye dipna deiyok ning akunum, kum daneibuk. Winipsukce, ninye lyena ati, Yesus el lak teleb yupu peterenyaka deice arye, dipkoprop kam una deiyok ning ap, bola koplobuka, pia kam unamap ning ap ara, akunum lak kibuka ati, kel kinyabe.

1 Peterus 1:21

Yesus pil dopsukce, melisilya deice arye, Allah diba tenelulume. Yesus dibukura, Allah arye kam bukeibukce, weik dirina ap, mambul una ap deice arye, ereibuka ati, anggunce Allah ati diba teneplulume. Diba teneplumce, ‘Allah arye wininamsile’ tenen, kintinibuka dinauk ululum ning ap, ‘Allah elcuk melinamsile,’ tenena ap ara, anggun kanye talima Allah el deiceuk deililulume.

1 Yohanes 3:23

Ara Allah arye, “Wininamlulume,” nyalul yupu ara ani. Tonok ning ara, Allah arye, “Na Mi Koprop Yesus Kristus diba tenenamlulume,” nyasulule. Ton ning ara, Allah arye nyapsuk touk, “Anggunce bico tenebuka melilanauk unamlulume,” nyasulule.

1 Yohanes 4:11

Ara na kayapu, Allah arye nunti, weika arye pia bico tenepsuka ati, nun babye bico tenebuka melilanauk unamabe.

1 Yohanes 4:21

Tonda, Allah arye, “Wininamlulume,” nyapsuk yupu ara ani. “Ara, Allah ati kanye deilinamlum ninye nirya ara, adiparyuk anggun mening dam ninye babye, bico tenebuka melinamlulume,” nyabuka nyapsuke, nyapne.