1 Yohanes 2:20 - Eipomek

²⁰ Sik abataksik nang ara wininyak bukni, anggunda kume. Yesus ara, malye winina ning tonok babye kum ulule. Allah arye el Dib Kanye ara, Yesus arye arepsukbuk, anggun talima ak weksuke. Tonda, anggun nirya, el dipkoprop yupu akunum kel kiplume.

1 Yohanes 2:20 ပူးပေါင်းရင်းမြစ်များ

Mazmur 16:10

Aning ara, urdem ati kum nyapne. Na dipnya babye, Allah ance kum bataknamnilame. Winipnimince, ance wibuka deipnulumnye, pia diksukum winibuka telebuk wininunye bira, dipnyopura, tuku pum tam weipnica babye, nong ara, kum lyupnamnile. Kam bukeipnamnilama ati nyapne.

Mazmur 23:5

Tonda, na mal olan nang wekuka dinmacak arye, Allah ance na patan ning nirya, weika arye arenilyame. Winipmanto ara, weik kwalya kwalipmince, nati arenilyame. Ara, weik mambul nang yukubikceba, din ning weika arye dilyangalamk touk, wininiminyeba, na mal olan nang eibikirye, ‘Se’ tenen, unamake. Tonda, ninye arye, ‘Anye nun ninye deiyok kibuka unamsil’ tenen, pia teleb minyak mek, anye el kisok deice likeibiceba, anye ninye deiyoknye Raja ulamle touk, ance pia teleb kibuka kipdeipniminba, pia telebuk unune. Ati ara, yata ning do nirya, na patanilye touk, weika arye tabakuka areniminyeba, na dam yanganiliba, kanye deibuka telebuk unune.

Mazmur 45:7

Se an ni Allah, an weik tonun, aning-aning nirya talibuka, nun ninye deiyoknye ulyam ning ara, pia aunalame. Aning ara, pia kum, kum datue. Ance ninye deiyoknye kina ati, emas kama dopmince, nun ninye tukwak nang ati, yupu lipsisikuka bokeipsimince, ‘Wininamlume,’ nyabuka, yupu nyasilyam ning ara, pia telebuk ulule. Ninye yupu lipsisikuka bokolina ati, ance, ‘Na kwit’ tenen, tenebuka arye, kum nyasilyame. Pia dipkoprob yupu uk nyapsimince, yupu lipsisikuka bokolisilyame.

Mazmur 71:22

Tonda, mot nyana ati, lelim nyalamle ning, takubarye (10) tapu ulul ning, el si ara gambus dopropnirye, mot nyanye ning ara, anti, “Anda pia telebe,” nyabuka, kanye deilin mot nyana deice nyanamne. Deiyok ara, ance nati, batakna pia kumce, tuba-tuba melibuka kalinilyama atia. Ance nati, ‘Winipnamkine,’ nyabuka, nyalin yupu deice nyanilyam touk, aninguk tuba wininilyama ati, an siuk erekinirye, mot nyanamne na nio. Tonda, mot nyana ati, lelim nyalamle ning, tapu takubarye (10) arye uamuk ning, el si ara kecapi dobuka, aning deice arye, mot nyanirye, “Anda pia telebe,” nyanamne. Se, nun Israel nang arye, si erekinyap Allah, anda pia telebuk ulyame. An talima noutam ara, malye winin ning tonok babye, kum ulule.

Mazmur 92:10

Ninye nirya moubuka biklulume! Allah Yahweh ati, ‘Elda nun like,’ tenenyak nang nirya ara, aminyan talak dipnamake! Diba nun ni Yahweh, anti yanikikirye, ‘Nun like,’ tenekinyak nang nirya ara, aminyan talak ance sikti, wenebuka opminyeura, sik nirya kum danamake! Mandipna kanye bobikirye, malye-malye ninguk wininyak nang nirya ara, aminyan talak, ance sikti, yakuka dopkwepminyeura, sik kanye teniltonauk kibikirye, bai tam bikbik abuka bikirye, mutuku yuk-yuk, dana-dana tam mutuku binamake.

Amsal 28:5

Ninye ton diksukum una kumce, malye winin ninguk talibuka ululnye bira, elce teleb diksukum uning nirya ati ara walwal uk ulule. Diksukum uning ap, ninye yupu kekebuka teleb lipsisikuka bokolina ap ara, ‘Deiyok ara ani. Teleb uning ani, malye un ning ara ani’ tenen, pia kum tenepmanto ulule. Bukni yatanye do nirya, tuba-tuba Allah el si Yahweh arye nyalul yupu kekeplirye, Allah el siuk erelulnye bira, diksukum uning nirya dipkoprob kel kiplirye, ‘Deiyok ani,’ tenelirye, pia moubuka bikilule.

Yesaya 43:3

Aning nyapmasina ara, urdem ati kum nyapsine. Deiyok ara, Israel ninye anggun ni koproba Allah, na si Yahweh unune. Israel ninye, anggun kalikuka melina deiyoknye, Pia Telebnye birye, anggunti lyepnamsina ati nyapsine. Israel ninye anggun Lyena Deiyoknye unune. Anggun malye winilulum ning ati, wenebuka oplopsitinye bukni, amalye umunye ning pununa ati, Mesir mutuku ulamik ninye ap, Etiopia mutuku ulamik ninye ap, Syeba mutuku ulamik ninye ap ara wenebuka oplopse. Winipsirye, anggun Israel ninye ati lopdeipsise.

Yesaya 61:1

Nabi Yesaya birye nyabuk. Allah aning-aning deice tam talibuka Weik Mikip Deiyok ululnye, Allah Yahweh arye, ‘Wininamne,’ tenelye touk winilule. El Sambala mikip weik ning na deice deipnuke. Allah Yahweh winipnukce, nati ‘Elce laka teleb yupu nyalbanamle’ tenen, wipdeipnuke. Ara, bona utotoa kum talinyak ninye ap, imun kanye bobuka, unyak ninye ap ati, nyanamlyame. Kanye talima uk dipliba ikin kanye bobuka unyak ninye ati, ‘Allah arye anggun kwa dibuka melinamsile,’ nyabuka laka nyanamlyame. Tonda malye kum winilamik buk, wenen aik noutam bunyak nang ati, ‘Allah arye lolinamsile,’ nyabuka laka nyanamlume. Tonda sik asing kubukba kwelakirye, kunukna noutamak unyak ninye ati, “Allah arye anggun asing laipnamsile,” nyabuka laka nyanamlyame. Anggun nirya ati, “Allah arye lyepnamsile,” nyabuka, ‘Nyalbanamle’ tenen, Allah Yahweh arye na wipdeipnuke. Nabi Yesaya birye nyabuk.

Yeremia 31:34

Atalak arye dipdongobuka doyanamle talak ara, tonoknye birye, el kwit yuknye biti, ‘Anda Allah si kel biknalame,’ nyabuka, peterelamik atonun, tuba kum wininamake. Ara, weik nang babye, mitik nang babye, na siuk akunum kel bikikirye, ‘Nun ni koproba,’ nyabuka, na damuk unamake. Ara, urdem ati kum bukni, deiyok ara, sik malye winilamice ning babye, narye pia kum kipdeipnamne. Aning nirya ara, kilipnirye, kum kipdeipnyopura, tuba tamubuka tonap, sik malye winin ning nirya kum tenepnamne. Ayupu ara, na Allah Yahweh arye, akunum nyapsine ati, dipkoprob nong upnamle,” Allah arye nyabuk.

Imamat 7:35

Aning laka nyapmasin ning ara, na Allah Yahweh ati, yanuka arepmakiba, imam nang arye, uku dongonamak ning bukni, danoutam arye, abasam yan sirik tam ning ap, taram ap wilipnikirye, sikce aning bitinye dinamak nang ara, Harun ap, elce deiamlye nang ap ati, yanuka arepnalum ning, sik aninguk dobuka dinamnyake. Ara, ‘Sikʼ anang arye, Allah el si eren aik pum tam pil donamakʼ tenen, anang wibuka deiplum talak arye dipdongobuka, dounamle talak nirya babye, anggunuk alaka nyapmasin ning, dobuka dinamnyake.

Matius 13:11

Asipdeyikbuk, Yesus arye tamubuka nyabuk. Allah arye ninye weike lyeplirye, sik kanye talima talinamle nyasunun yupu ara, Allah arye nyapdeiamnuk touk, na mapu anggunti yupu nong laka nyasunune. Bukni, yuk talya ninye ati ara, na yupu dib tenebuka, moubuka kum kekenyaka ati, aninye ati domon yupu arye, nong bola deiceuk nyanune.

Markus 1:24

“Yesus Nasaret mutuku ulamlumnye, anda yata ning patapmakilba yanmasilam do? Ance ‘Amutuku isa mer nirya opnaman’ tenen, yanmasilam do? Na kel bikmakine. Allah arye wiamkukba, anda Pia Diksukumnye ulyame,” nyabuk.

Lukas 4:18

Allah arye na laka teleb yupu dobuka, ‘Talya kankan ninye peterelbinamle’ tenen, akunum wipdeipnuka anya arye, Allah El Dib Kanye arye el mikip weik arepnukura, unune. ‘Tapu koubuka deiamik ninye lolongona yupu peterelbinamle’ tenen, dopkwetepnuke. Tonda, asing guna ninye asing lalina ap, yaniplobikirye ikin ning sik nong deice delilamak ninye, ‘Melibuka erelina ap, wininamle’ tenen, dopkwetepnuke.

Lukas 4:34

“Yesus Nasaret mutuku ulyamnye, ‘Anda yata ning patapmakil ati yanmalam do? Obuka kum danipsitinye’ tenen, yanmalam do? Na kel bikmakine. Allah arye weipdeiyamkuke. Tonda, malye winina tonoknye babye kum winilyame. An ara, pia Diksukumnye ulyame,” nyabuk.

Yohanes 14:26

Bukni, Allah El Dib Kanye, anggun talima melina ati, Melinanye bira, Allah arye, na si deice arye el Dib Kanye dopdeipnamsile. Aripsiliba, Allah El Dib Kanye arye aning-aning nirya ati, peterenamsile. Tonda, na nyapdeiyamsise yupu nirya, ‘Tuba tamubuka tenepnamak’ tenen, Allah El Dib Kanye arye tonap nyanamsile.” Yesus arye nyabuk.

Yohanes 16:13

Bukni, min nyapmasinanye, Dib Koprop Yupu nyalulnye, Allah El Dib Kanye dopdeipsinyopura, anggun dam yalyopura, elce dipkoprop yupu nirya kel bikna ati, ‘Winipnamlum,’ nyabuka peteresilyopura, kel biknin banamlume. El kanye aryuk kum nyanamsil bukni, narye nyapnyopura, el kekeplye yupu uk, peterenamsile. Elce aminyan talak winipnamle ning ati, laka nyabuka, peterenamsile.

Rasul 10:38

Allah arye Yesus Nasaret mutukunye, akunum wipdeibuka ati, ‘Na piluk donamle’ tenen, el mikip ap, Allah El Dib Kanye ap, Yesus nong deice deibukura, Yesus arye pia teleb piluk dopra balamuk. Dopra balamuk akarye, Isa Mutuku Dongonye kouke pum tam weklamukak ulamik ninye weik kwetelilamuk. Aninye weik kwetelilamuk deiyok ara, Allah ap, Yesus ap, sik neiktoto ulamrik arye, Allah el mikip el nong deice deiamuk arye aninye kwetelamuk.

Rasul 3:14

Yesus ara, Diksukum Ululnye atia. Allah el yupu pia teleb kibuka kekebuka dolamuk akarye, malye una pia kum arye, Allah piluk dolamuk bukni, anggunce elti, bataklum akarye, “Ninye onanye Barsabas lobuka arepsilyame,” nyabuka moroplume.

1 Korintus 2:15

Yatanye do nirya, dib tenebukura, Allah El Dib Kanye arye akunum talilulnye bira, anye birye aning-aning nirya ati, kintinipdelirye, ‘Teleb ning ani, malye ning ani’ tenen, yupu bokdeiptue. Atonye birye winiptu bukni, yuk ninye ara, sik dib tenena kum, yuk talye wininyak ninye ara, aning nirya ati ara, moubuka kum teneptingce, yupu kum bokdeiptinge. Tonda moubuka kum kel biktinge. Deiyok ara, Allah El Dib Kanye arye, sik talima kum talilula ati, nunce peterenyap yupu, moubuka kum kel biktinge nyapsine.

Ibrani 1:9

Ance kanye delilyam ning ara, malye winina pia kum, diksukum un ning uka. Ance, lik tenepmince malye kanye bobuka uminye ning ara, malye un ning nirya atia. Winibuka uminya ati ara, ance na si erebuka kinilyamnye na Allah arye, anti wibuka erepdeipkise. Eripkisirye, an ap, neika unyak ninye nirya deice tam akunum erebuka deipkise. ‘Aning-aning nirya deice tam umince, aning-aning nirya talibuka, weik deiyoknye unamlam’ tenen, wibuka deipkise. Winibuka erepkisa deice arye, pia pin-pin kanye deibuka, ulyame.’ (Mazmur 45:6-7)

Ibrani 8:11

Minop talak ara, na yupu kel kiyamik nang arye, ayupu kum kel kiyamik nang ati, peterelamik bukni, wini talak ara, tonoknye birye, el aik dam ululnye biti, “Allah ap talima dukdongobuka neika una ati, winipnulyam, winipnulyam,” nyabuka, tuba-tuba kum peterenamle. Aning atonun, tonoknye birye, el weit kopropa ati, “Allah ap, talima dukdongobuka neika una ati, winipnulyam, winipnulyam,” nyabuka, kum peterenamle. Kume, narye na yupu dobuka, anggun kanye talima noutamak dongopnamsina ati, weik mambul nang babye, pia mambul kum nang babye, anggun nirya ap, na ap talima dukdongobuka neika unamabe. Atalak ara, na mapu nirya kel kipra banamaka ati, sik kum peterelanamake.

1 Yohanes 2:27

Bukni, anggunda Allah El Dib Kanye Yesus arye arepsuka ara, anggun talima ak, wekamukce, tuba ulula ati, talye ninye arye nyapsitinge yupu ara, kum patasulule. Anang nyasikce yupu ara, kum kekenamlulume. Bukni, Allah El Dib Kanye arye, aning-aning nirya peteresulule. Aning nirya peteresilye ning ara, moubuka kekenamlulume. El babye, el peterelye ning babye, talye kum, dipkopropuk ulule. Ati ning ara, elce peteresilye yupu uk, kekebuka dobolbalamunyopura, Yesus ap neika uk unamlume, nyapsine.

1 Yohanes 4:13

Allah arye el Dib Kanye akunum arepsuka deice arye, ‘Allah ara, nun talima ak usilirye, nun ap, Allah ap, dukdongobuka neika unyabe,’ akunum tenenyabe.

Yudas 1:5

Ura, anyapnusin yupu nirya ara, akunum kekemunce, akunum kel kiplum bukni, tonap tuba, tenepnamluluma ati laka nyapnusine. Allah arye, ‘Na’ tenen, el mapu kiyamuk ninye, Mesir mutuku noutamak ikin kanye bobuka ulamikbuk, lyebuka dopromuk bukni, aminyan dib kum tenebik ninye ati oltakalamuk.

Wahyu 3:7

Ninye Mi Koprop Atonunye birye nyapnuke. “Yohanes, ance Piladelpia mutuku diba tenenyak ninye, sik melin malaikat ati, ayupu sekuka dopdeiplyame. Dopdeipnulam yupu ara ani.” Malye winin ning tonok ning babye kum wininirye, pia diksukumnye unune. Tonda, na nyasinye ning nirya ara, pia dipkoprop yupu ati ara, ayupu batakna kumce, anyapmasin touk dipkoprop talibuka ununye birye, ayupu nyapsine. Na aryuk nyanamne yupu ara ani. Ara, “Akili sal ara, Allah el ulya im deice wekna telebe. Bukni, anang ara, im deice kum wektinge,” nyabuka, tukwak kili sal wibuka, yuk-yuk bokolina deiyoknye bira, na unune. Narye buplan pakeipnyopura, yuk nang arye abuplan ila tuba tonap kum tiriktinge. Aning atonun, narye buplan tirikdongopnyopura, yuk ninye arye kum kukeiptinge. Bublan kukulina ap, buplan tirikina ap, deiyoknye bira na uka.

Wahyu 4:8

Akam unyak ning dumbarye nirya, sik yuk-yuk bukni, sik pol ara naku barye ubuk. Sik nong bol deice ara, asing pia weik ubuk. Sik pol amu tam babye asing ubuk. Sik nong ap, urasin ap, anyapmasin touk ubukba eipse. Lukunyan babye, keting noutam babye, batakna pia kumce, tuba-tuba ayupu pia nyanyake. “Minop talak ulamuka ani, wini talak tuba ulirye, aminyan sirya talak yanamlanye bira, aning-aning nirya malye kibuka, aning nirya deice tam ulirye, weik mikipnye ulule. Elda nun Weik Deiyoknye ulule. Elda malye winin ning tonok babye kum ulula ati, pia telebuk pia telebnye ulule, pia telebuk pia telebnye ulule, pia telebuk, pia telebnye ulule,” nyabuka mot senyake.