1 Yohanes 2:17 - Eipomek

¹⁷ Atuku ak ulul ning nirya ap, malye wininyak ninye sik patalamle ning nirya ap ara, kum upnamle. Aning nirya kum upnin banamle bukni, yatanye do nirya, Allah elce tenebuka nyasilye yupu uk kekebuka, dobolbalamice nang ara, pia kam unamake. Pia kum dipnamake.

1 Yohanes 2:17 ပူးပေါင်းရင်းမြစ်များ

Mazmur 102:26

Aning-aning kum uamuk talak ara, an akunum kam ulyama ati, ancuk, tukwak mutuku nirya kwelina ati, weik mikip arye, kwepdeiplumura, pia mikip weik ulula ati, wini talak babye, tuba aulule. Aning atonun, im noutam ap, im deice ap, amutuku noutam ulye ning nirya ap ara, ancuk kwepdeiplume. An taruk mikip deice aryuk, aning-aning nirya akunum kwepdeiplume.

Mazmur 143:10

Tonda, Allah ance, ‘Anye birye winipnamle ning ara, ani-ani,’ akunum tenelamnulum ning ara, ‘Ance peterepnutumba, biktinirye, aninguk talibuka wininamtinye’ tenen, moropkine na nio. Aning patapnila ara, talye ati kume. Deiyok ara, anda na ni Allah ulyame. An tibuk si erekiniba, ance na talinilyame. Ati, an pia teleb ulyam Pia Teleb, Lek Dip Kanye arye, elcuk, “Wininalyame, wininalyame,” nyabuka, peterepnuturye, menekuka balibuk, nara el aminyan tam yanuka, abisikuk banamne na nio. Elce peterepnilyopura, ikin ning ara, na dam kum yanamle. Teleb bisikuk banamne.

Mazmur 39:6

Na kele, ance nati, ‘Anye bira, keting tamun mitik tonun dem kam unamle,’ akunum tenepnulume. Ati ara, na kam unamne keting tamun nuktinyopura, mitik tonunuk kipnamle. Tonda, ance teneplum ning ara, ‘Ninye tukwak unyak talak ara, pia mitik tonun kam unyake,’ tenesilyame. Winipmanto ara, ninye tukwak nang nirya, kam unyap keting tamun ara, tonok ulule. Ninye isin ara, mok puru yo bok deice palipmalya miklamle touk ulule. Pia mitik tonun dem ulule.

Mazmur 90:9

Malye weik wininyaba deice arye, Allah an yu upkiliba, nun kam una ati, lo ara, mitik bumanguk arisilyame. Aketing tamun, aketing tamun nirya, upnin balamipya ani, sirya talak ara, isin arepsulum ning, tamubuka dopropsiminyeura, malye nyabuka ngalukibirye, adiparyuk dibinyabe.

Amsal 10:25

Winilula ati ara, malye, el dam ara, pia weik kumanya mikip yalirye, amalye ululnye dam, yanuka puplirye, el nong bobiliba, kum danamle. Bukni diksukum teleb ubuka unyak ninye ara, pirilen ning ton, sik dam yatua babye, kum lulukdenamake. Pia tunim abuka telebuk unamake.

Matius 21:31

Ayupu akunum nyabukopura, aYahudi yala deiyok nang ati, asipdeyuk. “Amapu bitinye nang ara, sik ni patapmokba, morobuk ning ara, danye birye dipkoprop kekebuka wininmok do?” nyabuka Yesus arye asipdeyuk. Asipdeyukba, sikce, “Minyumanye bira kekebuka el li pil ati melipmoke,” nyabik. Nyabikopura, Yesus arye anang ati tamubuka nyabuk. Na dipkoprop nyapsine. Sik ninye deiyok nang arena ati, pajak yo bok ubula dolonyak nang, pia malye unyak nang ap, talye-talye yoldalamak kilapu ap, aninye nirya, sik malye ning batakuka, akunum dib tenepnikirye, Allah arye ninye mutuku-mutuku nirya noutamak, ninye weik lyebuka sik talima talisilirye, akunum menekuka wekenyake. Bukni, anggun wini talak ululum nang ara dib tenena kum ati, anggun wini talak babye min kum wekelulume.

Matius 24:35

Im deice tam ulye ning nirya ap, tukwak tam ulye ning nirya ap ara, kum danamle bukni, na nyasinye yupu nirya ara, tonok babye ton kum, kum danamle. Pia aupnamle. Na yupu nyasinye touk dipkoprop nong upnamle. Yesus arye nyabuk.

Matius 7:21

Ninye aryuk nati, ‘Na ni, Na ni,’ nyabuka, talya nyaltakaninyak nang nirya ara, narye talipniba, neika kum unamabe. Nati, ‘Na nie,’ nyabuka, talya nyaltakaninyak nang nirya kum bukni, Na ni Allah, im deice ululnye birye, ‘Ninye nirya wininamak’ tenen, nyasilye touk kekebikirye, aninguk talibuka unyak nanguk, narye talipnirye, na ap neika unamabe,” Yesus arye nyabuk.

Markus 3:35

Yata nang do nirya, Allah arye, ‘Wininamak,’ tenelul touk pil dololamak nang, sikda, na weit yapu ap, na weit kilapu ap, na nin yapu ap, atonun unyake,” Yesus arye nyabuk.

Yohanes 4:14

Bukni, yata ninye do nirya, narye arebsinye mek dobuka dibikcopura, tuba tamubuka tonap mek kum patapnamle. Anggun mek patana kum bukni, na arebsinye mek dopropmunyopura, anggun kanye talima noutamak arye, mek pu atonun upsilyeura, mek pu doplirye, panabuka saklamle atonun winipnamsile. Winipnin balamlya ani, aminyan talak ara, pia kam unamlume,” Yesus arye nyabuk.

Yohanes 6:58

“Adomon yupu nyapmasina deiyok ara, im deice arye yayuk kwaning, nati nyasunune. Nun apu yapu ara, Allah im deice arye dopdeiamuk ning, el si mana kwaning bulubuka dilamik bukni, aminyan diplamik. Bukni, na nyapsin roti dobuka dinyak ninye ara, kam pia unamake. Ara, nati dib tenepnikirye, melinamniak ninye ara, pia kam unamake.” Yesus arye ayupu nirya nyabuk.

Yohanes 7:17

Yata ninye do nirya, sikce, ‘Allah tenenyamsukce, el yupu deice nyasilye touk, aninguk talibuka unamabe,’ tenebikirye dipkoprop ubicopura, kel biknamak ning nyapnusine. Na Yesus arye, na kanye aryuk peterenun do? Na Ni Koprop Allah arye nyanilye yupu uk peterenun do? Ayupu dobolbanyak ninyeuk kel biknamakca,” Yesus arye nyabuk.

Roma 12:2

Tonda, sik diba kum tenenyak ninye arye winilamaka atonun, tuba kum wininamlum bukni, Allah arye anggun malye kanye tenen ning nirya dangupsilirye, kanye talima winiryuk ning punubuka arisilya deice arye, anggun winin ning nirya ara, telebuk wininamlulume. Anggun kanye talima winiryuk ning akunum upmasilyopura, Allah arye, ‘Wininamake,’ tenesilye ninguk, moubuka kel kinamlulume. Ara, ‘E, dipkoprop teleb winin ning ara ani. Winibibiba, Allah arye kanye deilisilye ning ani. Malye ning tonok babye kum winiplirye, diksukum winin ning ani, kel kinamlum’ tenen, nyapsine.

1 Korintus 7:31

Ayupu nirya nyapmasina ara, deiyok ani. Ara, wini talak dinyabuk, atukwak mutuku ulul ning nirya ara, atalak ulye touk, pia weik tonun tonap kum unamle. Aning nirya, akunum kum upnin banmala ati, ayupu nyapmasine. Aning ati ara, yata yala ning do nirya, tukwak awablye ning nirya talibuka, pil dolamak ninye nirya ara, aning ap, apil ap, aninguk tenebuka kum wininamlulume. ‘Aning-aning nirya ara, tia ning uka,’ tenebuka unamlume.

Kolose 1:9

Aning nirya laka nyapsuk ning ati ara, Epafras arye, anggunti ayupu nyapsuk talak arye dipdongobuka, atalak ap, aminyan unamsil talak ap, atalak-atalak nirya babye, batakna kum arye, anggun Kolose nang ati, Allah pia morosinyame. ‘Allah arye anggun Kolose ninye ati wininamle’ tenen, morosinyam ning ara, nyapnusiname. Ara, Allah arye anggunti, ‘Wininamake, aning ton kum wininamake,’ tenyamsuk ning nirya ara, ‘Dipkoprop moubuka kel kibikirye, aninguk wininamak’ tenen, morosinyame. Ara, ‘Weik kel kina deiyok ning doprobikirye, kel ninye unamak’ tenen, morosinyame. Tonda, Allah El Dib Kanye arye, el mikip arisilya deice arye, nong bol deice ninguk kum bukni, ‘Pia noutamak deiyok kel ning ton moubuka tenenamak’ tenen, Allah morosinyame.

Kolose 4:12

Tonda, anggun mutuku, Kolose mutukunye, Epafras arye, “Telebe,” nyapmasile. Elce Yesus Kristus amu tam ulirye, Yesus el pil dobuka ulule. Epafras arye anggunti, pia pi dobuka, Allah moronauk usulule. Elce morosulul ning ara, nyapnune. Ara, Allah arye el mapu nirya ati, ‘Wininamake, wininamake,’ tenesilye ning nirya ara, ‘Aning pia dipkoprop ning anya arye, Kolose nang arye aninguk talibuka pia kanye lamabuka unamak’ tenen, Allah morosulule. Tonda elce, ‘Teniltona kumce, diba tenebiceura, sik talima pia wisipnamle’ tenen, elce anggun Kolose nang ati Allah morosulule.

1 Tesalonika 4:3

Ayupu atouk ning ton nyapnusiabe. Ara, Allah arye nun nirya ati, ‘Wininamake,’ tenelamsuk yupu ara, ani. Tonok ning ara, Allah eluk talilamunce, diksukumuk wininamlulume. Talya ninye arye, talye-talye yoldalamak ning nirya ara, pia kum wininamlulume.

1 Tesalonika 5:18

Allah arye anggunti, ‘Wininamake,’ tenyamsuka ara, ani. Ara, Yesus Kristus ap, kanye dukdongobuka neika unamak talak nirya ara, yata wirin talak do nirya, ikin uplye talak babye, kanam uplye talak babye, Allah ati, “Telebe,” nyabuka kanye delinamake, tenyamsuke. Ati, wininamlulume.

Ibrani 10:36

Ikin ning awabsilya babye, batakna kum arye, pia pi dobuka, ‘Diba,’ tenenauk ulamunyopura, aminyan talak Allah arye tenyamsuk touk, akunum winipmunyopura, elce, “Winibuka, winibuka arenamsine,” nyabuka nyalilamsuk touk dekna ning arepsiliba, ‘Aning dolonamlume’ tenen, nyapsine.

Yakobus 4:14

Anggun ayupu nyalulum ning ara yata ati do? Ambusum winipnamasil ning, aning babye tenebuka kum kel keptuma ati, nyana meme. Anggun kam unamlulum talak nirya atonun ning nyapnusine. Dua puto welebli ani, keting deiplirye, keting bupu arye minopce kum danalamle touk ululume.

1 Peterus 1:5

Anggunda, Allah ati diba teneluluma ati, Allah arye, ‘Na mapu malye ubicak’ tenen, el mikip deice arye kalekuka lelilongosulule. Wini talak arye dipdongobuka, dotalak yanamle talak nirya ara, el mikip arye kalekuka lelisilyebuk, sirya daknamle talak akunum uplyopura, Allah arye lyen ning akunum kintiniyeiamsuk ati, Yesus aminyan talak tamubuka yalyopura, lyepnamsile. Atalak ara alyen ning nirya laka daneipnamsile.

1 Peterus 4:2

Malye winin ning akunum batakanyak ninye ara, kanye imun kanye bobuka, akunum ulamik ati, sik tukwak mutuku tuba unamak talak noutamak nirya ara, ninye talima ak, malye un ning pataplibuk kum wininamake. Malye un ning pataplibuk, ‘Malye winipnuyap’ tenen, kum unyak bukni, Allah arye, ‘Wininamak,’ tenesulul ninguk tenebuka, aninguk talibuka diksukumuk unamake.