1 Yohanes 2:13 - Eipomek

¹³ Anggun dipkoprop wisi nang ara, na ni yapu atonun ululume. Aning-aning nirya min kum uamuk talak, minop arye el tonok ulamuknye, Allah akunum kel kiplume. Allah akunum kel kipluma ati, ayupu seksene. Anggun kam nang ara, Pia Malye Ululnye, Isa Mutuku Dongonye akunum bisibuka yaniptapluma ati, ayupu seksene. Tonda, na mapu atouk nang ara, nun ni Allah akunum diba tenebuka kel kipluma ati, ayupu seksene.

1 Yohanes 2:13 ပူးပေါင်းရင်းမြစ်များ

Mazmur 148:12

Se, anggun kam nang babye, kam kilapu babye, mitik mapu babye, wisi nang babye nirya arye, Allah Yahweh el tibuk, “Anda, pia telebe,” nyabuka, el siuk erenamlume.

Mazmur 90:2

Tonda, mutuku-mutuku nirya, min kum kwepdeialum talak arye aulalume. Tukwak mutuku ap, mutuku-mutuku nirya ap, min kum kwepdeialum talak ara, anda akunum aulalume. Allah an Kam Una Deiyoknye anya arye, pia ati, aunauk unalame. Atalak arye diprongobuka, dounamle talak babye, kam pia ati unalame.

Mazmur 91:14

Allah el si Yahweh arye nyabuk. Dipkoprop, na wipdeiamsinye birye, natibuk kanye deilinulula ati, narye el anye bira, lyelonamne. Lyepropniba, elda na amu tamuk uliba, nara el damuk, pia unamne. Ara, el anye birye, na siuk erenulula anya arye, narye elti, pia melibuka kalikinamne.

Amsal 20:29

Welnye el nong mikip ululnye binyak, yuk nang nirya arye elti, kanye pia delinyakce, ‘E, anye bira pia telebuk ulule,’ tenenyake. Aning atonun, wisi nang babye, teleb kibuka diksukumuk ulamikiba, kul potong palye nang ati, yuk nang arye, “Anang ara pia telebe,” nyabuka, kanye delinyake.

Yoel 2:28

Allah arye Israel ninye ati nyabuk. “Na tenepse talak, akunum dam uplyopura, narye anggun tukwak ninye nong deice, na Dib Kanye arepnamsine. Arepnamne talak, anggunce deipnamlum sal mapu ap, kilmapu ap nirya ara, na yupu nyapniba, kekebikirye, sikce laka nyanamake. Tonda, sik wisi-wisi nang unam noutamak arye, tonok-tonok nang ton, lengdar deice mabikirye, na arenamne ning lak kipniba, eibikirye, ayupu ton laka nyanamake. Tonda, wel nang, sik deice arye dotalak unamle ning, sik dam arepneba, sikce kel kibikirye, laka nyanamake.

Zakaria 9:17

Doyanamle talak ara, Allah arye anang ati, arepnamle mutuku noutam ara, ninye arye, wa wibuka koulamak ning, el si gandum, nong weik upliba libuka, dilamica deice arye, sik awel nang ap, wel kilapu ap, sik nong teleb kibuka nenamake. Aning atonun, anggur mek winiryuk purubikiba, pia telebuk uplye ning, sikce kwebuka dinamaka deice arye, telebuk unamake. Winibicopura, akilisal sik nong urasin nirya, pia teleb asa arye unamake. Aninye nirya ara, Allah arye, pia moubuka talipliba, unamake.

Matius 11:27

Allah morobukopura, el yupu kekenmek nang ati ayupu ton nyabuk. Na ni Allah arye, ‘Na mi Yesus, aning-aning nirya talibuka deiyoknye unamle’ tenen, akunum arepnuke. Ninye nirya tonoknye ton, Allah el Mi Koprop arye, el kanye talima noutamak tenelul ning ara, kum kel biktinge. Allah el Mi Koprop kanye talima ulye ning ara, Allah elcuk kel bikilulue. Ninye nirya tonoknye ton, na ni Allah el kanye talima noutamak tenelul ning ara, kum kel biktinge. Na ni Allah, el talima noutamak ulye ning ara, tukwak ninye ton kum bukni, nauk ara, el Mi Koprop arye kel bikinune. Tonda, ‘Narye peterenunba, na ni ulye ning kel kipnamak’ tenen, wibuka deipse nanguk, na ni Allah arye pataplyeba, tenelul ning kel biktinge.

Matius 13:19

Ura, yo duk dokninbanmok bukni, bisik noutam sakmok ning ara, Allah yupu peterebik bukni, yuk ninye arye, ‘Kekepnuyap,’ tenebikibuk, bita kum kekenyake. Ara, Isa Mutuku Dongonye, malye winina deiyoknye birye, adiparyuk sik talima noutamak arye, ayupu dalubuka dololule. Dopropliba, aninye dib kum, tenenyake.

Matius 13:38

Wa nyapmanua ara, tukwak mutuku im sirya, mutuku sirya nirya ati nyapmanue. Teleb yo duk ara, Allah akunum lyebukce sik talima talilul ninye ati nyapmanue. Malye yo duk pabukce, palamuk ning ara, Malye winin ning Deiyoknye, Isa Mutuku Dongonye el yupu kekebuka pia malye winin nang ati nyapmanue.

Matius 5:37

Aning ati ara, anggunce nyalin yupu nyanamlum talak nirya ara, ‘Winipnune,’ tenepmunyopura, “Yo, winipnune,” nyapnamlulume. Aning atonun, ‘Kum winipnune,’ tenepmunyopura, “Kume, kum winipnune,” nyapnamlulume. Anggunce, ‘Yuk ninye diba tenepnamsiyak’ tenen, yuk ning si ap, tabakuka nyamunye ning ara, isa arye nyapsiliba winin ning atonun ati, aning winina meme nyapsine. Yesus arye nyabuk.

Lukas 10:22

Allah morobukopura, el yupu kekenmek nang ati, ayupu ton nyabuk. “Aning-aning nirya ara, na ni Allah arye akunum arepnuke. Ninye nirya tonoknye ton, Allah el Mi Koprop arye, el kanye talima noutamak tenelul ning ara, kum kel kiptinge. Allah el Mi Koprop kanye talima ulul ning ara, Allah elcuk kel kilule. Ninye nirya tonoknye ton, na ni Allah el kanye talima noutamak tenelul ning ara, kum kel biktinge. Na ni Allah, el kanye talima noutamak tenelul ning ara, nara, el Mi Koprop arye kel bikinune. Bukni, yuk nang ton kum biktinge. Tonda, ‘Narye laka nyabuka peterenyeura, na ni kel kipnamak’ tenen, wibuka deipse nanguk, na ni Allah arye tenelul ning kel biktinge.” Yesus arye nyabuk.

Yohanes 14:7

Dipkoprop nati moubuka kel bikamtumtoura, na Ni koprop babye akunum moubuka kel biknamtume. Bukni, wini talak ayupu nyapsine. Wini talak arye diprongobuka, doyanamle talak nirya ara, na Ni Koprop Allah akunum kel bikamlume, akunum na elinululuma ati nyapsine,” Yesus arye nyabuk.

Yohanes 14:9

Nyabukura, Yesus arye nyabuk. “Pilipuso, anggun ap, na ap, asum-asum yupa weik neika akunum ulamubu bukni, anda moubuka min kum kel bikamnulum do? Yatanye do nirya, na elilamnuknye birye, na Ni Koprop Allah ati akunum elilamuke. Nun bitinye ara neika ati, ance, ‘An Ni Koprop Allah laka kipdeipsutume,’ nyapmanilama ara, yata ati do?

Yohanes 16:3

Pia malye wininamsiyak bukni, aning atonun wininamsiyaka deiyok ara, sik anang arye na ni Allah ap, na ap ati, dipkoprop diba kum tenesinyake. Diba tenena kumce, nun kum bikamsika ati, nun ap talima dukdongobuka kum unyake.

Yohanes 16:33

Aning-aning nirya, min nyapmasina deiyok ara, ‘Sikce nati diba tenepnikirye, na ap, na mapu ap, kanye talima dukdongobuka neikauk ubibyopura, sik ikin kanye bona kumce, kanye deibuka telebuk unamak’ tenen, ati nyapmasine. Tukwak mutuku noutamak unamlum talak nirya ara, ikin ning ap, kanye imun ning ap, unamsile. Bukni, bouku sukuna kumce, kanye deibuka lamapdongobuka unamlume. Ara, tukwak mutuku ulul ning ap, tukwak mutuku unyak ninye ap nirya ara, narye akunum malye kibuka bisipsirye, sik deice tam akunum ununa ati nyapsine.” Yesus arye el wipdeiyamuk nang, sik 12 nang ati nyabuk.

Yohanes 17:21

Naio, narye sik aminyan talak dib tenenamak ninye ati moropmakin ning ara ani. Ara, ‘Na ap, Allah an ap, nun talima dukdongobuka, tonok kanye bobuka unyam touk, sik dib tenenyak ninye ap, aminyan dib tenenamak ninye ap, sik nirya ababye atonun, talima dukdongobuka neika unamak’ tenen, moropkine. Tonda, naio, sik nirya ap, nun bitinye ap, ‘Nun nirya ara talima dukdongobuka, tonok kanye bobuka neika unamap’ tenen, moropkine. Anyapman touk, sik dib tenepnamak ninye nirya arye winiptingopura, yuk talye ninye nirya eibikirye, ‘E, dipkoprop, ninye lyena ati, Allah arye Yesus dopdeipsuk’ tenen, kel biktinge. Utenen ati moropkine, naio.” Yesus arye nyabuk.

Yohanes 17:3

Ura, bol koplobuka pia kam una ara, talye winina kum bukni, ara na areamnulum ninye ap, an ap, ance dopdeipnulumnye Yesus Kristus ap, nun nirya talima dukdongobuka neika una ati nyapne. Aninye nirya arye, nunti diba tenepsikirye, nun bitinye ap, aninye ap, talima dukdongobuka neika ubibya deice arye, pia kam unamake.

Yohanes 8:19

Nyabukba, sik Farisi nang arye Yesus ati tamubuka asipdeyik. “An ni koprop ara, dan mutuku ulul do?” nyabuka asipdeyik. Asipdeyikba, Yesus arye tamubuka, “Anggunda na ap, na ni koprop ap ati, pia kum kel kiyamlume. Nati, ‘Anye bira anye’ tenen, moubuka kel kipnutumopura, adeice arye, ‘E, el li kopropa anye’ tenen, kel kiptume. Bukni, na ap, na ni koprop ap ati, moubuka kum kel kiyamlume,” Yesus arye nyabuk.

2 Korintus 4:6

Allah arye, “Kuna noutamak arye, dirina unamle,” nyabuk. Ayupu nyabuknye Allah, elcuk nunti pia mambul ning arepsuke. Ara, nun kanye talima noutamak, el dirina ning arepsuka deice arye, Allah el pia teleb ulul ning ap, pia teleb winilul ning ap ara, bikinyabe. Allah el pia teleb ulula ara, Yesus Kristus el winilamuk ning kel kibibya deice arye, laka usilibuk, bikinyabe.

1 Timotius 5:1

Ara, yuk yupu ton nyapnukine. Wisi nang ati ara, mikip arye wenena ap, derelana ap, meme. Aning kum bukni, ‘Anang ara, na ni yapu atonun unyak,’ tenebuka, nimalye arye, “Naio, winina telebe,” nyabuka, peterenalyame.

Titus 2:6

Arup nyapmakin touk, ance sik kam nang ati ara, melibuka peterenamlyame. Ara, sik kanye noutamak patalul ning, ‘Talye luparabuka winipnun,’ tenena kum diparyuk, ‘Malye winibibyak’ tenen, sik wininyak ning ati bita dipdandekirye, sik mining kanye atibuk, diksukumuk unamake. ‘Winibuka unamak’ tenen, ance sik kam nang ati, anyapkanin yupu peterenamlyame.

1 Yohanes 1:1

Na Yohanes arye ayupu seksene. Ara aning-aning nirya kum uamuk talak, Allah el Kam una Yupu dobuka yanamuknye, Yesus ulamuk. Im deice ei ulamuka ani, tukwak mutuku yayuk talak ara, aulamukce, yupu nyalamukbuk, kekelamubu ning ap, nun asing arye elilamubu ning ap eibuka, nun taruk arye talilamubu ning ap ara, aning-aning nirya ara, anggunti laka nyabuka peterenyabe. Apeterenyaba ara, Kam Una Deiyoknye, Yesus, elti, nyasinyabe.

1 Yohanes 2:1

Na mapu bico tenesunune. ‘Anggunda malye kum unamlume’ tenen, ayupu seksene. Bukni, yata nang do nirya, malye winibicopura, nun kanye barina ap, melina ap ati, Allah dam tuba-tuba yupu melibuka nyasululnye tonok usulule. ‘Allah arye sik tukwak mutuku ninye oploplyak’ tenen, Yesus Kristus arye, nun melina ati, teleb yupu nyaplirye, yupu sekelule. Allah dam melina yupu nyasululnye bira, Yesus Kristus uka. Yesus Kristus ara, Pia Diksukumuk ulule.

1 Yohanes 2:12

Sik kamto nang ara, narye bico tenesununa ati, na mapu atonun ululume. Anggun malye tenelulum ning ap, malye winilamlum ning ap, Yesus Kristus el si deice, Allah arye, ‘Sik malye winilamik bukni, aning tonok minopce kum opnune’ tenen, batakdongobukce, talye kanye bobuke. Winibukce, anggun malye winilamlum ning nirya ara, akunum namin kipsukce, anggun malye ning ara, kum ubuka deibuke. Ati ara, ayupu seksene.

1 Yohanes 2:14

Na ni yapu atouk nang ara, aning-aning nirya min kum kwepdeiamuk talak, minop talak arye, el tonok ulamuknye, Allah akunum diba tenebuka kel kipluma ati, ayupu seksene. Anggun kam nang ara, anggun talima wisipsuk ak, anggun talima tunim abuka umunya deice arye mikip upsuke. Tonda, Allah el yupu diba teneplumce, talibuka dobolbalulume. Tonda, Pia Malye Ululnye, Isa Mutuku Dongonye akunum bisibuka yaniptaplume. Aning-aning nirya ati ning ara, ayupu seksene.

1 Yohanes 3:12

Ura Kain ara, Isa Mutuku Dongonye el yupu kekenanye ulamukce, el weit koprop Habel oplobukce, winilamuk touk kum wininamlulume. Kain arye el weit koprop oplobuk ning ara, yata ati do? Deiyok ani. Kain el winilamuk ning nirya, malyeuk winilamuk bukni, el weit koprop Habel ara, diksukumuk winilamuka ati, Kain arye yu ubukura, Kain arye Habel oplobuk.

1 Yohanes 4:4

Na mapu atonun nango, anggunda Allah ati, diba tenebuka taliplum nang ara, anggun talima ak usilinye, Allah, el mikip pia weik ulule. Bukni, tilila yupu peterenyak nang nirya, sik talima ak ulirye, talilinye bira, Isa Mutuku Dongonye, el mikip mitika. Ati ara, Allah el mikip deice talisilibuk, ululuma anya arye, Isa Mutuku Dongonye, el talilye nang nirya, akunum yanibuka bataklulume.

1 Yohanes 5:18

Nun kele, Allah arye sik talima kam bukeibuk ninye nirya ara, tuba-tuba malye kum wininyake. Allah el Mi Koprop wibuka deibuknye bira, Yesus, elce aninye ati, ‘Malye winibicak’ tenen, pia melibuka kalikilule. Yesus arye sikti, winiplyopura, pia Malye Deiyoknye, Isa Mutuku Dongonye, malye kum kipdeipsutue. Ton, dalubuka kum dopropsutue.

1 Yohanes 5:20

Ton kel kibupu ning, ton nyapnusine. Ara, ‘Sikda Pia Dib Koprop Allah, diba tenebuka talipnamake’ tenen, Allah el Mi Koprop Yesus yayukce, kel kina deiyok ning akunum arepsuke. Pia Dib Koprop Allah ap, nun ap, talima dukdongopsukba neika unyabe. Aninguk kume. Allah el Mi Yesus Kristus el bidamnye ap, nun ap, talima dukdongopsukba, neika unyabe. Yesus Kristus elda, Dib Koprop Allah el nong tonok ulule. Tonda, elda, Pia Kam Una Deiyoknye ulule.

Wahyu 12:11

“Allah el mapu nirya ara, Domba Mi Atonye, el ining sik lyena ati arebuk deice arye, Isa Mutuku Dongonye malye kibik. Tonda, aninye arye, “Ninye lyena ati laka teleb yupu ani,” nyabuka lak akarye, peterelamika deice arye, Isa Mutuku Dongonye malye kibuka nirya obik. Aninye nirya arye, ‘Kume, nun kam unyaba ara weik mambule, nun kam una ara nun dokola ati ara, opsicak ati, Allah yupu nyanyaba ara bataknuyabe’ tenen, ilil kum ulamuk. ‘Malye nang arye opsica babye, telebe uka,’ tenelamik. Aning nirya winilamika deice arye, Isa Mutuku Dongonye ati, malye kibuka ulamik.

Wahyu 2:7

Anggun amul wapsilyopura, ‘Ayupu deiyok ara ani’ tenen, kekepmanto ninye nirya ara, Allah El Dib Kanye arye, Allah diba tenenyak ninye nirya ati nyalul yupu ara, moubuka kekenamlulume. Ara, malye winin ning nirya ati, malye kibuka kinyak ninye nirya ati ara, na pia teleb ununa noutamak tikuk yo ati, “Teleb amolul yo duk ara anggunda dakuka diplulum,” nyapnamne. Ayo duk din ning ninye nirya ara, pia kamuk unamak anya arye, ayo el si ara, Kam Una Yo nyanyabe. “Ayupu nirya ara, Efesus mutuku diba tenebuka unyak ninye ati nyapnamlyame,” nyapnuke.