1 Yohanes 1:8 - Eipomek8 Nun nirya arye, malye winin ning tuba aupmasilibuk, “E, na pia malye kum wininune,” nyabuka, talye nyaltakanyap bukni, nyabibyopura, ara nunce nun bidamnye atibuk, talye duknubuka nyalanyabe. Tilil yupu uk, nyalanyabe. Tonda, winibuka nyabibyopura, Allah el dipkoprop yupu, nun kanye talima noutamak kum usulule. အခန်းကိုကြည့်ပါ။ |
1 Yohanes 1:8
33 ပူးပေါင်းရင်းမြစ်များ
Nyabukopura, Yesaya birye, ayupu tonap dukdongobuka nyabuk. “Sik anang ara, an talibuka ulyam asik noutam ara, yata-yata ning dilyanmangurye, eibuka bikmak do?” nyabuka asibuk. Nyabuka asibuk ati, Hizkia birye tamubuka nyabuk. “Kume, narye deipse ning, yala-yala nirya ara, eipmakce bikmake. Tonda na talinun asik noutam deibik ning, yala-yala nirya ara, tonok babye, ton kum duknupmane. Aning nirya ara, lake nyapmanbuk, sik anang arye ebuka bikmake,” nyabuk.
Bukni, an mapu sik Israel nang arye, aminyan talak an dam malye winipnamake. Nun kele, dan tam nang do nirya, ninye deiyok nang babye, teleb nang ton kum unyabe. Ati malye ubicopura, yu upliba, ance anang dobuka, sik mal olan nang deice deipmin buk, ayu nang arye an mapu malye kibicak arye, Israel nang tomobikirye, sik babye yuk mutuku bobicak arye, wenen aik dongobiceura, amutuku ara pera mutuku do, dam mutuku uk do, delilbinamake.
Anda moubuka tenipnalyame. Ance, ‘Nara, malye pia kum upse. Diksukum unanye unune,’ tenepdalum bukni, aning ara winipmanto. Kume, nun tukwak unyap nang tonoknye babye, malye kum wininyak do? Tonda Allah el dam yanuka, el si erena ati ara, talye nang arye deiamsik nang unyap nang arye, el dam talye lukdanuka yatibye do? Atonun, tukwak mutuku kilapu arye deilinsik nang unyaba ati, Allah arye, “Aning wininamlume, aning ara, pia kum wininamlume,” nyapdeiamsuk yupu ara, malye winina pia kum arye, diksukumuk wininyap do? Kume, nunce kum winiptibye. Ati, nun nirya arye, “Nunda teleb nang unyabe,” nyapmanto kume.
Allah ara, pia mambul weiknye ulula ati, nun talye tukwak mutuku ninye adeksuka nirya ara, Allah el dam tikibirye, “Anggunda pia dipkoprob, pia teleb nanguk ululume. Narye nyasunun yupu nirya, moubuka talipmunce, dobolbanauk ululume,” nyapsutu do? Tukwak kilapu arye delinyak mapu unyaba ati, yatanye malye winina kumce, teleb leknye upturye, Allah el dam talye parapkapturye binuka uptu do? Kume, nun nirya ara, malye winina kum, pia diksukum ubuka, teleb ninguk kum unyabe. Nunda malye winin ninguk wininyabe.
Na nio, tukwak mutuku noutam kam tuba unyap nang nirya ara, pia diksukumuk kum unyaba ati, yatanye birye, ‘Nara telebnye unune,’ tenepturye, an dam talye mangkau asa, yanuka tiktu do? Kume, aning ara, kum winipmanto. Nara, an amu tam unirye, an piluk donuna ati, ‘Ance na malye wininun ning ati, namin kipnutumopura, aminyan talak ara, yupu lipsisikuka bokeipnimince, kum wenepnamnilam’ tenen, moropkine na nio.
Yata ninye do nirya, ninye tukwak mutuku unyak ninye noutamak ara, tonoknye birye mikip asa yupu nyapturye, ‘Se, nara, pia telebuk unirye, na talima pum tam nirya ara, malye ning tonok babye pia kum unune. Na tuba kam unamne talak nirya ara, malye un ning ap, yuk malye winin ning ayala-ayala nirya ap, pia kum unamne. Nara, kanye talima diksukum telebuk kibuka ununye,’ tenebuka kum nyaptinge. Ninye tukwak unyak kili sal nirya ara, pia teleb ninye ton, pia kum unyake. Aning ati, sikce, ‘Nara dipkoprob teleb kibuka unune,’ nyan yupu ara, kum nyaptinge. Ayupu nyabica babye, tilila yupu uk nyanyake.
Tonda, narye bikse. Tukwak mutuku im sirya, mutuku sirya nirya ara aunyak nang kan-kan arye ton nang ara pia teleb ubuka unyak nang ton unyake. Bukni, ateleb unyak nang babye sikda ton talak ara, malye ton wininyake. Tukwak mutuku noutam ara, malye ning tonok babye, kum upmanto ning ara, pia kum ulule. Ninye tukwak nang nirya ara, malye un ning pia wiminyake.
Winilamuk ning deiyok ara ani. Ara, winipmanto ara, nun nirya wanglamak domba basam atonun ulamupu. Nun malye ulamupa deice arye, nun kanye yuk-yuk tenilamuburye, bisik yuk-yuk tenebuka balamupu. Domba basam buru sakuka yuk-yuk dabalamak touk ulamupu. Allah Yahweh arye nun tukwak ninye malye winilamu ning ati opsutu bukni, nun malye winina ati, nun malye winilamu ning nirya dobuka, el amu tam pil dolamuknye, el nong deice uk deibuk.
Nun nirya ara, Allah ance, ‘Aning ara, weik malye ning anya arye, na walwale,’ tenesiminye ning atonun wininyabe. Tonda, nunce, ‘Teleb unyap ning ani’ tenen, teleb winin ning winiptibya babye, dipkoprob weik malye ninguk unyabe. Nunda, pia weik malye ning baju deice bol pipliba, bataklamaka atonun, nunda malye ninye uk unyaba anya arye, malyeuk usulule. Tonda, weik kumanya yalirye, pubuka dopliba kolulamle yo bok dakuka bobalamle touk unyabe. Ara, nun minopce malye ulamepya ani, wisi dapyopura, dibinyabe. Ara, nun bidamang malye wininyaba deice arye winisulule.
Malye ululum ning, kum nukmanto usilibuk, anggunce nyanululume. ‘Kume, nunda malye kum wininyap nang unyabe. Nunda telebuk unyabe. Ati, Allah arye kum wenebuka opnamsil,’ nyaldalulume. Bukni, na Allah arye dipkoprob nyapsine. Narye anggun malye weik ululuma ati ara, wenebuka opnamsine. Ara, anggun malye ululum diparyuk, ‘Kume, nunda malye kum wininyap nang, telebuk unyabe,’ nyaluluma deice arye, yupu bokipsinirye, wenebuka opnamsine. Na Allah arye nyapsine.
Tonda Imamnye birye, anye el nong bol deice dipdelyebuk, el bol deice nirya, lolobuka kala lokuka sakanmalirye, suse aryuk anye el yan duk arye dipdongobuka, potong duk nirya amuamlirye, suse dilamlyeak, imamnye biryuk, adilul suse ara, yata talak arye lopnamle ouku weik do? Mitik do tenepnamle. ‘Seʼ tenen, anye el nong nirya bita dilenamle.
Anggun ni koprop Isa Mutuku Dongonye arye, anggun kanye talima talisilibuk, elce kanye delilul ninguk malye winilulume. Allah arye aning-aning nirya kwepdeibuk talak arye dipdongobuka, anoutam talak nirya ara, Isa Mutuku Dongonye el kanye noutamak ara, dipkoprop ning tonok babye kum ulamukce, tuba kum ulula ati, Isa Mutuku Dongonye elda ninye talye oltakananye ulule. Elce tilila yupu nyalye talak ara, el mutuku koprop yupu uk nyalule. Isa Mutuku Dongonye, tilila yupu deiyok koubuka nyananye koprop ulula anya arye, tilila yupu uk pia nyalule.
Ninye im sirya, mutuku sirya nirya ara atotouk unyabe. Allah el tonokuk ara malye ning tonok babye kum ulirye, pia diksukumuk ulul touk kum unyabe. Nunda el yupu yaniplobibirye malyeuk unyabe. Allah pia teleb ubuka ulul touk, kum unyabe. Nunda diksukum kum winipmanto ninye unyabe. Ati tukwak mutuku unyap ninye nirya ara neiktotouk lyesulule.
Wini talak talye ninye arye, ‘Se ayupu ara, weik kel yupu. Weik mambul yupu,’ tenenyak ning ara, Allah el kanye ara, ‘Aning nirya ara, talye ning uka,’ tenelule. Na kayapu, anggun bidamang winilulum ning ati, tilila yupu nyapdamunce, dib kum tenenamlulume. Yatanye do nirya, wini talak dib tenena kum, weik kel ninye arye kel kiyamice ning ati ara, aning kel bikmunce, ‘Nara, weik kelnye akunum unune,’ tenebuka ulyamnye bira, kanye moupnulyame. Atalak ara, dib tenena kum ninye arye, ‘Se, aning ara, weik mambule. Aning ara, weik kel bikne ning ara, anye,’ tenebikirye, erenyak ning nirya ara, Allah el kanye ara, ‘Aning nirya ara, talya talye ning uka. Aning nirya ara, nong kum uplirye, kum danamle,’ tenelule. Aning ati ara, yatanye do nirya, sik dib tenena kum, talye ninye arye, ‘Aning weik mambule,’ tenenyak ning ati batakliba, talye nang arye elti, ‘Anye bira walwalnye,’ tenebikirye, nyabikca babye, mambul kume. Allah arye, talye tukwak ning bataklinye biti, ‘Na kanye ara, elda weik kelnye,’ tenelule. Allah arye anye biti, ‘Telebe,’ teneplyopura, ara weik mambule. Aning atonun, Allah yupu noutamak arye ayupu ton sekik. ‘Diba tenena kum ninye, aning-aning nirya kel bikamikce ninye ara, ‘Nunda, weik kel nang,’ tenelanyak bukni, atenelamaka noutamak arye, kabang mankau arye wena pum bisik wekliba youlamle touk, Allah arye anang ati wenepnamle. Ara, sik weik kel bikamikce ning deice arye, tenepce arye winilamice ning ati, wenepnamle.’ (Ayub 5:13)
Wininyak deice arye, kanye deibuka teleb ubuka neiktoto una pia kum arye, malye teneldana ap, waldana ap, oldana ap, wininyake. Awininyak ninye ara, sik kanye talima pia malye ubuka anya arye, dipkoprop moubuka kum teneptinge. Allah el dipkoprop yupu batakuka yaninyaka ati ara, wini talak ara, teleb ning kum teneptinge. Deiyok ara, sikce. Tonda, anang sik malye tenenyaka ara, ‘Allah yupu dobuka yuk nang ati peterebibyopura, aminyan ara, yuk nang arye yo bok arepsikce deice arye bona weik talin nang mapu unamabe,’ tenenyake.
Atalak noutam nirya ara, malye wininyak nang ap, tilila yupu tenepce arye, nyalamak nang ap, malye akunum wininyak bukni, weik arye tonap, tabakuka pia malye wininyake. Sikce yuk nang ati, ‘Tilila ning ati diba tenepnamak’ tenen, tilila yupu talye tenepce arye nyanyake. Aning atonun yuk nang arye aninye ati, tilila yupu nyakibuk, aninye diba tenenamake.
Allah yupu nyapsicebuk, anggun amul deiceuk kekeplopmunce, ‘Akunuma,’ kum tenenamlulume. Ara, talye amul deiceuk kekeplopmunyeura, sik bidamnye aryuk, tilila yupu tenelalamak nang atonun ululuma ati, “Aning ara winina meme,” nyapsine. Allah el yupu deice nyasilye touk, moubuka kekepmunce, dobolbanlulume. Anyak winina kumura, tilila yupu nyan nang atonun unamlulume.
Yatanye do nirya, elce el bidamnye ati, “Na diba tenepsa ati, diksukumnye unune,” talye nyaltakalul bukni, el nyalye yupu moubuka tenena kum arye, talye luba kibuka nyaplyopura, anye bira tilila yupu uk nyalalule. Atonye bira, el dib tenebuka talibuka ulul ning ara, deiyok kum ubuka ati, nong kum upnamle. Diba tenebuk ning ara, talyeuk ulule.
Nun nirya arye, ‘Na malye kum upnun do?’ tenen, winilebyebuk, mankau arye aning-aning yala yuk-yuk, malye wininyabe. Tonoknye birye, el nyalye yupu noutam nirya ara, tonok malye ning babye, kum nyaplyopura, anye bira dipkoprop diksukumnye winilule. Anye bira, el nyalye yupu nirya, moubuka teneplirye, teleb ninguk nyalul touk, el nong ap, el winin ning nirya ap ati, ‘Malye winipnyak’ tenen, moubuka kalikilalule.
Sikce yuk nang ati, malye kipdeilinyak ning ati ara, Allah arye anang ati, kwa dakuka, wenebuka opnamle. Sik kanye deililul ning ara, nyapnusine. Ara sikce, ‘Nun patapsilibuk malye wininamap ning ara, keting duduk noutamak babye, talye luba kibuka winina telebuka,’ tenebuka wininyake. Tonda, lek ongon baju bukni, malye ning duplirye, nininga ulamle touk, sik tilila yupu peterena ninye arye, malye kilisinyake. Ara, sik ap kwalina ning neika dimunye talak ara, amalye nang sik nong patalye ning, malye winin ninguk tenebuka, malye wininyakura, anggun diba tenelulum nang arye, kwalibuka dilulum ning ara, anang arye malye kiilisinyake ati, nyapsine.
Allah arye ninye mutuk sirya im sirya nirya ati, “Sik nirya malye unyake,” nyabuke. Nyabuka ati, nunce, “Kume, nunda malye kum unyabe,” nyabibyopura, talye kanye bon nang arye, “Allah tililanye ulule,” nyalamak touk, nun babye atonun nyanyabe. Nyalamibyopura, Allah el yupu kekebuka, pia kum talinyap anya arye, el yupu nun talima ak kum usulule.
Yatanye do, nirya, “Nara, Allah ati kanye delinune,” nyalul bukni, elda mening dam ninye ati, bico tenena kumce, like tenebuka, kum melilinye bira, anye bira, winilye ning ap, el nyalye ning ap, anirya tililanyeuk ulule. ‘Aning ara yata ati do?’ tenena kume. Ara mening dam unyakba dilye ninye bukni, bico kum tenelule. El mening dam dilye ninye bicoe kum tenelula ati, el asing arye kum dilye ning ara, bico kum teneptue. Ati ara, Allah el dam aulyeba, elce kum dilulnye anya arye, Allah ati, kanye kum deiptue.
Allah el dipkoprop yupu diba tenebuka talimunya arye, el yupu, nun talima noutam tuba usulule. Usilye ati, el yupu diba tenebuka, pia talinauk ulamibyopura, el yupu nun talima ak pia unamsile. Anggunti kanye delina ara, naryuk kume. Aning ati, anggunti kanye delina ara, na babye, ninye mutuku-mutuku nirya babye, Allah yupu diba tenebuka talinyak ninye nirya babye, nun nirya arye sikti, kanye delinyabe.
Allah diba tenena ati, nun ap, du weit atonun unyak nang arye, an ulalum ning ati yanuka laka nyapnike. Sikce nyapnik. “Gaius bira, Allah el dipkoprop yupu pia batakna kumce, talinauk ulule. Tonda, Allah yupu nyasilye touk, Gaius moubuka kekelirye, aninguk talibuka telebuk ulule,” nyabuka anti nyapnikba, na weik kanye deipkise.
ကြော်ငြာတွေ