1 Yohanes 1:7 - Eipomek

⁷ Aning atonun kum bukni, Allah malye winina pia kumce, dirinak ulamle touk, nun babye, malye winina kumce, telebuk ubirye, dirinak atouk ulamibyeura, nun nirya ap, tonok kanye tenebuka, ansinibuka unyabe. Allah el yupu uk kekebuka, dobolbabyeura, Allah el Mi Yesus, el ining arye, nun malye tenenyap ning ap, malye wininyap ning nirya ap, kum ubuka deipsilirye, lyepnamsile.

1 Yohanes 1:7 ပူးပေါင်းရင်းမြစ်များ

Mazmur 104:2

Nun ni Allah el dirina weiknye ulule. Ninye arye urasin teleb baju ongolamak touk, el deice dirina weik ulule. Tonda, ninye arye, kanam aniryuk baju bol dobuka, tia yanuka una ati, doltakna aik tapu bibik talebuka, kiriklamak touk, anda im deice ulul ning nirya kwepdeiplumce, teleb kipdeiplume.

Mazmur 51:2

Raja Daud birye, ninye el si ara Uria, domuk kil, el si Batsyeba ubula dobukba, Allah el yupu laka nyalamuknye, nabi Natan birye, Daud biti, “Ance Uria domuk kil dopluma deice arye, pia malye weik winiplume,” nyabuka wenebukba, Daud birye, ‘Na malye winipse’ tenen, amot deice nyabuk.

Mazmur 56:13

Se, na ni Allah, narye, ‘Anti wininamkine. An ti, teleb aren ning arenamkine,’ nyabuka nyalin yupu deice arye nyalamse ning nirya ara, dipkoprob winipnamnarya! Tonda, narye anti, “Naio anda pia telebe nyapkine,’ nyabuka, an si erenamkine.

Mazmur 89:15

Allah ance, aning-aning nirya ara, mikip weik arye erebuka dolyamce, dilyame. Ance aning nirya erebuka dopluma amu tam aik, ayukumna yo atonun ara, pia diksukum una ap, pia dipkoprob yupu nyana ap, ulule. Tonda, ance nunti, batakna kum diparyuk, weik arye bico tenesilyam ning ap, ance, ‘Wininamsine,’ nyapsulum touk, winisiminye ap nirya ara, aninguk ulule.

Mazmur 97:11

Yata nang do nirya, Allah arye nyasulul yupu moubuka talibikirye, dipkoprob uk wininyak nang ara, Allah arye sikti, lyepdoplirye, dirina deiyok ning arelula deice arye, moubuka bikinyake. Tonda, yata nang do nirya arye, teleb diksukumuk unyak nang ati ara, sik dam ara, pia kanye deibuka, kil-kil una ati, sik anang dam unamle.

Yesaya 2:5

Ati, se, Yakub birye deibukba, dadeipdanin yangalamlum ninye nirya ara, yamunba, nun nirya Allah el dirin deiceuk, talibuka unamabe.

Yesaya 33:24

Tonda aminyan talak ara, Allah arye Yerusalem mutuku akunum teleb kipdeipsilyopura, doryanamle talak nirya ara, nun mutuku noutamak ara, tonoknye babye ikin upliba, imun kanye bon ning ton kum unamle. Uk din ning ayala-ayala nirya babye, kum upnamla anya arye, tonoknye babye, ‘Na uk dinmanile,’ nyabuka, malye kum nyanamabe. Yerusalem mutuku noutamak unamap ninye nirya ara, Allah arye nun malye wininyap ning ap, malye tenenyap ning nirya ap kum kipdeipsilirye, namin kinamsila ati, pia diksukumuk unamabe.

Yesaya 6:7

Abopmokba, uku dinmok kalum ara, na sitang deice deipnukce, ayupu nyapnuke. Auku ara, an sitang deice deipmakinba, dinmakila ati, adeice arye an malye winiminye ning nirya ara, Allah arye kilibuka kum daneipmakile. An malye winiminye ning wenena ati, opkutu bukni, Allah arye, an malye winiminye ning akunum kum kipdeipmakile,” amalaikat Serafim arye nyapnuke.

Amos 3:3

Tonda, winipmanto ning ara, moubuka tenipdelulume. Anggun kele, ninye bitinye nang arye, neiktoto barudake. Ara, sik abitinye nang ara, ‘Nun winipnamaname. Bisikuk neika binamaname,’ nyabuka, laka kum nyapdanmarikiryuk, tonok bisikuk barudak do? Kume, ‘Nun bitinye ara, abisikuk binuname,’ nyabuka, neika kum nyapdatiringopura, neika tonok bisikuk kum bitiringe. (Aning atouk, anggun ap, na ap, tonok kanye uk, kum boptipyopura, neika kum uptibye.) Allah arye nyapdeibukba, Amos birye kekebuk.

Zakaria 13:1

Allah arye Yehuda tam unyak nang ati, tonap teleb kipdeipnamle talak ara, sik malye ulamik ning ap, tuba malye unyak ning ap ati, kum daneipnamne. Ara, Yerusalem mutuku weik asik noutam unyak nang ap, tonda Daud birye deibukba, dadeipdanin yanamak nang ap ati, narye arepnyeba, weik mek balamle atonun kibuka, banamle. Winipmanto ara, abanamle mek ara, sik malye winin ning nirya, mek likuka lyenamle. Ara, Daud tam nang ap, Yerusalem mutuku noutam unyak nang ap arye, malye wininyak ning ap, isa si erenyakce wininyak ning nirya ara, narye lyebuka, kum daneipnamne.

Matius 6:12

Yuk nang arye nunti, malye upsikiba, nun babye namin kinyap touk, ance ton nun malye wininyap ning ati, ‘Namin kibuka, kum kipdeipnamsilam’ tenen, moropkiyabe.

Yohanes 1:29

Anang arye Yohanes ati asipdeyik sum bukni, mapmeka, anyuku sum ara, Yesus arye Yohanes el dam yanganmokba, Yohanes eibukce, nyabuk. “Ninye mutuku-mutuku nirya, sik malye winin ning kum kilina ap, ‘Sik kum dipnamak’ tenen, pununa ap deiyoknye, Allah arena ati Domba Mi Atonunye bira, ayanmal atia.

Yohanes 12:35

Nyabikura, Yesus arye domon yupu deice arye tamubuka nyabuk. “Wini talak ninye moubuka kel bikna ati, dirina upsil ning ara, anggun ap mitik anunuk, anggun neika unamsile. Dirina tuba wapsilye talak ara, teleb bisik adiparyuk banamlulume. Aminyan talak ara, kunuknauk unamsila ati nyapsine. Kunuknak balinye bira, el bisik banmalya ara, moubuka kel kum biktue.

Yohanes 5:4

Amekwen damuk anyuk ninye, sikuk din ninye malilyangalamik deiyok ara aubuk. Ara, asum ton, asum ton Allah el im deice pil don nang, malaikat arye, amekwen deice yanuka mek bol pipmanbuk, amekwen lulukuka lonting-lonting anopura, minopce amek kwen wekelbinanye bira, minopce kwetepdeipnaba, adiparyuk teleb kilamuk. Yata yalauk do nirya, amekwen minopce wekelbinanye bira, eluk dilamuk ning, adiparyuk kum danalamuk.

Roma 13:12

Wini talak ara domon yupu ton nyapnusine. Ara, lukunyan inipmalye talak, ninye mapmaca bereklamle touk, akunum unmala ati, kunukna noutam arye malye-malye winilamikce ning nirya ara, batakibirye, dirin ninguk talibuka diksukumuk winipribapya deice arye, ting ongolamak touk kibuka ubirye, pia kaliknauk unamabe.

1 Korintus 6:11

Amalye winin ning nirya nyapmasina ara, minop talak anggun Korintus mutuku ninye, anggun babye aning atonun winilamlum bukni, nun Deiyoknye Yesus Kristus el si deice ap, Allah El Dib Kanye pil dopsuka ap deice arye, Allah akunum teleb kipdeipsuke. Ara, malye ning talibikirye, mek iliklamak touk, Allah arye, nun malye winin ning nirya kum kipdeipsukce, ‘Na ninye, unamak’ tenen, ansinibuka wipsukce, teleb kipdeipsuke. Winipsuka deice arye, Allah el kanye ara, ‘Aninye ara, akunum diksukumuk unyake,’ tenesulule. ‘Sikda, teleb ninye unamak,’ nyabuka wipdeipsukce, wini talak ara, kanye deibuka tenesulule.

Efesus 1:7

El mi Yesus, el ining biyuk deice aryuk, nun malye wininyap ning nirya namin kipsukce, kum kipdeipsuke. Nun malye winina ati oplopsutu bukni, nun pununa ati dibuksuka deice arye lyepsuke. Nun malye ning tapu kouamsuka noutamak arye, lobuka deksukce, lyepsuke. Winipsuk ning ara, mitik tonun kume. Allah el bico tenesilye ning ap, el kanye aniryuk talye arisilye ning ap, weik arye aulye touk, weik arye areamsuke. Ara, nun malye ning ara, nukmanto kum wamsuk bukni, aning nirya kum kipdeipsukce lyepsuke.

Efesus 5:8

Sik malye wininyak ninye ap, ansinibuka una meme nyapmasina deiyok ara, ani. Minop talak ara, anggun Efesus mutuku ululum nang ara, pia malye-malye ulamluma deice arye, kunuknak atonun ninye ulamlum bukni, wini talak ara, nun Deiyoknye Yesus ap, talima dukdongobuka umunya deice arye, dirina ninye atonun akunum ululume. Ati Dirina Deiyoknye arye el mapu una ati, akunum teleb kipdeipsuka ati, dirina nang ulamak atonun diksukumuk unamlulume.

1 Timotius 6:16

El tonok ara, kum diptue, pia kamuk unamle. El ulya ara, ninye tukwak ninye kum binmanto ak, weik dirina noutam ulule. Yata mutuku ninye do nirya, el nong pia kum elilamik, tonda, pia kum eiptinge. Na Paulus arye nyapmakine. Na pia patanulul ning ara, ninye mutuku-mutuku nirya, el siuk pia erenamake. Tonda, el weik mikip arye aning-aning nirya ap, ninye nirya ap, talibuka unamle. ‘Aning ara, dipkoprop upnamle’ tenen, Amin nyapne. Na Paulus arye sekeibkine.

Titus 2:14

Nun Lyena Deiyoknye Yesus arye, nun lyena ati, el mining nonguk arepsukce, nun pununa ati dipsuke. Malye winin ning noutam akuk ulamupa ati ara, nun wenena ati talye luparabuka oplopsutu bukni, ‘Akili sal ara, deknamne,’ tenelamukce, nun pununa ati, tukwak mutuku yanuka dibuk. Winibuka deksuka deiyok ara, ‘Ninye tukwak kili sal, sik malye un ning nirya kilipnirye, dekuka lopdeipniba, ‘Na’ tenen, ninye pia teleb una ninye unamake. Winibikirye, teleb winin ninguk talibuka, kanye deibuka diksukumuk unamak’ tenen, el nong deice arye deksukce, lyepsuke.

Ibrani 9:14

Sik minop talak pil dolamik ning ara, mitik mambul pil, nong bol deice ning uk, mitik teleb winilamik bukni, Kristus el bidamang ining deice arye, nun kanye talima dipkoprop teleb kilisilya ara, mambul weik ulule. Kristus ara, pia diksukumuk ulamukba, Allah El Dib Kanye, pia aunamlanye bira, el mikip melyamuka deice arye, Yesus arye Allah ati, el bidamang el nong kopropa arepdayuk. Nun kanye talima noutamak, malye ning usilya deice arye, malye winibirye dibinyabe. Ati, Kristus el ining deice arye, nun kanye talima noutamak malye ning dipsuka deiyok ara ani. Ara, ‘Tukwak ninye arye, Pia Kam Una Deiyoknye Allah, el amu tam ubikirye, el pil donamak’ tenen, pil dopsuke.

Yakobus 1:17

Yata teleb ning do nirya, pia teleb diksukum winina ning nirya ara, Allah elcuk arepsilyeura, im deice arye yangasulule. Ara, im deice dirina ulul ning nirya kwepdeibuknye, Allah elcuk pia teleb ning arisulule. Tonda, Allah elda, keting deiplirye, kanya urasin yuk-yuk kinim-kinim alamle touk, pia kum ulule. Allah el pil dobuka ulul ning nirya ara, pia tuba telebuk ulule.

1 Peterus 1:19

Talye kum ulul ning arye kum deksuk bukni, Yesus Kristus ara, domba yok kwanena ap, nong bol malye una ap, kum wamlye ning atonun ulamukce, el bidamnye ining pia mambul ning deice arye dekuka lyepsuke.

1 Yohanes 1:3

Nun ap, anggun asurat eiplum nang ap, ‘Nun nirya arye kanye tonok tenebuka, ansinibuka unamap’ tenen, nun elilamubu ning ap, yupu kekelamubu ning ap ara, anggunti laka nyabuka peteresinyabe. Ura nun kanye tonok tenebuka, ansinibuka unyap nang ara, nun ni Allah ap, el Mi Yesus Kristus ap, dukdongobuka neika unyabe. Nun ap, nun ni Allah ap, el Mi Yesus ap, kanye tonok tenebuka, kanye talima dukdongobuka unyabe.

1 Yohanes 1:5

Yesus arye peterepsukbuk, kekelamubu yupu ara nyapnusiabe. Ara ani. Allah ara pia dirina weiknye ulule. El ulul ning ap, tenelul ning ap noutamak ara, malye winin ning pia kume, diksukumuk ulule. Kunukna atouk ning ara, pia kum ulule. Allah ara winilula ati, Yesus arye, “Allah ara pia dirina weiknye ulule,” nyabuka peterelamsuke.

1 Yohanes 5:6

‘Yesus Kristus elda, dipkoprop Allah el Mi Koprop ulule’ tenen, kel kinyaba deiyok ning ara ani. Ara, Yohanes arye, Yesus mek dongobukba winibuk ning ap, sikce Yesus obikbuk, el ining biyuk ning ap, abitinye ning deice arye kel kinyabe. ‘Yesus ara, Allah el Mi Koprop ulule,’ tenenyaba ara, tonok ning deice aryuk kume. Yohanes arye Yesus mek dongobukba winibuk ning ap, sik obikbuk ining biyuk ning ap, abitinye ning deice arye, diba tenebuka kel kinyabe.

1 Yohanes 5:8

Awinilye ning kel kinyap deiyok ning ara, Allah el kanye ap, Yohanes mek dongobuk ning ap, Yesus ining biyuk ning ap, awinilye ning arye neika atonun nyasulule. Ansinibuka neikto ning nyalula ati, ‘Allah el Mi Koprop ara, Yesus el uka’ tenen, kel kinyabe.

2 Yohanes 1:4

Yuk nang arye, anggunti nyapnike. “Nun ni Allah arye, ‘Wininamlulume,’ nyapsuk touk, anang nirya kum bukni, anggun kan-kan noutam arye, ton ninye ara, Allah el dipkoprop yupu kekebuka diksukumuk unyake,” nyapnike. Nyapnikba, kekepsa ati, na kanye pia teleb deipse.

3 Yohanes 1:4

Na Yohanes arye, peterelamsibuk, diba tenebik ninye ati, “Aninye ara, Allah yupu nyasilye touk, moubuka kekenyakce, pia teleb ubuka unyake,” yuk nang arye, nyapkikbuk kekenun ara, pia kanye teleb delinune. Yuk teleb kanye delinun ning ara, mitikuka. Weik ning ara, atonoka.

Wahyu 1:5

Ura, Yesus Kristus ara, pia diksukumnye ulirye, batakna kum diparyuk, Allah ati pia dipkoprop yupu uk nyasulule. Yesus ara, dibuk bukni, Allah arye minyuma kam bukeibuknye bira, el Yesus uka. Tukwak mutuku noutamak ninye deiyok nang weik aunyak bukni, sik deice tam ulirye, aning-aning nirya talibuka weik Ninye Deiyoknye Yesus ara, elce ton anyapmasin ning arenamsile. ‘Allah ap, Yesus ap, Allah el dam bunyak dib kanye tekbarye ap, sik nirye arye anyapmasin ning arenamsiak’ tenen, Allah morosunune. Na Yohanes arye nyapsine. Yesus Kristus ara, weik arye bico tenyamsukce, el ining biyuka deice arye, nun malye un ning tapu kouamsuka noutamak arye lobuka lyepsuke.

Wahyu 12:11

“Allah el mapu nirya ara, Domba Mi Atonye, el ining sik lyena ati arebuk deice arye, Isa Mutuku Dongonye malye kibik. Tonda, aninye arye, “Ninye lyena ati laka teleb yupu ani,” nyabuka lak akarye, peterelamika deice arye, Isa Mutuku Dongonye malye kibuka nirya obik. Aninye nirya arye, ‘Kume, nun kam unyaba ara weik mambule, nun kam una ara nun dokola ati ara, opsicak ati, Allah yupu nyanyaba ara bataknuyabe’ tenen, ilil kum ulamuk. ‘Malye nang arye opsica babye, telebe uka,’ tenelamik. Aning nirya winilamika deice arye, Isa Mutuku Dongonye ati, malye kibuka ulamik.

Wahyu 7:14

Asipdenukbuk, narye, “Na walwal bukni, anda kele,” nyapse. Nyapsiba, anye birye ayupu tamubuka, laka nyapnuke. “Kume, sik aninye ara talye nang kume. Sirya talak noutamak ara, malye nang arye, Allah el mapu nirya ati, ‘Nun like’ tenen, ikin ning pia weika arye, sik nong deice delilamikba, imun kanye weik bolamik bukni, Allah pia kum bataklamik. Kanye darapdongobuka, Allah elti, diba tupa tenelamik. Domba Mi Atonye obikba, el ining biyuka deice arye, sik malye winin ning nirya kum kipdeibukce, pia diksukumuk kipdeibuk. Winipsuka ati ara, sik nirya arye pia teleb koprop kurun baju ongopmake,” nyapnuke.