1 Timotius 6:12 - Eipomek12 Yin talin nang arye, ‘Yuk mutuku ninye obisipsikcak’ tenen, pia pi dobuka olalamak atonun, Allah dib tenebuka taliplum pil moubuka talina ati, mikip arye pirilenamlyame. Allah ati dib tenelulum ning ara, moubuka talipmince pia bobanamlyame. Aning ara, pia telebe. Minop talak, ninye weik kekenmekba, ance, “Kristus ati, dib tenenune,” nyabuka, teleb yupu nyaplum talak ara, Allah arye, ‘Anye bira, na ap, im deice pia unaname’ tenen, wideipkuke. ‘Bol koplobuka pia kam una ati, kintinipkuk ning dopropnamne’ tenen, pia moubuka teneminyak arye dolonamlyame. အခန်းကိုကြည့်ပါ။ |
1 Timotius 6:12
39 ပူးပေါင်းရင်းမြစ်များ
Asipdesirye, tuba tamubuka bisik banmase, talak aryuk, na weik tonun bico tenenunye bira, epdanumu. Winipnumurye, na dopnamnilanye bira eipsirye kanye deipse. Kanye deipsirye, narye moun dinun nye biti pia nurubuka talipsirye, ‘Na akanyeo, anda pia kum bataknamkine. Pia talibuka irinamkine. Pia talibuka irilamsa ani, ‘Na nin koproba, el aik bobinamanʼ tenen, anye talibuka bobanmasa ani, binumu. Na deipnuk kil, el aik pum tam ara, narye moun dinun nye bira, bobinuka deipmasa ati, asukumuk neika unmanumu.
Teleb ubuka ukiba eibikirye, aninye nirya tonok-tonok, ‘Nara Allah el tamnye unune’ tenen, na siuk nyanamake. Ton nang ara, ‘Yakub el yalanye unune,’ tenebikcopura, sik aninye ara Yakub ance deipminba, dadeipdanin banamak ninye tam uk kilyanganamake. Winibicopura, anang sikce seknamaka ara, ‘Nara, Allah Yahweh el tamnye unune,’ tenebuka, sik taruk deice arye sekenamake. Tonda sikce sik bidamang ati, ‘Nara Allah el tamnye, el tenenanye unune,’ tenen, Israel si nyanamake.
Yehuda yala nang wipdeipnirye, mikip arepneba, sikda mal olan deiyoknye birye deiyok kiplirye, yuk nang ap mal olalamica ani, ninye nirya obuka, sirya daknamake. Aoplobice nang, sik nong deice ara, talye bental deice yanibuka balamak touk wininamake. Ara, na Allah Yahweh arye sik Yehuda yala nang ati melipniba, sik mal olan nang ati, nirya obuka sirya dakanamake. Aning atonun, yuk mutuku ninye, sik yin talin nang arye, kuda basam balye deice bukuka yanganmace nang babye, ayin talin nang ara, nirya obuka, sirya dakanamake.
Tonda, tilila yupu kum nyanyap bukni, pia dipkoprop ninguk nyana ap; Allah el mikip arisilibuk, adeice arye moubuka pil dona ap; aning-aning nirya wininyabe. Anirya ara, yin nang arye, taruk dana-dana tam yin talibuka olbalamak touk, malye winina pia kum, diksukumuk unyaba deice arye, Allah el pil donyabe.
Ninye melina ati apil dopluma deice ara, yuk nang arye anggun Korintus nang ati, ‘Kume, anang ara, telebuk wininyak’ tenen, laka biknamake. Apil dolulum talak ara, ninye weik arye nyanamake. “Anggun Korintus ninye ara, ‘Kristus el laka teleb yupu dib tenenyape,’ nyalamak touk dipkoprop ayupu uk talibuka dobolbanyake. Tonda, sikce nun ap, yuk mutuku ninye ap ati, sik ning weik arye bokuka aresinyake,” nyanamake. Aning ati ara, ninye weik arye, nun Ni Koprop Allah ati, “Telebe,” nyanamake.
Minop talak, na ap, neika ulamubu talak ara, malye nang arye, na nong deice ikin ning deiamneikba, ikin ulamse, anggun elilamnulume. Tonda, wini talak babye, “Malye winin nang arye, Paulus tuba yanibikiba ikin ulule,” nyakibuk kekelulume. Aning kekemunya atouk, anggun babye atonun, diba tenena kum nang, anggun Pilipi mutuku ninye ati, anggun nong deice ikin ning delisinyake. Wininyaka anya arye, na kele, Allah arye, ‘Na mapu ati, wininamake’ tenen, akunum tenyamsuke. Na Paulus arye nyapsine.
Ara, anggun yuk-yuk ululum bukni, Allah arye, ‘Sikda walana ap, oldana ap, kum aryuk, nong tonok atouk kibuka, talima dukdongobuka, namin arye neika unamake’ tenen, wibuka deiamsuke. Winibuka wipdeiamsuka anya arye, Kristus arye talima dukdongopsukba, nong tonok atonun, kibuka ululuma ati, teleb ubuka neika unamlume. Tonda, anggunce Allah ati tuba-tuba, “Telebe,” nyanamlulume.
Ara, Allah arye anggunti, ‘Aninye ara, narye aning-aning ap, tukwak ninye nirya ap, talibuka unye talak, pia teleb weik dirinak unmana ara, sik ap unamabe’ tenen, yukupsuke. Allah arye anggunti, nyapsuk anya arye, ‘Aminyan talak Allah arye anggunti, kanye deipnamsil’ tenen, nunce anggunti, “Wininamlulum, wininamlulum,” nyabuka peterena ap, anggun ikin ulamsuk ning ati, kwa daklamsupu ning ap, anggun kanye imun kanye bona ati, talima mulina ap ulamsubu.
Allah arye sikti, ‘Anang lyepnamne’ tenen, wipdeiamsuka ati, ara nunce anggun Tesalonika mutuku nang ati, Allah el laka teleb yupu, ninye lyena yupu peterelamsupu deice arye, Allah arye anggunti yukupsuke. ‘Wininamak’ tenen, yukupsuka deiyok ara, ani. Ara, nun Deiyoknye Yesus Kristus ap, el yanamle talak upnamle ning ap, urasin pia teleb kibuka yanamle. Atalak ara, ninye nirya arye elti, teleb nyabuka, el si weik arye erepnamak talak ara, ‘Anggun Tesalonika nang babye, neika atonun wininamak’ tenen, yukupsuke.
Na mi Timotiuso, minop talak, Allah yupu laka nyana deiyok nang, nabi nang arye, aminyan winipnamuk ning tenebuka, anti laka nyalamik yupu atonun, na babye wini talak kanye arye tonap, ayupu uk akunum nyapmakine. “Winipnamlyam,” nyapmakin yupu deiyok ara, talye ati kume. Ara, yin talin nang arye, malye un ninye ati, pia piribuka mikip arye olbalamak atonun, anyapmakin yupu kekebuka, moubuka talipminya deice arye, Allah el pil teleb ubuka donamlama ati, nyapkine.
Atalak-atalak nirya noutamak arye, kanye bokoltona kum arye, Allah ati pia dib tenebuka unamlyame. Tonda, an kanye tenen ning noutamak, malye winin ning duknuna kum arye, diksukumuk unamlyame. “Winipnamlyame,” nyapdeipmakin ning bitinye ara, yuk nang ara, aning bitinye batakika deice arye, Allah ati tuba dib kum tenenyake. Akunum batakikce, pia kanye imun unyake. Anang ara, laut mekwen deice balamle mek liyo, banmalya ani, mankau arye mekwen pum bisik wamlye keil diplibuk, mekwen pum bisik weklirye, dilamle touk, winibikirye, sik winin ning nirya malye wininyake.
Minop talak apil min kum dolamlum talak ara, Allah yupu aik deiyok nang arye, sik taruk an nong deice deibuka, “Allah el pil moubuka winipman kum pil winibuka, winibuka donamle,” nyalilamkika deice arye, Allah El Dib Kanye arye pil bita dona deiyok ning arepkuk. Aripkuk ning ara, ‘Dauplye’ tenen, batakna meme. Anyuk tenebuka pi dobuka mikip arye pil donalyame.
Bona weik talin nang, sik ning bokuka, yuk ninye arilamakopura, adeice arye, im deice dekna atonun ning weik arepnamle. Winipmanto ara, ayukumna teleb yo arye aik ayukumna ikikcopura, pia gat ubuka mikip ulamle atonun, bona weik talin nang arye yuk nang ati, weik arye melibikcopura, aminyan talak ara, Allah arye meliplibuk, sik babye teleb unamake. Anirya ara, talye ati kume. Deiyok ara, talye una kum bukni, ‘Pia dipkoprop bol koplobuka, kam pia un ning dopropnamak’ tenen, nyapne.
Allah el mikip deice arye nunti, ‘Malye ning nirya batakuka, diksukum un ninyeuk unamak’ tenen, nyabuka melipsukce, akunum lyepsuke. Winipsuka ara, nun teleb ubuka pil dolamupa deice arye, kum lyepsuk bukni, elce minop talak akunum tenyamsuk touk, elce nunti bico tenepsukce, el kanye aryuk nunti talye melibuka lyepsuke. Allah el kanye aryuk bico tenyamsukce, ‘Yesus Kristus el pil donamla deice arye, aninye melibuka lyepnamne’ tenen, kintiniyamsuk ning ara, Yesus Kristus deice arye kintiniyamsuke. Aning ara, aning-aning min kum kwepdeiamuk talak arye, nun Lyena Deiyoknye Yesus Kristus akunum kintinipdeiamsuke.
Tonda, narye yuk nang kekelamik mutuku peterepra balamsibuk, ance kekelamlum yupu nirya ara, an babye ayupu dobuka, yuk teleb nang ati peterenamlyame. Peterelbinamlam nang ara, talye nang kum bukni, sikce “Wininamabe,” nyabuka nyanamak touk, aninguk dipkoprop unyakce, diba tenepmanto nang ati peterenamlyame. Tonda, anang arye yuk nang ati, teleb ubuka peterepting nanguk wibuka peterenamlyame. Talya-talya daunyak nang ara, kume.
Ara, sik yin talin nang arye, batakna kum aniryuk, malye nang ati olbalamikirye, malye kibuka batakalamak touk, akunum winilamse. Tonda, bik-bik nyan nang arye, ‘Dekni ning dopdopnuyap’ tenen, batakna kum, pi deipnarye piribuka bik-bik abuka balamak touk, akunum winilamse. Anyapmakin yupu nong ara, Allah ap, el yupu ap, ati, diba tenyamse ning ara, kum bataklamsirye, pia moubuka tuba talinune. Allah areamnuk pil ara, akunum dobuka sirya daknin banmane.
Amambul yupu ton nyapnusine. Nunce Allah ati, winiryuk diba tenebupu talak ara, kanye bokoltona kum arye, mikip arye diba tenebupu touk, tuba-tuba diba tenepra balamibya ani, dorsirya talak babye, batakna kum arye, Allah eluk moubuka talibibirye, tuba diba tenenamabe. Winibuka winibibyopura, wini talak babye, aminyan talak babye, Kristus ap, talima dukdongobuka neika unamabe. Bukni, kanye boktopsilyeba, Allah ati batakipyopura, Yesus Kristus ap, neika kum unamabe.
Allah arye, “Wininamsine,” nyabuka, nyalilamuk yupu ap, el si kopropa deice arye nyabuk yupu ap ara, urasin yuk pia kum tamupmanto, elce nyabuk touk dipkoprop unamle. Allah arye aning bitinye ati, tilila yupu kum nyaptua anya arye, dipkoprop wininamle. Allah arye, ayupu bitinye deice nyapsuk ning deiyok ara ani. Ara, sikce, ‘Allah dipkoprop lyepnamsil’ tenen, diba tenebuka dinauk unyak ninye ara, ayupu kekebikca deice arye, talima kwa dipsilyopura, kanye teniltona kum unamake. ‘Allah arepsiliba, dopronamak ning, batakna kumce pia moubuka talibikirye unamak’ tenen, nyapsine.
Yuk nang arye anggunti, malye upsikcopura, tamubuka kwang dakana meme. Tonda, yuk nang arye anggunti, yu bobuka malye yupu nyapsikcopura, tamubuka sikti, malye yupu kum nyalanamlulume. Bukni, “Allah arye, ‘Teleb ulinamsile’ tenen, Allah moronamsine,” nyabuka, teleb yupu uk, tamubuka nyanamlulume. Anggunce yuk nang ati, ‘Teleb yupu nyalinamak’ tenen, Allah arye wibuka yukupsuk anya arye, winimumnyopura, Allah arye teleb ulinamsile.
Winibuka umunye talak noutamak arye, ikin ning ton upsilyopura, Allah elce anggunti, teleb kipdeipsilirye, ‘Darapdongobuka unamak’ tenen, mikip arepsilyopura, pil pia palibuka dona ati deiyok ning arenamsile. Allah arye, ‘Sik ap, Yesus Kristus ap, kanye dukdongobuka unyaka deice arye, pia kam unamake. Teleb arye dirina kan-kan ak, na ap dukdongobuka neika unamap’ tenen, yukupsuke.
Na kayapum, anggunti, bico tenesunune. Otalak arye, ‘Anang ati surat seknamne,’ tenyamsise. Asurat noutamak ara, Allah lyepsukce, el ap, kanye talima dukdongobuka neika unyap ning ati, ‘Laka nyabuka seknamne,’ tenyamsise bukni, yuk nang arye, “Tilila yupu peterena nang anggun kan-kan noutamak yanmake,” nyapmekbuk, kekepsirye, ‘Aning ara, weik mambul anya arye,’ winira utenepne. Ara, ‘Aminyan talak kume, tilila yupu peterena ati, ayupu ara, adiparyuk yupu seknune’ tenen, asurat sekeipmasine. Wini talak sekmasin yupu deiyok ara, ani. Ara, tilila nang yupu peteresiceura, malye ning yuk tenena deice arye, Allah yupu akunum diba tenemunye ning batakmunyeura, malye upsilyake. Malye upsilyak anya arye, ‘Allah arepsuk yupu uk, pia moubuka talibuka unamlulum’ tenen, ayupu sekeipmasine. Allah yupu diba tenebupu ning ara, tonok talak aniryuk Allah arye nun diba tenenyap ninye ati akunum arepsuka ati, yuk talak arye, yuk yupu tonap, kum tabakalinamsile. Akunum arepsuk ninguk diba tenebuka talinamlulume. Yuk yupu tabakuka diba tenena meme.
“Aning ati, anggunce peterelamsikba, kekenamlum ning nirya ara, ila tuba tonap tenepmunce, dipkoprop lipsisikuka dobolbanamlume. Anggun malye ululum ning batakmunce, urasin tamubuka diksukumuk unamlulume. Bukni, anggun kanye kum moupmumyopura, sik ubula don nang, talya karin arye, duknubuka yangalamak touk, anggun dam yanamsine. Anggunce, ‘Atalak noutamak, asum arye yanamasil’ tenen, moubuka kum kel bikmamunye talak aryuk wenelyanamsine.”
ကြော်ငြာတွေ