1 Timotius 6:10 - Eipomek10 Anyapmakin yupu ara, talye ati kume. El deiyok ara, yata ninye do nirya, ‘Se, bona weik talinanye utibye’ tenen, yo bok do, dengna weik ning do, weik arye patalyopura, adeice arye malye winin ning yala weik wininamake. Anyapmakin touk, ton nang ara, ‘Yo bok weik doproptibye’ tenen, patabuk deice arye, Allah dib tenelamak ning batakuka, talye yuk bisik balamakbuk, aminyan ara, weik kanye imun ning ap, ikin ning weik ap, kanye bokoltona ap, weik ulule. Sik ikin ulilalamik. Na Paulus arye nyapmakine. အခန်းကိုကြည့်ပါ။ |
1 Timotius 6:10
49 ပူးပေါင်းရင်းမြစ်များ
Yehuda talye mangkau kanye bobukce, ‘E, akil ara, na mi arye domuk kil’ tenena kumce, el bukmokak binuka nyabuk. “Akilo, nun neika mapnamanam ati, aning ‘Se,’ tenepne,” nyabuka morobuk. Nyabukura, Tamar birye, tamubuka nyabuk. “An ap mapnimnyopura, ance yatato ning arepnamnilam do?” nyabuka asipdeyuk.
Utenebukopura, Simei adiparyuk, Keledai basam balye deice bukuka, ban ning, el si pelana kintinibukopura, aKeledai basam balye deice deibukce, aning deice bukabukce, ninye deiyoknye Raja Akhis, Kat mutuku ulamukak biyuk. Ara, el melin nang bitinye ati, ‘Anang eipnirye, tamubuka boyanamneʼ tenen, biyuk. Winibukce, anang akunum eibukopura, tamubuka boyayuk.
Ati, an wenena ati ara, Naaman taleamuk barye suse ara, an ap, ance deipminyeba, dadeipdanin binamak nang nirya ara, sik nong deice abarye, suse pia aupnamsile,” Elisa birye nyabuk. Nyabukura, Gehazi koulukuka bayuk talak ara, adiparyuk barye suse ara, pia lep-lep alamle ning ara, el nong deice palibukba biyuk.
Anggun nirya moubuka tenenamlume. Malye wininyak ninye, sik dam ara, ikin ning ap, imun kanye ning ap, diamuk yaliba dolonyake. Bukni, yata ninye do nirya, sikce Allah Yahweh el tibuk, diba tenebikirye, ‘Elce dipkoprob yupu uk nyasulula ati ara, ayupu uk kekebuka wininamabe,’ tenenyak ninye ara, Allah weik arye bico tenelirye, aninye ati batakna kumce, pia melilule.
Mikip kum nang nirya ara, tonok isin atonun unyaka ati, sikce pia kum lyepsitinge. Atonun, sik pia mambul weik nang babye, sikce kum lyepsitinga ati, sik bidamang lengdar deice arye, elilamak ning atonun unyake. Talye bona utotoa talina kum nang babye, weik nang babye, sik nirya ara, mambul nang kume. Winipmanto ara, bona dobuka, ‘El ikin ara yata barye kilo do?’ tenen, timbangan deice deibikcopura, sik ikin ara, pia mitik diamuk ulule. Sik tukwak nang ara, weik mambul nang kume. Diba, talye bona utotoa kum nang babye, weik bona talin nang babye, sik nirya ara, mambul kum ati, winipmanto ara, ‘Ikin ulul do?’ tenen, timbangan deice deiptibya babye, sik ikin ara, pia kume. Sik nirya ara, tonok isin atonun unyaka ati, sikce kum melibuka lyepsitinge.
Aning atonun, yata ninye do nirya, ‘Nun patasulul ning ara, yuk nang sik nong obibirye, sik talinyak ning ara, mikip arye dalubuka ubula dolanamabe’ tenen, wininyak ninye nirya ara, amalye winin ning wininyaka deice arye dipnamake. Dipnamaka deiyok ara, ubula donyaka deice arye, sik nong uk dekelanyake.
Aning ati ara, anggunce winilamluma dekna ara ikin ning dopropnamlume. Tonda anggunce, ‘Winibuka malye wininamabe,’ tenepce arye, ‘Malye winin ninguk talibuka unamabe’ tenen, malye piluk dolamluma deice arye, dekna dopropnamlume. Aning deiyok ara, talye ati kume. Anggun bidamnye arye, anggun bidamnye ati, malye winililalulume.
Yatanye do, ‘Yo bok weik arye koproptinirye, bona weik talinanye kiptinye’ tenen, tilila yupu nyabuka ubula dololulnye bira, aning-aning nirya, winibuka dololya deice arye, el ap, el mapu silip nirya ap ati, malye kililule. El malye ulya deice arye, bona ning weik dolonamle bukni, adeice arye, el mapu silip nirya malye winililulba, ikin ning weik unamake. Ton nang ara, ‘Ubula dopropnamne’ tenen, mambul ning bokuka arepmantonye ati, morolbalule. ‘Anye bira kanye deipnilirye, kum arepnamnutu ning bukni, dungnubuka arepnamnil’ tenen, amorolbalulnye birye, teleb ning dobuka, weik deiyoknye ati dungnubuka arelbalule. Winilul bukni, Allah arye amalye ululnye ati, aminyan sirya talak, wenebuka oplopnamle. Ati ara, yatanye do, ‘Ayo bok ara dungnubuka dolona na like,’ teneplirye, binuka moroplirye, kum dolbalulnye bira, teleb ubuka kam pia unamle.
Yuk nang aryuk na taleamse ning dopropnamaka bukni, yatanye birye biktu do? Na punupnamnilanye bira, weik kel bikamlinye unamle do? Pia walwalnye unamle do? Bukni, na kam ulamse talak mikip arye talibuka akunum pil dolamse ning ap, weik kel bikna deice arye ulamse ning ap nirya ara, el anye biryuk talibuka unamle. Winipnamla babye, doyanamle talak ara nong uplyeba, teleb upnamle do? kume, nun walwal ati, ‘Aning nirya babye, talye-talye uk ulule,’ tenepne.
Ura anggun Yerusalem mutuku talibuka ululum ninye deiyok nang nirya ara, na yupu bisimunce, ubula don nang ap neika ululume. Anggunce ninye ati, yupu lipsisikuka bokolin talak ara, malye wininyak diparyuk, ‘Nun patasilye ning ara arepsitingopura, sik tenenyak touk, yupu lipsisikuka bokeipnuyabe,’ tenemunce, winilulume. Utenemunya deice arye, youwak kilapu ap, kwaknamne mapu kilmapu ap ati, sik ikin uplya babye, diksukum yupu kum lipsisikuka bokolilulume. Anggunda, ‘Nun patasilye touk arepsitinge’ tenen, winimunya ati nyapsine.
Sik aninye ara, kam atonun dem unyake. Winipmanto ara, kam arye din patana dem ulula ati, moubuka bikina kumce, talye aupmalye ning nirya luparabuka, diplibuk kum boulamle touk, anang babye wininyake. Sik aninye deiyok nang ara, aning-aning nirya ati, patana dem ulule. Tonda winipmanto ara, sikda domba basam weina deiyok nang atonun unyak bukni, sikda moubuka, kum bikmanto nang unyake. Sikda, sik kanye pum tam aryuk tenebikirye, ‘Teleb winin ning ati, abisikuk binuyabe,’ kum tenenyake. Sik mining kanye aryuk, ‘Nun yuk tenebipye bisikuk, atalye binuyabe,’ tenebikirye, malye bisikuk banyake. Tonda, sik anang nirya arye, ‘Kume nun bidamang aryuk bona weik dolonamabe,’ tenebikirye, sik patan ning tenenyake. Tonok ning babye, yuk nang patan ning ton kum tenenyake. Sik Israel tam unyak ninye deiyok nang nirya ara, ato kanye dem bobuka malye dem wininyake.
Anggunda, na mapu koproba, Israel yala nang noutam arye, ninye weik tonun, akunum doproplume. Tonda, anang weik tonun, akunum oplume. Anggun mem pil dolulum deice arye, ninye weik tonun, akunum olulume. Winilulum talak ara, amem pil dekna ati, yuk nang arye, sikti, dekna arebikirye, anggun mem pil dolulum ning ara, pununyake. Winibikceura, anggunce mitik-mitik ning dololulume. Ara, gandum el duk ap, roti kwaning tobuka, el bun dolona ap ati, ‘Naʼ tenen nang olulume. Anang ara, malye kum ulamik ati, kam tuba upting bukni, anggunce, anang oplume. Tonda, deiyok auplyeba, ‘Mouple’ tenen, wenebuka opnamting nang ara, anggunce melibuka kalikmunyeba, kum wenebuka onyake. Amalye winin nang ara, tuba kam unyake. Israel yala nang arye, tilila yupu weik tonun kekebikirye, diba tenenyak nang unyaka ati, anggun mem pil doplum kilapu arye, anang ati, tilila yupu nyalulumba, diba tenenyake. Awiniluluma deice arye, pia malye weik ululume. Winilamlumce, na mapu koproba, sik Israel nang ati, malye yupu nyalilamlumba, anggunce, sik nyapne yupu ati, diba tenelamik.
Talya yolan kilapu arye morobikiba, ninye arye, atalye-talye yolamikce kilapu ati ara, yo bok dekenyake. Bukni, anggun Israel nang ara, aning atonun kume. Anggunce, tamubukapmunce, anggunce pia, ‘Anang ara, na talima pia patapnile’ tenen, pia tuba-tuba anang atibuk dekna ara, arelulume. Tonda, sik yuk-yuk mutuku nang yukuna nang ara, angguncuk, yo bok deice arye, libuka yukupmunyeba, dana-dana pera mutuku unyak nang nirya yayikba, anggun ap, neika malulume.
Aninguk kum bukni, yuk nang, anggun Yerusalem mutuku ululum nang kan-kan arye, “Ninye opdeipsululume,’’ nyabuka, dekenyak uang arebikceba doprobikirye, ninye ton onyake. Tonda, yuk nang arye, yo bok patan nang ati, “Anggun yo bok tia arepnusiap, bukni, min yuma ara, winibuka yo bok ton tabakuka arepnamnilyame,” nyabuka arinyake. Winyamikca ani, anye el uang kum upmalye buk, tamubuka min kum areptu talak ara, ila tamubuka, anggunce “Ati, wini talak aryuk, yo bok ton ap, weika tabakuka areplulume,” nyabuka, mikip arye moronyake. Tonda, anggun yala nang atibuk, “Uang ton arepsilyame. Kum arepsiminyopura, ikin ning weik, anggun nong deice arenamsine,” nyabuka, mikip arye moronyake. Winiluluma deice arye, anggun nirya arye, na Allah ati, akunum lubakinululume. Nara Allah Yahweh, aning-aning nirya deice tam erebuka, Pia Mikip Weik Deiyoknye ununye birye akunum nyapsine.
Tonda, Yerusalem mutuku noutam unyak ninye nirya ati, yupu lipsisikuka bokolina talak ara, diksukumuk ubuka, yupu kum bokolilulume. Anggun ninye deiyok kibuka, amutuku talilulum deiyok nang nirya arye, sik malye winipmace ninye ati, wenelamtum bukni, aninye arye, “Nun winipmap ning ara, namin kipsilyame,” nyanyake. Ara, yupu sekelana ati, yo bok arebikiba, tilila yupu deice aryuk nyalulume. Aning atonun, Allah el si eren aik noutam talibuka, pil donyak nang, anggun imam-imam nang arye, “Nunda yo bok weik arepsikiba doprobibyopura, amutuku noutam unyak ninye nirya ati peterenamabe,” nyalulume. Tonda, Allah el yupu nyapdeipliba, sik Allah yupu laka len ap, aminyan winipnamle ning ati lak lena ap, ati unyak nang nabi-nabi babye, “Yo bok arepsumunba, dopropmapya deice arye, Allah Yahweh elce nyapmasil ning ara, lak lepnamsiyabe,” nyanyake. Wininyak diparyuk sikce tenenyaka ara, ‘Kume, Allah Yahweh, nun dam ausulula ati, ikin ning nun dam kum yanganamsile. Telebuk unamabe,’ tenekirye nyanyake. Utenenyak deice, Allah arye kanye imun ning dobuka, sik nong deice delinamle.
Ati ara, na Allah Yahweh aning-aning nirya talibuka, im deice yin talin malaikat, sik deiyok ununye birye nyapsine. Teleb ning ara, anggun kan-kan noutamak, tonoknye mambul kanye bopturye, na si eren aik bublan ara, tirikdongoptuba, na kanye deiptinye. Ara, urdem ati kume. Akat bublan tirikdongoptuopura, anggunce kam ning malye ning bobuka, na arena ati, uku kum dongopmantonye ton upsutue. Bukni, na arena ati, pia malye ninguk arelyanganumunya ati, narye kanye kum deipsine. Anggun ti na lik unulule. Tonda, anggunce malye ning arelyanganumunye ning ara, pia kum dopropnamne.
Ton ninye ara, Allah yupu kekebuka dolonyak bukni, yo duk tirmangka weiyang-weiyang kan-kan sakmok ning atonun wininyake. Ara, tukwak mutuku noutamak arye, ‘Aning doproptinirye teleb uptinye do? Yuk ning aupnutuba teleb uptinye do?’ tenen, teniltona ap, kanye bokoltona ap deice arye, Allah yupu batakalogonyake. Tonda, “Bona weik doproptinirye, telebuk uptinye,” nyabuka, sikce sik bidamang arye, tilila yupu talya nyaldanyake. Tonda, aning-aning nirya weik patapliba, ‘Aning ton doproptinye, aning ton winiptinye,’ tenenyak deice arye, lik upliba Allah yupu batakalogonyake. Wininyaka ara, tirmangka weiyang-weiyanga arye apamuk ning koupdongobukce, angkalung kipdongobukba, wen-wen alamuk touk, talya tukwak ning aning-aning nirya pia tenenyak deice arye, Allah yupu kekelamikce ning ara, batakiceba duk kum mouplirye, talya urdemuk bolule. Ara, teleb ubuka kum kekekirye, Allah yupu pia kum dobolbanyaka ati nyapsine.
Yesus arye ayupu nyabukopura, dukdongobuka ayupu tonap, nyabuk. “Farisi nang ap, Musa sekamuk yupu peterena deiyok nang ap ati, Allah arye wenebuka opnamsila ati, anggun bico,” nyabuk. Nyabukce, ayupu ton dukdongobuka nyabuk. Se, anggun Farisi nang ap, Musa sekamuk yupu peterena deiyok nang ap, Allah arye wenebuka opnamsila ati, anggun bico. Anggun talimak malye ning aupmasilibuk, ‘Teleb nang tenepnamsiyak’ tenen, teleb ning bola deiceuk winilulume. Anggun malye winimunye ning ara, nyapnusine. ‘Allah dib tenebibyeura, Allah arye nun dobuka nun talima talinamsilak binuyabe,’ tenenyak nang ara, anggunce yupu sekeldongolulume. Winiluluma ara, ‘Anggun aik weknuyap’ tenen, buplan dam ninye tikilyangaki bukni, yu upliba, mikip arye buplan tirikildongolamak touk, winilulume. Ara, ‘Allah ati, dib tenebibirye,’ ‘Allah talinamsilak weknuyabe,’ tenenyak ninye ati, yupu sekeldongoluluma ati nyapsine. Anggun babye dib tenebuka kum wekelulume. Tonda, ‘Nun dib tenebuka Allah talinamsiak wekenamabe,’ tenenyak nang ati ara, anggun Farisi nang arye winimunye ning deice arye, aninye ati yupu sekeldongolulume.
Yesus arye ayupu nyabukopura, ayupu ton nyabuk. Anggun mambul ning ara, tukwak mambul ninguk bulubuka, dokola kum delinamlulume. Tukwak mambul ning nirya ara, sisilya una ap, sing arye dina ap deice arye, malye-malye ulule. Tonda, ubula don nang arye, sik buplan kukuka wekikirye, ubula donyake. Ati, tukwak mambul ning nirya ara, kum dasutue.
Tukwak mutuku noutamak arye, ‘Aning arye, teleb uptinye do, aning arye teleb uptinye do?’ tenen, talima bintinilaliba tenildana deice arye batakanyake. Tonda, ‘Bona weik doproptinirye, telebuk uptinye,’ nyabuka, sikce sik badamnye ati, talye nyalanyake. Tonda, aning-aning nirya, yala-yala weik patalya deice arye Allah yupu batakanyake. Wininyaka ara, tirmangka weiyang-weiyanga arye apabuk ning koupdongobukce, angkalung kipdongobukura, wen-wen alamok touk, aning-aning nirya pia pataplibuk, tenelamaka deice arye, Allah yupu kekelamak ning ara, duk teleb ubuka kum moulule. Allah el yupu teleb ubuka kum kekebikirye, pia talibuka kum dobolbanyake.
Anggun awipdeipnamlum nang arye, ‘Aning ara dipkoprob malye ninge. Aning ara, dipkoprob teleb ning,’ tenebikirye, yupu bokeipnamsiyake. Anggunce, ‘Anye na kwit ulula anya arye, dauaplye,’ kum tenenamake. Sik kanye aryuk, ‘Aning ara, winipnamabe,’ tenebikce touk, ubuka yupu lipsisikuka kum bokeipnamsiyake. Tonda, ‘Tonye bitibuk, ikin ning kum deipnuyabeʼ tenen, elce uang areplyopura, elce malye winibuk ning, lubuka, namin kum kipnamake. Tonda, malye ning arebice ning ara, kum dolonamnyake. Deiyok ara, amalye ning arepmacopura, kel weik bikilirye, dipkoprob teleb winin ninguk wililamlanye babye, tamubuka malye ninguk wininamle. Malye ning ati, kum winilule. Teleb winin ning ati, wenelula anya arye, asing kum nang atonun unyake. Adeice arye, malye pil donyake. Dipkoprop ning ton, kum pil donyake. Ati ara, malye ning dopropmanto nang ara, kum wipdeipnamlume.
Tonda, aning atonun ara, sik isa si eren aik noutam pil donmakca ani, sik nong deice aryuk dekdopmakce yo bok ara, anye dobuka, ‘Allah Yahweh arepnuyapʼ tenen, dobuka, Allah si eren aik kum boyanganamnyake. Ara, isa-isa si eren ning ap, malye winin pil dona deice arye, dolonamak uang ap, bobinuka, anggun ni koproba Allah ati, arelbana kume. Atonun ara, malye winin ning anya arye, elda pia yu ulule.
Winipnamsil ning ati ara, anggun talye tukwak ninye malye upsilye ning nirya ara, pia batakanamlulume. Akunum diamik ninye arye, aning-aning nirya kum pataplirye, pia talye wininamak atonun, malye winin ning nirya ara, batakanamlulume. Ara, yuk kilapu talye dalubuka yolana ap, pia yuk talye kanye bobuka ninye kum winipmanto ning, pia malye-malye yolalamak ning ap, malye winin ning ati weik patana ap, aning nirya batakuka, diksukumuk wininamlulume. Amalye winin ning yala nirya ara, pia kum wininamlulume. Tonda, ‘Aning-aning nirya bona weika arye doproptinye’ tenen, weik arye patapsilyopura, ara pia malye winina ati, aning babye, kum wininamlulume. ‘Bona weik doproptinye’ tenen, kanye talima engelul nang ara, Allah batakuka yuk talye ning si erenyak atonun wininyak anya arye, aning babye kum wininamlulume.
Bukni, ‘Se, nunda bona weik talin nang mapu uptibye’ tenen, pia pataplye ninye ara, atenen deice arye, Isa Mutuku Dongonye arye, ‘Sik malye upting’ tenen, sik kanye talima lilolibuk, malye un ning patalulbuk, malye weik wininyake. Tonda, nong kum upnamle ning bukni, talye-talye ning patana weik ap, malye usilye ning patana ap, akunum winiplibuk, malye weik wininyake. Wininyakopura, winipmanto ara, anoutamak arye, ikne pum bisik kabang balyebuk youlamle atonun, weik ikin ning pia malye ulisulule. Aning ara, kum lipsisikmanto.
Ninye mutuku-mutuku nirya arye pia malye wininamak ning ara, nyapnukine. Ara, sik bidamnye arye, sik bidamnye ati tenenauk unamake. Yuk nang ati bico tenebuka kum melinamake. Tonda, ‘Yo bok weika arye doproptibye’ tenen, kanye engeplibuk, unamake. Aninye nirya arye, “Nunda pia teleb nang,” nyabuka kanye erena ap, sik babye kanye aryuk erepdeipdakirye, dilana ap, yuk nang ati yu uplirye, sik nong deice malye yupu nyabuka delinamake. Winibikirye, sik ni yapu ap, sik nin yapu ap, nyanyak yupu ati, yanibuka kum kekepnamake. Tonda, yuk nang arye teleb kipdeipsikibuk, anang arye, “Telebe,” nyabuka, kina kum unamsiake. Allah winilul ning nirya ati, ‘Nun lik’ tenen, pia malyeuk wininamake.
Atilila yupu nyanyak nang ara, sik malye yupu peterenyaka deice arye, anyasik-anyasik ninye akunum diba tenelamik bukni, tonok-tonok ton kum, sik nirya arye, dib tenebik ning, Allah yupu batakuka, weik kanye mambul kilinyake. Ara, atalye yupu nyanyak nang arye, yuk nang ati, peterenyaka deice arye, tonok-tonok kum bukni, anang weika arye minop talak kunum diba tenelamik ning, bataknamyak ati, atilila yupu nyanyak nang arye, yuk nang ati, weik kanye mambul kilinyake. Aning ati ara, atilila yupu, tenepce arye nyanyak ninye ati, “Amalye winin ning ap, tilila yupu nyanmalum ning ap, adiparyuk bataklulume,” nyabuka, yupu sekenamlyame. Amalye nang talye yupu peterenyaka deiyok ara, ‘Yo bok weik arye dolonamap’ tenen, tilila yupu tenepce arye, nyanyake.
Na kayapu, nun du weit atonun kipdeipsuk nango, yupu ton nyapnusine. Ara yata nang do nirya, Allah el dipkoprop yupu deice nyasilye bisik bindebuka, abisik batakuka, yuk bisik kirikuka bilyopura, yuk nang arye anye dobuka, teleb bisik akuk, yanuka tamubodeibicopura, ara pia telebe. Ati, anyapnusin yupu ara, ila tamubuka tonap tenenamlulume.
Nunce nun mal olan nang akunum olanmabu talak ara, sikce batakmek bona, aning-aning nirya ara, ninye deiyok nang nong deice ongolamak cang jaket ap, tonda kain sarong cang ning atouk, urasin teleb ning tonok eipse. Aning ara, mutuku si Babilon, tonda Sinear nyanyak mutukunye birye, wiamuk ning ara, ubula dopropse. Tonda, aning ara dekna weik ning, perak ton, nukuka ikin ara, bitinye kilo gram eipsirye, dopropse. Tonda, dekna weik ning, emas ton, el ikin ara, tonok kilo gram bukni, noutamuk wilibuka deiamik ning, aning ton aupmokba, eipsirye, ubula dopropse. Aeipse ning nirya ati, na patapnukura, na ton dopropse. Aning nirya ara, dopropsirye, na cang baju arye pakubuka deipse ara, na tenda aik pum tam bukni, tuku palibukapsirye, atuku pum tam dongopse. Ara, na tenda aik pum tam tuku pum tam uk dungnubuka deipsirye, siknipdongopse. Akunuma kat weik ning emas ara, alip tam deipse bukni, perak ap, emas ap ara amu tamak moubuka deipseba, atuba ubuke. Akan birye, Yosua biti laka nyabuk.
Sik anang ara, pia bicoe, Allah arye anang wenepnamla ati, sik anang ikin upnamle. Sikda Kain arye Allah nyabuk yupu kum kekebukce, malye winibuk touk wininyake. Tonda, minop talak Bileam arye, ‘Ayupu ara, tilila yupu,’ akunum bikmokcuk, “Yo bok weik arepnukiabe,” nyabikura, kekebukce, ‘Yo bok weik doproptinye’ tenen, patabuka ati, tilila yupu peterebuk. Tilila yupu peterebuk touk, sik anang babye, ‘Yo bok weik dolonamap’ tenen, malye wininyake. Tonda, minop talak Korah arye, ‘Allah arye nyapdeibukura, Musa nyalamuk yupu kum kekepnuyap’ tenen, deiyok koubuka, el yanibuk touk, sik anang babye, Allah arye nyasulul yupu yaniltanyake.
Tonda, to len ning, el si kulit kayu manis ap, nintong teleb ning aning-aning nirya ap, sik si ara, mur ap, kemenyan ap, anggur mek ap, Ara yo duk teikuka dololamik minyak ap, roti dana deiyok ning terigu pia teleb ning ap, tonda ninye arye weilamak ning sapi basam ap, domba ap, kuda ap, tuku deice balamle ning yala nirya ap, ninye arye ‘Sik yo bok deice dekikirye, ikin pil arukikiba, talye pil donamak’ tenen, ninye nong tapu koubuka bobalamik ninye ap, aning-aning nirya, sik Babel mutuku unyak kili sal ila tonap kum dekenamak ati, abona dekelbalamik deiyok nang arye, ‘Se,’ tenen, engenamake.
ကြော်ငြာတွေ