1 Timotius 5:6 - Eipomek

⁶ Bukni, yata youwak kilapu do nirya, ‘Kume, na kanye deibuka unye ning ap, aning-aning weik dopropnune,’ teneplirye, dilana ap, ulul kil ara, kam tuba ulul bukni, akunum dibinyak ninye atonun ulule.

1 Timotius 5:6 ပူးပေါင်းရင်းမြစ်များ

Kejadian 2:17

Bukni, tonok yo ara, ayo duk dakuka kum dinalyame. Ayo duk dina ara, meme. Ara, Malye Winina ap, Teleb Winina ap, Kel Bikna Deiyok Yo duk dakuka dipminyopura, dipkoprob dipnamlame. Ayo duk tonok ara meme, pia kum dinalyame, nyapkine.” Allah arye, nyabuk.

Amsal 29:21

Sik amu tamukirye, sik pil melibuka don nang ara, mitikop dorapce dipdongobuka nepnin balamlya ani, akunum neplyopura, atalak noutamak nirya, el patalamle ning nirya ap, el morolamlye ning nirya ap, talye lukparabuka arepmunyopura, aminyan talak weik arye akunum neplyopura, mandipna kanye weik upnin balirye, anggun nyapmunye yupu nirya yaniptaplirye, pia kum kekenamsile. Elda, ‘Na deiyok nang arye, nyaninyak yupu ara, kum kekenamne, na like,’ tenenamle.

Yesaya 22:13

Nyapdeipsuk bukni, anggun Yerusalem mutuku ululum nang ara, teleb kanye bobuka pin-pin upsukba kanye deipmunce, weik kwalya kwalilulume. Anggunce sapi basam ap, domba basam ap, weik tonun opmunce, tup dobuka diplume. Tonda anggur mek dobuka diplumce, ayupu nyaplume. Anggunce, “Kume, anggun nirya yalulume! Nun nirya ara, anggur mek ap, teleb tup ning ap dibibirye, talye kanye bobuka unmanbe. Winibuka dibibirye, mapmapya bereklye sum ara, nun nirya dipnamabe. Ati ikin kanye bona kume,” nyabuka kanye deibuka winipmalume.

Yesaya 47:1

Allah arye, sik Babel mutuku nang ati nyabuk. “Se, anggun Babel mutuku nang kekepnululume! Anggunda kouluklulume! koulukmumce, tuku deice yanuka buklume. Anggunce mikip weik nang ulamlum bukni, aminyan talak ara, anggunce yuk mutuku unyak nang ton ap kum talipnamlume. Winipmanto ara, sik Kasdim mutuku nang ara pia urasin teleb wel kil atonun ulamlum bukni, wini talak ara, aning nirya akunum kum kipdeipsina anya arye, weik deiyok nang arye, teleb weik bunak bulamakak atonun ning arye koulukmunce, kanye lamapdongopmunce, tuku deice buklulume! Narye anggun dobuka amu tamuk kipdeipnamsina anya arye, ninye nirya ara anggunti, ‘Sikda pia mambule, pia teleb nang unyake,’ nyalamsik nang ara, ton ap kum nyanamsiyake.

Yeremia 6:2

Yerusalem mutuku noutam ubuk mutuku, Sion mutuku asik dolulum mutuku ara, urasin pia teleb mutuku ulul bukni, Allah arye, amutuku dakuka bataklirye, malye kibuka, oplirye uluplopnamle.

Ratapan 4:5

Min talak ara, sik bona talin nang ara, pia dekna weik baju, urasin mirin ning kiniklamikce, pia teleb-teleb din ninguk dobuka, dilamikce sik urasin ara, pia telebuk ulamik bukni, wini talak ara, anang babye, din patana ati ukirye, ‘Ninye batakmace, din ning aupmaliba, aninguk dobuka dipnuyapʼ tenen, bai bisikuk bakirye, din ning sung-sunga donokolbanyakakuk epnin banyake. Tonda, din pia pataplyeura, balamikca ani, mitang uplyopura, ninye balamak bisikakuk dibinyake.

Matius 8:22

Anye bira, nyabuka asipdeyuk bukni, Yesus arye tamubuka nyabuk. “Kume, adiparyuk an melipniminba, binuname. Diba tenena kum ninye ara, akunum dibik ninye atonun ninye unyaka anya arye, sik bidamnye aryuk dibikce ninye weipnamake,” nyabuk.

Lukas 12:19

Winipnyopura, na aik na yuk ati tenenamne. Ara, akunuma, aminyan upnamle talak nirya ara, aning-aning nirya pia weik akunum deipsa ati, din telebuk dipnirye, mek dibuka pia kanye deibuka, talye kanye bobuka unamne,’ tenebuk.

Lukas 15:13

Arebukura, daulamrika ani, wala bitinyeto, winilyeto ubukopura, el weit koprop arye, el talyamuk ning nirya bulubukabukce, ‘Na yuk mutuku unamne’ tenen, leibuka biyuk. Yuk mutuku biyukopura, aning-aning nirya dengna ap, malye ubuka una deice ap arye, el li arebukak, dopromuk ning nirya, kum daneibuk.

Lukas 15:24

Ara talye ati kume. Na mi yanmanila ara, dipna nang atonun ulamukbuk wini talak ara, kam ulamak nang atonun upmale. Tonda, na mi tunimapnuk bukni, akunum yanmalak eipmana anya arye, yuna kwalimunyeura, kil-kil arye dipnuyabe,” nyabuk. Nyabuka ati, sik nirya kanye deibikce, yuna deiya koubuka kwalinmek.

Lukas 15:32

Ara, an weit koprop ara, dipne nang atonun ubuk bukni, kam ulamak nang atonun upmale. Tonda, pia tunimamuk bukni, yanmalak, eipmana anya arye, elti, kanye deipmapce, yuna kwalipmapa ara, pia telebuka.” Anye el li birye, el mi dunye kopropa ati nyabuk. Yesus arye awinipmanto yupu deice nyabuk.

Lukas 16:19

Yesus arye ayupu nyabukopura, ayupu dukdongobuka nyabuk. Tonok talak ara, bona weik talinanye ulamukce, atalak-atalak nirya ara, dupsice ubuka ulamukce, sik pia weik bona talinanye nang mirin baju ap, pia teleb ongon cang baju ap, ongolamik touk, el babye, aongon baju, el si juba ongolamuk.

Lukas 7:25

Akumopura, yata ning, ‘Eipnuyap’ tenen, dilbalalum do? ‘Tonoknye pia teleb baju ongoplibuk eipnuyap’ tenen, dilbalalum do? Kume, weik teleb baju ongonyak nang ara, ‘Talya kanye bopnuyap’ tenen, pia teleb ning talipra, talyeuk unyak anya arye, weik ninye deiyok nang, sik aik unyake. Yohanes winilamuka atonun ara, kum wininyake.

Efesus 2:1

Na kayapu, anggun Efesus mutuku ululum ninye ara, minop talak anggun malye-malye winilalum ning ap, Allah el yupu yanilalum ning ap, winibuka ulalum deice arye, akunum diplamak ninye atonun ulalume.

Efesus 2:5

Nunce el yupu yaniplobuka malye-malye ulamupa deice arye, akunum diplamak ninye atonun ulamubu bukni, Kristus ap, talima dukdongopsuka deice arye, kam bulina atonun, teleb kipdeipsukce, lyepsuke. Allah arye, lyepsuka ara, yuk deice arye, kume. El bico tenyamsukce, el kanye aryuk talye meilyamsuka deice arye, lyepsuke. Nun teleb winina ati kume.

Efesus 5:14

Yata ning do nirya, dirinarye aning deice deipliba, lak akuk ulule. Laka upliba, moubuka kel biktibirye, ‘Aning teleb ning, aning ara, malye ning’ tenen, bikinyabe. Aning ati ara, ayupu ton nyanyabe. “Amio, an diplumnye bira kam buklyame. Kristus el dirinarye, teleb kipdeipnamkile.”

Ulangan 28:54

Tonda, yata nang do nirya, el amutuku kopropnye, el talima namin ulirye, yuk nang nirya ati, yu una kumce, pia bico tenebuka, weik tonun melilulnye babye, yuk nang ati, din bokuka kum arenamle. El aik unyak nang babye, kum bokuka arenamle. Atonunye bira, ‘Dotalak kanye imun upnamnil,’ teneplirye, kintinin ning nirya kintinibuka ululnye babye, ikin kanye boplirye, yuk nang nirya ati, pia kum melipnamle. El babye, ‘Se, yata ati wariksiyak do?’ teneplirye, el mapu koprop, obuka dipnamle. Ara, dina yuk ning ton kum upnamle ati, winipnamle. Tonoknye birye, el mi obuka, dinmalye ning sekdoba ara, el kayapu koproba yuk nang do, atouk el domlye kil, bico tenelamle kil do, tonda el mapu koproba, tuba kam unmace mapu do, nirya ara, aobuka dinmalye mi kalimna ara, kum bokuka arenamle.

Ulangan 28:56

Aning atouk ton, amutuku kobrob kil, pia kanye teleb kil, tonda pia namin kil ara, akil arye, ‘Se, yata winiptinye deice arye, yuk talak ara, teleb uptinye do?’ teneplirye, tuku deice yanibuka, talye kum balul kil babye, atouk winipnamle. Ara, sik mal olan nang arye, ‘Israel ninye opnuyapʼ tenen, sik mutuku wariklamik talak ara, sik din ning nirya kum daliba, akil babye din patapliba, din ati, ‘Yata winiptinye do?’ teneplirye, dungnubuka, el mi bukni, winiryuk deipmalye mi uk obuka, mi dei sekdoba nirya dipnamle.

Kolose 2:13

Ara, anggun Yahudi yala kum ninye ara, anggun malye tenelamlum ning ap, talima malye ulalum ning ap, deice arye, akunum dibilamak ninye atonun ulalume. Minop talak Allah arye, “Den bam bol mouse ning kum seklamik nang, na dam kum yatinge,” nyapdeiamuk touk, anggun Yahudi yala kum ninye babye, anggun malyeuk ulamlum talak ara, Allah el dam kum yanmanto ulamlume. Minop talak noutamak winibuka pia malye ulalum bukni, atalak noutamak arye, Allah arye Kristus kam bukeibuka deice arye, anggun babye, kam bukepsuke. Allah arye, nun malye unyap ning ap, malye tenenyap ning ap, namin kipsukce, kum kipdeipsuke.

2 Timotius 3:6

Arup nyapmasinto nang arye wininyak ning ton nyapnukine. Sik tenepce arye teleb yupu nyabuka yukulakirye, yuk nang aik wekuka neika unyake. Yuk nang aik yupu teleb nyabuka yukulakirye, akunum bikcopura, anyaik unyak kilapu ati, talye yupu nyana deice arye kekebikceura, sik anang kilongonyake. Akilapu ara, ‘Aning winipnun do, kum do? Teleb ning dan do?’ tenen, teniltonauk unyak kilapu ati, anang arye akilapu sik kanye talima lilon yupu nyabikibuk, kekebikirye, anang tamuk kilongonyake. Sik nyanyak yupu ara, akilapu arye talye luba kibuka kekebikirye, diba tenenyake. Akilapu ara, sik malye winin ning weik arye unyaka ati ara, diksukum bisik ara, kum banyake. Tonda, sik kanye talima noutam malye ninguk pataplibuk, aninguk tenenyaka deice arye, sik kanye lipdongoplibuk, yuk malye bisik kirikuka banyake.

Yakobus 5:5

Anggun tukwak mutuku umunye talak nirya ara, ninye kanye delina pia teleb ning nirya talibuka, mutan nang ululume. Winipmanto ning ara ani. Anggunda, ‘Sapi basam owala obuka dipnamape’ tenen, el dina weik arye arilamice bukni, weik neplirye, bol teleb uplyopura, asapi basam arye, ‘Na opnamniak,’ kum tenyamlye bukni, obuka dilamak atonun ululume. Sapi basam arye, ‘Na opnamniak,’ kum tenyamlye atonun, anggun babye, ‘Nun malye winin ning weik upsilyeura, aminyan talak ara, Allah arye wenebuka opnamsile’ tenena kumce, malye kanye kum boluluma ati, nyapsine.

Wahyu 18:7

“Minop talak Babel mutuku ninye arye bona uto-uto talin ning ap, dekna weik ning ap, weik dololamikce arilalamikba, nukmanto kum ulamuk. Bona talin nang weik ulamikba, yuk mutuku ninye arye, ‘Se, sikda pia telebuk unyake,’ tenelamikce, amutuku ninye ati si erelamik. Ati, bona talin nang weik ulamik touk, wini talak ara, Allah arye kanye imun ning pia weika arye, sik nong deice deipliba, pia weika arye engebuka donamake. Babel mutuku unyak ninye sik talima pum tam ara, utenyake. ‘Kume, sik youwak kilapu arye, malye kanye bobuka engelamak touk, kum unyabe. Nunda weik ninye deiyok nang, Raja nang arye talye kanye bobuka pin-pin asauk ulamak touk pia unamabe,’ tenelamik. Winibuka tenelamik bukni, wini talak ara, Allah arye sikti, weik arye wenepnamle.

Wahyu 3:1

Ninye Mi Koprop Atonunye birye nyapnuke. “Yohanes, ance Sardis mutuku diba tenenyak ninye, sik melin malaikat ati, ayupu sekuka dopdeiplyame. Dopdeipnulam yupu ara, ani.” “Allah el bulul sukum urasin tam unyak dib kanye, tekbarye ap, tonda kurya tekbarye ap, talibuka ununye birye ayupu nyapsine. Anggun ululum ning nirya ara, narye kel bikisunune. Yuk ninye arye anggunti, ‘Kume, anang ara, sik teleb kibuka, Allah yupu kekebuka diksukumuk dobolbanyak,’ nyasinyake. Winibuka nyasinyak bukni, narye dipkoprop kele. Anggunda, dipkoprop teleb ubuka na yupu ati kum dobolbalulume. Ati, na kanye ara, anggunda akunum diamik ninye atonun ululume.”

1 Samuel 15:32

Akunum winibikopura, Samuel birye nyabuk. “Amalek ninye, anggun ninye deiyoknye, el si Agag, na dam boyalulume,” nyabuk. Nyabukba, Saul el mapu arye, Agag inibuka boyayikba, Agag bira, Samuel dam yanuyuk talak ara, utenebuk. ‘Kume, na ap, na amu tam nang ap arye, Israel ninye obupu ning ara, min arye winibupa ati ara, akunum luba kibik ati, teleb yupu uk nyapnamaniyake,’ tenebukce, adiparyuk yayuk.

1 Samuel 25:6

Tonda nyapnamalulume. Daud birye, ‘Anye bira, Nabal keting tamun weik kam unamle’ tenen, Allah moronamkile. Tonda, ‘Anda Nabal ap, an mapu silip ap, an weilyam ning nirya ap, an melin nang ap nirya ara, lo uk unamak. Tonda, ‘Telebuk unamak’ tenen, Allah morokunune. Nun ni koproba, Daud birye, nyapdeipkile.’ Ayupu ara, Nabal biti nyapnamlulume,” Daud birye, el wipdeibuk nangak, nyabuk.