Tonda, na nio, sik yu ubikirye, nunti talye minin yupu weik nyakce nang ara, ‘Nun Israel yala nang unyap mutuku noutam ara, tuba kum unamak’ tenen, moropkine. Ati, ance anang ara, yupu pia sekenalame. Ati, sik anang arye, yuk nang ati, onyak nang nirya ara, ‘An Allah arye sikti, kanye imun weik ning, sik nong deice deipnalam’ tenen, moropkine na nio.
1 Tesalonika 4:6 - Eipomek6 Ninye talye yoldalamak ning ap, aning-aning nirya pia pataplibuk, ‘Talya parapkabuka winipnun’ tenena ap ati ara, anggunce yuk nang nirya ati, talye minina yupu nyana ap, malye kilina ap, kum wininamlulume. Nunce anggunti akunum peterepsupu. “Yata ninye do nirya, anyapmasin malye ning ap, aning atonun ning ap, akunum winipmacopura, aminyan ara, Allah weik arye wenebuka opnamle,” nyabuka wenelamsupu. အခန်းကိုကြည့်ပါ။ |
1 Tesalonika 4:6
50 ပူးပေါင်းရင်းမြစ်များ
Se, nun ni Allah Yahweh, ninye malye wininyak ning ati, anda kwang dakna deiyoknye ulyama ati, ance, “Aning wininamlume. Aning ara, pia kum wininamlume,” nyapdeiamsulum yupu nyasulul touk ubuka, ninye nirya kum winibikirye, malye wininyak ning ati, wenenamsilame. Diba nun ni Allah, anda sik malye wininyak nang ati, kwang dakna deiyoknye ulyama ati, minop yanuka, ninye nirya ati, yupu lipsisikuka bokeipmince, wenenamlame!
“Yuk nang sik ning nirya ati, ‘Se, na uk doproptinye,’ tenena meme. Ara sik aik ap, sik kilapu ap, sik pil melina nang ap, pil melina kilapu ap, el sapi basam ap, el keledai basam ap, el weilul ning yuk ning ap, tonda, yata ning do, el talilye ning nirya ati, ‘Na doproptinye,’ tenena meme,” Allah arye nyabuk.
Ura ninye arye, ‘Dekna ning ati, ikin yata barye do?’ tenen, kiklilen ning, timbangan malye kibuka kiklinyaka ara, Allah arye, ‘Aning ara pia na like,’ tenelule. Bukni, ninye arye, ikin kiklilen ning el si ara timbangan, kiklipdekirye, timbangan dipkoprob ulamle touk nyabikirye, auang yo bok dipkoprob ning arinyak nang ara, ateleb wininyak ninye ati ara, Allah arye el kanye weik delilule.
Ninye arye, sik bona ning dekna ati, ‘Ikin do, kanam do?’ tenen, kiklildelamak ning deice arye, kiklipdekirye, pia dipkoprob ninguk upliba nyabikcopura, Allah Yahweh arye sikti, kanye delilule. Deiyok ara, kiklildelamak ning, pia dib dipkoprob ning deiyoknye bira, Allah el uk ulule. Ati kiklildelamak ning, kiklildenyak bukni, tilila yupu uk nyanyak nang ara, Allah arye weik wenepnamle.
Tonda, ninye nirya arye, aning-aning nirya deibuka deklamak sukum, pasar do, dekna ning deibuka delinyak aik do, bikirye, ‘Nun patapsil ning deknamabe,’ tenebikirye, aning deiamlyenye binyak, nyanyake. “Se, aning ara, pia teleb ning kum anya arye, dekna ning kulukeipsutumce, mitik tonun nyapsutumba, nunce dektibye,” nyanyake. Bukni, aning nyaplobuka dekicopura, sik kayapu yuk nang kekenmace bikirye, “Nunda weik kel nang unyabe. Aning ara, dekna mitik tonun deice aryuk dekmabe,” nyabuka kimilanyake. Sik kayapu yuk nang ati, “Diba, aning ara dipdelulume. Dekna weik ning bukni, mitik anun arye arepsikce deksik,” nyabuka kimilanyake.
Tonda ninye weika arye tilila ning wininyak nang arye wininyake. Bona ning dekna ap, ikin ati kililena ap, nukna ap wininyak talak ara, dipkoprob ning kum upmalibuk, talye dem ati, “Aning ikin ara ani. Aning el dekna ara ani,” nyabuka nyaplobikirye, sik dekna ning talye dem ati, weika arye dolonyake. Wininyak bukni, nun ni koproba Allah, el si Yahweh aninye unyak ning elilulce, ‘Aning ara pia na like,’ tenelule. Allah Yahweh elda, bon-bona dekna ap, ikin ati kiklilen talak ap, nukne talak ap arye, yuk nang ning talye yupu nyabuka dolonyak nang ati, tuba-tuba elilulce, ‘Na like,’ tenelule.
Yatanye do nirya, el li ap, el lin ap, sik ning ubula dopdoplirye, minin yupu deice arye, “Aning ara, na deipnirik nang bitinya, sik ninguk dopropmana anya arye, aning ara malye kum wininune,” tenebuka pililamlanye bira, dipkoprob pia weik malye ulule. El li ap, el lin ap talilamdeice ning, talye lukparabuka ubula dololula anya arye, yuk nang arye, aning-aning talye lukparabuka ulultaklamak nang atonun ulule.
Tonok mutuku noutam balamlumce, dipdebuka, mikip weik deiyoknye birye, sik talye bona utotoa kum nang nirya ati, sik nong deice ikin weik ning deiplirye, sik anang ati dopropnyopura, aning ara anggunce, ‘Seʼ tenen, Yata upmal do?’ tenen, kanye teniltona kume. Deiyok ara ani. Amalye ulamlye ninye deiyoknye, el deice tam ton, ninye deiyoknye yuknye ton aulule. Atonun, anye el deice tam babye, yuk deiyok nang ton daunyake. Sik nirya arye, amalye ulamlanye ulul ning nirya ara, elikirye akunum bikinyak bukni, sik nirya ara, ‘Yo dauplye,’ tenebikirye, luba kinyake. Ati, sik nirya ara malyeuk unyake.
Adomon yupu nyapmasina deiyok ara ani. Anggur wa deiyoknye bira, Allah aning-aning nirya talibuka ulye deiyoknye, Allah Yahweh ulule. Allah Yahweh ara, aning-aning nirya talilirye, im deice yin talin malaikat nirya, sik weik deiyoknye ulule. El anggur wa ara, Israel yala ninye unyake. Tonda, teleb wa tuku ati kanye delilul ning ara, sik Yehuda yala ninye unyake. Israel ninye ap, Yehuda yala ninye ap, ‘Teleb kibuka unyak do?’ tenen, dililamuk bukni, aninye nirya ara, olanauk ulamik. ‘Diksukumuk unyak do?’ tenen, dililamuk bukni, ton nang arye, ton tam nang ati, ikin ning weik, sik nong deice delilamikce, malye nyabuka, ngaluklamikba, kekelamuk. Ati, Allah arye aninye nirya ati, malye kanye bolamuk.
Tonda, anggun amutuku ululum ninye arye, ninye asik nang ap, yuk pera mutuku arye amutuku yanganamak ninye ap, kwaknan mapu ap, youwak kilapu ap, sik nong deice, ikin ning kum delinamlume. Aninye nirya ati, diksukumuk wininamlume. Tonda, malye winin ning kum winipmakibuk, ‘Anye bira malye winipmale,’ nyabuka, minina yupu nyapmunce, anang kum onamlume. Yuk ninye talye oltakana pia meme. Tonda kwemdina ara, Isa Mutuku Dongonye ap, ninye arye puturubuka delinyak ning ap, talye-talye ning nirya ap ati, ‘Nun deiyok ning ulula anya arye, aning si erenamabe,’ nyabuka, amutuku noutamak umunce, si kum erenamlume. Awinimunya deice arye, anggunce, anggun bidamnye ati, malye kililalulume.
Tonda, anggunce anggun kayapu nang ap, anggun dam unyak nang ap, anang arye wininamak ning ati, ‘Nun dam yasilyak’ tenen, moubuka kalikilamunce, unamlume. Aning nirya ati, ‘Diba, sikda teleb wininyake,’ pia kum tenenamlume. Deiyok ara, anggun kayapu koproba, tonok mun pum tam arye deiamsik nang unyak bukni, sikce nyapsikce yupu nirya ara, ‘Diba’ tenen, pia kum kekenamlume. Anggun kayapu nang koprop arye, tilila yupu uk tamultokirye, nyanyak nang unyaka ati nyapsine. Tonda, dipkoprob awinipmaliba kum eipmakce adiparyuk, talye yupu nyana ap, talye tilila nyana ap, ayupu nyalakirye, banyake.
“Ton ning ara, anggun yala nang babye, anggun damak unyak nang babye ati, tilila yupu nyana deice arye, minina yupu nyana ap, tenepce arye nyana ap, sik ning ubula dolona ap ara, pia meme. Tonda sikce, ‘Anggun melina ati, pil dobibiba, dekna ning dopropnamabe’ tenen, pil melibuka dosinyak ninye nirya ara, malye ulina kume. Sik pil akunum dobikcopura, asum aryuk, sik dekna ning arepnamlulume. Anggun pil donmasica ati, dekna dolon ning ara, mapmamunya ani, beren tam arye arena meme. Pil donmace sumuk, arenamlulume.
Tonda, aketing tamun noutam ara, anggunce anggun kwitcapu nang koproba, Israel nang arye taleamice tuku, patapsilirye, ‘Winipnuname,’ teneprumunce, sik tuku dekmunyeura, dipkoprob atuku winilamle touk, yo bok teleb kibuka arenalume. ‘Yo bok mitika aryuk arepnuneʼ tenen, kanye pum tam tilila yupu nyana kume. Tonda, tilila yupu nyana deice arye, yo bok mitika aryuk arena meme. Dipkoprob ninguk arepmunce, deknamlulume. Aning atonun, anggun kwit birye, “Amio, an taleamlum tuku deknune,” nyaplyopura, atuku el dekna dipkoprob wamlye touk, yo bok moropnamlulume. Lak ninye kekenak arye, laka nyapnulyame. Tuku malye upmalyebuk, kwinisa dobuka, tenepce tilila yupu nyabuka, yo bok weik tonun dolona meme.
Anggun kwitcapu nang koproba, Israel nang ara, deknamlum ning, yala-yala nirya ara, tilila ati, talye-talye yupu nyapmunyakarye, kwinisa kum donamlulume. Aning kum bukni, aning-aning nirya, el dengna dipkoprob aulye touk, aninguk tenebuka, yo bok moropnamlume. Tenepce tilila nyana pia meme. Ura, anggun nirya arye, anggun ni koproba Allah Yahweh ati, ‘Se, malye winibibiba, Allah arye wenepnamsilʼ tenen, na Yahweh ati, ilil asa upsilibuk unamlume. Nara, Yahweh, anggun ni koproba Allah unirye nyapsine.
Sik amalye ning wininyak nang arye, bona utotoa talina kum ninye nirya arye, sik wa tonok wiamikce ning ati, ‘Nuncuk ubula dopropnamabe’ tenen, talipmace yupu ara, kum batakanyake. Adiparyuk dekna kumce, lukdanuka ubula dolonyake. Atonun, sik malyeuk tenenyak nang arye, bona utotoa kum ninye arye tonok, wiamikce wa win dam ati, ‘Alubuka doproptibye’ tenen, mikip donyake. Aning atonun, bona utotoa kum ninye, sik aik tonok babye, ‘Adiparyuk dalubuka dopropnamabe,’ tenenyake. Utenelamica ani, tilila yupu nyanyaka deice ap, sik anyasik ninye nirya obikirye, bona utotoa talina kum ninye, sikce aik pum tam deiamikce ning nirya, talye dalubuka, ubula dolonyake. Yata ninye do nirya, sik talye yuk ninye, sik aik ap, sik aik deiamice ning ap, sik aik neika ulamikce, kili sal ap nirya ara, ‘E, nun mapu silip ap, nun talenyap ning ap ara, telebuk unamle,’ kum tenepnamake. Sik malye deiyok nang arye, talye bona utotoa talina kum kili sal, talinyak ning nirya ara, ubula don nang arye dalubuka dolonyake. Aning nirya dopdobikcopura, sik anyaik ulamikce ninye nirya arye, teleb kanye ton kum bonyake. Sik aninye nirya arye, malye kanye bobuka unyake.
Se, Yerusalem weik asik domik noutam unyak nang ara, mandipna ukirye, sik ni Allah Yahweh ati, ‘Elda mambul kume,’ tenebikce, Allah ati batakamik touk, tuba wininyake. Tonda, Allah arye nyalul yupu ara, pia kum kekenyake. Tonda, sikce pia malye winin ninguk talibuka, unyaka deice arye, malye kililanyaka ati, Allah dam ton kum yatinge. Aninguk kum bukni, sik Yerusalem mutuku unyak nang arye, Allah ati, tuba diba kum tenenyake. Tonda, ‘Allah arye, yata yupu nyapnusil do?’ tenen, el dam yanuka, moubuka kum kekenyake. Sik Yerusalem mutuku talibuka, deiyok kinyak nang arye, sik mutuku nang ati, ikin ning delinyake.
Yerusalem mutuku ninye deiyok nang arye, tuba malye wininyak bukni, Allah Yahweh, elda aweik asik dobuka, unyak mutuku noutam tuba aulule. Allah elcuk tuba-tuba teleb kibuka, pia diksukumuk ulule. Elce, malye winililan ning, pia tonok babye, kum winilule. Dipkoprob asum-asum nirya ara, beren tam talak babye, sintam babye, Allah arye diksukum winin ninguk, pil dolul bukni, amutuku ati, ninye deiyok kibuka talinyak nang ara, diksukum winin ning ara, pia kum bikinyak nang anya arye, sikda, ‘Se, malye winimabeʼ tenen, alye una kumce, tuba malye-malyeuk wininyake.
Na Allah arye, anggun dam yanamne talak ara, talye ati kume. Anggun wenebuka yupu lipsisikuka bokolina ati yanamne. Tonda, na minopce yanamne talak ara, anggun asing keten nang ap, tonda kil talye-talye mal olan nang ap, tilila yupu nyana nang ap ati, ‘Anggunda dipkoprob malye winilulume,’ nyabuka, weik arye wenepnamsine. Aning atonun, bona utotoa kum nang ati, weik ikin pil arukikiba donyak bukni, dekna mitik tonun arinyak nang ap, youwak kilapu ap, kwaknamne mapu ap ati, sik ning ubula dolonyak nang ap, tonda ninye asik nang ati, deiyok kum upmalibuk, malye yupu sik deice nyanyakce, malye kinyak nang ap nirya ati, na yanirye, ‘Anggun malye weik ululume,’ nyabuka wenepnamsine. Deiyok ara, sik amalye-malye weik wininyak nang arye, nati ilil kum ulule. Sikce, na si kum ereninyaka ati, yanirye sikti, wenebuka oplopnamne. Na Allah Yahweh, im deice yin talin malaikat nirya, sik weik deiyoknye birye nyapsin ning ara, dipkoprob winipnamne, nyapsine. Allah arye Israel ninye ati, nyabuk.
Tonda, Yesus arye abona weik talinanye biti ayupu nyabuk. “Allah arye, ‘Winamlulume, aning ton kum wininamlulume,’ nyapdeibukura, Musa arye mem yupu sekeiamuk ara, an akunum kel kiplume. Ayupu ara, ani. ‘Ninye ona ap, yuk kilapu talye ubula yona ap, yuk nang ning ubula dolona ap, yuk nang ati minina yupu nyana ap, talye tilila yupu nyana ap, tenebuka, arye talye yupu nyaplobuka dolona ap, anirya ara, pia meme. Tonda anggun ni yapu ap, anggun nin yapu ap, si erebuka melinamlume.’ Ayupu nirya ara, Musa sekiamuk yupu noutamak aupmal ati, nyapmakine,” Yesus arye nyabuk.
Yata ninye do nirya, Allah elce, ‘Wininamlulume, aning ara kum wininamlulume,’ nyabuka nyasilye yupu nirya batakuka, pia malye-malye wininyak ninye arye wininyak ning ara, laka nyapnusine. Ara, yuk ninye Allah el dipkoprop yupu kekepmanto ninye unyak bukni, amalye wininyak ninye arye sik malye unyaka deice arye, yupu sekelongonyake. Wininyaka deice arye, Allah el diksukum yupu yaniltanyake. Wininyaka deice arye, yuk ninye babye, Allah el yupu moubuka kel kum bikinyake. Ati, amalye wininyak ninye nirya ara, Allah im deice ulirye, yu upliba, akunum deiyok koubuka aninye ati wenelye ning ara, akunum lakak kipnin basulule.
Na kayapo narye anggunti, pia bico tenesunune. Yuk ninye arye anggunti malye updeipsica babye, anggunce aninye ati, tamubuka kwang dakna meme. Aning kum bukni, ‘Allah arye aninye ati weneplirye, yupu lepsisikuka bokeipnamle’ tenen, lo bataknamlulume. Anggunce tamubuka kwang dakanauk kum wininamlulume. Deiyok ara, ani. Ara Allah el yupu noutamak ara, ayupu sekamik. ‘Allah arye nyabuk. “Angguncuk tamubuka kwang dakna meme. Na aryuk amalye nang ati wenebuka yupu lepsisikuka bokeipnamna anya arye, nara Kwang Dakna Deiyoknye unune,” nyabuk.’ (Ulangan 32:35)
Ayupu nyapmasina deiyok ara ani. Allah arye ninye deiyok nang nirya ati, ‘Sik adeiyok nang arye ninye nirya ati, moubuka teleb ulinamak’ tenen, erebuka delilula ati, nyapmasine. Aning ati ara, anggun malye winipmunyopura, dipkoprop ilil unamsile. Sik ninye deiyok nang arye, malye wininyak ninye ati wenebuka onyake. Winibuka sik apil dona deiyok nang unyaka anya arye, talye sik bidamang aryuk tenebuka kum unyake. Talye ati kum unyake. Ayupu nyapmasina deiyok ara ani. Allah arye ninye deiyok nang nirya ati utenyamuk. ‘Ninye arye malye winibikiba, na yu upnilyopura, ninye deiyok nang ara, na melin nang unyakce, malye winin ninye nirya ati, wenebuka onamake’ tenen, erelilule.
Ara, anggun Korintus ninye ton tenipdelulume. Wenen surat dopdeipsukba, Allah arye anggun talima noutamak pil dobukba, anggunda mambul kanye bobuka engepluma deice arye winipsuk ning ara, telebuka. Ara ani. Anggunce nati, ‘Anang ara, teleb nang tenepnamsil’ tenen, pia pi dobuka yupu nyalamnulum ning ap, tonda, ‘Malye winipsuk ning kum daneiptibye’ tenen, pi dobuka pil dolamlum ning ap, tonda, ‘Se, yata ati malye winin ning nun noutamak tuba upmasil do?’ tenen, ilil kanye bobuka ululum ning ap, tonda, ‘Malye winin ning batakuka, teleb ninguk wininamabe’ tenen, patana ap, ‘Malye usilye ning batakuka, teleb kibuka mupdeipnamap’ tenena ap, tonda, malye usilye ning ati, “Dauplye,” kum nyanamap bukni, malye ning nirya ati ‘Yupu bokeibibirye, lipsisiknamap’ tenena ap, anirya ati ara, na kanye ara, telebuka. Adeiyok nirya ati ara, anggunce apil nirya dolamluma deice arye, ‘Anang ara, teleb winin ninyeuk unyak’ tenen, laka upsilaba akunum kel kisinyabe.
tonda, ‘Se, na kwit talilye ning ara, na babye taliptinye’ tenena ap, patana ap, yu mek weika arye dinyakba, kanye wangalamak ning winina ap, ninye weik bulubikirye, talye-talye yolalamak ning ap, anyapmasin ning atonun winin ning nirya ara, aupmale. Na kayapu, min arye, “Kanye mouplulume, winina meme,” nyabuka wenelamsise touk, tuba tonap wenepsine. Anyapmasin ning wininyak ninye ara, Allah arye nunti lyebuka talinamsil ning ap, atalak arenamsil ning ap, dipkoprop kum dopropnamake. Winibuka malye-malye tuba wininyak ninye ara, Allah arye kum talinamle.
Ara, na kayapu, anyapnusin yupu ara, talye ati kum nyapsine. Kume, nara nun Deiyoknye Kristus, el pil melina deiyoknye ununa deice arye, ayupu nyapdeipnusine. Anggun Yahudi yala kum nang ara, dib tenena kumce, anggun kanye talima noutamak talye-talye tenenyak nang deice arye, malye-malye winilamak touk, anggun Efesus mutuku nang arye, sik talye nang wininyak atonun tuba kum wininamlume.
Na kayapu, talye nang arye, talye-talye yupu, nong kum upnamle yupu talye nyaplobikiba, ‘Mankau arye, tilila ning dib tenebibyak’ tenen, anggun kanye moupnamlulume. Talye ati kum nyapsine. Amalye nyapmasin ning nirya wininyak ninye arye, Allah el yupu yaniplobuka, wininyaka ati ara, Allah yu weik upliba, sik nong deice ikin ning weik deiplirye, weika arye, wenelule.
Anggun babye, Israel ninye noutamak, tonoknye birye yuknye biti, ubula doproplirye, tapu koubuka taleamlirye, ‘Anye bira, talye ning atonun ulule,’ teneplyopura, aminyan talak taliplinye dobuka, yuk nang ati dekeipmali bukni, sikce anye dobuka bobikcopura, pia malye weike. Tonda, aning atonun, tonoknye birye, yuknye ubula dobuka, tapu koupdongoplirye, ‘Na mambul pil talye urdemuk pil danamnilame,’ nyaplyopura, aning babye pia malye. Yatanye do nirya, aning atonun winibicopura, yuk nang ubula doplinye bira, adiparyuk oplopnamlulume. Aning ara, batakna meme. Atonye opmunyopura, winipmunye deice, anggun Israel ninye noutamak, malye ning kum danaipmunce, sirya daknamlulume. Musa birye nyabuk.
Wininyak nang, sik menenga ara, na Allah arye, sik malye pil donyak atonun kiklibuka, weik arye wenepneba, sik weik imun kanye bobuka unamake. Ninye kot dam arye, sakuka olamle atonun, sik malye winilamaka ati, aminyan talak, narye anang ati, wenepnamne. Sik anang on talak ara, akunum dam upmale. Anang opnirye, sirya daknamne talak ara, minopce yanamle, akunum dam kipmale. Allah arye nyabuk.
Ura, kil dobuka una ati, yupu nyapnusine. Kilapu dobuka unamlum talak nirya ara, ‘Aning ara, weik mambul anya arye, malye kum wininamap’ tenen, yuk kilapu dobuka talye-talye neika kum manamlulume. Aning ara meme. “Winina meme,” nyapmasina ara, talye ati kum nyapsine. Kume. Kil akunum domlye bukni, yuk nang kilapu ubula neika malamak nang ap, tonda kam nang bukni, malye-malye winibikirye, talye kilapu ubula neika malamak nang nirya ap, Allah arye sikti, yupu lipsisikuka, wenebuka opnamle ati, nyapsine.
Kankan ninye wibuk bukni, anggunce, ‘Kankan ninye mambul kume,’ tenepmatum deice arye, anang sik nong deice malye yupu nyaplulume. Ton tenipdelulume. Sik bona weik talin ninye arye, anggun nong deice ikin ning deipsikirye, anggun ning dobuka malye ulisinyak ara, kum tenipmalum do? Tonda, sik sisin ninye bona weik talin ninye arye, ‘Anggun talipdongobuka, sik ning dalubuka dopropnamap’ tenen, yupu bokolina deiyok nang dam bobasinyak ara kum tenipmalum do?
Anggun moubuka tenepnululume. Anggunce, “Nun wa wipdeipsululume,” nyalilamlum ati, anggun wa wilamsiak bukni, wa wina ati dekna yo bok ara kum arilamlumce, anggun aikuk moubuka deililamluma deice arye, si sekelisulule. Anggun wa wibuka kouamik ning libuka, sirya dakuka yangalamik nang arye, malye nyabuka engelamik yupu ara, Allah nun Weik Deiyoknye damak biyukbuk kekebuke. Allah ara, aning-aning nirya talina deiyoknye ululce, moupbuka disilirya anye arye, anggun ara bicoe. Ikin weik upnamsile.
ကြော်ငြာတွေ