Tonda ninye tonok basam weina deiyoknye birye, el domba basam nirya bulubuka tonokak delilamle touk, Allah el mapu sirika nirya ara bulubuka telebak deipnamsile. Tonda, domba weina deiyoknye birye, domba basam mapu bico tenen, iribuka bobalamle touk, Allah arye el mapu koproba dobuka iribuka bobinamsile. Tonda domba basam mapu nirya sik nin birye, ‘Na mapu na dam nimalyap asa yanamal’ tenen, ‘Yalulume,’ nyapnin balibuk, sik nin yupu kekebuka balamak touk, Allah arye el mapu koproba ati atonun wininamle.
1 Tesalonika 2:7 - Eipomek7 Ikin kum kipdeiamsube. Aning kum bukni, sik nin yapu arye, siki mapu ati, pia bico tenebikirye, nimalye arye melilamaka atonun, nunce anggunti atonun winilamubu. အခန်းကိုကြည့်ပါ။ |
1 Tesalonika 2:7
18 ပူးပေါင်းရင်းမြစ်များ
Yuk mutuku ninye arye, sik mapu ap, sik kilmapu ap dobuka delilyanganamak talak ara, yuk pera mutuku, sik ninye deiyok kibuka taleamik Raja nang arye, Israel yala ninye sik mapu ati, melibuka kalikinamake. Tonda, aRaja nang sik kilapu, weik deiyok kilapu kibuka ulamik bukni, wini talak ara akilapu arye, Israel yala ninye sik mapu ati, melibuka kalikinamake. Sik yuk mutuku Raja nang ap, sik kilapu ap, sik Israel yala ninye sik amutuku tam uk unamake. Winipsikirye anggun, Israel ninye si erena ati, anggun dam yakirye kanupdongobuka si erenamsiake. Sik yuk mutuku weik deiyok ninye, mambul nang ulamik bukni, wini talak ara, talye ninye uk unamake. Anggun Israel ninye dam yakirye, anggun si erena ati, kisok kanupdongobuka tuku deice mabikiba, anggun yan deice upmalye tuku butbuta sik sitang deice palinamle. Sik ninye deiyok nang arye anggun Israel ninye ati, anggun amu tam ubikirye, si erenamsiake. Aning winipsikca deice arye, anggun Israel ninye ara kel biknamnulume. Ara, na si Allah Yahweh nati kel biknumunce, ‘Se, dipkoprob Allah el dem arye apil dopmasile,’ tenenamnulume. Tonda, ‘Allah elcuk melinamsile,’ tenen, natibuk moropnikirye, na si ereninyak ninye ara, malye kanye kum bonamake. Narye aninye ati, dipkoprob melipnamna anya arye, alye kum dakdanamake.
Tonda winipmanto ara, kilapu arye, sik mapu engenmakce talak ara, amapu moubuka bobikirye, namin yupu nyabikirye, kaliklamak atonun, na Allah arye, anggun Yerusalem mutuku ululum nang nirya ati, anggun melisinirye, melibuka kalikinamsine. Yerusalem mutuku noutam arye melipsinyopura, anggunda kanye deibuka, talye tunim nyabuka, pia teleb-telebuk unamlume. Allah arye nyabuk.
Narye, sik Israel ninye nirya deipseba, na mapu uk unyak do? Kilapu arye, sik deiamikce, mapu iribuka balamak atonun, yata deiyok ati, ance nyapnulumba, aninye bobuka banun do? Ance sik pununa nang ati, ‘Ateleb mutuku nuknamsine,’ nyamlum mutuku bana ati, bisik banyak talak nirya, yata deiyok ati, narye aninye bobuka banun do? Sikti, na ikin weik unulule.
Bukni, sik kanye talima noutam dib tenenyaka ara, min kum wisiamuk ninye ap, neika ulamubu talak ara, ‘Yesus dib tenepnamak’ tenen, sikce winilamik touk winilamse. Ara, sik anang arye, ‘Se, mankau arye, malye unyap’ tenen, aning-aning batakuka winilamik touk, na babye aning batakuka ulamse. Yatato ninye do nirya, ayala-ayala ninye nirya, sik winilamik touk, sik ap neika ulamubu talak ara, malye winina kum bukni, sik winilamik ninguk talibuka ulamse. Deiyok ara, ‘Winipnyopura, Allah yupu, ninye lyena ati teleb yupu peterepnibuk kekebikirye, Yesus dib tenepnamak’ tenen, winilamse.
Ara, yuk yupu ton nyapnusine. Kristus el bidamnye kanye erena kumce, talima mitang ubuka una ap, ‘Na kwit malye kanye boplyak’ tenen, nimalye arye una ap arisilya deice arye, ayupu ton nyabuka moropnusine. Na Paulus arye nyapsine. Na kele, anggun kan-kan ton nang arye nyaninyake. “Kume, Paulus ara, neika bukuka dilanyap talak ara, ilil asa unyak nang atonun ulul bukni, nun neika kum unyap talak ara, mikip weik nang ulye touk, mikip arye nyasulule,” nyaninyake.
Ara dip, sikce Yesus tongobuka, wanwanun yo deice arye obik talak ara, Yesus mikip naminuk ulamuk bukni, wini talak ara, Allah el mikip deice arye, kam bukdeibukba, mikip arye ulule. Aning atonun, Kristus ap, kanye talima dukdongobuka neika unyap bukni, nun mikip ara mitang nanguk unyabe. Bukni, Allah el mikip arisilya deice arye, nun ap, Kristus ap neika ubirye, anggunti melibuka pil donamsiabe.
Se, na kayapu, anggunda bico tenesununa anya arye, ‘Na mapu atonun ninye unyake,’ tenesunune. Kilapu arye, sik mi deipnuce talak, mi deiyok uk dilamle touk, narye anggunti, ‘Se, Galatia mutuku ululum ninye ara, Yesus Kristus el winilye ning nirya, kel biktingce, sik kanye talima wisiptue’ tenen, pia se tenenunce, ikin kanye bonune.
Amalye un ning akunum nyapmasin bukni, Allah arye weik kel bikilina deiyok ning arisulula ara, winira nyapnusine. Minop ara, el kel bikilina deiyok arisilye ning ara, yuk malye ning tonok babye tabakuka kum ulule, diksukumuk ulule. Ton anang ara, ‘Nun nirya talima nimalye aryuk, telebuk neika ulamtibye’ tenen, patalule. Tonda, sikce, ‘Na yupu nyapnikcopura, yuk nang kekebikirye, alye una ap, ilil una ap, kanye ikine ap, kanye delina ap, unamak do, kum do?’ tenen, minopce moubuka teniltonyake. Tonda, ninye arye yupu nyabikibuk, moubuka kekebikirye, nimalye aryuk unyake. Tonda, yuk nang malye ubicopura, ‘Na adiparyuk wenebuka optinye,’ kum tenebikirye, anang ati, bico tenebuka luba kilongonyake. Sik yupu nirya ara, duknuna kum arye, lak akuk laka nyanyake. Ton ninye urasin eibikirye, sik kanye kum bokolinyake. Sik teleb ubuka diksukum unyak ning noutam nirya ara, duk telebuk moulule.
ကြော်ငြာတွေ