1 Tesalonika 2:5 - Eipomek5 Tonda, Allah arye nun winilamap ning nirya kekebuka disulula anya arye, nun talye kum nyapnyabe. Anggun kele, nunce anggunti, ‘Teleb yupu nyaplopmabibuk, anang arye kanye deipnamsiak’ tenen, kum winilamubu. Tonda, ‘Bon ning weika arye doproptibye’ tenen, tenepce arye, tilila yupu kum nyalamubu. Tonda, ‘Anggun ning ubula doproptibye,’ tenenyaba ara, ‘Biksicak’ tenen, duknuna yupu pia kum nyalamsupu. Aning nirya ara, pia kum winilamubu. အခန်းကိုကြည့်ပါ။ |
1 Tesalonika 2:5
34 ပူးပေါင်းရင်းမြစ်များ
Yata nang do nirya, sik kweit capu koproba bukni, yuk nang dam binuka, ‘Na kwit biti, tilila yupu nyapnirye, moul kin yo bok arepnutumba, doproptinirye, weik kipnutu’ tenen, nyabuka morolulnye bira, aminyan talak, elce deiamlye mapu ara, ikin weik unamake. Winipmanto ara, ton bikna nang arye, nyanyak ning ara, ani. “Atonye elce deiamlye mapu ara, anggun ni koproba, malye weik winilamuk ning ati, aminyan talak amapu ara, ikin weik unamake,” nyanyake.
Ninye ton yuk nang sik kekena ati, ‘Talye yupu uk nyaltakanamne’ tenen, patalibuk ululnye, el dam ara, anggun mambul yupu ton, pia kum nyanamlulume. Ati, anye el kekenak ara, moubuka bikmunce nyanamlulume. Aning kumopura, ‘Ninye ton talye yupu bobuka nyalbitiniba, ninye nirya kel biktinge’ tenen, patalyeba nyalbalule. Winiplyopura, sikce, ‘Ayupu ara lakak kum nyanamabe,’ tenelamlum ning nirya ara, elce talye lukparabuka, laka arye nyalbalula atia. Ati, atalye yupu bobuka nyalbalulnye kekelye sukum ara, anggun mambul yupu kum nyanamlulume. Tonda aning atonun, yupu nirya bobuka, ‘Yuk ninye weika arye kekenamak’ tenen, patalibuk ululnye bira, neika una meme. Anggun mambul yupu bobuka, anye dam kum nyalbanamlulume. Aning ati, ‘Yuk nang arye talye nyanyak yupu kekebuka nyapra banamne,’ tenelulnye ap, neika ansinibuka kum unamlume.
Ninye ton el sitang deice arye, el kayapu nang ati, tilila yupu nyaltakalulnye bira, dipkoprob el kayapu nang ati, ‘Sikda na like,’ tenelirye, sikti, malye ulilule. Aning atonun, sik talima noutamak arye, ‘Anang ara nun like,’ tenenyak bukni, tenebuka yupu deice arye, ‘Kume, anggunda telebe, nun ap neika ulamtibye. Anggun ti kanye deibabe,’ nyabuka, talye yupu deice arye nyaltakanyak ning ara, dipkoprob anyanyak yupu deice arye, sik kayapu nang ati malye ulinyake.
Ninye arye malye upmace talak ara, sik kayapu nang arye, sikti, wenena yupu nyalinyak nang ara, sirya daknamle talak, anang nirya arye, wenena yupu nyanyak nang ati, “Wenelamsika deice arye, meilyamsika ati, sikda pia teleb nang unyake,” nyabuka, sikti, kanye delinamake. Allah arye, anang ati, menenga ning arepnamlarya. Bukni, ninye arye malye ubikiba, tonoknye birye, ‘Anang kum wenepnun’ tenen, teleb yupu uk nyapliba, kekebikirye kanye deilinamak bukni, sirya talak ara, anye biti, kanye kum delinamake. Atonye birye utenelule. ‘Yuk nang nirya arye, nun kwit bira pia telebnye, tenepnamniak’ tenen, teleb yupu uk nyaliba, kekebikirye kanye delinyake. Winibuka atalak ara, kanye delinyak bukni, sirya talak ara ninye nirya arye, anye biti kanye kum delinamake. Anye bira bataknamake. Tonda, Allah arye, ato nang ati, weik arye wenepnamle. Bukni, diksukum yupu uk nyalinye ati, pia weik arye kanye delinamake. Weik teleb ning ara, ninye yupu bokolina ati, lipsisikuka dipkoprob yupu uk bokolinamlulume. ‘Yuk nang arye nati kanye deipnamniyake,’ tenena ara, pia kume.
Tonda sik anang arye, na yupu laka len deiyok nang, nabi nang ap, tonda narye arepneba, lengdar mapmakce deice arye eibikirye, laka nyanyak nang ap ati, nyanyake. “Anggun si bam bol kitipdongobuka, koulongana atonun wininamlume. Allah arye arepliba, lengdar mapmamunye deice eipmunce, laka lesululum yupu ara, yata ati ayupu nunti tuba nyasululum do? Dipkoprop ikin ning weik upnamsil ning, nyasumunye ning ara, nun lik ati, tonap ayupu kum nyanamsululume. Ikin yupu kum bukni, ‘Kanye teleb upnamsutue’ tenen, yupu uk nyanamsululume. Aminyan kum winipnamle ninguk nyapsutumba, kekeptibirye, ‘Talya kanye bobuka uptibye’ tenen, nyapsiyabe. Nunda pia lik ati, talye kanye bobuka unamabe.”
Sik aninye ara, kam atonun dem unyake. Winipmanto ara, kam arye din patana dem ulula ati, moubuka bikina kumce, talye aupmalye ning nirya luparabuka, diplibuk kum boulamle touk, anang babye wininyake. Sik aninye deiyok nang ara, aning-aning nirya ati, patana dem ulule. Tonda winipmanto ara, sikda domba basam weina deiyok nang atonun unyak bukni, sikda moubuka, kum bikmanto nang unyake. Sikda, sik kanye pum tam aryuk tenebikirye, ‘Teleb winin ning ati, abisikuk binuyabe,’ kum tenenyake. Sik mining kanye aryuk, ‘Nun yuk tenebipye bisikuk, atalye binuyabe,’ tenebikirye, malye bisikuk banyake. Tonda, sik anang nirya arye, ‘Kume nun bidamang aryuk bona weik dolonamabe,’ tenebikirye, sik patan ning tenenyake. Tonok ning babye, yuk nang patan ning ton kum tenenyake. Sik Israel tam unyak ninye deiyok nang nirya ara, ato kanye dem bobuka malye dem wininyake.
Amutuku unyak nang nirya ara, weik nang babye, mitik nang babye atonun, ‘Nun ton yo bok uang weik dobuka, bona talin nang uptibyeʼ tenen, eibuka dolonyak ning ara, diksukum pil dona deice arye, kum dolonyake. Aninguk kum bukni, tonda, sik imam nang babye, nabi nang babye, sik nirya arye, yuk nang ati, tilila yupu nyabikca deice arye, yuk nang, sik yo bok uang ubula dolonyake.
Sik mutuku noutam uceba, anggunce, ‘Se aning ara, weik kel nang unyake,’ nyalulum nang ati ara, wenepnirye, narye lo arepnyeba, yuk nang arye, sik akunum domik kilapu nirya, narye yuk nang ati arepyeura, anang arye akilapu alubuka dopropnamake. Aning atonun, sikce wa tuku wilamice mutuku ara, na Allah arye dobuka, yuk nang ati arepnamnarya! Winibuka wenepnamsina deiyok ara, ani. Ara, anggun amutuku noutam ululum nang nirya ara, weik bona talin nang babye, amu tamuk mitikto unyak nang babye, ‘Se, aning-aning nirya, nun ton weika arye doproptibye,’ tenen, pia patasilyeba, enauk ululume. Tonda, anggunce, tenebuka aryuk nyabibyeba, ‘Yuk nang ning pia weika arye alubuka doprobibyeba, bona talin nang uptibyeʼ tenen, tilila yupu nyalulume. Ara talye daunyak nanguk kum bukni, anggun mutuku noutam, Allah si eren aik pum tam pil donyak nang, sik imam-imam nang babye, na yupu ap, aminyan upnamle ning ap ati, laka nyana deiyok nang, sik nabi-nabi nang babye, tilila yupu deice aryuk, nyabikirye, enyake.
Mika birye nyabuk. Allah Yahweh arye, anggun tilila yupu talibuka nyalulum deiyok nang ati, “Winibuka-winibuka,” nyasulule. Na mapu koproba, Israel ninye arye, anggun tilila yupu nyamunye, nabi-nabi nang ap, Allah yupu laka len deiyok nang ap ati, anggun laka nyalulum yupu dekna ati, din ning weik arepsicopura, anggunce, “Yo, telebe. Dotalak noutamak ara, urdem kanye bobuka, telebuk unamlume,” nyalulume. Bukni, yuk ninye ati, dekna teleb ning kum arisinyak ninye ara, anggunce nyalulume. “Kume, dotalak noutamak ara, anggun mal olan nang arye, yanuka opnamsiyake,” nyabuka, malye yupu nyabuka, sik nong deice ikin ning delilulume. Winiluluma deice arye, talye tilila yupu nyaplumce, Israel ninye, sik nong deice ikin kililulume. Ati, anggun winilulum nabi-nabi nang nirya ati, Allah arye ayupu nyapdeipsuke.
Ati ara, na Allah Yahweh aning-aning nirya talibuka, im deice yin talin malaikat, sik deiyok ununye birye nyapsine. Teleb ning ara, anggun kan-kan noutamak, tonoknye mambul kanye bopturye, na si eren aik bublan ara, tirikdongoptuba, na kanye deiptinye. Ara, urdem ati kume. Akat bublan tirikdongoptuopura, anggunce kam ning malye ning bobuka, na arena ati, uku kum dongopmantonye ton upsutue. Bukni, na arena ati, pia malye ninguk arelyanganumunya ati, narye kanye kum deipsine. Anggun ti na lik unulule. Tonda, anggunce malye ning arelyanganumunye ning ara, pia kum dopropnamne.
Yayikce, Yesus ati ayupu asipdeyik. “Anda peterenanye umince, yupu diksukumuk nyalyame. Tonda, an petereminye talak ara, ‘Na peterenunba kekepnikirye, derenuniyak do? Kanye deipnuniyak do?’ kum tenelyame. An petereminye talak ara, ‘Anang ara bona weik talin nang do? Anang ara weik ninye deiyok nang do? Anang ara yuk sisinanye do?’ tenena kum diparyuk, Allah yupu deice arye, ‘Wininamlulume,’ nyasilye touk, diksukumuk peterelyame.
Yesus arye ayupu nyabukopura, dukdongobuka ayupu tonap, nyabuk. “Farisi nang ap, Musa sekamuk yupu peterena deiyok nang ap ati, Allah arye wenebuka opnamsila ati, anggun bico,” nyabuk. Nyabukce, ayupu ton dukdongobuka nyabuk. Se, anggun Farisi nang ap, Musa sekamuk yupu peterena deiyok nang ap, Allah arye wenebuka opnamsila ati, anggun bico. Anggun talimak malye ning aupmasilibuk, ‘Teleb nang tenepnamsiyak’ tenen, teleb ning bola deiceuk winilulume. Anggun malye winimunye ning ara, nyapnusine. ‘Allah dib tenebibyeura, Allah arye nun dobuka nun talima talinamsilak binuyabe,’ tenenyak nang ara, anggunce yupu sekeldongolulume. Winiluluma ara, ‘Anggun aik weknuyap’ tenen, buplan dam ninye tikilyangaki bukni, yu upliba, mikip arye buplan tirikildongolamak touk, winilulume. Ara, ‘Allah ati, dib tenebibirye,’ ‘Allah talinamsilak weknuyabe,’ tenenyak ninye ati, yupu sekeldongoluluma ati nyapsine. Anggun babye dib tenebuka kum wekelulume. Tonda, ‘Nun dib tenebuka Allah talinamsiak wekenamabe,’ tenenyak nang ati ara, anggun Farisi nang arye winimunye ning deice arye, aninye ati yupu sekeldongolulume.
Na kanye bokoltona kumce, pia pi dobuka, mikip arye peterepda banune. Ara, na kanye talima el deiceuk deipna deice arye, Allah el Mi Kopropa Yesus, el laka teleb yupu, ninye lyen yupu dobuka, mikip arye peterepra banune. Ara, na kanye talima, Yesus el deiceuk deipsa deice arye, ‘Allah el Mi Kopropa Yesus, el kai teleb yupu, ninye lyen yupu dobuka, mikip arye peterepra banune. Allah el Mi Kopropa Yesus, el amu tam unirye, el piluk dopnamne,’ tenenune. Allah elce dinmanila anya arye, na talye yupu kum nyapsine. Allah moronun talak nirya ara, anggun Roma mutuku umunye ninye ati pia tenepnirye, Allah morosunune.
“Amalye nang ati memelonamlulume,” nyapmasina deiyok ara nyapnune. Ara, sik bidamang winin ninguk tenebuka wininyak nang ara, nun Deiyoknye Yesus Kristus ati, diba tenebuka el amu tam unyakce, dipkoprop el pil kum donyake. Aning kum bukni, sik bidamang kanye aryuk tenekirye, sik bidamang patan ninguk tenebuka, malye ulisica ati nyapmasine. Anang arye yuk nang ati, “Se, anda pia telebe,” nyabuka tenepce arye talima lilona ati, namin yupu nyanyake ap, tilila yupu talye nyaltakanyak ning ap deice arye, sik kanye moubuka tenena kum, mitik walwal unyak nang arye, ‘E, aning ara dib nyapmasiak do’ tenen, atilila yupu uk diba tenenyake. Winibuka tilila yupu uk nyasinyaka ati, anang sik dam arye kwarabuka, yukak memelonamlulume.
Na kayapo, na yala ninye anggun Israel ninye ati tenepnirye, ‘Se’ tenen, tuba-tuba ikin kanye bobuka, talima uk dinulule. Na Paulus bira, Kristus ap, talima dukdongobuka unun deice arye, pia dipkoprop yupu nyasunune. Na kanye talima pum tam nirya ara, Allah El Dib Kanye unilirye, “Dipkoprop nyanmalame,” nyabuka nyanilye touk, dipkoprop yupu nyasunune. Tilila yupu kum nyanune.
Aning nyapmasina ara, urdem aryuk kum nyanune. Ara, yuk ninye weik arye, ‘Allah yupu peterenmabya deice arye, ninye kekebikirye, yo bok weik arepsikibuk, yo bok weik doproptibye’ tenen, tenepce arye nyaltakanyake. Bukni, nunda aning atonun kum wininyabe. Aning kum bukni, nunda Allah dilesiliba, nun ap, Kristus ap, talima dukdongobuka neika ubirye, duknuna ap, tenepce arye nyana ap, kum aniryuk, dipkoprop yupu uk laka nyanyabe. Wininyaba ara, Allah arye dopdeipsuk ning unyaba atia. Tonda, Yesus el yupu nyanyap talak nirya ara, ‘Allah dam tikuka nyaptibye touk, wininyabe,’ tenenyaba anya arye, Allah arye disulula ati, aning moubuka tenebibirye, pia dipkoprop yupu uk nyanyabe.
Aning kum bukni, pia malye ning wininyak nang arye, ‘Yuk ninye eibuka kel biksikcak’ tenen, duknulamak ning aning-aning nirya akunum batakibirye, tenepce arye yupu nyana ap, tilila yupu ap kum nyanyabe. Tonda, Allah yupu dipkoprop nyasilye touk aninguk moubuka peterenyabe. ‘Yuk nang arye kanye deipsitinge’ tenen, nun kanye aryuk kwalibuka kum peterenyabe. Aning nirya kum wininyap bukni, Allah el dinmasilibuk, Allah el dipkoprop yupu ulye touk, aninguk dobuka laka arye peterenyabe. Peterenyaba deice arye, ninye nirya kekebikirye, sik kanye tenena noutamak arye nunti, ‘Anang ara, dipkopropuk wininyak,’ tenesinyake.
Na kayapu, anggunce nunti, kanye deipsumunce, bico tenepsululume. Nunce yuk ninye nirya ati, malye kum winililamubu. Tonda, nunce yuk ninye nirya ati, tilila yupu kum peterelamupebuk, siktilila yupu dib kum tenelamik. Tonda, ‘Yuk nang sik ning ubula doproptibye’ tenen, tenebuka arye kum nyalamuburye, ubula kum dolamubu. Tonda, ikin ning yuk nang deice kum deililamubu.
Anggun Allah ati dib tenelulum ninye ap, nun ap, neika ulamubu talak nirya ara, Allah arye dilamsuke. Tonda, anggun babye, elilamluma anya arye, anggun kele. Allah funguk ulye touk, malye winin ning tonok ning babye, una kum arye, pia diksukumuk winilamsupu, yuk nang arye nunti, “Anang malye wininyak ning ara, ani-ani,” nyabuka, kum nyapmanto nang ulamubu.
Ara, Allah dib tenen ninye ati, sik melibuka pil dopmanto nang yupu nyapnukine. Arup nyapmakin atonun, anang, yuk nang arye, ‘Anang ara, teleb un nang uka,’ tenebice nanguk, wibuka delina telebe. Tonda, aning ara, na tenen arye nyana kum, dipkoprop yupu nyana ap, yu mek kanye wangalamak mek weik arye kum dinyak nang ap, tonda, ‘Yo bok weik doproptibye’ tenen, malye winina ap, na tenena kum arye pil dona ap, kum wininyak nanguk, apil doptinge.
Aning ara, talye ati kum nyapkine. Allah yupu peteren nang, sik melina deiyok nang ara, dib tenen nang, sik kanye melipdakirye dinamak anya arye, talye pil kum donyake. Sikda, Allah el pil talibuka donamaka ati, sik adiparyuk maknya kintinibuka dina ap, yuk nang yanina ap, kum winiptinge. Tonda, yuk ninye ati minop derelana ap, wenena ap, kanye wangalamak mek pia pataplibuk, weik arye dina ap, kum winiptinge. Tonda, yu weik ubuka, yuk nang oldana ap, bona talin ning yo bok ap, weik arye dolona ati, tenepce arye, minin yupu nyana ap, anirya ara, sik adiparyuk pia kum wininamake. Amalye-malye winin nang ara, ‘Allah ati diba tenen nang, sik melina deiyok nang unamak’ tenen, wibuka pia kum delinamlyame. Aning kum bukni, ‘Allah yupu peteren nang, sik melina deiyok nang unamak’ tenen, diksukum unyak nanguk, wibuka delinamlyame.
Domba basam weina deiyok nang arye, sik domba basam ati bico tenebuka, teleb ubuka weilamak touk, anggun babye, Allah el mapu sik amutamak unyak ninye ati, bico tenebuka nimalye arye melinamlulume. Ara, sik amutamak unyak ninye ati, ‘Sik kanye malye ubicak’ tenen, melipmunce, ‘Kalikuka dilanamlulum’ tenen, nyapsine. Wininamluma ara, ‘Na lik,’ tenenun bukni, ‘Allah arye pia pi donilya ati, wininamne,’ tenena kume. Aning kum bukni, Allah arye, ‘Na mapu melina ati teniltona kum arye, kanye deibuka melinamak’ tenen, ‘Patalul ak tenesilye touk wininamlum’ tenen, nyapsine. Tonda, ‘Yo bok weik arepsiting ak, teleb ubuka utibye,’ tenena kum arye, kanye deibuka talye luba kibuka melilanamlulume.
Allah arye anang dobuka, pia kunuknak dongopnamla ara, talya urdem ati kume. Ara, atilila yupu nyaninye arye, “Nunda weik mambul ning winipnamabe,” nyabuka, talye yupu uk nyaltakanyakce, sik kanye erebuka kwalinyake dilanyaka atia. Tonda, talye tukwak ninye nirya ara, talima noutamak malye ning aupsuka anya arye, yuk ninye malye winin ning pataplibuk, tenenyak ning ati ara, atilila nang arye, nyanyake. “Kume. Winina ara, telebe uka,” nyanyake. Nyabica deice arye, yuk nang sik kanye lilonyake. Sikce talima lolonyak ninye ara, winiryuk deiyok kibuka diba tenepmak bukni, kanye min kum wisibuk nang ati nyapne. Anang arye, sik malye nang winilamak ning batakuka, ‘Diksukumuk unamap’ tenen, winiryuk deiyok kipmak bukni, talima wisina kum ninye ati nyapne.
Atilila yupu peteren nang arye, ‘Aning-aning nirya weik doproptibye’ tenen, patalye ninye unyaka anya arye, sik badamnye kanye arye tenenyak ning, talye yupu uk, peteresinyak deice arye, ‘Sik ning weik dolonamap’ tenen, yum yupu nyabuka, anggun ning ubula dolonamsiyake. Minop talak ara, Allah arye, ‘Atilila peteren nang ara, wenebuka oplopnamne,’ tenyamukce, akunum kentenlamuk anya arye, aning ara lubakiplirye, kum bataknamle. Dipkoprop aminyan talak ara, aninye oplopnamlarya.
Sik anang ara, pia bicoe, Allah arye anang wenepnamla ati, sik anang ikin upnamle. Sikda Kain arye Allah nyabuk yupu kum kekebukce, malye winibuk touk wininyake. Tonda, minop talak Bileam arye, ‘Ayupu ara, tilila yupu,’ akunum bikmokcuk, “Yo bok weik arepnukiabe,” nyabikura, kekebukce, ‘Yo bok weik doproptinye’ tenen, patabuka ati, tilila yupu peterebuk. Tilila yupu peterebuk touk, sik anang babye, ‘Yo bok weik dolonamap’ tenen, malye wininyake. Tonda, minop talak Korah arye, ‘Allah arye nyapdeibukura, Musa nyalamuk yupu kum kekepnuyap’ tenen, deiyok koubuka, el yanibuk touk, sik anang babye, Allah arye nyasulul yupu yaniltanyake.
ကြော်ငြာတွေ