Tonda, ayo moromna lilun tam ara, Allah el si Yahweh arye, ei tikukce, nyabuk. Nara, an apu koproba Abraham ap, an ni koproba Isak ap arye, na si erenurudaknye, Allah, na si Yahweh aunune. Anda amapmalam sukum arye, otam nirya arepnamkine. Tonda, ance deipminba, dadeipdanin banamak nang babye, atuku talipnamake.
1 Tawarikh 28:9 - Eipomek9 Tonda, na mi Salomo, narye el si erelamse Allah, na ni koproba Allah ati, an babye kel bikinamlame. Allah el siuk pia erenamlame. Ara, an kanye talima nirya moubuka tenepmince, ‘Winipnun do, kum do?’ tenen, teniltona pia kum unamlame. Pia pi dobuka, el tibuk, talipmince el siuk erenamlame. Ara talye ati kume. Deiyok ara, Allah Yahweh elda, ninye talima noutamuk ulul ning nirya weklirye dilule. Tonda, ninye kanye pum tam teninamak ning ap, ‘Winipnamabe tenen,’ teninamak ning ap nirya ara, kel bikilule. Ura, ance elti, ‘El kanye delilul ning eipnirye, kel biknamne. Aninguk talibuka unamne,’ tenepminyopura, dipkoprob adiparyuk el ulul ning ati eipmince, elti, bikinamlame. Bukni, aning winina kumce, el batakmince, kum dobolbiminyopura, elce, ‘Kume, anye na like,’ tenepkilirye, pia ati bataknamkile, kum melinamkile. အခန်းကိုကြည့်ပါ။ |
1 Tawarikh 28:9
79 ပူးပေါင်းရင်းမြစ်များ
Ninye tukwak mutuku-mutuku nirya arye, sik kanye talima pum tam tenelamik ning nirya, pia malyeuk winilamik. Atalak-atalak nirya, teleb ning tenena kum diparyuk, pia malye ninguk tenebuka patalamukba, malye-malye pia weik winipnin balamik. Malyeuk winilamik ning ara, Allah el si Yahweh arye dipdeyukce, bikamuk.
Nuh birye, Allah el si erena ati, aning nirya uku dongobukba, uku dinmokce, nintong teleb ning welebukba, Allah el si Yahweh kekebukce, “Telebe,” tenebuk. Utenebukce, Allah el talima pum arye aning ton tenebuk. “Ura, wini talak arye, dipdongobuka doryanganamle talak noutamak nirya ara, ninye tukwak ninye ati, tukwak mutuku tonap ikin ning deibuka, malye kum updeipnamne. Ninye tukwak ninye nirya ara, winiryuk deibikce talak arye, dipdongobuka, sik kam unamak talak noutamak nirya ara, sik kanye tenenamak ning ap, sik talima patalamle ning nirya ap ara, pia malye unamle bukni, tukwak mutuku ara, tamubuka tonap malye kum kipdeipnamne. Tukwak mutuku nirya ati, tonap tamubuka kum supnamne. Tonda, tukwak mutuku kam ulye ning ayala-yala nirya, obuka kum daneipman touk, yuk talak ara, tup tamubuka tonap kum winipnamne.
Nyabukba, Salomo birye, “Na ni Allah ance na ni koproba Raja Daud biti bico tenyamlumce, teleb ubuka meliamlumba, an amu tam ulamuk. Na ni biti meliamluma deiyok ara, Daud biti el dam nyamlum yupu uk talibuka pil dolamuk. Tonok ning babye, kum bataklamlum. Tonda el talimuk ara, diksukumuk ulamukce, ance ‘Aning telebe,’ tenyamlum ninguk, elcuk winilamuk. Minop arye, na ni Daud teleb ubuka meliamluma atonun, wini talak babye, el mi nati tuba melinilyame. An meliamluma deice arye, na ni koproba Raja bulamak ning deice bulamuk touk, na babye aning deice bunirye, Israel ninye nirya talinune. Na ni koproba dolamuk piluk talibuka donune,” nyabuk.
“Morobikcopura, an adiparyuk im deice, an un dam arye kekenamlyame. Kekepmince, nun malye winin ning ati namin kipsimince, lyenamsilyame. Nun nie, ance tukwak unyak ninye nirya, sik talimak ulul ning an kel ati ara, teleb do, malye do, ninye arye sik yuk-yuk ulamikce touk, ance yupu bokeipnamsilame. Ancuk ninye tukwak nang sik talima noutam ulul ning dimince kel bikilyame, yuk nang arye ton kum winiptinge.
“Sik yuk mutuku nang, talye tikilyangan nang arye, anti anyaik dam moropkikcopura, an adiparyuk im deice an uminyak arye, sik morobikce ning ara kekepmince, melinamlyame. Winipmince sik moropmakikce touk melipminyopura, amutuku talye tikilyangan nang babye, winipminye deice arye, eipkikirye yuk mutuku binuka nyabikcopura, ninye mutuku-mutuku nirya, an siuk kel biknamake. Winibikirye, anti, ‘Se Allah ara weik mambule’ tenen, ilil unamake. Winibikirye anti sik babye ilil upliba, an mapu Israel nang arye an si erelamika atonun, yuk mutuku nang babye, wininamake. Tonda, an si erena ati, dopkise aik ara, ‘E Raja Salomo birye anyaik ara dobuka deiyok ara, talye ati kume. Ara, dipkoprob Allah el si erena ati dobuke,’ tenenamake. Winipnamak tenen ati moropkine.” Salomo birye nyabuka morobuk.
Nyabukce ayupu ton dukdongobuka nyabuk. “Ati ara, anggun adiparyuk Allah el si Yahweh ati, diba tenepmunce anggun kanye talima ap, nong ap, tuba Allah arenamlume. Winipmunye deice arye, elce ‘Aning ara wininamlume, aning ara ton kum wininamlume,’ nyapsilye yupu moubuka kekepmunce, talibuka unamlulume. ‘Ara, arup unmaluma atonun pia wininamlum’ tenen, nyapsine.” Raja Salomo birye sik Israel ninye nirya ati nyabuk.
Raja Hizkia engen dol-dol deice arye nyabukce, Allah ati morobuk, “Na ni Allah Yahweh, ance nati tenepnulume. Na nimalyap arye, kanye amu tam kibuka unirye, antibuk tuba talikunune. Yuk talye ning ati, si pia kum erelamse. Tonda, ance nyapdeipsulum yupu uk, moubuka talipsirye, an piluk akunum donune. Tonda, na ni Allah, yuk ning tenina kumce, an teneminye piluk, pia pi deibuka donune,” nyabuka morobukce, engenmok.
Winilamuka deice arye, elda Allah Yahweh, el tenen ning ton, kum talibuka pil dolamuk. Winilamuka deice arye, el apu yapu si erelamik Allah, el si Yahweh ara, Amon batakamukce, talye isa siuk erelamuk. Winilamukce, Allah Yahweh arye, “Aning ara, wininamlume, aning ara, pia kum wininamlume,” nyapdeiamuk yupu nirya ara, yanibuka kum dobolbalamukce, malyeuk winilamuk.
Yosia elda diksukumuk ulamuk. Ara, Allah el si Yahweh arye, ‘Aning ara wininamlulume, aning ara ton kum wininamlulume,’ nyapdeiamuk yupu nirya moubuka taleamuka ati, el ap, Allah ap, talima dukdongobuka ulamrik. Minop talak el apu koproba Raja Daud babye nimalye arye, Allah nyapdeiamuk yupu nirya talibuka ulamuk touk winilamuk. Winilamuka ati ara, winipmanto ara, ‘Kwanim tam binun do? Aning kum sirik tam binun do?’ tenena kum aryuk, pia noutam teleb bisikuk tuba balaminye touk, el winilamuk ning ara, diksukumuk winilamuk, malye ning ara, kume.
Ati wini talak ara, anggun nong ap, anggun kanye talima ap nirya arye, Allah Yahweh nun Israel nang melisulul Allah ati, pia pi dobuka, pribuka umunce, ‘Allah el yupu uk moubuka talipnamabe. Elce tenepsilye ninguk wininamabeʼ tenen, Allah damuk unamlume. Anggunce si erelulum Allah ati, ena uk unamlume. Winibuka umunyopura, adiparyuk deiyok koubuka, pia teleb lek sukum, Allah Yahweh el si eren aik donamlume. Winipmunyopura, minop talak Allah Yahweh arye, ‘Aning ara wininamlume, aning ara pia kum wininamlume nyapdeiamsukce, ayupu sekuka arebukba, Peti Perjanjian marikna pum tam deibik ning ap, tonda, el si eren aik pum tam pil don ning, pia teleb lek ning nirya ap ara, sik imam nang arye aning nirya boyanuka, Allah Yahweh el si eren aik noutam wekelbikirye, dipnamake. Anyasik dopnamluma ara, nun ni koproba Allah Yahweh, el si erena ati, dopnamlume. Raja Daud birye, sik Israel yala nang nirya ap, sik deiyok-deiyok nang ap ati, nyabuk.
Nyabukopura, ninye deiyoknye Raja Daud birye, ayupu ton dukdongobuka nyabuk. “Se, wini talak ara, na talibuka unun mutuku nang nirya ara, nun ni koproba Allah, el siuk erenyab nang, el mapu koproba ululum nang nirya ara, asukumuk Allah Yahweh arye dinmasilyak uk, bulupmunce el yupu kekebuka dinamlume. Ati, narye anggunti, pia dipkoprob moropsine. Ara, anggun ni koproba Allah Yahweh arye, “Aning ara wininamlume, aning ara pia kum wininamlume,” nyapdeiamsuk yupu ati, ‘Deiyok ani,’ tenen, pia moubuka tenimunce, kel bikinamlume. Tonda, ayupu moubuka talipmunce, dopbolbana uk unamlume. Ura, winipmunyopura, anggun ap, anggunce deilinamlum mapu nirya ap ara, pia ati, teleb mutuku noutamuk unamlume. Anggun dipmunyopura, anggun mapu koproba arye, amutuku tuba talinamake. Asukumuk ukirye anggunce deipmunyeba, dadeipdanin banamak mapu nirya babye, amutuku deiyok nang kibuka upnin bakirye pia, aunamake.
Amutuku noutam bulubuka delilamik nang nirya arye, aning-aning nirya, sikce boyanuka arelyangalamik ning elilamikce, sik talima noutam arye kanye delilamik. Deiyok ara, adeiyok-adeiyok nang nirya ara, sik kanye deice arye, ‘Nun ni Allah ati, akunuma weik ning talye arepnamabe,’ tenepnarye, Allah Yahweh ati arelamik. Aboyanuka arelamik ning nirya ara, yupa weik ulamik bukni, sik nirya ara, tonok kanye bona atouk kibuka, tonoknye una atouk kibuka, aning-aning weik tonun bulubukabikce neika uk arelyangalamik. Tonda, ninye deiyoknye Raja Daud, el babye pia kanye delilamuk.
Atalak ara, Yehuda tam ninye deiyoknye Raja Rehabeam ap, Yehuda mutuku noutam ulamikce, ninye deiyok kibuka ulamik nang ap, Mesir mutukunye birye, oplopsilyak tenen, Yerusalem mutuku noutam bulubuka tonokak yanuka ulamik. Winilamik talak ara, Allah el yupu lak nyalamuknye, el si nabi Semaya bira, sik anang dam yayukce nyabuk. “Allah el si Yahweh arye nyabuk yupu ara ani. ‘Anggunda adiparyuk nati kunum batakanulume. Winipnuluma ati ara, narye anggun babye bataknamsine. Winibuka bataksiniba, Mesir mutuku ninye deiyoknye Sisak birye opsilirye, anggun Yehuda tam ululum nang nirya talinamsile Allah arye nyapsile.” Nabi Semaya birye nyabukba kekebik.
Akunum wekuk ati, nabi Asarya birye, ‘Ninye deiyoknye Raja Asa abataknamneʼ tenen, biyuk. Biyukce nyabuk, “Se na deiyoknye Asa ap, Yehuda mutuku noutam unyak nang nirya ap, tonda Benyamin yala nang nirya ap ati, nyapsine! Moubuka kekeplulume! Allah Yahweh anggun dam usulule. Atonun, anggun babye el dam ululume. Ati, anggunce Allah Yahweh ati, El nyasilye yupu nirya adiparyuk moubuka dolonamabe, aninguk talinamabe ati, melipsilyame nyabuka moropmunyeura, elce anggun dam yanuka melisiliba, el ap neika unamlume. Bukni, anggunce elti, kum kekepmunyakarye, batakmunyeura, elce anggunti melina kumce, batakanamsile.
Moropkipyopura, nun ni anda im deice mutuku unmamince kekenamsilyame. Kekepsimince, nun malye un ning ati namin kipsimince, lyelonamsilyame. Na ni ance tukwak mutuku noutam unyak nang nirya ati, nun talima noutam ulye ning ara, an kel ati, teleb do, malye do, ninye arye sik yuk-yuk malye winilamice touk, tonda teleb ulamikce touk, ance yupu bokeipnamsilame. Na ni ancuk ninye ap, sikce deibikce nang ap, tukwak nang nirya, sik talima noutam ulye ning nirya diminyakarye, bikisilyame. Aning ara, ninye yuk nang arye ton kum winiptinge. Aning ara, ancuk winiptume, ati moropkine.
Tonda, nunda Raja Artasastane dam tuba ulamse talak ara, alye weik upnuka ati, ‘Narye Raja Artasastane ati, ‘Naio, ance an yin talin nang ap, tonda kuda basam bokuka, ninye olbana ati, yin talin nang ap, wipdeipsutumba, sikce nun bisik banamap talak ara, melibuka kaliksitinge,’ nyabuk,a kum moroptinye, tenepse. Deiyok ara, nunce Raja ati, mince akunum nyabupu. Nunce, ‘Kume, nun ni Allah arye, el yupu moubuka kekenyak nang ara, el kanye aryuk, pia teleb kibuka melisulule. Bukni, el yupu moubuka kum kekekirye, el ap batakakikirye, elti, yaninyak ninye ati, anang ara, yu weik upliba, ‘Sikda na like,’ teneplirye, el mikip weik deice arye, sikti, wenebuka oltakalule,” nyapse. Ati aning ara, yata wiribuka deice arye, Raja ati moroptinye do? Kume aning ara, kum winipmatinye.
Narye, malye winina kumce, pia diksukum winin ning ara, moubuka biknamne! Aning nirya, akunum winipnyopura, yuk nang arye, nati, ‘Elda malye winilul ning ara, ani-ani,’ nyabuka, malye kum nyapnitinge. Diksukum winin ning ara, moubuka biknamne bukni, dan talak arye, “Aning nirya ara, akunum bikamsa ati, nara pia diksukum wininune,” nyaptinye do? Na walwale. Na talima noutam ara, pia diksukum kanye uk teninamne. Na mapu silip ap, na tam nang ap, unamne noutam nirya ara, malye winina kumce, diksukumuk wininamne.
Ance, na kanye talima noutam ara, moubuka dipdenimince, tonda, lukunyan noutam babye, ‘El talima noutam ara, malye winin ning aupmal do, kum do?’ tenen, na kanye talima noutam moubuka dipdeniminyopura, ‘Aning ton aubukʼ tenen, eipnamnilame. Na kanye talima noutam ara, malye un ning ap, tonda, ‘Malye winin ning talibuka wininamne’ tenen, ning ton, pia kum eipnamnilame.
Bukni, sik kanye pum tam pia malye unyak nang arye, malye winin ning yuk-yuk nirya ara, na nio, ‘Ancuk aning nirya kum kipdeipsutum’ tenen, moropkine na nio. Malye wininyak nang ati, wenebuka kum kipdeipnalam bukni, ance, ‘Winipnamlume,’ nyapdeipsulum touk, dipkoprob ninguk wininyak nang ara, mikip kipdeipsiminba, pia aunamabe. Ara, anda ninye tukwak nang nirya ati, sik kanye tenen ning ap, sik talima noutam ulye ning nirya ara, moubuka dipdemince, ‘Teleb unyak do, kum do?’ tenen, pirisilyamnye bira, Allah an tonoka. Na ni Allah, ance nyapdeipsulum yupu nyasilye touk, ance pia diksukumuk ulyame. Malye winin ning ara, tonok babye, pia kum ukulule.
Allah Yahweh, elcuk, nun tukwak unyap nang yala-yala nirya ap, mutuku noutam unyak nang nirya ati, yupu lipsisikuka bokolina deiyoknye ulule. Ati, na ni Allah Yahweh, ancuk kintinipmince, na dipkoprobuk ulamse ning nirya ati, moubuka tenipdemince, ance nati, yupu lipsisikuka bokeipnamnilame. Tonda, na kanye talima noutam tenina deice arye, tilila yupu tonok ning babye kum nyalamse. Na kanye talima ara, dipkoprob uk unulula deice arye, aning dipdemince, na winilamse touk ubuka, yupu lipsisikuka bokeipnamnilame.
Allah el si Yahweh, elda mikip weiknye anya arye, na kanye talima el deice uk delinune. Elce Mesir mutuku noutamak arye nun dobuka lyepmasil ati, narye Allah el si erebuka kisal donune. Nun ni Allah ulula ati, kanye deibuka mot nyabuka si erenamne. Elda nun ni Allah el uka ulula ati, el si erenyabe. Elda nun apu yapu ati kalikuka pia meliamuka anya arye, elti, kisal dobuka el si erenyabe.
Nyabukopura, ayupu ton nyabuk. “Ura, bimince, Israel nang wisi-wisi nang, deiyok nang nirya bulubuka deipmince, nyapnamlyame. Nun apu yapu pununa ninye, Abraham ap, Isak ap, Yakub ap, kalikuka meliamukba, el si erelamik Allah Yahweh arye, na dam yayukce nyapnuk. Ura, sik Mesir mutuku ninye arye, ikin ning weik, anggun nong deice delilamsikba, mambul kanye bomlum ning ara, na tuba elinun anya arye, na kele.
Ninye arye talye tuku ap, keil ap palibuka doprobikirye, ‘Aning nirya noutamak ara, emas ap, perak ap, tabakuka aupmal do?’ tenen, weik uku dinmalyak dongobikiba, uku arye dinmalya ani, malye ning palilamlya ning nirya diplirye, kat ning pia teleb ning batakliba, emas ap, perak ap, nong uk lakak upliba dolonyake. Winilamaka deice, ninye arye emas ap, perak ap ara, uku deice arye, winilinyake. Bukni, ninye tukwak mutuku unyak ninye nirya, sik kanye talima noutamak ulul ning ara, Allah Yahweh arye asipdenamle. ‘Teleb ning ara ani, malye ning ara ani,’ teneplirye lakak uk deipnamsile.
Yata pil do nirya, dopmunyopura, Allah ati moropmunce donamlume. Tonda, yata wirin ning do nirya, ‘Allah melisilya deice aryuk apil donamabe,’ tenenamlume. Tonda, ‘Allah el si erena ati, apil donamabe,’ tenebuka unamlulume. Allah ati, si eremunyopura, elce, “Pia diksukum un bisik ara, ani,” nyabuka peterenamsile. Winipsilirye, anggun wininamlum ning nirya ara, telebuk ulinamsile.
Winibuka ulamse talak ara, na ni birye pia moubuka peterelamnuke. Na ni birye, pia moubuka peterelamnuk yupu ara, ani. Narye anti, nyakinye yupu ara, moubuka kekepmince, kanye talima pum tam deibuka, teninauk unamlame. Tonda, ance na nyakinye yupu nirya ara, tonok ning babye, pia kum luba kinamlyame. Narye anti, “Aning ara wininamlame,” nyabuka nyamkise yupu ara, ninye taruk deice arye, ‘Na tenen ning’ tenen, talibuka bolamak ning atonun, tenebuka unamlame. Winipminyopura, an pia kam unamlame.
Allah ati morobukce nyabuk. “Se, na ni Allah Yahweh, nara, ance nyapdeiamnulum touk ubuka unirye, batakana kumce, pia an piluk weik donirye, ance, ‘Aning ara, diksukum un ning ani,’ tenelyam ning ara, teleb un ninguk wininun ning ara, akunum kel biknulum ning ara, luba kina kum bukni, tuba teninauk unamnilamʼ tenen, moropkine,” nyabuka, malye kanye bobuka, pia engena weik deice arye, Allah ati morobuk.
Na yupu ara duknubuka kum nyanune. Tonda kunuknak arye duknubuka kum nyanune. Tonda na wiamse ninye Israel ninye ati, ‘Talya urdemuk dibuka banamak’ tenen, kum nyanune. Nara, dipkoprob Allah Yahweh ununa anya arye, ‘Diksukum koprop uk teleb kibuka unamak’ tenen, dipkoprob yupu uk nyalinune.” Allah arye nyabuk.
Nyalamikba, akunum bikseura, narye Allah ati moropse. “Na ni Allah Yahweh anda, im deice yin talin malaikat nirya ara, sik deiyoknye ulyama ati, anda mikip weiknye ulyame. Na bikse, anda yupu bokolina deiyoknye umince, ninye tukwak nang ati, diksukumuk yupu bokuka nyalilyame. Ancuk, nun tukwak nang, kanye talima noutam tenenyap ning babye, tukwak arye eibuka bikiselyame. Ati na nio, sikce nati, ‘Anye opnamap,’ nyanyak ning nirya ara, dobuka an deiceuk deipkine. Ati ara, ance tenepnimince, ‘Sik anang deice menenga dobuka, deipnalam ning ara, na ton eipnirye, biktinyeʼ tenen, moropkine.
Bukni, na Allah Yahweh aryuk, ninye sik talima pum ulul ning ap, ninye arye teninyak ning ap ara, tukwak arye eibuka bikne ning ara, narye sikti, ‘Teleb wininamak do, malyeuk wininamak do?’ tenen, sik nirya ati winilenune. Narye tukwak nang nirya ati, tonok-tonok nang arye, sik wininyak ning, dawinilamiceba, nong akunum uplyopura, narye eipnyopura, sik winilamikiba, duk mouplyopura, narye sikti, kwang dakanune. Ara, narye sik winilamice touk, deken ning arenune.
Allah Yahweh, anda mikip weiknye ulyame. Anda aning-aning ap, im deice yin talin malaikat nirya ap, sik weik deiyoknye ulyama anya arye, ance diksukumuk ubuka, wininyak ninye ati ara, ‘Dipkoprop teleb wininyak do, kum do?’ tenen, asildelyame. Ara, Allah ance, ninye nirya, sik kanye talima noutamak ulul ning ap, sik kanye noutamak tenenyak ning nirya ara, ance moubuka bikisilyame. Ati, na yu teneninyak ninye ara, ance wenen ning arepminba, ‘Na ton eiptinye’ tenen, moropkine. Aning ati ara, na wininun ning ap, na kam una ap nirya ara, ‘Na ni Allah, elcuk kalikuka melinamnil’ tenen, an deiceuk lobuka deipkine.
Yosia birye, yuk nang ati ara, teleb kililamukce, elce imun kanye bolamik nang ap, bona utotoa kum nang ap ati, aning-aning kum talilamik nang ap ati, teleb kibuka melilamukce, yupu lipsisikin talak ara, sik bona utotoa kum nang ati, elce teleb kililamuk. Ati ara, el winilamuk ning nirya ara, nong telebuk winilamuk. Ati, an babye, bita tenipdelyame. Na Allah ati, diba tenebuka, nati dipkoprob bikininyak nang ara, dipkoprob ninguk wininyakce, yuk ikin unyak nang ap, daunyak nang nirya ati, telebuk kilinyake. Sikce yuk nang ati, tilila yupu nyabuka, ikin ning sik nong deice kum delinyake.
Narye sikti, kanye talima winiryuk ning arepninyeba, sikce na Allah ati, ‘E, nun ni Allah, elda dipkoprob Yahweh, el ukaʼ tenen, moubuka biknamake. Winibikceura, sikda na mapu koproba unamake. Tonda, nara sik ni koproba Allah unamne. Winipyeba, sik malye wininyak ning nirya, batakikcak arye, sik kanye talima nirya ara, dobuka, na deiceuk deibikirye, na siuk erenamniake.
Ara, anggunce nati, diba tenebuka, anggun kanye talima nirya, na deiceuk deibuka moropnumunyopura, anggun moropmunye ning ati melinamsine. Anggunce, nati, Se, nun ni koproba Allah, dan sukum ulul do? Elce nyapnamsil yupu ara, moubuka kekebibirye, biktibyeʼ tenen, pia pataplyeba, epnumunyopura, dipkoprob neika unamabe. Kanye talima telintona kumce, dipkoprob epnumunyopura, eipnamnulume. Na Allah Yahweh arye nyapsine.
Dipkoprob nyapsine. Dipkoprob epnumunyopura, narye anggunti, lo arepsinyeba, na unye ning eibuka biknamlume. Tonda, wini talak ara, anggun ikin weik ululum bukni, aminyan talak ara, narye anggun tamubuka pia teleb kipdeipnamsine. Tonda, wini talak ara, anggun malye winilamlum ning wenena ati, akunum bataksisirye, donoksiseba, yuk-yuk mutuku, dana-dana tam ulamikce nang yuk-yuk yala nang kan-kan, dabinuka winilamunya babye, aminyan talak, narye anggun boyanuka, anggun mutuku koproba, tonap tamubuka boyanuka deipnamsine. Ayupu ara, na Allah Yahweh arye akunum nyapmasina ati, aning ara dipkoprob kunupnamle!
Atalak arye dipdongobuka doyanamle talak ara, tonoknye birye, el kwit yuknye biti, ‘Anda Allah si kel biknalame,’ nyabuka, peterelamik atonun, tuba kum wininamake. Ara, weik nang babye, mitik nang babye, na siuk akunum kel bikikirye, ‘Nun ni koproba,’ nyabuka, na damuk unamake. Ara, urdem ati kum bukni, deiyok ara, sik malye winilamice ning babye, narye pia kum kipdeipnamne. Aning nirya ara, kilipnirye, kum kipdeipnyopura, tuba tamubuka tonap, sik malye winin ning nirya kum tenepnamne. Ayupu ara, na Allah Yahweh arye, akunum nyapsine ati, dipkoprob nong upnamle,” Allah arye nyabuk.
Aning kum bukni, yata nang do nirya, sikce ‘E, mambul weik ning ani, mambul weiknye bira ani,’ tenenamak talak ara, sikce anyapnusin ninguk tenenamake. Tonda, tukwak mutuku, talye daulye ning nirya ati, ‘Aning ara, mambule,’ pia kum tenenamlume. Aning nirya kum bukni, anggunce na Allah Yahweh ati, diba tenepnulumce, na ap, na wininye ning ap, moubuka biknamnulum nang ara, angguncuk, ‘E, mambul weik ning ara, Allah Yahweh el uka,’ tenepmunce, aning deice aryuk, kanye pia delinamlume. Ara, anggunce na Allah ati, “E, Allah arye bico tenesilirye, elce, ‘Aning ara wininamlume, winipmunyopura, narye melisinirye, pia teleb kipdeipnamsine,’ nyabuka, nyalin yupu deice arye nyapdeipsuka deice arye, teleb kibuka melisulule. Elce winilye ning nirya ara, diksukum una ap, teleb ning winin deice aryuk, ninye yupu lipsisikuka bokosilirye, tuba-tuba melisulule,” nyaptingce, na si erepnitinge. Nara Allah Yahweh arye, anggunti pia bico tenesinirye, pia kum batakasunune. Narye, anggun tukwak mutuku sirya, im sirya nirya ululum nang ati, melisinye ning nirya ara, bico tenena ap, dip yupu nyana ap, malye winin ning pia kumce, diksukum winin deice arye melisunune. Tonda, na Allah arye, ateleb winin ning nirya ap, ‘Diksukum winin ning nirya ap ara, telebe uka’ tenen, na kanye delinune. Aning ara, na si Allah Yahweh arye ayupu nyapsine, nyabuk.
Nyapnukura, adiparyuk Allah Yahweh, el Pia Teleb, Lek Dip Kanye ara, na dam wekuka langdipbukce, na nong talibuka melipnukba, Allah arye nyamnuk yupu kekepse. Allah Yahweh arye nyamnuk yupu ara, ani. Nara, Allah Yahweh ununa ati, anggunda na mapu Israel yala nang ululume. Anggun nirya arye, anggun kanye talima noutam tenelulum ning nirya babye, na akunum moubuka bikisunune. Anggunce, ‘Kume, Yerusalem mutuku noutam, akunum yanuka unmaba ati, aminyan talak ara, ikin ning ton ap, nun dam kum yanamsile,’ tenelulum bukni, na Allah arye dipkoprob yupu nyapnusine. Ara, ani.
Nara Allah, na si Yahweh, aning-aning nirya talibuka, deice tam erebuka, Pia Mikip Weik Ununye birye nyapkine. An Gog biti nyapkine. Na Allah arye tenyamse talak akunum uplyopura, Gog anda, an talima noutam arye, yu weik tenipmince, ‘Aning pia malye un ning ara winipnune,’ tenipmince kintinipnamlam ning ara, pia malye ning tenibuka kintinipnamlame.
Allah el si Yahweh arye, nabi Hosea biti laka nyabukba, Hosea birye sekuk. Se, anggun Israel ninye ara, Allah Yahweh arye nyalisilye ninguk, moubuka kekepnululume. Nun amutuku ninye malye wininyap ning ara, Allah elcuk kel bikisilirye, nyasulule. Allah arye nyapdeibuk yupu ara, nun ton moubuka kum kekenyaba ati ara, kum dobolbanyaba ati, Allah el winilye ning kum bikinyabe. Tuba walwal ninyeuk unyabe. Tonda, nunce yuk nang ap, teleb kibuka neika kum unyabe. Bico kum tenelamyap deice arye, amutuku unyap ninye ara, nun min arye domupu kilapu ara, deiyok kum uamuk bukni, nun talye kanye bobuka, akilapu batakibirye, yuk kilapu dolonyabe. Tonda, Allah ap, el winilul ning ap ati, moubuka kum bikinyabe.
Na Allah arye, wipdeiamse ninye, na mapu koprop Israel ninye ara, wenebuka opnamne deiyok ara, ani. Sikce na Allah wininye ning ap, na nyasinye yupu ap, na si ap kel bikna kum atia. Israel ninye arye nati, walwal tuba unyaka deiyok ara, sik iman-imam nang atia. Anggunda, na si erenyak aik pum tam, pil dona deiyok nang ululum bukni, anggunce, na wininye ning nirya kel bikna ati, ‘Aning ara, nun like’ tenen, ‘Like,’ tenebuka ululuma ati, sik Israel ninye elisinyakce, ‘Nabi nang arye, malye winilyak touk, nun babye malyeuk wininamabe’ tenen, sik babye malyeuk wininyake. Ati ara, narye anggun imam-iman nang nirya ati, ‘Sikda, na si eren aik pum tam, pil dona deiyok nang dipkoprob kum unyake,’ tenesinirye, anggunti akunum bataknamsine.
Ura, bol koplobuka pia kam una ara, talye winina kum bukni, ara na areamnulum ninye ap, an ap, ance dopdeipnulumnye Yesus Kristus ap, nun nirya talima dukdongobuka neika una ati nyapne. Aninye nirya arye, nunti diba tenepsikirye, nun bitinye ap, aninye ap, talima dukdongobuka neika ubibya deice arye, pia kam unamake.
Aminyan ara, Yesus like winilye ning arye Peterus ati asipdeyuk. “Wisinye Yohanes arye deipkuk mi, anda Simon Peteruso, dipkoprop kanye delinilyam do?” nyabuka asipdeyuk. Asipdeyukura, Peterus arye, ‘Se, like winilye ning arye, tuba tamubuka tonap aninguk asipdenmanile’ tenen, bouku sukubuk. Mambul kanye bobukce, Yesus ati tamubuka nyabuk. “Naio, anda aning-aning nirya kel bikinanye ulyama anya arye, adinmanilama arye, moubuka kel bikmanilame. Narye anti kanye delikunune,” nyabuk. Peterus arye nyabukba, Yesus arye tamubuka nyabuk. “Ati, na bico tenenun domba ati, sik din arenamlyame,” nyabuka domon yupu deice nyabuk.
Anggunce Allah ati dipkoprop kum kel kilulumce, el ap talima dukdongobuka kum ululum bukni, nara Allah dipkoprop kelnye unune. Nun neika unyame. Narye, “Allah na walwale, min kum kel kipne,” nyaptinya babye, ayupu dipkoprop kum uptu. Ayupu nyapnyopura, anggunda tilila yupu nyaninye ulalum tonun uptinye. Bukni, ayupu kum nyanamne. Allah ara na dipkoprop bikinune. El yupu nirya talibuka pia diksukumuk unune.
Na talye banye talak ara, anggun allah-allah si erelulum ning ap, allah-allah si erelulum mem aik ap, tonok ning ara, keil pala yangabuka deiplum akarye, anggun allah-allah si erena ati, kam ning obuka arimunyak ara, eipmase. Allah arena ati, keil pala deice arye sekeiplum yupu ara, eipse. ‘Nun kel kum kinyap Allah si erena ati deipmabe,’ nyabuka sekdeiplum yupu ara, na akunum eipse. Aning ati, el dipkoprop kum kel kiplum bukni, walwal arye elti, kibuka talye si erelulum Allah ara, winira laka nyapnusine.
Anango, anggun kan-kan arye, ton ninye ara, Allah el winilul ning ap, el yupu ap ati, moubuka min kum kel bikamikce, walwal ninyeuk tuba unyake. Aning ati, anggun Korintus mutuku ninye ara, anggun kanye walwal kipsukba, talye-talye ninguk tenepnin banmalumce, malye weik ululum bukni, pia teleb ning ara, anggun adiparyuk aning nirya batakuka, tuba tamubuka kanye moubuka unamlume. Anggun malye winilulum ning nirya batakuka diksukumuk unamlume. Ayupu nyapmasina nirya ara, ‘Kekepmunyopura, se tenen, alye dakdanamak’ tenen, na Paulus arye, nyapsine.
Allah arye, “Kuna noutamak arye, dirina unamle,” nyabuk. Ayupu nyabuknye Allah, elcuk nunti pia mambul ning arepsuke. Ara, nun kanye talima noutamak, el dirina ning arepsuka deice arye, Allah el pia teleb ulul ning ap, pia teleb winilul ning ap ara, bikinyabe. Allah el pia teleb ulula ara, Yesus Kristus el winilamuk ning kel kibibya deice arye, laka usilibuk, bikinyabe.
Ara, nun kanye talima noutamak ara, ‘Se, bona utoto talina kum nang melina ati, aning-aning bulubuka areptibye’ tenen, patana weik awabsilyopura, Allah el kanye ara, ‘Kume, anggunce auplye ning talibuka ulamak touk, arena ababye telebe. Bona weik talinyak nang arye, weik arye arenamake. Aning atouk mitika aryuk talinyak nang ara, mitika aryuk arenamake. Sik dipkoprop kum uplye ning kum arepmanto anya arye, aning ara, kum nukuka tenipnune,’ tenesulule. Ati, ‘Anggunda auplye ning taliplum atonun, bona utotowa talina kum ninye melina ati, bokuka arepnamlum’ tenen, nyapmasine.
Ayupu nyapmasin touk, ninye nirya ara, sik talima noutamak arye, ‘Winibuka arepnamne,’ tenebikce touk, yuk ninye melina ati, bokuka arenamake. Kanye bokoltoliba, ‘Arepnun do, kum do?’ tenena ap, yuk nang arye anggunti, “Sik adiparyuk areplulume,” nyapsikce ning ap, deice arye arena kume. Sik kanye deibuka pin-pin asa arye arenyak ninye ati, Allah arye, kanye deilisulula ati, nyapsine.
Musa birye, Israel ninye ati nyabuk. Ura, Israel ninye kanye lamapdongobuka ulamunce, ayupu uk moubuka tenepmunce, wininamlulume. Amapo, Allah el si Yahweh arye anggunti, ‘Wininamlulume,’ nyabuka, nyalisulul yupu ara, ani. Ara, anggunce, Allah el si Yahweh ati, ‘Elda pia mambule,’ tenebuka kipmunce, el si diamuk erenamlulume. Ubuka winipmunyopura, Allah arye, ‘Wininamlulume. Teleb bisik ani,’ nyasilye ninguk kekebuka, abisikuk banamlulume. Tonda, elti, anggun kanye talima ap, anggun nong ap, el deiceuk deilinamlulume. Winipmunce, Allah yupu aik wekuka, el yupu kekebuka, dobolbanamlume. Ara, anggun kanye taliama ap, anggun nong ap, anggun wininamlum ning nirya ap, unamlum ning nirya ap arye, Allah ati arepnamlume. El piluk dopmunce, el amu tamuk, bunamlulume.
Nyabukce ayupu ton nyabuk. “Wini talak ara, weika arye weik mambul ning ap, ikin ning ap, tuba sik deice upliba, sik kanye imun unamle talak ara, winipliba, anyapnusin mot yupu ara, sikti, wenen yupu ning upnamle. Aning deiyok ara, amot nyapnusin ning ara, sekuka arepminyopura, sik deipkirik dabanamak mapu nirya kel kibikirye, amot sepdanin banamake. Aminyan talak babye, pia luba kum kipnamaka atia. Aminyan talak ikin ning weika arye, sik nong deice akunum uplyopura, amot yupu uk, sik tuba tonap tenenamake. Sik min kum winipmakce talak bukni, sik winipnamak ning ara, na akunum kele. Ara, narye, anggun apu yapu nang ati, ‘Na si deice arye nyapsine. Apia teleb mutuku arepnamsine,’ nyapdeiamse yupu, amutuku min kum bobinamsin talak ara, sik aminyan talak malye winipnamaka ara, na akunum kele.” Allah arye Musa ap, Yosua ap ati, nyabuk.
Tonda, Allah arye minop talak, el mikip deice arye winipra yangalamuk ning nirya babye, wini talak winilul ning nirya, yupu nyasilye ning nirya deice arye, akunum laka nyamsukce, tuba nyasulule. Ara, ‘Nun ni koproba Allah, el si ara Yahweh, el tonok ulule. Yuk Allah ton pia kume. Yuk Allah ton kum unyake, el uka,’ tenepmunce, ‘Kel kinamlulumeʼ tenen, mambul pil weik dolamsuke.
Aning ati ara, na kayapo, Allah arye nun diba tenenyap ninye talibuka, weik Ninye Deiyoknye unamsila nirya ap, elce arisiliba, talibuka unamap ning nirya ap ara, luluktuba, kum kum uptua anya arye, nun nirya arye Allah ati tuba-tuba, “Telebe,” nyabuka unamabe. Tonda, Allah arye, ‘Aning telebe,’ tenesilye touk, ‘Se, Allah ara weik mambule’ tenen, elti, ilil usiliba, el siuk pia erenamabe. Nun ni Allah ati, ‘Telebe,’ nyabuka, el siuk erebibyopura, Allah arye nunti kanye delinamsile. ‘Allah ati, ilil unamsile,’ nyapmasin yupu ara, talye ati kum nyapsine.
Yata ning do nirya, Allah arye kintinipdeiyamuk ning nirya ara, pia kum duknupmanto. Allah arye aning-aning nirya ati, pia dilule. Baju arye singipdongopmakce ning auplyeba, abaju dopdobikcopura, laka ulamle touk, Allah arye aning-aning nirya lak akuk dilule. Aning-aning nirya dilinye Allah ati, nun wininyap ning nirya laka nyabibyeba, elce kekebuka dipdesilirye, “Aning teleb, aning malye,” nyabuka, yupu lipsisikuka bokeipnamsile. Nun wininyap ning nirya ati, Allah el dam laka nyabibyeba, dipdesilirye, yupu lipsisikuka bokeipnamsile. Tonok ning babye kum duknuptibye.
Domba basam weina deiyok nang arye, sik domba basam ati bico tenebuka, teleb ubuka weilamak touk, anggun babye, Allah el mapu sik amutamak unyak ninye ati, bico tenebuka nimalye arye melinamlulume. Ara, sik amutamak unyak ninye ati, ‘Sik kanye malye ubicak’ tenen, melipmunce, ‘Kalikuka dilanamlulum’ tenen, nyapsine. Wininamluma ara, ‘Na lik,’ tenenun bukni, ‘Allah arye pia pi donilya ati, wininamne,’ tenena kume. Aning kum bukni, Allah arye, ‘Na mapu melina ati teniltona kum arye, kanye deibuka melinamak’ tenen, ‘Patalul ak tenesilye touk wininamlum’ tenen, nyapsine. Tonda, ‘Yo bok weik arepsiting ak, teleb ubuka utibye,’ tenena kum arye, kanye deibuka talye luba kibuka melilanamlulume.
Akil arye deiyamuk mapu nirya ara oplopnamne. Winipniba, amutuku-amutuku diba tenenyak ninye nirya arye, moubuka kel kipnamake. Ara, ‘Se, ninye kanye tenen ning ap, ninye talima pum tam usilye ning nirya ap ara, elce kel kisulule. Nun nirya arye ulamap touk, yupu bokeipsilirye, wenesulule,’ tenebikirye, kel kipnamake.
Ilil una kume. Dipkoprop anggunda, malye un ning weika arye, akunum winilamlum bukni, wini talak ara, aning nirya batakuka, telebuk unamlulume. Ara, anggun ni Allah, el si Yahweh ati, batakna kum arye, el siuk erenamlulume. Anggun kanye talima nirya, Yahweh deice uk deipmunce, el amu tamuk ubuka, el yupu uk, moubuka kekepmunce, dobolbanamlume.
Utenebuk bukni, Allah el si Yahweh arye tamubuka, Samuel biti nyabuk. “Ancuk eipmince, ‘Anye bira, el urasin teleb, el nong ara, cang weik ati, pia telebnye ulule,’ tenebuka, wibuka erelina kume. Narye, anye akunum batakmana ati, kum wipdeipnune. Deiyok ara, nyapnukine. Ara, na Allah arye, ninye nong ap, sik urasin ap, eipnirye kum erelinune. Ninye arye, nong bol deice ning eibikirye, ‘Aning mambule, anye bira telebe,’ tenelamaka atonun, kum tenenune. Tonda, ninye arye urasin ara, elilalulum bukni, nara Allah, na Yahweh arye, anggun talima pum tam moubuka elisunune,” nyabuk.
ကြော်ငြာတွေ