Boyayikopura, Raja Salomo birye urasin teleb yo cendana doprobukce, Allah el si Yahweh, el si eren aik pum tam bukni, weik ayukumna yo atonun ning deibuk. Tonda, el un aik pum tam ton deibuk. Tonda, ayo cakukabikce, teleb bung-bung nyan ning el si kecapi ap, gambus ap, kintinip deibik. Atalak aurasin teleb yo ara pia weik, kum nukmanto boyayik. Atalak anerye, anoutam talak ap, wini talak ap babye, ayo weik arye, boyayik atonun ning ton mince kum boyangalamik. Pia weik ning ara, atalak uka.
1 Tawarikh 25:1 - Eipomek1 Ura, ninye deiyoknye Raja Daud ap, sik Lewi yala nang ninye deiyok nang nirya ap, ‘Aning ara Allah si eren talak mot nyana ap, alat-alat musik kintinina ati aning, apil talibuka unamakʼ tenen, ninye ton wipdeibik. Ara, Asaf elce deiamuk nang kan-kan ap, Heman elce deiamuk nang kan-kan ap, tonda Yedutun elce deiamuk nang kan-kan ap, wipdeibikba, anang ara Allah arye nyapdeiamuk yupu weken talak pil deiyok kouna ap, tonda mot nyan talak alat-alat musik el si ara, kecapi ap, gambus ap, simbal ap, nyanmeka deice arye, Allah el si erelamik. Awipdeibik nang arye, apil talibuka dolamik. Allah yupu weken talak deiyok kouna ati ara, yupa yuk-yuk wipdeibuk nang ara, sik si ani. အခန်းကိုကြည့်ပါ။ |
1 Tawarikh 25:1
46 ပူးပေါင်းရင်းမြစ်များ
Ati ara, wini talak ara, mot nyan ning, el si kecapi, musik weik kel bikuknye boyanululume. Boyamunyeba, anye el mot nyan ning, kecapi nyanamal talak ara, Allah Yahweh arye nyapnutue,” nyabuk. Nyabukura, mot nyan ning, el si kecapi, boyanuka deibikba, aning onmok talak ara, Allah Yahweh, el mikip weik arebukba, Elisa el kanye pum tam wekukce, mikip kibuk.
Banmarikopura, sik Daud ap, elce taleamukba, el ap neika amutuku yayik nang, sik Israel yala nang ap ara, mikip weik arye, kanye pia deipmek. Awinipmeka deiyok ara, ‘Se, amambul ning dobuka, nun mutuku deiyok noutam arye deipnamapʼ tenen, weik teleb kanye deibikce, Allah el si erebuka kina ati, mot nyanmek. Mot nyabuka yanganmek talak ara, bung-bung obuka, weika arye nyanmek. Aning ara, ani. Ara, kecapi ap, rebana ap, ceracap, el si ton simbal ap, tonda terompet ap, weik lelim nyanmekce, Allah el si eremekce, mot nyanmek.
Winipmekce banmeka ani, Daud ap, el mapu koproba ap, el mapsilip sik Israel yala nang nirya ap, kanye pia deipmekce, bung-bung ana ning, el si terompet ap, pereng nyan ning, el si Nafiri ap, weik lelim nyan ning simbal ap, tonda gitar ato ning kecapi ap, gambus ap, bobuka nyanmeka ani, mot nyapra banmeka ani, Yerusalem mutuku welebiyik. Abanmek talak ara, Allah arye yupu nyapdeibukba, Musa birye sekekuka, Peti Perjanjian yo marikna pum tam deiamuk ning bopmekce, banmeka ani, el ninye deiyoknye Raja Daud birye domuk aik dam bobiyik.
Asaf elce deiamuk nang dumbarye ara Zakur ap, Yusuf ap, Netanya ap, tonda Asarela ap deiamuk nang wipdeibik. Anang sik deiyok kina deiyoknye bira, Asaf ulamuk. Tonda, Raja Daud bira, “Allah elce, ‘Winamlulume,’ nyapdeiamuk yupu yanuka nyanamlanye bira, Asaf birye nyanamle,” nyabuka ati, apil ton dobuka, Asaf arebikura, elce aning talibuka pil dolamuk.
Aning atonun, el kwit Yedutun, elce deiamuk nang kan-kan ara, nakub barye, deiamuk nang wipdeibik nang ara, sik si ani. Ara, Gedalya ap, Zeri ap, Yesaya ap, Simei ap, Hasabia ap, tonda Matica ap, ‘Sik nirya apil talibuka donamakʼ tenen, wipdeibik. Anang sik deiyoknye bira, sik ni koproba Yedutun ulamuk. Tonda, elcuk, Allah arye nyapdeiamuk yupu ara laka nyalamukce, el mot nyan ning kecapi deice arye, Allah mot nyalamukce Allah el si erelamuk. Awinlamuk talak aryuk, Allah Yahweh ati, “Na nio, anda pia telebuk ulyame. Ance melipnamsilam ning nirya ara, pia teleb nyapkiyabe,” nyabuka, Allah el si erelamuk. El mapu ara, el amu tam ulamik bukni, sik anang babye, yupu deice arye nyalamik mot ap, mot nyan ning, el si ara alat musik kecapi ap, gambus ap, simbal ap nyaman deice arye, Allah el si erelamik.
Undi dopmeka deice arye, sik anang yupa weik 288 nang nirya ara, yupa yuk-yuk wipdeibikba, sik 24 nanguk sik yuk-yuk aulamik touk, yuk-yuk bokdeibik. Ayupa wipdeibik nang nirya ara, tonoknye birye deiyok kipdeibikce, el yala nang ara dua belas (12) nang obarye kipdeibik. Aning ara yuk-yuk nukuka kintinip deibikce, yupa yuk ninye deiyok kibik nang ara, abuku outam aupmale. Ara ani. Min yuma ara, Asaf el yala kan-kan arye, undi dobika deice arye, ‘Mot nyan pil donamak nangʼ tenen, wipdeibik. Min yuma wibiknye bira, Yusuf ulamuk. Elce deiyok kouamuka ani, el amu tam ara, el kayapu koproba arye, dua belas (12) nang ton wipdeibik. Anerye, undi kedua dopmeka deice, sikce wipdeibiknye bira, Gedalya ulamuk. Elce deiyok kouamuk bukni, el amu tam ara, el kayapu koproba arye, dua belas (12) nang ton wipdeibik.
Allah el si eren aik, mot nyana ati lo areamik nang, sikce deibikura, dadeipdanin binamik nang, sik si ara ani. Sik anang nirya ara, Kehat yala nang ulamik. Ayala nang arye deiamik nye, el si Yoel bira, elce deibuknye Heman birye mot nyalamuk. Heman el li koproba ara, Yoel ulamuk. Yoel el li koproba ara, Samuel ulamuk.
Asaf bira, Allah el si eren aik noutam mot nyan nang, sik deiyoknye ara, bulinanye bukni, deiyok bitinye anye ulamuk. Mot nyana bulubuka kina nye, Yoel el mi Heman, el melinanye bira Asaf ulamuk. El ap, el melibuka mot nyalamik nang ap ara, Heman el sirik tam tiklamikce, mot nyalamik. Asaf el li koproba ara, Berekya ulamuk. Berekya el li koproba ara, Simea ulamuk.
Ura, mot nyana deiyoknye Heman, el kwanim tam tiklamukce, mot nyalamuknye bira, Etan ulamuk. Etan bira, Allah el si eren aik pum tam mot nyana ati yupa ara, deiyok winilyenye ulamuk. Elda, Merari birye deibukba, deipdanin yangalamik nang arye deiamiknye ulamuk. Asukum mot nyan nang ati, sik deiyoknye Etan, el li koproba ara, Kisi ulamuk. Kisi el li koproba ara, Abdi ulamuk. Abdi el li koproba ara, Maluk ulamuk.
Tonda, Lewi yala nanguk wilipdopnarye, ton tam nang ara, Allah el si eren aik noutam arye, mitik-mitik aik wilibuka domik ning ara, anang arye aik malamik. Deiyok ara ani. Ara, anang ara, Allah si eren ati, Allah yupu mot nyana deiyok nang wipdeiamikba, ayala nang arye mot nyalamik. Ara keting noutam ap, lukunyan ap, atalak-atalak nirya ara, sik anang adiparyuk bulubuka, mot nyalamik. Sik anang nirya ara, Allah el si eren aik noutam, weik cang aik domika pum tamuk ulamik. Anang ati ara, yuk pil ton kum areamik. Sik nirya ara, anyasik koproba noutamuk ulamikce, mot nyalamik.
Akil Atalye birye, Yehuda tam taleamuka ani, keting tamun tekbarye (7) akunum kibukura, imam Yoyada birye, ‘'Yoas erepdeibipnyeura, Raja kipnamsile,’ tenebukce, pin-pin ubuka deice arye, mikip kibukce, ‘Aning ara winiptinye,’ tenebukce, Yoyada birye, yin talina deiyok nang, pamubarye nang ati, ‘Winipnamabe,’ nyabuka nyalin yupu deice arye, kintinibik. Ayin talin nang ara, sik amu tam, yin nang ton, seratus (100) nang taleamikce, yupu nyalamik. Ayin talin deiyok nang ara, kung yuk-yuk ulamik. Ati, imam Yoyada ap, yin talin deiyok nang ap, kanye tonok bobuka, yupu tabik nang, sik si ara ani. Ara, Yoreham el mi Asarya ap, Yohanan el mi Ismael ap, Obed el mi Asarya ap, Adaya el mi Maaseya ap, tonda Zikri el mi Elisapat ap, sik nirya ap, Yoyada ap arye, ‘Yo aning ara, winipnamabe,’ nyabuka, nyalin yupu deice arye nyadayik.
Biyukopura, dilamukak, Raja winiryuk wipdeibiknye Yoas bira, Allah el aik noutam wekelyangalamik bisik bublan dam, weik ayukumna yo dam tikmukak eibuk. El atikmuka dana-dana tam nirya ara, sik yin nang yupa yuk-yuk deiyok kibuka ulamik deiyok yin nang ap, lelim len ning terompet bolamik nang ap, sikcuk Raja warikdongobuka tikmek. Tonda, Raja si eren ati, amutuku noutam ulamikce, apil dolamik nang ara, anyaik dam bulubuka wekmek nang nirya ara, kanye weik deipmekce, terompet bobuka, si arye pulunmekce, si erenmek. Tonda, kanye delina mot sena deiyok nang arye, bung-bung an ning ap, alat-alat musik yuk yala nirya ap, bopmekba mot senmekce, weik yupu deice arye si erenmek. Atalak ara, Atalye binuka eibukce, el kanye pia malye ubuka ati, el kenekmuk baju adiparyuk kwilikuka batakukce, mikip yupu arye nyabuk. “Se, Se, dipkoprob na tonok arye amutuku talebuka, ninye deiyok kil unun ati, anggunce awinipmaluma deice arye, na yanipmanulume,” nyabuka, weik yupu arye malye nyabuk.
Obikopura, imam Yoyada birye, Allah Yahweh si eren aik kalikna ati, “Sik imam-imam nang ap, Lewi yala nang ap, sikcuk anyaik kalekuka unamake,” nyabuk. Ara, min talak Daud birye, Allah si eren aik pil talebuka dona ati, imam-imam nang ap, Lewi yala nang ap, sikti, pil yuk-yuk dobuka deibukura, talebuka dolamik touk, ‘Wini talak babye atouk pil dobuka unamakʼ tenen, Yoyada birye anang wipdeibuk. Sik anang arye, Allah si eren ati, kam ning obuka uku dongona ati pil dopnuceura, “Musa birye, ‘Winibuka-winibuka wininamlume,’ nyabuka sekeiamuk touk wininamake,” nyabuk. Tonda, “Sik anang kanye teleb deice arye mot senmakirye, apil donamake,” nyapdeibuk. Ara, min talak Daud birye wibuka deiamuk touk, Yoyada babye, atouk winibuk.
Unmek talak noutam ara, imam Yoyada birye, sik yin nang yupa yuk-yuk ati, deiyok kibuka taleamik nang, sik amu tam seratus (100) yin nang taleamik deiyok nang ati ara, ninye olan talak ning ton, bokuka arebuk. Ara, minop talak, Raja Daud el babye bolamuk ninye on kama (tombak) ap, ‘Mal olan talak arye, opsicakʼ tenen, nong lelina ati bolamuk ning, el si ara perisai, weik ning ap, mitik ning ap, aning nirya bobuka, ayin talin nang, sik deiyok nang ati arebuk. Aninye on ning nirya ara, minop talak Raja Daud birye aning nirya, Allah si eren aik noutam, dokola deiamuka ati, atalak ara, imam Yoyada birye, aning dobuka, sik ayin deiyok nang ati arebuk.
Winibikopura, Raja Hizkia birye, Allah el si eren aik pum tam pil dona deiyok nang, sik imam-imam nang ap, tonda, sik pil melin nang, yuk Lewi yala nang ap, sik yuk-yuk bukni, sik yupa yuk-yuk pil dolamik touk bokdeibuk. Atonun ton, sik imam-imam nang babye, pil dolamik touk, sik yupa yuk-yuk bokdeibuk. Winibuka deice arye, sik imam nang ap, Lewi yala nang ap, sik yupa yuk-yuk tamubuka wibukce, sik pil don nang ati arebuk. Sik pil talebuka donamik ning ara ani. Ara, ‘Allah arye nun malye winin ning kilipnamsilʼ tenen, kam ning obuka, uku dongon ning ap, tonda ‘Allah ap, nun ap, dukdongobuka teleb unamapʼ tenen ati, Allah aren pil don nang ap, Allah el yupu keken talak pil don ning ap, bokuka arebuk. Tonda, Allah el si eren aik bublan dam arye, ‘Allah ati si erebuka kinamakʼ tenen, Allah ati si erebuka kin mot nyan ning ap, Allah ati, “Anda pia teleb ulyame,” nyabuka, el si eren yupu nyan ning ap, bokuka arebuk. Ara, Allah el si eren aik pum tam, tonda el aik bai tam, yuk-yuk pil don nang ap nirya ara, kintinip deibukce, “Winipnamlume, wininamlume,” nyabuka, anang ati, sik pil nirya, yuk-yuk bokuka arebuk.
Aning nirya akunum kintibikce, yupu deibikba, anyaik lipsisikuka don pil deiyok nang ara, ‘Anyaik teleb lipsisikuka dopnamakʼ tenen, wipdeiamik nang ara, pia teleb diksukumuk ulamikce, pil teleb kibuka dolamik. Tonda, sik anang ati kalikna deiyok nang ara, Lewi yala nang, dumbarye nang wipdeiamik. Sik anang si ara ani. Ara, Yahat ap, Obaja ap, sik anang ara, Merari birye deibukba, dadeipdanin yayik nang ati, Lewi yala nang ulamik. Tonda, Zakaria ap, Mesulam ap, sik anang ara Kehat yala nang arye diamik nang ulamik anya arye, sik babye Lewi yala nang ulamik.
Lewi yala nang bukni, ninye si Asaf birye deibukba, dadeipdanin yanamik nang, sikda mot nyana ati, alat musik, kitar ayala-yala nirya ara, kel weik nang ulamik. Anang ara, minop talak ulamuknye, Raja Daud birye wipdeibukce, nyabuk. “Anggunda asukum tikuka umunce, pil donamlume,” nyapdeiamukakuk ulamikce, pil dolamik. Anang ara ani. Ara, Asaf ap, Heman ap, tonda Yedutun, elda nabi kibuka, Raja dam ulamukce, Allah arye nyapdeiamuk yupu laka nyalamukba, Raja kekelamuk. Tonda, Allah el si eren aik, bublan dam pia kalikin nang ulamik. Sikda, Kaplina Kwalina sum ati, ‘Asukumuk unmamunce, bublan kalekuka, pil donamlume,’ nyapdeiamuk mutuku anyuk ulamikce, pil dolamik. Bukni, sik Lewi yala nanguk bukni, ton tam nang melipnaba, sik dipnamik ning ati kintinililamik.
Atalak ara, sik Lewi yala nang arye deipdanin yanamik nang, sik mot nyana kel bikamik nang nirya ara, anyaik dam unmek. Sik anang yala ara, Asaf ap Heman ap Yedutun ap, tonda sikce deiamikak, dadeipdanin yangalamik nang ap, sikda anyaik dam bukni, keting panalyangan tam unmekce dinmek. Sik tikmekak ara, kam ning opnarye, uku dalamikak, mesba dam tikuka dinmek. Sik ayala nang nirya ara, apil don nang ati, sik baju pia teleb namin ning, kain lenan ongolamik. Tonda imam-imam nang nirya arye, lelim len ning, kitar ap, simbal ap, kecapi ap, bopmekce onmekak, lelim weik arye lenmek. Tonda, imam-imam nang yuk kong ara, 120 nang arye, lelim len ning, terompet bopmekce pong-ponganmek.
Tonda, Salomo birye, el li koprop Daud birye, “Winibuka unamlyame,” nyapdeiamuk touk, Raja Salomo birye sik imam-imam nang ati, bulubuka yuk-yuk wibuka deibukce, “Sik aninye kong ara, atalak aryuk Allah el si eren aik pum tam pil donamlume. Ton ninye kong ara, yuk talak noutam arye punubuka apiluk donamlume,” nyapdeibukba, aninguk winilamik. Tonda, Allah Yahweh el si eren ati, mot sena ap, imam-imam nang pil dolamik ning melina ati ara, Salomo birye, sik Lewi yala nang arye deiamikak, deipdanin yangalamik nang, wibuka deiamukce, “Aninye kong ara, atalak pil donamlume, sik yuk bulubikura, anang punupmunyak arye, apiluk donamlume,” nyapdeibuk. Ati, sik imam nang aryuk, Allah si eren ati weklamik talak nirya ara, aLewi yala nanguk melilamik. Atonun ton, Allah Yahweh el aik bublan dam nirya melibuka Kalikna nang babye, sik kong yuk-yuk bokuka delilamuk touk, apiluk dolamik. Aning-aning nirya ara, Allah el amu tam ulamuk ninye deiyoknye, Raja Daud birye, “Winibuka unamlame,” nyapdeiamuk touk, Raja Salomo birye aninguk winilamuk.
Aning akunum winibikopura, Allah arye nyamukba, Musa birye sekeiamuk buku noutamak nyabuk touk, Allah el aik pum pil dona deiyok nang, sik imam nang wibuka, yupa yuk-yuk bokuka si sekeibik. Aning atonun sik melin nang ati, Lewi yala nang ton wibuka, yupa yuk-yuk bokuka, si sekeibik. Awinibik ning deiyok ara, aminyan talak Allah el si eren aik noutamak pil donamik ning ati, akunum kintinibik. Aning nirya ara, minop talak Musa birye, “Wininamlume,” nyapdeiamuk touk winibik.
Winibuka ulamikce, Mika el mi Matanya ap, Lewi yalanye ulamuk. Asaf el mi Sabdi ap, sikda Allah ati kanye debuka, mot nyana ap, Allah morona ap ati, deiyok nang kibuka ulamik. Sik anang arye, ‘Wininamabe,’ nyapne touk winilamik. Tonda aminyan wibiknye el si, Bakbukya bira, el kwit Syamua, el mi Abda ap, Yedutun birye deiamuknye Galal ap, sik uk dukdongobuka neika ulamik.
Allah el si eren aik, pil talibuka donamik ati, deiyok kibik nang, sik si ara ani. Asabya ap, Serebya ap, Yesua ap, Binuai ap, Kadmiel ap, sikce Lewi yala nang, sik bulubuka yuk-yuk ati deiyok kibik. Atalak ara, sik nirya arye, asum-asum unyak bitinye-bitinye kipdeibik. Ara, Allah el si eren aik noutam, el yupu keken talak, mot nyana ati, tonok bulubuka ton kibik. Tonda Allah ati, ‘Telebe,’ nyabuka, si erena ati, yuk bulubuka ton kibik. Sik bulubuka yuk-yuk ulamik touk kibuka, ayupu nyanmek. Akibik ning ara, min talak Allah el pil dolamuknye Raja Daud birye, ‘Aning ara, wininamlume,’ nyapdeiamuk touk, winibik.
Ura, “Yerusalem mutuku tuba tamubuka dobupu cang keil poka ati, kwalina yubuka, si erenamabe,” nyabuka, Nehemia birye Lewi yala deiyok nang ati, deiyok koubuk. Tonda, ayupu nyabuk. “Sik Lewi yala nang yuk-yuk aulamik touk, Yerusalem mutuku bulubuka yamunce, anggunce, ‘Winipnuyabe,’ nyabuka, winipnin bamunye touk, sik yuk ninye nirya, aninguk melibuka wininamake. Ara, Allah ati kanye deibuka, teleb nyan mot sena ati, nyan ning bung-bung ana, el si ara gambus ap, kecapi ap bobibirye, mot sebuka, si erebibirye, banamabe,” nyapdeibuk.
Anggun Israel nang nirya ara, kekepnululume! ‘Nun mal olan nang arye opsikcak’ tenen, kalekuka melisilirye, mikip aresulul Allah ati, nun nirya arye, el si erebuka, ‘Anda pia telebe,’ nyabuka, si erenamkiabe. Ara, nun apu koproba Yakub birye, si erelamuk Allah ati, nun babye, ‘Naio, anda pia telebe,’ nyabuka, kil-kil kanye bobuka, weik yupu deice arye nyanamabe.
Atalak ara, nara anye birye bobinuka, Allah el si eren aik wekelban bisik ati, cang keil arye deibuka domik aik noutam, kirikuka binumurye otam binuka deipnuke. Ara, Allah el si erena ati, aik mening dam bukni, lo mitik tonun, batakamik noutam bobinukce deipnuke. Asukum ara, cang keil arye deibuka domik aik lilun ara, mitikto aik bitinye wilibuka domik ning ton eipse. Tonok aik ara, dabu tam cang weik bisik wekelbalamik bisik bublan dam, dana-dana tam domik aik, el urasin ara, iknapnye tam (arah selatan) kiamik ning eipse. Bitinye aik ara, keting panalyangan tam, cang weik wekelbalamik bisik bublan dam bukni, anyaik el urasin ara, dabu tam (arah utara) domik aik awamukak, eipse.
Aning akunum winiminyopura, Saul an adiparyuk, Gibea mutuku noutam bukni, amutuku si ara, ‘Gibea mutuku dup, Allah el ning,’ nyalamak mutuku binamalyame. Amutuku noutam ara, ‘Nun mal olan nang yanamakʼ tenen, sik Pilistin mutuku nang arye, weik keil arye, weik asik domik. Aunyak mutuku noutamuk binamlyame. Amutuku noutam wekelban bisik bublan dam ara, sik nabi-nabi nang yupa weik, tonok mutuku dup, Allah el si erebuka kina ati, kam ning obuka, uku dongolbanmikce, koulukuka yangakiba, epdanamalume. Sik anabi-nabi nang nirya ara, mot nyanarye, bolamak ning, sik si gambus ap, erebana ap, bung-bung ana, el si seruling ap, kecapi ap bopmakirye, yupu weik tonun nyapnin yanganmak ning ap, mot sepnin yanganmak ning ap, aminyan winipnamle ning, lak nyapnamak ning ap, nirya ara, an eipnamalyame.
ကြော်ငြာတွေ